رواية معا للأبد الفصل السادس 6 بقلم آلاء سيد
رواية معا للأبد الجزء السادس
رواية معا للأبد البارت السادس
رواية معا للأبد الحلقة السادسة
صلي على من قال لا تؤذوني في عائشه❤🍁
ـــــــــــــــــــــــــــــــــــــــــــــــــــ
الساعه 11 بـ الليل وعد بتفتح باب شقتها بتعب وبتحاول ترسم عـ وشها ابتسامه هاديه حطت أكياس الأكل الي فـ ايديها عـ طربيزه صغيره واتوجهت لـ البلكونه وهي بتقول بمرح: ايه دا ياصفصف كل دا نوم
صفاء وهي بتقفل المصحف: نوم ايه يابت مـ انا صاحيه قدامك اهو “وكملت بحنان” هو انا اقدر يغمضلي جفن وانتي بره البيت
وعد وهي بتحضنه: ربنا يديمك ليا ياست الكل
صفاء: ويحفظك ليا ياضنايا واشوفك احلى عروسه قادر ياكريم
وعد:طب وليه السيره الغم دي عـ المسا “واكملت بمرح” قومي بقا دا انا جيبالك أكلة سمك إنما ايه تاكلي ايدك كلها وراها مش صوابعك بس
صفاء: وليه المصاريف دي كل شويه يابنتي انتي بتتعبي فـ الشغل حافظي عـ فلوسك وهتيلك بيهم حاجه فـ جهازك
وعد: بقولك ايه ياصفصف تعالي بس ناكل وبعدين نبقى نشوف الاسطوانه الحمضانه بتاع كل مره دي يلا علشان انا واقعه من الجوع صحيح اخدتي العلاج بتاعك ولا
صفاء بكذب: اه اه اخدتو
وعد بشك: تمام بس انتي اخدتي علاج السكر ولا القلب
صفاء بـ ارتباك: هو تحقيق ولا ايه
وعد بهدوء: ولا تحقيق ولا حاجه بس بطمن عليكي مش اكتر
صفاء: طب يلاا ناكل
وعد: هروح اغير وجايه
وعد خرجت من البلكونه وراحت المطبخ تشرب الأول لفت إنتباها علبة دوا مرميه فـ الباسكت مسكتها لقت انه دوا القلب بتاع صفاء خرجت وراحت أوضة صفاء مسكت أكياس العلاج لقت إن فيه نوعين كمان من العلاج ناقصين خرجت وهي ماسكه فـ ايدها إكياس العلاج والعلب الفاضيه وفـ نفس الوقت كانت صفاء دخلت من البلكونه لقت وعد بتبصلها بدموع متحجره وأردفت: هو انتي ليه مُصره تعذبيني معاكي لما العلاج خلص مجبتيش غيره ليه…. طب ليه مقولتليش وانا جبتهولك
صفاء بحزن: مكنتش عايزه اقولك علشان عارفه انو ملهوش لازمه غير اني ازود الحمل عليكي ومش هيمنع قضاء ربنا لما يجي
وعد: ياستي هو انا اشتكتلك؟؟!! قربت منها بعد مـَ حطت العلاج عـ جنب وهي بتمسك ايديها وبتقول برجاء: يا أمي علشان خاطري اهتمي بعلاجك علشاني علشان أنا مليش حد غيرك مُش مستعده أخسرك انتي الي بقيالي فـ الدنيا دي
صفاء حضنتها بدموع وسكتت دقايق مرت وهمَ عـ نفس الوضع لحد مـَ خرجت وعد من حضن صفاء وهي بتقول: هنزل أنا دلوقتي أجيب الدوا بسرعه وجايه
صفاء: ملهوش لزوم يا وعد
وعد: بالله عليكي يا أمي ريحيني
صفاء: طب اقولك تعالي ناكل وارتاحي انتي تعبانه اليوم كله وانا هبقى اجيبو الصبح
وعد بعند: لا هنزل اجيبو دلوقتي وهتاخديه وبعدين ناكل وانا زي الفل يلا سلام عليكم
قالت كدا وهي بتعدل طرحتها وتاخد فلوس زياده واسامي علب العلاج الفاضيه وفـ طريقها لـ باب الشقه ومنه لـ الصيدليه ردت عليها صفاء بتنهيده حزن وهيَ بتقول: وعليكم السلام ورحمة الله وبركاته
وصلت وعد الصيدليه وهي بتُلقي السلام عـ الدكتور الكبير الي واقف
وعد: سلام عليكم يادكتور عامل ايه
الدكتور بود: وعليكم السلام ورحمة الله وبركاته انا الحمد لله ياوعد يابنتي اخبارك
وعد: الحمد لله كُنت عايزه العلاج دا
قالت كدا وهي بتقوله اسامي العلاج وهو جاب نوعين بس وأردف: بصي يابنتي دول النوعين الي عندي النوع التالت دا مش نازل السوق بس ممكن تلاقيه فـ صيدلية ابو حمدي علشان هو بيجيب انواع كتير ويخزنها
وعد اتنهدت بضيق وهي مش عايزه تروح هناك بس مُجبره صحة والدتها أهم بصت لـ الدكتور وهي بتقول: تمام يادكتور كدا الحساب كام
الدكتور: خلي عنك خالص دا انتي زي بنتي تمام
وعد: تسلم يادكتور بس قولي الحساب كام
بعد وقت كانت وعد أخدت العلاج ودفعت الحساب وفـ طريقها لـ الصيدليه التانيه وصلت واتنفست بـ ارتياح وهي شايفه الي واقف يبقى ابو حمدي مش حمدي قالتلو عـ اسم العلاج وكان موجود فعلاً اخدته وحاسبت وروحت
ــــــــــــــــــــلا إله إلا اللهــــــــــــــــــ
مالك رجع شقته وهو مُنهك من الشغل وخصوصاً ان كان عندو تدريب للدفعه الجديده رمى مفاتيحه ودخل اخد شاور وبيعمل فنجان او نقدر نقول شوب قهوه اخدو وطلع البلكونه وهو حاطط الهيد فون وبيسمع قصيده أبويا السند والضهر الي مبيملش لـ فارس قطريه…. استرجع ذكرياته مع والده الي أغلبها كان قاسي
Flash Back
لحظة ظهور نتيجة الثانويه العامه وفرحة مالك الكبيره لما جاب 98٠9٪ وإنو أخيراً هيحقق حلمه وهيدخل هندسه معماري بس الي قلب فرحته لـ حزن
نصر والده بسخريه: هندسة ايه الي عايز تدخلها ان شاء الله
مالك: يا بابا دا حلمي من زمان وحضرتك عارف
نصر: بلا حلم بلا كلام فاضي انا هقدملك فـ شرطه
مالك: مش حببها ومش عيزها أنا تعبت السنين الي فاتت دي كلها علشان ادخل كلية هندسه الي بحلم بيها ليل نهار وحضرتك تقولي شرطه
قلم قوي نزل عـ وش مالك من قوته وشه اتعدل لـ الناحية التانيه بيبص بصدمه لـ والده ونصر بيبادله بـ جمود وهو بيقول: شرطه الي مش عجباك دي هي الي انا شغال بيها وبصرف عليك منها وأخر كلام عندي ياتدخل كلية شرطه لإما لا انتَ ابني ولا اعرفك ولا تحضر جنازتي يوم مـ اموت
Back
خرجت منو تنهيدة موجوعه وحزينه وهو بيرجع يفتكر موقف تاني
Flash back
طفل عنده 7 سنين مربوط فـ السرير جوه أوضه ضالمه وبيصرخ الباب انفتح بهمجيه وبنبره حاده: فـ ايه صداع صداع صداع مش عارف اتخمد منك
مالك بـ بكاء: أرجوك ولع النور أنا بخاف
نصر بحده: اخرص ومش عايز اسمع صوتك انت ابن نصر الشرقاوي كلمة بخاف دي مسمعهاش منك أبداً
مالك بـ بكاء: طب أرجوك فُكني وأنا والله مش هعمل حاجه تزعلك خالص
نصر مردش عليه وخرج تاني وسط بُكاء مالك
Back
اتنهد بـ حزن وهو بيسمع باقي القصيده وبيشرب القهوع وعيونه بتبص لـ تحت بلامباله قطع إختلائه بـ نفسه صوت بنت جاي من البلكونه الي جمبه بتقول بمرح: ازيك ياحضرة الظابط
مالك بهدوء: ازيك ياتقى عامله ايه ومامتك عامله ايه
تقى بزعل مصطنع: عــ أساس إنك بتسأل يعني
مالك بضحك مصطنع: اه هندخل بقى فـ بتسأل ومبتسألش قولي عايزه ايه من الاخر
تقى بـ لماضه: بتبقى عسل يا أبيه وانتَ فهمني
مالك: اممم قولي الموضوع علطول
تقى: احم بص في رحله المدرسه عملاها هنروح فيها الأقصر وأسوان ونشوف المعابد والأثار وكدا يعني
مالك: اممم وبعدين
تقى: شوف هي رحله مفيده جداا جداا جداا بس مرات عمك مش راضيه
مالك: وانا كمان مش راضي خلي بالك من مذاكرتك وبعدين انتي لسه صغيره مينفعش تسافري لوحدك وكمان محافظه بعيده كدا بينا وبينها 5 او 6 ساعات عـ الاقل
تقى بغيظ: عفكره انا مش صغيره انا عندي 15 سنه وبعدين مش هسافر لوحدي هيبقى معايا اصحابي والمدرسين وكدا
مالك بـ استفزاز وهو بيقلدها: وكدا
تقى بغيظ: ابيه بقى
مالك: لاء يعني لاء ياتقى الموضوع منتهي
تقى بعيون القطط: طب لو قولت علشان خاطري
مالك بـ رخامه: برضو لاء
تقى بحزن: خلاص مش عايزه حاجه
مالك: مـ تعوزيش أنا الغلطان اني كنت هفضي نفسي فـ يوم و أوديكي كل الاماكن الي عيزاها
تقى بفرحه: بجد طب احلف كدا
مالك بضحك: هبله بس بجد وجد الجد كمان هفضي نفسي فـ يوم واخدك انتي ومامتك ونقضي اليوم كله بره
تقى بفرحه: أحلى أبيه فـ الكون كله يعيش مالك يعيش
ــــــــــــــلاحول ولا قوة الا بالله العلي العظيمـــــــــــ
فرح وهي بتكلم أحمد عـ الفون: ايه يابني مش ناوي تيجي بقى
أحمد: بس يابت مش ناقص صداعك قولت جاي
فرح: طب فينك دلوقتي
أحمد: جاي فـ السكه
فرح: امممم طب بص وانتَ جاي عدي عـ السوبر ماركت وها
أحمد بمقاطعه: استني في سوبر ماركت قصادي اهو هركن العربيه ولما ادخل ابقي قولي الي عيزاه
فرح: ماشي
بعد دقايق
أحمد: هااا ارغي عايزه ايه
فرح: انتَ فـ انهي قسم دلوقتي
أحمد: الألبان
فرح: طب هات 7 او 8 علب زبادي فراوله
أحمد: 7 او 8 علب ليه يختي
فرح: الله انتَ هتبصلي فـ اللقمه ايه الأخ دا
أحمد: أخ فيك بعيد عنك
فرح: ࢪبنا يجازيني خير اني مستحملاك
أحمد بغيظ: يعيني عليكي وانتي عامله نفسك ملاك
فرح بمرح: ربنا يحفظني من الحاقدشين
أحمد: طب اخلصي يختي وقولي عايزه ايه تاني احسن امشي ومجبش حاجه
فرح: تمشي ايه ياحوكش دا انت حبيبي
أحمد: اممم طب اخلصي وقولي
فرح: روح قسم الشيبسيهات
أحمد: اهاا وبعدين
فرح: هات 6 تايجر من الكبير و8شيكا و
أحمد: فرح انتي عازمه حد يابابا ولا ايه
فرح: احم لاء بس اصل انا مشيت الداده قبل مـ تعمل عشا وكدا وانا مكسله اقوم فـ انتَ زي الشاطر هتجيب معاك شويه سناكس وكدا ونعملهم ساندويتشات وناكل
“انا ومحمد اخويا علطول كل لما ابقى مكسله اعمل اكل وماما مش هنا اخليّ يجيب سناكس ونعملها ساندويتشات وناكل يممممم😂”
أحمد: طب مـ تقولي كدا من بدري اقفلي اقفلي وانا هظبطك
فرح: احلى حوكش اساسا
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية معا للأبد)
