رواية ليه يا زمن الفصل السادس والأربعون 46 بقلم نسرين بلعليجي
رواية ليه يا زمن الجزء السادس والأربعون
رواية ليه يا زمن البارت السادس والأربعون
رواية ليه يا زمن الحلقة السادسة والأربعون
بعد سنه…..
في شقه نوال.
المعلم مش قادر ياخذ نفسه.
نوال : فيك إيه يا معلم ؟؟
المعلم : هاتيلي الدوا بسرعه.
نوال : حاضر يا خويا.
آه يا غلبي ياني، كل ماتيجي عندي تبقى في الحاله دي.
راحت جابت ليه بخاخ الحساسيه، المعلم مابقاش قادر ياخذ نفسه، أخذ البخاخ و حاول ينام.
نوال طلعت بره تندب حظها. 😔
نوال : آه على حظي، المعلم كان حصان إيه اللي حصل ليه؟ بقى يتعب شكله عجز. لا لا البت فرهدته ، أخذت كل قوته.
آه يا غلبي، بقى بنت امبارح يبقى ليها شقه، و محل كوافير، وانا لأ. ولما افتح بؤي يقولي إحمدي ربنا على اللي انت فيه.
المعلم حس إن رجولته إتهانت، وقرر يروح للدكتور.
رحمه اتعالجت شويه، ابتدت تتكلم كويس، و عملت عمليه ولسه مستمره على العلاج الطبيعي.
دخلت لها فرح الاوضه..
فرح : إزيك يا أحلى أم في الدنيا؟
رحمه : أهلا يا حبيبتي.
فرح : أخبارك إيه النهارده؟
رحمه : الحمدلله، بس البت بتاعت العلاج الطبيعي إيديها ثقيله شويه، أول ما تخلص رجليا بيوجعوني. وأنا تعبت من إني آخذ مسكن، معدتي مابقتش مستحمله كثر الأدوية.
فرح : هانت يا ماما.
رحمه : مش آن الأوان تروحي بيت جوزك.
فرح : واسيبك يا ماما ؟؟
رحمه : ما الممرضه معايا على طول. يا بنتي مراد بيحبك، و استحمل كثير علشانك، و خاصم أهله.
فرح : أقولك يا ماما؟ في حاجه جوايا مكسوره مش عارفه إيه هي.
رحمه : جوازك منه مكانش سهل، و رفض أهله مخوفك. انا مش عارفه حماكي ماله؟ عمري ما انسى يوم ماجا عندي يقولي خلينا نخرج بالمعروف، و اقنعي بنتك تطلب الطلاق.
فرح : وانا مش هنسى إنك خبيتي عليا ده، لولا حمايا عايرني بيها.
رحمه : إنت أصلا بتتلككي تطلقي. وأنا شايفه إن أبوه مفتري ومالقاش راجل يوقف له 😒.
فرح : أظن علي تدخل وراح كلمه.
رحمه : قولي راح هدده يبعد عنك، و الراجل أخذ مراته و سافر. أخوك بقى راجل ثاني، مش إبني اللي انا عرفاه.
فرح : كله من زهره، دي قلبت حياتنا. لا وهي عايشه حياتها، وكتب لها الشقه و اشترى لها محل الكوافير اللي غيرته كله، وكمان مسكها محل الذهب.
رحمه : كل واحد بياخذ نصيبه، مكانش نصيبها مع أخوكي.
فرح : و ليه أخويا يقع نصيبه مع وحده مقرفه بجد؟ بتبص لنا من فوق كإنها مش طايقانا. دي زارتك مرتين من ساعة ما اتجوزها.
رحمه : ما هي دي الحقيقه، هي مش عايزانا. ده هو بقى يزورني زي الضيف.
فرح : بس إنت اتغيرتي عليه، و مش بترضي تاخذي فلوسه.
رحمه : علشان فلوسه مش حلال، ومش عايزه أتكلم في الموضوع ده.
إحساسي عمره ما يكدب، أخوكي راح لعالم مش بتاعنا.
فرح : ياه يا ماما! إيه اللي مخليكي متأكده كده من كلامك ؟ ما مراد شغال معاه، والمكتب باسم الله ماشاء الله شغال كويس.
رحمه : أنا مش بتكلم على شغل المكتب، أخوكي سفرياته كترت، و فلوس الحرام جريت في إيديه
فرح : يا ماما هو اتكلم معاكي كثير، وانت مش عايزه تصدقي.
رحمه : حلفته فوق المصحف و مارضيش يحلف، إتهرب مني وعمل نفسه وراه ميعاد .
سماح راحت عند سيف….
سيف : خير كل شويه تتصلي، عايزه إيه؟؟
سماح : أنا حامل.
سيف قام من مكانه..
سيف : نعم ياختي!!
سماح : أنا حامل، لسه جايه من عند الدكتوره حالا.
سيف : وجايه عندي ببلوتك دي ليه؟ قالوا لكي إني دكتور نساء وانا معرفش؟
سماح : كفايه من أسلوبك ده، بقولك حامل في إبنك.
سيف ضحك ضحكه مستفزه..
سيف : و مين قالك إنه إبني؟ هو انت ناسيه إنت روحتي مع كام راجل؟
سماح : بقالي فتره منزلتش الشغل وبقابلك إنت بس .
سيف : آه! و قلتي إنه إبني أنا ؟
روحي يا شاطره شوفيلك حد تاني غيري 😏
سماح : إنت إيه يا أخي؟ شيطان؟ مش كفايه إنك استغلتني وشغلتني زي ما انت عايز؟ ودلوقتي بتقولي شوفيلك حد تاني ؟
سيف : بقولك إيه يا حلوه، وقتك خلص، و خلاص الزباين قرفت منك. مش عايز اشوف وشك هنا ثاني
سماح بهيستريه..
سماح : مش بمزاجك تعمل كده. فيه ورقه بينا، وأنا مراتك واللي في بطني ده إبنك، ولازم تلاقي حل معايا. و إوعى تقولي نزليه، الدكتوره قالت إنه في خطر على حياتي.
سيف : أحسن برده، أخلص منكم انتم الاثنين. يلا من هنا عكرتي مزاجي. و بخصوص الورقه اللي بينا قطعتها من زمان، وأصلا عمري ما اتجوزتك، دا كان لعب عيال. و يوم ما اقول يا جواز ، مش هتجوز وحده رخيصه زيك.
سماح اتجننت…
سماح : آه يا واطي يا كلب، ضحكت عليا 🙄و اوهمتني إنك بتحبني؟.
سيف : أنا مش بتاع حب. يلا غوري من هنا.
و هو نازل السلم ، سماح جريت وراه و زقته بكل قوتها و وقعته . هو صرخ جامد ، نزلت السلم لاقته غرقان دم . طلعت من الباب اللي ورا الفيلا بتجري لا حد يشوفها.
بعد غياب طويل….
نرمين رجعت مصر مع وائل ، وطارق راح يجيبهم من المطار مع شويكار .
Nisrine Bellaajili
طارق : حمدالله على السلامه .
وائل : الله يسلمك.
نرمين أول ماشافت طارق قلبها إبتدا يضرب جامد ، و وشها بقى أحمر .
شويكار حست بيها..
شويكار : مالك يا حبيبتي؟
نرمين : دايخه شويه .
وائل : معلش يا حبيبتي السفر كان طويل عليكي .
طارق : يلا نركب .
طارق كان بيحاول يبعد نظراته عن نرمين ، واتأكد انها لسه بتحبه ، و صعب عليه وائل ، شايفه راجل كويس و محترم .
نرمين أول ما وصلت بيتهم ، دخلت الأوضه بتاعتها ، قفلت الباب وابتدت تعيط . قلبها كان واجعها أوي .
طارق أخذ أمه و بنته ، و هما راجعين..
طارق : عاجبك كده؟
حنان : هو في إيه؟
طارق : في إن الهانم لسه بتفكر فيا و هي على ذمة راجل ثاني ؟
حنان : بيتهيألك . هي مبسوطه مع جوزها و شكلها حامل .
طارق : أتمنى ده ، لأن جوزها باين عليه إبن ناس و محترم .
حنان : ربنا يهدي سرها .
زهره عدت على محل المعلم وشافت كريم فاتح الخزنه .
زهره : بتعمل إيه عندك ؟
كريم اتخض ، بس حاول مايبينش .
كريم : هكون باعمل إيه يعني ؟ بحط الفلوس في الخزنه .
زهره : قول بتسرق الفلوس من الخزنه !
كريم : أسرق؟ دا مالي على فكره . هو إنت فكرتي نفسك بقيتي الكل في الكل؟
زهره : رجع الفلوس مكانها .
كريم : إنت مين أصلا اللي تديني الاوامر؟
زهره : و الله روح اسأل أبوك أنا مين ؟
حط الفلوس مكانها لأن الكاميرات جابتك ، و دي مش أول مره تسرق .
كريم : تاني هتقولي اسرق ؟ دا حقي اللي انت بتلهفيه دا انت عملتي منه محل كوافير، و دلوقتي بتجهزي محل ملابس.
زهره : مش هفضل أتكلم مع عيل بتاع مزاجه ، لو أبوك عرف منك ليه . من غير سلام عليكم..
و راحت على بيتها..
أما كريم أخد الفلوس و طلع من المحل. راح عند امه .
روايات Nisrine Bellaajili
نوال : في إيه؟ بتخبط الباب كده ليه؟ وفين مفاتيحك؟
كريم : أوف، نسيتهم في المحل .
نوال : متزربن كده ليه؟
كريم : من اللي اسمها زهرة. جت المحل، و قال إيه ؟ إقفل الخزنه إنت بتسرق أبوك.
نوال : يا لهوي يالهوي! هي حصلت تتهمك بالسرقه؟
كريم : زهره ست ذكيه مش زيك، ماعرفتيش تطلعي منه بحاج ؟
نوال : أكيد سحراله، ما هو مش معقول يسلمها كل حاجه كده ؟ يا ترى بتعمله إيه انا مش بعمله؟
كريم : عملت لنفسها قيمه، علشان كده حطها فوق دماغه.
نوال : قصدك إيه يا ولا؟
كريم : مش قصدي حاجه، سيبيني أخش اريح شويه.
سماح هنا ولا برة ؟
نوال : دي بايته عند صاحبتها.
كريم : بنتك اتغيرت كثير.
نوال : يوووووووه بقى، سيب اختك في حالها.
سميره كانت بتذاكر مع ولاد ها لحد ما دخل محمد جوزها.
محمد : السلام عليكم.
سميره : وعليكم السلام ، إتأخرت كده ليه ؟
محمد : حطيلي العشاء على ماآخد دوش و اخلص و احكيلك .
راحت سميره المطبخ و هي بتفكر إن جوزها بقى بيتأخر في الشغل الأيام دي، والفار ابتدا يلعب في عبها.
خلصت، وحطت الأكل على السفره وهي مستنيه على نار. محمد خلص وراح عندها، وابتدا ياكل.
محمد : ماتقومي تنيمي العيال.
سميره : إحكيلي الأول في إيه؟
محمد : هو في إيه؟ عايز اكل على راحتي، أنا راجع تعبان من الشغل وانت قاعده لي كده بتبصيلي في اللقمة .
سميره : أنا ؟
محمد : قومي شوفي وراكي إيه ؟
سميره قامت مقموصه، نيمت العيال و راحت أوضتها .
محمد خلص ودخل شافها نايمه.
محمد : مش هتقومي تلمي السفره و تغسلي المواعين؟؟
سميره : حاضر.
قامت وهي بتخبط الأرض برجليها. خلصت و رجعت الأوضه لاقته نايم .
سميره : لا بقى، مش تقولي احكيلك و تنام ؟ إصحى يا خويا كده وصحصح معايا.
محمد : الصباح رباح ، و الله تعبان .
سميره : لأ، مش قادره استنى لحد الصبح .
محمد : أقولك إيه ؟ إنه كان في عركه بين مرات أبوكي و أخوكي كريم.
سميره : عركه ازاي؟ و المعلم كان فين ؟
محمد : المعلم بقاله فتره بيغيب عن المحلات، و زهره بقت هي اللي ماسكه الشغل . جت المحل عندنا و شافت أخوكي فاتح الخزنه و مطلع مبلغ كبير ، قالته رجع الفلوس مارضيش .
روايات نسرين بلعجيلي Nisrine Bellaajili
سميره : وهي مالها ؟ المال مال ابونا يجوا الغورب يطردونا ؟
محمد : على فكره ، هي عندها حق. أخوكي بياخد مبالغ كبيره، و كلها بتروح علي المزاج .
سميره : قصدك إيه إني أخويا حرامي؟؟
محمد : والله لو من ورا المعلم يبقى حرامي .
سميره اتنرفزت..
سميره : لا بقى، هو إنت جاي على أخويا علشان خاطر السنيورة ؟ علشان كده بقيت تتأخر في الشغل حالك مبقاش يسر لا عدو ولا حبيب.
محمد : حاسبي على كلامك يا سميره لا تندمي.
سميره : إنت اللي حاسب على كلامك، اللي بتتكلم عليه ده أخويا و صاحب المال . وزهره دي و انت اللي غربا في المكان .
محمد : هي بقت كده؟
سميره : أيوه يا محمد. إنت لازم تيجي في صف كريم ، مش في صف العقربه اللي سودت عيشتنا و كسرت قلب أخويا و سببت الشلل لأمي .
محمد : لو أخوكي كان راجل، كان اتجوز زهره اللي فضل يضحك عليها سنين، لحد ما أبوكي حط عينه عليها و اتجوزها غصب. فوقي يا سميره لنفسك. زهره مش عقربه، بس هي ضحيه أخوكي و أبوكي . فا ماتجيش دلوقتي تتكلمي عليها . على الأقل هي وقفت جنب أبوكي في أزمته لما كان تعبان ، و مسكت المحلات. و الشهاده لله، دخلت إيرادات حلوه ، وبتخاف على مال أبوكي ، و بتبعت لكم كل شهر حصتكم. المعلم معملش كده معاكم. وعايزاني أدافع على أخوكي ؟ لا يا بنت الناس، مش هدافع على حرامي و مدمن مخدرات، سيرة أخوكي بقت على كل لسان في الحاره.
و لولا زهره بتستر عليه، الله أعلم كان حصله إيه. لأن أبوكي شك إن الفلوس بتنقص، و هي بنت ناس كانت بترجعها بطريقتها، و انا شاهد على كده . وباقولك إيه مش رايح المحلات ثاني ، خيرا تعمل شرا تلقى .
قال غريب قال…
سميره : لا لا، شكل البت عاجباك.
محمد : هي وصلت لكده؟؟
أيوه عجباني شخصيتها ، إزاي عرفت تعيش مع أبوكي و نسوانه ؟
وعرفت تأمن مستقبلها ، و بتشتغل بما يرضي الله. دا المعلم مابقاش يعمل خطوه الا بشورتها، و كمان البنت أخلاقها عاليه جدا، غير انها حلوه. إبقي خلي عندك دم و خليكي زيها.
و أخذ المخده و طلع ينام بره.
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ليه يا زمن)
