رواية ليه يا زمن الفصل الرابع عشر 14 بقلم نسرين بلعليجي
رواية ليه يا زمن الجزء الرابع عشر
رواية ليه يا زمن البارت الرابع عشر
رواية ليه يا زمن الحلقة الرابعة عشر
محمد قعد على الكرسي مصدوم…
محمد: يا فضحتك يا محمد، يا خيبتك السودا.
زهرة : في إيه يا با؟ هو إنت صدقت الوليه الخرفانه؟!
محمد: إنت مش سامعه بتقول إيه؟
زهرة : كذب يا با، هو انت مش عارف تربيتك لينا ؟ ماتتكلمي يا ما ساكته ليه؟؟
جات وحدة عامله نفسها دكتوره، جملات اتفقت معاها…
الدكتورة : انتوا أهل المريضة إلى جوه؟
فاطمه: آه، هي فين؟
الدكتورة : في الإفاقة لسه طالعة من العملية.
زهرة : ممكن نعرف حالتها بالظبط، وعايزين تقرير لو سمحت لأننا عايزين نبلغ على الاعتداء إلى حصل ليها.
الدكتوره : إعتداء إيه؟؟
زهرة : حالة الاغتصاب إلى حصلت ليها.
الدكتورة : مين الي قال لحضرتك انها جات في حالة اغتصاب؟
زهرة : طب عملية إيه الي عملت ؟؟
الدكتورة اتوثرت.
الدكتورة : جالها نزيف بس مش من الاغتصاب، بس كشفنا عليها ومكانتش علاقتها لأول مرة. ومن أم العريس فهمنا إنها كانت دخلتها ومكانتش عايزة جوزها يلمسها. هو دا الي حصل.
زهرة : دفعولك كام علشان تقولي الكلمتين دول ؟
الدكتورة : ماسمحش ليك إنك تتكلمي معاي كده. وبعدين انزلوا ادفعوا الحساب.
محمد : لا حول ولا قوه الا بالله العلي العظيم.
فاطمة : خليني ادخل اطمن على البنت.
زهرة : مش هي جايه في ضرب واعتداء؟ ليه مابلغتوش البوليس؟
الدكتورة : عايزه تبلغي بلغي، بس فكري في سمعة اختك.
ومشيت و سابتهم..
زهرة : دي مش دكتورة، هما عاملين علينا التمثيلية دي علشان مانبلغش. إوعى يا با تسامح في حق بنتك.
بعد ساعة وداد صحيت وبتعيط من الي حصل ليها. أول ما شافت زهرة حضنتها وحكت ليهم الي حصل.
محمد: ماحدش حايصدق الي بتقوليه دا.
زهرة : ليه يا با كده؟ في طب شرعي يأكد كلامنا.
محمد: كل الي هنا بيقولوا نفس الكلام.
زهرة : إحنا ناخذها اي دكتور ثاني.
جات الممرضة تبلغهم إنهم ينزلوا الحسابات.
في شقة عماد…
دخلت امه و اخواته البنات…
عماد: أومال وداد فين؟؟؟
جملات : إنت ليك عين تسأل عليها بعد الي عملته فيها؟!!
عماد : هي الي كانت بتدلع، انا ماعملتش حاجة.
بطه: لا عملت. البنت عملت عملية وحالتها وحشة واختها عايزه تبلغ البوليس.
عماد: بوليس؟!!
جملات : ايوه البوليس. اتخضيت يعني!!
عماد : وليه البوليس بس؟؟
عواطف : هو انت كنت شارب حاجة ؟؟!
عماد : دي بس سيجارة بعتهالي عرابي لزوم الواجب.
جملات : يا خبتك الثقيلة في ابنك يا جملات. واجب إيه يا ابو واجب؟؟ هو انت ناقص قلة عقل؟احنا في نصيبة. البت اختها مش عايزة تسكت. حتى التمرجية الي اديتها قرشين تمثل عليهم إنها دكتورة، خافت وقالت إن البت عينيها بجحة.
بطه: بس شكل ابوها خاف من كلامك وصدقه.
عواطف : على فكرة الموضوع خطير. أي دكتور ممكن يكشف عليها ويعرف الي حصل. دي أي ممرضة ممكن تقول على الي حصل. وماتنسيش يا ما إن كل شوية بيغيروا نبطشيات.
جملات : مصاريف المستشفى والعملية غالية مش حايقدروا عليها، وانا وصيت بتاع الحسابات يضغط عليهم و اديته قرشين.
سامع يا ابن بطني؟ قاعدة بوزع في فلوس يمين و شمال علشان الم من وراك.
عماد: خلاص يا ما حانعمل إيه؟
عواطف : العمل عمل ربنا، دي أكيد حاتطلب الطلاق. الحمدالله مش كاتبين مؤخر صداق كبير، هي ملاليم.
عماد: طلاق؟! هو انا لحقت اتجوز علشان اطلق.
بقلم Nisrine Bellaajili
جملات : اسمع يا ولا، لو حد سأل قل انها ماطلعتش بنت بنوت وانت الدم غلي في عروقك وضربتها.
قومي انت وهي غيروا مفارش السرير. يلا فزوا قوموا.
محمد بعد ما طلع من مكتب الحسابات قعد على الأرض مش عارف يعمل إيه ولا إيه، وقام طلع من المستشفى.
زهرة قررت تتصل بعلي..
زهرة : ايوه يا علي.
علي: حرام عليك يا زهرة، ليه تعملي في كده؟ ليه ماترديش علي؟
زهرة : معلش اصلي في المستشفى.
علي: خير يا حبيبتي فيك حاجة؟ آجي عندك ؟
زهرة : ماينفعش تيجي، اختي الي تعبانة.
علي : تعبانة ازاي؟!!
زهرة : الحيوان اغتصبها و ضربها وعملت عملية. وامه بتتهم اختي في شرفها علشان مانبلغش البوليس.
علي: هو كل دا حصل ولسه مابلغتوش؟
زهرة : يا علي انا لوحدي، أبويا و امي خايفين من الفضائح. الست المفترية محرضة كل الناس الي هنا يقولوا نفس الكلام.
علي: اسمعي يا زهرة، لازم تبلغوا. إوعي تسكتوا عن حقها، وانا الي حدافع عنها، ولازم تطلق منه، دا مستحيل تعيش معاه ثاني.
حاجي أخدك ونروح القسم نبلغ.
زهرة : المشكلة التقرير الي عندي بقول عكس الكلام، ومختوم من دكتور.
علي : حتى لو في ضرب وتعدي واي دكتور حايعرف يكشف عليها. أنا طالع من المكتب قوليلي اسم المستشفى. أول ما اوصل ارن عليك تطلعي عندي.
رجعت زهرة غرفة وداد الي لسه بتعيط…
وداد : انا مش عايزة ارجع عنده يا ما.
فاطمة : يا لهوي!! إنت عايزة الناس تاكل وشنا، ويبقي كلام حماتك صح.
قولي يا بت هو ضحك عليك؟؟
وداد : إنت بتقولي إيه يا ما؟؟ هو انا أصلا كنت بروح عنده ولا بقابله من وراكم؟ ما كل حاجة على يدك.
فاطمة : برج من نفوخي حايطير، عمل كده ليه؟ إوعي يا بت تكوني منعت نفسك عنه وهو ماقدرش يصبر؟؟
زهرة : جرا إيه يا ما؟؟ إيه الي بتقوليه دا؟ بدل ما تاخذي حقها تقطميها. حتى لو منعت نفسها عنه ماينفعش يعمل الي عمله.
فاطمة : أبوك فين؟
زهرة : راح الحسابات.
فاطمة : اه يا ناري على حرقة قلبي. حانجيب الفلوس منين علشان ندفع حق المستشفى دي.
وداد ابتدت تعيط وهي شايفه امها كده.
وزهرة لسه متردده تعمل إيه ؟!
اما محمد راح عند المعلم في المحل…
محمد : سلام عليكم يا معلم.
المعلم : وعليكم السلام يا ابو العروسة.
محمد : معلش يا معلم كنت عايزك في خدمة كده.
المعلم : خير في حاجة ؟؟
محمد : مش عارف اقول إيه ! البت وداد في المستشفى بعد ما اتعدا عليها جوزها في ليلة دخلتها، وسابوها مرمية هناك، وانا مش معاي فلوس أدفع المصاريف، و الولية حماتها باطلع كلام والله يا معلم بنتي بريئة.
المعلم: من غير حلفان انا مصدقك. العريس مش تمام، دا كان واضح وباين في الفرح، الكل استغرب ازاي أخذها وسط المعازيم والفرح شغال.
يلا نروح نشوف حانعمل إيه ؟ بلغت ولا لسه؟
محمد : الوليه هددتني لو بلغت حاطلع سمعة وحشة على بنتي، وانا عندي زهرة على وش جواز.
المعلم: خير بإذن الله…
في مكتب طارق كان قاعد ومستني حد على نار…
طارق: اتأخرت كده ليه؟؟
باسم: في إيه يا طارق؟ يادوب مسافة السكة.
طارق : فين الفيديو؟ عايز اشوفه.
باسم : في الفلاشة دي.
طارق أخذ الفلاشة حطها على جهاز الكمبيوتر الخاص.
طارق : اووووووبا إيه دا ؟
باسم: غراميات يا صاحبي.
طارق : ماكنتش عارف إنه غلبوص كده.
باسم : الحب يا صاحبي بيعمل العجائب. قلي ناوي على إيه؟؟
طارق : كل خير إن شاء الله.
علي وصل المستشفى واتصل على زهرة وهي طلعت عنده، وراحوا القسم عملت بلاغ عند واحد معرفة لعلي.
وهما راجعين علي وقف العربية.
زهرة : وقفت العربية ليه؟
علي : اهدي يا زهرة، عايز بس اتكلم معاك شوية.
زهرة : لو سمحت رجعني بسرعة المستشفى مش عايزة مشاكل مع أهلي.
علي : زهرة، أنا بجد آسف على امبارح، ماحستش بنفسي والله، حقك علي.
زهرة : ليه يا علي !؟ انت بقالك فترة متغير معاي.
علي : لأني مابقتش قادر اصبر اكثر من كده. نطمن على اختك واجي اتقدم ليك.
بقلم نسرين بلعجيلي
زهرة : احنا في إيه ولا إيه؟!؟ أهلي وراهم مشكلة كبيرة وفضيحة ما يعلم بيها إلا ربنا.
علي : مافيش مشاكل ولا حاجة، انت سمعت الضابط إنه حايحقق في القضية، وحايسأل الدكتورة الي كشفت عليها أول مرة والي عملوا ليها العملية، وكمان حايعرضوها بكره للطب الشرعي، يعني اطمني.
زهرة : ربنا يستر.
الوقت الي علي وصل زهرة المستشفى كان المعلم واقف مع محمد بيتكلموا بعد ما دفعوا حساب المستشفى.
هايدي كانت بتتصل وعلي مش عايز يرد.
زهرة : مين الي بيتصل بيك ؟؟
علي : المكتب، أكيد في حاجة ضروري. انزلي إنت وابقي طمنيني.
نزلت زهرة، وهي داخلة قابلت أبوها والمعلم.
محمد: كنت فين يا بت؟؟
زهرة : سلام عليكم.
المعلم : وعليكم السلام
محمد : ردي علي كنت فين؟؟
زهرة : رحت اعمل محضر باللي حصل.
محمد : ياخبتك القوية يا محمد. فضحتيني وفضحت اختك حرام عليك. أنا كنت رايح أنا والمعلم نتمكلم معاهم ونلم الفضيحة.
زهرة : انت بتقول إيه يا با؟! تروح تتكلم معاهم ليه؟؟؟
المعلم : علشان اختك و الفضيحة
زهرة : فضيحة إيه؟ هي ماعملتش حاجة وحشة، ليه يا با عايز تضيع حقها؟؟؟
محمد رفع إيده وضربها بالقلم.
محمد : اخرسي، أنا عايز أضيع حقها؟! أنا رايح أجيب حقها وما اخربش على اختك مهما كان هي لسة عروسة.
زهرة بصت ليه، ودخلت تجري جوه.
المعلم : ليه يا محمد بس؟
محمد : إنت مش سامع قالت إيه؟
المعلم : معلش، يلا بينا نروح، و المحضر ملحوق تتنازلوا عليه.
البوليس اتحرك لشقة عماد وأخذوه من وسط امه و اخواته.
جملات آخر حاجة كانت تتوقعها إنه يحصل كده. عملت كل احتياطتها
بس فشلت فضلت تصوت وتقول كلام وحش على وداد و أهلها، وناس العماره بيسمعوا فيه الي صدقها، وفيه الي لأ وعارفين انها بتتبلا على البنت.
وصل المعلم و عم محمد العمارة
وسمعوا صوت جملات وهي بتصوت وتشتم.
المعلم : بقولك إيه انت تسكت خالص مهما قالت، أنا حاتصرف.
طلعوا السلم شافوا جملات قاعدة على باب الشقة وكل الجيران قاعدين جنبها. فيه الي شمتان و فيه الي صعبت عليه، مهما كان دي أم برضه.
المعلم : عامله مندبة ليه يا ست جملات ؟!
جملات بمساعدة جارتها قامت وقفت..
جملات : انتوا ليكم عين تيجوا لحد هنا؟؟ بنتكم عاملة مصيبة، وبدل ما تحاسبوها غلطت مع مين، بتبلغوا على إبني الي سترها
المعلم : سترها ؟؟!!! لا، كثر خيره.
إنت كذبت الكذبة و صدقتيها يا ولية. عيب واختشي على دمك، دا إنت عندك ولايا برضه.
جملات : لا، بناتي أشرف من الشرف.
المعلم : وبنتنا أشرف من الشرف، هو إنت فاكره بالشويتين دول حاتخوفينا يعني؟ بتدي رشوة لناس علشان يزوروا التقارير، مش خايفة من عقاب ربنا؟؟
تفضحي بنت بريئه علشان تدافعي عن إبنك المجنون و المجرم؟
إنت عارفة إنها كانت ممكن تموت؟
دفعت فلوس كثيرة، بس ربك لما بيظهر حق حد، دعوة المظلوم مالهاش حجاب عند ربنا، وانت ظلمتي الراجل الغلبان دا هو و بنته.
جملات: دا الدكتورة قالت إنها مكانتش ولا مؤخدة.
المعلم خلي مؤاخدتك معاك دي وحدة تمرجي اديتيها فلوس علشان تحبك الدور بس طلعته تعبئه الكاميرا جابتك وانت بتديها فلوس.
تحب تحصلي ابنك في القسم؟
يا ناس اسمعوا، الولية دي مفترية، علشان ابنها اتهمت بنت في شرفها.
إبنها الحيوان الي ماشافش ستات في حياته اغتصب البنت في ليلة دخلتها، عدمها العافية. وبدل مايعتذروا ويعترفوا بغلطهم لا، بتشوه سمعتها. إيه رأيك بقا إننا عندنا تقرير واثنين بيقولوا البت كانت سليمة. دا انتم حتى ضحكتوا علينا، إبنك مجنون وكان محجوز في السرايا الصفراء، وتقولي للناس دا كان شغال في الخليج.
آه يا ست جملات تحبي نتفاهم ولا نمشيها قانوني؟، انت ست كبيرة ومش حمل بهدلة. وماتنسيش، ابني محامي كبير، يعني حايوديك انت وابنك ورا الشمس.
بطه : انتوا جايين تهددونا في بيتنا ؟!؟ اشهدوا يا ناس.
المعلم : ماهما حايشهدوا بالحق.
قوليلي بقا قدام الناس دي كلها لو عايزة ابنك يطلع، ودا وعد رجاله مش حا يبات في التخشيبة،
البت كانت بنت بنوت ولا لأ ؟!!
عواطف دخلت جوه الشقة.
جملات : وانا اعرف منين؟؟ كنت معاهم ولا كنت معاهم؟؟ هو دا الي قاله ابني وكمان الداكتورة الي كشفت عليها.
المعلم : ما خلاص يا ست جملات
اعترفي.
جملات: تعالوا نخش جوه ونتكلم.
المعلم : لا الكلام يبقى قدام الناس زي ما فضحتيها قدامهم.
هنا طلعت عواطف..
عواطف : دي الملاية عليها براءة وداد، وهي حصل ليها نزيف. إحنا غالطانين، أمي بتحاول تحمي عماد. هو مش مجنون هو بس تعب نفسي بعد وفاة أبويا الله يرحمه.
واللي حصل لوداد غصب عنه لان في حد ابن حرام اداله حاجة.
جملات بصوت عالي..
جملات : اسكتي يا بت.
عواطف : لا ياما خلاص الحق لازم يبان، ابنك مش حايستحمل قعدة التخشيبة وممكن ترجع ليه الحالة من ثاني.
المعلم كان ماسك تليفونه وهو بيسجل كل الاعترافات.
Nisrine Bellaajili
يا ترا وداد موقفها إيه من كل الي حصل ؟
ومحمد حايطلق بنته من عماد ولا لأ ؟
وإيه هي حالة عماد ؟؟
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية ليه يا زمن)
