رواية لن اعشق سواك الفصل الرابع عشر 14 بقلم منى مرزوق
رواية لن اعشق سواك الجزء الرابع عشر
رواية لن اعشق سواك البارت الرابع عشر
رواية لن اعشق سواك الحلقة الرابعة عشر
طبعا عمر في اللحظه دي كان عايز يطلع يجري وسط الناس و يغني اغنية عبد الحليم بتاعت يا اصحابي يا اهلي يا جيراني انا عايز ٱخدكوا ف احضاني، بس هو اكتفى بضحكة سعاده و عيون اتملت دموع بإنه خد نور في حضنه و فضل يلف بيها بشكل فظيع لدرجة ان كل الموجودين كانوا باصين عليهم بإنبهار
احمد : ايه ياسطاااا مالك في ايه انت اندمجت اوي كده ليه؟ دي خطوبتي انا اهدى كده متقلقنيش عليك
عمر بإبتسامه و هو بيمسح دموعه : معلش ياسطا بس انت عارف خطوبتك دي اصلها مبتحصلش كل يوم ف تلاقيني متأثر بزيادة شويه
احمد : يابني ده انت لو عندك جفاف عاطفي مش هتبقى كده وربنا
عمر : ههههههههههههه لا خلاص الجفاف راح الحمدلله
احمد : الجفاف راح ؟ لا استني انتي يا ٱيه كده معلش ( بيسيب ٱيه في وسط الرقصه و بيروح لعمر) ياسطا قولتلك انا اخوك فهمني بس ايه الحكايه عشان نلحق نعمل اللازم و ننقذ الموقف
عمر : ياخويا اتنيل انقذ نفسك انت الاول
احمد : تؤ طب انا مش هسألك انا هسأل مراتك، يا مدام هو انتي بتفكري تروحي محكمة الاسرة قريب او حاجة
عمر : لا هتروح محكمة الجنايات بعد ما اخلص عليك
احمد : ياعم اصبر شكلك هيبقا وحش لو رفعت عليك قضية خلع و الموضوع مش هيبقى لطيف
عمر : ولااا ارجع ياض لخطيبتك بدل ما ارجعك بطن الحاجة والدتك دلوقتي
احمد : خلصانه يابا و انا بردو ف الخدمه متقلقش
عمر ( بيبص لنور) : بقولك ايه اوعي كلام الواد ده يخلي الشك يدق بابك احنا الحمدلله تمام اوي يعني
نور : احنا مين وكلام ايه؟ انتو الاتنين اجن من بعض وربنا
عمر : طب جنان ب جنان بقى ما تيجي نطلع دلوقتي على اسكندرية نتغدى و نقضي اليوم هناك
نور : اسكندرية ايه؟ هو انت ناسي ان بكره في اشعه هتتعمل عشان نتطمن عالنتيجه
عمر : اااه صح طب والله كنت ناسي، انتي الواحد معاكي ينسى نفسه و اسمه كمان والله
نور بإبتسامه : والله انت اللي نستني روحي و خليتني حتى مش عارفه افكر
عمر ( بيقرب من ودن نور وبيقولها) : انا عايزك متفكريش في اي حاجه غيري عشان عقلك و قلبك ميتشغلش عني لحظة واحدة
نور بتبلع ريقها و بتبص بكسوف في الارض بإبتسامه
( بتخلص الحفلة و بترجع نور و عمر لبيتهم)
نور : عمر خلي بالك احنا هنكون في المستشفى بكره الساعة 9 الصبح بإذن الله
عمر : حبيبتي متقلقيش انا ظابط المنبه من الصبح اصلا،انتي بس اطلعي دلوقتي نامي و متفكريش في حاجة خالص يا قمري…اه الا انا طبعا فكري فيا عادي
نور بتضحك ضحكة بخجل و بترد : ماشي تصبح على خير عمر : وانتي من اهل الخير يا قمري
( بينزل عمر و نور الصبح و بيروحوا للمستشفى)
نور بتنهيده : هو انا ليه حاسه ان احنا وصلنا بدري اوي كده
عمر : لا يا حبيبتي ده بس عشان انتي متوتره و بتفكري كتير
نور : فعلا انا قلقانه و خايفه اوي يكون عندي حاجه
عمر : بعد الشر عليكي يا ست البنات بإذن الله هنطمن و هنتأكد انك كويسه و زي الفل
( بينزل عمر و نور من العربيه و بيدخلوا المستشفى)
عمر لموظف الاستقبال : لو سمحت احنا عندنا النهارده ميعاد مع دكتور ابراهيم
الموظف : دكتور ابراهيم في العيادة جوه اتفضلوا
( بيدخل عمر اوضة الكشف و هو ماسك ايد نور اللي كانت حرفياً متلجه من كُتر الخوف
عمر : السلام عليكم
دكتور ابراهيم : وعليكم السلام اتفضلوا، مدام نور انتي هتعملي اشعه عالمخ صح؟
نور : ايوه يا دكتور
دكتور ابراهيم : طب اتفضلي حضرتك معايا في اوضة الاشعه
( بتدخل نور اوضة الاشعه مع الدكتور و بعد ما بتعمل الاشعه و بيرجعوا اوضة الكشف)
دكتور ابراهيم : طبعا نتيجة الاشعه بتطلع هنا من المستشفى بعد 24 ساعه بس عشانكم و عشان الدكتور حسن اللي بعتكم ليا ف انا بإذن الله هبلغكم بيها النهارده بليل
عمر :ربنا يخليك يا دكتور متشكرين اوي
( بيخرج عمر و نور من المستشفى)
عمر : ايه يا حبيبتي مالك سرحانه ف ايه؟
نور : حاسه اني هيغمى عليا على ما النتيجة تطلع بليل
عمر : لا يا حبيبتي مش هيحصل متخافيش، عموماً بصي احنا مش هنرجع البيت لحد بليل اصلا
نور : اومال هنروح فين؟
عمر : هنطلع اسكندرية يا حبيبتي
نور : عمر انت مجنون اسكندرية ايه دلوقتي
عمر : خلاص يا حبيبتي مفيهاش نقاش قُضى الامر
( بيسافر عمر و نور اسكندرية و ما ادراك ماهو جو اسكندرية في الشتا 😍)
عمر : احنا وصلنا اهه يا ستي شوفتي بقى ان المشوار مش بعيد زي ما انتي بتقولي
نور بتبص ناحية عمر بإبتسامه : انا فعلا محستش بالطريق بس يمكن عشان انا معاك
عمر : خبر اسوووح يا جدعان طب انا اعمل ايه دلوقتي بعد ما سمعت الكلام القمر ده من شفايف القمر دي
نور : ههههههههههه والله من رأيي ان اللي المفروض تعمله دلوقتي هو انك تطلع بينا على اقرب مكان ناكل فيه عشان انا خلاص هموت من الجوع
عمر : يا عمري انا هاخدك لاحلى محل سمك في اسكندرية و مصر كلها
نور : تمام بس خلي بالك عشان انت عارفني لما بجوع ممكن اطلب المنيو كله حتى لو مش هاكل كل ده بس هو كده يعني بقى
عمر : ههههههههههه متقلقيش ياستي معايا القرشين اللي كانوا تحت البلاطه و اهه لو مكفوش هنغسل صحون في المطبخ عادي
( بيروح عمر و نور للمطعم و بعد ما بيخلصوا غدا)
عمر : ها ياستي تحبي تشربي ايه بعد اكلة السمك العظمه دي
نور : لا انا مش عايزه اشرب انا عايزه اروح اتمشى عالبحر
عمر : امممم بحر يعني نسكافيه طب تمام يلا بينا
نور : ههههههههههه نسكافيه ايه يابني
عمر : اسمعي مني بس البحر لازمه نسكافيه في الجو الجميل ده
نور : ماشي يا سيدي
( بعد ما بيوصل عمر و نور عند البحر )
نور : ياااه انا كان نفسي في الجو و المود ده اوي
عمر : طب و معقول يكون نفسك في حاجة وانا معملهاش
( بتعدي عالشط ست عرافه من اللي بيقروا الكف)
عمر : تحبي تشوفي الكف
نور : ههههههههههه انت بتؤمن بالكلام ده؟
عمر : لا بس اهه من باب الفضول احنا مش هنخسر حاجه
( بينده عمر للست العرافه)
العرافه : تحت امرك عايز تعرف الطالع و المستخبي؟
عمر : لا انا عايز اعرف نتيجة الدوري السنه دي
العرافه : هااا!!
عمر : ٱسف قصدي ممكن تقري لها الكف ؟
العرافه : طبعا ناوليني كفك يا عيوني
( نور بتمد ايدها للعرافه)
العرافه : ماشاء الله لسه داخله دنيتك الجديده مش كده
نور : اه فعلا انا لسه متجوزه
العرافه : بس انتي لسه واقفه على بابها،افتحي بابك لاحبابك و حِني يا عيوني،و متخافيش اختيارك صالح
عمر : وربنا انتي ست زي الفل
العرافه : ههههههه طب خليني اشوفلكم الباقي يا عريس
بصي يا عيوني بلاش تكتري من العند و الملاوعه عشان حبايبك الصغيرين واقفين على بابك و عايزين يوصلوا و ينوروا حياتك
عمر : ايه ده مين دول؟ هو انتي عزمتي حد يا نور ؟
العرافه : ههههههههههههه لا يا سيد العرسان، حبايبها هما حبايبك اللي هيمدوا في اسمك، دول ولادك بإذن الله
عمر : قولي وربنا
العرافه : كله بعلمه
عمر : ونعم بالله بس وربنا ده هيحصل قريب يعني
العرافه : ده في ايد ربنا ثم بشطارتك يا عريس
عمر : احم تمام مفهوم ✋
( بعد ما بتمشي الست العرافه)
عمر : ايه يا ام العيال
نور : ههههههههههه و ده حصل امتى ده؟
عمر : لسه محصلش بس هيحصل بإذن الله 😉
نور بتتكسف و بتبص في الارض : طب ايه هو انت هتسمع كلامها؟انت مش قولت مش بتؤمن بالحاجات دي
عمر : لا الست دي غيرت مفاهيمي تماما،تعرفي ايه اول حاجه فكرت فيها؟
نور : ايه؟
عمر : اننا نخلف بنوته شبهك،ساعتها والله انا مش عارف من الفرحه ممكن اعمل ايه
نور بتعض على شفايفها من الكسوف و بتبص في الارض
عمر و هو بيرفع بإيده راس نور : لا مفيهاش كسوف،هو في حد يتكسف من اللي بيحبه بردو
نور بتوتر و كسوف : اووف يا ربي هو الجو ماله قلب حر كده ليه ايه ده
عمر بإبتسامه و هو بيقرب من نور : تعرفي ان جمالك بيزيد لما خدودك بتحمر كده من الكسوف
نور : احم ميرسي تسلم( بتلف نور و بتمشي خطوه و هي بتقول):ايه طب مش هنمشي بقى
بس عمر مدهاش فرصه تمشي خطوة تانيه و مسك ايديها و شدها ناحيته و بصلها بصه كلها حب و بكل رقه قرب من شفايفها و فجأة ….تليفون عمر رن
عمر : تؤ استغفر الله العظيم يا رب ده مين الكائن الرخم الفصيل اللي بيتصل ده ( بيبص في التليفون بيلاقيها مامته)
سامحني يا رب دي طلعت امي🤦♀️ الو ايوه يا ماما الحمدلله يا حبيبتي بخير ، لا مش في البيت اه في مشوار صغير كده جنبنا، اه يا حبيبتي، ايه؟ بكره؟ تمام هتنورونا بإذن الله، بجد والله يااه اكيد طبعا وحشنى جدا، ماشي يا ست الكل اشوفك بكره بإذن الله.. سلام
نور : هييجوا بكره؟
عمر : اه يا ستي بإذن الله، امي دي بتتصل في اوقات غريبه
نور : طب ومين اللي كان واحشك ده؟
عمر : اكل ماما، اصلها هتجيبلنا بكره معاها الغدا من البيت
نور : يا نهار ابيض يا عمر و هو ده ينفع بردو تيجي بأكلها يعني؟
عمر : ياستي الحمدلله انتي كنتي هتعملي اكل للقبيله دي كلها امتى
نور : بس بردو يا عمر يعني مامتك كده تقول عليا ايه
عمر : هتقول عليكي ست الكل و احلى بنوته ربنا خلقها
نور بإبتسامة خجل : ربنا يخليك هو احنا احنا يعني اتأخرنا كده صح؟
عمر : هو انتي خارجه مع صاحبتك ده انتي مع جوزك يابنتي ما نتأخر عادي
نور : معلش عشان كمان نلحق نعرف نتيجة الاشعه
عمر : نعرفها دلوقتي حالا يا ستي ( بيتصل عمر بالتليفون)
الو مساء الخير يا دكتور انا عمر جوز مدام نور اللي كنا عندك النهارده و عملت الا… ( بيقاطعه الدكتور)
ايوه ايوه الاشعه، والله النتيجة لسه واصله لي حالا
عمر : طب و ايه هي يا دكتور؟
الدكتور : ولا اي حاجه يا سيدي المدام زي الفل و مفيش عندها اي مشكله
عمر : بجد والله يا دكتور؟ الحمدلله يا رب الحمدلله، انا متشكر اوي يا دكتور و ٱسفين لتعب حضرتك، ربنا يخليك مع السلامه
نور : اطمن؟ صح يا عمر؟
عمر بإبتسامه : اطمني يا قلب عمر، مش انا قولتلك انتي زي الفل يا ست البنات
نور : الحمدلله يا رب الحمدلله
بيحضن عمر نور و بيفضل يلف بيها قدام البحر بفرحة تشبه فرحة العيد و بعدها بيبص في عينيها و هي بتبص في عينيه و بتخرج منهم كلمه واحده في نفس الوقت و هي “بحبك”
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية لن اعشق سواك)
