رواية لن اعشق سواك الفصل الخامس عشر 15 بقلم منى مرزوق
رواية لن اعشق سواك الجزء الخامس عشر
رواية لن اعشق سواك البارت الخامس عشر
رواية لن اعشق سواك الحلقة الخامسة عشر
بعد ما اخيراً نور اقنعت عمر انهم لازم يرجعوا القاهرة عشان الوقت اتأخر، ركبوا العربية و اثناء ما كان عمر مشغول بالسواقه و الطريق كانت نور سرحانه في دنيا تانيه و هي بتبص ل عمر و بتحرك ايديها على شعره و على خده
نور : اهه على ادد ما الدقن لايقه عليك على ادد ماهي بتضايقني عشان بتداري غمازاتك
عمر : طب ايه احلقها؟
نور : تؤ بلاش تحلقها، هو انا قولتلك قبل كده اني بحب دقنك اوي؟
عمر بإبتسامة : دقني بس؟
نور : لا و شعرك كمان
عمر : اه كده طمنتيني لو مكنتيش قولتي شعري كنت هزعل، بقولك ايه نامى يا نور
نور : ههههههههه تصدق انا فعلا حاسه اني عايزه انام، اه بس قبل ما انام صح بقولك ايه متنساش تبقى تعدي على اي سوبر ماركت عشان نشتري منه لوازم الحلويات اللي هعملها لهم بكره
عمر : طب وليه تتعبيهم قصدي تتعبي نفسك؟ طب ما نشتري حلويات من اي حلواني على طول واهيه اسرع و اضمن قصدي و اسهل يعني
نور : هاها خفيف اوي حضرتك، تصدق انا غلطانه عشان كنت ناويه اعمل حلويات تحفه تشرفك قدام عيلتك
عمر : يا روحي انا وجودك جنبي و معايا ده اكبر شرف ليا ادام العالم كله مش عيلتي و بس
نور : ماشي يا سيدي ثبتتني
( بتنام نور على الكرسي و بيبص عمر ليها و بحنيه بيحرك خصلات شعرها بعيد عن وشها و بيغطيها بالجاكيت بتاعه)
بعد ما بيوصلوا تحت العماره، عمر : نور اصحي يا حبيبتي
بس نور كانت رايحه في سابع نومه حرفيا و كان باين عليها الارهاق، فقرر عمر يشيل نور لحد شقتهم
و بعد ما بيدخل الشقه ، عمر : طب اطلعها تنام في الاوضه اللي بتنام فيها لوحدها ولا ٱخدها عندي في الاوضه؟ لا استغفر الله العظيم يا رب ، ايه ده ثواني دي مراتي انا بستغفر ليه ده ايه الخيبه دي، يلا ملناش نصيب نوصل الود النهارده و هي كده كده نايمه يعني، خلاص ادخلها اوضتها
( تاني يوم الصبح)
نور بتفتح عينيها : اممم ايه ده يالهوي انا جيت البيت امتى؟
( بتنزل نور للدور الاول بتلاقي عمر واقف بيحضر الفطار)
عمر : صباح الورد و الشربات على ست البنات
نور : صباح النور، هو انا فضلت نايمه من واحنا جايين في العربيه لحد دلوقتي ازاي؟
عمر : هوا اسكندرية يا بنتي قادر يسطل اي انسان شهرين قدام
نور : فعلا انا حاسه اني نمت نوم منمتوش عمري كله
عمر : نوم الهنا يا حبيبتي
نور : الله يهنيك، ايه بقى بتعمل ايه؟
عمر : بعملك احلى فطار يا احلى البنات
نور : ربنا يخليك تسلم ايدك، بس انا بتعبك كده معايا انت كل يوم بتعمل الفطار، انا عايزه ابقى اعمله انا
عمر : لا يا ستي انا بحب اعمل الفطار عشان بحب افطر بنوتي بنفسي
نور بإبتسامة : بنوتك؟ ايه انت اتبنيتني كمان ؟
عمر : حبيبتي انتي معشوقتي و مراتي و اختي و بنتي، نور انتي كل حاجه ليا في الدنيا
نور و عينيها كلها حب : مش عارفه اقولك ايه، ربنا يخليك لقلبي يا عمر
عمر : اهه بعد الجمله دي انا مش عايز اسمع كلام تاني خالص وربنا، يا شيخه بقى الجمال عدى الكلام
نور : ههههههههه طب انا هجهز السفره عشان نلحق نفطر بسرعه و نجهز نفسنا قبل ما الجماعه ييجوا
عمر : ماشي يا حبيبتي
نور : اه صحيح يا عمر انا كنت عايزه اكلم ٱيه عشان اعزمها هي واحمد ييجو يتغدوا معانا النهارده و خصوصا ان مالك كمان هيكون هنا
عمر : تفتكري دي حاجه هتفوتني؟ انا عزمتهم امبارح يا قمري
نور بنظرة اعجاب : انا حاسه اني منبهره سيكا
عمر : ههههههههههه لا طول ما انتي معايا هتنبهري كتير يا حبيبتي
( بيفطروا و بعدها بشويه جرس الباب بيرن)
عمر ( بيفتح باب الشقه) : اهلا نورتي يا ست الكل ( بيسلم على مامته و بتبوسه و تحضنه بحرارة)
والدة عمر : يا حبيبي عامل ايه؟ وحشتني اوي
عمر : وانتي كمان والله يا حبيبتي،اهلا يا خالتو حمدالله على السلامة يا حبيبتي
خالة عمر : الله يسلمك يا حبيبي واحشني والله
عمر : وانتي كمان والله،اهلا يا سمر ازيك
سمر وهي بتبص ل عمر بصة اعجاب فيها خبث : الحمدلله ازيك انت يا عمر وحشتنا والله
عمر : احم متشوفيش وحش ابدا يا رب،اااا تعالوا اتفضلوا
والدة عمر : اومال فين نور؟
عمر : هي نازله اهيه،يا نوور
( بتنزل نور و هي على سنجة عشرة و بإبتسامة بتسلم عليهم)
نور : ايه ده اومال فين نيرة و مالك؟
سمر : بيجيبوا الشنط من العربيه
نور ( و هي بتبص ل سمر و نفسها تقولها اطلعي بره) : اه تمام، منورين يا جماعه والله
والدة عمر : ده نورك يا حبيبتي، بس قوليلي بقى ايه الجمال ده يا ست العرايس
نور : ربنا يخليكي يا ماما هاجي جنبك ايه بس
والدة عمر : لا والله مرات ابني قمر، خلي بالك منها يا واد يا عمر
عمر : دي في عينيا و قلبي يا ماما
( في اللحظه دي سمر كانت قربت تطلع نار من بوقها و وشها جاب الوان و نور خدت بالها)
نور : تسلم يا حبيبي ده انت اللي في قلبي و بين رموش عينيا
والدة نور : حبايبي ربنا يحميكوا يا رب
عمر : يا رب، انا هقوم اكلم احمد اشوفه بقى فين
نور : لا خليك انت انا هتصل ب ٱيه و هعرف منها
( بتطلع نور الدور التاني عشان تكلم ٱيه)
والدة عمر : طمني يا حبيبي عاملين ايه مع بعض و نور عامله ايه معاك؟
عمر : الحمدلله يا ماما احنا كويسين اوي و نور ست البنات كلها و هدية ربنا ليا
سمر بغيظ : يااه للدرجه دي؟
عمر : واكتر م الدرجة دي والله يا سمر، بس انا عاذرك انتي بكره بإذن الله هتحسي اللي بقوله ده لما تلاقي الشخص المناسب اللي هيشاركك حياتك
خالة عمر : يا رب يا عمر والله يا ابني سمر بنتي دي هتجنني مش عاجبها العجب و جالها عريسين زي الفل طفشتهم و قال ايه بتقولي لسه بدري يا ماما
عمر : طب ليه يا سمر يعني كنتي اديتي نفسك فرصه
سمر : اظن يا عمر انت لما اخترت مراتك محدش غصب ولا ضغط عليك وانا من حقي اختار حياتي بنفسي
عمر : في دي معاكي حق، خلاص يا سمر اختاري اللي يريحك بس خلي بالك من نفسك و من اختياراتك
خالة عمر : ده اللي ربنا قدرك عليه يا عمر؟
عمر : معلش يا خالتو سيبيها على راحتها وهي اكيد هتعرف تختار اللي يناسبها بإذن الله
( بتنزل نور من الدور التاني)
عمر : ايه كلمتي ٱيه؟
نور : اه و هما جُم اصلا و واقفين مع مالك و نيره تحت
عمر : طب تمام، يا رب بس ينجزوا عشان مش عايزين نجوع النهارده بسببهم
( الباب بيخبط و بتفتح نور بيدخل مالك و نيرة و احمد و ٱيه و بعد السلامات والذي منه)
نور : ايه اتأخرتوا تحت ليه كده؟
مالك : بنطلع مجايب ماما يا ستي
احمد : اه و انا جاي معزوم اتسحلت بردو في شيل شنط عادي، مكتوب عليا يا رب
عمر : اه ياعم مالك في ايه ده انت هتتغدى غدا مُعتبر
احمد : بعمل ب لُقمتي يعني؟
عمر : ههههههههههههه اه يعني حاجة زي كده
نور : بس تسلم ايدك يا ماما تعبتي نفسك والله يا حبيبتي
والدة عمر : يا حبيبتي تعبكم راحه دي حاجه بسيطه
احمد : طب ايه هنقضيها كلام كتير انا مفطرتش يا جدعان
ٱيه : يابني اسكت انت على طول فاضحنا كده
مالك : والله يابنتي الله يكون ف عونك ده انتي هتعيشي مع فرانكشتاين
احمد : ايه ياسطى هتسكت ولا اتكلم انا؟
مالك : يااااه عليك ده انا بهزر، ما يلا بقى يا جماعه انا جوعت فجأة سبحان الله انا كمان
نور : ههههههههههههه خلاص استهدوا بالله انا هقوم اجهز السفره و احط الاكل
ٱيه : استنى انا جايه معاكي
( بتجهز نور و ٱيه السفره و الكل بيقعد يتغدا)
والدة عمر : قولولي بقى رأيكم في الاكل بصراحه و ميضرش شوية مجامله بردو
نور : والله يا ماما اكلك مش محتاج اي مجامله ماشاء الله تحفه انا بيتهيألي عمري ما اكلت اكل بالجمال ده
والدة عمر : حبيبتي تسلميلي يا رب، بس ده انتي الاكل ادامك زي ماهو انا قولت مش عاجبك والله
نور : لا والله يا حبيبتي تسلم ايدك ده حلو جدا
خالة عمر : اسكتي بقى يا ام عمر بلاش تكسفيها، اهي البشاير باينه من غير حاجه
نور : بشاير ايه؟
خالة عمر : اهه قلة الاكل و شكلك الضعفان ده كله بشاير على اننا هنفرح بالنونو قريب بإذن الله
احمد بيبص ل عمر : اوبا ايه السرعه دي يا معلم انا كلامي لحق يأثر فيك في يوم واحد كده؟
عمر : اخرس ياض و اطفح وانت ساكت
احمد : اصلي ياسطى و بارك الله في المولود ✋
نور : ايه ده، لا ثواني والله انا مش حامل ( بتبص ل عمر) وربنا انا مش حامل
عمر بصوت واطي : انتي بتحلفيلي انا على اساس اني كنت مسافر مثلا؟
نور : احم الحمدلله انا هقوم اجهزلكم العصير و الشاي على ما تخلصوا
والدة عمر : بقولك ايه يابني هي زعلت من الكلام ولا ايه؟
عمر : اكيد لا طبعا يا ماما انتي بتقولي ايه، كلوا بس عشان نور هتفاجئكم بشوية عصير ما يتشربش قصدي مايتنسيش
( بيخلصوا الغدا و بيقعدوا يشربوا العصير في الانتريه )
عمر : ايه ٱخر اخبارك يا خالتو طمنيني عليكي
خالة عمر : انا بخير الحمدلله يا حبيبي بس مش مطلع عيني غير البت سمر دي
عمر : ههههههه ليه بس كده دي سمر طيبه
خالة عمر : يابني دي حتى الجامعه بتاعتها قرفاني بيها
سمر : يعني يرضيك يا عمر تبهدلني عشان جبت مقبول في ماده اصلا انا مش فهماها
عمر : مادة ايه دي؟
سمر : ادارة اعمال
عمر : ازاي بقى دي ماده سهله جدا
خالة عمر : هو انت كنت بتدرسها يا عمر؟
سمر : اه طبعا يا ماما ماهو عمر كان في تجارة بردو بس تجارة انجلش
خالة عمر : طب بالله عليك يا عمر ما تقعد تشرحلها كده شويه ينوبك ثواب فيها و فيا
سمر : اه ايوه ياريت يا عمر انا متأكده اني هفهم منك احسن من الدكتور المعقد اللي عندي ده
( نور في سرها الدكتور اللي معقد بردو يا حربايه)
عمر : اه طبعا مفيش مشكله اي وقت تيجوا فيه اشرحلها
سمر : طيب ما احنا هنا اهه و على حظي كمان الكتاب معايا في الشنطه
عمر : اشرحلك دلوقتي؟
سمر : اه ايه المشكلة تعالى نقعد في اي ركن او حتى بص تعالى نقعد في البلكونه ( و بتقوم سمر لحد البلكونه)
عمر في سره طبعا كان بيقول الله يخربيتك يا سمر ل بيت الجامعه ده انا ما صدقت نور اتعدلت معايا، طلاقي على ايدك والله انا عارف
بيقوم عمر عشان يروح ورا سمر البلكونه و قبل ما يدخل بيبص ل نور و بيقولها بصوت واطي : انا ٱسف
نور : طب معلش يا جماعه انا هستأذنكم بس هطلع اخلص حاجه فوق و نازله لكم تاني
( بتطلع نور اوضتها و بتقفل الباب بكل غيظ و غضب )
نور : ماشي يا ست سمر لما اشوف ٱخرك هيوصل ل فين
و انت يا عمر باشا دورك جاي
( بيخرج عمر و سمر من البلكونه)
عمر : ايه ده هي فين نور؟
والدة عمر : طلعت تعمل حاجه فوق و نازله يا حبيبي
عمر : حاجة ايه؟
والدة عمر : والله ما نعرف عموماً احنا لازم ننزل دلوقتي عشان خالتك لسه هتسافر
عمر : ايه ده يا جماعه بالسرعه دي انتو لحقتوا
خالة عمر : معلش بقى يا حبيبي الضيف المجنون ياكل و يقوم، يلا نجيلك المره الجايه في سبوع ابنك يا رب
عمر : تسلمي يا رب يا خالتو، نورتونا والله يا جماعه
( الكل بيخرج من باب الشقه و مالك كان ٱخر واحد)
مالك : بقولك ايه يا عمر ابقى اطلع شوف نور عشان شكلها اكيد اتضايقت من ست زفته سمر و عمايلها
عمر : لا حول ولا قوة الا بالله انا عارف والله ربنا يسامحها بقى، متقلقش انا هطلع اشوفها
مالك : ماشي خلي بالكوا من نفسكم سلام
عمر : سلام يا حبيبي
بيبص عمر للدور التاني و بياخد نفسه و هو بيقول : استرها من عندك يا رب و عديها على خير
بيطلع عمر لاوضة نور و بيخبط بس هي مش بترد ف بيتخض عمر و بيدخل الاوضه بيلاقيها مش فيها، بيخرج و بيبص حواليه بيلاقي ان اوضته منوره فبيدخل بيلاقي نور هناك
عمر : انتي كويسه؟
نور : اه الحمدلله، هو انت سيبتهم تحت ليه؟
عمر : كلهم مشيوا
نور : ايه ده ليه بسرعه كده؟ طب ده حتى الدرس لسه ملحقش يخلص
عمر : حبيبتي والله انا ٱسف بس انتي شوفتي اللي حصل كله ادامك
نور : بردو كنت ممكن تتهرب منها بأي طريقه
عمر : كنت ههرب فين وازاي بس؟
نور : معرفش بقى بس عموما يعني انا سمر دي مش عايزه اشوفها تاني ابداً
عمر بإبتسامه و هو بيقرب من نور ببطء : اللي تشوفيه يا قمري، بس قوليلي ايه سبب تشريفك للأوضة عندي هنا؟
نور : ايه ده هي مش الاوضة دي ملكية مشتركة بردو
عمر : ههههههههه كل حاجه في البيت ملكك يا حبيبتي بما فيهم انا والله
نور بإبتسامه : تسلم، و عموماُ انا قولت ادخل افضي شنطة الهدوم بتاعتك و ارتب الهدوم في الدولاب بما انك مش مسافر
عمر و هو بيقرب اكتر : حبيبتي تسلميلي بس تعبتي نفسك
نور : لا مفيش تعب ولا حاجه و عموماً….. ( نور بتركز في عيون عمر و بتتنهد) و بتقوله :تعبك راحه
عمر بعد ما قرب اكتر كتير من نور : تعرفي اني كنت بحلم تيجي هنا الاوضه اللي بنام فيها
نور و هي متلغبطه : احم اه اصل عادي الاوضه مش بعيده
عمر بإبتسامه : بس انتي كنتي بعيده ( و بيلمس وش نور و بيبتدي يحرك صوابعه على خدها و شفايفها)
نور : بتبتدي تحس ان الدنيا بتلف بيها و كأنها ثبتت مكانها
عمر بصوت حنين : وحشتيني
نور بتبلع ريقها و بصوت واطى بترد : وانت كمان
بيبتسم عمر و بيبتدي يقرب من شفايف نور و في لحظه نور بتحس انها فقدت السيطرة على نفسها و انها مش قادره تتحكم في عواطفها و بتلف ايديها حوالين رقبة عمر و بتلمس بشفايفها شفايفه و بيدخلوا في قُبلة عميقه كلها شغف و اشتياق و حب، و بعدها بلحظات بتستسلم نور و بيحصل اللي كان عمر بيحلم بيه و نور عاشت تتمناه ( الف مبروك يعني و مش هنوضح اكتر من كده عشان الرقابة)
و تاني يوم الصبح بتفتح نور عينيها بتلاقي عمر بيبصلها بإبتسامته الجميله اللي غمازاته بتزيد جمالها و بيقولها :
……….صباح الخير يا ست العرايس
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية لن اعشق سواك)
