رواية لن اعشق سواك الفصل الثاني والعشرون 22 بقلم منى مرزوق
رواية لن اعشق سواك الجزء الثاني والعشرون
رواية لن اعشق سواك البارت الثاني والعشرون
رواية لن اعشق سواك الحلقة الثانية والعشرون
نور بصدمه : عمرر
عمر بإبتسامه : ايه يا حبيبتي قفلتي الخط ليه؟ ما تكملي كلامك.. لا انا كده شكلي عكننت عليكي، تؤ ميصحش كده استاذ رامي يقول عليا ايه.. راجل همجي مش بيراعي خصوصية مراته و عشيقها
نور : انت.. انت فهمت ايه؟ ايه اللي انت بتقوله ده؟
عمر وهو بيقرب منها : تؤ تؤ *بيحط صباعه على شفايفها* نسكت شويه كده يا حياتي، انتي اتكلمتي كتير مع رامي سيبي بقى عمر يتكلم حبه * وبحركه سريعه بينزل بإيده على وشها و بيديها قلم قوي بيوقعها ع السرير*
نور بصريخ : ااه انت اتجننت انت مش فاهم حاجه
عمر بصوت مرتفع : مش فاهم ايه ؟ انا مش فاهم حاجه واحده ، انا كنت ازاي مخدوع فيكي كل الفترة دي، لا شابوه بجد طلعتي محترفه و عارفه بتعملي ايه
نور بعياط : اسكت ه اديني فرصة ه افهمك
عمر بلا مبالاة : قوليلي صحيح يا نور هو انتو كنتو بتصرفوا اموركم ازاي؟ اصل مش معقول يعني كنت مقضيينها *بيفتح صور نور مع رامي على موبايله و بيوريها لنور* كافيهات وبس، يعني كنتوا بتطلعوا على فندق ولا يمكن على شقتي وانا مش موجود
نور بصدمه : ان.. انت جبت الصور دي منين؟
عمر : ياستي ولاد الحلال شافوكم و حبوا يشاركوني معاكم الحفله عشان مفيش حاجه تفوتني
نور بغضب و هي بتمسح دموعها: اللي مصور الصور دي انسان حقير وواطي و عمل كده عشان يخرب بيتنا و… بيقاطعها عمر : تؤ رغي كتير يا نور وانتي عارفه انا مبحبش الرغي، خلينا دلوقتي نتفق بقى بعد ما بقينا على مايه بيضا، تحبي امرمطك ازاي؟ بصي انا راجل ديمقراطي يعني اختاري انتي بنفسك
نور بنظرة حاده : لا مش هختار و اعمل اللي انت عايزه يا عمر عشان انت بكره اللي هتندم كتير والله صدقني
عمر بإبتسامه صفرا : ايه هتموتي ابني اللي ف بطنك؟ صحيح يا نونو صارحيني كده بيني وبينك هو البيبي ده بتاعي ولا بتاع رامي؟ عشان بس مكنش باجي على حق حد بردو
نور و الدموع تنهمر من عينها بقوة : طلقني يا عمر، طلقني دلوقتى حالا
عمر بسخريه : ليه هو رامي باشا وافق يكتب البيبي بإسمه؟ والله فيه الخير، بس في مشكلة صغيرة.. انا مش هطلقك يا نور، انتي هتلازميني لحد ٱخر نفس فيكي اصلي بصراحة عجبني حوار العشق الممنوع ده و عايز اشوف المسلسل هيخلص على ايه
نور عياطها زاد : وانا بقولك طلقني بدل ما والله العظيم هموت نفسي
عمر بنظرة حاده : لا يا نور مش عايزك تموتي انا عايزك تعيشي بذنبك ده اطول فتره ممكنه، انا عايز اشوف عذابك عايزك تحسي بللي خليتيني احس بيه
نور بنظرة حزن : انت ظلمتني من غير ما تفهم ولا تعرف اي حاجه
عمر : لا فهمت و عرفت و كمان شوفت و سمعت بنفسي
نور : انت فهمت اللي انت عايز تفهمه
عمر : بلا فلسفه فارغه بقى، انتي ايه جايبه الجبروت ده منين كمان هتقوليلي حجج و اعذار، يا شيخه انا مشوفتش ف حياتي كده
نور بحزن : ولا هتشوف ف حياتك كده، انا عايزه اقولك حاجه واحدة بس انا عملت كل حاجه عشان احافظ عليك و على حياتنا و بيتنا بس انت اللي هديت كل ده يا عمر
عمر : لا قشعرت تصدقي، بس اه معاكي حق فعلا ماهو اصل انا المفروض بردو مكنتش اركز اوي كده معاكي انتي و عشيقك *متمثلا الحزن* انا ازاي رَجعي كده؟ خلاص اوعدك هبقى اعرف حدودي بعدين
نور بصدمه : عشيقي؟….طب يا سبع الرجالة طالما انا ليا عشيق سايبني على ذمتك ليه؟ ولا هي دياثه و خلاص
عمر قرب من نور و راح ماسك شعرها بقوة و مهتمش بصرختها و قال : انا هوريكي سبع الرجالة ده هيعمل فيكي ايه.. وحيات امي و امك لاكون موريكي النجوم في عز الضهر و مش هطلقك يا نور لحد ٱخر نفس فيا او فيكي
* بيزق عمر نور اللي بتقع على السرير و بيخرج من الاوضة*
نور و هي منهاره من العياط : اعمل ايه يا رب انا ليه بيحصلي كل ده…..ده انا بعمل كل ده عشان اخته، عشان عايزاها تكون سعيدة و تعيش مع الشخص اللي اختارها و اختارته.. انا استاهل كل ده ؟
*قطع كلام نور مع نفسها رنة تليفونها*
نور : الو.. ٱيه حبيبتي عامله ايه؟
ٱيه : الحمدلله يا قلبي الف سلامه عليكي طمنيني عامله ايه دلوقتي؟
نور : ايه ده عرفتي منين؟
ٱيه : من احمد يا ستي ما عمر حكاله و هو حكالي
نور : اه.. عموما متقلقيش يا حبيبتي الحمدلله ربنا ستر انا كويسه
ٱيه : الحمدلله بس انا مش هينفع اسيبك كده، بصي انا و احمد هنييجي و هنجيب معانا نيره و مالك
نور : يا حبيبتي على ايه كل التعب ده؟ انا والله بخير
ٱيه : معلش ياستي اعتبرينا جايين نتفسح خصوصا اني عايزه اطمن عليكي لان الموضوع مش شكله تعب من اثر الوقعه بس لا انتي في حاجة تعباكي يا نور وانا هعرفها
نور بتنهيده : ماشي يا ٱيه اهم حاجه خلي بالك من نفسك
___________________________________________
* بيعدي اليوم و تاني يوم الصبح بيوصل احمد مع ٱيه و مالك و نيره *
عمر : ايه ده الغزو المفاجئ ده؟
احمد و هو بينزل شنطة السفر عالارض : يابني هو انت متعلمتش بربع جنيه ذوق؟ مسمعتش في حياتك عن كرم الضيافة؟
عمر : طب انا راضي ذمتك انت العشم اللي عندك ده جايبه من فراغ ولا من كرم اخلاقي؟
احمد : لا جايبه من كارفور
عمر : طب حلو اوي كفايه لحد كده انت تاخد بعضك كده و تلف ترجع القاهره عشان الألشه دي قضت على صداقتنا
مالك : ايييييه انت وهو هتفضلوا ترغوا و تستظرفوا كتير، اوعى ياعم منك ليه انا عايز ادخل الحمام من واحنا في نص الطريق
احمد : ادخل ياخويا ما انا مسافر بإبن اختي معايا
عمر : وسع طب يللي عامل زحمه عالفاضي انت و خليني اسلم على الناس اللي اهم منك … ازيك يا ٱيه عامله ايه؟
ٱيه : الحمدلله تمام انت عامل ايه يا عمر؟
عمر : انا كويس الحمدلله، المهم طمنيني عامله ايه مع الكائن الحي اللي خطبك ده؟
ٱيه : ههههههههه اهه الحمدلله شغال
عمر : طب تمام و لو عطل منك كلميني انا معايا الكتالوج بتاعه هاجي اصلحهولك
احمد و هو باصص لعمر بتركيز : خلاص يابا خلصت الحفله عليا؟
عمر : ههههههههه اه تمام كده لو احتاجت حاجه تاني هندهلك
احمد : عيوني ده احنا في خدمة سيادتك
عمر بإبتسامه و هو بيفتح دراعاته : وانتي مستنيه ايه حضرتك مش تيجي لحضن اخوكي
بتجري عليه نيره و بتحضنه… وحشتني اوي يا عمر والله
عمر : وانتي كمان والله يا حبيبتي
نيره : كده بردو يا عمر تيجي العزبه هنا كل الفتره دي و تبعد عننا كل ده
عمر : معلش والله يا حبيبتي غصب عني.. اصل… اصل انتي عارفه نور حامل و تغيير الجو كويس عشانها
نيره : اخخ احنا بقالنا ساعه كلنا بنرغي و نسينا نسأل هي نور فين؟
ٱيه : اه يا عمر هي فين نور؟ هي كويسه؟
عمر : اه يا جماعه الحمدلله كويسه مالكم؟ هي فوق في الاوضه نايمه
ٱيه : طب هستأذنك انا يا عمر هطلع لها
عمر : اتفضلي طبعا يا ٱيه من غير استئذان
*ٱيه بتخبط على الباب*
نور : ادخل
ٱيه : قلللبي اللي وحشاااني
بتجري عليها نور و هي بتعيط و بتقول : وانتي كمان وحشتيني اوي يا ٱيه
ٱيه : اهدي يا حبيبتي، تعالي اقعدي استريحي و احكيلي فيكي ايه؟
نور : هحكيلك يا ٱيه هحكيلك
___________________________________________
احمد : ايه بقى ياعم انت استحليت القاعده هنا في العزبه ولا ايه؟
عمر : لا ماهو انت عارف يابني عشان نور حامل و…..
احمد بيقاطعه : ايه يعني نور حامل؟ هو الحمل في القاهره عليه حظر الايام دي يعني؟
عمر : لا بس عشان هنا الجو احسن و كمان عشان نفسيتها
احمد : بص ياسطا وربنا انا بس عايزك تسمع مني ده كأخ ليك، انت فااااشل في جو التحوير و اللف و الدوران ف إنجز و قول في ايه اللي مخليك ماسك في القاعده هنا
عمر بتوتر : ها.. هيكون في ايه يعني ياض يا عبيط انت بص فكك مني و خلينا فيك انت، ها ناوي ترحمنا من خلقتك و تبلي بيها البت ٱيه الغلبانه و تتجوزها امتى ؟
احمد : هي مصممه منعملش الفرح غير بعد نور ما تولد و تطمن عليها الاول
عمر بإبتسامه حزينه : فيها الخير ٱيه والله
احمد : طب مالك بتقولها وانت متأثر كده ليه كأني بقولك انها هتتبرعلها بكليتها الشمال
عمر و هو فطسان ضحك : الله يخربيتك بتفصلني من المود في لحظه جتك نيله
احمد : ياعم اتنيل، المهم خلينا نشوف الموضوع الاهم
عمر بقلق : خير في ايه؟
احمد : يا ترى هتغدونا ايه؟
عمر وهو بيحاول يمسك نفسه عشان ميضربش احمد : تصدق يابني انا راجل مش تمام عشان فتحتلك الباب
احمد : ياعم انجز بدل ما نقوم ناكلك انت و مراتك
عمر : طب معلش يا نيره اطلعي فوق قولي لنور تنزل تسلم على احمد و مالك و تجهز الغدا
نيره : تجهز غدا؟ وهي تعبانه كده يا عمر؟
مالك : ازاي يعني يا عمر؟
احمد : ايه ياض انت معندكش دم؟
عمر ببرود : ايه يا جماعه نور بقت كويسه دلوقتي مالكم ما تبطلوا افوره و اطلعي انتي بس يا نيره قوليلها
نيره بعدم اقتناع : حاضر يا عمر
___________________________________________
ٱيه : يا خبر اسود، يعني عمر دلوقتي فاكرك خاينه عشان شاف صورتك مع حبيب اخته؟
نور : هو ده اللي حصل
ٱيه : طب وانتي ازاي يا نور متحكيش لعمر و تفهميه حقيقة الموضوع؟
نور : يعني انتي عيزاني افضح نيره و اوديها في داهيه؟ ما انتي عارفه عمر متهور و مش بيتفاهم في الامور دي، و نيره زي اختي الصغيره و انا خايفه عليها
ٱيه بتقوم تقف و بترد بعصبيه : لا بقى انتي كده اتجننتي رسمي، يعني انتي هتقبلي ان عمر يبقى فاهم انك خاينه؟ و هتتحملي كل اللي بيعمله فيكي ده؟
نور بدموع : هو معذور بعد اللي شافه
ٱيه : ايوه صحيح بمناسبة اللي شافه، هو انتي ازاي اتصورتي انتي و رامي في الكافيه؟
نور : معرفش و ده اللي هيجنني
ٱيه : يعني اثناء ما كنتو في الكافيه مشوفتيش اي حد تعرفيه هناك؟
نور : لا مشوفتش وبعدين هو انا كنت هركز في وشوش الناس ليه، انا كنت رايحه عشان موضوع معين و ماشيه
ٱيه بتنهيده : عموما الشخص ده هنعرفه قريب اكيد بس المهم دلوقتي انتي لازم تسمعي اللي بقولك عليه و تحكي لعمر كل حاجه
نور : مقدرش يا ٱيه مقدرش، قولتلك لا يمكن اكون سبب في أذية نيره، مستحيل اقوله
*الباب بيتفتح* انتي مش هتقولي يا نور، انا اللي هقوله
نور بصدمه : نيره!!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية لن اعشق سواك)
