رواية لن اعشق سواك الفصل الثامن عشر 18 بقلم منى مرزوق
رواية لن اعشق سواك الجزء الثامن عشر
رواية لن اعشق سواك البارت الثامن عشر
رواية لن اعشق سواك الحلقة الثامنة عشر
بترجع نور للبيت واول ما بتدخل من باب الشقه بتلاقي عمر قاعد قدامها
نور : سلام عليكم
عمر : و عليكم السلام
نور : ايه يا حبيبي اتأخرت عليك؟
عمر : لا بس انا اتضايقت يا نور
نور : ليه؟ ايه اللي حصل؟
عمر : اول مره من ساعة ما اتجوزنا ارجع ملاقيكيش في البيت و ايوه بصراحه انا اناني و مش عايز اي حد يشغلك عني و لو لحظه واحده
نور بإبتسامه : يااه كل ده عشان خرجت ساعه واحده بس؟ وبعدين انت رجعت بقالك ادد ايه؟
عمر : رجعت بقالي 10 دقايق يا هانم
نور : لا احنا هنهزر كده
عمر : لا والله مش بهزر، انا مستحملش اقعد في البيت ثانيه واحده وانتي مش فيه
نور و هي بتقرب من عمر : طب اعمل ايه عشان اصالحك انا دلوقتي بس؟
بيبصلها عمر بنظرة زعل مصطنعه و بيشاور لها على خده
بتضحك نور و بتقرب من عمر و بتبوسه في خده
عمر : والله العظيم انا كل رجالة العالم تحسدني على اللي انا فيه ده
نور : ههههههههه ياه كل ده عشان بوستك في خدك؟
عمر : اه صح معاكي حق البوسه دي مش كفايه تعالي بقى كملي و صالحيني من كل مره زعلنا فيها من اول ما عرفنا بعض، بس بيتهيألي كده هنضطر نطلع الاوضه فوق
نور : ههههههههه والله انت رايق، بص بقى انا جوعت جدا و تقريبا كده ابنك طالبه معاه ياكل سوسيس و بطاطس محمره ف انا هطلع اغير هدومي بسرعه و انزل اعملك احلى سوسيس مكسيكي دوقته ف حياتك
عمر : نور انتي عمرك روحتي المكسيك ؟
نور : هاهاها لا يا عسل بس يعني هو الاكل الصيني اللي بناكله بنسافر نجيبه من الصين؟
عمر : لا افحمتيني بصراحه شابوه ليكي
نور بغرور مصطنع : انا عظمه لا تكلمني
عمر : ههههههههه اموت فيك ياعم الواثق انت
نور بضحك : ماشي يا سيدي انا هطلع اغير بسرعه بقى و انزل احضر الاكل
عمر : تمام يا عسل
( بعد ما غيرت نور هدومها و نزلت لاقت عمر قاعد و ملامحه باين عليها انه حزين او متضايق من حاجه)
نور : ايه ده مالك يا حبيبي قاعد ليه كده؟
عمر بنبره حزينه : مفيش يا حبيبتي
نور : والله ده من امتى؟ عمر لو سمحت انجز و قولي مالك عشان حقيقي بدأت تقلقني
عمر بتنهيده : المدير بتاعي لسه مكلمني في التليفون
نور : وبعدين؟
عمر : بيقولي ان مفيش حد من الموجودين في الشركه ممكن يسافر المؤتمر و ان حتى الشخص اللي كان فيه امل انه يروح مكاني تعب فجأة تعب جامد و مش هينفع يسافر
نور : طب وانت قولتله ايه؟
عمر : انا حاولت طبعا اني اعتذر له بكل الطرق عن السفريه دي لكن هو قالي ان مفيش غيري ينفع يسافر وان المؤتمر ده متوقف عليه مستقبل الشركه و يا اما اسافر يا اما….
نور : يا اما ايه؟
عمر : يا اما اسيب الشركه
نور : ايه؟ لا طبعا يا عمر دي مفيهاش كلام انت لازم تسافر المؤتمر
عمر : ازاي يا نور؟ انتي حاليا مينفعش تسافري ولا تركبي طياره عشان ده خطر عالحمل و انا مقدرش اسيبك لوحدك في الظروف دي
نور : ليه يعني يا عمر هو انا طفله صغيره؟ يا عمر اللي بتقوله ده مش مبرر ابدا و يا سيدي متخافش عليا انا هبقى اقفل على نفسي بالمفتاح عشان الحرامي ميجيش يخطفني
عمر : نور انتي بتهزري؟ انا قسما بالله معنديش اي مشكله اسيب الشركه و الشغل خالص عشانك و عشان اكون جنبك و اطمن عليكي
نور : ارجوك يا عمر متبقاش حساس بزياده وبعدين يا حبيبي انت شغلك ده هو اساس حياتنا انا وانت و ابننا اللي جاي في الطريق بإذن الله
عمر : خلاص مفيش غير حل واحد
نور : ايه هو؟
عمر : انك تروحي تقعدي عند مامتك لحد ما ارجع
نور : يوه بقى يا عمر انت عارف يا حبيبي اني من ساعة ما اتجوزت مسيبتش البيت وروحت ابات عند ماما غير مره واحده وانت كنت معايا و اهه انت شوفت الدوشه اللي بقت في البيت من ساعة ما اخويا و مراته وولاده راحوا عاشوا في الشقه اللي جنب ماما و بابا من ساعة ما رجعوا من بره
عمر : معلش يا نور ده وضع مؤقت يعني مجرد اسبوعين و هرجع مش هطول بإذن الله بس عشان اكون مطمن عليكي يا حبيبتي والا والله ما هسافر
نور بتنهيده : حاضر يا عمر زي ما تحب اهم حاجه انت متقلقش و تركز في شغلك و بإذن الله ربنا يوفقك
( بعد كام يوم جه ميعاد سفر عمر)
نور : خلي بالك من نفسك يا حبيبي و كُل كويس و البس تقيل عشان البلد هناك تلج
عمر بضحك : حاضر يا مامي “بصوت اللمبي”
نور بضحك : اللي يقولك غششني قطعوا، غش انت
عمر : والله ما عارف هقعد اسبوعين ازاي من غيرك يا شيخه ربنا يهد ام المؤتمر و الشركه بللي فيها
نور : بعد الشر انا حبيبي في الشركه
عمر : قلب حبيبك وربنا
نور : عمر
عمر : عيونه
نور : عايزه اقولك على حاجه
عمر : قولي يا حبيبتي
نور : اوعى يعني عينك تزوغ كده ولا كده و تبص للبنات الاجانب اللي هناك اصل يعني شعر اصفر و عيون ملونه و حاجه كده تزغلل العين و انا عارفه ان الانسان دعيف
عمر : ههههههههه لا يا عمري متقلقيش انا عمري ما اضعف قدام حد غيرك، يابت ده انتي القلب والروح انتي
نور بضحك : يا ولا
عمر : والله يا قمري انا ما بشوف في كل الدنيا دي كلها حد غيرك انتي
نور : اممم ماتت في عينك جميع النساء مش كده؟
عمر : يعني هما في غيبوبة حاليا
نور : والنبي؟
عمر : ههههههههه بهزر يا رمضان مبتهزرش، يا حبيبتي والله انا كل البشر ماتوا في عيني و العالم انتهى فيه كل شئ و مبقاش غيرك و كأنك ٱخر شعاع شمس بينور الكوكب
نور : هيييح طب يا ربي ادخل في شنطة السفر و اقفل عليا ولا اعمل ايه في الراجل اللي هيجنني ده
عمر : ياريت والله يا عمري كان نفسي تكوني معايا بس معلش الواد ابن….. ولا بلاش اغلط فيه دلوقتي لما ييجي بالسلامه بإذن الله هبقى اهينه على شهر العسل اللي ضاع علينا بسببه ده
نور : معلش يا حبيبي الايام جايه كتير و نبقى نعمل 100 شهر عسل بعد كده
عمر : والله انا حياتي كلها معاكي عسل، بقولك ايه”بغمزه”ما تيجي نطلع اوضتنا فوق نتكلم في موضوع شهر العسل ده اصل الموضوع ده حيوي جدا
نور بضحك : انت كنت مسافر تقريبا؟ وفي طيارة بتطير دلوقتي و مستقبل بيضيع
عمر : هممم ماشي ياستي خلاص هريحك مني و همشي اهه، بس بالله عليكي يا نور تخلي بالك من نفسك كويس اوي و زي ما اتفقنا تنزلي تروحي عند مامتك
نور : حاضر يا حبيبي متقلقش وانت ابقى اتصل بيا طمني عليك
عمر : ده كل يوم بإذن الله يا عمري هو انا بردو هيجيلي نوم في اي يوم من غير ما اسمع صوتك
نور : تسلملي يا رب يا عيوني، يلا عشان متتأخرش
عمر : ماشي يا حبيبتي لا إله إلا الله
نور : محمد رسول الله
( بيحضن عمر نور و بيبوس راسها و بعدها بياخد الشنطه و بينزل)
بعد ساعتين بتخرج نور بشنطة هدومها و بتروح على بيت اهلها زي ما اتفقت مع عمر
- بعد مرور يوم كانت مامت عمر قاعده مع خالته و بنتها سمر
* يا حبيبي يابني يا ترا عامل ايه لوحدك في الغربه
+ههههههه ياختي ده مسافر اسبوعين و راجع ان شاء الله بالسلامه مالك مكبره الحكايه كده ليه
* والله ما بقدر يبعد عني ولو يوم
+ يا سلام اومال متجوز ازاي يعني و قاعد في بيته؟
* ايوه متجوز بس هنا جنبي مش في بلاد بعيده
+ قوليلي صحيح هي مراته سافرت معاه؟
* لا سابها هنا قال ان هي تعبانه شويه وانه كده كده مسافر عشان شغل و بإذن الله هيرجع على طول ف مش محتاج يشحططا معاه
+ والنبي عمر قلبه طيب حبيب خالتو
” في الوقت ده كانت سمر بتبتسم بخبث بينها و بين نفسها و قالت : الحمدلله دي الامور بتتيسر اكتر و اكتر اهه و تلاقي طبعا الهانم هي اللي صممت تفضل هنا عشان تقابل عشيقها بس قريب اوي فضيحتك هتكون على ايدي يا نور و عمر هيرميكي ومش هيبص في وشك ”
++ بيعدي اسبوع و عمر كل يوم بيكلم نور يطمن عليها++
و في اثناء مكالمه بينهم نور بتطلب من عمر انها تقول لاهلها و اهله على موضوع الحمل عشان خايفه لو استنت اكتر من كده يزعلوا
عمر : يعني مش قادره تستني اسبوع واحد بس انزل و نقولهم مع بعض
نور : يا حبيبي والله انت عارف اني اكيد عايزه كده بس انا حامل اهه بقالي زيادة عن شهرين و لو عرفوا متأخر يمكن ياخدوا موقف يا عمر
عمر : خلاص ياستي قوليلهم بس ابقي صوريلي ريأكشناتهم عشان بحب التفاصيل دي
نور : ههههههه حاضر و هبعت اجيب مراسلين يسألوهم عن شعورهم بعد الخبر
عمر : هاهاها ماشي يا عسل، بصي رغم انك غلسه و بترخمي عليا بس وحشتيني اقسم بالله
نور : تؤ بتثبتني عن بُعد كمان يا اخي انت مش ممكن
عمر بغرور مصطنع : طبعا يابنتي هو انا اي حد ولا ايه
نور : شيبسي و كاراتيه
عمر : طب انا هقفل الخط عشان مجيش اقفل يومك دلوقتي
نور بضحك : ياعم بنضحكوا معاك ياعم مالك كده بقيت قفوش
عمر : انتي صح انا هروح انام انا يا عم الفرفوش
نور : حلو الكلام اللي عالقافيه ده، خلاص روح نام عشان عندك شغل الصبح بس قولي صح البت السكرتيرة الفرنساوية دي لسه هناك؟
عمر : لا طلعوها معاش
نور : انت بتتريق؟
عمر : ما اكيد يا نور ما انتي كل يوم بتسأليني نفس السؤال و بقولك موجوده ده انا بدأت احس انك امها و بتطمني انها مبتزوغش من المدرسه
نور : لا يا خفيف انا بتمنى تختفي بعيد عن طريقك ولا انت مبسوط و هي بتتمسح فيك طول النهار في الشغل؟
عمر : يالهوي عليا، يا ستي والله انا ما بقعد معاها نص ساعه على بعضها و بيكون في الاجتماعات يعني في وسط موظفين ادد كده
نور : عمر
عمر : قلبه
نور : عارف انا نفسي في ايه؟
عمر : ف ايه يا روحي؟
نور : نفسي ابلعك كده كلك على بعضك عشان محدش في كل الدنيا دي يشوفك و لا يقربلك غيري
عمر : بتحبيني يا هدى؟
نور : ههههههههه تؤ مش بحبك
عمر : يا شيخه!
نور : انا بموت فيك
عمر : طب انا اعمل ايه طب دلوقتي يعني اقوم ٱخد اول طياره و اجي طيب؟
نور : ههههه ياريت والله يا حبيبي انت وحشتني اوي
عمر : يابنتي ابوس ايدك انا مثبت نفسي بالعافيه والله انا مجنون واعملها و اسافر دلوقتي
نور بضحك : لا يا عمري خلاص كلها اسبوع و ترجع بالسلامه و تيجي لحضني
عمر : يدوم لي حضنك و قلبك يا نن عيني
نور : تصبح على جنه يا عيوني
عمر : وانتي من اهلها يا قمري
ستوووووووووووووب
( خلاص شبعنا حب و هيام و ضيق تنفس؟ 🤷♀️احب ابلغكم ان الرواية هتاخد منعطف تاني خالص و هنبدأ في جانب النكد المظلم منها هالحين ✋،يلا انجوي 😌)
عدا الاسبوع و عمر كان مبسوط جدا عشان خلاص هيرجع لنور و اثناء ما كان بيجهز شنطته فجأة جاله صوت رساله عالتليفون
فتح التليفون ولقى الرساله من رقم غريب على الواتس اب
فتح الرساله و كان مكتوب فيها : متستغربش من اللي هتشوفه ده و اعرف ان ربنا بيحبك و عشان كده حطني ف طريقك عشان تعرف حقيقة الانسانه اللي انت حبيتها و استأمنتها على شرفك و اسمك ، و كان مع الكلام ده صور لنور و هي قاعدة مع راجل في كافيه
اتصدم عمر من اللي شافه و بسرعه حاول يتصل على الرقم اللي بعتله الرساله لكن الخط كان اتقفل، عمر كان حاسس ان الدنيا كلها بتلف حواليه و كأن عقله هيطير منه، مكنش قادر يصدق الكلام اللي مكتوب بس في نفس الوقت مكنش قادر يستوعب اللي شافه في الصور
عدا اليوم على عمر كأنه سنه و جه ميعاد طيارته و فعلا ركب الطياره و سافر
في الاثناء دي كانت نور رجعت بيتها هي و عمر و كانت بتروق البيت و بتزينه استعدادا لرجوع عمر
بيعدي كذا ساعه و نور بتقلق ان عمر مكلمهاش لحد دلوقتي لانه المفروض يكون وصل فتجرب تتصل عليه بس قبل ما تتصل بتلاقي صوت الباب بيفتح و بيدخل عمر ، بتتفاجأ نور و بتجري عليه و بتحضنه
نور : حبيبي كده بردو متتصلش بيا ٱجي استقبلك في المطار، انت وحشتني اوي اوي
عمر بنبره بارده : انتي رجعتي البيت من امتى يا نور؟
نور بإستغراب من اسلوب عمر : من امبارح يا حبيبي قولت لماما اني هرجع عشان اجهز البيت عشانك ، مالك في ايه؟
عمر و عينيه يكاد يخرج منها شرار : و يا ترى كنتي بايته امبارح لوحدك؟
نور : ايه؟ يعني ايه؟
عمر : يعني انتي……
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية لن اعشق سواك)
