رواية لن اعشق سواك الفصل الثالث والعشرون 23 بقلم منى مرزوق
رواية لن اعشق سواك الجزء الثالث والعشرون
رواية لن اعشق سواك البارت الثالث والعشرون
رواية لن اعشق سواك الحلقة الثالثة والعشرون
نيره بدموع : ايوه يا نور، نيره اللي حياتك اتدمرت بسببها
نور : نيره انتي ملكيش ذنب
نيره : لا ليا يا نور و لولا انك وقفتي معايا مكنش ده كله حصل
نور : يا حبيبتي الحكايه اساسها مش فيكي انتي ولا في موضوعك
نيره بإستغراب : اومال في ايه؟
نور بإبتسامه مكسوره : في ان عمر معندوش ثقه فيا من الاساس
ٱيه : لا بقى يا نور معلش اسمحيلي انتي عايزه واحد يشوف و يسمع اللي عمر شافه و سمعه و مش هيشك
نيره : ٱيه معاها حق يا نور هو اكيد معذور بردو
نور : و الشخص المعذور ده ليه مرضيش حتى يديني فرصه ادافع عن نفسي؟ ليه كأنه ما صدق يطلعني خاينه
نيره : معلش يا نور اعذريه عشان خاطري و انا بإذن الله هصلح كل حاجه
نور : صدقيني يا نيره مبقاش فيه حاجه ينفع تتصلح في علاقتي انا و عمر خلاص بعد اللي حصل.. انا اللي اتكسر فيا حاجه كبيره اوي
*بتكتفي نيره انها تبص لنور بحزن و بتخرج من الاوضه*
___________________________________________
مالك : ايه اتفقتوا هناكل ايه؟
نيره : لا لسه
احمد : يعني كل ده بترغوا و في الٱخر مش هناكل؟
عمر بشك : مالك يا نيره شكلك متغير ليه؟
نيره : ها… لا مفيش انا بس حاسه اني مصدعه شويه بسبب الطريق، انا هخرج الجنينه اشم هوا
___________________________________________
نيره : ايوه يا رامي زي ما بقولك كده البيت قايم حريقه انا خرجت اكلمك في الجنينه بره
رامي : يا خبر اسود طيب اتصل بعمر و افهمه الموضوع ولا ايه؟
نيره : يا شيخ! تفتكر دي حاجه تنفع في التليفون يعني؟
رامي : طب قوليلي ممكن اعمل ايه عشان اصلح اللي حصل و هعمله
نيره : هقولك…..
___________________________________________
نور : تعالي ننزل تحت دلوقتي عشان اسلم على مالك و احمد و نقعد معاهم
ٱيه : ماشي يا نور بس الاول قوليلي هتعملي ايه ؟
نور : هعمل ايه يعني، ولا حاجه هفضل الست الخاينه الرخيصة لحد ما نيره و رامي موضوعهم يتعرف و عمر ساعتها ييجي يعتذرلي بكل أسف و السينما كلها تصقف
ٱيه : نور!
نور : لا بس استني ثواني انا هغير شويه في النهاية، اصلي ساعتها هقوم انا اللي اصقفله و اقوله خلاص كده فركش
ٱيه : ارجوكي يا نور بلاش تفكيرك يبقى كده، احنا لسه الموضوع في ايدينا
نور : لا يا ٱيه خلاص انا و لأول مره ٱخد قرار من غير ما احس بأي تردد او ضعف…. يلا بينا ننزل
ٱيه بحزن : يلا
___________________________________________
احمد : ياااه اخيرا نزلتي لنا يا نور، طب والله كان فاضل شويه و انا و الراجل الطيب ده نقول انك مش عايزه تشوفينا
مالك : وربنا ما حصل انت كداب ياسطا
احمد : ايوه معاك حق نسيت انك معدوم الكرامه و الحاجات دي مبتأثرش معاك
ٱيه : بسسس ما تخفوا رغي شويه
نور : ههههههههه طب ادوني فرصه اسلم عليكم طيب
مالك : عامله ايه يا نور؟ وصحتك عامله ايه دلوقتي؟
نور : الحمدلله يا مالك انا بخير والله
احمد : قلقتينا عليكي يا ست، بس بقولك ايه انتي لازم تاخدي بالك من نفسك عشان الاستاذ او الاستاذه اللي هيشرف ده يخصنا كلنا
نور بإبتسامه : خير بإذن الله
مالك : صحيح يا نور مفكرتوش في اسماء عشان البيبي؟
نور : لا لسه
احمد : انتو هتروحوا تعرفوا ولد ولا بنت امتى؟
*ٱيه حست ان نور اتوترت من كلامهم و حبت تغير الموضوع* و ردت : خير انتو كنتو بتحوشوا الاسئله من شهر ولا ايه؟ ما تخفوا شويه عالبت
احمد : ماهو بصراحه احنا كنا مستنيين الحدث التاريخي ده يحصل من زمان اصل مش كل يوم هنبقى عمو يعني
عمر : طب يا ابو عمو انت وهو كفاية اسئلة حريم السلطان دي و خلونا في الغدا انتو مش كنتو هتموتوا عالاكل
نور : تحبوا اعملكم سمك ولا……
بيقاطعها مالك : لا لا انسي كلمة تعمليلنا دي، قولي انتي نفسك في ايه وانا و احمد و عمر باشا عليناا الطلعه دي
نور : ربنا يخليك والله بس مينفعش يا مالك انتو جايين من سفر
مالك : لا ميهمكيش سفر ايه هو احنا يعني مسافرين على جِمال دي عربيه يا نور
احمد : ياستي قَصَري و قولي بس نفسك تاكلي ايه و احنا هنتعامل بس انجزي عشان شويه و هبلعكم
نور بضحك : طب خلاص خلاص، هو عموما كلنا بنحب اللحمه المشوية و دي الاكله الوحيده اللي محدش هيختلف عليها، ولا ايه رأيك يا ٱيه؟
ٱيه : معاكي طبعا يا قلبي
احمد : اشطه جداا انا اشتريت، قوموا يلا يا باشا منك ليه و خلينا نبهرهم بأحلى حتة لحمه مشويه هياكلوها
مالك في سره : وربنا انت اول واحد هيحرق الاكل و احتمال البيت كله
عمر بيضحك : الواد مالك قصف جبهتك قصف ثلاثي الابعاد
احمد : ماهو مش هينفع ارد هنا عشان مراتك واقفه
عمر : طب و بالنسبة لخطيبتك؟
ٱيه : لا انا اعتبروني مش هنا عادي خدوا راحتكم
عمر : طيب يلا نخرج احنا الجنينه نولع الفحم في الشوايه بره
مالك : تمام يلا
*بيخرج عمر و احمد و مالك للجنينه*
نيره : ايه ده انتو رايحين في حته؟
مالك : لا ياستي هنشوي لحمه هنا في الجنينه عشان الغدا
نيره : طيب تمام، انا هدخل انا اشوف نور و ٱيه
___________________________________________
مالك : يااه ما اجمل كوباية الشاي بعد الغدا العظمه ده
ٱيه : لا بس تسلم ايديكم الاكل فعلا كان جميل
احمد : طبعا يا حبيبتي اومال انتي فاكره ايه ده احنا شيفات على اصله
ٱيه : طب طمنتني الحمدلله كده انا ضمنت اني هعيش برنسيسه و انت اللي هتطبخ يا شيف يا صغير
احمد : احم لا بلاش تتعشمي اوي وبعدين ما عندك نور اهه جوزها كان بيعمل الاكل معانا بس هل هو اللي بيعملها الاكل في البيت؟
نور بإبتسامه حزينه : كتير بيعمل الاكل كتر خيره
عمر و هو باصص لنور بحده : اه يا ٱيه بس بلاش تتخدعي في كده عشان دي بتبقى شوية تفاريح و دلع في اول الجواز بس مش اكتر لكن بعد كده ده شغلك يا ماما
بتبص له نور بتحدي و بترد : ايوه يا ٱيه فعلا بلاش تتخدعي في حلاوة البدايات دي عشان اللي بييجي بعدها هيصدمك
احمد : ايه ده؟ مالكم يا شباب سودتوها على البت كده ليه لا مش كده يا ٱيه يا حبيبتي انا هدلعك والله ملكيش دعوه بالناس المعقده دي
ٱيه بضحك : طبعا طبعا اومال
*بعد ما بتعدي حوالي ساعه من كلامهم و ضحكهم*
احمد : طب يا شباب احنا كده عملنا اللي علينا يعني اتطمنا عليكم و اكلنا اكلكم و شربنا شربكم ف الذوق بيقول اننا نمشي بقى
عمر : يا راجل!
احمد : ايوه ياعم احنا منحبش نكون تقال على حد
مالك : احمد انت تقيل عالقشرة الارضيه نفسها
احمد : اكيد يعني لازم اكون تقيل عليها، ياض انا احمد صابر ياض
مالك : ايوه يعني بتبيع ايه؟
احمد : شيبسي و كاراتيه
عمر : لا هو كده انت اتأخرت فعلا يا احمد يا حبيبي ولازم تمشي حالا
مالك : طب خليني انا ابات معاكم يا اخويا يا حبيبي عشان انا كده لبست في الكائن اللزج ده لحد ما نوصل
احمد بصوت واطي و هو ماسكه من قفاه : طب وحيات امي اكشف لهم المستور و افضحك حالا
مالك متمثلا البراءه : احم يااه عليك يا احمد ده انا بهزر
احمد : ايوه كده اتعدل صحيح ناس متجيش غير بالعين الحمرا
عمر : هههههههههه طب بعيدا عن الهزار بطلوا رخامه و باتوا معانا النهارده
احمد : يعني بذكاء سيادتك يعني هبيت ٱيه هنا مثلا وابعت اقول لابوها بنتك بايته معايا النهارده يا حاج؟
عمر : هههههههههه معلش عندي دي انا نسيت ٱيه اصلا، لامؤاخذه يا ٱيه
ٱيه : لا يا عم ولا يهمك انت خليك في الليله اللي حواليك دول الاول
مالك : طب هي الليلة دي لازم تتحرك حالا عشان مينفعش نتأخر عن كده عشان الطريق
*بيسلم عمر و نور عليهم كلهم و بيمشوا*
– تاني يوم بيصحى عمر على صوت رنة موبايله
عمر : الو… ايوه يا افندم صباح الخير
المدير : صباح النور، عامل ايه يا عمر؟
عمر : تمام الحمدلله بخير
المدير : طب ايه يا استاذ مش ناوي تنزل الشغل بقى؟
عمر : ما انا كنت مقدم يا افندم على الاجازة و حضرتك…
المدير بيقاطعه : عارف يا عمر لكن حاليا في ضغط شديد في الشغل و خصوصا بعد ما وصل الشغل الجديد اللي جه من فرنسا
عمر : ايوه يا افندم بس….
المدير : مفيش بس، بعد اذنك يا عمر انا عايزك بكره تكون في الشركه، انت عارف اني بثق فيك و في كفاءتك
عمر : ده شرف ليا يا افندم شكرا
المدير : العفو دي الحقيقه، عموما بكره بإذن الله اول ما توصل لازم تيجي المكتب عندي عشان احدد معاك ايه اللي هيتم في الشغل الجديد
عمر : تمام يا افندم تحت امرك
المدير : يلا اشوفك بكره، سلام
عمر : سلام
*بعد ما بيقفل عمر الخط بيروح يخبط على اوضة نور*
نور بتفتح الباب : خير في ايه؟
عمر : في انك لازم تحضري نفسك و هدومك عشان راجعين بكره القاهرة
نور بفرحه : بجد؟
عمر و هو بيبص لها بضيق : ايوه بجد افرحي يلا عشان مكان عذابك هيتغير
نور بتعب : طب الحمدلله كويس بردو
*بيلف عمر ضهره ليها و بيمشي* و هو بيقول: اعملي حسابك احنا هنمشي من هنا على 7 الصبح يعني تكوني جاهزه من قبلها
*هزت نور راسها بالموافقة و قفلت باب الاوضه*
نور لنفسها : يا رب تكون دي خطوه عشان الحقيقه تظهر، يا رب انا مش عايزه اي حاجه غير ان برائتي تبان و يعرف انو غلط غلطة عمره و ضيع من ايده اكتر انسانه كانت وفيه ليه في كل الدنيا.
___________________________________________
*الصبح بيجهز عمر و نور للسفر و بيركبوا العربية*
بعد مرور ساعات من الصمت بينهم اخيرا بيوصلوا للبيت*
عمر بيرزع الشنط في الارض و بيقول : انا نازل رايح الشغل، ياريت لما ارجع الاقي الاكل جاهز و الشقه متنضفه
نور و هي بتغمض عينيها في محاولة لتهدئة اعصابها : حاضر، عايز حاجه تانيه؟
عمر بحده: لا
*بيخرج عمر و بيرزع الباب وراه*
نور بدموع : ساعدني يا رب ساعدني
___________________________________________
عمر : صباح الخير يا افندم
المدير : صباح النور، حمدالله على السلامه يا استاذ عمر
عمر : الله يسلم حضرتك
المدير : اتمنى تكون استمتعت بأجازتك
عمر : دي مكنتش اجازة للإستمتاع و لا استجمام يا افندم انا خدت اجازة عشان المدام عندي كانت عيانه شويه
المدير : الف سلامه عليها، طب هي احسن دلوقتي؟
عمر : احسن اه، انا بعد اذن حضرتك هروح على مكتبي عشان اشوف الشغل اللي عندي
المدير : تمام وانا هبعتلك ملف الشغل الجديد بتاع فرنسا
عمر : تمام
*بعد ما بيخلص عمر شغله و قبل ما يمشي من الشركه ب نص ساعه جاتله مكالمة تليفون*
عمر : الو
نيره : الو، ازيك يا عمر
عمر : الحمدلله يا حبيبتي انا كويس انتي بخير؟
نيره : اه الحمدلله… احم انا كنت بس يعني عايزه اطلب منك حاجه
عمر : خير يا حبيبتي حاجة ايه؟
نيره : انا كنت عيزاك تقابلني في كافيه….. انا عارفه انه قريب منك
عمر : طب ما تيجي البيت عندي ليه كافيه؟
نيره : معلش يا عمر انا عيزاك في حاجة خاصه و مش هينفع في البيت
عمر : ماشي زي ما تحبي ، طب انتي عيزانا نتقابل امتى؟
نيره : دلوقتي ارجوك
عمر : انتي قلقتيني، هي حاجة مستعجله؟
نيره : هي حاجة مستعجله اه بس متقلقش
عمر : طب انا ربع ساعه بالظبط و هكون في الكافيه
نيره : ماشي
*بيوصل عمر الكافيه و بيلاقي نيره قاعده مستنياه*
عمر : ايه يا حبيبتي عامله ايه؟
نيره : الحمدلله انا تمام
عمر : المهم قوليلي مالك فيكي ايه قلقتيني عليكي
نيره : مفيش والله انا الحمدلله كويسه انا بس كنت عايزه
بيقاطعها عمر : كنتي عايزه تعملي فيا مقلب ولا ايه؟
نيره بإبتسامه : لا انا كنت عايزه اتكلم معاك في حاجة
عمر : طب ما تقولي يابنتي حاجة ايه تعبتيني
نيره : نور
عمر بإستغراب : مالها نور؟ ضايقتك في حاجة؟
نيره : ضايقتني؟! نور عمرها ما تضايق حد ابدا يا عمر
عمر بضحكة سخرية : اه فعلا معاكي حق
نيره بحده : ايوه يا عمر هو ده الحق و هي دي الحقيقة اللي لازم تعرفها، نور مراتك اشرف من الشرف و عمرها ما خانتك ابدا
عمر بذهول : ايه؟! انتي جبتي الكلام ده منين ؟ هي اللي قالتلك مش كده؟ *بزعيق* انطقي يا نيره
نيره : لا يا عمر مش هي اللي قالتلي انا سمعتها بالصدفه وهي بتحكي لٱيه
عمر : الله اكبر يعني كمان رايحه تحكي لصاحبتها على فُجرها و خيانتها؟ صحيح اللي اختشوا ماتوا
نيره بصوت عالي : اسكت بقى اسكت حرام عليك يا اخي، اللي بتتهمها بالفُجر و الخيانه دي انضف انسانه في الدنيا، اللي متعرفوش يا استاذ عمر ان مراتك كانت بتحميني انا و بتساعدني عشان اكون مع اللي بحبه
عمر : ايه؟ يعني ايه الكلام ده انتي بتقولي ايه؟
– بتقول الحقيقه يا استاذ عمر
*بيبص عمر وراه على مصدر الصوت*
بيقوم عمر بغضب : انت؟! و كمان جايلي برجلك يا ابن ال$@# (و قبل ما يقرب عمر ايده منه عشان يضربه بتلحقه نيره)
نيره : ابعد ايدك يا عمر، انت عارف ده يبقى مين؟
عمر و هو بيبصلها بغضب : يبقى اللي مراتي استغفلتني و خانتني معاه
نيره : لا يا عمر ده يبقى حبيبي اللي مراتك كانت بتساعدني انا و هو عشان ييجي يخطبني قريب
عمر بصدمه : ايه؟
نيره : اللي سمعته يا عمر، انت ظلمت مراتك و ظلمتنا و ظلمت نفسك
*عمر مكنش قادر ينطق و اكتفى بإنه هز راسه بالموافقة ل نيره و خرج من الكافيه*
رامي : تفتكري هيعمل ايه دلوقتي؟
نيره : معرفش هو شكله ميطمنش بس… بس هو لازم يصلح اللي عمله ده تحت اي ظرف
___________________________________________
*بيوصل عمر البيت و اول ما بيدخل بيلاقي نور واقفه في المطبخ*
نور بتبصله و بترجع تبص للأكل اللي بتعمله
عمر وهو بيبص لها و ٱثار الصدمه لسه باينه عليه : ليه مقولتيليش؟
نور : ايه؟
عمر بصوت عالي : ليه مقولتليش يا نور؟
نور و الدموع اتجمعت في عينيها بعد ما فهمت انه عرف الحقيقه : مكنش ينفع عشان مكنتش عايزه اكون سبب في تعاستهم، مكنتش عايزه اكون سبب في تعاسة اختك
عمر كسر الفازه اللي كانت على الترابيزه جنبه : يعني ايه متكونيش سبب في تعاستهم؟ يعني عشان تسعديهم تخلي حياتي و حياتك جحيم؟
نور بنرفزه : انا مخلتش حياتك جحيم، انت اللي مدتنيش فرصه حتى ادافع عن نفسي، انت اللي حكمت عليا بدم بارد و طلعتني خاينه و ساقطه
عمر و عينيه احمرت من الغضب : يعني كنتي عيزاني اشوف صور مراتي مع واحد و اسمعها بتكلمه في التليفون و بتطمنه كمان اني مش هعرف بكلامهم و اكون ساعتها انسان هادي و اتعامل كأن شيئاً لم يكن؟
نور : انت فكرت للحظه مين هي مراتك اللي بتتهمها دي؟ طب محستش للحظه اني ممكن اكون مظلومه وان كل ده سوء فهم منك انت؟ للدرجة دي انت ثقتك فيا و ف شرفي معدومه؟
عمر بدموع : غصب عني يا نور، انا كنت زي المجنون، انا كنت عامل زي الطير اللي بيتدبح كل يوم بسكي*نه تلمه
نور : كل اللي اقدر اقولهولك ان اللي حصل ده اثبتلي حاجه واحده بس
عمر : حاجة ايه؟
نور : ان انا و انت حياتنا مع بعض مستحيله و ان وجودنا سوا من الاساس كان غلطه
عمر بذهول : انتي بتقولي ايه؟
نور : اللي سمعته، انا رايحه على بيت اهلي دلوقتي يا عمر، انا كنت صابره و مستنيه لحد ما الحقيقه تظهر و كل حاجه تبان عشان ارجع بيت اهلي و راسي مرفوعه، و اهه حصل الحمدلله،دلوقتي انا مش طالبه منك غير حاجه واحده و ارجوك يا عمر تنفذهالي……… طلقني يا عمر
عمر :……….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية لن اعشق سواك)
