رواية للحبيب حبيب تاني الفصل السادس 6 بقلم شهد محمد جادالله
رواية للحبيب حبيب تاني الجزء السادس
رواية للحبيب حبيب تاني البارت السادس
رواية للحبيب حبيب تاني الحلقة السادسة
_فينك؟
_في كافيه جنب البيت بشرب القهوة
_فطرتي؟
_والله لسه يا ياسمين مش عارفه افطر إيه
_اجيلك ونفطر كرواسون وقهوة
_كرواسون وقهوة إيه دول اللي نفطر بيهم إحنا مينفعش معانا غير عربية كبده عربية فول وطعمية ده الفطار التمام
_عايزه اخليكي واحده هاي وانتي مصممة إنك تبقي بيئه
_معلش
_ومش في الشغل دلوقتي ليه؟
_صدعت هشرب القهوة وبكمل شغل
_طيب نتقابل بليل
_أتفقنا
بقولها وبقفل معاها وبكمل فنجان قهوتي
مش عارفه العالم هو اللي مزعج ولا انا اللي بحب الهدوء
بس الفتره دي مش بقدر استحمل اي صوت عالي ولا بقدر اتكلم ولا اناهد مع حد يا سلام لو الاقي شغل مفيهوش كلام نهز راسنا فيه وبس ..
بخلص شغلي وبطلب قهوة تاني بس بطلبها تيك واي وباخدها وبروح اجيب شادي من الحضانة
_عملت إيه بقى انهارده
_لعبت كوره وجبت جون
_برافو على اشطر كتكوت وإيه كمان؟
_واكلت سندوتشاتي كلها وإياد كان عايز يلعب مع يارا بالعافية وانا ضربته
_ضربته !! ليه كدا يا شادي
_مامي يارا كانت بتعيط هو بيلعب لعب وحش وبيكسر الحاجات انا انقذتها
_نقول للميس مش نضربه انت ضربته عشان كنت غيران على يارا صح؟
_غلط لو يارا كانت عايزه تلعب معاه هسيبها بس هي مش عايزه كانت بتعيط يبقى انقذها
_ماشي يا عم المنقذ بعد كدا تقول للميس متتصرفش من دماغك
_سوري مامي
_بكرا اديك شكولاته تديها للولد اللي ضربته وتقولوا سوري اوكي؟
_حاضر
_شاطر يا حبيبي قولي عايز تاكل إيه إنهارده بقى؟
_برجر ومكرونة وايت صوص وجمبري
_التلاته مع بعض
_خلاص برجر وبطاطس
_اه معقول كدا
_والحلو ايس كريم
_هو ممنوع بس ماشي نحتفل بالجون اللي جبته انهارده
_هييييه
ببتسم ليه وباخده وبنروح للماركت بجيب كل الحاجات الي هحتاجها وبرجع للبيت
انا بقف اعمل الأكل وبسيبه هو بيذاكر
ولما بخلص بيكون نام
بقعد في البلكونة مستنيه ياسمين تيجي ناكل كلنا سوا
بولع سيجاره وبسرح في الفراغ وعيني بتيجي على البرواز اللي فيه صورتي مع سيف وبقيت الشله ، لحظة إدارك إن الزمن جري ومفضلش حاجه من معرفتنا
ببعض غير شوية ذكريات
بيقطع شرودي صوت جرز الباب بقوم افتح وانا عارفه إنها ياسمين
_كل ده
_مفجأءه تخيلي حصل إيه
_جالك عريس
_ياستي لأ دي حاجه احلى واجمل وأروع
_اترقيتي في الشغل؟
_احلى وأروع
_خالتك هتتجوز؟
_والله !!
_طب ماتقولي يا ياسمين
_اتفتح فرع لشركتنا في إسطنبول
_حلو ده الف مبروك
_سبيني اكمل
_كملي
_الفرع ده بقى فيه فريق هيشتغل فيه تحت إشرافي انا يعني هسافر إسطنبول
_واو مبروك يا عيوني
_ومش كدا وبس مسموح ليا اخد معايا حد يسافر معايا وهاخدك انتي وشادي
_بس يا ماما
_بس إيه بقولك إسطنبول وكل حاجه على الشركه تذاكر وفندق حد يقول للعز لأ يا بومه
_روحي انتي شوفي شغلك انتي مش رايحه تتفسحي
_لأ رايحه اتفسح واتصور واشوف البيت اللي كان عايش فيه مراد وحياة وهاكل من اكلهم بقى وامشي في شوارعهم
_من الواضح كدا إنهم اختاروا الشخص الغلط
_تعالي معايا يا نادين دي إسطنبول عارفه يعني إيه إسطنبول يعني تركيا ويا سلام بقى نلاقي عرسان هناك اتنين أصحاب ونتجوزهم
_فوقي من عشق الزين الي انتي فيه ده صحي الواد خلينا ناكل
_هتيجي معايا لازم تيجي اهو نشوف مناظر جديده ونتصور في أماكن جديده ولو مش عشانك يبقى عشان شادي يغير جو بدال الروتين الممل ده
_ناكل ونشوف الموضوع ده
_عامله اكل إيه؟
_برجر وبطاطس ومكرونة بالصلصة
_طيب هصحي حبيب خالتو
بتقولها وبتروح تصحي شادي وبنقعد ناكل سوا وبحكيلها على الجون اللي شادي جابه وأننا هناكل ايس كريم عشان نحتفل بيه
وبعد ما بنخلص أكل بتاخد شادي وبتنزل بيه عشان يجيبه الآيس كريم سوا وانا بقف اغسل الأطباق اللي اكلنا فيها
وشوية وبتطلع ياسمين وشادي وبتفجاء بــ شادي وهو بيقول:
_بليز يا مامي نسافر مع خالتو ياسمين
_لحقتي تعرفيه؟
_يا نادين هو في حد عاقل يرفض سفريه زي دي بطلي خنقه بقى
_بليز يا مامي عشان خاطري نفسي اروح اوي عشان خاطري ومش عايز ايس كريم لو روحنا يبقى ده الاحتفال
بتنهد بقلة حيلة وببص ليهم وبقول:
_أمري لله ماشي هنروح وهناكل الآيس كريم بردوا
بيفرح هو وياسمين وبيرقصه سوا من الفرحه وبنكمل سهرتنا والاحتفال البسيط
وتاني يوم بحاول اخلص الشغل وكل اللي ورايا عشان السفر وبعرف عزت إننا مش هنكون موجودين في القاهره الفتره الجايه
وفي آخر اليوم بنجهز الشنط سوا وبنروح للمطار كان بقالي كتير مسافرتش ولو سافرت مبيكنش بره مصر
حاجه جديده عليا بس مين يعرف مش هناك ممكن الاقي حاجه ضايعه مني مثلآ!
بنركب الطياره وياسمين وشادي بيتخانقه على الكرسي اللي جنب الشباك
_وبعدين معاكم انتوا الاتنين والله اخد الشنط وارج تاني عادي
_خلاص يا نادين يقعد هو وأمري ل الله
_طفله مسافره مع بنت اختي
_مقبوله منك ياروحي
بنقعد وبشغل ل شادي كارتون عشان ميحسش بملل وبطلب من المضيفة قهوة وبتبدا رحلتنا لـ إسطنبول
_ندوش
_اممم
_كمليلي بقيت الحكاية
_يعني ده وقته؟
_اه وقته لسه قدامنا وقت عقبال ما نوصل نسلي وقتنا
_طيب وقفنا عند إيه؟
_لما سيف قالك انه هيعرفك على كاميليا
_ااه افتكرت
“فـــــلاش بـــــااكـ”
في اليوم التاني بعد ما بيصالحني بيكون متفق معايا يعرفني على كاميليا
حاولت اعمل اسكيب لمشاعري عشان مينفعش اعاتبه او ازعل منه على حاجه هو مالوش ذنب فيها
وبلبس اوت فيت مريح وبلم شعري وبننزل نتقابل كان في كافيه انا وهو دايمآ بنقعد فيه
_لسه مجتش؟
_زمانها على وصول المهم
_مش قصدي بس بشويش عليها
_حاضر يا حنين
_اهي قمر حياتي اهي
بيقولها وبيقوم يجيبها من على باب الكافيه وبيجي بيها للترابيزه اللي قاعده عليها
_دي بقى يا ستي نادين اللي حكتلك عليها اختي وبنت خالتي وبنت عمتي وخالتي وامي وعمي كل القرايب يعني
بتضحك برقه وبتتكلم بصوت لطيف وبتقول:
_سيف كلمني عنك كتير
_وكلمني عليكي كتير بردوا عملتي في إبننا إيه ها؟
_ولا حاجه
بتقولها بهزار وبنتعرف على بعض
مش هنكر البنت لطيفه وظريفه وتتحب
وحلوه ملامحها لذيذه كانت طول القاعده عينه عليها عينه بتلمع لما بيبصلها انا خدت بالي من نظراته ليها
وفي آخر اليوم بناخد ارقام بعض وبيوصلني انا الأول بعدين بيوصلها
في الحالات اللي زي دي احب إني اقص شعري جدآ
بقف قدام المرايا بقص شعري هو كان طويل بس مش اوي بخليه لحد وداني
ومتسألونيش عملت كدا ليه انا معرفش
وبعد ما قصيته باخد الطفاية وسجايري وبقف في البلكونة
كان دخان السيجاره بيطلع على هيئة كلام فوقي ، مبيحبكيش ، مش واخد باله من وجودك ، قلبه مش ليكي
زعلي بيكون هادي ودي اكتر حاجه خوفتني لأني عمري ما كنت هاديه في زعلي
وبتعدي الأيام انا بهتم بشغلي وبـ بابا وهو كل يومين معاها ويجي يحكيلي عن الجديد في حياته
لحد ما في يوم بيرجعلي بليل في المكتبة والفرحه مش سايعاه
_خير
_قالتلي بحبك
_كل ده مكانتش لسه قالتها
_قالتها انهارده وقرارت إني هاخدك انتي وسوسو ونروح نتقدملها
_بتهزر يا سيف انت عايز تتجوز؟
_لأ مش عايز اتجوز انا عايز اتجوزها هي
_معقوله !!
_اه آخر الحب إيه غير جواز
_بجد فرحتلك اوي اخيرآ هنفرح بيك سوسو مش هتصدق لما تعرف
_يلا نطلع نحكيلها
_لأ انا عندي شغل روح انت وشوف امتى هتروح تتقدملها وانا هاجي معاك يا حبيبي
بيبتسم ليا وبيقرب مني بيبوس راسي وبيقول:
_عقبال ما افرح بيكي يا حبيبتي
ببتسم ليه وبيمشي وبقفل المكتبة وبطلع على البيت بشرب سجاير كتير علبتين تلاته او اكتر مش فاكره كام
بس كنت زي المجنونه بحرق في سجاير عندي امل إن الخنقه اللي حاسه بيها هتطلع في الدخان بس مطلعتش !
بيبعتلي مسدج إنهم هيروحه بكرا عشان مامته مستعجله إنها تشوفها
برمي التيلفون على الأرض وبقف قدام المرايا وانا بعيط وبزعق
_طب إزاي إزاي !!!!
بفضل على الحاله دي لحد نص الليل لحد ما بتعب وبنام في الأرض وانا عيني على السقف وحاسه بقلبي اللي هيخرج من مكانه
عارفين لو كان قلبي بعيد عن الموضوع كنت هعرف اتأقلم انا اعقل من كدا بكتير بس اي تصرف بيحصل بيكون تحت تأثير قلبي وانا قلبي غبي .
في اليوم التاني ببقى مضطره إني ابان عادي جدا واتعامل عادي
بلبس وبخبي عيوني بكونسيلو وبخبي مشاعري بـ شوية كلام قاسي عشان افوق
وبنزل ليهم بيكون واقف لابس بدله شيك ومعاه بوكيه ورد ومستنيني
ببتسم ليه وبنسى إن كل الشياكه دي مش ليا والورد مش عشاني حتى فرحته مش ليا بس بفرح بيه
اصل عيب اوي ابقى امه التانيه ومفرحش بــ ابني في أهم يوم في حياته
برغم إنه أطول مني وعنده دقن وطول بعرض لكن هو إبني
بيجي الأوبر وبنروح كلنا سوا بزغرط كتير وبنتصور كتير لحد ما بنوصل لبيت كاميليا
بنسلم عليهم وبنقعد كان متوتر مش عارف يبدأ منين عينه رايحه شمال ويمين عايز يشوفها
بتبدأ سوسو اللي تتكلم وبتقول:
_طبعآ حضرتكم عارفين إحنا هنا ليه انهارده
وبنكمل كلام انا وهي عشان نلطف الجو وبيتكلم سيف بيعرفه هو مين وبيتشغل إيه وكل الأمور المطلوب دي
لحد ما بيرد باباها وبيقول:
_انا سعيد بمعرفتك يا سيف انت شاب مكافح وقد المسؤليه بس للأسف الجواز قسمه ونصيب طلبك مش عندنا
“بـــــاكـــ”
من كابتن الطائره الي الساده الركاب نحن الآن نحلق فوق اراضي
” إسطنبول ”
_بتهزري موافقش يا نادين
_اه
_يعني سيف متجوزهاش في الاخر
_لأ
_يا خبر طب وبعدين
_ننزل يا ياسمين بعدين هحكيلك
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية للحبيب حبيب تاني)
