رواية للحبيب حبيب تاني الفصل الحادي عشر 11 بقلم شهد محمد جادالله
رواية للحبيب حبيب تاني الجزء الحادي عشر
رواية للحبيب حبيب تاني البارت الحادي عشر
رواية للحبيب حبيب تاني الحلقة الحادية عشر
بتنزل ياسمين تجيب شادي من عزت وبتطلع تقعد معاه شويه لحد ما بينام وبترجع تقعد معايا تاني
_مش هسيبك غير لما تكمليلي بقيت الحكاية وهتخلص انهارده يا نادين
ببتسم ليها بولع سيجاره وبروح ناحية المكتبة اللي عليها البرواز اللي فيه صورة الشلة كلها وبقول:
_هي تعتبر خلصت
_بتهزري
_اه والله من بعد ما كاميليا خذلت سيف مره تانيه من يومها وهو مبقاش سيف كل وقته في الشغل وبس حتى كلامنا مبقاش زي الأول بنعرف اخبار بعض وبس انا فاكره كويس اخر كلام بينا كان خناقة
_بسبب إيه؟
_وقتها بابا كان تعبان اوي كان في أيامه الأخيره هو جالي وزي كل مره كان محتاس يرجع يدي فرصة تانيه لـ دينا ولا لأ وقتها مقدرتش امسك نفسي زعقت فيه قولتله انت أناني وإني تعبت منه وانه طول عمره يهمه مصلحته هو وبس زعل مني ومشي
_كان يعرف إن باباكي تعبان؟
_لأ مكنش يعرف بس عارفه لما تبقي مخنوقه ونفسك حد يحس بيكي وفي نفس الوقت يجي هو بالمشاكل العبيطه بتاعته يزود همك
_فاهمكي ، بعدين إيه حصل؟
_يومها سابني ومشي وفضلت انا مع بابا في المستشفى يومها مات ومكنتش عارفه اعمل إيه ولا اروح فين رنيت عليه كان موبايله مقفول روحت البيت مالقتش حد وكلمت أعمامي في البلد العزا اتعمل عندهم واتدفن بابا عندهم ورجعت للقاهرة تاني وبردوا معرفتش حاجه عنه تيلفونه مقفول مش موجودين في بيتهم ولا كأنه كان موجود
_إزاي يعني اختفى!
_معرفش دورت عليه كتير اوي حتى روحت شرم للمعرض بتاعه وعرفت انه باعوه في نفس اليوم اللي كان جاي يحكيلي فيه وقتها عزلت عشان البيت من غير بابا كان وحش اوي واعترفت على عزت واتجوزنا وجبنا شادي ولحد إنهارده معرفش حاجه عن سيف
_إزاي إزاي بجد!!
_عدت سنين يا ياسمين دورت عليه كتير اوي حتى على السوشيال ميديا بس مفيش اثر ليه ومن اليوم ده وكان خلاص خلصت حكاياتنا
_تفتكري هو كمان حاول يدور عليكي؟
_اكيد اه حاول بس موصلش حتى اصحابنا المشتركين من وقت ما اتخرجنا محدش يعرف عن التاني حاجه
_كان نفسي القصة تكون نهايتها احسن من كدا
_القدر بقى ، اتمني يكون سعيد في حياته دلوقتي
بيقطع كلامنا رن موبايلي بتكون نسمه مامت يارا بستغرب بس برد عليها
_إزيك يا حبيبتي اخبارك إيه
_تمام الحمدلله إنتي ويارا عاملين إيه؟
_بخير الحمدلله كنت بكلمك اقولك إن فيه رحله تبع شغل جوزي لدهب انتي اكيد عارفه إن بابا يارا منظم رحلات قولت اقولك تيجي معانا يارا مصممه شادي يكون معاها
_هو مفيش مشاكل بس هتكون امتى؟
_بكرا الصبح يعني يدوب نتحرك دلوقتي
_بتهزري !
_عارفه إني بكلمك في الوقت الضايع بس حاولي عشان خاطري دول هما يومين بس
_طيب هشوف نظامي إيه وهرن أقولك
_تمام يا حبيبتي مع السلامة
بقفل معاها وبحكي لــ ياسمين على اللي حصل
_يدوب نحضر البوركيني والعوامه البطه والصن بلوك والنضاره و..
_اهدي يا ياسمين مش لما اشوف هينفع ولا لأ
_ومينفعش ليه هنروح حد يقول للبحر لأ وكمان دي دهب مش اي بحر
_مش حاسه إني عايزه اروح
_متبقيش بومه بقى يلا نحضر الشنط اهو نغير جو وابنك ينبسط ونتصور كام صوره حلوين
_طيب هكلمهم في الشغل استأذن على اجازه
_وانا هصحي شادي اقولو ده هيفرح اوي
بتقولها وبتروح تصحي شادي وأنا بكلمهم في الشغل وبعدها بكلم نسمه بعرفها إني هكون معاها وبحضر الشنط مع ياسمين
وبننزل من البيت على الساعة واحده بنركب مع نسمه وعيلتها السوبر جيت
كانت أجواء لطيفه اغاني وهزار والأولاد مبسوطين بس مكنتش عارفه انبسط زيهم
غالبآ انا كبرت وضاع شبابي مش اي حاجه تبسطني ولا اي حاجة بترجع شغفي ناحية الحياة
بعد عشروميت كمين بنوصل اخيرآ لدهب بنريح شوية في الفندق وبلبس دريس فوشيا عليه ورود بيضه وميكب بسيط وبننزل انا وياسمين وشادي
بنسيب الاولاد يلعبوا وبنقعد مع نسمه وقرايبها
_بليل بقى فيه حفلة على يخت تحفة هنروح كلنا فيه
_انتي ناوية تفرهدينا يا نسمة
_وفيها إيه يا نادين خلينا ننبسط
بترد عليها ياسمين وبتقول:
_هي نادين على طول كدا شايله طاجن ستها سيبك منها قوليلي هنلبس إيه بليل
بضحك وبسيبهم وبقوم بقف على البحر شوية وبرجع ليهم اقعد معاهم تاني
جزء بيرقص مع الأغاني وجزء في البحر وانا ونسمه اللي قاعدين سوا عنينا على الأولاد
بتيجي بنوته جميله إسمها أصيل بتعمل خصل الوان في الشعر
بتعمل ليا خصلة بينك وبتعمل لنسمه كمان
_كدا حساني من دهب اوي
_شكلها لذيذ عليكي يا نادين
_وعليكي انتي كمان حلوه
_قوليلي بقى مفكرتيش تحبي تاني من بعد بابا شادي؟
ببتسم ليها وببص للبحر وبقول:
_لأ انا محبتش في الدنيا غير عيالي الاتنين
_إيه ده انتي عندك اولاد غير شادي
بستوعب انا قولت إيه وبكمل كلامي وبقول:
_قصدي ياسمين مانا بعتبرها بنتي
_ربنا يخليكم لبعض
_حبيبتي ويخليكي
بنكمل قعدتنا مع كوبايتين شاي وبنرغي شوية وبيجي وقت الحفلة بنطلع كلنا نغير هدومنا
بس مبكونش قادره اروح معاهم ياسمين بتصمم لكن مبوافقش بسيبها تروح هي وشادي
وانا بغير الدريس بلبس إسيكيرت زرقه على بلوزه بيضه وميكب بسيط وشعري ويفي وبنزل اقعد قدام البحر بطلب قهوة وبحاول انسجم
بيقطع روقاني رن موبايلي وبتكون ياسمين
_عايزه إيه؟
_عارفه مين على اليخت؟
_مين
_سيف
_بطلي هزارك ده وسيبيني اقعد شوية مع نفسي
_انا بكلمك بجد هو اللي منظم حفلة اليخت ماسك كل الرحلات اللي على اليخت غالبآ
_انتي بتقولي إيه؟
_والله هو تعالي وشوفي بنفسك بس بسرعه عشان اليخت عشر دقايق وهيطلع
_طيب جايه
بقفل معاها وبجري بالهفه مكنتش عارفه هتصرف إزاي لو طلع هو او لو طلعت بتضحك عليا عشان بس اجي !
كنت بجري بكل ما فيا عايزه اوصل عايزه اشوف ابني شكله بقى عامل إزاي اخباره إيه من غيري ..
واخيرآ بوصل وانا بنهج بطلع لليخت وانا بدور عليه بعيوني لحد ما بلاقي ياسمين واقفه وبتشاور عليه
كان واقف مديني ضهره وقدامه شادي إبني ويارا بيتكلم وبيقول:
_يعني مينفعش اخد اتنين شكولاته يا عمو؟
_هديك اتنين شكولاته وانت تديني البنوته الحلوه دي
ببتسم وبقول:
_سيف
بيلف ليا وشادي بيشوفني وبيجري عليا
_مامي
بحضن شادي وبشيله وهو كان واقف مذهول مبتسم مستغرب نظراته كانت بتقول حاجات كتير
بيجي لعندي وبيبص لشادي وبيقول:
_ماما !
ببتسم ليه وبهز راسي بمعنى اه
بيبص لـ شادي وبيقول:
_امي من قبلك انا إبنها البكري صح ولا مش صح؟
بتكلم بفرحه وانا عيني مدمعه وبقول:
_إبني وإبن عمري كمان
بتيجي ياسمين تاخد شادي مني وبتسيبنا لوحدنا
_عايز اخدك بالحضن بس خايف اكون كبرت في نظرك ومبقتش ابن ليكي ولا جوزك يشوفني وميعرفش صدق مشاعري
_انا وبابا شادي منفصلين
_يبقى ادخل في حضن اخوك يا فواز
بيقولها وبيشدني ليه بيحضني قدام كل الناس ، كان حضن كله شوق ولهفه وحنية
زي ما يكون معاه رجعتلي تاني روحي وحياتي ودنيتي
بيعتذر انه مش هيكمل معاهم الحفلة وبياخدني وبننزل من اليخت بنقعد على الرمله قدام البحر
كنا ساكتين بنبص لبعض وبنبتسم وبس
شكله اتغير كتير عن زمان كبر بقى عنده كام خصلة شعر لونهم ابيض مزودين جمال على جمالو لسه وسيم وشيك ولسه قلبي بيدق لما بشوفه !
_بقيتي مامي امتى وانفصلتي أمتى واتجوزتي أمتى واحلويتي كدا أمتى
_انا طول عمري حلوه يا واد
_وانا اشهد على كدا بصراحة
_انت اللي اختفيت فين وحياتك دلوقتي عامله إيه اتجوزت؟
_محتاس يا نادين
بضحك من قلبي على الكلمة اللي لسه متغيرتش لحد دلوقتي وهو بيضحك معايا وبيبعد خصالات شعري بعيد عن عيني وبيفضل باصص ليا وهو ساكت ومبتسم وبيقرب لـ راسي بيبوسها وبيقول:
_زي واحد كان تايه ورجع ليه إحساس الأمان من تاني
_وحشتني اوي يا سيف
_انتي اللي وحشتيني اوي ودورت عليكي كتير وكالعادة كنت محتاس من غيرك ومالقتش حد يفهمني قدك
_هتقابل ستات كتير في حياتك بس كلهم نادين
_ده اكتر واقع في حياتي بقى
_احكيلي اختفيت فين؟
_من بعد اليوم اللي اتخانقنا فيه رجعت البيت وعرفت من امي إن كان ليها صديقه عايشه في إيطاليا تعبت ولازم يتعمل ليها عملية ومش معاها غير بنتها ومكانتش عارفه تتصرف امي كانت منهاره عليها سافرنا في أول طياره وأول ما وصلنا شنطتها اتسرقت كان فيها موبايلي وموبايلها والأوراق وفلوس وكل حاجه
_وبعدين؟
_أبدآ عرفنا نوصل لصاحبتها دي والعملية كانت هتكلف كتير بيعت شقتنا وبيعت المعرض ورجعت بالفلوس عشان تعمل العمليه وعملتها وللأسف ماتت
_ياخبر وبعدين حصل إيه؟
_امي تعبت فتره وبنتها انهارت ودخلت مصحة نفسية فضلنا معاها فتره ونزلت القاهرة اشوفك كنتي عزلتي وجبت موبايل جديد ورقم جديد رنيت كتير على رقم الأرضي كان غير موجود بالخدمة رجعت ليهم تاني وانشغلت في تفاصيل البنت دي واتجوزتها
_بتهزر انت اتجوزت يا سيف !
_وانفصلنا جوازي منها كان تعاطف مش اكتر مكناش شبه بعض خصوصآ إنها مش مصريه حاجات كتير عندهم عادي وانا حمش ودمي حامي
_طبعآ انت هتقولي
_بس ياستي انفصلنا بس مش أعداء يعني صحاب ولو احتاجت حاجه بكون معاها وفتحت شركة سياحة وبقيت بنظم رحلات واغلبية وقتي مسافر وكمان امي اتوفت ومن يومها بقيت وحيد وكنت بدور على حضن امي التانيه بس مالقتكيش
_سوسو ماتت !
_من تلات سنين
_بابايا كمان مات اخر يوم شوفنا بعض فيه
_بتهزري ومكنتش معاكي وقتها !
_القدر بقى كمل إيه تاني جديد في حياتك
_بس ياستي اكتشفت بقى إني مهما لفيت مش هلاقي زيك وانك كنتي ليا الأم والأخت وعارفه كمان محستش إني يتيم غير في غيابك
_انا معاك وجنبك وهفضل طول عمري معاك وهتفضل طول عمرك إبني البكري
_إبنك إيه بقى ما استاذ شادي خد الدلع كله خلاص
_كنت عايز تديله الشكولاته وتاخد منه يارا ها ؟
_الكتكوته العسوله دي اسمها يارا
_اه وتخص شادي خلي بالك متجيش جنب حاجات إبني
_طب مانا كمان إبنك يبقى نقسمها سوا
_إزاي؟
_هو ياخد يارا وانا اخدك انتي
_لسه زي ما انت يا سيف
_مش اوي يعني المهم احكيلي انتي بقى حصل إيه في حياتك
بحكي ليه عن كل اللي حصل من اخر مره شفته فيها وبحكي عن عزت اتجوزنا إزاي وانفصلنا ليه
_وكنت بحكي عنك لياسمين صاحبتي بقالي اسبوع بحكي كل يوم جزء من القصة وكانت نهاية القصه دي انهارده
_لأ بدايتها بقى إنتي لقيتيني وانا لقيتك
_ياه لو تعرف كنت محتاجك في حياتي قد إيه
بيبتسم ليا وبيقول:
_فاكره لما امي قالتلي إن احلى حضن للراجل حضن الست بتاعته قالتلي الحق يبقالك حضن حنين تترمي فيه
_اه فاكره
_انا بقى عايز تبقي انتي الحضن الحنين ده يا نادين انا لفيت كتير قابلت ستات كتير وانتي عارفه ده كويس بس مفيش واحده فيهم قدرت تفهمني وقدرت تكون ام ليا انا عايز اعوضك عن كل اللي فات تقبلي اكون ابن ليكي وأب لشادي؟
ببتسم نبضات قلبي بتزيد ، حلم ايام المراهقه بيتحقق اللي كنت مستنياه من سنين يحصل بيحصل انهارده
_انت تعرف انا مستنيه الكلام ده بقالي قد إيه؟
_يعني بتحبيني
_بص في عيني وهي تقولك
_بتقول إنك سعيده وفرحانه وبتحبيني وعايزه تبوسيني
_بطل قلة أدب عيني مقالتش كدا
بيضحك وبيمسك إيدي يبوسها وبيقول:
_ضيعت من عمري كتير والباقي مخليه علشانك
_من زمان وانا في كلمه نفسي اقولهالك
_إيه هي؟
_يا حبيبي ، كان نفسي اقولك يا حبيبي
_ده انتي اللي حبيبت عيني وحبيبت ايامي يا ناديني ..
تمت..
وفي النهاية نادين بقت مع الشخص اللي اتمنت إنه يكون من نصيبها ، القدر ده غريب اوي بيجمعنا بناس وبنفارق ناس بس واخيرآ الدار أصبحت امان
لقراءة الرواية كاملة اضغط على : (رواية للحبيب حبيب تاني)
