رواية للحبيب حبيب تاني الفصل التاسع 9 بقلم شهد محمد جادالله
رواية للحبيب حبيب تاني الجزء التاسع
رواية للحبيب حبيب تاني البارت التاسع
رواية للحبيب حبيب تاني الحلقة التاسعة
بتعدي الأيام في إسطنبول ياسمين بتشوف شغلها بالنهار وبليل بنخرج
كنت بتجنب كريم صاحب عادل على قد ما اقدر لحد ما بيخلص اسبوع الشغل على خير وبنرجع القاهرة سوا
_عندك إيه بكرا؟
_ولا حاجه وانتي ؟
_ولا حاجه بردوا
_خلاص بكرا بقى تعمليلنا ورق عنب ومكرونة بشاميل وحشني الأكل المصري يا نادين
_عيني حاجه تانيه؟
_مش واخده بالك إنك بقالك يومين مبقتيش تحكي حكاية سيف؟
_عشان مفيش وقت يا ياسمين
_دلوقتي إحنا فاضيين اهو احكي
_طب تعالي ننام جوه احكيلك وانا بنام
_يلا
بتقولها وبتيجي ورايا اوضتي وبتقعد وهي حطه إيديها على خدها بحماس زي الأطفال الصغيره
_وقفنا عند إيه؟
_انك هتحكي لـ دلال عن سيف
_ااه افتكرت
“فـــــــلاش بــــــااااكـ”
في اليوم التاني بتجيلي دلال زي ما اتفقنا بحضر ليها الفطار بطاطس سوري وشاورما وبعمل فنجانين قهوة وبنقعد في بلكونة اوضتي
وبحكي ليها كل حاجه عن سيف كل حاجه حتى عن كاميليا واللي حصل منها
_وبس كدا يا ستي لسه زي ما هو سيف الوسيم المجروح اللي لسه مش عارف ينساها
_مش نصيبه يا نادين
_انا فاهمه ده كويس بس هو بيفكر بـ قلبه وركن عقله عشان كدا الموضوع صعب عليه هو بس لو لقى البنت الصح هينسى كل اللي فات ده
_إن شاء الله ربنا يعوضه
_يارب يا دلال
بقولها وشباك اوضته اللي بيبص على بلكونتي بيتفتح وبيكون هو ، دلال بتفجاء وبتبصلي بضحك ليها وبقول:
_نسيت اقولك إنه جاري
بيتكلم هو وبيقول:
_بتعملوا إيه كدا من وش الصبح
_بنجيب في سيرتك
_ياساتر
بنضحك وبكمل كلامي وبقول:
_ماتيجي تفطر معانا
_لأ يدوب هحضر شنطتي رايح شرم دلوقتي
_في حاجه ولا إيه؟
_شغل جديد في المعرض
_اجي معاك؟
_تعالي وانتي كمان يا دلال لو حابه تغيري جو تعالي معانا مش هنتأخر تلات ايام بس وهنرجع
_خلاص هشوف واقولكم
_ماشي اسيبكم تكملوا كلام عليا
بيقولها وبيدخل اوضته وبناخد الموضوع بهزار انا ودلال وبعد شوية بتستأذن عشان شغلها
كنت واثقه إنها هتوافق تيجي معانا
وكنت شايفه في عينيها نظرات الانبهار بـ سيف برغم كل العيوب اللي حكيتها عنه
وبعد ما بخلص شغلي وبعرف بابا إني هسافر بترن دلال بتقول إنها جايه معانا
وبنروح كلنا على شرم ، روحنا الأول المعرض بتاعه خلصنا الشغل فيه
ووقفنا بره نشرب كوفي
كنت واخده بالي من نظراتهم لبعض
سيف كان بيقاوم مش اكتر او بيعاند !
_تعالي جنب الشجره الصور هتبقى تحفه
بيقولها لـ دلال وبيقف يصورها وبيقطف ورده من على الشجره بيحطها جنب ودانها من ورا الحجاب وبيكمل تصوير
مش هكدب عليكم كنت غيرانه بس مكنش ينفع اصل انا اللي جايبه دلال اصلآ
واصل انا قدامه من سنين لو كان حس بحاجه ناحيتي كان زماني معاه !
بنرجع كلنا للفندق هو في اوضه وانا ودلال في اوضه لوحدنا
_اتصورتي شوية صور حلوين انتي
_اه سيف شاطر اوي
_دي حقيقة
_كنت عايزه أسألك على حاجه
_إيه هي؟
_كاميليا دي كان شكلها عامل إزاي
_مجرد بنت حلوه مش اكتر ولا أقل
_هو حبها عشان إيه كان إيه مميز فيها؟
_مش عارفه احدد بصراحه يا دلال سيف كل يوم مع بنات أشكال وألوان دي بالذات اللي حركت قلبه
بتقلع طرحتها وبتقف قدام المرايا بشعرها كانت بتشوف نفسها او بتحاول تقنع نفسها انها حلوه احلى من كاميليا..
وهي فعلآ كانت جميله ، ببتسم ليها وبقول:
_من وجهة نظري إن انتي هتقدرى تنسيه كاميليا وعشره زيها
_تفتكري؟
_متأكده من ده
بتبتسم ليا بخجل وبنغير الكلام لمواضيع تانيه واخر النهار بننزل بيكون فيه حفلة في الفندق اللي إحنا فيه
بننزل إحنا التلاته وبيكون فيه ملل بحاول اكسر الملل ده وبقول:
_ما تقوموا ترقصه
_لأ انا مبعرفش
_سيف يعلمك
بيبص ليا وبيرجع يبص ليها وبيقول:
_لو حابه مفيش مشاكل
_هنضحك الناس علينا
_لأ متخافيش
بيقولها وبيقوموا سوا بيعلمها الرقص ولأول مره اخد بالي انه بيحاول يبعد إيديه عنها على قد ما يقدر بيحاول ميكنش فيه بينهم تلامس
برغم إن سيف مش كدا بس دلال خليته يبقى كدا
بستغل الفرصه وبسيبهم لوحدهم وبرجع انا الفندق بنام وبصحى على صوت دلال وهي بتصحيني
_مشيتي ليه؟
_كنت عايزه انام
_كان يوم زي القمر
بقوم بحماس بعدل قعدتي وبقول:
_احكيلي حصل إيه؟
_رقصنا شويه بعدين لما انتي مشيتي خرجنا ندور عليكي بس بصراحه نسيناكي واتمشينا على البحر كان فيه كافيه مشغل اغنية عامر منيب يا ملاك حبيت العمر معاك رقصنا عليها سوا لوحدنا على البحر وكمان كتب اسمي على الرمله وكمان جابلي دي
بتقولها وبتطلع من جيبها حاجه زي صَدف البحر مكتوب عليها حرفها
_الله جميله اوي
_هشتري ليها بقى سلسلة واحطها فيها
_مبسوطه يا دلال؟
_اوي اوي بجد اوقات بتمنى .. بتمنى انه يكون حبيبي
ببتسم ليها وانا بتنهد اه لو تعرف إن دي كانت امنيتي انا كمان !
بيقطع كلامي معاها مسدج منه بيقول فيها لو صاحيه انزلي نتكلم شوية
بسيبها هي تنام وباخد شال بحطه عليا وبنزل ليه كان قاعد في كافتيريا الفندق
بشد كرسي وبقعد قدامه بيولع لنفسه سيجاره وبيولع ليا انا كمان سيجاره
بينفخ دخان سيجارته وبيقول:
_إيه بقى ده؟
_هو إيه اللي إيه ده
_دلال
_مالها؟
_بتكلميها عني وبتجبيها معانا وتطلبي إني اعلمها الرقص وتسبينا لوحدنا وتطلعي
_اه وانا اللي ضربتك على إيدك عشان ترقص معاها على البحر وتكتب اسمها على الرمله ؟
_دي حاجات لطيفه عادي
_سيف افهم بقى الحاجات الطيفه دي لما بتتعمل لبنت بتفكر إن الراجل ده بيحبها افهم
_انتي إيه اللي في دماغك؟
_مفيش حاجه في دماغي ومتنساش إن انت اللي عزمتها تيجي معانا تقدر تنهي كل ده لو تجنبتها وارجوك لو مش شايفها مناسبه ليك بلاش الحركات بتاعتك دي عشان متعلقهاش بيك وتكسرها دلال مش زيهم يا سيف
بيبتسم وبينفخ دخان السيجاره وبيقول:
_دلال وهي فعلآ دلال
_تصبح على خير يا عم سوما العاشق
بقولها وبسيبه وبطلع بكمل نوم وفي اليوم التاني بنصحى كلنا بنفطر سوا
وهما بيقربه لبعض اكتر هي بتقولو على افكار ديكورات يعملها بالورد في المعرض عنده وهو على طول قاعد معاها بيضحك وبيهزر بيتمشو شوية بيصورها شوية بيشوفه الغروب سوا
كل حاجه كان نفسي اعملها معاه دلال عملتها بس عارفين بقى عادي بنسبالي أصبح الجرح عادي ما اصل لو مش دلال هيبقى واحده غيرها عمري ما هكون انا ..
بنرجع من الشرم وكل واحد بيرجع يشوف حياته وانا ومامته بنكون مخططين إننا نلفت نظره لـ دلال عشان ياخد خطوه رسمي في الموضوع
علاقتهم بتطور كل يومين يتقابله وكل يومين ننزل إحنا التلاته سوا
وإنهارده كان عيد ميلاد دلال واتفقنا إننا هنعمل ليها مفجأءه
لبست بنطلون اسود وتيشيرت اوفر سايز بينك وميكب بسيط ونزلت لما عرفت انه تحت البيت واتفجأت من بوكيه فراشات كبير مكتوب عليه
انا و٩٩ فراشه جايين نطلب إيد الفراشه الميه
ببص ليها بإستغراب بيتكلم وبيقول:
_ما اصل هي عندها محل ورد مكنش هيبقى لذيذ لو جبت ورد
_ثانيه بس إيه المكتوب على البوكيه ده؟
_إمبارح كنت قاعد مع سوسو اترميت في حضنها قولتلها مفيش في الدنيا احلى من حضنك قالتلي حضن الست لـ راجلها بيكون احلى بكتير قالتلي الحق يكون ليك حضن وونس في الدنيا يا سيف وانا قولتلك لو هختار ام لعيالي هتبقى دلال
_ازغرط؟ هزغرط
بقولها بفرحه وبزغرط فعلآ وبنروح نجيب التورته وبنروحلها المحل بنعملها مفجأءه
كانت هتطير من الفرحه زي ما يكون طلع ليها جناحين زي الفراشات اللي في البوكيه بالظبط
وبيروح يتقدم ليها وبتتم الخطوبه على خير كل حاجه كانت ماشيه تمام
كل حاجه حصلت زي ما انا اتمنيت خلاص اطمنت على ابني هعوز إيه تاني !
لحد ما بتفجاء بيه تحت بيتي طلب انه يقابلني نزلت وانا خايفه يكون متخانق مع دلال
كان مبهدل قميصه زرايره مفتوحه شعره متنعكش مش ساند طوله
_في إيه مالك؟
_كاميليا رجعت لحياتي
_نعم !!!
“بــــــــاكـ”
_مامي انا جعان
_حالآ يا حبيبي هقوم احضرلك تاكل واجهزلك اللانش بوكس
_هو ده وقته كملي حصل إيه يا نادين
_شادي جعان استني احضر ليه الأكل
_ابنك بيجي في اوقات غلط انتي عامله زي كُتاب الروايات عند اهم حته يكتبولك يتبع
_هكملك بعدين هنروح من بعض فين يعني
بقولها وبقوم احضر لشادي الأكل..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية للحبيب حبيب تاني)
