رواية لحظات من الصدمة الفصل السادس 6 بقلم عمرو راشد
رواية لحظات من الصدمة الجزء السادس
رواية لحظات من الصدمة البارت السادس
رواية لحظات من الصدمة الحلقة السادسة
مين اللي عليه الدور؟
= لا احنا النهاردة مش رايحين عند حد
ليه كدا؟
= عشان اللي عليه الدور ما*ت من شهر
وهنعمل ايه؟ كدا ملك هتروح لمين؟
= للشخص الخامس علطول ولا انت ايه رأيك؟
مظبوط بس هو مين الشخص الخامس ؟
” ركنت العربية على جنب و خرجت الصورة من جيبي و بدأنا نركز انا والدكتور
مين دا؟
= معرفوش
طب ملك محكتش ليك اي حاجة عنه
= احب اقولك يا وليد الكشف اللي معايا فيه 4 ولاد بس
يعني ايه؟،، اللي في الصورة دول خمسة مش اربعة
= يمكن دا واحد كان معدي بالصدفة وقال يتصور معاهم
لا طبعا ايه اللي انت بتقوله دا؟
= طب مانا عندي حل أحلى
قول ايه هو بسرعة؟
= افتح اللوكيشن وشوف ملك فين
العربية في البيت لسة و دا اللي أنا مستغربه
= في الحقيقة انا مش لاقي تفسير للي بيحصل دا
انا كدا اللي مش فاهم،، يعني كدا ملك مش هتخف؟
تفائل خير،، انا هرجع العيادة وهفكر في حل وهكلمك
” بالفعل وصلته العيادة وانا رجعت البيت تاني لإني مكنتش لاقي مكان اروحه،، رجعت ونمت على الكنبة وغمضت عيني…
فلاش باك
انت مش هتسيبني،، وليد انتي مش هتسيبني صح
= والله ما هسيبك
وليد متسبنيش
= مش هسيبك،، مش هسيبك أبدا
” بعدها بشوية فجأه لقيت ممرضات بتجري من حواليا وكلهم داخلين اوضة العمليات،، صرخت بصوت عالي ونطقت اسمها
ملك
باااك
” فتحت عيني بسرعة وقومت اتعدلت وأنا بحاول اتنفس بشكل طبيعي،، في نفس اللحظة جالي إشعار ان عربية ملك اتحركت من البيت،، كلمت الدكتور سامح بسرعة
ايوا يا دكتور
= في ايه؟
العربية اتحركت،، انا جايلك حالا،، انت لسة في العيادة؟
= اه في العيادة
مسافة السكة وهبقا عندك
” نزلت بسرعة و ركبت العربية و حرفيا كنت طاير على العيادة بتاعته وفي اقل من نص ساعة وصلت،، كان هو مستنيني تحت،، ركب جنبي و اتحركت بسرعة للمكان اللي العربية متجهة فيه،، فضلت ماشي بسرعه جدا لحد ما لقيت نفسي داخل المقابر،، الدنيا كلها ضلمة من حواليا،، مفيش أي مصدر للضوء غير نور العربية لحد ما شوفت عربية ملك قدامي،، ساعتها وقفت ونزلت من عربيتي وجريت على عربية ملك اللي كانت فاضية تماما لكني لمحت القبر اللي انا واقف قدامه،، قبر كان مكتوب عليه
” ملك سعد الدين ”
” ساعتها جسمي بدأ يترعش وعنيا كانت مفتوحة على اخرها من الصدمة،، وقعت على الأرض وساعتها لقيت دكتور سامح جاي مع واحدة تانية انا معرفهاش لكنها كانت لابسة لبس ملك،، دكتور سامح بدأ يتكلم
ملك ما*تت يا وليد،، ماتت في اليوم اللي اجهضت فيه،، فاكر؟
” صداع شديد جدا في دماغي،، صداع شديد مش قادر استحمله،، الذكريات كلها بتها*جمني
فلاش باك
ملك أنتي هتبقي كويسة متخافيش انا جنبك،، والله هتبقي كويسة
= متسبنيش يا وليد،، متسبيش
والله ما هسيبك،، عمري ما هسيبك أبدا
” بعدها دخلت أوضة العمليات وبعد ربع ساعة بالظبط بدأت اشوف الممرضات بتجري و داخلة أوضة العمليات،، ساعتها صرخت بصوت عالي ونطقت اسمها
ملك
” جريت بسرعة على أوضة العمليات ولكن الممرضين منعوني ادخل،، فضلت واقف برا وأنا قلبي بيدق بسرعة شديدة جدا،، لحد ما الدكتور خرج من جوا وقالي
البقاء لله،، المدام حصلها نزيف شديد ومعرفناش نلحقها،، شد حيلك
بااك
بعدها يا وليد انت جيت تتعالج عندي بس للاسف كانت حالتك صعبة جدا،، رافض تصدق ان ملك ما*تت،، رافض تصدق حتى الفكرة ذات نفسها لحد ما جاتلي الفكرة وهي اني اعملك صدمة،، اللي انت شايفها قدامك دي مش ملك،، دي المساعدة بتاعتي،، أنا اللي حطيت قدامك الصورة بتاعت التخرج عشان تشوفها وتجيلي ولما انت جيتلي ساعتها انا خليت المساعدة بتاعتي تروح البيت عندك وتدخل تاخد هدوم ملك عشان نقدر ننفذ الخطة،، ولو سألت دخلت ازاي هقولك انك انت اللي قولتلي انك دايما بتسيب مفتاح احتياطي تحت الدواسة اللي قدام باب الشقة،، وبالنسبة للمعلم ابو العز و أستاذ أيمن و شادي كل دول صحابي وأنا اللي اقنعتهم يعملو كدا،، وانا كنت متأكد انك هتقدر تشوف المساعدة بتاعتي كأنها ملك،، اولا عشان اللبس بتاعها وثانيا عشان انا هيأت عقلك لكدا،، ملك ما*تت يا وليد،، ملك كانت بتحبك بس دا قدر ربنا ملناش دخل فيه،، لازم تتقبله عشان تقدر تكمل حياتك
” رجعت البيت بعدها وقررت اني لازم اكتب القصة دي عشان ابقا فاكرها طول الوقت ولو اني متأكد اني عمري ما هنساكي يا ملك،، الانسان بيعيش حياته كلها و عمره ما يقدر ينسا اول حب في حياته وانتي كنتي اول حب في حياتي،، حقيقي الدنيا دي غريبة أوي،، كل وجع فيها مربوط بالحب،، لو دورت على اي سبب ل وجعك هتلاقيه بسبب الحب بس برضو هيفضل هو الحاجة الأجمل في حياتنا ومن غيره منقدرش نعيش،، منقدرش نعيش من غير كلمة حلوة،، نظرة تغير يومنا،، لمسة ايد حنينة وسط تعب الدنيا،، وفي النهاية لو انت اختارت الشخص الصح اضمنلك انك هتقدر تعيش قصة حب عمرك ما هتنساها..
” بعدها قفلت المذكرات بتاعتي عشان ابص قدامي واشوف ملك واقفة بعيد وبتضحكلي و بالصدفة كانت الأغنية اللي بتحبها شغالة جنبي
” كنت بشتاقلك وانا وانت هنا،، بيني وبينك خطوتين ،، والعمل،، ايه العمل ما تقولي اعمل ايه؟،، والامل انت الامل تحرمني منك ليه♥️ “
تمت…
لقراءة الرواية كاملة اضغط على : (رواية لحظات من الصدمة)
