رواية لحظات من الصدمة الفصل الرابع 4 بقلم عمرو راشد
رواية لحظات من الصدمة الجزء الرابع
رواية لحظات من الصدمة البارت الرابع
رواية لحظات من الصدمة الحلقة الرابعة
انت كنت جاي تسرقني انا يااالا،، دا انت مش هيطلع عليك نهار
= اهدى بس يا معلم انت فهمت غلط
انت تبع مين بقا قولي بالذوق كدا بدل ما اخليك تقول بالعافية
= والله انا ما اعرفك أصلا،، انا جاي هنا عشان مراتي
وهو حد قالك اني بتاجر في الجواري يا روح امك
” ساعتها سامح بص ليا وقالي
دمه خفيف
= أوي
بس شرير
= أوي
” رجعت تاني وكملت كلام معاه
يا معلم ابو العز انا مراتي تبقا ملك
= ملك مين ياض؟
ملك سعد الدين
= انت جوز ملك؟
ايوا جوزها،، ملك تعبانة يا معلم،، عندها فقدان في الذاكرة،، تعتبر مش فاكراني خالص ولا فاكرة اي حاجة عن حياتها بسبب صدمة حصلتلها من مو*ت ابوها وابننا
= لا حول ولا قوة الا بالله،، انا شوفت الفيلم دا امبارح على قناه فوكس موفيز
” سامح رجع يتكلم معايا وقالي
انا كمان شوفته
= انت تسكت خالص خلينا نخرج من هنا
” المعلم كمل كلامه
انت بقا عايزني اصدق الفيلم الهندي دا؟،، هو في واحدة في الدنيا متفتكرش جوزها؟،، انت شكلك بتحور ياض
= والله العظيم دي الحقيقة،، حتى دا الدكتور بتاعها وهو اللي متابع حالتها
” سامح بص ليا مرة ومرة للمعلم وبعدها رجع يبص عليا تاني وقالي
انت قصدك عليا انا؟
= ايوا يا سامح اتكلم وقوله ان ملك تعبانة بجد
” سامح فعلا بص للمعلم وقاله
في الحقيقة ايوا يا معلم خالد،، ملك تبقا مرات وليد وهي تعبانة بالفعل،، احنا مش بنكدب عليك
= ولو هي تعبانة فعلا زي ما بتقول،، اشمعنا افتكرتني انا؟
هي بترجع بالزمن ل ورا،، يعني مثلا هي متخيلة دلوقتي ان ابوها عايش
= ولو افترضنا ان كلامك دا صح،، مطلوب مني انا ايه؟
انك تسيبها وتبعد عنها عشان تخف و ترجع ل جوزها
= اسيبها؟؟
ياريت يعني
= فرحي انا وملك بكرا
بكرا ازاي؟،، ايه السرعة دي؟،، حجزت القاعة امتى؟
” زعقت ساعتها وقولتله
هو دا اللي همك؟
” بصيت للمعلم خالد وقولتله
يا معلم بقولك دي مراتي،، والله العظيم مراتي،، و المصحف الشريف مراتي
= انا برضو شوفت الفيلم دا قبل كدا
صدقني يا معلم انا مليش أي مصلحة اني اكدب عليك
” سامح كمل بعدي وقال
دي حقيقة يا معلم خالد،، احنا هنكدب عليك ليه؟،، ثم انت مينفعش تتجوزها لانها متجوزة وبعدين حتى لو مش متجوزة برضو مش هينفع لانها حاليا مش في وعيها فيعتبر الجواز باطل
= ماهو دي مهمتك بقا يا دكتور،، انت هتعملي تصريح انها تصلح للزواج و عقلها سليم مليون في المية
انت بتقول ايه؟،، انا عمري ما اعمل كدا
= 100 الف جنيه والتصريح يبقا عندي النهاردة
150 الف جنيه واجيبلك التصريح لحد باب البيت
= وانا موافق
” زعقت في اللحظة دي بصوت عالي
يا عم انت غبي بقولك دي مراتي
= ومالو مفيش اي مشكلة،، تطلقها
وحتى لو طلقتها برضو مش هينفع تتجوزها بكرا،، في حاجة اسمها شهور العدة ولا انت مش مسلم ولا انت من انهي ديانة؟
= اسمع يا ابني انت انا هسيبك تمشي لو شوفتك هنا تاني هربطك هنا لحد ما تمو*ت
” الراجل مشي و رجالته قربو مننا وقطعو الحبل اللي كنا مربوطين بيه،، قومت مشيت بسرعة و خرجت من المخزن دا،، سامح كان بينده عليا وانا بجري ومش بقف لحد ما جري ورايا و مسك كتفي
هو انا مش بكلمك؟
= عايز ايه؟
ممكن تقولي رايح فين؟
= رايح اجيب مراتي يا دكتور
هتجيبها منين؟،، هو انت فاكر أنها هتعرفك؟
= لو حد كلمني أو حتى هي بلغت البوليس هوريهم القسيمة
كدا انت بتعرضها لصدمة تانية،، وليد انت مش عارف انت بتعمل ايه
= اعرف بقا ولا معرفش خلاص مبقتش فارقة،، دا بيقولك فرحهم بكرا
خلاص احنا ممكن نمنع الفرح دا بس بطريقة تانية
= ازاي قولي؟
انت لازم تظهر ل ملك،، احنا بنظهر للشخص الغلط،، انت لازم تخلي ملك تنجذب ليك عشان توافق تتجوزك إنما احنا ماشيين في سكة غلط
= وانت جاي تقولي كدا دلوقتي؟
عقبال ما افتكرت
= هو انت مش دكتور ولا انت سباك ولا انت حكايتك ايه؟
لحد هنا وتقف،، انا دكتور محترم ومش معنى اني بساعدك انك تنسى اني دكتور وليا اسمي وليا برستيچي وسط الناس
= طب هنمنع الجوازة دي ازاي يا دكتور يا محترم؟
قصدك نخلي ملك تحبك ازاي؟
= مش فاهم يعني ايه؟
هي ملك بتحبك ليه؟
= السؤال دا تسأله ل ملك مش ليا انا
لا انا عايز اعرف انت عملت ايه عشان هي تحبك،، الحاجات اللي انت بتعرف تكسب قلبها بيها،، اكيد انت حافظها اكتر منهم يعني انت اللي هتعرف تكسبها
= ملك بتحب الشخص الحنين
حلو
= بس يكون قاسي
ايه دا؟
= ملك بتحب الشخص يكون عصبي كدا و دمه حامي
كويس جدا
= بس في نفس الوقت لازم يبقا هادي
لا حول ولا قوة الا بالله
= ملك عايزة الشخص اللي معاها يبقا تقيل كدا و راجل واثق من نفسه
جميل
= بس هي عايزاه يقولها كلام حب كل دقيقة
هي تعبانة في دماغها ولا ايه؟
= انت اتجننت يا سامح ولا ايه دي مراتي
مراتك مجنونة يا عم
= انا مراتي مجنونة؟
انت مالك مستغرب أوي كدا ليه؟،، محسسني اننا رايحين نجيبها من معرض الكتاب،، مراتك مجنونة وانت كمان مجنون اكتر منها
= لا دا انت زودتها أوي
هتعمل ايه يعني؟
= هعمل اللي مشافتوش عينك
يبقا اكيد كنت نايم ساعتها
” ابتسمت وقتها وقولت
دمك خفيف
= أوي
بس هضر*بك
= اوي برضو
طب ممكن كفاية هبل ومنضيعش وقت أكتر من كدا
= انت اتعرفت على ملك ازاي يا وليد؟
كان في واحد بيضايقها في الشارع وأنا كنت ماشي بالصدفة و شوفتها و روحت عملت نفسي ظابط قدام الواد اللي بيضايقها وطبعا عملت معاه الواجب
= طب ماهي كدا اتحلت يا عبقري
قولي ازاي؟
= هقولك
” رجعت البيت و دخلت خدت دش بعد اللي حصل في المخزن،، خرجت لبست وكالعادة معرفتش انام في الأوضة وخرجت نمت في الصالة على الكنبة،، وأنا نايم وباصص للسقف افتكرت…
فلاش باك
ممكن اعرف أنتي مضايقة ليه دلوقتي؟
= اعمل نفسك مش عارف بقا
والله ما اعرف
= شوف انت كنت مركز مع مين في الفرح
مع مين؟
= انت هتستعبط يا وليد؟،، يعني انت مكنتش مركز مع الست نرمين
ايه الست نرمين دي زي الست أم كلثوم كدا
= متهزرش يا وليد،، انت عينك مسابتهاش ثانية واحدة
على فكرة بقا انا عيني كانت فيها مشكلة طول الفرح
= مشكلة ايه يا حبيبي خير؟
مكنتش شايف بيها حد غيرك لدرجة اني كنت بفكر اروح لدكتور
= هصدقك انا بقا،، المفروض اصدق
انا في حياتي والله ما شوفت واحدة تبقا حلوة وهي بتتخانق،، وحلوة وهي صاحية من النوم وحلوة وهي تعبانة،، حلوة في كل اوقاتك
= بجد انا حلوة؟
انا مبقتش قادر امسك نفسي،، المرة الجاية هروح المستشفى اركب محاليل بسبب الدوخة اللي بتجيلي من جمالك
= الخناقة باظت
لو عايزة تكملي كملي انا سامعك
= انا عايزة اكمل فعلا بس اكمل عمري كله معاك
بحبك
بااك
” متصدقش حد بيقولك الجواز وحش،، الجواز مش وحش نهائي،، الوحش هو انك ترجع بيتك متلاقيش حد تحكيله يومك،، متلاقيش حد يحتويك،، متلاقيش بيتك نضيف و في حد عاملك اكلك بكل الحب والرضا اللي في الدنيا،، كل دا هتفتقده لمجرد انك خايف من الجواز،، هو اينعم بيكون في مشاكل كتير بس كل دا بيروح وبيختفي مجرد ما تسمعها وهي بتقولك بحبك،، مجرد ما تشوفها وهي غيرانة عليك،، انت المسؤول عن النكد وانت المسؤول عن الخناق،، عاملها كأنها أميرة وهي هتخليك عايش امير في بيتك،، نمت بعدها ولما صحيت خدت دش و لبست اللبس اللي كنا متفقين عليه و نزلت ركبت العربية و روحت ل بيت سامح واستنيته تحت،، بعد ربع ساعة بالظبط سامح نزل و ركب جنبي ومشينا،، كانت الساعة 4 العصر
كلمت ابو العز؟
= كلمته وقالي على مكان الفرح
فين
= قاعة الاميرات
دي في عالم ديزني دي ولا ايه؟
= لا قاعة عادية،، المهم انت كويس انك لبست الچاكيت الجلد زي ما قولتلك
اشمعنا بقا؟
= اي ظابط لازم يبقا لابس چاكيت جلد،، انت مشوفتش امير كرارة ولا ايه؟
طب و ملك؟
= هتدخل عليها نفس الدخلة اللي دخلتها زمان
و دي هنعملها ازاي؟
= هنفضح العريس قدام الناس كلها
هنقول ايه يعني؟
= اي كلام بقا،، أي كلام من عندك وخلاص
اتفقنا المهم انا عايزك تجيبلي بطاقته
= و دي انا هجيبها ازاي يا وليد؟
قولو انك هتاخدها عشان تعرف تجيب التصريح اللي هو عايزه منك
= صح بس انت هتعمل بيها ايه؟
عشان لو الخطة فشلت ميعرفش يكتب الكتاب
= الله عليك
الله ياخدك
” كملنا مشي بالعربية لحد ما وصلنا مكان القاعة وشوفتها وهي قاعدة في الكوشة،، تخيلو معايا اللي انا شايفه،، مراتي انا قاعدة في الكوشة مع واحد غريب
انا مش مصدق نفسي يا سامح،، انا حاسس اني في فيلم
= لا يا وليد دا مش فيلم،، دا مسلسل جعفر العمدة لما وداد اتجوزت شوقي فتح الله وهي على ذمة المعلم سيد
هو انت قاعد ليل ونهار قدام التليفزيون مبتتحركش أبدا
= لا بتحرك بروح آاكل و ارجع تاني
ولو عايز تدخل الحمام بتعمل ايه؟
= هروح الحمام
ولو عايز تشرب؟
= هروح على التلاجة
ولو عايز تخرج؟
= هروح على الباب
طب شايف الباب اللي هناك دا؟
= شايفه
روح عليه بقا
= عايزني امشي يا وليد؟
يإما تفضل ساكت او تمشي
= ومين هيكمل الخطة معاك
هكملها لوحدي
= انت محسسني اننا خلصنا،، لسة في 3 كمان
خلاص اسكت
= عموما انا هروح ابارك للعروسين وبالمرة انفذ الخطة
” سامح فعلا مشي و انا بتدارى وسط الناس عشان محدش يشوفني،، وبعد نص ساعة لقيت حد بيخبط على كتفي،، ساعتها بس عرفت اني اتكشفت بس لما بصيت ورايا لقيته سامح
هو انت هربان من حاجة؟
= بعمل كدا عشان محدش يشوفني يااخي
يا عم دول فاكرينك حرامي،، الواد اللي بيصور دا كان فاكرك حرامي وجاي يمسكك لولا اني لحقته وقولتله انك شحات وجاي تتعشى وهتروح
= انت كدا صلحتها يعني؟
إلى حد ما
= المهم عملت ايه؟
امسك البطاقة اهي
” خدت منه البطاقة وفي اللحظة دي لقيت المأذون داخل القاعة و الناس كلها مبسوطة،، بعدها قعدو المأذون طلب البطايق وساعتها المعلم ابو العز بدأ يدور على بطاقته،، وفي اللحظة دي كان لازم اتدخل،، دخلت وسطهم وقولت بصوت عالي
ثانية واحدة يا جماعة
” بعدها بصيت ل ابو العز وقولتله
انت كنت فاكر نفسك هتهرب مني يا ابو العز؟،، دا نجوم السما اقربلك
= انت تاني؟
وتالت،، انا قدرك،، انا نصيبك،، انا الفا*جر،، انا ابو جلابية اللي مبشوفش،، الراجل اللي قاعد قدامكو دا قا*تل بيتجوز البنات عشان ياخد اعضائها ويتاجر بيها،، وطبعا هو قايل للكل انه بيشتغل في الأجهزة الكهربائية وطبعا كلكم صدقتوه،، بس دا قناع هو لابسه عشان كلكم تتخدعو فيه،، وأنا النهاردة جاي اخلصكم من الشر دا
” كان في اللحظة دي سامح ربط بين الميكروفانات اللي في الفرح وبين تليفونه وفي ثواني كان صوت سرينة البوليس بترن في القاعة كلها،، الكل بدأ يجري بما فيهم المعلم ابو العز لحد ما القاعة بقت فاضية تماما ب استثناء ملك كانت قاعدة وحاطة ايدها على وشها وبتعيط،، قربت منها ومسكت ايدها
انا كان لازم الحقك منه،، هو ميستاهلكيش،، هو متجوز تلاتة وانتي كنتي الرابعة يعني شوية وكان ممكن يطلقك عشان واحدة تانية عجبته و عايز يتجوزها،، أنتي تستاهلي حد يحافظ عليكي،، انا من ساعة ما شوفتك وأنا بحاول احميكي منه لدرجة انه خط*فني وكان عايز يقت*لني عشان بس عايزه يبعد عنك،، كل اللي انا عايز اقولهولك انك مش لوحدك،، انا جنبك في كل دقيقة وكل ثانية وكل لحظة،، أنتي قصاد عيني دايما،، وهو دا اللي كان نفسي فيه،، اصل بصراحة مش هلاقي حاجة اجمل من كدا تكون قصاد عيني
= تتجوزني؟
ياريت،، ياريت والله،، ياريت أوي،، ياريت خالص،، ياريت بقاااا،، المأذون فين يا جماعة!!
” انت الوحيد اللي لما بكون معاه بلقى روحي مصدقاه و دايبة فيه♥️ “
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية لحظات من الصدمة)
