رواية لا تسألني من أنا الفصل العاشر 10 بقلم شهد محمد جاد الله
رواية لا تسألني من أنا الجزء العاشر
رواية لا تسألني من أنا البارت العاشر
رواية لا تسألني من أنا الحلقة العاشرة
اول ما بحط رجلي بره باب الشركة بلاقيني في الساحه اللي فيها أبواب كتير
_دكتور حضرتك سمعاني؟
_معاكي يا شمس ها خرجتي من الباب؟
_ايوا خرجت
_طيب ادخلي في باب تاني يلا
_حاضر
بقولها وبفتح باب تاني وبلاقيني جوه محكمة وعندي جلسة المفروض هترافع عنها
_ريم من الأحسن تسيبي القضيه دي عشان مش هينفع انتي مستوعبه إنك بتحبي متهم !
_هو بريئ انا واثقه من ده
_انتي بتقولي كدا عشان شايفاه بقلبك ولغيتي عينك وعقلك ده متهم يا حبيبتي فوقي
_هنشوف يا هنا ودلوقتي معاد الجلسه بعد إذنك
بقولها وبسيبها وبدخل القاعه عشان اترافع ومبيكونش فيه حل أو دليل كافي ومش بوصل لحاجه غير إن بتتأجل الجلسة اسبوع كمان اكون جبت الدليل
برجع لمكتبي وبراجع ملف القضيه مره تانيه لكني مش بوصل لحاجه مش بعرف اوصل لحاجه اصلآ
بقوم اعمل فنجان قهوة وبرجع اعيد على الملف وبتكون النتيجة واحده مش لاقيه دليل ..
انا طول عمري شاطره في شغلي دي اول مره اكون مشتته كدا يمكن عشان المره دي الموضوع يخص كراش الطفولة !
عارفين الحب من طرف واحد ، تفضلي طول عمرك تتمني يجمعك كلام مع الشخص ده ويوم ما يجمعك كلام يكون عن جريمة قتل !
عارفين الإحساس بالخوف من النتيجة
ده مش مجرد متُهم عادي ، ده شخص قلبي بيحبه ، حتى لو مش هنكون لبعض بس كنت مكتفيه إني شايفاه سعيد في حياته من بعيد ..
بقفل اللابتوب وبروح ليه وبطلب إني اشوفه واتكلم معاه
وشويه وبيجي مع العسكري وبيخرج الظابط وبيسيبنا لوحدنا
_طارق انت فعلآ قتلتها ؟
بيبص ليا ومش بيرد
_ارجوك لازم تصارحني انا معاك مش ضدك لازم متخبيش عني حاجه عشان اقدر اساعدك
بيهز راسه ليا وبيقول:
_ايوا
_ايوا إيه؟
_قتلتها
_وعملت كدا ليه وإزاي؟
_كنا بنتخانق وغصب عني وقعتها ومكنتش مهتم وسيبتها ومشيت واتفجأت إنها مكانتش واقعه عاديه وإن كان فيه تحت راسها حجر !
_علاقتكم ببعض كانت إيه؟
_ارتباط
_كانت حبيبتك يعني
_امم
_إيه سبب المشكلة؟
_خانتني ..
_في حاجه تانيه عايز تقولها؟
_مفيش بس حقيقي فكرتها بتمثل لما وقعت عشان تصعب عليا مكنتش اعرف إن الأمور هتوصل لكدا نهائي
_تمام بشكرك على صراحتك معايا واوعدك إني هعمل كل اللي عليا عشان اقدر اخرجك
بقولها وبخرج من باب المكتب وبلاقيني في نفس الساحه الكبيره
_دكتور !
_معاكي يا شمس
_انا خرجت من الباب
_طيب ادخلي باب تاني يلا
_ده اخر باب
_تمام ادخلي يلا
_تمام
بقولها وبدخل من الباب وبلاقيني قاعده في كافيه مع شاب وبنتكلم
_كريمان أنا آسف بس مش قادر اكمل
_وجاي تكتشف ده دلوقتي ؟
_انا بظلمك معايا اكتشفت إني بقدم ليكي بواقي مشاعري انا لسه بحبها يا كريمان وانتي متستاهليش حد يكون قلبه مع واحده غيرك
_عبدالرحمن مش مطلوب منك مبرارت نهائي الله يسعدك في حياتك وكأن محصلش بينا حاجه
_اتمنى مخسركيش كـ صديقه
_لأ خالص اكيد احنا صحاب
_شكرآ على كل حاجه وحقيقي اسف
_محصلش حاجه صدقني عادي مجرد تجربه وفشلت والحياة تجارب
بقولها وبسيبه وبمشي برجع البيت وانا منهاره ، فيها إيه مش فيا عشان ميعرفش يحبني زيها !
بس حتى الأنهيار مش بعرف اخد راحتي فيه من مشاكل بابا وماما والزعيق من غير سبب وطبعآ كالعادة مش عارفين يعمله إيه فـ بيتخانقه معايا بدون سبب
بعد ما بيتخانقه معايا وبيتنكد عليا بنام وانا معيطه وبصحى تاني يوم بروح الجامعه وبكتشف إني سقطت السنه دي كمان !
دي تاني سنه ليا في هندسه أسقط فيها ومش عشان مش شاطره او مش مجتهده بالعكس بعمل اللي عليا
بس هي الدنيا كدا من يوم ما جيتها وهي طول عمرها بتاخد مني عمرها ما بتديني
ولو قولت ليهم في البيت مش بس هيكون فيه خناقه ده كمان بابايا هيطلق مامتي ومحدش فيهم هيفهمني ولا هيستوعب كلامي
عارفين انا مش عايزه اكمل في الدنيا دي كفايه اوي لحد كدا
بقولها وبرمي نفسي من فوق سور الجامعه ، بحس بالكل حواليا وصوت صويت واسعاف
عارفين انا بس كنت محتاجه حد واحد يكون حنين عليا حد واحد اروح اقوله إني تعبت وإني متفتفته حد واحد يفهمني ويقولي معلش هتعدي
مكنش عندي مشكلة نهائي إني اتعب قد التعب اللي تعبته الف مره ، مشكلتي الوحيده في عدم التقدير لو كان اتقالي كلمه حلوه كلمه حلوه بس كنت هتشجع واكمل وفي النهاية أصبحت شيء لم يكن ..
_دكتور
_معاكي يا شمس
_خرجت وكدا خلاص مفيش أبواب تاني
_تمام اطلعي بقى من السلم اللي نزلتي منه
_تمام
بقولها وبطلع السلم وبتفجاء لما بطلع بناس كتير اوي شبهي كإنهم أنا
_دكتور انا فيه مني كتير اوي
_ركزي يا شمس لازم انتي اللي تخرجي متخليش حد فيهم يخرج قبلك
_ما كلهم أنا
_لأ انتي بس شمس إنتي الاصليه
_تمام
بقولها وبحاول اعدي من وسط الناس الكتير اللي شبهي بس بيحصل خناقه كلهم بيضربه في بعض كلهم عايزين هما اللي يخرجه
بحاول اخرج بس واحده فيهم بتضربني بحاجه على دماغي وبقع من طولي
_شمس شمس سمعاني؟
_ايوا يا دكتور انا وقعت في الأرض واحده فيهم ضربتني
_لأ لازم تفوقي قومي يا شمس
_مش قادره
_لازم تقدري كلمي نادر
بسمع صوته وهو بيكلمني:
_شمس حبيبتي قومي عشان خاطري
_مش قادره يا نادر
_عشان خاطري يا شمس حاولي لازم تخرجي عشان نكمل حياتنا سوا واحلامنا ونعيش في بيتنا مع بعض ارجوكي يا شمس عشاني وعشانك
كلامه بيأثر فيا شوية وبقوم وبسيبهم كلهم بيتخانقه وبخرج انا من غير ما حد ياخد باله
وبقوم من نومي بعدها وبلاقي نادر
قاعد على كرسي جنبي ونايم على نفسه
_نادر ..
_انتي فوقتي يا حبيبتي حمدالله على السلامه
بيقولها وبيحضني وبيبوس راسي
_حصل إيه ؟
_خلاص خفيتي يا حلوه
_بجد
_اه والله مفيش شخصايات تاني
_يااه يا نادر كإني كنت في عالم افتراضي
_عيشتي شخصايات كتيره؟
_جدآ ومختلفه بقى
_لأ ده انا اقوم احضر اكل حلو لحبيبتي ونقعد تحكيلي كل حكاية عشتيها
_اتفقنا جدآ كمان عشان وحشني الكلام معاك
بيقطع كلامي دخول كلب صغير الاوضه
_إيه ده مين جابه ؟
_شخصية من شخصاياتك والله ما فاكر كانت فرح ولا مريم ولا ملك
_ياه انا كنت كل دول؟
_ده انا كنت عايش في مغامره متخيله تصحي الصبح تقوليلي انت مين ومره كنت طليقك ومره كنتي هحبسيني ومره اخوكي
_لازم نقعد نحكي إيه اللي حصل
_هحضر الأكل وارجع يا جميل
_ماشي يا حبيبي
بقولها وبلعب مع الكلب شوية وبدخل باخد شاور وبيكون نادر خلص الأكل
وبنقعد ناكل سوا وبنحكي لبعض عن كل حاجه
مواقف مضحكه ومواقف حزينه وهكذا لحد ما بنخلص كل الحكاوي
وبنام في حضنه وبنصحى في النهار
ببص ليه وبقول:
_انت مين؟
_لأ شمس متهزريش !
بضحك من ريأكشانت وشه وبقول:
_لأ ههزر
_وقعتي قلبي والله
_سلامتك وسلامة قلبك
وبتعدي الأيام وبيعملي فرح كبير بيعزم فيه كل أصحابنا وحبايبنا وبلبس فستان فرح زي ما كنت بحلم
وبنعيش في سعادة بنحقق احلامنا سوا سفر ومغامرات وصدق اللي قال إن حمل الليالي خفيف لما يشيلوه اتنين
وبنكون قاعدين في بلكونة بيتنا وانا باكل من الفراولة وبقول:
_انهي شخصية في شخصاياتي عجبتك اكتر؟
_كلهم كانه حلوين كل ما فيكي من ستات فجأتيني ووقعتيني في حبك
_بتكلم بجد يل نادر عشان النونه لو جت بنت هسميها على اسم الشخصية
_انا فعلآ حبيت كل شخصاياتك إنتي انهي واحده أثرت فيكي؟
_كريمان ، شخصية كريمان مأثره فيا اوي لحد دلوقتي
_خلاص نسميها كريمان
_هسميها كريمان وهكون ليها ام جميله وصاحبه حنينه عشان متفكرش في يوم من الأيام في الانتحار
_هتكوني ام تاخد العقل يا حبيبتي
_تخيل بقى لو كريمان لما تيجي يبقى عندها نفس المرض !
_بس يا شمس الله يخليكي بعدين هتاكلي الفراولة كلها لوحدك؟
_وحم يا حبيبي وحم
_بالهنا والشفا
_قوم بقى اعملي عصير فراولة
_مانتي بتاكليها !
_كريمان بنتك هي اللي عايزها عصير
_حاضر لما نشوف اخرتها معاكي انتي وبنتك
_متكترش في الكلام يا نادر عشان متنامش في البلكونه انهارده
_يا حبيبي إحنا اوامر ماشيه على الأرض
تمت ..
لقراءة الرواية كاملة اضغط على : (رواية لا تسألني من أنا)
