رواية لا تسألني من أنا الفصل الثالث 3 بقلم شهد محمد جاد الله
رواية لا تسألني من أنا الجزء الثالث
رواية لا تسألني من أنا البارت الثالث
رواية لا تسألني من أنا الحلقة الثالثة
_كنتي فين إمبارح ؟
_يعني إيه كنت فين !
_مترديش على سؤالي بسؤال كنتي فين؟
_هنتكلم من على الباب !
_مستنيكي تحت في العربية
_لأ انا مش هروح الشغل إنهارده ادخل نتكلم جوه ونفطر سوا
بدخل بقعد على اول كرسي بشوفه وببص ليها وبقول:
_ها كنتي فين ؟
_يعني إيه كنت فين يا نادر
_بعد ما وصلتك البيت روحتي فين؟
_مروحتش في حته طلعت كملت شغلي وفضلت سهرانه لحد الصبح بشتغل ومقدرتش انزل الشغل إنهارده عشان سهر إمبارح
_أمال مين نور واحمد اللي وصلك إمبارح والفستان اللي زي الزفت اللي كنتي لابساه والمكان اللي روحتيه؟
_انت بتقول إيه هو اي كلامي !
_شمس انا شفت صورك بعيني
_هو انت شاكك فيا ، صور إيه اصلآ انا بحلفلك إني منزلتش من بعد ما وصلتني يا نادر والله ما نزلت
_طيب ليكي جاره هنا إسمها نور ؟
_لأ ليه ؟
_احمد صاحبي جابني لحد هنا وقالي إن بيت اللي إسمها نور دي هنا وشفت صورتك معاه يبقى إيه؟
_يبقى تفوق عشان انا شمس مش نور وعشان العلاقه لما الثقه فيها بتنتهي بيبقى دي بداية النهاية يا نادر
_شمس انا مش هجيب كلام من دماغي ولا انا فاضي عشان نعمل مشاكل من الهوا
_وانا شمس يا نادر يعني المفروض تثق فيا اكتر من كدا !
_ماشي يا شمس هصدقك واكدب عينيا حاضر
بقولها وبسيبها وبمشي برجع للشركة وانا دماغي هيجرالها حاجه من كتر التفكير
مش عارف أصدق مين وأكذب مين!
بسيب شغلي وبرجع البيت باخد برشام صداع وبشرب قهوة وبقعد مع نفسي افكر الاقي حل إزاي عشان اعرف مين صادق ومين كذاب
(عند شمس في البيت)
بعد ما نادر نزل من عندي حاولت ارجع أنام بس معرفتش ، مكنتش فاهمه إيه معنى كل الأسأله الكتيرة دي وإزاي بيتكلم بثقه كدا !
حاولت مفكرش كتير وقومت روقت الشقة غيرت ديكورات حاجات كتير عندي ورتبت اوضتي ودولابي والتسريحة وخلصت وخدت شاور
وخرجت من الشاور رايقه دخلت المطبخ شغلت الراديو ووقفت عملت مكرونه وايت صوص وعملت عصير فراولة
وخرجت شغلت فيلم “خطة جيمي”
وقعدت اتفرج وانا باكل ، لحد ما خلصت اكل ودخلت حطيت طبقي في الحوض
وعملت فشار وهوت شوكليت وخرجت كملت الفيلم لحد ما بيخلص وبشوف فيلم تاني ادور عليه ولما مش بلاقي حاجه حلوه شغاله بقوم بجيب اللابتوب اشوف شغلي
بقعد اشتغل ولما بخلص بقفل النور وبنام
وفي نفس المعاد بتاع كل يوم بيجيلي نفس الصداع
بقوم بفتح النور وبمسك دماغي من الصداع لحد ما بيروح وتلقائي بقوم افتح الدولاب بختار فستان اسود لحد الركبه وهيلز سيلفر وبقف احط ميكب وبعمل شعري
(نـــادر)
كان الوقت متأخر وكنت قاعد في عربيتي قدام بيتها من بدري مستني اشوف هيحصل إيه ومش هنكر إني بحس بالذنب إني شكيت فيها بس وقت إحساسي بالذنب بشوفها نازله من بيتها
لابسه فستان جريئ ميكب اوفر وبتوقف تاكسي وبمشي وراها وانا دمي بيغلي
لحد ما بتقف قدام ملهى لـيـلــيي
بتحاسب التاكسي وبتدخل وبدخل وراها
وبشوفها واقفه عند البار بتشرب بروح ليها وانا عيني حمرا من الغضب وبقول:
_وده إسمه يا استاذه شمس !!
_افندم؟
_هو إيه اللي افندم إيه البرود اللي انتي فيه ده؟
_انت سكران ولا إيه؟
بتقولها وبتبص للشاب اللي واقف عند البار وبتقول:
_كاس كمان يا رامي
كانت بتتكلم كأنها متعرفنيش كأني غريب عنها بتتصرف عادي كأنها مش شمس ، لولا إني شايفها نازله من البيت كنت قولت مش هي
_شمس أمشي معايا
_شمس إيه وامشي معاك فين انا نور !
_اطلعي من المكان ده دلوقتي ونبقى نشوف الموضوع ده بعدين
_ابعد عن لو سمحت مش قد الشُرب بتشربه ليه ؟
بتقولها وبتروح على ساحة الرقص بترقص وبشوف شاب بيقرب ليها عشان يرقص معاها ومش بحس بنفسي غير وانا ماسك فيه بضربه لدرجة انه كان هيموت في إيدي
وفي لحظه بلاقي حد تاني بيكسر على دماغي إزازه إزاز ، بتعور وبيجي الأمن عشان يخرجوني بزعق فيهم وباخدها من إيديها بالعافية وبنخرج سوا
_انت مجنون
_ولا كلمة إنتي فاهمه ولا كلمه
بقولها وبدخلها في العربية وبركب جنبها وبسوق وانا بحاول اتجاهل ألم الجرح
_انت واخدني فين ومين انت وبتعمل كدا ليه
_انا خطيبك يا هانم
_هو إيه اللي خطيبي انا مش مخطوبة
_والدبله اللي في إيدك دي تبقى إيه ؟
بتبص على إيديها وبتستغرب الدبله وبتبص ليا تاني وبتقول:
_لو انت خطيبي اكيد لينا صور مع بعض معاك صور ليا وانت مع بعض ؟
_ماشي يا شمس خليني اخدك على قد عقلك لما نشوف اخرتها
بقولها وبطلع موبايلي بفتحه على صورنا وبديهولها بتتفرج على وعلى ملامحها علامات الدهشة والأستغراب
_انا فاكره إني مش مخطوبه مفيش حد في حياتي واسمي نور مش شمس !
_والصور دي إيه والدبله دي إيه؟
_مش عارفه ومش فاهمه
بتقولها وبتمسك دماغها وفجاءة بتفقد الوعي ، بقف بالعربيه وبحاول اشوفها
_شمس مالك ، حصل إيه ، فوقي عشان خاطري
بحاول افوقها لكن مبيكنش فيه فايده بغير طريقي وبروح على أقرب مستشفى
بنوصل للمستشفى وبقعد استنى الدكتور لحد مابيخرج وبيقول:
_اتعرضت لـ إنهيار عصبي
_مش فاهم ممكن توضح اكتر ؟
_حصلها حاجه او زي ما تقول كدا صدمة ليها وفقدانها للوعي ده نتيجة الصدمة اللي اتعرضت ليها حضرتك تقربلها إيه؟
_خطيبها انا خطيبها
_طيب تقدر تاخدها وتمشي دلوقتي ومن الأحسن لما تفوق متتكلمش معاها عن آخر حاجة كنتوا بتتكلمه فيها
_طيب معلش هو لو مثلآ فيه حد بيكون الصبح شخص وبليل يبقى شخص تاني واسم تاني دي ليها مصطلح طبي او علمي؟
_ده كدا اسمه انفصام الشخصية ومن المفروض تتابع من دكتور نفسي ، ده اخر موضوع اتكلمته مع بعض فيه؟
_اه هي كانت شخصية تانيه متعرفنيش وعرفتها إن انا خطيبها ووريتها صور لينا
_يبقى ده سبب الصدمة انت صدمتها بشخصيتها اللي كانت مجهولة بنسبه ليها ومن الأحسن تتابع مع دكتور نفسي أفضل ليك وليها وهيفيدك اكتر مني
_تمام متشكر يا دكتور
بقولها ليه وبروح احاسب وبدخل اخدها وبنمشي بوصلها للبيت بطلعها وبسيبها نايمه على الكنبه وبمشي
(شــمــــس)
بصحى الصبح بدري وبستغرب إني مسمعتش المنبه وبستغرب اكتر لما بلاقيني نايمة على الكنبه
بدخل اوضتي وبتصدم وانا واقفه قدام المرايا من الفستان اللي لابساه
_إيه ده !
_ولبسته امتى وفين وليه؟
بقولها لنفسي وبغير هدومي وبغسل وشي من الميكب وبستغرب بردوا عشان محطيتش اي ميكب إمبارح
بعمل فنجان قهوة وبقعد بحاول افتكر إيه اللي حصل ، وموبايلي بيرن وبيكون نادر
_إيه يا حبيبي
_صحيتي ؟
_اه من شويه
_طيب محتاج نتكلم شويه
_انا اللي محتاجه اتكلم والله يا نادر
_حصل حاجة ولا إيه ؟
_بقالي يومين بيحصلي حاجات غريبه
_زي إيه ؟
_بصحى من النوم بلاقي هدوم على الأرض مره فستان ازرق ومره فستان احمر إنهارده بقى صحيت من النوم لقيتني على الكنبه ولابسه فستان اسود انا خايفه اوي يا نادر تفتكر انا ملبوسه !
_ملبوسه إيه بس يا شمس
_والله الموضوع فيه عفريت
_عفريت إيه ده اللي بيحب الفساتين عفريت من الانستجرام ولا إيه فاشونستا !
_انت بتهزر يا نادر
_لا مش بهزر البسي ونتقابل في الكافيه اللي تحت البيت وهنفهم مع بعض كل حاجه
_طيب هلبس وانزل
_تمام مستنيكي
يتبع…….
لقراءة الفصل التالي : اضغط هنا
لقراءة الرواية كاملة اضغط على : (رواية لا تسألني من أنا)
