رواية لا تسألني من أنا الفصل الأول 1 بقلم شهد محمد جاد الله
رواية لا تسألني من أنا الجزء الأول
رواية لا تسألني من أنا البارت الأول
رواية لا تسألني من أنا الحلقة الأولى
وراكي حاجة بعد الشغل إنهارده يا شمس؟
_لأ ليه ؟
_تعالي معانا حفلة إنهارده
_حفلة إيه دي ؟
_حفلة تبع النادي هيكون فيها فقرات كتير غنى وشِعر ومسرحية وحاجات كتير لذيذه
_خلاص بعد ما اخلص شغل هكلم نادر ونيجي سوا
_هستانكم
_اتفقتا يا عيوني
بقولها ليها وببتسم وبكمل شغلي وبعد ما بخلص بقعد مع العميل اللي هتفق معاه على الصفقة الجديده
_على إتفقنا يا استاذ خالد اتنين مليون
_كتير يا شمس صدقيني
_لأ مش كتير ده كدا الشركة خسرانه استاذ صلاح جاد متفق معايا على اتنين مليون ونص بس انا احترمت إتفقنا ورفضت عشان حضرتك
_مليون ونص
بيقولها وموبايلي بيرن بيكون نادر خطيبي باخد الموبيل وبقول:
_استاذ صلاح بيرن اهو
بقولها وبرد على موبايلي وبقول:
_ايوا يا استاذ صلاح
_صلاح مين ؟
_إيه بتقول إيه تلاته مليون مره واحده !
_إنتي بتكلمي حد تاني يا شمس ولا إيه ؟
_طيب ممكن خمس دقايق وارد على حضرتك
بقولها وبقفل موبايلي وبروح ناحية استاذ خالد وبقول:
_استاذ صلاح ناوي يدفع تلاته مليون لو حضرتك مش هتدفع الاتين مليون يبقى خلاص حصل خير ونلتقي في صفقات جديده
بقولها وباخد شنطتي وبيوقفني صوته وهو بيقول:
_خلاص يا شمس اتنين مليون
_مبروك عليك ، نمضي العقد
بقولها وبطلع العقد من شنطتي وبنمضيه وبتخلص الصفقة وبدخل لـ سيف المدير بتاعي وبقول:
_الصفقة خلصت على اتنين مليون يا كوتش
_الواحد مش عارف من غيرك الشركة كانت هتعمل إيه والله
_الشركة كانت هتبقى ولا حاجه
_انا اقول انتي متقوليش
_طيب العقد أهو
_ليكي ربع مليون مكافأه
_هو دا الكلام ، استأذن دلوقتي وبكرا حضرلي فلوسي باي
بقولها وبخرج من الشركة باخد عربيتي وبرن على نادر خطيبي
_حقك عليا يا حبيبي معلش
_إنتي فين يا شمس
_جايه حالآ في الطريق اهو
_ومين صلاح وإيه الكلام الغريب اللي كنتي بتقوليه ده
_كنت بعمل صفقة جديده وانت رنيت في وقتك وكنت استاذ صلاح اللي هياخد الصفقة بــ تلاته مليون جنيه
_طيب يا مجنونه مستنيكي
_عد لحد عشرين وهكون عندك
_ولو عديت لعشرين ومكنتيش عندي؟
_بسيطة عد عشرين كمان
_مستنيكي يا اخر صبري وخلي بالك من نفسك
_حاضر يا حبيبي
بقولها وبقفل معاه وبكمل الطريق وانا بسمع اغاني فريد وبغني معاه بدلال لحد ما بوصل المعادي
بدخل للكافيه اللي بنتفق اننا هنتقابل فيه بيكون كافيه على النيل اول مكان اتقابلنا فيه وقصة حبنا بدأت فيه
بدور عليه بعيوني لحد ما بلاقيه قاعد سرحان مع فنجان القهوة
_بخ انا جيت
_وحشتيني
_وانت كمان وحشتني قد البحر
_بس؟
_وسمكاته
بيبتسم ليا وبيمسك كف إيدي بسيب فيه بوسه رقيقه وبيحكيلي عن تفاصيل يومه
_وبس يا ستي بوظت الشغل
_متزعلش نفسك هنحل كل حاجه سوا
_مش في المود نهائي عشان احل حاجة دلوقتي
_لأ هنحل كل حاجه دلوقتي انت تمسك ملف المبيعات وانا همسك ملف التسويق وهنخلص سوا
_شمس مش عايز اعمل حاجة دلوقتي
_لا هنعمل كل حاجه دلوقتي كمان انا معايا اللابتوب بتاعي ومعنديش حاجه بقيت اليوم يبقى نخلص سوا يلا
بيبتسم ليا وبيطلع اللابتوب بتاعه وبنبدأ شغل سوا ، بنشرب القهوة وبنطلب شاي
وبنخلص الشاي وبطلب طبق فراولة وهو بيخرج يجيب ليا شكولاته سايحه بحطها على الفراولة وباكلها وانا بعمل الشغل
لحد ما بنخلص سوا
_شفت خلصنا بسرعة إزاي
_مش مصدق والله شغل اسبوع خلص في كام ساعة
_انت قد اي حاجه يا حبيبي
_انا بحبك
_وانا كمان بحبك قد الدنيا حقيقي
بيبتسم ليا وبيقوم يحاسب وبيوصلني لحد البيت وبنسلم على بعض وبيمشي
بطلع البيت بقلع الهيلز بتعب وبمسح الميكب وبلبس بيجامه مريحة وبلم شعري كحكة
وبدخل اغسل المواعين وبروق الصالة وبعمل كيس إندومي بالخضار باكله وبدخل انام
وفي وسط نومي بصحى من صداع في دماغي مكنتش قادره استحمله لدرجة إني كنت ماسكه دماغي عايزه اخبطها في أي حيطه من الوجع
فجأة الصداع ده بيروح وبرجع لطبيعتي وبفتح الدولاب بختار دريس ازرق ستان قصير بلبسه وبعمل شيري وبحط ميكب اوفر وبلبس هيلز وباخد موبايلي وشنطتي وبنزل
بحس إني في حلم مش فاهمه انا فين ولا بعمل إيه ولا رايحه فين بس زي ما يكون دي حياتي ودي حاجه مش جديده عليا
بروح الـ night club
بدخل المكان والغريبه إن اغلبية الموجودين عارفني ، بروح للبار بطلب نبيذ بشربه وبروح ارقص في ساحة الرقص وبعد ما بزهق برجع أقعد على البار تاني
بطلع سيجاره وبلاقي واحد ورايا بيولع ليا السيجاره ببتسم ليه وبيقعد جنبي
_أدهم
_نور
_فستانك شدني بصراحة
_الفستان بس !
بقولها وبضحك بدلع بيرد عليا وبيقول:
_الفستان وصاحبة الفستان
_طبيعي ست حلوه زيي ميلقش بيها إلا نظرات الإعجاب والحب
_اموت انا في البنات الواثقة من نفسها ، نرقص سوا يا حلوه؟
_يلا بينا
بقولها وبقوم ارقص معاه الوقت بيعدي مش عارفه قد إيه بس بنخلص رقص وبنشرب سيجاره سوا وبرجع البيت
بطلع البيت وانا حاسه بنفس الصداع بقلع الفستان وبلبس البيجامه بتاعتي وبمسح الميكب وبنام
وبصحى تاني يوم على صوت المنبه
بصحى وببص على الأرض وبقول:
_إيه اللي جاب الفستان الأزرق ده هنا !
يتبع…….
لقراءة الفصل التالي : اضغط هنا
لقراءة الرواية كاملة اضغط على : (رواية لا تسألني من أنا)
