رواية كما تدين تدان الفصل السادس 6 بقلم زينب رمضان
رواية كما تدين تدان البارت السادس
رواية كما تدين تدان الجزء السادس
رواية كما تدين تدان الحلقة السادسة
فريده: رايح فين كدا يا حبيبي ومتعصب ليه
مالك: سمر هتجنني يا ماما مش عارف اعملها ايه
فريده: ليه يابني مالها عملت ايه دا مراتك بلسم يتحط على الجرح يطيب
مالك بقهر: موضوع الحمل دا يا ماما ممغص علينا عيشتنا كل اما حد يقولها كلمه تنكد عليا انا وتبقا عايزه تسبني انت تستاهل الاحسن مني يا مالك انت تستاهل يبقا عندك عيال يا مالك انت معرفش ايه يا مالك انا شكلي العيب مني وانت مش عايز تقولي مش عارف اعمل ايه بس زهقت ومبقتش طايق اقعد في الشقه من زنها
فريده: يابني وحد الله واهدى كدا وبعدين مين قالها ان بجوازك من غيرها هتتحل المشكله يابني العيب مش فيك ولا فيها مش دا الي الدكاتره قالوه يابني بس ربنا مش رايد دلوقت والموضوع مش في ايدنا انا هروح اكلمها وهحاول اطيب بخاطرها واشوف اي الي مزعلها
مالك بحب: ربنا يخليكي لينا يا ماما يارب انتي اطلعيلها وانا هروح اجبلها هديه حلوه كدا تفرحها وتنسيها الموضوع دا
♡__________________________♡
ام هدير بجديه: جهزي نفسك يا هدير عشان حسام شويه وجاي عايز يتكلم معاكي
هدير: يتكلم معايا في ايه يا ماما انتي مش قولتي لبابا يقوله اني مش موافقه
ام هدير: ايوا يابنتي ابوكي كلمه بس هو طلب انه يقعد يتكلم معاكي وهو هيحاول يقنعك ولو موافقتيش يبقا خلاص كدا وابوكي وافق لانه الصراحه مش معترض على حسام بيقول انه محترم وابن ناس محترمين وهيحافظ عليكي ويصونك
هدير في نفسها: يحافظ عليا انتي متعرفيش حاجه خالص يا ماما
ام هدير: بتقولي حاجه
هدير: مبقولش يا ماما بس انا مش عايزة اقعد معاه خلاص انا قعدت مره وقولت مش موافقه وخلاص
ام هدير: يابنتي مينفعش ابوكي ادا للراجل كلمه وقاله يجي هتكسري كلمة ابوكي
هدير بإنفعال: لا يا ماما بس هو مش بالغصب انا مش موافقه وخلاص عايز ايه تاني بس خلاص عشان خاطركم هطلع المره دي كمان بس لو قولت لا المره دي اتمنى ميبقاش في مره تالته
ام هدير: خلاص يابنتي الي تشوفيه إن شاء الله دي اخر مره
هدير: يارب يا ماما بقا
♡___________________♡
عادل: بتفكري في ايه اوعي تقولي هتروحيله وتسيبيني دي فرصه خلصنا منه هناخد راحتنا بقا سيبك منه وتعالي في حضني
منال بمرقعه: هيهيهييي يا حبيبي هو احنا فارق معانا وجوده من عدمه بس عندي فضول عايزه اعرف الي حصل
عادل: خلاص سيبك منه وانا هكلملك واحد صحبي ممرض في المستشفى دي واعرفلك منه هو حصله أيه وهيريحنا منه ولا لسه فيه النفس
منال: خلاص يا حبيبي كلمه كدا وقولي خبر حلو اني هخلص منه
عادل: انا عارف انك نفسك تكون نهايته على ايدك بسبب خيانته لينا والي عمله معانا بس يا حبيبتي هو ميستهلش نضيع نفسنا على كلب ولا يسوا زي دا
عادل اتصل بصاحبه
عادل: السلام عليكم
-وعليكم السلام ورحمة الله وبركاته عامل ايه يا عادل وحشني يا جدع مختفي يعني بقالك فتره
عادل: موجود يا صاحبي بس انت الي مش فاضي من ساعه ما اشتغلت ممرض في المستشفى بقا مبقتش شايف حد
-عيب عليك يا صاحبي هو انت اي حد دا انت اخويا يا جدع
عادل: تسلم يا اخويا بقولك يا صاحبي عايز اطلب منك طلب
-اتفضل يا صاحبي تحت امرك
عادل: في واحد معرفه سمعت انه عامل حادثه في المستشفى الي انت شغال فيها وكنت عايزك تطمني هو كويس ولا ايه
-اسمه ايه يا صاحبي
عادل: اسمه صبحي عبدالحميد لسه عامل حادثه النهارده
-اه جات حاله اسعاف النهارده لواحد عامل حادثه بس حالته خطيره ومحتاج عمليه مستعجله بس لسه مظهرش حد من اهله كان الدكتور بيقول انه للاسف ممكن يعمل بتر في رجله
عادل: لا حول ولا قوة إلا بالله طب بقولك يا صاحبي هو فايق كدا ولا ايه النظام
-ايوا فايق بس مش بيتحرك وشكله عنده صدمه ومش بيتكلم
عادل: خلاص يا صاحبي هشوف عيلته ونجيلك انت بس خلي بالك منه وابقا طمني عليه
-من عيني يا صاحبي دا واجبي
عادل: تسلم يا صاحبي مع السلامه
—
عادل: ها يا ستي اطمنتي
منال: طب يالا يا عادل عايزه اروح اشوفه
عادل: ليه يا اختي هتحنيله ولا ايه ولا يكون صعبان عليكي
منال بخبث: احن لمين يا حبيبي كل الحكايه اني عايزه اشوفه وهو عاجز واتشفى فيه
عادل: إذا كان كدا ماشي بس بقولك ايه انتي مش كنتي عايزه تاخدي كل فلوسه
منال: ايوا بس هعملها ازاي دي وهو كدا
عادل: الحل عندي اسمعي ياستي
♡__________________________♡
ريم: فاطمه يا حبيبتي عامله ايه
فاطمه: ريم عاش من شافك يابنتي ايه الي شغلك عني
ريم: مفيش يا قلبي والله بس انتي عارفه المذاكره بقا والامتحانات قربت عايزه انجح بقا ولو بمقبول يابنتي بس نلغي الضعيف والضعيف جدا من تقديري
فاطمه بضحك: هو كدا يبقا تقدير يابنتي وهو فيه ض وض. ج بتهزري دا كدا اقلام يابنتي على وشك تقدير ايه بس
ريم: وبتقوليها في وشي كدا يا فاطمه وبعدين يابنتي مش بجيبهم بمجهودي يبقا لازم يقدروني عليهم
فاطمه بضحك: امال يابنتي لو ريم سامي متقدرتش مين هيتقدر
ريم: ايوا كدا يابنتي اتعدلي صح يا بطه بقولك عايزاكي في موضوع كدا بس توعديني الي هقوله ميطلعش بره
فاطمه: عيب يا صاحبي سرك في بير
ريم بجديه: بصي ياستي انا عندي واحده صحبتي كانت على علاقه بشاب وبتكلمه على النت وكانت بتنزل صورها استوري بحجاب وكدا وصور عاديه بس هو كان بينزل الصور عنده وكان بيبتزها عاطفيا عشان تبعتله صور اكتر يعني كان بيقولها انه بيحبها من غير ما يشوفها وبعدين لازم اعرف الي بكلمها وكدا لحد ما قررت تقطع علاقتها بيه لما عرفت انه بتاع بنات وشخصيته مش كويسه هددها بصورها وبعتلها صور متفبركه ليها يطريقه مش كويسه وقالها تبعتله فلوس بدل ما ينزلها على كل المواقع ويفضحها ويبعتها لاخوها وهي خايفه تقول لاخوها يقتلها
فاطمه: بس كدا غلط انها تستسلم لتهديده ليها مش هتخلص منه يابنتي هتديله مره هيطلب التانيه ومش هتخلص وبعدين هي صحبتك دي غنيه قوي هتجبله منين
ريم: لا هي لما قالتله انها معهاش فلوس قالها تسرق دهب امها ودهبها وتبعتهوله
فاطمه: دا شكله كدا عايز يحقق احلامه على قفاها يابنتي ولا ايه
ريم: شكله كدا يا بطه بس هنعمل ايه
فاطمه: بصي يا ريم انا سيبت الموضوع دا من زمان بعد ما زهقت من حركات الشباب دي والله ووجع دماغهم ومبقتش اكلم حد بس انا شوفت جروب على الفيس كدا مشهور جدا بيساعدوا البنات الي زي صحبتك دي وبيعرفوا يوقفوا المبتز عند حده هبعتلك اللينك بتاعه على الواتس خليها تكلمهم وهما هيقولولها تعمل ايه
ريم: يعني انتي ضمناهم كدا يا فاطمه يعني مش هنكون بنطلع من حفره لحفره اكبر
فاطمه: لا يابنتي متقلقيش دول جهه معتمده من الدوله وساعدوا بنات كتير وإن شاء الله يساعدوا صحبتك وكمان هتبقا كل معلوماتها سريه
ريم: خلاص هقولها وربنا يسترها بقا ويقدروا يساعدوها
♡_________________________♡
فريده: سمر يا حبيبتي مالك
سمر وهي بتعيط وترمي نفسها في حضن فريده
مخنوقه جامد يا ماما مش عارفه اعمل ايه هو بايدي يا ماما اني مخلفش طيب ليه يا ماما كله جاي عليا كدا
فريده: اهدي يا حبيبتي اهدي وفهميني ايه الي حصل في حد قالك حاجه انا عارفه ان الموضوع دا مش بايديك وبعدين انتي يابنتي مكملتيش سنه يا حبيبتي دا في ناس بتاخد اكتر من خمس سنين والموضوع عادي وربنا بيرزقهم
سمر بحزن: حاولت يا ماما اني اتقبل الموضوع دا وانساه بس يا ماما كل حاجه بتقولي انتي هتنسي انتي مش هتخلفي حتى اختي الي من لحمي ودمي مرحمتنيش كل اما تشوفني تقولي دا فلانه اصغر منك ولسه متجوزه وخلفت وفلانه معاها كام عيل وكل شويه تاخدني لشيخ شكل عايزه تشوفني معمولي حاجه ولا ايه ومش بخلف ليه يا ماما لحد ما كرهت اني اشوف اختي بقيت برتاح لما مش بشوفها يا ماما
فريده بحزن: يا حبيبتي والله ربنا هيرزقك بس انتي استغفري ربنا وصلي متقطعيش صلاتك وابعدي عن اي حاجه توترك وخلي ليكي شخصيه مع اختك مش تقولك ايمين ايمين شمال شمال لا يا حبيبتي انتي تشوفي ايه الصح وتعمليه
سمر: حاضر يا ماما والله هحاول اعمل كدا انا مليش غيرك انتي ومالك ومريم في حياتي لو ماما وبابا كانوا عايشين مستحيل كانوا وافقوا على الي اختي بتعمله معايا دا وانا من النهارده هحاول اتغير وحياتي هختصرها على الي مهتمين بيا بس
فريده: حبيبتي ربنا يصلحلك حالك ويرزقك بالذريه الصالحه يارب يالا يا قمر انا نازله بقا مريم شويه وجايه من الكليه ومالك زمانه طالعلك متكشريش في وشه وتنكدي على نفسك وعليه في حاجه مش في ايده يعمل فيها حاجه يابنتي هو هيجلك هديه ويجي يصالحك فرفشي كدا ومتخلش الشيطان يدخل بينكم
سمر: حاضر يا ماما والله هصالحه واعتذرله عن الي عملته لما يجي
♡__________________________________♡
ام هدير: يالا يا هدير اطلعي بقا حسام مستنيكي من بدري
هدير: حاضر يا ماما طالعه اهو
ام هدير: ماشي يا حبيبتي بصي انتي هتقعدي انني وهو في الصاله وانا وابوكي في البلوكه جنبكم عينا عليكم
هدير بهدوء: ماشي يا ماما يالا نطلع
هدير: السلام عليكم ورحمه الله وبركاته
—وعليكم السلام ورحمه الله وبركاته
ابو هدير استأذن وخرج عشان يسيبهم على راحتهم
هدير: حسام انت مش قولت اني لو رفضت هتنساني ونخلص من الموضوع دا رجعت تاني ليه
حسام بهدوء: لا منا مترفضش يا دودو ولا ايه ومتنسيش ان رقبتك تحت ايدي ولا نسيتي صورك الي معايا ولا خروجنا سوا من ورا اهلك شكلك نسيتي نفسك بعد ما استخبيتي ورا النقاب وفكرتي نفسك خلاص كدا لا يا حبيبتي متنسيش نفسك وماضيكي الزباله ولو نسيتي انا موجود افكرك
هدير بدموع بتحاول تداريها عشان اهلها مياخدوش بالهم حرام عليك يا اخي انت ليه كدا حرام عليك انت الي علقتني بيك وانت الي دخلتني الطريق دا ودلوقت جاي تحاسبني وبعدين انا غلط لوحدي انت كمان غلط
حسام: لا يا حبيبتي انا راجل مفيش حاجه تعيبني اما انتي بنت سمعتك زي عود الكبريت اذا اتبل ملهوش لازمه بعد كدا
هدير:…………………
___________________________________
اوعى تظلم مهما كنت قادر ربك هو الاقدر
اوعى تفضح عيب انسان لو ربك ستر
كما تدين تدان متضمنش القدر
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية كما تدين تدان)
