رواية كل حياتي الفصل الرابع 4 بقلم حمادة هيكل
رواية كل حياتي الجزء الرابع
رواية كل حياتي البارت الرابع
رواية كل حياتي الحلقة الرابعة
عاوزاكي في حاجه مهمه
طيب نخلص المحاضرة ونتكلم
محاضرة ايه انا عرفت السر ورا اللي عملوا فاروق
بتتكلمي جد!!
ايوه طبعا هو انا اي حد انا ريم يا بنتي
طيب يلا نروح الكافتريا ونتكلم
طب والمحاضرة ؟
تتحرق أكتر ما هي محروقة ؟
ها ..قولي بقى ؟
الغيرة هي السبب
يعني ايه ؟
الغيرة هي اللي خلت فاروق يسيبك ويخطب اختك
مش فاهمه حاجه ..وضحي وبلاش ألغاز
طيب طيب هفهمك ..
ها
اسمعي يا ستي ..فاكرة علاء عبد الباسط ؟
علاء ..اه فاكراه الواد الرخم اللزقة دا
اللي كان قارفني كل شوية وعاوزني احبه بأي شكل
اهو علاء دا بقى سبب المشكلة
أزاي ؟
عرف أنك بتحبي فاروق وانكم هتتخطبوا قريب
وعرف أزاي
في عنده صديق مشترك بينه وبين فاروق
حكى له عن كل حاجه ..عرف علاء يوقعه
في الكلام وفهم منه أن فاروق ناوي يتقدملك قريب
وبعدين ؟
بعدها ياستي نار الغيرة شعللت فيه وقرر
انه يوصل لفاروق انك بتأجلي موضوع ارتباطكم
دا لأنك بتحبي حد تاني ومستنيه منه يتقدملك
وان الشخص التاني دا مش واضح في علاقتكم
وانك رابطه فاروق لحد ما تعرفي حبيبك
التاني دا هيتقدم ولا هيخلع
يابن الكلب !! هو أزاي يقول عني كدا
المشكله ان الكلام دا قاله لبنت قريبة
من بنت خال فاروق وهي اللي وصلت ليها الكلام
وطبعا هي زعلت على ابن عمتها
وقالتله أن سهيلة بتأجل أرتباطكم
لأنها عملاك أستبن ..لحد ما تشوف
حبيبها الأولاني هيتصرف معاها أزاي
طبعا فاروق اتقهر وصدق الكلام دا
لانه كان حاسس انك مخبيه حاجه
ورا تأجيلك الخطوبة باستمرار
عشان كدا قرر ينتقم مش بأنه يسيبك لأ
بأنه يتتقدم لأختك كمان
عشان يقهرك ويذلك بشكل مستمر
بقى فاروق يصدق عني أنا كدا ؟
طب كان يسألني ويعرف مني
قبل ما يصدق الغرب
الحكاية جات له من بنت خاله فهي بالنسبالك
مش غريبة وبيعتبرها زي أخته
وأنها لا يمكن تكذب عليه
علاء الحيوان دا لعبها صح ..وعرف أزاي
يوقع ما بينكم ..لكن فاروث أنتقامه منك كان صعب
طب هو كدا مش بيحب حنان وممكن يسيبها
في اي لحظة ..ويكسر قلبها هي كمان
حنان ملهاش ذنب في اللعبة القذرة دي
كلمته بعد تردد وطلبت منه أقابله
حاول يتهرب مني
بعدها شوفته عندنا في البيت
وانتهزت فرصة انشغالهم
دخلت البلكونه ووقفت جنبه وقولتله
شوف انا مش هعاتبك ع اللي عملته
بس لو فكرت تكسر قلب أختي
انا هقتلك بأيدي ..مش فارق معايا انك سبتني
بس أختي لأ ..الا أختي يا فاروق
سبته ومشيت وانا خارجه
لقيت حنان واخده عصير ورايحه ليه
بصت لي وهي مستغربة ..حست أن في حاجه
بعدها بالليل ..سألتني قبل ما انام
انتي كنتي بتقولي لفاروق ايه في البلكونه
ها..لا مفيش
لا في ..واضح انك مخبيه عني حاجه
صدقيني مفيش انا كنت بوصيه عليكي
وبقوله اوعى تزعلها منك وسيبيني بقى عايزه انام عندي محاضرات بدري ،تصبحي على خير
وانتي من اهله !!
بعد كام يوم كنت قاعده في أوضتي بتظاهر اني بذاكر
دخلت حنان وقالت
بتعملي ايه
بذاكر يا قلبي
واضح …مسكت الكتاب وقالت
.بس لو ذاكرتي والكتاب معدول هتفهمي أكتر
اه ..شكلي سرحت شوية
على فكرة انا هسيب فاروق
ايه ؟
انا عرفت كل حاجه
انتي بتقولي ايه
ماما قالت لي على كل حاجه
ماما !! ليه بس يا ماما تعملي كدا ؟
اوعي تفتكري اني ممكن ابني سعادتي
على وجعك يا سهيلة ..انتي مش أختي الصغيرة وبس
انتي بنتي اللي انا مخلفتهاش
حنان صدقيني أنا مفيش حاجه جوايا ناحيته خلاص
عارفه ..هي اصلا مشاعر مراهقه وانتي عارفه اختك
هبله بتحب على روحها كل شوية بكراش على مز جديد
وعشان عارفه اختي ..عارفه انك بتكذبي
انتي عمرك ما كنتي كدا..انتي حبتيه بجد
حنان لأ . صدقيني أنا مش بحبه
دا هيبقى جوز اختي يعني زي أخويا
مفيش حد زي اخونا ابدا
الله يرحمه
سهيلة ..فاروق لو كان اخر راجل في الدنيا
لا يمكن أتجوزه..صدقيني اي حد في الدنيا ممكن يتعوض
بس انتي هعوضك أزاي يا عبيطه
يروح راجل ييجي عشره ولو مجاش
هبقى بايرة وماله ..المهم اني مشوفش النظرة
دي في عيونك ابدا ..بسببه او بسبب غيرة
انا ممكن أكله بسنناني لو فكر يجرحك
مش اني اسيبه وبس
دموعي نزلت غصب عني ..واختي حضنتني جامد
وقالت عيطي ..عيطي ياروحي انا اكتر وحده حاسه
بوجعك من يومها بس كنت مستنيه تصارحيني
وتيجي منك
كنت خايفه أكسر فرحت
انتي فرحتي يا عبيطه مش هو
ربنا يخليكي ليا يا أجمل وارق واطيب أخت في الدنيا
بعدها فاروق اتصدم لما شبكته رجعتله
واكتشف الحقيقة أن كان ضحية كذبة صدقها
من واحد حقير بدافع الغيرة
ندم جدا واعتذر ألف مرة
وانه اد ايه ندمان ومستصغر نفسه
وانه اسف على الوجع اللي سسبهولي
بسبب غباءه وتسرعه
انا اللي وجعني مش انك سبتني
بس وجعني انك كنت ناوي تكسرني بأختي
وتكسرها هي كمان ..بس صدقني
ربنا كريم وعادل وهيعوضنا خير
وهتشرب من نفس الكاس
وكفاية اوي لحد كدا مش عاوزه اشوف وشك تاني
بعد 4 شهور
مش مصدقة اني شايفه اختي
بتلبس شبكتها على شاب محترم
وابن حلال شافها صدفه في فرح وخطفت قلبه
وسأل عنها وجاب أهله وجه على ملا وشه
الحمدلله ربنا عوضها خير…ربنا كريم ❤
تمت
لقراءة الرواية كاملة اضغط على : (رواية كل حياتي)
