رواية كل حياتي الفصل الثالث 3 بقلم حمادة هيكل
رواية كل حياتي الجزء الثالث
رواية كل حياتي البارت الثالث
رواية كل حياتي الحلقة الثالثة
لقيت فاروق بص لي وقالي
وانتي يا انسه سهيلة ايه رأيك ؟
بصيت ليه في تحدي وقولت بكل كبرياء
ربنا يتمم بخير
حالة صدمة ودهشه كبيرة
كنت فيها بعد ما مشيوا
أختي حضنتني وهي مش مصدقة
ضميتها وانا بقولها ألف مبروك يا حبيبتي
ربنا يسعدك انتي تستاهلي كل خير
ماما حطت ايدها على كتفي وقالت
تعالي يا سهيلة نشيل الحاجه ونحطها في المطبخ
كأنها كانت بتسحبني من الموقف الصعب دا
واول ما دخلت المطبخ وراها
بصيت لها والدموع في عنيا
واترميت في حضنها وفضلت ابكي
بكل قهرتي وانا بحاول أكتم صوتي
عشان بابا وأختي ميحسوش بحاجه
بس خلاص يا سهيلة ..اهدي يا حبيبتي
متوجعيش قلبي اكتر ماهو موجوع عليكي
ليه يا ماما ..فهميني هو عمل كدا ليه ؟
والله ما اعرف يا بنتي ..انا كنت مستغربة جدا منه
انتي واثقه انه كان بيحبك ؟
ايوه يا ماما هو انا كنت بحلم ؟
معقول كنت بحلم وعايشه في وهم كل دا
بس لا ..لا مش حلم دا واقع ..8 شهور و5 ايام
و9 ساعات من وقت ما قالي بحبك
انتي حاسبها باليوم والساعه كمان ؟
واكتر يا ماما ..انتي مش متخيلة انا بحب..
كنت بحبه أد أيه
طيب وهتعملي ايه
مش هعمل ..لا يمكن أكسر فرحت حنان ابدا
دي حنان يا ماما انا ما صدقت اشوفها فرحانه كدا
ربنا يكملك بعقلك يا بنتي ويعوضك خير عنه
كنت هموت واتصل بيه واكلمه
واشوفه واعرف منه هو ليه عمل كدا
بس كرامتي منعتني ..هو خلاص أختار أختي
ولا يمكن أسمح لنفسي أبوظ فرحتها
ولا أعرفها انه كان بينا حاجه في يوم
ومسيري هنساه وهطلعه من قلبي ..حتى لو هموت
فات أسبوع والتاني ..وكان فاروق جه مرتين تلاته
في زيارة لينا ..كنت شايفه فرحت حنان
وكأن روحها رجعت لها من تاني وابتدا وشها ينور
وهي متعرفش بالنار اللي ف قلبي
كمان فاروق بيتعامل معايا ببرود وكأنه معملش اي حاجه
ولا كسرني وباع حبي في لحظة بدون سبب
فات شهرين وانا عايشه في عذاب
وحيرة وألم وهموت من الفضول
واعرف ليه فاروق عمل فيا كدا
والأصعب من كل دا ..اني كنت بمثل اني فرحانه
عشان أختي ..وخايفه يبان عليا حاجه
رغم انها سألتني انا ليه متغيرة كدا
احكي لي مالك يا سهيلة هتخبي على أختك حبيبتك
مفيش يا روحي ..ازعل أزاي وانا شايفكي
مبسوطه وسعيده كدا
متتصوريش فاروق حنين اد ايه
وبيحبني أزاي ..الحمدلله ربنا عوض صبري خير
كلامها كان زي السكين بينغز في قلبي
وانا بحاول اتظاهر بدور الاخت السعيده
ولكن قلبي مش قادر ..وانا عمري ما كنت بوشين
بس بحاول عشان متعرفش وبتحجج بأي كلام
ومشاكل هبلة تبرر الحزن اللي عنيا
بدأت الدراسة وقابلت ريم زميلتي
وحكيت لها اللي حصل ..كانت مش مصدقه
معقول فاروق بعد الحب دا كله يسيبك
ودونا عن بنات البلد كلها يختار أختك انتي !!
انا هموت من القهرة ياريم ومش عارفه أعمل ايه
طب محاولتيش تعرفي منه ليه عمل كدا
محاولتش ومش هحاول
وطبعا هو محبش يقولك ولا يعرفك ليه عمل كدا
طبعا لأ..بالعكس دا بيعاملني بكل برود
وكأننا أخوات ومكنش بينا اي حاجه خالص قبل كدا
غريبة اوي الحكاية دي ..الموضوع دا وراه سر
ولازم نعرفه
بعد كام يوم لقيت ريم بتقولي
تعالي تعالي
في ايه يا بنتي
عاوزاكي في حاجه مهمه
طيب نخلص المحاضرة ونتكلم
محاضرة ايه انا عرفت السر ورا اللي عملوا فاروق
بتتكلمي جد!!
ايوه طبعا هو انا اي حد انا ريم يا بنتي
طيب يلا نروح الكافتريا ونتكلم
طب والمحاضرة ؟
تتحرق أكتر ما هي محروقة ؟
ها ..قولي بقى ؟
واللي عرفته منها كان صادم ومش متوقع أنه يحصل من فاروق ابدا …
قالت لي
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية كل حياتي)
