رواية قل متى ستحبني الفصل الأول 1 بقلم الشيماء محمد
رواية قل متى ستحبني الجزء الأول
رواية قل متى ستحبني البارت الأول
رواية قل متى ستحبني الحلقة الأولى
# اصحي…. يا ابني اصحي بقي مش قولت وراك شغل وعايز تصحي بدري؟ احمد حبيبي اصحي
##احمد: يا الله يا امي سيبني انام شويه انا راجع الفجر
سميره: انت طلبت مني اصحيك بدري عايز تنام؟ براحتك
قام قعد بعنين تعبانه نعسانه
احمد: انا فعلا عندي شغل ولازم اقوم المهم صباح الخير يا قمر
سميره: صباح النور يا قلبي اجهزلك فطار سريع
احمد: لا لا تسلمي انا هاخد شاور بارد يفوقني وانزل علي طول
سميرة: مش تتجوز بقي ومراتك تبقي مسؤله عنك وتصحيك وتنيمك
احمد: طيب تصحيني ومعروفه وتنيمني ازاي بقي؟
سميرة: تاخدك في حضنها كده وتدلعك
احمد قام واخد امه في حضنه
احمد: وهو في حضن احلي واجمل وادفي من حضنك انتي يا قمر؟؟
سميرة: اه في لما تجرب وتحب هيبقي حضنها بالدنيا
احمد: ولاني عارف اني عمري ما هغلبك ابدا ادخل الحمام انا واهرب علي شغلي
سابها ودخل
سميرة: ماهو انت مسيرك هتتجوز
احمد: ان شاءالله ادعيلي بس انتي… بس ادعيها من جوه ( شاور علي قلبه) بلاش الدعوات البراني دي
سميره: انا دعواتي براني يا ابن ال….
احمد: اياك تغلطي في جوزك الله يرحمه
سميره: امشي يا واد
دخل اخد شاور ولبس ونازل
احمد: عايزه حاجه قبل ما امشي؟؟؟
سميرة: فرح بنت عليه ياحبيبي النهارده تيجي بدري
احمد: يا الله صاحبتك وبنتها انا دخل امي ايه؟
سميرة: ان انت ابن امك تيجي فاهم؟ والا اقسم بالله م
احمد: من غير حلفان هاجي
احمد: ضابط برتبه مقدم شاطر في شغله محترم له سمعته ومكانته بين اصحابه ورؤساءه
جسمه رياضي طويل ووسيم جدا عمره حوالي 26 سنه والده متوفي وعايش هو وامه في فيلا صغيره وحالتهم الماديه ميسوره نوعا ما
اخر النهار رجع ولبس بسرعه بدله وطلع لامه
سميره: امتي بقي با حبيبي اشوفك عريس كده؟؟؟
احمد: ربك يسهل لما يريد يالا بينا
راحو الفرح وفضل مع والدته لانه بيكره جدا جو الافراح
قاعد بيسلي نفسه وبيلعب بموبيله ويقلب فيه وامه بتكلمه وهو مش مركز معاها اصلا لانها بتكلمه في بنات
كل ما تشوف بنت تحكيله تاريخ حياتها
وفجأه لفت انتباهه برفان شده جدا فاخد نفس طويل ورفع راسه يدور علي صاحبه البرفان ده ويدوب بيدور وشه لمحها وعنيهم اتقابلو في نظره طويله ليها الف معني ومعني
بنت جميله جمال ناعم شعرها بني ميال للدهبي عنين خضرا جدا وبياض التلج
ادهم بيبصلها جامد وبيحللها من فوق لتحت عايز يشوف اي غلطه فيها بس للاسف مفيش
سميره: هاه يا احمد قلت ايه؟؟؟ احمد؟؟؟ احمد
لاحظت انه مش معاها نهائي وبصت شافت البنت وابتسمت ان اخيرا واحده لفتت انتباهه
سميره بصوت عالي: احمد؟؟
احمد: ايه في ايه؟؟ صوتك عالي ليه؟؟؟
سميره: نص ساعه بتكلم وانت مش معبرني وبعدين ايه مش حلوه يعني تتنحلها كده؟؟
احمد: مين دي اللي بتنحلها وايه اتنحلها دي؟؟؟
سميرة: ام عنين خضرا
احمد: دي مش حلوه؟؟؟ لما دي مش حلوه مين الحلو؟؟؟
سميرة عايزه تضايقه وعايزه تتطبق نظريه الممنوع مرغوب وتخليه يعند عليها
سميرة: لا خالص شعرها لونه نار كده تحس انها حريقه وعنيها خضرا تخوف تحس انها هتتحول لقطه وهتخربشك وبياضها زي اللي عندهم بهاق و
احمد: بس بس شردتي البنت اولا شعرها لونه حلو جدا وعنيها زي البحر صافيه وجميله وتحسي انك لو بصيتلها كتير هتغرقي فيهم وبياضها زي التلج
زوقك انحدر جدا يا مرمر
سميرة: انت اللي زوقك غريب
احمد: طيب بعد اذنك بقي
سميرة: رايح فين وسايبني اقعد هنا؟
احمد: بقالك ساعه تتحايلي عليا اقوم ودلوقتي اقعد ايه الحكايه؟
سميرة: ما انت هتروح للقطه دي
احمد: اه عندك مانع لازم اعرف القطه دي اسمها ايه ادعيلي
سميره: تعال يا واد هنا احمد
سابها ومشي وهيا ابتسمت لانها عارفه انها لو شكرت فيها للحظه كان صرف نظره عنها لكن كده العند اشتغل واصر يتعرف عليها
الكل بيرقص سلو مع بعض وهيا واقفه بتتفرج وهيمانه
احمد قرب منها جدا ووقف جنبها واخد نفس طووويل من برفانها وهيا لاحظته وبصتله
احمد: بتبصيلي ليه؟؟؟ مش عايزه حد يبصلك ما تحطيش برفان فوق الرائع
ابتسمت البنت: برفاني مش للدرجه دي
احمد: برفانك عامل زي المغناطيس شاددني وراكي وعامل زي الشمام
البنت ضحكت علي تعبيره وهو اتسحر بضحكتها
البنت: طيب واعمل ايه بقي دلوقتي لو ادمنت؟؟؟
احمد: دي مشكلتك اتصرفي انتي بقي؟؟؟
البنت: اتصرف؟؟؟ خلاص مش هحط منه تاني ايه رايك؟؟
احمد: لا ده كده انا ممكن اتجنن انا ادمنته خلاص لازم تقوليلي اسمه؟؟؟ اروح اشتري قزازتين اشم فيهم
البنت ضحكت تاني: انت مجنون
احمد: انا احمد مش مجنون
البنت: وانا عبير
احمد ضحك اول ما سمع اسمها
عبير: بتضحك ليه؟
احمد: عبير!؟؟؟ اسمك هو ريحتك!! عبير!!!
عبير: اول مره حد يعاكسني كده
احمد: ايه ده مين اللي عاكسك؟؟ شاوريلي عليه وانا هقبضلك عليه حالا
عبير: تقبض عليه؟؟ انت ظابط؟؟
احمد: مش باين عليا؟؟ شكلي ما يديش؟؟ طيب ايه؟؟ اعملك اراجوز يمكن اعجبك؟؟؟
عبير: اممم افكر استني؟؟
احمد: ممكن تفكري وانتي بترقصي معايا؟؟ الاغنيه دي من اغاني المفضله
مد ايده ليها وهيا اترددت شويه وبعدها حطت ايدها في ايده ورقصوا مع بعض علي اغنيه Sway
رقصتهم كانت مليانه مشاعر، حوارات، صمت، حاجات كتيره عنيهم متعلقه في بعض لحد ما الاغنيه خلصت واتفاجؤا الاتنين ان محدش بيرقص غيرهم والكل بيصقفلهم عبير اتحرجت جدا فاحمد شدها من ايدها واخدها وطلع بيها بره
امه كانت بتتفرج عليهم وطلعت النوته بتاعتها تسجل معازيم الفرح وتجهيزاته
الاتنين مع بعض بيدردشوا ويتعرفوا علي بعض اكتر واكتر
عبير بنت رقيقه وحيده امها وابوها في اخر سنه في كلية صيدله
وهما مع بعض سمعوا حد بينادي عليها وهيا قاعده مع احمد في التراس علي السور قاعدين جنب بعض
احمد: في حد بينادي عليكي علي فكره
عبير: ينادي عليا انا؟؟؟ فين؟؟
احمد: الراجل اللي هناك ده
عبير بصتله وراحت نازله من علي السور
عبير: ده بابا
احمد نزل هو كمان وابوها جه عليهم واحمد عرف نفسه لابوها واتاسفله لو كان اخرها
ابوها اسمه يوسف الجبالي دكتور مشهور جدا في مجال النساء والولادة وامها دكتوره جراحه واسمها هناء
احمد دخل معاهم لجوه الصاله ولقي امه بتدور عليه واول ما شافتهم راحت ناحيتهم
احمد: امي ده دكتور يوسف الجبالي والد عبير
دكتور دي والدتي سميره السيد صاحبه شركه الامل والحياه للتأمينات
اتعرفوا علي بعض كلهم وقعدوا مع بعض وشويه وعيله عبير هيمشوا فاحمد قام يوصلهم لبره الفندق من بابا الذوق
اتاخر في المشي وشد عبير معاه
عبير: في ايه؟
احمد: هشوفك امتي تاني؟؟
عبير: وتشوفني تاني ليه؟؟
احمد: انتي مش عايزه تشوفيني تاني؟؟
عبير: عادي يعني
احمد اتضايق: طيب خلاص براحتك مش بحب افرض نفسي علي حد فرصه سعيده ومش هضايقك تاني بعد اذنك
ويدوب هيمشي راحت شداه: انت ايه ما صدقت؟؟
احمد: مبحبش افرض نفسي علي حد
عبير: وانا مش بقعد مع حد فارض نفسه عليا واعرف اتعامل معاه كويس
احمد: قصدك ايه؟
عبير: قصدي اني عندي بكره كليه وهخلص الساعه 2 يعني علي 2:10 هبقي قدام الباب الرئيسي
قالتها ومشيت وهو وقف مش مصدق للحظه انها وافقت تقابله فضل متابعها بعنيه وابتسامه كبيره علي وشه مرسومه ومستني بصتها ليه مره تانيه قبل ما تختفي
احمد لنفسه: يالا بصي وراكي بقي يالا يالا يالا
اخيرا قبل ما تختفي بصت وابتسمت له وشاورتله وهو شاورلها وبعد ما اختفت يدوب هيتلفت وراه لقي امه في وشه لدرجه انه اتخض
احمد: انتي واقفه ورايا كده ليه؟؟ حد يقف كده؟؟ خضيتيني
سميرة: انت ظابط انت؟؟؟ افرضنا كنت مجرم انا وهقتلك
احمد: مجرم في فرح طنط عليه ( قالها بتريقه) جاي ليه!؟ يسرق الجاتوه؟؟
سميرة: طيب هتكمل ولا نروح البيت؟
احمد: البيت ابوس ايدك انا صاحي من الفجر وعلي يدك
سميره مدت ايدها
احمد: ايه مش فاهم؟؟
سميرة: مش بتقولي ابوس ايدك!؟ بوس ايدي يالا
احمد ضحك ومسك ايدها وباسها واخدها وراحو لعربيته
سميرة: يالا يالا يالا ( بتتريق عليه وهو مستني عبير تبصله)
احمد: وبعدين معاكي يا سميره؟؟ مش هتجيبيها لبر انتي؟؟ لازقه ورايا تتجسسي عليا وهتخليني اقطع الخلف قبل ما اتجوز
سميرة: بعد الشر عليك يا قلبي بس برضه مش حلوه كده يا احمد تعال اعرفك علي بنت ساره صاحبتي
احمد: لا متشكر ولا ساره ولا عليه ولا اي حد متشكر
احمد راح لعبير تاني يوم وفعلا الساعه 2:10 طلعت كان واقف بنظارته ساند علي عربيته كانه موديل
احمد : مواعيدك مظبوطه
عبير: جدا وفوق ما تتخيل
احمد : طيب بما اني جاي من الشغل علي هنا فواقع من الجوع ايه رايك لو ناكل اي حاجه كده الاول علشان بس اعرف اتكلم
عبير: ايه علاقه الاكل بالكلام؟؟
احمد: مش محتاج طاقه ولا ايه؟؟ وبعدين انا عايزك ابهرك بيا
عبير: تبهرني امممم… يبقي فعلا محتاج مجهود كبيرلان الانبهار ده حاجه صعبه
احمد: ربنا يطمنك طيب تعالي بقي نديها اكله متينه علشان بس الانبهار ينفع
عبير: يالا بس خلي بالك اني قلت لبابا هتأخر ساعتين بس مش اكتر
احمد: بابا؟؟؟ ده مجرد hint ولا بتعرفيني ان باباكي عاوف انك معايا؟؟؟
عبير: التنتين
احمد: التنتين؟؟ يبقي يالا طالما الحسابه بتحسب
اخدها واتغدوا مع بعض
كانوا تلقائيين مع بعض مش محتاجين تزويق او تزييف او اقنعه
اتكررت مقابلتهم يوم بعد يوم والحب بينمو ويكبر جواهم واحده واحده
سميره و هناء اتصاحبوا وبقم بيتقابلوا ويتفقوا ويخططوا
وبعد شهرين من مقابلتهم
احمد: عبير
عبير: همم
احمد: تتجوزيني؟؟؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية قل متى ستحبني)
