رواية قلبي ومفتاحه الفصل العشرون 20 بقلم روز أمين
رواية قلبي ومفتاحه الجزء العشرون
رواية قلبي ومفتاحه البارت العشرون
رواية قلبي ومفتاحه الحلقة العشرون
خرجت من مكتبه عازمتآ علي طيه في ذاكرت نسيانها ،،
ولكن ،،هل حقآ ستستطيع بتلك السهوله نسيان أحلامها الورديه معه؟؟
نزلت الدرج،، وجدت أريج بإنتظارها،، فقد كانت تعلم ما سيحدث وحظرتها منه !!
ولكن ماذا نقول لعاشقه؟؟
إحتضنتها أريج بقوه،، والغريب أنها وجدتها متماسكه إلي حد ما !!
أريج بقلق٠٠إنتي كويسه؟؟
مها بوجه خالي من التعبير ٠٠الحمد لله،،أنا رايحه التواليت أغسل وشي وبعدها هاروح !!
أريج بتساؤل ٠٠٠٠مش هاتحضري معانا،، بقالك كذا يوم مابتحضريش وكده غلط،، فايتك محاضرات كتير !!!
مها بتعب ٠٠٠٠٠مش قادرة يا ريجا ،،مصدعه ومحتاجه أنام،، مش هاأعرف أركز كويس،
وكمان مش معايا كتب ولا حتي كشكول للمحاضرات !!
يعني وجودي هيبقي زي عدمه !!
أطاعتها أريج لصحة حديثها !!
☆☆☆☆☆☆☆☆☆☆☆☆☆☆☆☆☆☆☆☆
وبعد مده قصيره كانت تدلف من بوابة فيلا نور وجدت عبير بالحديقه كانت تغادر لكليتها ،،وقفت بوجهها ،،
أوقفتها عبير بملامح شامته٠٠٠مهاااا رأفت،، الفتاة المثاليه بمنزلنا !!
علي فكرة فرحتلك أوي يا نجمه !!!
مها مضيقتآ عيناها بعدم فهم٠٠٠ وياتري فرحتيلي علي أيه يا عبير ؟؟
تحدثت عبير بشماته وغل٠٠٠٠٠علي كسرة قلبك وحسرتك لتاني مرة !!
وأكملت بسعادة٠٠٠٠٠٠ماتتصوريش فرحت أد أيه وأنا سامعه صراخك وإنهيارك وإنتي في أوضتك من كام يوم !!
صحيح ماكٌنتش عارفه بتصرخي ليه ؟؟
وضحكت وأكملت بحقد٠٠٠٠ بس بصراحه صوت صٌراخك وألمك،، خلاني في مٌنتهي السعادة !!
وتحدثت بغل٠٠٠بس طبعآ ما أرتاحتش غير لما سألت ودورت وجبت أرار الموضوع !!
ودارت حولها بفرحه وقالت ٠٠٠دكتور أدهم سليم رضوان !!!
برااافو،، بصراحه الواد قمر ،،يجنن !!
طول بعرض ،،عيون أيه وشعر ودقن أيه،، وشياكة أيه ،،لاوشكله متريش زي إللي قبله !!
وااااو ،،بصراحه ليكي حق ترمي شباكك وتلعبي عليه !!
وأكملت بحزن مفتعل٠٠٠بس يا خسارة، رماكي بردو زي إللي قبله !!
وتحدثت وهي تمط شفتيها بتساؤل ٠٠٠إلا قوليلي يا ماهي،، هو إنتي تخصص دكاترة بس !!!
يعني ما بتقبليش طلبه أو موظفين،، كده يعني ؟؟
بس نصيحه مني ليكي جددي،، يمكن تصيب معاكي المرة الجايه !
وضحكت وقالت٠٠٠٠ بصراحه شكلك بقا زباله أوي ٠
ونظرت بغل وأكملت ٠٠٠ربنا يذلك كمان وكمان ويشمت فيكي كل الناس،،
فاكرة نفسك أحسن من الكل،، عملالي فيها محترمه وبنت ناس وإنتي مقضياها مع الدكاترة !!!
الأول عماد ودالوقت أدهم ويا عالم ،،ما خفي كان أعظم !!!
كانت تنظر لها بقلب مفطور حزين لم تستطيع الرد،، فهي ليست بحال يسمح لها بمجابهة تلك الشامته !
فاهمها أكبر من تلك الفارغه بكثير !!!
فليسامحك الله علي تلك الإفتراءات التي نسبتيها لي !!!
مرت بجانبها بهدوء للدخول إلي المنزل !!
صرخت بها عبير بغضب٠٠٠ مش هاتردي عليا يا محترمه !!
ولا خلاص ،،حقيقتك بانت وإنكشفت ومش لاقيه كلام تقوليه ؟؟
خرجت نور علي صياح تلك الغاضبه،، وجدت مها تتجه إليها داخل الفيلا بوجه حزين شارد !!
تحدثت نور بغضب ناظره ل عبير٠٠٠٠٠إنتي تاني يا عبير ،، صوتك عالي ليه،، فيه أيه ؟؟
نظرت لها عبير ببرود وخرجت من البوابه بدون كلام !!
دلفت نور خلف تلك الشارده ذات الوجه الحزين لتري ما بها ؟؟
تحدثت نور بتساؤل وفضول٠٠٠٠٠ فيه أيه يا مها،، عبير صوتها كان عالي ليه ؟؟
أوعي تكون ضايقتك بكلامها تاني ؟؟
نظرت لها مها بنظره لائمه ٠٠٠٠مافيش حاجه مدام نور، ماتشغليش بالك !!
وصعدت الدرج ذاهبه إلي غرفتها
تركت نور مٌستغربه ومٌتسائله،،ما بها تلك الفتاه،، لماذا تعاملني بهذا الجفاء ؟؟
وما سر نظرة اللوم التي في عيناها لي ؟؟
تٌري ما الذي حدث ؟
دلفت إلي غرفتها أخذت ثيابآ من خزانتها وذهبت لتأخذ حمامآ ،،عله يريحها ويغسل معه همومها وحزنها الموجع !!
نزعت عنها ثيابها ونزلت تحت الماء !!
وجاء وقت إطلاق العنان لدموعها السجينه،، فلن تستطيع التظاهر بالتماسك أكثر من ذلك !!
لقد حان دورك دموعي،، فهيا إنطلقي
بكت وبكا قلبها بقهر !!
بكت علي حلمها الضائع التي لم تعش منه إلا القليل،،
بكت علي حبيب غالي رأت فيه رجٌلها وسندٌها وخليل أيامٌها ،،
بكت علي بيت الأحلام التي صنعته وغزلته بخيوط ذهبيه وذهب مع الريح !!!
بكت علي مشاعر جميله إفتقدتها وللأبد
وأخيرا !!! جاء الدَور لبٌكائها المٌر علي كرامتها التي أٌهدِرت تحت قدمَيْ ذلك المغرور عديم الشفقه !!!
هنا لم تستطع ،،صرخت صرخة من أعماق قلبها ،،والماء منهمر علي وجهها وكأنه يغسلها ،
دقت بيدها علي الحائط وصرخت ٠٠٠٠ أاااااااهْ
آهٍ علي ضحكه لم تدٌم طويلآ !!
أهٍ علي رجٌلً كَسَرني وخزلني ولم أستطع كٌرههْ !!
أاااهٍ علي كسرة قلبي وذبحْ رَوحِي
فمَن لي خليلآٌ بعدٌكَ حبيبي؟؟
مَن يواسيني لفراقك عزيزٌ عيني؟؟
مَن يٌدَاوينيْ وكنتٌ ليْ أنتَ الدواءِ
لماذا غدرت بي وبأحلامي هاجري ؟؟
لما ذبحتني أدهم لما ؟؟
بما إستفدت بهجراني فقيدي؟؟
أاااهٍ علي حٌلمٌ أخفت ملاَمِحهٌ الرياحٌ !!
أاااهٍ علي خراب حياتي التي لم تبدء بعد !!
لمَن سأشكي همي أدهمي ؟
وبحضن من سأرتمي ؟
ظلت تبكي حتي جفت ينابيع دموعها !! ظلت تبكي حتي صرخ قلبها طالبآ الرحمة !!
صرخت روحها ،كَفيَ فتاتي، ألم تكتفي من النحيبِ بعد علي من لا يستحق ؟؟
لقد تعبنا وهرِمنا كَفيَ !!!
إرتدت ملابسٌها وخرجت، أحست براحة بعد بٌكائها فحقآ الدموع تغسل القلب وتريحه !!
غفت في ثباتٍ عَميق ،،وكأن جسدها ثار عليها فقد تعب حقآ ويريد هدنه !!!
☆☆☆☆☆☆☆☆☆☆☆☆☆☆☆
في الجامعه كانت تجلس أريج وأيه في الكافيتريا !!
أيه بلا مبالاة ٠٠٠ أنا شايفه إن كده أحسن لها،، عماد بيحبها وبيتمني رضاها وأكيد هايسعدها،، بصراحه أدهم مش شبه مها خالص !!
أجابتها أريج ٠٠٠وإنتي فاكرة إن مها هاتوافق ترجع ل عماد تاني وخصوصا بعد أدهم،،
هي كده هاتبقي بتأكد لأدهم كلامه !!!
نظرت لها أيه وتحدثت بتساؤل ٠٠٠أنا بقا كل إللي شاغلني حالياً هو ليه دكتور أدهم والباشمهندس عماد كانو مخبيين إنهم قرايب ؟؟
أريج بتأكيد علي حديثها ٠٠٠مش عارفه أنا كمان مستغربه جدآ من الموضوع ده ،، وبعدين دول قرايب من الدرجه الأولي إبن عمته،، غريبه فعلآ !!
تحدثت أيه لنفسها٠٠٠ أنا وإنتي مش هنفترق حتي بعد الجواز يا مها،، هاتتجوزي إبن خال جوزي يسلاااام ،
المهم يا يويو لازم تستغلي حزن أدهم وفراغ مكان مها،، وتقربي منه وتهتمي بيه،، وده لازم يحصل بسرعة جدآ !!!
تحدثت أريج بتساؤل٠٠٠٠أيه يا بنتي سرحانه في أيه ؟؟
أجابت أيه بمكر٠٠٠ولا حاجه،، كنت بفكر في مها صعبانه عليا أوي،، يا حرام حظها وحش بجد !!
أجابت أريج بحزن٠٠٠ أنا هاتجنن علشانها ،،بفكر أتكلم مع دكتور أدهم ولو وصلت حتي أترجاه يسمعها ويرجع لها !!!
تحدثت أيه بفزع ونفي٠٠٠لاء طبعآ أوعي تعملي كده ،، إنتي كده بترخصيها أكتر !!
وعلى فكره بقا،، أدهم عمره ما حبها،،
شكله كان بيتسلي زي ما أنا قلت في الأول !!
أريج بإستهجان٠٠٠٠٠إنتي هبله يا بنتي،، دي عيونه كانت بتتكلم وهو بيبصلها، وكلنا شوفنا ده بعيونا !
ده كأنه إتبدل وبقا واحد تاني !!
لا طبعآ حبها وجدآ كمان !!
٠٠☆٠٠٠☆٠٠٠٠٠☆٠٠٠٠☆٠٠٠☆٠٠☆٠٠٠☆٠٠٠٠☆
بعد ساعتان أفاقت مها من نومها ،أحست براحه بعض الشيء بجسدها !!
شعرت بحنين وأشتياق لأبيها الغالي الحنون ♡
هي تريد الآن أن ترتمي داخل أحضانه الحانيه،، هو فقط من سيشعرها بأمانها المفقود،،
♡ومن لي غيرك سندي وأمني وأماني بعد الله أبي ♡
أمسكت بهاتفها وضغطت علي الإتصال أتاها صوت أباها ٠٠٠السلآم عليكم ٠٠٠
كانت أشبه بطٍفلة صغيرة ذْو جسد نحيل،، تائهة في ليل شتاء مٌمْطر ،قارس البروده ،،
جسدٌها يرتعش من شدة البرد وعدم شعورها بالأمان،،خائفتآ هي حقآ !!
وهافجأتآ وجدت أباها يأتي مهرولآ إليها ،، فاتحآ لها ذراعيه ليحتويها،
جرت عليه بفرحة وأرتمت بأحضانه لتدفئ جسدها المنهك وتغمض عيناها بأمان وأستسلام،،
فقد وجدت ملاذها الأمن بين أحضانه !!
ردت بلهفة وإشتياق٠٠٠وعليكم السلآم ورحمة الله وبركاته !!
بابا وحشتني أوي يا حبيبي !!
أجاب رأفت بحنان٠٠٠٠إزيك يا مها،، عامله أيه يا حبيبتي !!
تحدثت مها بحب٠٠٠٠٠الحمد لله أنا كويسه جدا،، إنت وحشتني أوي يا بابا،، طمني عليك وعلي صحتك !!
رد رأفت بحنان٠٠٠الحمدلله يا بنتي في خير ونعمه،، مش هاتيجي قريب،، عاوز أشوفك يا مها !!
هٌنا أَحست مها بإختناق في صَدرِها،، كانت تريد أن تصرخ وتقول لأبيها
أحتاجٌك أبي،، أحتاجٌ أحضانك،، إشتقتٌ لرائحتك حبيبي !!!
ولكن تماسكت بعض الشيئ وتحدثت بصوتٍ به خنقه٠٠٠ هاجي بكرة إن شاء الله،، عاوزه أشوفك وأشوف ماما وإخواتي !!
رأفت بقلق٠٠٠إنتي كويسه يا بنتي فيكي حاجه ؟
أجابت مها بلهفه٠٠٠لا يا بابا صدقني أنا كويسه جدآ
وبصوت مخنوق وحزين تحدثت٠٠٠٠ أنا بس حاسه إني بعدت عنكم أوي ،،وحاسه إني وحيده ،،
مٌفتقداكم في حياتي، إشتقت لقعدتنا وضحكنا مع بعض،، إشتقت لدفا البيت، وحنانك إنت وماما ،،وحشتوني أوي يا بابا ♡
تأثر رأفت من كلام قرة عينه وقال ٠٠تعالي يا ماما بكره،، وأنا هقوم من النجمه أدبحلك خروف،،
علشان أمك تشويلك الكباب اللي بتحبيه !!!
إجابته بفرحة وكأنها طِفله ذات الخمسْ سنوات ٠٠٠وحمرلي الكبده علشان أجي أفطر بيها معاك أنا وأنت وبس،، إتفقنا !!!
أنا هقوم بدري علشان أوصل ف أول اليوم !!!
ضحك رأفت علي حماس إبنته وسعد أنه بحديثه أنساها حزنها وقال٠٠٠ طبعآ أنا وإنتي بس !!!
تحدثت مها بسعاده حقيقيه ٠٠٠ربنا يخليك ليا يا بابا وما يحرمنيش منك أبدآ،، مش عاوز حاجه أجبهالك معايا ؟؟
أجابها رأفت بقناعه٠٠٠٠هاعوز أيه يا بنتي الحمد لله كل حاجه موجوده !!!
ردت مها بحماس ٠٠٠خلاص هاجيب لك معايا الجاتوه والهريسه من المحل إللي حضرتك بتحبه،،
وقالت ب فكاهه ٠٠٠ويلاااا إن شالله ماحد حوش !!!
هنا ضحك رأفت وتحدث بدعابه٠٠٠٠اللي يسمعك كده يقول هاتصرفي علينا من فلوس أبوكي !!
قالت بحماس وحب٠٠٠٠طبعأ فلوس أبويا !!
وضحكا كثيرآ من قلبهما !!
تحدث رأفت بحنان ٠٠٠خلي بالك علي نفسك يا مها !!!
أجابته مها بفرحه ٠٠حاضر يا حبيبي،، أنت كمان خلي بالك علي صحتك،، مع السلامه يا بابا !!!
رد عليها رأفت بحنان٠٠٠٠في حفظ الله يا بنتي !!
أغلقت معه الخط وأخذت الهاتف بأحضانها وشعرت بسعاده لحديثها مع عزيز عيناها أبيها !!
وكأن حديثها معه وضحكاتهم،، غسل قلبها من همومه وأحزانه !!
نعم ،،ومَن غير الأب ليمسح دمعة الحزن عن فلذة كبده يا سادة !!
فيا (الله ) لا تحرم أحد من حنان أبيه وحضنه !!
🌼 فالأب هو السند الحقيقي للفتاه 🌼
نزلت بحماس إلي الأسفل لتصنع لنفسها مشروبآ دافئآ لتبدء بمذاكرت دروسها !!!
فقد خسرت الكثير من الوقت فلا داعي لإضاعة !!!
◇◇◇◇◇◇◇◇◇◇◇◇
آتي المساء عند أدهم !
كان يجلس مع عاصم إبن خاله الذي آتي لزيارته والإطمئنان عليه بعد زيارة عماد له !!!
عاصم٠٠٠عماد حكالي إنه جالك هنا،، وحكالي كمان علي إللي حصل بينكم بخصوص موضوع مها !!!
رد عليه أدهم بإستهجان٠٠٠وياتري قالك إنه هددني في قلب بيتي ،،وطلع عقدة القديمه عليا ؟؟
تحدث عاصم بتهدأه٠٠٠٠معلش يا أدهم ،، إبن خالك وواجب عليك تتحمله !!
يا سيدي إتحمله علشان خاطر خالك علي الله يرحمه !!
تحدث أدهم بأسي ٠٠٠المشكله يا عاصم إنه لسه مقتنع إني سبت ريهام غرور وعند مني علشان أكسرها وأكسره !!
غبي،، مش قادر يفهم إن أنا وريهام ما كانش لازم ندخل في علاقه من الأول أساسآ !!
أنا وريهام زي الشروق والغروب يا عاصم، عمرنا ما كنا هانتقابل !!
أنا بتقاليدي وعاداتي،، بحياتي ونظامي وشروطي إللي حاطتها في مراتي المستقبليه !!
لبسها،، أخلاقها،، طريقة حياتها !!
وقال مفسرآ بإحترام٠٠٠طبعآ مش بقلل من أخلاق ريهام أو غيرها خالص !!
ريهام دي تربيتها وده وسطها إللي إتولدت لاقت نفسها فيه !!
تحرر لبسها وشعر وميك أب،، تحرر في السهر والسفر لوحدها،،
يعني مثلآ إنها تصاحب شباب ده في وسطكم عادي،،
لكن أنا لاء يا عاصم،، عمري ما كنت هاقبل بده علي رجولتي أبدآ !!
وأكمل ٠٠٠٠أنا قلت لنفسي حبها ليا هايغيرها،، لكن كنت غلطان !!
كانت بتحبني آه،، بس كانت بتعند معايا علي أتفه الأسباب،، وكل دقيقه تخلق مشكله معايا بعندها !!!
ومامتها وأخوها بدل ما يعقلوها بالعكس،، كانو بيعقدو الأمور أكثر !!
كانو بيشجعوها ماتسمعش كلامي !!
دايمآ كانو يقولولها،،ماتسمعيش كلامه،، مالوش حكم عليكي،، إنتي مش جارية عنده علشان يعاملك كده،، خليه هو يتطبع بطبعنا !!!
كل ده كنت بسمعه بودني !!
كام مرة طنط عزه تقولي في وشي، يا إبني سيبك من التفكير القديم والجهل ده،، الدنيا إتغيرت وإنت مٌتعلِم !!
ونظر لعاصم بتساؤل ٠٠٠هو أنا علشان مٌتعلِم أنسي ديني وأوامر ربنا ليا ؟؟
تكلم عاصم بحزن٠٠٠للأسف كل كلامك حقيقي يا أدهم !!
تحدث أدهم بتعقل ٠٠٠جوازنا كان محكوم عليه بالفشل يا عاصم،، وأنا عمري ما كٌنت هادخل علاقه وأنا عارف إن نهايتها الطلاق !!
أنا مش غبي،، أنا شفت مستقبلي معاها،،
وصدقني،، لو كملت كنت هاخسر نفسي وأخسركم !!
وتحدث بتساؤل٠٠٠يبقي أنا كده غلطت في أيه يا عاصم ؟؟
ليه عماد مٌصِر يحملني ذنب مش ذنبي ؟؟
أنا دوست علي قلبي وقتها وكملت لقدام،، وما بصيتش ورايا،، مع إني كنت بحبها !!
وكل ده والله علشانها أكتر ما هو علشاني،،
أنا كان مٌمكن أكمل وأتجوزها وأسعد قلبي بقربها مني وبحبي ليها،،
وأعيش لي يومين حلوين،،
لكن النتيجه الحتميه كانت هتبقا الطلاق !!
وهي الوحيده اللي كانت هتطلع خسرانه وخصوصآ لو فيه أطفال !!
عاصم بتفهم٠٠٠٠والله يا إبني أنا فاهم كل ده،، بس أنا عاوزك تنسي الموضوع وترجع تزورنا تاني في البيت زي الأول ،،
علشان تثبت للكل إنك فعلا إتخطيت الموضوع !!!
تحدث أدهم بتفسير٠٠٠إنت فاكر إني ماباجيش التجمع علشان زعلان ؟؟ غلطان يا عاصم !!
بالنسبه لأني ما بجيش ده كمان علشان مصلحة ريهام والله !!
وتحدث مفسرآ٠٠٠أنا عارف حالة ريهام كويس من بعد فراقنا !!
أنا تخطيت الموضوع ونسيته،، وكأنه ما كانش ليه وجود في حياتي أساسآ !!
لكن ريهام للأسف ماقدرتش تنسي ،،
ماأقدرش أظهر قدامها تاني وأخربلها حياتها مع جوزها،، وخصوصآ إنه كان يعرف قصتنا !!
أنا مش وحش يا عاصم زي عماد ما بيحاول يظهرني للكل !!
ربنا وحده يعلم إن نيتي خير !!!
عاصم بتفهم٠٠٠٠إنت بتبررلي أيه يا أدهم،، أنا عارفك وعارف أخلاقك كويس جدآ !!
وعلي فكرة طنط عزة نفسها وبابا وكلنا قولنا لنفسنا كده،،
وإحترمنا رغبتك وقرارك جدآ،، لأنه فعلا في مصلحتكم أنتو الإتنين !!
وعماد كمان لازم نلتمس له العذر،، هو بيحب ريهام جدآ ،،وتأثر بتعبها والحالة إللي وصلت ليها بعد ما أنت سبتها،،
فاحملك أنت المسؤليه،، بس عماد مش وحش يا أدهم،، أرجوك أعذرة !!
ريهام مش بس أخته،، ريهام تعتبر بنته،،
أنت عارف خالك إتوفي بدري وعماد آخد مكانه عند ريهام ومروة ،،بقا هو أبوهم وأخوهم في نفس الوقت !!
أدهم بتنهيده٠٠٠والله يا عاصم أنا عمري ما كرهته ،،بس هو كده حتي من قبل موضوعي مع ريهام !!!
عمرة ما ساب مناسبه إلا وحاول فيها يقلل مني قدام العيله كلها،، أيه السبب أنا معرفش ؟؟
عاصم مغيرآ الحديث٠٠٠٠سيبك أنت من كل الكلام ده وقولي،، أيه حكايتك مع مها،، إنت بتحبها بجد؟؟
أدهم بحزن ٠٠٠ودي كمان سبتها وبفضله بردو،،
قوله ينبسط،، أنا ومها خلاص ما بقاش ينفع نكون مع بعض وبسببه !!!
عاصم متسائلآ ٠٠٠هو أنت فعلا حبيتها يا أدهم ،،وهل فعلا كنت تعرف حكايتها مع عماد !!
أدهم بنفاذ صبر٠٠٠تفتكر لو كنت أعرف كنت سمحت لقلبي يحبها ؟؟
ولا إني أشغل بيها بالي ولو دقيقه واحده،، صدقني يا عاصم ما كٌنتش أعرف !!
عاصم بتأثر ٠٠٠طب سبتها ليه وأنا شايف حبها ف عنيك يا إبن عمتي !!
أدهم بإنكسار وحزن٠٠٠علشان مش أنا إللي أقبل أتجوز واحده كانت بتحب راجل قبلي !!
وده مش أي راجل يا عاصم ،،ده عماد،، وأنا وأنت عارفين كويس إن أي بنت بيرتبط إسمها بإسم عماد سمعتها بتبقي عامله إزاي ؟؟
تحدث عاصم بدفاع٠٠٠ إلا مها يا أدهم ،،صدقني عماد ما طالش منها حتي ماسكة أيد !!
ويمكن ده إللي خلاه حبها وإتعلق بيها،، لأنه أكتشف إنها نضيفه ومختلفه غير كل البنات إللي عرفهم قبل كده !!!
وأكمل٠٠٠ ده كفايه إنها كانت السبب في تغيير عماد وإنه ساب علشانها كل البلاوي إللي كان بيعملها،، وتاب علي أديها !!!
كان يستمع له ويستشاط غضبآ من ذكر إسميهما في جمله واحده !!
ولكن لم يظهر،، فهو ماهر في تخبأة ما بداخله أمام البشر !!!
أدهم بتأكيد٠٠٠٠عارف يا عاصم والله ،،
ومٌتأكد إنها محترمه وأي حد يتمناها،،
بس خلاص الفراق أحسن ليا وليها !!
تحدث عاصم بحزن ٠٠٠بس إنت كده بتظلمها يا أدهم !!
أدهم بتأكيد ٠٠٠عارف ،،وبظلم نفسي قبلها ،،بس للأسف،، مش قادر أقبلها علي رجولتي !!!
نظر له عاصم بإستغراب وتحدث٠٠٠٠٠مستغرب أوي إني باسمع الكلام الراجعي ده ،،من دكتور مٌتعلم ومٌثقف زيك،،
تفكيرك قديم وعقيم أوي يا أدهم !!!
أدهم مدافعآ عن أفكاره٠٠٠٠٠ أنا صعيدي يا عاصم !!
يعني مهما إتعلمت جوايا أخلاق ورجولة صعيدي،، عمرة ما يقبل الغلط ولا يوافق بيه ابدآ !!!
عاصم بتساؤل٠٠٠٠٠وفين الغلط يا أدهم؟؟
إنها حبت قبلك ؟؟ طب ما أنت حبيتها،، وقبلها حبيت ريهام !!!
لو بمنطقك وتفكيرك،، المفروض جوز ريهام ما كانش إتجوزها بقا !!
وخصوصآ إنه كان يعرف حكايتكم قبل الجواز !!!
تحدث أدهم ٠٠٠كل واحد ليه تفكيرة وقناعاته يا عاصم،، هو تفكيرة وتربيته كده،، وأنا ماأقدرش ألومه !!
تحدث عاصم بنصح٠٠٠٠قلوبنا مش بأدينا يا أدهم،، أفتح عقلك وسيب قلبك يختار ،،
لو فعلا حبيتها بجد أدي لنفسك وليها فرصه تحبوا وتعيشوا !!
الحب حاجه مش بنلاقيها كل يوم يا صاحبي،، دي حاجه بتجيلك صدفه مرة واحده في عمرك كله،،
يا تمسك فيها وتعيشها ،،يا تفضل عمرك كله تلعن نفسك وتندم عليها،،
صدقني ده كلام واحد عاش التجربه !!
وتحدث عاصم بحزن وتأثر٠٠٠٠٠أنا لما أتخليت عن حبيبتي، إكتشفت بعدها إني مش بس أتخليت عنها، أنا اتخليت عن حياتي كلها معاها !
فقدت شغفي للحياة،، فقدت روحي وكياني كله !!
ونظر له ولمعة دمعه بعيونة أبيه للسقوط ٠٠٠لو فعلا حبيتها يا أدهم أوعي تتخلي عنها،، علشان ما تعيش مأساتي !!
مها بنت نضيفه وقويه،، مش كل يوم هتلاقي زيها ،،أوعي تخسرها يا أدهم،، أوعي !!!
تحدث أدهم مغيرآ الحديث٠٠٠بقولك أيه،، ما تيجي نخرج نسهر في أي مكان ،،أنا مخنوق من قعدة البيت وعايز أغير جو !!!
وافق عاصم متفهمآ وضعه،، فاأدهم من الأشخاص الذين لا يحبزون تدخل الأخرين كثيرآ في حياتهم الشخصيه،،
حتي ولو كانوا أقرب الناس الي قلوبهم !!
فهكذا هي شخصيته وعليه إحترامها !!!
فخرجا وأكملا سهرتهم خارجآ،، ظنآ منه أنه هكذا يمكن أن ينسي مها !!
ولكن هيهات يا فتي،، فاجحيمك بإنتظارك !!
فقط هي مسألة وقت لا أكثر !!!
فانتظر جحيمك بصدر رحب أيها الأحمق !!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية قلبي ومفتاحه)
