رواية قلاع الضر الفصل الحادي والثلاثون 31 بقلم زينب ماجد

رواية قلاع الضر الجزء الحادي والثلاثون

رواية قلاع الضر البارت الحادي والثلاثون

رواية قلاع الضر الحلقة الحادية والثلاثون

<< اسرار قدس >>
طحت مغشية .. ما دريت شنهي الصار والجرى من طكت المصكوع الامريكي على راسي .. فزيت افج بعيني كوة مدري طكتيش اجت برجلي .. طلع نفسه المصكوع الصكعني براسي .. عيضرب بيه ببسطاله على رجلي خاطر افز
حسيت على روحي امددة مثل الشهيدة بالكاع لا عباة لا ربطة جدام هالامريكي .. طفرت بسع وانا اصيح : بنااااتي يمه بنااااتي وينم
خذيت بناتي وجريت الربطة اغطي براسي والامريكي يجوعر ومدري عليش يصارخ .. اخيرها كرب المترجم يكلي : دا يسالج عن زوجج وينه
– ما هو طلع والله ما ادري بيه وين
كمت الم ابناتي واصرخ .. جرجرونا ووكفونا قصاص ع الحايط ويصيحون والمترجم يحجي ( رفعوا اديكم ليفوك ) رفعت ادي انا وبناتي وادموعي تجري وانا اصيح : عساها بحظكم وابختكم ولكم ما عدكم غيرة ما عدكم ناموس موكفين مرة هيييييج دخيلك ربي منين اجونا ذول
كلبوا البيت فوك جوا .. لكوا بالبيت مسدس وسجاجين
وشغلات ما عرفها .. كاموا يحققون وياي وانا ما عرف شي رادوا ياخذوني بالسيارة كمت اصرخ وادك على راسي وبناتي يصارخن … التموا المنطقة صارت هوسة وكوان وصياح
لحد ما صار رمي بذاك الصوب
هدونا الامريكان وفلتوا ..
انا لميت هدومي وركضت لهلي
من دروا الامريكان رايدين ياخذوني اخوي خاف لا يردون علي انا والبنات واعمي على اخوتي كالي : اتبوشي بسرعة واطلعي وياي وغطي بناتج
كامت امي تصيح وادك على راسها وبتي راح تموت انولينا يمه وانا ابجي واكله : ابخت الله اخاف لا ياخذوني خليني هين لبين ما يهدا
– يولي لو اجو لهين واني وابوي ناس كبار واحنا عدنا نسوان وجهال ننولي كلنا من تحت راس رجلج الفاين الما مخلي احد بحالو .. شذنبنا .. كومي اتغشي بسع خلي اخذج للجول
والله وكتها صدك فكرت
اذا اجو الامريكان وعملوا بامي مثل ما عملوا بيه حرام تموت وابوي ينجلط هم ناس كبار ما يتحملوا هلي استر على اهلي واخوتي واطر للچول اخيرلي اني وبناتي
والله لبست غشاوة وبناتي لبسن ربطات
وطلعنا نتخوتل لينا وصلنا للشارع وكف النا تكسي وطلع بينا للجول من وصل جريب من الجول كال : انزلي انا راح ارجع للبيت كبل لا يصير الليل والرجعة على هالدرب صعبة كلو ذبح
كتله : سالم خوية ترد مودع بالله ان شاءالله
خذيت بناتي اسوحل بيهن للبيت الكاعدة بيه وسام
شو وصلت غاد ووسام تكلي : شجابج هين يولي
اجر ابناتي واكلها : اسكتي الجرى علينا اليوم لا ينكال ولا ينحجي المر ضكته اليوم .. مروان مدري شعامل للامريكان وذول ما تحسين الا جنم زنابير فوك رروسنا بسلحتم
عد احجي واشوف مروان نايم بالهول
فتت وصحت : يا مروان انت من صدكك لو تتكشمر ؟
شال راسه : شني يا الجابج ؟
– وهذا الهامك ياهو الجابني ما همك من عملت عملتك وشردت وخليتنا انا وبناتك بالبيت ما فكرت يجتلون يتعرضونا يتعدون علينا ياخذون ما فكرت ؟
– ياهو التدنى نفسه عليج وياخذج انت دروحي هم حاسبة روحها مرة
– عجل هسه انا ما مرة وبناتك يول صكعوا روسنا بطف ابشواجير ورادوا يشلونا لو ما الجيران الله يطيهم وكفولنا وتكاونم جان هسه الله يعلم بحالنا وانت احر ما بكلوبنا ابرد ما بدمك
حجت امه : عجل يموت هاطر انت وبناتج اتضلين غير يفر بروحه وذوله الجلاب ملاحكينو
– ويا زلمة اليفر ويهد عرضه هدد الامريكان يصكعون فوكم ؟
-وهاي ما حصلج سي لا ادوخين روسنا
حجه مروان : هسه شجابج انت ؟
– اخوي جابني رحت لاهلي اتحامى بيهم اخوتي جرو بوش لبابهم راح الامريكان يجونم ويجتلونم .. شيلنا بسع وخذانا ليجاي حتى ما كرب خاطر يرد كبل الغروب
– هسه لو احد مراكبج ما نروح بيها كلنا
– والله دحج روحك شعامل خاطر خايف يجونك
– انا ما اخاف من احد بس انا خايف الكل يتضرر من وراي
– يعيارتك لو زلمة صدك وتخاف احد يتضرر وراك ما شردت وجيت ليجاي تنمطل وعايفني اني وبناتي غاد تحت رحمة الامريكان
وسام : هسه شني ابتلى على عمره خوما ابتلى على عمره ؟ ديكلح خاف لا يلاحكونا وجا ليجاي .. سدي الموضوع كافي انا اخبر ريسان يسوف شنهو حل هالامر .
شفت الحجي وياهم ضايع وانا روحي واصلة لزردومي من الخوف الشفته على ادين الامريكان الله سترها عليه وعلى بناتي لا جان هسه احنا الله يعلم بيا سجن متعدين عليه شمسويلنا وهالاسمه زلمة منمطل هين ولا جن عرضه استحل
ضلينا هين .. عكب يومين جا ابو وهب
كالتلو وسام .. هيج وهيج صار ويا مروان
كاللها : حيل بيه عجل من انضم للقاعدة شجان اباله هيتة
حجه مروان : بس التنظيم مالو خص انا التعرضت للامريكان وهددتم وانا على وعدي لا ما اكضبم واذبحم ما اطلع زلمة ..
ضل يتكاون وياه ابو وهب
ابو وهب منظم لجيش المجاهدين اللي نظمه احد المقربين من النظام السابق وجمع بقايا حزب البعث وضباط الجيش في النظام السابق واللي خرجوا عن الخدمة ما بعد السقوط .
جانت اكو مشاكل ما بين هذا الجيش وتنظيم القاعدة .. وحرب داخلية اللي بالقاعدة يكره اللي بالجيش واللي بالجيش يكره اللي بالقاعدة بس الاثنين وجهين لعملة وحدة ومصنفين ارهاب واسمائهم مطلوبة .
وهم مثل هيج تنظيم ما يستغلون غير العقول المغلفة مثل مروان وغيره اللي هم اصلهم عرب لا دراسة لا فهم لا علم يكله الجتل حلال وهذا يستحق الجتل وعلى كل واحد يجتله تلث ورقات .. يا حلاة الجتل عده يروح يذب روحه ذب وشيكلوله وشيفهموه من معتقدات يصدكها كبل ويمشي مغمض .
مروان ما جاز من تنظيم القاعدة ..
وابو وهب مغتاض منه عبن راده ينظم وياه للجيش ومروان مجلب بالقاعدة .. ووسام صايرة بالنص .
الليل ياخذ مروان ما يرد غير الفجر
شيعمل شيسوي محد يدري وهم يجيب كومة فلوس ويجي
انا كمت ما ادخل روحي
الكلت حرام الكل صاحت بيه والاعترضت محد يسمعلي والحجيت محد يهتملي ولو لحيت اعمي على روحي وانجتل .. يطيني فلوس اضمهن واسكت ..
وسام كامت تخاف على ابنها حيل
وابو وهب ما راضي على شغل مروان .. حاولت تجره من هالدرب ما رد .. رادت منم يروحون للموصل ويكعدون عند خالهم ثاىر محد منم رضى يروح للموصل ويشتغل غاد ..
ايام وليالي ونحن خيفانين على يا ساعة .. وسام ما عد تامن ابو وهب على ولدها خايفة عليهم منه حيل تشوفهم يدور حولهم ويتصيدلم
كتلها : عجل عليش ساكتة
– انا ساكتة لو جل الساني وانا احجي ويا مروان وعمار ويوسف وهم ما يرضون نمش من هين
– اي نمش حنة .. عد ما يشوفون نسوانم راحت ومحد ضل بالبيت عيشتم اصير صعبة ويضطرون يجون ورانا
– هو حجي لسان بكيفنا اخذج واخذ قدس واروح بهالاوضاع تعرفين شجاي يصير لو يسولفولج الخطف والجتل بفلس ونص على درب الموصل .. تنوب اخذ تل نسوان وامش شني مجنونة ما براسي عكل يتعدون علينا ويجتلونا ..
– عجل وشلون ؟
– غير هم الولد غير نطلع بوضح النهار وهم ويانا وبعدين خوما نروح هيج غراض جثيرة النا هين وحسبي حساب ابو وهب ما يرضى بروحتنا يعني نروح بلايا علمه .. شلون اروح واخلي ولدي هين جدام عينه ؟
– والله يا خالة معدافتهمج انت تخافين على ولدج من ريسان كل خوفج هاذ وانت بعدج وياه ومخلية البيت مرتع له ولاصحابه ينضمون خططم ومامراتهم كلها بالليل هين تابعوهم الامريكان واجونا وخذونا وياهم شنعمل ساعتها
تكوم تتحجج واطلع اعذار واهية وعذر ما يشبه عذر وما تجمع بالحجي ما اعرف من شنهو خايفة وريسان عليش هج مخوفها وتحسبلا حساب .
يوم من الايام ..
جا ابو وهب وطلب مروان ..
هم ما يتحاجون .. جت وسام كالتلو : امشي كرم ريسان طالبك
كاللها : ماني بعازة شوفته
– انت عليش تعمي علينا يول امش شوفه شيريد واحج وياه عليش خايف
– انا اخاف منه هاذ شني البوخة هاذ ويخوفني اني مروان اكبر واحد ما يخوفني
– دام ما تخاف كوم شوف شيريد منك
كام من مكانه وراح لريسان ، كالو : اكرب هين احاجيك
فاتت وسام وراه ، كاللها : خليج شوية روحي سويلنا جاي يادو بجلمتين على انفراد
طلعت وسام بس ما تطمن كلبها رايدة تعرف ريسان شرايد من ابنها تعرف ابنها كديش مو ذاك النبه خاطر تامن تهده يم ريسان … وكفت تتصنط ورا الباب
كالو : عندي يمك شغلة رايدك تكضيها
– شنهو
– واحد عدي رايدك تخلص عليه
– ومنهو هاذ الواحد ؟
اطاه الصورة .. حجه مروان : هاذ ماهو ابن اختك الجم مرة اجا وياك
– امبلى انا راح انطيك دربه ومنين راح يمر تعرضله بمجان واسع وخلص عليه
– وشكثر تدفع ؟
– تاخذ مني
– انا ما اشتغل وحدي وياي ازلام تريد .. نتربصله ونكع بيه ونجتلو
– اطيك مية
– مية شني مية الف !؟
– اي عجل شكثر تريد ؟
– لا حنه نشتغل الركبة بثلث ورقات
– رايدها بعملة الامريكان الكفار
– هسه كفار مسلمين انا ياهو مالتي اطيني فاوسي حكهن وتامرنا
– زين عجل .. اطيك ورقة ونص غيرهن ما اطي لو تطلع نخلة براسك وغصبا ما عنك تنفذ والا ……
– خوش خوش خوش .. نطيني والله كريم
– شكثر الدولار اليوم
– مدري ١١٩ الف دينار يمكن
اطاه الفلوس وكالو : اخابرك واكلك ساعة طلعتو
– عجل انطر منك اتصال
راح ريسان .. وثاني يوم خابر عليه وكت الظهر ..
كالو : راح يطلع
وانطاه الطريق اليطلع منو
خابر مروان وطلع من البيت للعصر راد ما كن شي حصل
سالته وسام كالتله : شراد منك ريسان وشعملت
كاللها : شغلة صغيرة رادها مني وكضيتها اله
– وشني هاي الشغلة
– هيج سالفة ، اذا اكو غدا سوولي ترا لهساه ما متغدي وبطني تصوصي من الجوع
اندارت لنهلة كالتلها : كومي حضريله الاكل مالو
كامت نهلة تحضرلا غداه .. وهو اخذ بنتو عبير يلاعبها ويلاشيها … حطتلو الاكل وهو يسمع حس غناء وصوت يغني ( لو رايد تنساني انساني حبلك واحد ثاني ) صاح منين صوت الغناء هذا
حجت وسام : من هالدبة كاضبة بهالراديو وتسمع ليل نهار صكعت روسنا
صاح : قدددددس قدس ومررررض
اجتو تركض : ها ها شني
– شني صوت الغناء هاذ
– انا عد اسمع بيه
– اطفي لا اجي اطفي عينج … اطفي يلااااااا
راحت تركض للغرفة تطفي المسجل .. وهو كعد ياكل ووسام تدحج بيه كالتلو : اليدخل بين البصلة وكشرتها ما يجني غير الدموع يمروان
– وانا يا بصلة هاي الفايت بينها وبين كشرتها
– انا احذرك لا تمش ورا ريسان
– يمه والله ما افتهمتج من صوب تكليلي لا تمشي ضده ومن صوب تكليلي لا تمش وياه عجل شسوي هسا كليلي ؟
– ابعد منم ملم واستر علينا ابني
– وانا شعد اعمل ؟ يمه ترا انا كاعد
– وطلعت اليوم شنهو وراها ؟
– ما وراها شي يما بس خليني اكل بهني لا تسمميني
سكتت عنو وبكلبها النار
عكب اسبوع مر ريسان كالو : اسبوع صار واحمد اما هو
كالو مروان :ما ندري نحنا نفذنا بيا وهدينا ومشينا ما ندري بعد
– لا الجثة ولا السيارة ولا احد درى عنو شي هسا هدك منو السيارة ذاك الحساب وينها
– انا كتلك ما خذنا شي جتلنا وهديناه
– ما دفنتو واخذتم السيارة
– لا نخاذ السيارة وين نوديها لا خذناها ولا جسناها كتلنا نفذ نفذنا واخذنا افليساتنا وابوك الله يرحمو
ريسان ما تطمن لمروان منين ما يجيبو يناروا
سكت عنو ما يكدر يحجي شي بس ضلت بكلبا …
مشت الايام وراحت الايام وريسان مغضب رايد يعرف السيارة وين .. السيارة بسمو يخاف لا مروان نطاها للتنظيم والتنظيم يفخخوها ويشمروها ع الامريكان لو بفد مكان ويكع بيها ..
فترة وراد يضك الخناك على وسام .. كاللها : رايد واحد من ولدج بعملية انتحا رية
– كالتلو اسم الله الستار عملية انتحارية شنهو اطي واحد من ابني يتفجر شجالك
– عجل ترضين الامريكان يضلون بكاعنا هذا ماهو منطك .. حنه كاعد نضحي بارواحنا لجل هالارض ولجل ما تضل كيعانه بيد الامريكان وبيد الايرانين ورعاتهم اللفو علينا .. روحي وروح ولدج وكلنا فدا لجل ترد كاعدنا ونمحي الامريكان ونرد الروافض من ما جو .
كالتلو : ما اكدر انا مالي غير ولدي اذا رايد اطيك روحي واني الاضحي بنفسي بس ما ولدي نا اطي ولدي
تعرف ما يعرضها لو يفخـ خها
واد حجه وياها ما رضت تطي واحد من ولدها يخدره ويفخـ ـخو
ضل يحرم حواليهم ..
كامت وسام حيل تحذر منه وخايفة ..
الا ما فرد يوم .. اجت قدس خايفة .. طبت للبيت وجهها مخطوف .. كالتلها : شبيج يولي ؟
كالتلها : ما عد اعرف اشنو اكول اخاف
– منين تخافين يولي ؟
– من امي مدري من ريسان مدري منين ما ادري
– وهو شنهو الصاير ؟
– تعرفين هذا ابن اخت ريسان كرايبو اللي اجا وياه جم مرة
– منين تعرفين ابن اخته
– هو من حجيت وياه كال خالي يعني اذا واحد نده لاحد خالي يعني يصير ابن اختو مو صح
– ويمتى حجيتي وياه خاطر كالج خالي ؟
– تذكرين ليلة المطرت كبل ما يطبون الامريكان
-اي
– عاوني بجيتبة الهايشة وحجه وياي
– صح اي اذكر حجيتي وياه كتيلي احجي كملي اشفتي هسه ؟
– من جم فترة احس احد يراغبني من افوت لامراح الفجر
– اي ؟
-العرفتو ابن اختو لريسان .. كل يوم الفجر يدحج بالبيت ويراغبنا
– وشيريد من عدنا ؟
– ما ادري
كامت نهلة وصلت هالحجي لوسام ندهت وسام لقدس تستفسر منها وقدس تحلف لوسام تكللها : اني شفتو اكثر من مرة هو يراغابنا وانا خفت منو واجيت اكول ما اعرف بعد شي .
خافت وسام حيل ..
حجت ويا مروان كالتلو : بعد ما نضل هين خلينا نمشي نرد للموصل يول ريسان رايد جتلتنا
– يمه شنهو هاذ الفارغ ويجتلنا دعوفي خله يولي
– يول لا استهين بيه انا اعرف ريسان خبيث ورس خبيث امشي يولي من عين وخلنا نخلص
– يمه انا شغلي وامري كلو هين ابغداد ما اكدر اعدها وامشي تريدين انت اخذي قدس وروحي غاد للموصل وخلي البيت النا انا ومرتي وبناتي
– يالكديش انت حليتها انت معبرة ولد وعايفة ولد ما سويت شي تضل هين ليما يجتلك ريسان
– ريسان يجتلني ؟ دخلا يكوم هالفارغ هاذ وينه وين جروخه تراه جماعة الجهاديين ولى زمنهم راح حسبالهم مسيطرين مثل كبل ويشمرون ع الناس والناس تخاف منم تره بوخة بعد محد يشتريهم بطركة
– الحجارة الما تعجب تفشخ يمروان تهدي بسم الله وخيلنا محافظ على اروحنا ونولي غاد للموصل
– الموصل ما بيها شغل مثل بغداد يما شناكل وحل
حجت وياه رادت ما رضى يتزحزح من مجانو هين
عكب ايام جا ريسان كالتلو : شني صاير حاط عيون علينا هليام شني
– ما فهمت عليش ترامين ؟
– تعرف على شنو عداحجي
– وسام ترانا وراي شغل وما فارغ اكعد افكر عليش ترامين اطلعيلي بالنظيف شني السالفة
– ولا سالفة بس حاط ابن اختك يراقبنا بالبيت عليش انا ما اضم عنك شي ولو رايد شي روحي ما تعز عليك
– ابن اختي يراقبكم ؟ ياهو خطاب ؟
– اي
– ووين شفتي يراقب ؟
– ما شفته اني .. قدس هي الشافتو تكول كل يوم الصبح عد ما تطلع للمراح تشوفه يدحج من بعيد ويطمش
– قدس
– اي قدسنا شني ما تعرفها
– ما شايفها شكبرها
– ما عرف بس تطلع عشرين سنة ازغر اكبر ما احفظ مواليد
– همممم .. كتيلي يراقبكم ؟
– اي يعني ما انت الكايلو
– لا مو انا وراه سالفة هالولد
– بعد انت اعرف منه شرايد وكلي .. هذه البنت كديشة وتخاف
– انا ابلغوا لا تخافين
راح عكب ايام كاللها : قدس كتيلي بتج مو
– اي بتي عليش
– رايدها
– رايدها
– رايد منهو ؟
– قدس هاي التحجين عنها
– بس تطلع بكبر بناتك
– وشنهي تعزينها علي
– لا ما اعزها بس هي مو نالت عرس يعني
– وساااااام انت تعرفيني حجايتي وحدة ما تصير اثنين ولو صارت محد يسلم من شري كليلها للبنية تحضر نفسها باجر الصحى انا وشيخ نجي نملج واخذها
– ونسوانك ؟
– وشبلاهن نسواني ؟ الشرع محلل اربع وقدس رابعتهن لا عيب ولا حرام
سكتت ما عرفت شتحجي بعد
عافها ومشى دخلت مصوفرة صاحت : نهلة يولي ينهلة وين وليتي
– ها خالة شني
– اكربي احاجيج
– شنهو
-قدس جايينها خطابه
– وهو ياهو الشايفها هالمكرودة خاطر يتخطبها ؟
– ريسان
– شنيييي على بختج لا تظلمينها فوك ظليمتها هاي كافي معيشتها عيشة الحيوانات اكل شرب نام ****ب وفوك منها تطيها لريسان
– وانا بيدي خاطر اطي لو ما اطي لو رديته معناتها انا وولدي نتجتل
– شرديها
– وين اشردها وعلاش اشردها خليها تروح بحالها جم دوب اضل اعلف بيها انا
– البنية يتيمة خالة لا تظلميها ظليمتها ريسان شايب وعندو ثلث نسوان وجوكة بزر وهاي كديشة لا علم لا فهم بالضيم تطيها شلون تتعايش وياهم وشلون تعيش
– تعيش لا تخافين عليها تتعلم وتعيش
صاحتلها : قدس قدددددس
– ها يمه
– اكربي ليجاي احاجيج
اجتها قدس : هلا
– حضري روحج باجر تروحين عروس لبيت رجلج
– رجلي ؟ منهو رجلي هاذ الطلع فجه
-ريسان طالبج
– ريساااان … فد
– لا فد ولا بد امشي جهزي روحج نظفي نفسج خاطر باجر تمشين وياه
– بس اني ما عرفو
– تعرفينو بعدين امشي جهزي روحج
مشت وهي تصفن كامت لها نهلة : يله يولي مو احسن من العيشة هين بهالجول مثل الموتة
– فد اخاف شلون راح اروح ليقاد يمهم
-تتعودين كل بنية من تروح لبيت رجلها تخاف وبعدين شوية شوية تتعود وتاخذ ع المكان وعلى رجلها
– فد هو يخوف
– يولي مرته لح تصيرين يخوف عليش بعده
– ما ادري
– يولي ابالج ما تعرسين عرسي اخير من كعدتج هين يصير عدج جاهل يصير عدج شي ولا هاي الكعدة
جهزتها .. ونظفت وجهه وجسمها وحطتلها هدومها ببقجة ونطرت ثاني يوم الضحى اخوتها جانم موجودين وريسان جا وجايب وياه شيخ ملج الهم .. وخذا قدس من الجول وطلع .
نهلة خافت عليها وكامت تدعيلها عسى الله يسهل امرها ..
عكب ايام .. جا ريسان ومتخبل يصيح ويهدد ويكلم : اذا ما اطلعوها يول والله لا اذبحكم كلكم اليوم اطلعون قدس
تخبلت وسام كالتلو : يا قدس وشيجيب قدس لهين
– جذبتي علي وكلتي يراقبنا وانت مودي خطاب طلعت بتج وهالجلب مدسترينها بينم لحد ما فلت وياها
وسام : قدس ما عدها هالسالفة ولا تفهم والبنية لو عدها شي ما تجي تكللنا يراقبنا وتحذرنا منه العلة بابن اختك وين ودى البنية ؟ وهسه هي وينها ؟
– انتم اللي شردتوها والله بالله لا ما طلعتوها من بطن الكاع لا اكضيكم كضيان
تصدالو مروان كالو : البنية عاشت هين طول عمرها ما تعدت الباب وهاذ انت كل عمرك تجينا ما شايف وجها صاينين عرضنا ما مالت عن الدرب يوم .. روح اسعل حالك بس جت عدك جكم يوم طلعت عن الدري العلة ما بينا بيك واختنا شيصير وياها انت السبب ونريدعا منك مثل ما خذتها من هالبيت تردها
تكاون مروان وريسان هذا يكلو جاي تلعبوها عليه ولكم انا ريسااااان ومروان يكلو : اختنا اطلعها وتلكاها انت والله اذا ما ردت لا اسوي ما اسوي
كلوبنا صارت نار على قدس وين راحت
البنية ما تندل تطلع مترتين للشارع شلون طلعت وشردت منه ؟
اشافت من ريسان وهيج هجت من البيت بجم يوم ؟
هنوب ما عندم مكان يدورون بيه لا الهم كرايب ولا قدس تندل كرايب خاطر تمشيلهم وين راحت ؟ المتورط الوحيد بشردة قدس خطاب ابن اخت ريسان عبن خطاب غاب من البيت ويا غيبة قدس .
تشعوطوا تشعوط .. لحد ما بعد اسبوع قدس رجعت للجول بنفسها .. عد ما شافتها وسام طبكتلها الصوندا وكتلتها وين اليوجعها وهي تسالها : يولي وين جنتي وويامن شردتي
وقدس تنكر وتكلم ضعت ونا اندليت لحد ما كمت اوصفلهم المكان ووصلوني ما صدكها مروان ولا احد صدكها كتلوها رادوا يذبحوها بس وسام كالتلهم : عيفوها هل تولي كافي عليها الكتله
وحجت ويا نهلة وكالتلها : انا ادري جانت ويا خطاب عبن محد يندل الدرب لهين غيره هو الجابها .. والظاهر خطاب جان رايدها وريسان خذاها قسطا بخطاب
– شنهو من روح هاذ التدنى نفسو على بنية رايدها ابن اخته المربي مثل ابنه
– هاذ ريسان عجل انا عليش خايفة على ولدي لا يتامن ولا لو امان بس شنكول
– هسه لو خاطبها لابن اختو جان ماخذتلها واحد يناسبها يناسب عمرها وخالي مختلي ترتاح البنية وياه خذاها اله ابو نفس الدنية فوك ثلث نسوان خاطر يبرد دودته ابو دودة الشويب
– انت احجي وياها واعرفي شسوت شعملت شصار وياها غاد عليش شردت افتهمي منها الصار
راحت نهلة تستفهم حجتلها قدس بس نهلة ما وصلت كل الكلام لوسام حجتلها الطايفات .
ريسان عرف قدس ردت للجول وصارت عد اهلها
وعكبها رد خطاب للبيت وكعد ويا امه ونكر قدس وياه لو شايفها كاللها : جنت عد بيت عمي ما شايف قدس
…. شك وسام وولدها اتفقوا ويا خطاب ضده وراح يعلسون
هين راد يتغدا بيهم كبل لا يتعشون بيه ونطى موقع الجول وخبر على مروان وكال : يشتغل بتنظيم القا عدة ..
بين ليلة وضحاها الامريكان حاصروا الجول من مكان وداهموا الجول .. جان بس مروان نايم يوسف وعمار بالشغل والبيت ما بيه غير مروان والنسوان
اطوق البيت والامريكان حاصروا البيت من كل صوب
حست وسام شافت مدرعة امريكية من شافتها بسرعة ركضت على مروان تصحيه خاطر يشرد ….
كام مروان وفز من فراشه وركض فوك البيت
والامريكان داهموا البيت من كل مكان وطوقوها ..
كلبوا البيت فوكهم كلاب .. طكوهم جتلوهم وصيحوا عليهم ونتفوا البيت يدورون اسلحة ومعدات بس ما لكو .. عافوا المكان وطلعوا
عد ما طلعوا وسام ركضت ادور على ابنها مفرفحة تريد تعرف شرد لو لا .. تخابر عليه تليفونه بالبيت .. طلعت برا للجول ما شافت احد
لحد ما نهلة كامت تعيط وتصيح وادك فوك راسها
ركضت وسام الها والا تشوف ابنعا ورا البيت وطلقة براسو وميت … هين وسام انجت رسمي ….