رواية قلاع الضر الفصل الثلاثون 30 بقلم زينب ماجد
رواية قلاع الضر الجزء الثلاثون
رواية قلاع الضر البارت الثلاثون
رواية قلاع الضر الحلقة الثلاثون
<< الخوض في الجريمة>>
من كل كتر ننزف ونين وماحجينه مستحين
الگاطع
جرتني من هدومي ووكفتني :- اسمعي يولي اسراري جثيرة واليعرف سري يضيع ينهلة …
– ما اظن يضيع كثرج شنهو بعد ما عملتي يوسام ؟ شنهو الضل ما هدمتي .. لا تظنين افج ثمي واحجي لاحد سرج وافضحج حجاي الفضيحة اتدور عليه ليما تلبسه وانا عندي بنات اخاف عليهن من الزمن بس حاجي روحج ليمتى تظلين هاذ حالج دحكي عدل ..
– اسالج وجاوبي ينهلة شيهمه الغركان لو چملوه غطسة ؟
انا من زمان ضايعة من وكت ما الجيلة حطت بظهر امي وتيهت ادينا وماتت من ذيج الساعة ولهذا كبري انا ضايعة
– انت عتنطيني لنفسج اسباب لسواياتج وعمايلج وكل العملتي ماله اسباب .. التخون مالها اسباب والترخص روحها مالها اسباب والتبوك مالها اسباب والتظلم مالها اسباب
كل واحد بهالدنيا ينحط ابين دربين واحد سهل وحرام والاخر صعب لاجن حلال .. وكلها تختار السهل وتحط اسباب خاطر تبري ضميرها ولو رد حسابه ما بينه وبين روحه يجتله الضمير لجنه صام اذانه عن صوت روحه
– الحجي سهل
الكاله سهلة واسهل ما على كلب بنادم النصحة
يحب ينصح وهو كاعد بمجانه لا عاش عيشة غيره ولا ضاك من ماعون غيره ، دامج تكولين عدي بنات واصم ثمي من الفضيحة عجل اكرميني وصمي وياج من النصيحة انا ما بحاجتها
– انا ماني عدوتج ولو تجابليني تلاكيني بحلج وواعية اعلى ظرفج .. خاويني ما تخسرين شاركيني امرج داريني عن التعمليه
– لو عرفتي راح تهجين
– اهج منين ان جان اعلى العمايل التعمليها ويا ريسان والموتى البجول انا صاحيتلهم واحس بصريخم واعرف كلشي يدور حولي لجن مالي غرض غير ابناتي بهالجول كلنا موتى ورضاية الله ع الموتى اكلم هم امرهم بيد رب رحيم وتحت رحمته حنة تحت رحمة ناس ظلام وكل واحد بينا يتعلى على اخر ويظلم .. خاويني ما تخسرين وخلينا نبعد هالبع الجاعد هين منا ونبعد شره عن الولد كبل لا يصل الدور لنحورهم
– فات الوكت وكلشي هساه بيده
– الا وكته حنه مجبلين على حرب .. هاذ اكثر وكت خايف وما راح يعملج شي لو بعدتي
– ووين نمش
– نسيتي الج بيت ؟ نسيتي تعبج وكدج وسنينج ذيج الخذاهن ثاير وعايش بجلم كل هالسنين هو ومرته واولاده .. نمش من هالجول ونرد لاصلنا للسهل ونكعد بدارنا .. والغريب يطلع منها
– هساه الوكت ماهو وكته .. من كون ما نعرف الحرب منهو الرابح ومنهو الخسران بيها لو ردت امريكا وما كصفت .. لو جانت مطر صيف وضل الحال على بعضه ذيج الساعة ياهو اليخلصنا انا وولدي من ريسان
– عليش هالكثر خايفة منه
– ركبتي وركبة اولادي بيده
– وشنهو البيده خاطر يملك اركابنا ؟
– ما كل الحجي ينكال .. ندحج وين تصل الامور ونشوف
– الله كريم ما نكول الله يفرجها
.. دخلت نمت ثاني يوم كعدت على مروان وهو يدوس ويجعص بينا : ها ها شني جعصتنا خييييرك ما تكول نايمين
– دكومي من الدرب كومي خل اطلع دشداشتي هل اودي هاي
– ياهي هاي التوديها
– سهام طركاعة تريد اتروح لاهلها تضل غاد تخاف لا تصير الحرب وتموت بهالجول
– خذها عسى لا ردت
جريت رجلي وسحبت بناتي وهو جر دشداشته الجوزية جكها وراح يهربد خاطر ياخذها لاهلها .. ما جاني النوم بعد كمت هاطر اسوي ريوك للبيت لكيت قدس سابكتني كاعدة من الفجر عاجنة وطالعة غاسلة المراح وموردة الحلال ورادة للمطبخ تثرم
كتلها : عجل انت خلصي الريوك وانا راح اخذ انجانة العجين اطركهن واخبزهن بالتنور واجي …
رحت اخبز .. جتني وسام
كالت : ريسان رايد يجيب ابن اخوه ويضل هين بفترة الحرب
– عليش
– عده شغلات مهمة لاون يكضيهن وكال يضل هين
– ما تحسين مستعبدنا يجي وكت ما حلاله ونحن ما نكدر نكول اللا
– وهذا الصدك نكدر
– انت الخليتي روحج اسيرته
– عجل وتريدين اضل حبيسة السجن طول عمري ؟
– ماكو عمر يضل على حالها وهاي كل المساجين طلعت جان هساج طلعتي وما هاذ حالج
– وانا اشم ايدي صدام يطي عفو عام ويطلع الكل ؟ ولو ادري اضل سبع سنين اخرى بالسجن خاطر انطر العفو ما انا كتلج الكالة سهلة عيشة السجن ما تنراد
– اكلج دادة ضل سوال بكلبي ياكل اتمنى الاكيله جواب
– شنهوه ؟
– ريسان شعجب ما خذاج ؟ كل هالسنين انت وولدج بخدمته شعجب ما ملج عليج وخلاج على ذمته
– ماخذ ثلث نسوان
– وعليش ما خلاج الرابعة
– لا انا بيوم هويته ولا هو العجبته ورادتي والصار كبل جان مني خاطر يطلعني من السجن وما طلعني الا عكب ما علت بطني ..
– ورديتي للسهل وانت حبلى
– لا وين رديت للسهل من بعد شهوووور .. حبلت وجبت وكعد جثير ياله كلت اله اريد ولدي اجيبم هين
– والجبتي ما تعرفينو ؟
– ما شفتو خاطر اعرفو كالي دفنتا .. بس انا اعرف ما دفنا وهو ضامه ابمجان بعيد عني .. ذاك اليوم جا هو وولد كال ابني .. الولد جرة عينه تشابه جرة عين يوسف جدتي تكول جرة عين يوسف اعلى عين عين امي .. عيونها تكول جانم حلوات ..
– شكيتي بيه ابنج ؟
– بس ردت اعرف بس يكلي ابن عواطف ابنج مات ساعة الاجا
– ومصدكته
– الصدكت والما صدكت واحد .. انا لو عرفت الي ابن تظنين اريده ؟ لو اجيبه شكل لولدي حبلت بيه بالسجن واعتبره اخوكم ؟ انا لا كضبته لا شفته بس طلع من بطني الاحسن انسى انا شلت بزر ابطني بيوم من ريسان .
– وانت اعلى حك دامه من الاول ما صفى يولي
كعدت وانا اخبز تسولف وتحاجيني
كامت تحجيلي عنها وتحجي عن اسرارها .. بس كل سر تفجه يطلع بظهر الف سوال وماله حل ومن اسعل .. تسمت ذنربها جثيرة ومتوحلة ليذاناتها .
اتريكنا وكضينا يومنا
وصدك وريسان كام يلفي للجول ويكضي ايامه هين ..
وكل ما يجي جايب وياه دستة ملفات ما ندري شنهي هنه .. ويضمهن بالجول .
ايام الحرب لامت فوك روسنا
وندحج من ابعيد شلون الطيارات تقصف بالمركز والعاصمة والنار تنطح للظالين .. ابجي واون اعلى حال بغداد بين هالغرب وشيجرالها عكب هالحال
ليلة من الليالي جانت باردة ومطر زخ
انا نايمة واسمع الرعيد هز اللبيت هز .. حتى الكاع ارتجت
سمعت الباب مالتنا تنفتح واتنسد ابالي الهوى
مروان والبنات نايمات منصية الشيشة .. دحجت اشوف خيال احد .. كمت خاطر اشوف ياهو .. فجيت الباب والكاه قدس : ها يولي شعدج ؟
– اكلج المطر عيزوخ كوي والدوانية قركت والخطار بيها
– يولي يا خطار ريسان هم خطار خلاه يتبلل عساه بلكت يفج ويمشي عنا
– فد ابن اختو خطي كاعد مبتلي بالماي ركش المطر فات لهم
– دمشي وانا البس ربطتي واجيج
دخلت جريت الربطة لبستها وشديتها وطلعت لكيت ابن اخت ريسان شاب اسمر كاعد ومبتلي بالماي داخلم كتلوا : ها خوية شني
– والله كركت اذا عدج ماسحة بس امسح
– اي
ركضت اجيب الماسحة من جوا لكيت قدس ليغاد واكفة والزلمة موجود : يولي فوتي داخل لا يشوفج واحد من الولد ويروح يكضبج يجسر اعظامج .. الزلمة منا ادخلي
– احس حس الهايشة تجعر
-يولي يالثولة مطي هي وتجعر دخلي نامي
حجيتها وطلعت للولد ردت امسح عنه كال : استغفر الله اختي بس جيبي الماسحة ارد الماي عن خاله وانت ردي لنومتج المعذرة منج ضايكناكم
– لا صدك جذب كل الهلا
جاي احجي وما احس الا هالدبة عبرتني وهي شايلة النايلونة فوك راسها واطر البستان بهالمطر تركض للمراح ، صحت وراح : يولي يمصكوعة ردي لا يكعد واحد من الولد يولي قددددس
تسمع ؟ لا والله
سالفه وبيها حواوينها تفكد وتموت على هالحواوين تكول خوانها جهالها ما حواوين عفتها ورديت انام .. غفيت شوي وكعدت كلت خل اشوف مكصوفة الركبة وين طرت بهالمطيرة
لبست الربطة وجاي اطلع اجتلي تركض تهبد تهبد من تمشي تحس الكاع تصير بيها رجه : ها يولي ؟
هدتني وفاتت ع الغرفة اسمعها تنده بيوسف .. عفتم ورحت للمطبخ اعمل الريوك سمعت خطار جاينا طلعت لاكاني خطاب ابن اخت ريسان كالي : ذوله ناس شاردين من بيوتهم رايدين يطلعون لديالى وعاصين بالمطر وجايين لهين يرتاحون
– اي هلا بيهم ما كعدتم
– امبلى كعدتهم بس خالي لساه ما كعد
– هسه اسويلهم الريوك
– الله يكويج
مشيت للمطبخ الدبة هاي اليوم حتى عجن ما عاجنة خاطر اخبز رحت للغرفة حسبالي ردت نامت لكيتها تنظف دخلت احاجيها : وانت كاعدة
– وانا شفت النوم خاطر اكعد ؟
– كومي وياي جايينه خطار
– اي شفتم .. عالكين بالعاصفة واجو يدرون مجان يستراحون بيه
– فلك صاب راسج وانت طلعتيلهم يولي ؟
– اني جنت بالمراح الهايشة معوشرة وعتولد وهم اجو سعلوني ( سألوني)
– يولي ما اتوبين الا يكضون براسج التوبة عجل لو شايفج عمار لو يوسف الا يحطون ظهرج ويكصمنو
– عجل لو تدحكين كرايب ابو وهب طول ما الهايشة تطلك هو كاضبني اليكول انا الاطلك مو الهايشة
– يصخام صاب راسج صدك يولي .. يولي متخافين ربج انت ؟
جاي نحجي واندارت اليوسف نست هو نايم وضلت تهربد بالحجي لطمت على خدودها : تعزيت تعزيت تعزيت .. سمعني يمه يمه سمعني
طاحت علي بعدتني منها وراحت تطلع من الغرفة وتصيح : عزا براسي اليوم يمسح بيه المراح الا يكضي براسي الونة
: يولي السانج هذا لو تكضبينو جان احنا بخير ، امشي خل نكضي الريوك
كعدت هي تعجن وانا اثرم ادحج منا ومنا اخاف يوسف سمعها ويجيها ومن مر يوسف عيونها صارن بالطول هزيت راسي منها .. عا من مر وما حاجاها
كالت : اي هم زين ربي سهلها يمكنو ما سمعني
– دام عداه الج ربج وما سمعج كضبي السانج لا يسمعج بالاخرى
– لا لا بعد ما اعيدها
ضلت تعجن وتغني : ودعتك انا بليل قصبا عليه
عيني العمى ولا اشوف عيني العمى ولا اشوف ذيج المسية ودعتك
مر عمار على حسها صاح : هيييين انت يولي
ردتو – ها
– ووجعاه وطك رحاه ما عدتسمعين ناس وزلم بالدوانية جاية تغنين ادفرج انومج بنص العجين ؟
– الله الأحد هي اقنية شبيكم الواحد هين ما يقني شلون ؟
– يولي استري على روحج ونصي حسج
ما اندارتلي وراحت تصيح ورا عمار وراه : حنكة صدك عماااااار عماااااااار
رد شايط منها : يولي انت جلدج يحكج مو عدكلج ناس مكومة غاد شبيج ؟
– كضينا ماي كلش
– اي وشني ؟
– عجل روح جيبلنا ماي
– انت عليش تزرعدين اكول اعجني وانجعمي
– عجل شلون نضل بلا ماي ؟ امش انا اجيب ؟
عافها ومشى : يمممممه يممممه هي امي وينها ما تجي تشوف عمار لا انطيك ولا اخلي رحمة الله تنزل عليك .. لا هو يجيب ماي ولا يخلينا نطر نجيب
فاتت امها
وسام : صياحج من صباحات الله يا علواته انا شلون اخلص منج ؟
– يمه الماي كضى وعمار ما يرضى يجيب وما يخليني اطر الجول
عفتها بهوستها ورحت احضر التنور خاطر اخبز بس لكيت الكاع فايضة والجيم مبلل رديت محتارة: يولي هاذ الچيم كلو مبلول شلون اخبز ؟
-وماي كاضي منين نجيب؟ دحكي المطبخ قادي سيان
-عجل شلون ؟
-اكو جم حطبة بالمراح اجيبهن واجيم بيهن وانت روحي جيبي الماي وتعاي خاطر نكضي شغلنا
– خوش ديله
رحت جبت الماي ورديت حطيت المي بالبيت ورحت للغرفة لبست بناتي جواريبهن وقماصلهن كبل لا يطلعن والجو بارد يتمرضن .. كضيت طبت وسام كالت : شصار من ريوكجن ما طلع ريوك الوادم تريد تمشي
– شنسوي عجل بدينا ؟ الجيم مبلول الماي كاضي ورحت اجيب وذيج قدس عتخبز
– ديلا فضنها ريسان يريد يطلع
– يلا هسه بس اطك البيضات
كضيت الريوك بساع وقدس خلصت الخيز وجابته فضينا الريوك بسع وزتينا الهم .. وكعدنا ناكل الباقي بالحواف ونغمس .. حجت : اكلج
– ها
– نحن عليش ما نشرد
عمضت عيوني وعكدت حواجبي من سوالفها البنية حكها لا طالعة لا طابة سوالفها على كدها اليجي على عكلها تحجي وتسعل وينرادلها كلب ما مدنشن اليسولف وياها يحس الحياة وردية اكل ونوم .. كل همومها اخوتها عسرين ما يخلوها تغني بصوت عالي .
بس ردت افضي خلك وياها وكلت اجاريها واسولف هم خطية وين تروح رديتها : وين نشرد
– نشرد ؟
– لبقداد
– عليش ؟
– عجل ما عيقصفونا خاف نموت
– يولي هم جايين يقصفون ابغداد نشرد ليها على يا مال ؟
– عجل خل نشوف قير بقداد
– قدس اليرحم اهلج شوفيلج غيري تسولفين وياه
– شني محد بيكم يحاجيني عجل ويامن احجي
– روحي احجي ويا بناتي
– واني زعطوطة احجي وياهن
– يولي وين نشرد هم البغداد جاي يشردون لديالى
– وهي وين صايرة ديالى
– دحج البخت .. بالخريطة
– شني الخريطة
– خريطة اهلج اكوم منج حتى الزاد ما اريد
كمت اجت وسام : شنهي صوتجن واصل لذاك الصوب شجالجن
– تعل الكلب هالبنية تكلي عليش ما نشرد لبغداد
هزت ايدها منها كتلها : محد وصلها لهالحال غيرج خطية هالبنية بركبتج
– ليش يمه شسويتلها؟ شو نايمة بحضين الله تاكل وتشرب وتنام
– لا تغشمين روحج البت كل ما جالها تكبر وعكلها يصغر .. باجر عكبة تجور الكاع بيها وين تولي بدماغ البشة هاذ .. والدنيا تلاوي ابنادم ملاوة وحتى العاكل والواعي تكسره هاي شحالها ؟
– حيري بامرج وتركي عنج امرها .
مشيت وكلت انا ياهو مالتي روحي وبناتي ومالي غرض بغيري .. من بعد يومين سمعنا ابغداد سقطت وسقط حكم صدام
هرعت وسام وولدها وطلعوا لبغداد … فرهدوا دواىر الدولة اللي بايك الكراسي والكومديات والشالع الباب والبايك الميوزة ..
محمليهن وجايبيهن للجول خلوهن ..
حرت المن ابجي لحالنا لو لحال بلدنا
احنا اول شعب يبوك بلده عد ما طاح بدل ما نعينه ونكومه
شنهي قيمة الميز والكرسي والكومدي ؟ عود ينباع ويحصل جم فلس بالحرام .. مدري الله شراح يجري علينا بعد عملتنا هاي .
من ضمن المفرهديهن .. راديون جايبو يوسف
قدس عد ما شافت الراديو تخبلت صارت روحها بيها كام يوسف يعوفه الها تسمع بيها هي والبنات بس اني روحي تكش منه ..
من بعد السقوط
تلايمت الامور راح النظام راح القانون صارت هيته والكتل بفلس .. وكتها مروان كام يروح ما يرد … الا وجه الليل
بعد ما جان مهتلف بطرك الدشداشة
كام يلف اليشمغ ويلبس هالدشداشة السودة ويكصرها ويطلع
وين يروح وين يمش ما ندري
فرد يوم من الايام كاعدة افلي بشعر بتي
فات مروان وبيدك علاكة سودة : هاج ضمي هاي ؟
– شني هاي ؟
– كومي ضميهن بساع كبل لا امي تشوفهن
– غير اعرف شنهي
اطاني ياهن فتحتهن وعيني ما تشوف دستة فلوس صرخت : ءءءءءء دخيلك ربي شني هاي مروان
– فلوس شغلي ضميهن
-شغليش عاذ اليجيب علاليك فلوس
– عينج بالج امي تدري عنم ضميهن
شلتم وصفطتم بالمخدة
راح وعكب يومين هم جاب علاكة فلوس
احتاريت شنهي هاي الفلوس اليجيبهن مروان ومنين
عد ما جمعن وصارن هواي كالي : اريد منج شغلة
-شنهو ؟
– تاخذين الفلوس تضميهن عد اهلج خاطر اجمعهن ونشتري بيت اني وياج والجهال
والله لمني اني وبناتي وبعلاليك ملابسنا ضمينا الفلوس من وسام حطيتهن عد اهلي .. خلانا ثلث تيام ورد اخذنا من اهلي
رجعنا للبيت لكيته راد سهام جايبها للجول
ما حجيت شلي غرض بعد مرته يريدها يطلكها شانه
بس ما معتبرها مرة عبن رعنة وعلى نياتها
هاليامني على حلاله
الا بعد فترة جانا ريسان يزرعد ويهدد ويصيح : اينج وينو يولي ؟
طلعتلا وسام : اسم الله الرحمن ياهو منم ؟ مروان لو يوسف
– مروان اسمعي وتبلغي عن لساني لا ما جان عن شغله هاذ وابتعد الا حالو حالم اجتلوا
– شنهو الصاير وياهمه اليبعد عنم ؟
– ابنج صاف ويا القاعدة ضد جيش المجاهدين ولو ما كف عن دربو هاذ انا اردو
– لطمت وسام على خدودها وكامت تصرخ : مروان شلو بالقاعدة وشجابو عليهم ..
– ابنج لا ما تردي لا تلومين بالاعملا بحالو
كام يهدد ويتوعد
عد ما رد مروان تكاونت وياه وسام وهي تحاول تردعوه عن القاعدة كاللها : انت ياهو مالتج اني ويامني اشتغل اني زلمه واعرف امري انت خلك مرة لا تدخلين بامري وصاحبج هاذ ما يمشيني بعد
تكاونت وياه شلون كاللها صاحبج
لزمت الصوندة وجتلته .. هو جر الصوندة منها وضربها راشدي وهاد عليها جاتلها .. كل احنا ذبينا ارواحنا نفرغها من ايده ..
كامت تحلف وتصيح : ما يضل عدي اليوم ما تكابلني وغصبا ما عنك .. هسه تطلع من هين
خذانا ولملمنا بساع وطلعنا من الحول خذانا لاهلي بالمحمودية
اول ايامنا كعدنا ويا اهلي .. انوب دبر النا بيت .. كعدنا بيه
كلت امورنا كضت وتعدلت وراح نرتاح انا وبناتي
بس الصار بيتي صار مرتع للقاعدة يجون ويكعدون ويخططون ابيتي ..
العرفتو …
مروان منضم للقاعدة .. وصاير مجرم
اي واحد عندو طلابة لو معاديلو احد يجي لمروان ينطي ٣ اوراق .. يروح مروان يجتلو ويرد بفلوس جتلا .. الحجي سمعته من اهلي واتخبلت ..
رديت للبيت اتكاون وياه : انت ما رايدني ما رايد بناتك شجاي تعمل بحالك وبحالنا العدتعملو موت جريمة
– وانت شنهو خذيتي دور امي وكمتي تحاسبيني اني ما عامل شي غلط جاي اعمل بما يرضي الله واقتص من الكفرة والظلام
– اي كفرة واي ظلام مروان انت عتضحك على منهو القصاص تاخذ عليه فلوس الجاي تعملو جتل مالو غير معنى انت عدتجتل بالناس .. الفلوس العتجمعم من فلوس الجتل راح تحركنا وتخلينا رماد .. اصحى على زمانك وبطل من هالجرم العتعملو
كام يصيح ويعلط ويسب ويشتم وما رد
كام كل ما يجيب فلوس ويضم ابجي ليما اخوه اكول جم راس طار من تحت هالفلوس الملمومة ؟ جم طفل تيتم لجل هالفلوس ؟ وجم مرة ترملت وصارت بذلة اليسوى والمايسوى لجل هالفلوس ؟ جم كلب ام انفجع ؟ جم راس ابو شيب ؟
جم بيت انهجم .. جم حلم تهدم ؟
مرة من المرات جا رتل امريكي يفتش الدور ع السلاح ..
مدورين البيوت ما لاكين اسلحة .. جان مروان واكف على اعصابه وهو يدحج الامريكان يطوفون البيوت على كيفم
عد ما رايد الرتل يفوت وبعد ليغاد ماشرلهم بيدو وجار على اركبتو بمعنى ( الا اذ بحكم ) شايفه واحد من الجنود الامريكان كايم يصيح بالانكليزي وموكفين الرتل ونازلين
هو عد ما شاف الرتل وكف والامريكان نزلوا طكها ركضة وانهزم منم فوك البيوت .. والامريكان بالاسلحة يراكضون وراه من بيت لبيت لحد ما لابد منم .. وكادر يفلت
كايمين يحققون ويدورون لحد ما اندلوا بيتو
دخلوا علينا بطرك اني وبناتي .. دخلوا والاسلحة بديهم وبيها هاذ الضوا الاحمر ويصيحون بالانكليزي ما اعرف شيكولون كمت اصيح وادك على راسي …
ما احس الا بطرف اسلاحه طكني على راسي غوشت الدنيا بعيني ومعد ادحج شي وطحت للكاع وضلن بناتي يتصارخن من رعب الامريكان …..
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية قلاع الضر)
