رواية قضية خلع الجزء الرابع الفصل السادس 6 بقلم عمرو راشد
رواية قضية خلع الجزء الرابع الجزء السادس
رواية قضية خلع الجزء الرابع البارت السادس
رواية قضية خلع الجزء الرابع الحلقة السادسة
كنت عارفة انك هتيجي.. بس قولت مينفعش تيجي من غير ما احضرلك مفاجأه تليق بيك يا حسام باشا
= هو علمك الوسا*خة خلاص.. بقيتو انتو الاتنين شبه بعض
طب ما تبص لنفسك كدا وتشوف موقفك عامل ازاي.. انت ممكن متخرجش من هنا حي
= اقولك حاجة.. اقسم بالله أنتي ما قد اللي أنتي بتعمليه دا
” طارق اتكلم.. بصتله ووجهت المسد*س ناحيته
بقولك ايه يا حسام.. انا هطلع جدع معاك و هسيبك تخرج من هنا بس بشرط ، تسيب سلا*حك وتمشي ماهو مش معقول هتدخل بيتي بسلا*ح وعايز تخرج بيه
= انت بتحلم.. لو عايز تعمل حاجة اعملها وانت عارف كويس أني مبخافش
عارف بس كمان عارف انك ذكي ، فكر شوية يا حسام.. احنا اتنين وانت لوحدك يعني الموضوع خلصان يا حسام
= انتو الاتنين نفس صفيحة الزبا*لة
” بصيت ل نادية
شكلك نسيتي لما جبتك من الشارع يا نادية.. شكلك نسيتي لما كنت بتستنجدي بيا عشان احميكي من وائل ولا فؤاد ، كلهم عملو معاكي مواقف اوس*خ من بعض الا انا.. انا الوحيد اللي كنت في ضهرك و اخرتها بترفعي عليا سلا*ح بس برافو عليكي لا بجد أنا مبسوط بيكي
” طارق هو اللي رد عليا في اللحظة دي
ما تسيبك بقا من كلام الشعارات بتاعك دا يا حسام.. مبقاش في حاجة اسمها جواز دلوقتي وحب والكلام دا.. كله بيزنس دلوقتي يعني متستغربش لو لفيتني طلقت نادية وبعدها هي اتجوزت راجل تاني غيري.. فووق شوية
= دا كلام مين بقا ان شاء الله.. هو انا على اخر الزمن اسمع منك انت نصايح؟
نزل سلا*حك يا حسام.. نزله عشان متندمش
= وحياتك ما هنزله
” لقيت طارق بيشد أجزاء المسد*س
يبقا انت اللي حكمت على نفسك ويكون في علمك القضية دي مش هتاخد في ايدي ثانية ، واحد اتهجم عليا وعلى مراتي وماسك سلا*ح وانا كنت بدافع عن نفسي.. قضية متقفلة مفيهاش غلطة
” داس على الزناد.. الطلقة خرجت من المس*دس بس كانت في السقف.. بعدها قرب مني و حط المسد*س في وشي
اللي جاية هتبقا فيك.. قدامك دقيقة و تخرج برا بيتي
” نزلت المس*دس
اللي هيحكم بينا المحكمة.. سلام
” مشيت وخرجت من العمارة.. بيني وبينكو كنت عارف انه مش هيض*رب ، طارق مش غبي عشان يعمل كدا حتى لو كانت القضية مفيهاش غلطة زي ما بيقول وهو عنده حق على فكرة.. بس هو برضو مش غبي لانه لو قت*لني مش هيعرف يكمل اللي هو بيعمله.. هو لسة عايز يعذ*بني اكتر
#بقلم : #عمرو راشد
” حسام خرج من الشقة.. نزلت المسد*س اللي كنت ماسكاه وبصيت ل طارق
انت ازاي تسيبه يمشي
= امال كنتي عايزاني اعمله ايه
وانت كنت جيبته ليه هنا اصلا
= نادية انا عارف انا بعمل ايه.. هتفهمي كل حاجة في الاخر
بس انا عايزة افهم دلوقتي
= اصبري بس انتي شوية.. انتي عايزة تحمي ابنك ويبقا معاكي وانا هخليه معاكي متقلقيش
” مشيت من عندهم و رجعت الببت وطبعا زي ما كنت متوقع ملقتش حد.. الشقة فاضية بس المشكلة مش هنا ، المشكلة ان الشقة كانت نضيفة.. وانا نازل منها كانت متدمرة بسبب الخناقة اللي حصلت فيها لكن حاليا رجعت زي الاول و احسن.. انا مبقتش فاهم حاجة.. هو انا كنت بحلم ولا ايه..قعدت على الكنبة وسندت دماغي.. دقايق عدت ومكنتش حاسس بأي حاجة.. لما صحيت تاني يوم كانت الساعة 3 العصر قومت بسرعة من على الكنبة..اتأخرت جدا على الشغل وكمان لقيت مكالمات كتير جدا من فريدة ، قومت بسرعة غيرت هدومي ونزلت.. وانا في الطريق كلمت فريدة
ايوا يا حبيبتي
= انت كنت فين يا حسام قلقتني عليك
راحت عليا نومة معلش
= هو اليوم امبارح كان تقيل أوي كدا
اه كان عندي مواعيد كتير أوي
= لا وانت كنت عايزنا نخرج صح
المهم قوليلي أنتي عاملة ايه دلوقتي
= احسن الحمد لله
الحمدلله
= مالك يا حسام
مفيش لسة صاحي ومفوقتش
= طب روح المكتب و افطر و اشرب قهوتك وهتفوق
” محبتش احكيلها اللي حصل ومعرفش ليه مقولتش بس حسيت اني هتقل عليها وهخليها تشيل هم مش بتاعها.. قفلت معاها و روحت المكتب ويارتني ما روحت لانها مش هتفرق كتير ، مكنتش فايق تماما لدرجة اني لغيت كل المواعيد اللي عندي النهاردة وكمان خليت السكرتيرة تمشي.. مش عارف اشتغل ولا عارف اركز.. اللي حصل امبارح مش عايز يطلع من دماغي ، مش مستغرب ان الحركة دي تحصل من طارق لكن نادية تعمل كدا ازاي.. بعد كل دا نادية بترفع عليا انا سلا*ح.. كل اللي عملته اتنسا و افتكرت ليا الوحش بس واللي هو برضو كان عشانها.. سمعت صوت جاي من برا و بعد ثواني باب المكتب اتفتح ولقيتها واقفة قدامي
هي السكرتيرة فين
= خدت إذن ومشيت
انا قولت بقا طالما رايح متأخر وكمان شكلك مضايق يبقا انت مش هتعرف تشتغل ولا تركز وكمان عارفة انك مفطرتش
= لا فطرت اول ما جيت
كداب.. وممكن احلفلك كمان
= ماشي انا كداب
مانا عارفة
= وبعد ما عرفتي
جيت وجيبتلك معايا الاكل بتاعك طبعا و زي ما بتحبها بالظبط.. فطيرة سجق كيري.. فاكرها؟
” كانت مبتسمة وهي بتفتح العلبة و بتمد ايديها ليا عشان ااكل
معلش يا فريدة انا مليش نفس دلوقتي
= لا بقولك ايه انت عارف انا دافعة فيها كام دي ، دا انا بوست ايد الراجل عشان ااخدها منه قسط.. كله عشانك عشان مبقاش حارماك من حاجة
كتر خيرك يا فريدة والله..من فغيرك كان زماني بشحت عشان اجيب لقمة ااكلها
= خلاص يا حسام يا حبيبي انا مقدرة الظروف برضو
” ضحكنا سوا ، كانت اكتر حاجة بتعجبني فيها و بتحببني فيها أكتر انها كانت بتعرف تخرجني من اي مود وحش انا بكون فيه.. دي اهم ميزة لازم تكون موجودة في شريك حياتك.. طبعا بعد ما ضحكت خلاص مبقاش عندي مانع ااكل و بعد ما خلصنا اكل خرجنا وفضلنا نلف طول اليوم بالعربية ، وصلتها البيت الساعة 11 وانا روحت على بيتي.. دخلت نمت علطول عشان اعرف اصحا فايق ، بكرا عندي يوم شغل طويل وفعلا صحيت و روحت المكتب ومن هناك اتصلت ب محامي زميل ليا عشان يرفعلي قضية ب ضم ابني وفعلا وافق وهيبدأ في الإجراءات ، بالمناسبة المحامي دا كان سامي وهو يعتبر دفعتي.. بعدها ب أسبوع كلمني وقالي
انا رفعتلك القضية يا حسام والجلسة اتحددت.. هتبقا يوم 28 من نفس الشهر
” يعني تقريبا فاضل 20 يوم ، من ساعة ما قالي وانا بقيت مش على بعضي.. انا عارف اني هكسب ومن اول دقيقة بس مكنتش عايز اقف قدام نادية ، مكنش نفسي ندخل انا وهي في المشاكل دي كلها.. مكنش نفسي ابننا يشوف ابوه وامه واقفين قصاد بعض في المحاكم.. حاجات كتير كنت بتمناها ولكن ولا واحدة منهم اتحققت.. الايام كانت بتعدي بملل بسبب اني مكنش ليا نفس اعمل اي حاجة ، كنت بتجاهل مكالمات فريدة المستمرة كل يوم.. مكنتش حاسس نفسي عايز اعمل حاجة ، عايز ابقا قاعد ساكت مبتكلمش ولا حد يكلمني.. كمان مبقتش اروح المكتب لحد ما اخلص موضوع المحكمة دا وفعلا يوم 28 جه.. قومت بدري وخدت دش ولبست ونزلت ركبت العربية ومشيت روحت المحكمة وهناك شوفت فريدة وطارق.. اما انا مكنش معايا غير زميلي سامي.. بعد ربع ساعة دخلنا جوا ووقفنا قدام القاضي ، سامي بدأ يتكلم
دلوقتي يا فندم موكلي حسام سعدالدين الهواري كان متجوز السيدة نادية رأفت مصطفى.. و حصل بينهم خلاف و اتطلقو و دي ورقة الطلاق يا فندم
” سامي قدم ورقة الطلاق للقاضي
بعدها السيدة نادية تزوجت من الاستاد طارق و طبقا للقانون ف بكدا حضانة الطفل بتنتقل للاب بشكل رسمي ف انا بطالب يا فندم بنقل حضانة الطفل فؤاد حسام سعدالدين الهواري ل موكلي حسام
” لقيت طارق اتكلم
بعد اذنك يا فندم.. انا طارق السيد إسماعيل زوج مدام نادية وبالمناسبة انا محامي يعني اكيد مش جاهل بالقانون وفاهمه كويس سيادتك ، بس يا فندم انا مقدرش اخلي طفل لسة عمره متعداش ال 6 سنين انه يروح يعيش مع واحد مختل زي حسام ، حسام زميلي من ايام الكلية يا فندم.. و… استغفر الله العظيم يارب ، حسام كل يوم يا فندم مع واحدة شكل وكل المنطقة بتشتكي منه دا غير كمان انه.. انه أعصابه تعبانة شوية وعندي دليل يا فندم بيثبت ان حسام الهواري شخص غير طبيعي تماما
” طارق سلم تليفونه للقاضي.. بعد دقيقة القاضي قالي
عندك تعليق على الفيديو دا يا حسام
” كنت انا اللي موجود في الفيديو لما كنت رافع السلا*ح على طارق..
” ساعتها طارق اتكلم
في التوقيت دا يا فندم انا كنت نايم مع زوجتي عشان اعرف اصحا و انزل اصلي الفجر جماعة اصل أنا سيادتك دايما احب اصلي الفجر جماعة ، لقيت حسام دخل عليا انا ومراتي وماسك السلا*ح زي ما حضرتك شايف وانا كنت بدافع عن نفسي.. وترخيص السلا*ح بتاعي اهو يا فندم
” قدمله الترخيص وبص ليا و ابتسم
عندك حاجة تقولها يا حسام؟
= يا فندم الكلام دا كذب انا روحتله فعلا بس هو قبلها بعتلي ناس على البيت عندي وكانت عايزة تقت*لني
” طارق هو اللي رد عليا ساعة ما
انا يا حسام!! ، انا هبعتلك ناس على البيت.. يااخي حرام عليك.. اتقي الله حرام عليك
” القاضي رد عليا وقال
عندك شهود على اللي انت بتقوله دا يا حسام؟
= يا فندم هو اللي..
عندك شهود ولا لا؟؟
= لا يا فندم
حكمت المحكمة برفض دعوة حسام سعدالدين الهواري!!
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية قضية خلع الجزء الرابع)
