رواية قضية خلع الجزء الرابع الفصل الحادي عشر 11 بقلم عمرو راشد
رواية قضية خلع الجزء الرابع الجزء الحادي عشر
رواية قضية خلع الجزء الرابع البارت الحادي عشر
رواية قضية خلع الجزء الرابع الحلقة الحادية عشر
استاذ سليم هو مش حضرتك اللي هتشتري الشركة؟
= لا مش انا.. اللي هيشتري الشركة هو استاذ
” فجأه لقيت اللي واقف قدامنا وبيقلع النضارة
استاذ حسام الهواري
” قومت من مكاني وانا مصدوم.. مش مصدق اللي بيحصل بس هو لقيته ابتسم وقال
معاك حق بس معلش اصل الهواري لما يظهر بيكركب الدنيا خالص
= انت اللي اشتريت الشركة
امممم ايوا انا واقولك على الاحلى كمان.. انا اللي خط*فت الواد وانا اللي طلبت منك 5 مليون وانا برضو اللي نصبت عليك.. كدا انت مبقاش قدامك غير المكتب اللي انت اشتريته مني صح.. فاكر يا طارق؟ ، بس عايز اقولك ان المكتب بتاعك حالا البوليس بيحجز عليه بتهمة ايه بقا.. فكرني يا سليم بتهمة ايه
= تقريبا عشان لقو مخدرات في المكتب يا استاذ حسام
” رجع بص ليا تاني
وعلى فكرة انا اللي حطيت المخدرات دي في المكتب.. هو انت فاكر انك هتاخد مني حاجة وانا هسيبهالك عادي كدا ، ناقص بقا حاجة واحدة بس
” لقيته طلع مسد*س و موجهه ناحيتي
يلا نكتب النهاية سوا يا طارق.. بس للاسف انت مش هتكون فيها عشان دورك خلص لحد هنا.. تبقا عبيط لو فكرت للحظة انك هتدوس عليا وانا هخاف منك و اسكت ، العبد لله ملوش كبير
= متتسرعش يا حسام عشان متخسرش كل حاجة
ومين قالك اني هخسر حاجة.. شخص اتهج*م عليا في شركتي وانا كنت بدافع عن نفسي يعني مش هاخد فيها 3 دقايق.. فاكرها دي؟
فلاش باك
يبقا انت اللي حكمت على نفسك ويكون في علمك القضية دي مش هتاخد في ايدي ثانية ، واحد اتهج*م عليا وعلى مراتي وماسك سلا*ح وانا كنت بدافع عن نفسي.. قضية متقفلة مفيهاش غلطة
باك
= عارف يا طارق.. كل حاجة مشيت زي ما انا عايز بالظبط.. كل حاجة حرفيا بداية لما خط*فت اصل انا عرفت انك ناوي تخط*فه و تساومني عليه ف خط*فته انا.. لا ومش بس كدا دا انا خليتك تدفع 5 مليون جنيه.. عارف ايه اكتر حاجة عجبتني ، ساعة ما كنت جايلي البيت وشوفتني وانا سكران
فلاش باك
ابن حرا*م يا طارق والله.. جيت في وقتك تعالى اختارلك واحدة منهم واقعد اشربلك كاس
= انا مش جاي اشرب.. الواد فين يا حسام
واد!! ، ،وايه اللي هيجيب واد وسطنا يعني هيكون معايا اتنين زي القشطة و هجيب واد برضو.. دا انا هجيب توأم
بااك
عارف ايه اكتر حاجة كانت ضايقتني.. البنات اللي كانت معايا.. تخيل كل واحدة فيهم تاخد 5000 جنيه رغم انهم هيمثلو مش هيعملو مجهود يعني ، الأسعار ولعت
= حسام انا ممكن اديلك كل اللي معايا بس سيبني اعيش
انت اللي زيك خطر انه يعيش يا طارق.. عايزني اسيبك تعيش عشان ايه ، قولي سبب واحد وانا هقتنع
= انا لسة عايز اعيش يا حسام.. ابوس ايدك متعملش فيا حاجة
يااااه بقا طارق بيه يكون خايف كدا ومش قادر يقف على رجله.. اظن انت كدا عرفت الفرق بينا يا طارق ، عرفت الفرق بين الراجل و ال… ، بلاش اكمل
” نزل المس*دس وقالي
قدامك دقيقة لو مهربتش من قدامي دلوقتي مش هخليك تخرج من الباب على رجلك
” جريت بسرعة من قدامه ووصلت ل باب الشركة وفتحته وقبل ما اخرج الشارع سمعته بينادي عليا
طارق
” لفيت ورايا وبصتله
اوعا تنسا.. العبد لله ملوش ايه
” كنت واقف مش عارف انطق بأي كلمة.. بس هو زعق وصوته كان عالي جدا
رد.. العبد لله ملوش ايه
= كبير
برافو عليك.. كررها في دماغك بقا عشان متنسهاش وبالنسبة للقضية بتاعت المخدرات متقلقش منها خالص.. انا هشهد معاك وهخرجك منها و دا بجد على فكرة.. مش هسيبك تتحبس يوم واحد
” بعدها فتحت الباب وجريت
” ضحكت على شكله وهو بيجري.. رجعت المس*دس مكانه و بصيت ورايا.. كانت واقفة مبتسمة وقالت
مبروك يا حسام
= الله يبارك فيكي.. شكرا
حسام اوعا تفكر اني كنت عايزة أآذي*ك فعلا
= امال كنتي عايزة ايه
حسام انت اتجننت.. انا مستحيل هفكر اني أاذيك حتى ، انا عملت كل دا عشان اعرف هو ناوي على ايه.. مش هنكر اني طلبت منه انه يخط*ف ابنك بس دا كان عشان عايزاك تتحرك و ترجع حقك و اكبر دليل لما كلمتك.. فاكر يا حسام؟
فلاش باك
موافقة نتجوز بس انا عندي شروط
= موافق على اي حاجة
اسمع الاول جايز متعجبكش
= طب قولي
انا عايزاك تخلص على حسام.. تضيعه.. تخفي اسمه من الوجود نهائي
= حاضر يا فريدة بس كله بوقته و أوعدك ان دا هيحصل خلال أيام.. وانا عارف ايه اللي هيوجع حسام.. مفيش غير ابنه
= هتعمل ايه
هنخط*فه
” بعد ما سمعت منه الكلام دا.. كلمتك يا حسام
خير يا فريدة
= اسمعني يا حسام.. طارق هيخط*ف ابنك ، هو بيخطط ل دا.. خلي بالك منه ومتسيبوش مع نادية
لعبة جديدة من طارق بس المرادي أنتي البطلة فيها
= حسام أنا مبهزرش ولا بعمل عليك لعبة.. صدقني لو ملحقتش ابنك.. طارق هيخط*فه والله اعلم هيعمل فيه ايه
بااك
انا عارفة ان الطريقة اللي كنت عايزة افوقك بيها كانت غلط بس مكنش عندي غيرها.. انا لحد اخر لحظة وانا بضحي بنفسي عشانك يا حسام.. اوعا تفكر اني كنت عايزة اتجوز طارق ولا عايزة أاذيك.. انت عندي اغلى من كدا بكتير أوي
= ومين قالك اني كنت ساكت.. مين قالك ان اللي كنتي شايفاه دا حقيقي
انت مكنتش شايف نفسك عامل ازاي ولا ايه؟.. انت كأنك مكنتش عايش معانا
= كل دا كان جزء من خطتي.. و دا اكبر دليل انك لسة متعرفنيش لو هتكوني فكرتي ان حسام الهواري هيسكت عن حقه
انا عارفة ومتأكدة من دا بس اللي كنت شايفاه قدامي كان ملخبط كل حاجة عندي.. ممكن تكون الطريقة غلط بس صدقني انا مكنش عندي حاجة اقدمها تاني.. دا غير كمان لعبة الرهان اللي خليته يلعبها عشان يخسر كل حاجة لاني كنت عارفة انه طماع وهيكمل عشان يعوض خسارته.. انا عملت كل دا وانت حتى مفكرتش تشكرني
= لا مانا هشكرك دلوقتي و هتاخدي كمان شهادة تقدير.. الصديقة المثالية
عارف يا حسام.. انا كنت متوقعة اننا هنقف الوقفة دي عشان انت هتكون مش مقتنع اني عملت كدا عشانك.. كنت عارفة انك هتعمل كدا وبرضو انا كملت ومفرقش معايا
” مشيت و خرجت من الشركة.. كل حاجة كانت متلخبطة قدامي.. مش عارف اللي انا عملته دا صح ولا غلط بس انا اتفاجأت.. انا مكنتش اعرف كل دا.. كنت فاكر اني هرتاح لا دا انا بقيت مشتت أكتر من الاول..
” بعد ما جريت من الشركة وبقيت بعيد عنها.. وقفت استريح.. مش معقول انا هخسر بعد كل دا.. انا مش هخسر يا حسام حتى لو هيكون فيها مو*تي.. انا هقلبها على الكل.. في نفس اللحظة كلمته
ايوا يا حمدي.. انت فين
= طارق باشا اللي واحشنا .. انا قدامي ساعتين و اكون في البيت.. ايه رأيك تعدي عليا نشرب حاجة سوا
طب انا عايز اقابلك حالا.. انا مش هستناك ترجع البيت
= هو في حاجة ولا ايه يا طارق باشا؟
انا هبعتلك لوكيشن وتجيلي فيه.. متتأخرش
#بقلم : #عمرو راشد
” ركبت تاكسي و روحت على كافيه لان البيت حاليا اكيد البوليس هيكون مستنيني عند البيت.. روحت على هناك الفعل وبعد ساعة ونص بالظبط وصل
خير يا طارق باشا.. كنت عايزني ف ايه
= انت نايم على نفسك يا حمدي انت و رجالتك
محصلش يا باشا.. احنا مركزين كويس اوي
= انت معرفتش ان حسام الهواري طلع عايش
عرفت
= عرفت وقاعد ساكت يا حمدي.. طب ازاي
يا باشا الدنيا كلها مركزة مع حسام دلوقتي يعني مش هينفع نقرب منه
= الكلام دا مش هياكل معايا.. اسمعني يا حمدي انا عايز في خلال يومين تكون خلصت عليه
لا لا دي صعبة.. اهدا وخلينا نفكر.. هو عملك حاجة؟
= ميقدرش يعمل بس انا مش عايزه يبقا موجود.. وجوده بيضايقني
وهنعملها ازاي دي بس يا طارق باشا
= هدفعلك كل اللي انت عايزه.. اللي هتطلبه هتاخده بس تخلصني منه
أوامرك
= قدامك يومين وخلي بالك انا هكون موجود معاك في العملية دي
، خلصت كل اللي ورايا و روحت البيت لقيت.. لقيت نادية قاعدة على السلم
أنتي قاعدة كدا ليه
= مستنياك.. طارق طلقني يا حسام و رماني في الشارع.. ملقيتش مكان اروحه.. لقيت نفسي رجلي بتجيبني على بيتك
” فتحت باب الشقة و دخلنا..
انا اسفة يا حسام بس بجد انا ملقتش غيرك
= لا عادي دا بيتك
” لقيت كوثر خارجة من جوا
حمدالله على سلامتك يا استاذ حسام
= مين دي يا حسام
دي كوثر الدادة بتاعت فؤاد
” اتصدمت وقالت
هو فؤاد جوا؟
” من قبل ما ارد عليها لقيتها بتجري و دخلت جوا على الاوضة
تؤمرني ب حاجة تانية يا حسام بيه؟
= لا شكرا يا كوثر.. تقدري تمشي انتي دلوقتي ولو احتاجتك هكلمك
” شوية و نادية خرجت من جوا وهي حاضنة ابننا
لقيته فين؟
= موضوع طويل.. هبقا احكيلك بعدين.. المهم دلوقتي دا بيتك وبيت ابنك يعني تقدري تقعدي فيه من النهاردة
طب وانت
= متقلقيش عليا انا هعرف اتصرف
طب ما تخليك هنا
= مينفعش يا نادية.. يلا انا همشي ولو احتاجتي حاجة كلميني
” كنت لسة همشي بس لقيتها مسكت دراعي
انا اسفة يا حسام.. اسفة على كل حاجة عملتها بس وحياه ابني هو اللي كان بيطلب مني اعمل كدا
= تمام تمام.. هتلاقي عندك اكل في التلاجة وفي فلوس في الدرج اللي في أوضة النوم.. سلام
” مشيت و روحت على المكتب الجديد بتاعي.. هو يمكن يكون لسة مش جاهز بس مكنش عندي غيره ومش عايز اقعد في فنادق.. دخلت و قعدت على كرسي المكتب و سرحت في كل حاجة.. كل حاجة حصلت في الايام اللي فاتت لقيت اني ضيعت كتير أوي في المعافرة.. ضيعت اجمل سنين عمري في الهروب من حاجات كتير.. مبقتش عارف اندم على اللي فات و لا اخاف من اللي جاي.. لو ندمت يبقا هخاف ادخل في اي مواجهة بعد كدا بحجة اني مش عايز اضيع عمري ولو خوفت من اللي جاي يبقا هكرر نفس الغلط اللي حصل زمان وهكمل بقية حياتي خايف من حاجة انا معرفهاش.. نمت وانا
في مكاني.. لما صحيت كانت العمال اللي بيخلصو تشطيب المكتب وصلو. فضلت واقف معاهم لحد ما خلصو.. بعدها مشيو وانا فضلت قاعد في المكتب.. فضلت على الحال دا لمدة يومين لحد ما في مرة بعد ما العمال مشيو نزلت وراهم و ركبت العربية.. كنت هتمشى شوية في الشوارع بس لقيت فريدة بتكلمني
حسام انت فين
= في الشارع
حاول تستخبى اليومين دول يا حسام.. طارق بيدور عليك وعايز يقت*لك ومش هو لوحده.. معاه حمدي كمان
= كنت منتظر دا اللي يحصل
عشان خاطري يا حسام.. اختفي اليومين دول
= وانتي عرفتي منين
بعد ما مشيت من عندك روحت البيت لقيت البوليس مالي المكان و سألوني عن طارق بس طبعا قولت اني معرفش مكانه لإني فعلا معرفش هو فين.. بعدها طارق كلمني وطلب انه يقابلني ولما روحت قالي
فلاش باك
انا لقيت مكان نقعد فيه اليومين دول
= على فكرة البوليس سأل عنك
عارف.. انتي هتقعدي معايا كام يوم وبعدها هنسافر
باك
ومن شوية قالي انه نازل ولما سألته رايح فين قالي انه رايح ياخد حقه.. بعدها حمدي اتصل بيه قدامي و تقريبا هو هيروحلك على البيت
= نادية!!!!
” قفلت بسرعة المكالمة و سوقت بأقصى سرعة للبيت.. قلبي كان بيدق بسرعة جدا.. لحد ما وصلت ولسة هنزل من العربية لقيت اللي نازلين جري من العمارة وركبو العربية ومشيو ، مشيت وراهم.. كنت سايق بأقصى سرعة.. خرجت المس*دس و بدأت اضر*ب عليهم نار.. قربت منهم وبقيت ماشي جنب العربية بتاعتهم.. كان حمدي هو اللي سايق وبسرعة وجهت المس*دس ناحيته وضر*بته طل*قة.. العربية بدأت تميل يمين وشمال لدرجة انها كانت هتتقلب بس فجأه
لقيت حمدي وقع من العربية وهي ماشية.. حاولت اتفاداه وكملت جري ورا طارق.. كنت بقرب منه و خبطت العربية بتاعته.. كنا احنا الاتنين بنخبط العربيات في بعض.. بدأت اضر*ب عليه نار اكتر من مرة ولكن كانت بدون فايدة.. دوست على البنزين لحد ما بقيت جنبه بالظبط و استغليت اننا على الكوبري و خبطت العربية بتاعته.. العربية فضلت تلف وبعدها وقعت من فوق الكوبري.. نزلت بسرعة و بصيت عليه لقيت العربية بتتقلب يمين وشمال لحد ما انفجرت.. رجعت تاني بسرعة و ركبت عربيتي و رجعت على البيت لقيت الجيران ملمومة.. دخلت بسرعة لقيتهم مغطيين وشها
انتو ايه اللي انتو عاملينه دا.. انتو ازاي تعملو فيها كدا
” قربت منها و قعدت جنبها على الأرض
نادية قومي ردي عليهم.. نادية بالله عليكي ما تعملي فيا كدا.. والله العظيم هزعل منك أوي. قومي يا نادية.. يا نادية
فلاش باك
انا كنت عارف اني هلاقيكي هنا عنده
= عايز ايه يا طارق
فين حسام
= معرفش.. روح دور عليه في حتة تانية يا طارق
طيب عايزك لما تشوفيه فوق تبقي تقوليله امي بسلم عليه عشان مش هيبقا عندي وقت اعملها بنفسي
= فوق فين
” لقيته طلع المس*دس .. الطل*قة خرجت منه و استقرت في قلبي
باك
نادية قومي عشان تربي ابننا.. قومي وأنا هسامحك والله.. والله هسامحك.. ناااادية
فلاش باك
انا عايزة أرفع قضية خلع على جوزي
= وايه الجديد كلهم بييجو هنا عشان يرفعو قضية خلع
.
نعم حضرتك عايزة ترفعي قضية خلع عشان جوزك بيتفرج على افلام
..
بحبك يا حسام
= مستعد اعيش عمري كله معاكي.. و ازود فوقهم عمرين على عمري بس تبقي معايا.. انا محبتش حد قبلك ولا هحب
باااك
” بعد مراجعة الكاميرات وشهادة الجيران اللي كانت بتأكد اني مكنتش موجود ساعة الجريمة.. خرجت منها.. خدت تصريح الدفن و دفنتها.. بدأت اسمع صوت الناس وهي بتدعي.. وامها وهي هتم*وت من العياط عليها.. اما انا كنت واقف ساكت كأني لسة مش مستوعب… الناس بدأت تمشي وانا الوحيد اللي فضلت واقف معاها.. لقيت اللي بيطبطب على كتفي.. لما بصيت لقيتها فريدة ، متكلمتش ولا نطقت بأي حرف ، بعدها بشوية بدأت ادعيلها وقرأت الفاتحة ومشيت.. خرجنا من المقابر انا وفريدة
الله يرحمها يا حسام
= يارب.. أنتي كويسة؟
كويسة.. المهم قولي انت هتعمل ايه
= مش عارف.. انا دلوقتي هروح البيت استريح شوية
طب روح ارتاح.. وانا هعدي عليك بليل مش هسيبك
= مش هينفع يا فريدة
ايه هو اللي مش هينفع
= اللي أنتي عايزاه.. اللي أنتي عايزاه مش هينفع.. أنتي شخصية كويسة جدا جدا وانا حقيقي مشوفتش اجدع منك بس صدقيني مينفعش.. انا مش هقدر اظلمك معايا.. انا قلبي اتفتح مرة ومش هيتفتح تاني.. انا اسف
انا ممكن استناك يا حسام.. ممكن استناك العمر كله
= وانا مش هكرر اللي حصل زمان يا فريدة ، العمر بيجري وانا مستاهلش انك تضيعي عليا 7 سنين كمان.. يمكن لو احنا في دنيا تانية او في زمن تاني كان زماننا مع بعض ، اما حاليا انا منفعش لأي حاجة.. أنتي كمان لازم تبدأي حياتك من جديد وانا مش هختفي.. انا هكون موجود في اي وقت تحتاجيني فيه بس صحاب يا فريدة.. مش هينفع أكتر من كدا
” لقيتها ابتسمت
زي ما تحب.. صحاب يا حسام!!!
” حقيقي القدر دا غريب أوي.. جايز انا ونادية مش مكتوببن لبعض عشان كدا حصلت كل المشاكل دي.. ماهو مفيش أي تبرير تاني غير دا.. المرة الوحيدة اللي فتحت قلبي فيها هي أكتر مرة اتوجعت فيها عشان كدا مكنش لازم اكرر غلطتي.. انا هعيش مع ابني.. الحاجة الوحيدة اللي باقية من نادية عشان كدا متأكد اني عمري ما هقدر انساها.. بيقولو الحب الاول مبيتنسيش وهما عندهم حق هو بيكون محفور جوانا حتى لو بعيد عننا مسافات طويلة.. اما انت يا طارق ف انا نفسي اشوفك قدامي دلوقتي عشان اسألك سؤال واحد بس.. كانت اخرتها ايه يا طارق.. عملت كل دا عشان ايه.. استفادت ايه.. ولا اي حاجة.. ربنا يرحمك ويسامحك.. اما أنا بقا ك حسام الهواري ف انا رجعت من الموت عشان حد غيري هو اللي يموت.. يارتني ما رجعت ولا ظهرت.. كان لازم اعرف ان الميت مينفعش يصحا تاني!!
تمت..
لقراءة الرواية كاملة اضغط على : (رواية قضية خلع الجزء الرابع)
