رواية قتل بدافع الحب الفصل الأول 1 بقلم عمرو راشد
رواية قتل بدافع الحب البارت الأول
رواية قتل بدافع الحب الجزء الأول
رواية قتل بدافع الحب الحلقة الأولى
براحة شوية شوية شوية علينا يا شيخة
= براحة! ، براحة ايه ياعم انت وهو انا جيت جنبك اساسا
ايه يا أميرة أنتي نستيني ولا ايه ومين اللي معاكي دا؟
= انا جوزها يا استاذ ، انت اللي مين؟
” عارفين.. ، من ضمن التصرفات الغبية اللي البني ادم بيعملها هي انه يضيع حد بيحبه منه ، مش شرط انه يخونه ، يضيعه بتصرفاته ، عايز اقولك اني بنصحك وأنا اساسا ضيعت من ايدي حد بيحبني ، اكيد دلوقتي السؤال بيدور في بالك وبتقول
• طب ما كنت تنصح نفسك احسن
” ساعتها هرد عليك واقولك اني ملقتش حد ينصحني ، أي حاجة بنتعلمها في الحياه بيكون ليها مقابل ، ليها تمن ، وأنا عشان اتعلم النصيحة دي دفعت تمنها بس التمن كان صعب أوي عليا ، عايز تعرف ايه هو التمن اللي انا دفعته؟ ، هكيلك
انا مبقتش مستحملة تصرفاتك يا ياسر ، انت بقيت مش شايفني في حياتك ، انا مبقتش موجودة اساسا عندك ، انا عايزة اعرف هو انا لازمتي ايه لما انت طول الوقت سايبني ومبتفكرش فيا كدا
= بس انا مسبتكيش يا أميرة ، انا لما بسيبك ببقا يإما مع صحابي او في شغلي او مشغول في اي حاجة تانية
انت اهو بنفسك رديت ، تقدر تقولي بقا انا فين من الحاجات اللي انت مشغول فيها دي
” سكت ومعرفتش ارد
ياسر لو سمحت كل واحد مننا يروح في طريق
= بس انا…
انت مبقتش تحبني يا ياسر ، حتى نظرتك ليا اتغيرت ، فاكر اول ما ارتبطنا كنت بشوف في عنيك نظرة عمري ما نسيتها ، نظرة ليها معاني كتير أوي ، اللمعة اللي في عنيك اختفت تدريجيا كأن حبك ليا بيقل مع الوقت رغم اني مفتكرش اني قصرت في حقك ورغم دا انت قصرت ومبقتش شايفني اساسا ف يبقا ملوش لازمة وجودي..
” اكتشفت ان لما تبقا الحاجة بعيدة عننا بنكون بنتمناها من الدنيا وكأن دي طوق النجاه بالنسبالنا واول ما بتقرب بتبقا عادية جدا ، وهو دا اللي حصلي بالظبط ، لاني كنت بحب أميرة جدا واول ما بقت معايا خلاص الموضوع بقا عادي بالنسبالي ، لحد ما فوقت على جملتها وهي بتقول
• انا مش قادرة اكمل معاك
” ساعتها كان كل شئ اتغير ، حياتي اتحولت ل ضلمة ، مبقتش حابب اعمل اي حاجة ، حتى صحابي اللي كنت ساعات بسيبها بالساعات عشانهم مبقتش اقعد معاهم ، اكتفيت ب اني اقفل على نفسي باب اوضتي وبس ، قاطعت الاكل والشرب ، حاولت كتير جدا اني اتصل بيها او اقابلها بس كانت مش بتقبل وكأنها فقدت الامل فيا ، كل الطرق اللي تخليني اوصلها بقت مقطوعة ، فضلت على الحال دا لمدة 3 شهور ، 3 شهور وانا معرفش عنها حاجة ، 3 شهور وانا هموت من الزعل عليها ، قلبي بيتعذب حرفيا ، هموت ، انا عارف اني غلطان بس انا نفسي في فرصة تانية ، نفسي في فرصة واحدة بس ، فرصة واحدة و دا حقي ، انا اتغيرت بس طبعا كان بعد فوات الأوان ، وفي يوم لقيت واحد من صحابي جاي يزورني وطلب مني اني انزل معاه ونتمشى شوية عشان اغير جو ، طبعا رفضت في الاول ، بس بعد محاولات منه وافقت ، ماهو انا مش عايز ابقا لوحدي ، مش عايز اخسر كل حاجة يمكن على الأقل اعرف اتعافى ، وبالفعل نزلنا و اتمشينا ، و احنا بنتمشى شوفتها ، شوفتها تاني بس مش لوحدها ، كانت معاها واحد ماشي جنبها.. ، قربت عليها بتلقائية وكأن جسمي هو اللي بيحركني ناحيتها
ازيك يا أميرة
” بصتلي بعدم اهتمام
ايه دا ياسر ، عامل ايه
= انا كويس ، مين دا
اه نسيت اعرفك ، سليم خطيبي
= خطيبك!! ، خطيبك ازاي يعني
لسة مش خطيبي رسمي ولكن يعني هناخد الخطوة دي قريب ، صح يا سليم؟
” بصتله وهي بتضحك ، كانت نفس ضحكتها معايا وهي مبسوطة ، وسط مانا سرحان وباصصلها لقيت الشخص اللي معاها بيكلمني
انت بقا ياسر؟
= ايوا انا ياسر
اصل اميرة حكتلي عنك
= وقالتلك ايه عني
كل خير ، يلا يا اميرة عشان نلحق معادنا
= يلا
باي يا ياسر
” مشيت وخدت قلبي معاها ، اول ما شوفتها كأن الحياه رجعتلي لمدة 4 او 5 دقايق وبعد كدا رجعت تاني للحالة اللي كنت فيها ، انا عارف اني غلطان بس انا نفسي اصلح الغلط دا ، والله نفسي وعشان كدا اتصلت بيها
الو
= مين
نسيتي صوتي؟
= ماهو اكيد انت مش عمرو دياب عشان تزعل اني نسيت صوتك
يااه لسة بتحبي عمرو دياب ، عارفة يا أميرة في يوم من الأيام كنت اهم من عمرو دياب عندك
= اممم يبقا ياسر ، عايز ايه يا ياسر
بطمن عليكي
= انا بخير وبعدين مانا لسة شايفاك ، مظنش ان اتصالك مهم يعني
مهم بالنسبالي انا
= طيب واعتقد دلوقتي انك اطمنت ، بعد اذنك انا هقفل
أميرة انا عايز اقابلك
= عايز ايه! ، تقابلني ازاي يعني
محتاج اتكلم معاكي
= مفيش مواضيع بينا عشان نتكلم فيها يا ياسر
بعد اذنك ياريت توافقي
= لا مش هوافق ، انا دلوقتي بقيت مع شخص تاني يعني مينفعش ااجي و اقابلك
افتكري اي حاجة حلوة انا عملتها ، اخر مرة يا أميرة والله وبعد كدا مش هتشوفيني تاني ولا هظهر في حياتك بعد كدا
” وافقت و روحت في المعاد اللي اتفقنا عليه ، كنت لابس أشيك طقم عندي ، حاطط البرفيوم اللي هي بتحبه ، لبست الساعة اللي كانت جيباها ليا في عيد ميلادي الأخير ، الساعة اللي كانت دايما تسأل عليها لاني مكنتش بلبسها خالص بس دلوقتي مبقتش تفارقني
عايز ايه بقا
= مبسوطة؟
انت جايبني عشان تسألني السؤال دا
= ايوا ، ردي من فضلك
اه مبسوطة
= اللي انتي عملتيه دا اسمه خيانة يا أميرة ، لما أكون لسة بحبك ومش عارف انساكي وأنتي تروحي تعرفي حد تاني وتخرجي معاه تبقا دي خيانة
خيانة ايه اللي بتتكلم عنها دي ، انا قولتلك اللي بينا انتهى يعني انا مبقتش معاك يعني سيبنا بعض يبقا فين الخيانة بقا
= ايوا بس انا لسة بحبك
دا عندك انت إنما انا لا
= يعني دا اخر كلام عندك
اه اخر كلام
= طب لو سمحتي انا محتاجك تيجي معايا تاخدي كل حاجتك ، أي حاجة أنتي كنتي جيباها خديها
مش عايزاها ، ارميها
= خديها انتي و ارميها
وهو ايه اللي هيفرق
= لا تفرق ، انا مش هقدر ارميها ، مش هقدر ارمي حاجة أنتي كنتي جايباها ، ولو خليتها عندي انا هتعذب ، الافضل انك تاخديها
ماشي ، هي فين
= تعالي استني تحت البيت وانا هطلع اجيبها و انزل
” خدتها معايا لحد البيت ، خليتها تستناني تحت وانا كنت فوق في الشقة بجيب كل الهدايا بتاعتها و كل حاجة كانت جيباها ، بعد شوية نزلت و خدت مني الحاجات ومشيت ، بعد كدا اخبارها اتقطعت ، مبقتش عارف عنها حاجة لمدة 6 شهور ، سألت عنها الناس كلها حتى خطيبها مكنش يعرف عنها ، أميرة اختفت تماما ، بس مختفتش من احلامي لانها كانت بتجيلي كل يوم في الحلم ، في الاول بتظهرلي بملامح ملاك ، بتكون زي القمر حرفيا بس بعدها مباشرة وشها بيتحول و ملامحها تتبدل ، ملامحها بتكون غضبانة جدا وفجأه بتهجم عليا ، كنت كل يوم بحلم بنفس الحلم ، ولكن الأشخاص كانت بتتغير ، فكرت اروح ل دكتور نفسي ولكن انا مكنتش بعرف اثق في حد لدرجة اني احكيله كل حاجة عني بالطريقة دي لحد ما عدا سنة ، كنت في حفلة عند واحد صاحبي ، كنت واقف بتكلم مع شخص وفجأة لفيت وشي شوفتها تاني ، بعد كل الغياب دا وقلبي رجع يدق تاني ، كان شكلها احلى من الاول بكتير ، ساعتها مكنتش قادر اتحكم في نفسي ، روحت ووقفت قدامها
براحة شوية شوية شوية علينا يا شيخة ، ايه الجمال والحلاوة دي اقسم بالله
= انت مجنون يا ابني ولا ايه
مانا قولت براحة علينا شوية بقا
= براحة! ، براحة ايه يا عم انت هو انا جيت جنبك اساسا
أنتي نستيني ولا ايه يا أميرة ، لحقتي تنسيني بالسرعة دي
= انا معرفكش عشان أنساك اصلا ، انت مين
في ايه يا أميرة ، ومين الشخص اللي معاكي دا
= انا جوزها يا استاذ ، حضرتك مين بقا
انا… ، أميرة كانت تعرفني من فترة و..
= ثواني بس قبل ما تكمل ، أميرة مين
أميرة اللي واقفة جنبك دي
= بس دي مش أميرة ، شكلك غلطان
مستحيل ، انا مش ممكن انسا ، ازاي دي مش أميرة ، انا متأكد من اللي بقوله ، انا مش مجنون
” في اللحظة كان صوتي بدأ يكون عالي وساعتها هي اتكلمت و مسكت اللي بتقول عليه جوزها من ايده و استأذنته عشان تتكلم هي
لحظة يا ادهم بعد اذنك
” بعدها بصتلي وقالت
انت اكيد قصدك على أميرة اختي مش انا
= اختك.. اختك ازاي ، أميرة معندهاش اخوات
لا عندها اللي هي انا ، انا امنية ، انت ياسر صح
= اه ياسر ، انتي تعرفيني؟
لا معرفكش شخصيا بس كانت دايما بتحكي عنك وقبل ما أميرة تختفي قالتلي انها سابتك ، صح كدا؟
= طب وأميرة ، أميرة فين
محدش عارفلها طريق
= طب ازاي ، ازاي انتي اخت أميرة
اختها التوأم ، على فكرة هي عمرها ما كانت بتقول لحد انها عندها اخت توأم ، محدش كان يعرف غير اهلنا وبس
” مشيت من الحفلة وانا مصدوم من كل اللي انا سمعته ، أميرة عندها اخت وتوأم كمان طب ازاي هي محكتليش قبل كدا ، ليه خبت عليا.. مكنتش مصدق حاجة من اللي حكتهولي ، روحت البيت ، اتصلت ب واحد صاحبي اللي هو كان صاحب الحفلة و جيبت منه رقم امنية ، فضلت افكر لو اتصلت هقولها ايه ، معنديش حاجة اقولها ، عدا يومين لحد ما جاتلي فكرة
الو
= ازيك يا مدام أمنية
الحمدلله ، مين معايا
= انا ياسر اللي قابلتك في الحفلة ، فاكراني؟
اه اه فاكراك
= كان في حاجات كانت أميرة جيباها ليا ، واعتقد ان الحاجات دي متنفعش تكون موجودة دلوقتي
طب ما كنت ترميها او تديها لأي حد
= أميرة قالتلك أنها سابتني بس مقالتلكيش اني كنت لسة بحبها وحاولت ارجع ليها كتير وهي كانت بترفض ، انا مش هقدر ارميها او حتى اشوفها مع حد ، الأحسن انك تاخديها وتعملي فيها اللي أنتي عايزاه…
” وفي الاخر هي وافقت و بعتلها العنوان وجاتلي تحت البيت ، مكتنش عارف انزل بالحاجات اللي معايا كلها لانها كانت كتير ، طلبت منها انها تطلع وتساعدني وفعلا جات وبقت معايا في الشقة ، عرضت عليها انها تشرب حاجة لكن هي رفضت ، بعد محاولات كتير أوي مني وافقت ، عملتلها نسكافيه وقعدت معاها
بس غريبة ان اميرة متقولش ان عندها اخت توأم
= زي ما قولتلك محدش كان يعرف غير اهلنا
طب ليه
= اهلنا هما اللي قررو كدا من واحنا صغيرين ، تحسهم كانو خايفين من الحسد ، بصراحة معرفش عملو كدا ليه
طب و أميرة اختفت ازاي
= كانت نازلة في يوم حتى مكنش اعرف رايحة فين وهي مقالتش ، من ساعتها محدش شافها
مش جايز تكون هربت؟
= هربت مع مين
مع سليم مثلا
= سليم نفسه لسة موجود لحد دلوقتي ، يعني لو هي هربت كان زمانه هرب معاها
جايز هي كانت تعرف حد تاني غير سليم
= انا اختي متعملش كدا يا ياسر ، وواضح انها كان عندها حق لما سابتك ، عن اذنك
” سابت الكوباية من ايدها وحاولت تقوم بس مش عارفة ، فضلت قاعدة مكانها بتحاول تظبط اتزان جسمها ، واضح ان تأثير المخدر اللي انا حطيته اشتغل ، بدأت تغيب عن الوعي تماما ، بدأت اربطها و اجهز العدة اللي هشتغل بيها وقعدت مستنيها لما تفوق ، تأثير المخدر مكنش قوي وبسبب دا هي فاقت بعد ساعة تقريبا ، كنت محتاج مخدر ضعيف عشان اول ما هي تغيب عن الوعي ابدأ انا اربطها وبعد كدا استناها تفوق و يبدأ الحوار
اهه انا فين
= صباح الخير ياريت تكوني نمتي كويس
انت عملت فيا ايه
= عملت الصح طبعا
انت.. ، انت رابطني كدا ليه ، فكني
= افكك!! ، دا انا مستني اللحظة دي من بدري و لما تيجي تقوليلي فكني
سيبني امشي ، انا عايزة امشي
= انتي مش هتتحركي من هنا يا أميرة ، مش هتمشي ، أنتي بتاعتي انا وطالما انتي مش عايزاني معاكي يبقا أنتي متستاهليش تعيشي يا أميرة ، انتي خونتيني ، وافقتي اني اتعذب بعد ما بعدتي عني وفي نفس الوقت كنتي أنتي مستمتعة ب حياتك الجديدة ، سبتيني لحد ما كنت هموت وعمرك ما فكرتي فيا يبقا تعيشي ليه ، معندكيش سبب تعيشي عشانه يا أميرة
انا مش أميرة ، انا مش أميرة ، قولتلك أميرة مبقتش موجودة ، افهم بقا
” قومت وحطيت شريط لزق على بوقها بحيث محدش يسمع صوتها ، مسكت السك*ينة وعملت جر*ح في بطنها ، كانت بتصرخ من الوجع لكن صوتها مكتوم ومش طالع ، فجأه حسيت ب حد بيحاول يفتح باب الشقة لحد ما كسره ، خرجت برا و لسة السك*ينة في ايدي ، هجم عليا و بدأ يضر*ب فيا لحد ما وقعت على الأرض لكن هو كان مكمل ضرب فيا لحد ما مبقتش حاسس بأي حاجة حواليا ، لما فوقت كنت في أوضة ضلمة ، متكتف ، مش شايف أي حاجة ، مكنش فيه غير نور بسيط جاي من برا ، الباب اتفتح و دخل شخص ، حاسس ب خطواته بتقرب ناحيتي ، النور اشتغل في الأوضة ، لقيت نفسي قاعد على الأرض و ايدي مربوطة ، الشخص المجهول دا جه وقعد قدامي و قالي
أميرة فين يا ياسر
= معرفش مكانها
عملت ايه في اميرة ، رد احسنلك يا ياسر ، انت خلاص لبست التهمة ، كل حاجة ضدك ف ياريت بقا تختصر الطريق وتقولي هي فين
= اميرة اختفت من سنة ، انا بدور عليها ومش عارف الاقيها ، لو لقيتها قولها اني بحبها وعايزها ترجع ، قولها انها لو رجعت انا هتغير ، هتغير وهبقا انسان جديد ، قولها متتأخرش عليا عشان مزعلش منها لاني لو زعلت منها هعمل فيها زي ما عملت قبل كدا
ايوااا ، ايه اللي انت عملته فيها قبل كدا
= أميرة خانتني وانا كان لازم ااخد حقي ، انا كنت بحبها وهي سابتني اتعذب ومشيت ومفكرتش ترجع تسأل عني ولو لمرة واحدة ، يبقا كانت تستاهل بقا ولا لأ
طبعا كانت تستاهل بس انا نسيت انت عملت فيها ايه ، احكيلي من الاول يمكن افتكر
فلاش باك
خيانة ايه اللي بتتكلم عنها دي ، انا قولتلك اللي بينا انتهى يعني انا مبقتش معاك يعني سيبنا بعض يبقا فين الخيانة بقا
= ايوا بس انا لسة بحبك
دا عندك انت إنما انا لا
= يعني دا اخر كلام عندك
اه اخر كلام
= طب لو سمحتي انا محتاجك تيجي معايا تاخدي كل حاجتك ، أي حاجة أنتي كنتي جيباها خديها
مش عايزاها ، ارميها
= خديها انتي و ارميها
وهو ايه اللي هيفرق
= لا تفرق ، انا مش هقدر ارميها ، مش هقدر ارمي حاجة أنتي كنتي جايباها ، ولو خليتها عندي انا هتعذب ، الافضل انك تاخديها
ماشي ، هي فين
= تعالي استني تحت البيت وانا هطلع اجيبها و انزل
” خدتها معايا لحد البيت ، خليتها تستناني تحت وانا كنت فوق في الشقة بجيب كل الهدايا بتاعتها و كل حاجة كانت جيباها ، شوية وكلمتها وطلبت منها انها تطلع بحجة ان الحاجات كتير وأنا مش عارف اجيبها كلها ، لما وافقت تطلع كنت محضرلها الشاي بالنعناع اللي بتحبه ، صممت عليها انها تشربه وبعد مدة مش كبيرة وقعت على الأرض من تأثير المخدر و ساعتها قررت انتقم منها وبدأت اقط*ع فيها ، قط*عت كل حتة في جسمها و روحت دفنتها في مكان بعيد في الصحرا ، كانت تستاهل اللي حصلها زي يارا و سلمى و امنية
= هو كان في حد غيرها
كانو بيكدبو عليا ، فاكراني مش هعرفها لما تغير اسمها ، وفي كل مرة كنت بقت*لها
= وامنية ، ايه اللي حصل لما كنت معاها
فجأه دخل عليا شخص وبدأ يض*رب فيا و ساعتها محستش بنفسي غير وانا هنا ، معرفش وصل عندي ازاي أصلا
= عايز تعرف الشخص دا مين ، دا يبقا جوز امنية ، الأستاذ سليم وبرضو هو اللي كان بيضر*بك وهو اللي بلغ عنك ، وصل عندك ازاي؟ ، امنية قبل ما تجيلك كانت بعتتله رسالة انها عندك و بعتت لوكيشن للمكان اللي هي فيه ، والمكان دا هو بيتك طبعا يعني انت معندكش اي فرصة للهرب
” بعد ما سمعت منه الحكاية كلها حولته ل مستشفى الأمراض النفسية ، دا مجنون ، لا يمكن يكون شخص طبيعي ، وساعتها القضية اتقفلت وبعد فترة الدكتور اللي كان بيتابع حالته اتصل بيا وحذرني وقالي..
يا فندم المريض اللي انت بعته دا مش طبيعي خالص ، دا كان هيق*تل الممرضة بتاعته من يومين
= هو حالته ايه
على حسب ما فهمت انه كان بيحب واحدة اسمها أميرة وحصلت بينهم مشاكل و انفصلو ، ساعتها ياسر جاتله حالة اكتئاب و رفض يصدق اللي حصل ، وعلى حسب كلامه انه لما شافها في الحفلة مخه مقدرش يستوعب انها عايشة حياتها مع واحد تاني وهو لسة بيحبها ومش قادر ينساها ، عقله مكنش قادر يستوعب دا وبدأ يصورله انها بتخونه وعشان كدا قت*لها وبرضو عقله رفض يصدق انه عمل كدا فيها ، اي واحدة كان بيتعرف عليها كان بيشوفها كأنها أميرة وعشان كدا قت*لهم كلهم ، الراجل دا حالته صعبة يا فندم ، الشخص دا لازم يمو*ت ، دا حتى الممرضة هجم عليها وكان هيقت*لها ، صدقني يا هشام الراجل دا حرفيا متعذب وهو عايش..
” قررت اعمل حاجة يمكن اعرف اريحه من اللي هو فيه ، بعتله جواب
” عامل ايه يا ياسر ، وحشتني أوي وعارفة ان انا كمان وحشتك ، انا مش وحشة يا ياسر زي ما انت فاكر بالعكس دا انا محبتش غيرك ، بس انت ظلمتني ، معقول هونت عليك تعمل فيا كدا بس تعرف.. ، انا مسامحاك ، مسامحاك وعايزاك تجيلي ، المكان هنا حلو أوي ، مش ناقصه حاجة غيرك ، مستنياك.. ، حبيبتك أميرة ”
” بعد يومين تليفوني رن وبلغوني ان ياسر انت*حر ، قبل ما ينت*حر كانو كل ما يدخلو عليه الأوضة يلاقوه بيعيط ، كان رافض ياكل او يشرب بسبب إحساسه بالندم ، اعتقد انك دلوقتي مرتاح يا ياسر ، اعتقد انك دلوقتي في مكان أحسن لكن كل اللي اتمناه ان أميرة تسامحك.. ”
” لو الاسكريبت عجبك سيب كومنت لطيف 💜”
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية قتل بدافع الحب)
