رواية قبل تنفيذ الاعدام بدقائق الفصل الثالث 3 بقلم عادل عبدالله
رواية قبل تنفيذ الاعدام بدقائق الجزء الثالث
رواية قبل تنفيذ الاعدام بدقائق البارت الثالث
رواية قبل تنفيذ الاعدام بدقائق الحلقة الثالثة
ماما وقفت جنبي ومش سابتني ابدا لحد ما اطمنا ان ربنا نجاه وانكتب له عمر جديد .
حسيت ان لسه في أمل في الدنيا لكن كانت الصدمة لما عرفت ان الكسور اللي حصلت لعلاء هتخليه مش يخرج من المستشفي قبل شهور طويلة وانه مش هيقدر يمشي قبل سنتين علي الاقل وبالتأكيد هيكون عنده اعاقة في رجليه بعد كده !!!
كانت صدمة قوية جدا بالتأكيد هتغير كل حاجة في حياتنا !!!!!!
فضلت مع علاء في المستشفي كتير ، كنت بهون عليه وبخفف عنه شعوره بالاحباط واليأس ، لحد ما الفلوس اللي معانا خلصت .
كان الحل الوحيد اني لازم اشتغل ، قعدت مع علاء وقولتله اني لازم اشتغل علي الاقل لحد ما يخف ويشوف هيقدر يشتغل تاني ولا لاء .
علاء رغم انه كان رافض مبدأ شغلي قبل كده لكنه وافق مرغم علشان الظروف الجديدة بعد الحادثة .
قبل كده كان دايما لما اكلمه عن الشغل يقولي : انتي يا حبيبتي بسكوتاية ومش عاوز ابهدلك في الشغل ، انا عاوزك تقعدي في البيت ملكة زمانك .
وكنت ببقي عارفة انه بيرفض بسبب الغيرة لكن دلوقتي هو وافق مضطر علشان الظروف .
بدأت ادور علي شغل وقدمت في اكتر من شركة ولحسن الحظ اتقبلت في شركة كبيرة بمرتب خيالي مكنتش احلم به . كان تقريبا ٣ اضعاف مرتب علاء قبل الحادثة .
كلنا كنا فرحانين اوي بشغلي في الشركة دي علشان المرتب الكبير ده .
واتفقنا اني هسيب البنتين عند ماما كل يوم الصبح وارجع اخدهم وانا راجعة من شغلي .
مرت الايام الاولي في الشغل و كان كل يوم لما ارجع من الشغل اعدي علي علاء في المستشفي قبل ما اروح البيت وهو يسألني : في حد ضايقك في الشغل ؟ مفيش راجل عاكسك ولا قالك كلمة كده ولا كده ؟ وانا دايما كنت برد عليه ان كل زمايلي في الشغل ناس محترمين جدا وان اغلب اللي بتعامل معاهم معاملة مباشرة بنات وسيدات علشان يبقي مش قلقان عليا .
كنت بقوله كده بالرغم من اني من اول يوم ليا في الشركة وانا ملاحظة نظرات اعجاب المدير بيا ، لكن كنت عاوزاه يكون مطمن خصوصا اننا مغصوبين علي اني اشتغل وخصوصا كمان ان مرتبي في الشركة دي مش اضمن اني اخد نصه في اي شركة تانية .
مرت ايام واسابيع وتطورت نظرات اعجاب المدير بيا لمعاكسات في الاول كانت معاكسات بسيطة مش ملحوظة اوي وكنت بعمل نفسي مش واخده بالي ، لكن بعد كده كل يوم كانت معاكساته بتزيد وانا مش عارفة اتصرف ازاي ؟!!!
كنت خايفة اصده واخد منه موقف قوي يكون سبب اني اسيب الشغل .
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية قبل تنفيذ الاعدام بدقائق)
