رواية البر التاني الفصل السادس والستون 66 بقلم لولو محمد
رواية البر التاني الجزء السادس والستون
رواية البر التاني البارت السادس والستون
رواية البر التاني الحلقة السادسة والستون
فى سرايا الزنايته
مختار يدخل بعربيته و خليفه يقفل البوابه عبد الله قاعد بيزاكر تحت شجره يقوم يقف
مختار / ازيك يا دكتره
عبد الله / محتاس
مختار يبتسم
عبد الله / انا مش فاهم نص اللى فى الورق و قريت الكتاب و فتحت النت و حاولت بكل الطرق و برده مفيش فايده
مختار/ كل حاجه فى اولها صعبه و انت قدها و مره فى مره هتتعلم و تتحسن اللى ما تفهموش دلوقت احفظه و مع الوقت هتفهمه
عبد الله / ما انا شكلى هعمل كدا امين كان قال هيشوفلى حد من المعيدين يشرحلى بس هو اكيد انشغل
مختار/ انا هكلمه … اختك فين
عبد الله / فى الجيم ما انصحكش تخشلها
مختار يبتسم
مختار / هنخاف و لا ايه … انا جايب ورد
عبد الله / لا كدا ادخل و انا هدعيلك
مختار / ههههههههههه سلام
مختار يرجع العربيه و يطلع شنطه هدايا و يدخل السرايا يقابل ناصر
ناصر / ايه ده انت وصلت حمد الله على السلامه تعال عاوزك
مختار / هشوف بس
ناصر / فى حوار مهم اوى لازم نتكلم نتكلم فيه قبل ما الجوارحه يجوا
مختار / موضوع ايه ده
ناصر / هقولك فى المكتب
ناصر يدخل المكتب و مختار وراه
………………………
فى فيلا فيرا
فيرا قاعده بتضحك مع ادواردوا و يشربوا و يخبطوا كاساتهم فى بعض راجل يدخل و هو باصص فى الارض
فيرا / وات ( ايه ؟)
الراجل يجيب الريموت و يشغل التليفزيون
المذيعه / و بروتوكول العلاج ده اى حد يقدر يتبعه فى البيت حضرتك
صوت الراجل / ايوه طبعا و احنا زودنا رقمين للخط الساخن للمتابعه مع الحالات فى حاله احتياج اى من الحالات لاشراب طبى على مراحل التخلص من البى كاى يا فندم
فيرا / ايمبوسيبول .. زى ار لاينج ( مستحيل … بيكدبوا )
ادواردوا يبص لفيرا و تبصله
صوت الراجل / الطريقه دى اثبتت نجاحها بنسبه شفاء ميه فى الميه و اى كانت الاعراض الجانبيه فهى مؤقته لعده ايام و بعد كدا بيرجع المواطن يمارس حياته عادى جدا كان السم ده ما دخلش جسمه من الاساس
فيرا / زاى بروت زيز اون زيمسيلفز ( هم اللى جابوه لنفسهم )
فيرا تبص لادواردوا ادواردوا يمشى و هى هتنفجر من الغضب
……………………………
فى شقه رشيد
رشيد قاعد بيتفرج على التليفزيون بياذاذ لب و سمر قاعده جنبه
رشيد / اراهنك ان فيرا كسرت نص الفيلا دلوقت
سمر / تفتكر هتسكت
رشيد / استحاله اكيد هتعمل مصيبه بس اى كان اللى هتعمله مش هيبقي حاجه جنب اللى هى فيه دلوقت مركز قوتها انضرب فى مقتل الناس اللى هى مستعبداهم ممكن يخفوا يعني بقت زيها زى اى رئيسه عصابه
سمر / ايوه بس هى معاها فلوس كتير و بتاجر فى كل حاجه
رشيد / ايه المميز فيها برده ما المجرمين ما فيش اكتر منهم و بعدين الف قولى مليون من له تار عندها دلوقت
سمر / تفتكر الناس هتحاول تخف فعلا فى مدمنين مخدرات كتير ما بيحاولوش يخفوا
رشيد / اللى ياكل على درسه ينفع نفسه
سمر / ربنا يستر
………………………
فى مكتب الزنايته
مختار / بس انا مش موافق
ناصر / سبحان مغير الاحوال دا انا اللى كنت بقولك لا
مختار / مهو بعد اللى حصل لازم افهم عرفت منين اننا بنتعامل مع نبيل و عرفت منين انى رايحله دا هو ذات نفسه ما كانش يعرف
ناصر / يا ابنى احنا مش ولاد امبارح فى السوق ده و اللى يسال ما يتوهش
مختار / يعني ايه يعنى هو كان مستنيني يعني مجهز كل حاجه و الجى بى اس و البلطجيه و قاعدين مستنيني يعني
ناصر / عاوز تقول ايه بينا خاين مثلا ماشي مين كان يعرف الحكايه دى قولى كام واحد كان عارف انك مسافر مصر و كام واحد من الكام واحد عارف انك هتروح لنبيل
مختار/ ما اكيد هنروحله ما دام عمال يماطل فى الفلوس
ناصر / و هو رجالتنا اللى هناك قصروا فى حاجه يا ابنى دا كيد حريم بتلففك حوالين نفسك
مختار / على فكرة مش شرط يكون الخاين حد مننا ما يمكن التكنولوجيا السو دى
ناصر / و ماله فتوح لما يجي نتكلم معاه و نشوف يقدر يعمل ايه
مختار / تفتكر ممكن يكون عندها حد اشطر من فتوح
ناصر / ممكن ليه لا بس احنا ما نقدرش نامن غيره اخاف اجيب حد من بره بدل ما يكحلها يعميها
مختار / فى دى معاك حق الواحد ما عدش عارف يثق فى مين خلاص
ناصر / اطلع ارتاح شويه قبل الناس ما يجوا و ما تفكرش فى حاجه و فى القاعده اسمع للاخر و بعدين اتكلم
مختار / حاضر
ناصر / يلا روح شوف وراك ايه
مختار يبتسم و يمشي و ناصر عينه على الشنطه اللى فى ايده و مبتسم
……………………
فى اوضه فاتن
مريم بتساعد فاتن فى فرش السرير فاتن تنام عليه
مريم / انا كدا خلصت هتعوزى منى حاجه تانى
فاتن / ما اتحرمش … شكله واد ما بيبطلش فرك
مريم / يفرك براحته بس هو يجي بالسلامه
فاتن / عقبالك يا بت يا مريم
مريم / يووووه لسه بدرى اوى
فاتن / يا بت قولى امين ما تبقيش طوره كدا
مريم / ههههههههههه هو فى حاجه اسمها طوره
فاتن / اه انتى … تعالى اقعدى
مريم تجرى تقعد جنبها
فاتن / اخبار الحب ايه
مريم / بيزاكر كل ما اجى اقرب منه الاقيه ماسك الورق و ممقق عينه فيه يصعب عليا اعطله اسيبه و امشي من بعيد
فاتن / الواد ده جدع
مريم تبتسم سماح تدخل
سماح / الله الله طبعا ليكوا حق تقعدوا و تتودودا و تسيبونى انا مدعوكه بطولى فى شغل البيت
فاتن / قدها و قدود يا سمسمه
سماح / لا يا اختى انا صحتى ما بتجبش … اتاخرى يا بت
سماح ترمى نفسها على السرير
فاتن / و انتى اخبار الحب ايه انتى راخره
سماح / زفت انا عارفه ايه البخت المنيل ده يا اخواتى
مريم / انتوا لحقتوا تتخانقوا
سماح / نتخانق ايه هو مغاورى فى زيه انما هنعمل ايه فى العقربه عمته دى
فاتن / اعزريها جرحها لسه جديد
سماح / كلمته الصبح و كان زى الفل جيت اكلمه من شويه لقيته مقفول و مش قادر يتكلم و لما ضغط عليه قالى ان عمته كانت لسه عنده و مخنوق على عباس الله يرحمه
مريم / الله يرحمه ربنا ما يكتبها على حد دا كان ابنها الوحيد برده
فاتن / بس انتى دورك بقي انك تخفى عنه و تراضيه اللى ميت ده كان فى مقام اخوه برده
سماح / غلبت والله اتشقلبتله فى التليفون ما فيش فايده
فاتن / فتره و هتعدى ان شاء الله
سماح / صحيح عمكوا رجع من مصر شوفته تحت شكله جايب حاجه كدا للحب بتاعه ههههههههههههه
فاطمه تدخل و هى شايله ملايات
فاطمه / متجمعين عند النبى
فاتن / امين
فاطمه / ما دام قاعدين كدا و واخدين راحتكوا يبقى اكيد خلصتوا اللى وراكوا
سماح / او خلصنا
فاتن / بقولك ايه يا عمتى بما انك يعنى المزه اللى فينا ما تيجي تدينا شويه من نصايحك الزوجيه اللى بتجيب من الاخر دى
فاطمه ترمى اللى فى ايدها على اقرب كرسى و تجرى تقعد وسطيهم و هى مبسوطه
…………………………….
فى الجيم
هند قدامها كيس رمل على استاند على شكل انسان و نازله فيه ضرب مختار يدخل يشوفها و هى بتضرب بغل يقف يتفرج و يبتسم
مختار / الف و اهرب و لا ايه
هند تبص تبتسم و تجرى عليه تحضنه
هند / وحشتنى اوى حمد الله على السلامه
مختار / الله يسلمك قوليلى الحيوان اللى هناك ده زعلك فى ايه عشان ينضرب بالشكل ده
هند تضحك و تروح تجيب ازازه الميه و تقعد فى جنب و تشرب و تمسح عرقها بفوطه مختار يروح يقعد جنبها و يطلع بوكيه الورد و يديهولها تشمه
هند / شكله حلو اوى ميرسي
مختار/ عامله ايه
هند / بقيت احسن لما شوفتك
مختار/ ربنا ما يحرمنى منك
هند / شوفت الاخبار ؟
مختار / شوفتها
هند / دا معناه انكوا هتهجموا صح ؟
مختار / هم عاوزين بس انا مش شايف ان ده وقته يمكن ندى فرصه مثلا لاولاد ابو فارس او حاجه اكيد ليهم تار عندها يبقي عددنا اكبر
هند / هتثق فيهم بعد اللى عملوه
مختار/ فى الاول و الاخر صعايده و اكيد هيحبوا ياخدوا تارهم و يغسلوا نارهم و لا ايه
هند / مش معاك يا مختار اللى زى دول باعوا شرفهم مره اى كان الضغوطات اللى اتعرضولها دا ما يديهمش الحق فى اللى عملوه … ما يفرقوش اى حاجه عن رجاله فيرا اللى قتلوا الستات و العيال الصغيره … و ان كنت انت نسيت انا ما نسيتش
هند تيجي تقوم مختار يشدها يقعدها جنبه
مختار/ انا كمان ما نسيتش و ما نسيتلهمش كمان مواقف تانيه كانوا رجاله فيها معانا و بعدين مين انا عشان احكم نش يمكن لو لا قدر الله كنت مكانهم كنت عملت كدا و اكتر
هند / لا طبعا
مختار / ليه لا ما حدش ضامن نفسه كلنا بين ايدين ربنا و ما حدش له فضل على نفسه
هند / انا ما بتكلمش عن كدا بس اكيد فى حلول تانيه ما ينفعش تبرر الغلط
مختار / مش ببرره هم غلطوا بس باب التوبه موجود يقدروا يصلحوا غلطهم
هند / و لو غدروا بيك تانى هتعمل ايه
مختار يبصلها و يسكت
هند / انا ما اديش ضهرى لواحد غدر بيا قبل كدا
مختار/ للاسف انتى صح
هند / انا علاطول صح
مختار يبصلها و يرفع حاجبه
هند / قولتلك مش هيهجموا على البلد حصل و لا لا
مختار يبتسم و يبص فى الارض
هند / قولتلك هيهجموا عليك انت حصل و لا لا
مختار يهز راسه و هو لسه باصص فى الارض و مبتسم
هند / قولتلك انى بحبك و واحشنى اوى حصل و لا لا
مختار يبصلها تشد ورده من البوكيه و تديهاله ياخدها و يشمها و هو مبتسم و يبص لهند بحب تبتسمله
هند / حمد الله على السلامه
……………………..
فى فيلا فيرا
فيرا بتتكلم فى التليفون و بتزعق
فيرا / ما يموتوا ما يولعوا كلهم انت تعمل اللى بقولك عليه و بس انت فاهم و لا لا … دا لمصلحتك انت على فكره … هستنى الاخبار
فيرا تقفل تليفونها يرن رشيد
فيرا / دا اللى كان ناقصنى … ايوه يا رشيد
رشيد / قلبي عندك
فيرا / يعني ايه
رشيد / قولتلك ما تلعبيش مع الحكومه
فيرا / اااااه لا ما تقلقش الحكومه الفتره الجايه مش هتبقي فضيالى
رشيد / قولت كدا برضه
فيرا / اخبار سمر ايه
رشيد / بحاول اقنعها تسمع كلام الحكومه بتقولى مش وقته
فيرا / البى كاى بقي موضوع قديمه خلاص حققت منه مكاسب مش هنكرها دلوقت وقت الجديد
رشيد / انا لو منك اللم حاجتى البلدى بقت زيها زى غيرها
فيرا / عمرها ما كانت زى غيرها يا رشيد و لا عمرها هتكون
رشيد / بحب فيكي وطنيتك المفرطه دا انتى بتحبى البلد دى اكتر من المصرين
فيرا / اصلهم ما يستاهلوهاش
صمت
فيرا / انا لازم اقفل هكلمك وقت تانى
رشيد / بشوقك يلا سلام
فيرا تقفل و تتصل بحد تانى
فيرا / نسيتني و لا ايه
راجل / و هو الجميل ينفع يتنسي برده
فيرا / هههههههه لا يا راجل
الراجل / ما دام اتصلتى بنفسك يبقي الموضوع يستاهل
فيرا / صدقنى هتاخد قيمه وقتك و زياده
الراجل / وصل من قبل ما اعرف هو ايه دا كفايا رضاكى علينا
فيرا / كدا احبك
الراجل / قوليلى بقي مين زعلك عوزانى اشدلك ودانه
فيرا / لا دى عمليه تنضيف صغيره
الراجل / تنضيف !!! يلا ما حدش بيعيش اكتر من عمره
فيرا / هبعتلك الداتا كلها مع واحده من حبايبك
الراجل / و ماله حد يقول للدلع لا
فيرا / عاوزه اسمع اخبار حلوه
الراجل / و اسرع مما تتخيلى
فيرا / سلام
فيرا تقفل
فيرا / ورونى بقي هتردوا على اللى هيحصل ده ازاى
……………………
فى المضيفه
الرجاله كلهم متجمعين
فتوح / على العموم انا هسهر النهرده على الموضوع ده بس انا من دلوقت بقولكوا مش هلاقى حاجه بس برده هنخور فيه
شاهين / مش لازم نسيب فرصه لاى غلط المرادى غير كل مره الدنيا كلها حاطه عنيها على الوليه دى
مغاورى / الفتره الجايه لازم نفتح عنينا اوى و على قد ما نقدر نقفل البلد خالص
ناصر / صعب … الكليات شغاله و مش هينفع نقفل الطريق
عباده / طب ما صحيح يا كبير الناس دى لازم تتامن كويس اكيد فيهم بنات كتير و اخاف نتلخم عنهم نلاقى نفسنا روحنا فى حيص بيص
همهمه عاليه
شاهين / عباده بيتكلم صح الموضوع ده اهم من اى حاجه تانيه
مغاورى / بسيطه اشوف كام اوتوبيس و نوصل البنات و نرجعهم و نشوف حد ينظم الحوار ده
ناصر / فكره حلوه اوى و هتفرق مع اهل البلد … منها هنرحمهم من بهدله المواصلات و منها هيبقوا مطمنين على بناتهم
مختار / و الشباب يولعوا عادى و لا ايه يا جماعه الاوتوبيس هيطلع على الجامعه يطلع بالكل مهم دول بناتنا و دول ولادنا برده
عباده / و اهم ياخدوا بالهم من اخواتهم فى الرايحه و الجايه و زياده الخير خيرين
مغاورى / بس احنا كدا هنحتاج اوتوبيسات كتير اوى
امين / انا بقول نخليها زى الاوتوبيسات بتاعه الحكومه تلف على الجامعات و تجيبهم و تيجي و يرجع يلف يلم و يجيبهم ويجي
مختار / دى فكره ممتازه و اهو اللى يفوتوا اوتوبيس يلحق اللى بعده و كمان اكيد مش كلهم بيخرجوا فى معاد واحد
عباده / كل واحد منهم ليه جدول و اللى ينظم الموضوع ده يرتبهم بالكراسى عشان نضمن ان الكل ليه مكان
ناصر / و كمان عشان نضمن انهم يخلصوا و يروحوا مش وقت سنكحه و سرمحه
شاهين/ انا هتكفل بتكلفه الاوتوبيسات دى
ناصر / طول عمرك ابو الكرم يا حج بس لو تسمحلنا
شاهين / ما تاخذنيش يا كبير بس اسمحلى انا المرادى
ناصر / تمام اللى تشوفه
مغاورى / نرجع لموضوعنا
ناصر / ما فيش اهم من الموضوع ده تاخد اخواتك و تطلعوا تخلصوه النهرده عاوز بكره الصبح الاوتوبيسات دى تبقي واقفه على مدخل البلد و عاوزها متامنه كويس مش عاوز غلطه
مغاورى / ما تقلقش يا كبير ان شاء الله هرفع راسك و أشرفك
ناصر / عادتك و لا هتشتريها يلا ربنا معاكوا
الشباب يقوموا و يفضل شاهين و ناصر
شاهين / امال الحج شاكر فين
ناصر / ضهره بيوجعه ما تاخذوش
شاهين / لا باس عليه طب نبعت نجيبله دكتور و لا حاجه
ناصر / والله قولناله قال الموضوع مش مستاهل و هيرتاح شويه و هيروح زى كل مره
شاهين / ابقي طمنى عليه … هستاذن انا
ناصر / طب استنى نشبع منك شويه
شاهين / مره تانيه انا كمان والله لولا ان الموضوع ما يتاجلش ما كنتش جيت … موت عباس كسرنا كلنا
ناصر / الله يرحمه
شاهين / يلا بالاذن
شاهين يمشي ناصر يشاور لامين امين يجرى عليه
ناصر / احنا حطينا البيض كله فى سله واحده
امين / ما تقلقش يا كبير فى رقبتى
ناصر / و انا عارف انك قدها و قدود يلا روح شوف شغلك
امين يجرى و ناصر يدخل السرايا يلاقي عبد الله قاعد فى جنب و فارش الورق يبتسم و يروح يقعد جنبه عبد الله يجي يلم الحاجه
ناصر / بتعمل ايه خليك خليك دا احلى منظر ده … اعمل حسابك تنام بدرى النهرده عشان عندك كليه الصبح
عبد الله / بتتكلم جد يا كبير
ناصر / ايوه هتروح و تيجي مع زمايلك و امين هيظبطلك كل حاجه
عبد الله / تمام يا كبير
ناصر / اسيبك تركز فى مزاكرتك عشان ما يبقالكش عندى حجه هحاسبك على الدرجه لا النص درجه
عبد الله يبتسم ناصر يطبطب على ضهره و يقوم
………………………
بعد اسبوعين
فى مكتب فى وزاره الدخليه
ظابط 1/ انت متاكد من الكلام ده
ظابط 2/ بقولك دا تانى بلاغ يجيلنا بخصوص الموضوع ده
ظابط 1/ طب لو هنتكلم عن رافت بيه اقول ممكن انما معاذ بيه ازاى دا لحظه موته متصوره بكاميرات المطار ما حدش قرب منه و لا حتى لمسه و تقرير الوفاه كان قايل ازمه قلبيه مفاجاه يبقى ازاى بقى تصفيه
ظابط 2/ مراته قالت انه كان بيتعاطى من البى كاى و انه لما بطلها قتلوه
ظابط 1/ طب قتلوه ازاى
ظابط 2/ ما اعرفش هو انا دكتور
ظابط 1/ طب و المطلوب دلوقت
ظابط 2/ تساعدنى نعمل جرد للعناصر اللى ماتت الفتره اللى فاتت و نحقق فى الموضوع لو طلع فعلا فيهم نسبه بيتعاطوا الزفت ده يبقى الست معاها حق
ظابط 1/ او يمكن دى اعراض جانبيه لانسحابه مثلا خصوصا على قد علمى ان اكيد الناس دى ما بلغوش القيادات انهم مدمنين و خفوا مع نفسهم
ظابط 2/ كل ده هيبان من التحقيق فى الموضوع
ظابط 1/ انا ما اقدرش اوعدك بحاجه انا الاول لازم اعرض الموضوع و امشى فيه رسمى انت عارف الوزاره مقلوبه الفتره دى ازاى و الموضوع اللى بتتكلم فيه خطير جدا
ظابط 2/ و لو طلع اللى فى بالى صح الوزاره دى هتتقلب اكتر من ما هى مقلوبه
ظابط 1/ و دا اللى قالقنى على العموم ما تقلقش انا هتحرك فى الموضوع ده من النهرده من دلوقت كمان
ظابط 1 يقوم يقف
ظابط 2/ على فين يا ابنى
ظابط 1 / لو الكلام اللى بتقوله ده حقيقى يبقى كل ثانيه بنتاخرها ممكن نخسر فيها حد تانى
ظابط 1 يسيب المكتب و يطلع بره
…………………………..
فى سرايا الزنايته
ناصر قاعد فى التراس هند تدخل شايله صينيه عليها فنجان قهوه تحطه جنبه
ناصر / يا منجى من المهالك يارب
هند / كدا يا كبير طب تصدق انا الغلطانه
هند تاخد الصينيه
ناصر / ههههههههههههه تعالى يا بنت .. مش هقوم اجرى وراكى هاتى فنجان القهوه ده و تعالى هنا
هند ترجع تحط الفنجان و هى ضاربه بوز
ناصر / اقعدى
هند تقعد
هند / على فكره انا ما كنتش جايه اطلب منك حاجه بالعكس كنت جايه اشكرك و احييك على فكره الاوتوبيسات دى و ان عبد الله يروح الجمعه و الحياه تمشى طبيعى تانى فى البلد
ناصر / والله يا هند مش هكدب عليكي و اقولك انى مش خايف غير من ان الدنيا رجعت طبيعي تانى
هند / ليه بس يا كبير ما احنا الحمد لله زى الفل اهو و كنت متوقعه انك هتسمحلهم يطلعوا يهجموا على فيرا و يا عالم مين فيهم هيرجع و مين لا و مع كدا الحمد لله الدنيا زى الفل اهو
ناصر / و انتى الموضوع ده مش قالقك خالص كدا
هند / تقصد ايه
ناصر / يعنى ليه ما تقوليش انه الهدوء اللذى يسبق العاصفه يعنى مثلا معقول الوليه السو دى هتسكت على اللى حصل و مش هتعمل اى حاجه
هند / و هى فى ايدها ايه تعمله اكيد ملخومه مع الحكومه اللى بتقفش فى رجالتها و بتعالج الناس اللى كانت مسيطره عليهم
ناصر/ و هى هتسكت يعنى
هند / اكيد لا بس احنا مش طرف فى الموضوع
ناصر / على الله
هند تبص لناصر و تسكت
هند / طب حضرتك ممكن تفتكر يعنى انها يعنى ممكن تعمل ايه
ناصر / والله انا عقلى لحد اللحظه دى ما قدرش يجيب ربع الخبث و الغدر اللى فدم الوليه دى بس لو هتوقع الاسوء يبقى ربنا يسترها علينا
هند / امال ليه منعتهم يهجموا عليها
ناصر / عشان احنا محتاجين كل نفر فينا … ما ينفعش ابعت رجالتى يهاجموها تكون مرتبالنا خازوق … ساعتها مين هيلحق اهل البلد و هستفيد ايه لو رجالتى راحوا موتولهم عشره عشرين واحد من رجالتها و رجعوا لقوا البلد منباده و لا مخطوف مننا خمس ست بنات رايحين جامعتهم ان كنا لازم نرتب نفسنا للاسوء لازم الاسوء ده ما يمسش الغلابه و لا الحريم و لا العيال الصغيره و لا انتى شايفه ايه
هند / الموضوع طلع كبير اوى قال و انا اللى كنت فاكره
ناصر / ايه رجعتى فى كلامك و هتاخدى القهوه و لا ايه
ناصر ياخد الفنجان و يشرب منه و يبص لهند تبتسم
ناصر / تسلم ايدك الشهاده لله قهوتك غير … بس اوعى تقولى لام فاتن خليها سر بينا
هند تضحك و تبص فى الارض
ناصر / بقولك ايه يا هند ما تفكريش فى بكره مش بايدينا عيشى النهرده عيشى اللحظه اللى انتى فيها و ما تضيعيش وقتك فى التفكير و الهم اتعلمى من ام عباده الحق يتقال بيقولوا عليها رايقه بس انا بقول ان هى الوحيده اللى فهمت الدنيا بدرى عشان كدا مرتاحه و مريحه جوزها
هند / اوعدك انى هاخد الموضوع ده فى عين الاعتبار بعد كدا
ناصر يشرب من القهوه مختار يدخل
مختار / انا نفسى افهم القهوه دى ما بتتعمليش ليه دا انا جوزك حتى
ناصر / ما انت بقالك سنين و ام فاتن بتعملك و تخليلك و ما فتحتش بقى جاى على فنجان القهوه بتاعى و عينك رشقت فيه
هند / يا كبير دا بيوزعنى بس … ماشيه ماشيه
مختار / لا يا اذكى اخواتك دا انا بطلب منك فنجان شرحه عشان مصدع
هند / عيني
هند تمشى و مختار يقعد مكانها
مختار / طلبات الاسياد كانت ايه المرادى
ناصر / لا براءه كانت عملاها محبه
مختار يبص لناصر بطرف عينه
ناصر / ما انا ما كنتش مصدق زيك فى الاول برده بس اهو على راى اللى قال لا يمكن فهم مزاج المرأة الا من خلال طريقة واحدة وتلك الطريقة لم تكتشف بعد
مختار / هههههههههههههههه صدق والله صدق
ناصر يشرب من القهوه و هم بيضحكوا
………………………….
فى فيلا فيرا
فيرا بتبص فى ملفات حسابات و فى بنت واقفه قدامها
فيرا / نسبه التوزيع حلوه جدا ابدئو فى طحن الحبوب و خلطها مع الحلويات
البنت / تمام
فيرا / و بلغيهم يرجعوا تانى ينتجوا من الحبوب المتين و خمسين كفايا كدا الميه خمسه و عشرين بس اللى هتتحط فى الكانديز الميه خمسه و عشرين اوعى تتلخبطى
البنت / ما تقلقيش حضرتك
فيرا / انا مش عاوزه اى غلط فى النسب اكتر من نص حبايه فى اليوم لطفل اقل من عشر سنين يعنى هيموت فاهمه و لا لا
البنت / بالميزان سعادتك
فيرا تقوم تقف و تفكر بصوت عالى
فيرا / دول اطفال ممكن الواحد منهم ياخد كيكتين تلاته فى اليوم
البنت / احنا ممكن نحدد البيع بواحده بس لكل طفل
فيرا / عشان تلفتى الانتباه و تقولى يا اللى ما شوفتش تعال اتفضل شوف خفضى النسب للنص
البنت / بس كدا هتبقى قليله اوى و مش فعاله احنا اصلا
فيرا / انتى تسمعى الكلام و انتى ساكته انا مش عوزاهم يموتوا … على الاقل مش قبل ما اضمن ان الحبوب دى وصلت لاكبر عدد ممكن من الاطفال … الضربه دى لازم تبقى قاضيه لازم البلد يوم ما تتقلب ما تعرفش تقوم تانى انتى فاهمه و لا لا
البنت / فاهمه
فيرا / روحى شوفى شغلك و اى غلطه انتى عارفه
البنت تهز راسها و تمشى يدخل شاب
فيرا / ها يا سيدى وريني تقريرك
فيرا تبص فى الملف و الشاب واقف قدامها باصص فى الارض و مرتبك
……………………………
فى اوتوبيس فى اول البلد
عبد الله قاعد و جنبه كرسي فاضي بيتكلم فى التليفون
عبد الله/ لا انا يومى فى الكليه طويل انتى عارفه هبقي اكل اى حاجه من بره و خلاص
مريم / طب ما صحتنيش ليه اعملك لقمه تاخدها معاك
عبد الله / اه و تمليلى الزمزميه بالمره
مريم / و فيها ايه يعني الحق عليا انى بخاف عليك من اكل الشارع
عبد الله/ هبقي اجيب باكو بسكوت و لا حاجه و لما ارجع هبقي اتغدى
مريم / تحب اعملك حاجه معينه
عبد الله/ تسلم ايدك ما تشغليش نفسك عشان لما اجى تبقي مخلصه مزاكرتك
بنتين يدخلوا
عبد الله / ثوانى
عبد الله يشيل حاجته و يقوم يقع منه كشكول و هو مش واخد باله يشاورلهم يقعدوا و يرجع ورا يقعد جنب واحد
عبد الله / معاكى … معلش كنت بغير مكانى فى الباص
مريم / انتوا لسه ما اتحركتوش
الاوتوبيس يتحرك
عبد الله / اتحركنا اهو
مريم / تروح و ترجع بالسلامه السنه الجايه ان شاء الله تبقي تحجزلى جنبك
عبد الله / مش هحتاج احجزلك عشان هنبقي نازلين من البيت سوا انتى ناسيه و لا ايه الاتفاق كان على نتيجه اول سنه … مش كنت سمعت كلام عمك كان لازم الكرامه تنقح اوى
مريم / ههههههههههههه
بنت تلاقى الكشكول و ترجعه لعبد الله
عبد الله / ايه ده ؟ اااه شكرا بجد ليكي اوى دا مهم جدا ميرسي اوى شكرا
البنت تبتسم و ترجع مكانها
مريم / انت بتكلم حد
عبد الله / و انا بنقل من مكانى وقع منى كشكول الملاحظات و الحمد لله اللى قعدت مكانى لقته دا انا كنت هضايق جدا لو ضاع انا بكتب فيه كل الاسئله اللى بتقف قدامى و انا بزاكر و بروح اسال فيها تانى يوم
مريم / طب الحمد لله انها لقتهولك المفروض تشكرها
عبد الله / ما انا شكرتها
مريم / ابقي خد بالك المره الجايه لحسن مش كل مره تلاقي واحده بنت حلال ترجعلك اللى بيقع منك
عبد الله يستغرب
مريم / انت ايه اللى يقومك من مكانك اصلا
عبد الله/ كانوا بنتين و كان جنبى فاضي فقومتلهم يقعدوا جنب بعض و رجعت انا قعدت جنب واحد
عبد الله يبص جنبه يلاقي الشاب مركز معاه اوى و مبتسم اوى عبد الله ينقل التليفون الناحيه التانيه
عبد الله / بقولك ايه هبقي اكلمك بعدين
مريم / بجد .. خليها تنفعك
عبد الله/ هى مين دى … الو … يادى النيله … فى حاجه يا اخ
الشاب يمد ايده
الشاب / محمد .. محمد عبد الصمد تالته صيدله
عبد الله يسلم عليه
عبد الله / عبد الله الجمل اولى طب
محمد / خطيبتك دى صح
عبد الله / اه
محمد / ربنا يتملكوا على خير انا ما كنتش رامى ودنى و لا حاجه بس صوتكوا كان عالى
عبد الله / لا مؤاخذه هبقي اخد بالى بعد كدا
محمد / بس انت مدلعها اوى
عبد الله يقف يبص حواليه يلاقي كرسي بعيد يلم حاجته و يقوم يروح يقعد فيه محمد يقوم وراه
محمد / انت زعلت منى و لا ايه انا عامل عليك
عبد الله / بقولك ايه ما ترجع مكانك عشان اليوم يعدي
محمد / هى بقت كدا و ماله صحيح ما قدرش على الحمار
محمد يرجع و عبد الله بيضرب كف على كف الشاب اللى جنب عبد الله تليفونه يرن يرد عليه
الشاب / السلام عليكم … لا ما اخدتوش شوفتيه فى درج الكومدينو اللى جنب السرير الدرج الوسطانى … طب الحمد لله … يلا سلام
الشاب يكلم عبد الله
الشاب / مش عارف من غيرى كانوا عملوا ايه فى البيت ده بصراحه مفيش حاجه بتضيع الا ما يكلمونى يسالونى على مكانها
عبد الله / ربنا يخليك ليهم
الشاب / تشكر .. محسوبك بدر ابو الفتوح
عبد الله / عبد الله
الشاب / غنى عن التعريف
عبد الله توصله رساله يفتح يبص
مريم / يعني مش فارق معاك يعني
عبد الله يتصل ما تردش يتصل ما تردش يكتب رساله
عبد الله/ مالك يا مريم هو ايه اللى مش فارق معايا
الاوتوبيس يقف عبد الله يحط الموبايل فى جيبه و ياخد حاجته و ينزل و يروح المدرج و يقعد و يطلع الموبايل و يتصل تانى مش بترد يبعت رساله
عبد الله / انا مش فاهم مالك و مش هعرف اكلمك تانى عشان هبقي فى المحاضره ياريت تهدى و لما اتصل بيكي تانى تردى
…………………..
فى شقه رشيد
رشيد نايم سمر تفتح الباب و تدخل تصحيه بالراحه يفتح عنيه
سمر / الفطار جاهز
رشيد باصصلها و ساكت
سمر / انت هتكلم فيرا امتى
رشيد / مش هكلمها ابدا
سمر تبصله بحزن
رشيد / ما ينفعش تعرف انى عرفت انا هحاول ادور عليه بطريقتى و صدقيني مش هسكت
سمر / تمام
سمر تبصله بحزن و تيجي تقوم يمسك ايدها تبصله
رشيد / هيرجع ان شاء الله
سمر / ساعات الشيطان بيقولى كدا كدا مش هيرجع و كدا كدا كان ضايع و كدا كدا اخويا كان فقد الامل فيه نهرب نسيب مصر كلها و نمشي … انا خلاص خفيت اقعد ليه
رشيد / لو ده اللى انتى عوزاه
سمر / قلبي بيوجعنى عليه مش عارفه اعمل ايه
رشيد / يعني اعمل ايه انا
سمر / حاول … رشيد انت لسه زعلان منى
رشيد / انا شوفت ناس بتقدم تنازلات اكتر من دى بكتير على حاجات اتفه
سمر / يعني لسه بتثق فيا
رشيد / على قد ما بتثقى انتى فيا يا نكدو وسعى اما اروح الحمام رشيد يقوم و يروح يطلع غيار
رشيد / اعملى حسابك بعد الفطار هاخدك و نروح كام مشوار قعادنا سوا من غير جواز ما عدش عاجبنى يا نتجوز يا نشوفلك مكان تانى ياما اروحك بيتك لحد ما ارجعلك ابن اخوكى
رشيد يبص لسمر يلاقيها بتعيط
رشيد / انا انسان فرفوش محب للحياه نفسي اعرف دون عن بنات الدنيا ليه حبيت ام النكد دى مش فاهم انا والله
رشيد يدخل الحمام و يقفل الباب وراه سمر تقعد على السرير و تبتسم و تمسح دموعها
………………….
فى سرايا الزنايته
هند فى المطبخ و مريم رايحه جايه وراها
هند / ما هو قالك انه هيبقي مشغول فى المحاضرات طول اليوم و انتى معاكى جدوله
مريم / و هو يعني مفيش وقت خالص بين المحاضرات يكلمنى يعني
هند / انتى كبرتى الموضوع من الاول يا مريم
مريم / انتى لو كنتى سمعتيه و هو بيكلمها ما كنتيش قولتى كدا
هند / كلمها قالها ايه يعني .. شكرا ..امال لو قالها بحبك كنتى عملتى ايه
مريم / والله كنت طخيته
هند / ربنا يهدى
مريم / تصدقى انا غلطانه انى اشتكيتلك
هند تسيب اللى فى ايدها و تبص لمريم
هند / انتى يعني عوزاه يقولها ايه مش الحق عليها انها ما سابتوش يدوخ على الكشكول
مريم / كان يقول شكرا و خلاص و يقولها من غير وش كمان
هند تبتسم
مريم / ما بلاش استفزاز بقي
سماح تدخل تفتح الحلل
سماح / اللحمه استوت اهى ما طفتوش عليها ليه
سماح تطفى البوتجاز
سماح / ما لكوا سكتوا ليه لما دخلت ايه امشي
هند / تمشي تروحى فين تعالى ساعديني فى عمايل السلطه دى مريم مضربه النهرده
مريم / و مين اللى دست الرز مش مريم
سماح / لا دا انتى النهرده مزاجك مش رايق خالص ما تاخديها قلمين بالمره يجي عمك يسمعك
هند / خليكي فى حالك يا حقنه مريم ما تقصدش
سماح / الحق عليا انى بدافع عنك … ها احكولى فى ايه بقي
هند / عبد الله قال لزميلته فى الباص شكرا
سماح / و فيها ايه دى
مريم / يووووه انا ماحدش بيفهمنى ابدا كدا انا ماشيه
مريم تسيب المطبخ و تمشي و هى زعلانه
سماح / مالها دى اتجنت و لا ايه
هند / جرب نار الغيره
سماح / هههههههههههههه وسعى اما اساعدك
………………………
فى سرايا الجوارحه
ام مغاورى / اما امرك عجيب منين كنتى بتقولى نفشكل الخطوبه و منين بتقولى عباس هيفرح لاخوه
كوثر / لا بيعجبكوا العجب و لا الصيام فى رجب شيفاه ملهوف عليها و رايح جاى يكلمها فى التليفون يتجوزها و يخلصنا
ام مغاورى / ايوه بس بعد الاربعين علاطول دا
كوثر / هو حد هيحزن على ابنى اكتر منى عاوز يتجوزها يتجوزها عاوز يعمل فرح يعمل مالكوا و مالى
ام مغاورى/ و هو عباس ما كانش يخصنا احنا كمان و لا هى ماجده هتحضر فرح اخوها و جوزها لسه ميت
كوثر / و هى ماجده فارق معاها حاجه قال الحزن قاتلها اوى
ام مغاورى / اتقى الله يا ام عباس دا البت قافله على روحها و فين و فين على ما اللقمه بتدخل جوفها
كوثر / بقولك ايه البت بنتك و الواد ابنك اعملوا اللى يريحكم انا ماشيه
ام مغاورى / على فين طيب
كوثر / رايحه للى ليا اشقر عليه و افرق رحمه و نور
كوثر تمشي و ام مغاورى مضايقه
ام مغاورى / ربنا يهدى
…………………..
فى اسكندريه
وسام قاعده فى المول الجديد بتكتب حاجات فى دفتر و تجمع على الاله الحاسبه صاحب المحل اللى جنبها يدخل
الشاب / ايه يا بنتى انتى ما بتبطليش شغل
وسام / بجمع الفواتير اول باول عشان ما نتعبش فى الحساب اخر الشهر
الشاب / حساب ايه يا بنتى دا كومبيوتر يعني تيك تيك فى ثوانى الحساب يبقي معاكى
وسام / ايوه يعني اللى يدهونى اخده و اشكر ربنا و خلاص مش لازم على الاقل اول مرتين تلاته كدا اتاكد ان السيستم ده مظبوط
الشاب / يا بنتى ما فى حاجات كتير انتى ممكن ما تكونيش واخده بالك منها المشروع بيصرف برده دعايه و عماله و فواتير و ضرايب انتى فاهمه
وسام / ايوه ما كل الحاجات دى متفقين عليها و حاطينها فى ايجار الباكيه تتخصم من الارباح ليه بقي
الشاب / انا بقول مثلا مثلا
وسام / اهو اديني بحسب كل حاجه عشان ساعتها لما نيجي نتكلم يبقي بالورقه و القلم
الشاب / براحتك بس كدا هتضيعي على نفسك عزومه الغدى اللى كنت هعزمهالك فى البريك
وسام / امممم لا يا عم بلا ارباح بلا نيله ها هتوديني فين النهرده
الشاب / مش هنبعد ماما جايه فى الفود كورت تحت عشان تتعرف عليا
وسام / تتعرف عليا انا !!
الشاب / انا كلمتها كتير عنك و بيتهيالي جه الوقت اللى ننقل فيه علاقتنا للمرحله التانيه بقي و لا ايه ؟
وسام / علاقتنا !!
الشاب / انتى هتستهبلى قال يعني البت مش واقعه فى دباديبي
وسام / ايه الثقه دى جايبها منين
الشاب / ايه يعني ما اتحبش و لا ايه طب انكرى كدا تنكرى انك بتحبيني زى ما بحبك
وسام / امممممم
الشاب يزعق فيها بهزار
الشاب / انتى هتفكرى يلا انا جعان
وسام / حاضر حاضر ما تزقش ههههههههههههههه
…………………….
فى المضيفه
مختار / بقي دى الحكايه ؟
عبد الله/ والله انا ما عارف ارد
مريم / طبعا و ترد عليا ليه ما كفايا ردك عليها
مختار / على فكره الكلام ممكن يكون باسلوب احسن
مريم تبص لمختار بصدمه
مختار / عبد الله ما غلطش و شرحلك الموقف و ظروفه يعمل ايه يعني
مريم / ما يعملش
مريم تقوم و تطلع بره مختار يطلع وراها يحصلها
مختار / انا مش عيل صغير تجبيني تشهديني و تسبيني و تمشي
مريم / كنت فكراك هتنصفني
مختار / طب ما انا نصفك الواد اللى جوه ده زينه شباب البلد و انا جبتهولك انتى يا تحافظى عليه يا ما ترجعيش تعيطيلى
مريم / يعني هو زينه الشباب و انا جربه يا عمى
مختار / مريم فوقى انا ماليش خلق لدلع البنات ده مش وقتك ما حدش هيسمعلك فى وسط كل القرف اللى بنشوفه ست مريم مشغوله بعبد الله قال شكرا لزميلته فى الاوتوبيس
مريم / حقكوا على راسي تحب اروح احبلك على راسه
مختار / لما نبقي نكتب كتابكوا ابقي حبى براحتك
مريم واقفه مبوزه
مختار / يا بت الرجاله ما بتحبش النكد و لازم تحسسيه انك واثقه فيه و الاهم انك واثقه فى نفسك عبد الله فى الكليه حواليه بنات ياما و بعدها هيبقوا زمايله فى الشغل و العياده بس هو عينه مش هتشوف الا انتى عشان انتى اللى بتريحيه و تنسيه الدنيا مش تنكدى عليه و تعملى من الحبه قبه
مريم / لو الموضوع كان معكوس
مختار / هنقتلك مثلا عشان قولتى لحد شكرا دا من لم يشكر الناس لم يشكر الله … بصي يا مريم انتى صغيره اه بس انتى عاقله ما اعرفش مالك النهرده بقي هرمونات بقي
مريم / عمى عيب
مختار / و انا قولت ايه و بعدين ايه يا بت دا انا عمك
مريم / برضه
مختار / طب روحى يا بت اعمليلنا فنجانين قهوه انجرى يلا انا ناقص
مختار يروح المضيفه و يبص على مريم
مختار / والله اجيلك
مريم تدخل السرايا و هى بتفرك و تبرطم مختار يدخل المضيفه
مختار/ عاجبك فيها ايه البت دى ما تسيبها و تيجي اخطبلك البت بتاعه الاوتوبيس
عبد الله / هتهزر يا مختار
مختار / هى البت التانيه وحشه و لا ايه
عبد الله/ يا عم و لو ملكه جمال انا بحب مريم هبص للتانيه ليه اصلا
مختار يضرب عبد الله على كتفه
مختار / و ما دام بتحب مريم ما صالحتهاش ليه ما اتنيلتش لميت الموضوع ليه قارفنى معاكوا ليه
عبد الله / هى ادتنى فرصه دى مستلمانى على بوابه الفيلا على يدك
مختار / ما انت اللى حمار داخل بايدك فاضيه فين الورد و الشيكولاته هتيجي فى الاخر و تخيب يا استاذ المحن و التثبيت دا انت اللى معلمنى
عبد الله/ ما انا جيت جرى عشان ما كانتش عاوزه ترد عليا قلقت عليها و ما كنتش فاهم هى زعلانه اوى كدا ليه
مختار / يا اللهى لقد انتابتنى القشعريره
عبد الله/ انت بتالس عليا
مختار / ائلس عليك يا علامه يا جهبز طب دا انا من غير الكام كلمه على الكام حركه اللى بغشهم منك حياتى الزوجيه تبقي سواد … صغير اه بس فتاك
عبد الله/ صبرنى يا رب
مريم تدخل مبوزه
مريم / القهوه
مختار / صبرنى انا يارب … تعالى ياختى اسمعى الشعر اللى البيه بيقوله فيكي … دا انا شوفى انا حبيته
مريم / يا سلام
مختار / قولها تانى كدا الجمله بتاعه ملكه الجمال دى
عبد الله/ ما ترحمنى بقي من خفه دمك دى مش وقتك
مختار / من الاخر كدا الواد جه ملهوف عليكي و ما كانش مطنشك و لا فارق معاه زعلك دا كان مش فاهم و البت التانيه لو ملكه جمال مش هيبصلها عشان بيحبك هو قال كدا بعضمه لسانه فلمى الدور … هى مين البت دى صحيح
عبد الله / ورده الحلوانى
مختار / مين دى
عبد الله / بنت عطيه الحلوانى اللى جابولى منها الورق
مختار و مريم يضحكوا
عبد الله/ ايه !!!
مريم / ما اسمهاش ورده الحلوانى اسمها ورده الشباشيرى الحلوانى دى شغلانه ابوها
عبد الله/ و انا كنت هطلعلها بطاقه انا مالى بيها
عبد الله يقوم يقف جنب مريم
مريم / اهو عشان ما تجيش قدامها و تغلط
عبد الله/ يا بت والله ما ليا الا انتى و بعدين هم اللى يغيروا منك يا بت مش انتى انتى مش شايفه نفسك و لا ايه
مختار / الا هو الاريال لاقط كويس و لا اجيبه يمين شويه … يلا يا بت انجرى قدامى على جوه دا انا جزعت انت اترزع زاكر
مختار يزق مريم بره و يوارب الباب و يكلم عبد الله بصوت واطى
مختار / انتى مش شايفه نفسك و لا ايه .. استااااذ
مختار يقفل الباب و عبد الله مش قادر يمسك نفسه من الضحك يجرى يجيب الموبايل و يكتب حاجه
………………………
فى شقه رشيد
رشيد و سمر يدخلوا و شايلين اكياس كتير
سمر / والله بعد اللى شوفته النهرده شكلك هتطلع ظابط فى الاخر
رشيد / ظابط !!! و هو فى ظابط فى سنى معاه يدفع الفلوس دى كلها الا بقي .. و على العموم ما بعدناش كتير انا بفهم فى القانون و السلاح احسن من احسن ظابط
سمر / امال ازاى الناس دى و التليفونات دى دا انت طلعت مهم و مش واخده بالى
رشيد / فى البلد … فى الدنيا دى ما فيش اكتر من الشمال و ما دام شمال يبقي ليا معاهم سكك و مصالح المهم هتفضلى ترغى كتير كدا و تسبيني واقف مش على بعضي
رشيد يقرب من سمر و هى مكسوفه
رشيد / ما تدخلى تاخدى دوش كدا و تلبسي حاجه حلوه من اللى جبناهم … اقولك اللبسي البتنجانى ابو حمالات ده
سمر / حاضر
رشيد / حضرلك الخير يا ست الكل الزوجه المطيعه رزق
سمر تضحك و تاخد الاكياس و تدخل جوه
رشيد / انا هوضب السفره على ما تجهزى هعملك جو رومانسي ما شوفتيهوش غير فى الافلام حكم انا فى الرومانسيه دى لعبتى
رشيد يشيل كام كيس و يحطهم على السفره تليفون رشيد توصله رساله يطلعه من جيبه
فيرا / مبروك ما رضيتش اتصل قولت اكيد مشغولين دلوقت
رشيد يعوج بقه
رشيد / و نقفل ام الموبايل عشان مش وقت ازعاج … اتاخرتى ليه عندك مشاكل مع السوسته
سمر ترد من جوه رشيد يروح يقف عند باب الاوضه
سمر / سوسته ايه
رشيد / هو انتى ما لقيتيهاش
سمر / هى ايه دى
رشيد / هو انا كل حاجه لازم اعملها بنفسي كدا
رشيد يفتح الباب و يدخل و يقفله و صوتهم باين من وراه
سمر / استنى لسه ما جهزتش … طب فين السوسته اللى … ههههههههههههههه
…………………….
فى سرايا الزنايته
ناصر / هههههههههههههههه طب وآلله كنت عارف ان قلبه هيحن
مختار/ اهو اتلم و ما بقاش نجس اهو
ناصر / ربنا الهادى … ربنا يباركلهم و يهديهاله
عباده / بس انا عن نفسي لو مكانه عمرى ما اثق فيها
ناصر / مهما كانت وليه و مكسوره الجناح ربنا يجعل سترها فى ميزان حسناته ربنا وحده اللى يعلم لو ما كنش جبرها كانت آخرتها هتبقي عامله ازاى
مختار / ربنا يسترها علينا جميعا
ناصر / امين
عباده / امين … طب لامؤاخذه احنا هنفضل كدا لحد امتى
ناصر/ كدا ازاى يعني
عباده/ واخدين وضعيه الدفاع هنهجم امتى
ناصر / جاهز يعني
امين و سليمان يدخلوا
سليمان / متجمعين عند النبى
ناصر / والله شوقتنى
سليمان / ما احنا فيها يلا بينا
عباده / خديجه بس تولد و نطلع كلنا والله
امين / و هى خديجه لما هتولد هتعرف تتلفت يمين و لا شمال
عباده / اطلع انا يا سيدى بس على الاقل ابقي اطمنت عليها و لا ايه يا كبير
ناصر / اقعد يا سليمان طمنى ايه الاخبار
سليمان / كل خير كل حاجه شغاله زى الساعه و اديك شايف الحمد لله ما فيش اى مشاكل
مختار / بس دى حاجه ما تطمنش
عباده / والله خدتها من على لسانى
سليمان / انتوا خدتوا على السواد و لا ايه ربنا كارمنا احمدوا ربنا
ناصر / هم بيتكلموا صح يا سليمان دا ممكن يكون السكون اللذى يسبق العاصفه
عباده / اللى شوفناه من الست دى ما يقولش انها تبلع الخازوق اللى فات و تشرب عليه ميه
سليمان / و هى فى ايدها ايه تعمله
مختار / مهى المشكله اننا ما نعرفش هى ناويه على ايه
ناصر / بس ممكن نعرف
ناصر يبص لمختار
مختار / هحاول بس ما اضمنش
ناصر يهز راسه مختار يسيبهم و يمشي و هو بيتكتك فى التليفون
…………………….
فى شقه رشيد
سمر نايمه فى حضن رشيد و هو عمال يلعب فى شعرها و هى سرحانه
سمر / تصدق ان عندك حق
رشيد / فى انهى جزئيه بالتحديد
سمر / انى نكد
رشيد / هو بغض النظر انها واضحه وضوح الشمس بس يا ترى ايه اللى لفت نظرك للموضوع هل ده له علاقه انك بتفتحى من الاساس موضوع زى ده و احنا فى وضع زى ده
رشيد يبصلها يلاقيها بتعيط ياخدها فى حضنه اوى
رشيد / ليه كل ده طيب
سمر / خايفه عليك اوى
رشيد / من ايه
سمر / خايفه اخسرك خايفه افرح و اصدق اننا خلاص بقينا لبعض اصحي الاقينى لوحدى تانى خايفه الاقى سبب اتعلق بالدنيا و يروح منى تانى
رشيد / والله يا سمر كان نفسي اقولك اى حاجه تانيه بس انا مش ناوى اغشك … انا كدا كدا ميت النهرده بكره بعد ديشيليون سنه ما حدش بيخلد فيها يا بنتى … مت فى سريرى مت فى حادثه كدا كدا النهايه واحده ده هيقف
رشيد يمسك ايد سمر و يحطها على قلبه
رشيد / و كل ما عرفتى الحقيقه دى بدرى كل ما عرفتى قيمه الدقات دى و عملتى كل اللى تقدرى عليه عشان تستمتعى بكل دقه فيها انتى عارفه حتى الناس المتوصلين بجهاز القلب اللى بيعمل تيت تيت ده
سمر تبصله باستغراب
رشيد / انا شخصيا ممكن ارقص على التكات دى
رشيد يطرقع بصوابعه مع الكلام
رشيد / تيت تيت تيت تيت تيت فيها رتم ما يقدروش غير اللى عارف ان لما القلب بيقف بيعمل تييييييييييييييييت واحده كبيره ما بتخلصش مزعج كدا و ما فيهوش حياه
سمر / انت بتقول ايه
رشيد / بقول كلنا هنموت و كلنا لينا اجل و معاد ما حدش بيتاخر عنه فما دام كدا كدا النهايه واحده هتفرق فى ايه
سمر / تفرق انك ما عدتش لوحدك انا بقيت متعلقه فيك و افرض حصل بيبي هتسيبه لمين فى الغابه دى
رشيد / هسيبه للى خلقه هو احن عليه من الكل و انا كنت اتسابت لمين غيره انتى اتسابتى لمين غيره هو انا و انتى مين اللى جمعنا ببعض ايه اللى نزلنى من اوضتى فى اللحظه اللى بيدوكى فيها الحبايه مش ربنا مش نصيبنا ايه اللى خلانى دون عن الناس كلها احبك انتى مش قدرى و نصيبي ربنا يا سمر
سمر / ما كنتش متخيله انك تقولى الكلام ده
رشيد يبتسم بسخريه
سمر / بس ربنا قال لا تلقوا بايديكم الى التهلكه
رشيد / ربنا قال حاجات كتير مش حافظها للاسف بس انا متاكد انه ما قالش انك تبقي قادر تساعد غيرك و ما تساعدوش هرجع ابن اخوكى و اخلص كام حوار كدا و لو ربنا كاتبلنا عمر بعدها اوعدك نعمل اللى انتى عوزاه و نروح البلد اللى انتى عوزاها تمام ؟
سمر / تمام
رشيد / لا مش تمام يا سمر مش تمام عشان انا ما سبتش الاكل اللى بره يبرد عشان يتنكد عليا انا مستاء و عندى لوعه
رشيد يقوم و يروح ناحيه الباب و يفتحه سم تقعد على ركبها
سمر / ههههههههههههههههههه اسمها مشتاق
رشيد / انتى هتعدلى عليا كمان و لا ايه دا انتة هتتقطعى النهرده
رشيد يرزع الباب و يرجعلها يزقها تنام و هى بتضحك
……………………..
على السطوح فى سرايا الزنايته
مختار قاعد بيكتب حاجه على الموبايل هند تدخل
هند/ يعني جيت و ما عدتش عليا
مختار يسيب الموبايل و يبصلها و يقوم يقف
هند / و لا سالت عنى و لا عبرتنى و طلعت استخبيت هنا و عمال تلعب فى الموبايل … اللى وخداك مننا يا مختار بيه
مختار / و هى مين دى اللى تقدر انتى مش شايفه نفسك و لا ايه
هند تبتسم و تكتمها
مختار / و بعدين انتى تغيرى عليا ازاى دا البنات هم اللى المفروض يغيروا منك
هند تغطى وشها بايدها
مختار / عجبتك صح
هند تبصله و هى بتحاول تكتم الضحك
هند / طبعا … بس انا بيتهيالى سمعت الكلام ده قبل كدا يا ترى مين يا ترى مين يا بت يا دودو يا ترى مين
مختار / دى اكيد ديجافو
هند / والله
مختار يتكلم بسرعه
مختار / اه وهم سبق الرؤيا دا بيحصل نتيجه شذوذ في المخ المخ مش بيقدر يسترجع غير تفاصيل مشوشه من الموقف الجديد لكن في نفس الوقت مش بيقدر يسترجع الموقف القديم فيحصل تشابك بين الذاكرة ذات المدي القصير و الذاكره الي فيها مدي طويل و قبل ماتروح الذاكرة دي للوعي لازم بتتخزن ولما بتوصل الذاكرة للوعي بتتصلح هناك
هند بصاله و فاتحه بقها
مختار / في منطقه في المخ اللي بتتسمي هيبوكامبوس وفي دراسه تانيه اكتشفت انه المسؤول عن الذكريات المتسلسله منطقه التلفيف المسنن وده جزء صغير من منطقه الهيبوكامبوس الي في نفس الوقت بتخلينا نميز بين الأحداث المتشابهه في خلايا الدماغ
هند / انت بتقول ايه ؟
مختار / بشرحلك يعني
هند / بتشرحلى !! طب ممكن لو سمحت تشرحلى الرساله اللى عبد الله اخويا بعتهالى دى
هند تطلع الموبايل مختار ياخدها
مختار / لو ميخا قالك ما تغيريش من حد الكل يغير منك انتى مش شايفه نفسك و لا ايه دى جملتى غاششها منى … اه يا جزمه … اه حصل فيها ايه يعني على الاقل بحاول اتعلم ببذل مجهود هنا يا هانم لازم تقدريه
هند تضحك
هند / و عشان كدا بحبك عشان بتحاول طول الوقت تسعدنى عشان بجد بتتقى ربنا فيا
مختار / و عشان بحبك و بحب اشوف دحكتك الحلوه دى منوره وشك
هند / و دى بقي غاششها من مين
مختار / اقسم بالله مجهودى
هند / ههههههههههههههههه يلا يلا الاكل اتحط
هند تمشي و مختار وراها
…………………………
فى فيلا فيرا بعد اسبوع
فيرا قاعده بتتفرج على التليفزيون و قدامها طبق فاكهه متقطعه بتاكل منه رشيد يدخل تبتسم و تقوم تقف و تفتح ايديها
رشيد / انا راجل متجوز دلوقت
فيرا / ههههههههههههههه يعنى ما وحشتكش
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية البر التاني)
2 تعليقات