رواية فقيد قلبي الفصل السادس 6 بقلم رويدا القاضي

رواية فقيد قلبي الجزء السادس

رواية فقيد قلبي البارت السادس

رواية فقيد قلبي الحلقة السادسة

ثاني يوم من الكارثة للي صارت ….
عماد:تعرفي لو نتأكد انه ليك علاقة بالموضوع للي صار البارح مش رح تمر ع خير..
رندا:هههه شكلك بديت تحبها للي يسمعك وانت تتكلم هكي يقول مش انت للي كنت تدعي عليها
وتتمنالها الموت…
عماد:بعد ثلاثة ايام مجهزلك مفاجأة تهبل رح تعجبك…
رندا:انا قلت حبيبي مستحيل يفرق بينا شئ مهما كان…
رندا ماكانتش تعرف انه عماد للي مجهزها كانت صدمة بالنسبة ليها….طبعا رندا كانت امها من جنسية عربية مش ليبية ومافيش داعي لذكر…
بعد ثلاثة ايام اجتمعوا الاخوة الثلاثة في المربوعة متع حوش بوهم….
عامر:قررت انا وحسين نعطوك نصيبك من الورث اما نصيب طارق رح يتوزع بيني وبين حسين …وانت لا ع عملتك السوداء…
عماد:بالله بالك حتى نصيبي ماتبوش تعطهولي ناخده بالمحاكم…
حسين:ماوجعني شئ غير مهاب وامه المسكينة اليتيمة للي خلاها بوها امانه عندك … انت زاني ومنافق وخيان للأمانه لولا خايف من الفضيحة كنت رجمت انت وياها وخليت الدولة تقوم الحد الشرعي لزنا فيك وفيها….
للأسف احنا في مجتمع نخافوا من الناس ولكن مانخافوش من ربي لو في حد يجرم الزاني والزانية
تعرفوه شن عقوبة الزنا في الشرع للمتزوجين القتل بالرجم حتى الموت ….والله لو تمت تفعيل
القاونين الشرعية لما كان الحال كما هوا عليه الآن ….ولكن ان غابت عادالة الأرض لن تغفل عنهم عدالة السماء….
وتمت توزيع الإرث بين الأخوة ….طبعا خبر زي هذا مش رح ايغيب ع حد …من السلفات …
ثاني يوم بعد تقسيم الإرث بينهم…
عماد:صباح الخير البسي وتعالي عندي مشوار ضروري لازم نتمه انا وياك…
يقين:لبست ويشهد عليا ربي ركبت معاه وانا متقززة منه كل مانتفكر عمايله وللي داره كله نزيد نحقد عليه…
عماد:بنضرة انكسار …ماكنتش نعرف انه قلبك قاسي لدرجة هاذي….غلطتت ربي ايسامح ماتقدريش تسامحيني …حتى ع خاطر مهاب ..
يقين:لفيت للخلف لقيت مهاب يلعب بالايباد متعه…تفكرت لما يمرض انا للي نسهر معاه تفكرت يوم عرفت روحي حامل وجيت فرحانه
نحكيله هوا كان رده ماتفرحيش حملك هذا مجرد غلطة …كل لحظة صبر فوتتها وانا نقول هو هكي طبعه …وفي الأخير يطلع للي محرومه منه انا
هو كان يعطي فيه لغيري اهتمامه وحبه وخوفه
عليها ….للي صار بينا طول السنين مر قدام عيوني جمعت قوتي وقتله ولا اي شئ ممكن يغفرلك للي درته وقت كنت انا ومهاب محتاجينك
كنت انت مستغني علينا…
وصلنا قدام محرر عقود ونزل ومعاه أوراق للحظات كنت نتوقع انه اقتنع بالإنفصال وجاي بيدير طلاق بالتراضي…شوية جاني …
عماد:غطي ايديك وانزلي في اوراق ضروري توقعي عليهم…
يقين:نزلت وانا حيرة الدنيا فيا مش فاهمة شن للي قاعد ايصير اول ماخديت الأوراق لقيته بيع وشراء لكل املاكه …غصتني العبرة كنت خاطري نبكي وقعت بعد مااصر عليا …كنت خاطري نقوله
انا مش هامني فلوس ولا رزق انا كنت نتمنى تفيق
ع روحك قبل مايفوت الآوان ونوصل لطريق مسدودة بيني وبينك….
عماد:الدنيا فيها موت وحياة ماتعرفيش شن ممكن ايصير مع الوقت انا باللي درته مش طالب رضاك لكن اهو تخفيف دنوب لاأكثر ولا أقل…
يقين: ع كثر ماتحملت وصبرت لحظة تكلم هكي انهرت بالبكاء انا اول مافتحت عيوني ع الدنيا
اول شخص كان في حياتي عماد لانه كان راجلي ماكنتش متعت علاقات وحب وغرام علاش ايصير معاي هكي شن الغلط للي درته في حياتي باش نتجازى عليه هكي ….بعد زحمة الأفكار وهو يحاول يسكتني …تفكرت انه الله إذا أحب عبد ابتلاه استغفرت ربي ومسحت دموعي…وصلت الحوش ونزلت وخليته بدون اي كلمة مني …
عماد:هذا ماهو الا بداية التكفير ع ذنوبي مازال في امور لازم تعرفيها وبعدها من حقك تقرري
تقعدي ولا تتطلقي …
يقين:استغربت في الكلام للي قاله …خشيت للحوش شديت الهاتف واتصلت بحاتم قتله تعالى نبي نمشي لحوشنا…
سالمة:خيرها اختك شن فيها …
حاتم:والله ماني عارف قالت تبي اتجئ وبس وانا توا بنمشي نجيبها…
فاضل:انا نبي نفهم الخيال راجلها وين…
حاتم:لو كان هامك تعرف راجلها وين راهو من اول ماتزوج ع اختك وقفت في وجهه وعرفته حجمه ياويلك انت وخوتك من للي اديروا فيه
الظلم ضلمات والدنيا دوائر ….للي بتزرعه اليوم بتحصده غدوا…
علاء:وهو معصب شن قصدك …
حاتم:دير الخير وانساه ودير السر وارعاه …انا اليوم رح نكلم محمد ضروري يكون حاضر خلي اتم المهزله هاذي كلها…
ناهد:خيرك ياعماد لاعاد حالك حال ولا وضعك يعجب …شن فيك ياخوي …انا وامي خايفين عليك..
عماد: بالله خايفين عليا صار صدق كلام الاولين
لما قالوا يااميمتي كانك تبيني راك من الدحية الاولى انهيتيني ….تشوفوا فيا غارق في الحرام
لرقبتي لكن مافيش حد جاء واعطاني كف ع وجهي وقالي اصحى راك ماشي في الطريق الغلط.
فاطمة:انت ولدي الصغير …مصماص الكرشة
في عيني كل غلط اديره صح …نشوف فيك نقول فترة طيش وتمشي في حالها…
عماد:مامشتش في حالها ياامي انا ضعت ضعت خسرت الانسانه للي صانتني وحافضت ع شرفي
للي تحملت قلة الطلوع والصرف والخدمة حتى للي عايش في الحبس حياته خير من حياتها…
ناهد:الكل نتحملوا…
عماد:خليك حقانية مرة في حياتك والله لو تعيشي يوم العيشة للي هيا عاشتها ماك قعدا معاه راجلك لحظة غير احنا البشر نرضوا لغيرنا للي مانرضوش لروحنا….انا تنازلت ع كل شئ بيع وشراء ليقين….
فاطمة:شن هبلت كيف تسلم رزقك لمرتك والثانيه واولادها…شن خليتلهم تعالج في الغلط بالغلط…
عماد: تكلب المكلوبة وماتاكلش لحم ذرعانها هاذي مرتي ام ولدي للي بالشرع ومايصح الا الصحيح خيرك قبل مادافعتيش ع يقين مش كنت انتي يما تحرضي فيا عليها ….بنت الاصل
للي تصونك وتتحملك ع الحلوة والمره وللي صار قبل ايام خلاني نفيق ع روحي كويس …
ناهد:قصدك حكاية الرصاص بالك هيا مخططة ياعماد باش تقلب الموضوع لصالحها…
عماد:انت وانا نعرفوا كويس من ممكن ايدير هكي …يقين انقى وابسط من انها تفكر تفكير شيطاني زي هذا ….
فاطمة:ماعندي مانقول ربي يهديك ويصلح حالك وينورلك طريقك …
طلع عماد وخلاهم …خبط الباب ع رندا…
رندا:نعم اهو جيت …فتحت الباب لقاته عماد حت بتحضنه حبيبي…
عماد:حولي غادي راك تقربيني …تعرفي عمرك مارح تكوني حبيبتي لولا للي درتيه لكن للأسف انا عرفت كل شئ ….انت طالق طالق طالق…
رندا:من الصدمة مش قادرة تصدق الكلام للي سمعاته …تبصر اكيد مستحيل للي قولته…
عماد:عندك يومين تلمي فيهم حاجتك كلها والحوش انا نقدره ويوصلك حقك…
رندا:والله لماتندم ع كل شئ درته ياعماد…
عماد:تهديداتك معاش نخاف منها اه نسيت تنازلت ع املاكي كلها لمرتي بيع وشراء يعني حتى لو قتلتيني مش رح تحصلي شئ….
يقين:خشيت لقيت خوتي كلهم مقعمزين تقول يستنوا فيا…قلت السلام عليكم وجيت بنقعمز جنب امي…
محمد:تعالي هنايا جنبي …نبي نهدرز عليك …ونسمعك في نفس الوقت…
يقين:كيف بندأ نتكلم …
علاء:راك تقولي جاي بديرلنا جو الدلع واتزوج عليا معاش نبيه …
محمد:المفروض انك تسكت وتسكر فمك لانه انا موجود …وانت احكم في مرتك ساد …
فاضل:ساكت لانه يعرف ردة فعل محمد كيف بتكون…
يقين:احكيتله للي صار كله …من البداية لعند اللحظة للي سجل فيها املاكه بإسمي …
محمد:شوفي يااختي مانبيش نقولك ماتتطلقيش
ولازم تعطيه فرصة والراجل ديما هو للي يغلط والمرأة الذكية للي تعرف تحتويه…قبل في عهد أحد الخلفاء الراشيدين …كان فيه راجل ديما يشرب لين مات جت مرته لإمام معروف قتله فلان مات ونبيك تصلي عليه صلاة الجنازة …رد عليها الامام وقالها تبيني انا نصلي ع هذا للي يشرب تاب قبل مايموت قتله لا لأخر يوم في عمره
وهو يشرب …
رفض الامام يصلي ع الراجل بعد فترة من موته الإمام شاف رؤية الراجل هذا نفسه في منزلة من منازل الجنة فإستغرب فسأل الامام الرجل في المنام قله كيف تشرب وتخش الجنه قاله الحمدلله رحمة الله واسعة والحمدلله انه مفاتيح الجنة مش بيدك…
بعد فترة قعد الامام يسأل قال لازم نعرف شن العمل للي داره في حياته باش خش بيه الجنة
قعد يسأل في مرته قتله كان كل يوم خميس يجمع في الأيتام ويصرف عليهم ويطبطب عليهم…
يقين:سكتت وماقدرتش نتكلم….
محمد:الخمر من الكبائر زي مالزنا من الكبائر ماتعرفيش مرات داير شئ في حياته ربي يغفرله بيه…
يقين:فهمت معنى كلام محمد كويس ….وقررت نروح لحوشي لكن مازال ماقدرتش نقرر نسامحه ولا،لا.
جاء الصبح شوية وسمعت صوت عماد قدام الباب طلع مهاب يجري فتحله الباب…
عماد:ألبسي انت ومهاب عندنا مشوار …
يقين:خشيت نجهز في نفسي لين شفته مدخل شنطة ملابسه…مش لو نسمع فيك معناها سامحتك …وبترجع برا لما لمرتك للي فضلتها عليا حبيبتك….
عماد:لو تعرفي الدين زي قبل تعرفي انه من حقي نرجع وللي تحكي عليها طلقتها …وماعنديش مرا غيرك
يقين:سكتت حط ملابسك وانت اقعد انت في الدار وانا نقعد مع مهاب….
عماد :غير هيا نطلعوا مرات بعد للي تسمعيه ….ترجعي تفكري صح