رواية فتى القطار الفصل الثاني 2 بقلم آيات محمد
رواية فتى القطار الجزء الثاني
رواية فتى القطار البارت الثاني
رواية فتى القطار الحلقة الثانية
سيبته ومشيت بسرعه وحاسه قد ايه انا قلبي بيدق من التوتر اصل مش معقول اكون حبيته من ٤ ساعات بس قعدناهم مع بعض .
جريت رنيت على ماما حكيتلها على اللي حصل
– ايوه يا ماما الحقيني
– في ايه يا نور انتِ كويسه ؟ ايه حصل ؟
– انا كويسه ايوه لا ماتقلقيش
– امال ايه حصل بس قلقتيني
– قابلت ظابط الجيش دا تاني وقعدنا اتكلمنا كتير وقالي قد ايه هو مبسوط انه شايفني تاني وسالني ان كنا هنتقابل تاني ولا لا بس انا قولتله يسيبها على ربنا ومشيت وسيبته
– نور حبيبة ماما انا اول مره احس انك متوتره بسبب حد كدا
– انا نفسي مش عارفه ايه بيحصلي دا كنت مبسوطه اوي يا ماما ماكنتش عايزه الوقت يخلص بس دا غلط دا شخص انا ماعرفوش وانا ماكنتش عايزه دا يحصل
– ماتلوميش نفسك على حاجه مش بايدك وبعدين خلاص يا حبيبتي انتِ كبرتي يعني طبيعي تحبي وتتحبي وتتجوزي بس انتِ اتصرفتي معاه التصرف الصح بس اهم حاجه تركزي في دراستك دي اخر سنه ليكِ خليها تعدي على خير بقا وتجيبي تقدير زي كل سنه
– حاضر يا ماما ماتقلقيش عليا انا هقفل بقا عشان اروح اركب
– ماشي يا حبيبتي خلي بالك من نفسك بس في رعاية الله
قفلت مع ماما وحسيت اني اطمنت شويه اكيد كلامها كان كله حنيه ومتفهمه موقفي جدا روحت السكن ورتبت هدومي مكانها وشغلت مزيكا وبدأت اشوف مذاكرتي
” عمري ماشوفته ولا قابلته وياما ياما شاغلني طيفه وفي يوم لاقيته .. لاقيته هو ..هو اللي كنت بمتنى اشوفه … “
اندمجت مع الاغنيه ونسيت نفسي ونسيت مذاكرتي وماكنتش شايفه غيره قدامي وبسال نفسي ممكن اشوفه تاني امتى ؟
قررت اقوم اعمل قهوه اشربها جايز تفوقني شويه واقدر اركز في المذاكره حضرت الكنكه والبن وبدأت اقلب على نار هاديه وشوفت عينيه في القهوه ومعاها صوت الست وردة وهي بتقول
” يا حبيبي كنت واحشني من غير ماشوفك وتشوفني والقدر الحلو اهو جابني وجابك علشان تقابلني … “
ايه اللي انا فيه دا لازم افوق انا كده مستقبلي هيضيع فعلا على قد ماقدر شيلت الموضوع من دماغي وبدأت اذاكر
خلصت امتحاناتي خلاص النهارده اخر يوم وكنت متفقه مع صحابي نروح نقعد في اي كافيه هادي بعد الامتحان عشان نكسر الضغط النفسي اللي كنا فيه دا
– ها يا بنات هنروح فين ؟
– اي مكان هادي انا تمام
منهم واحده اقترحت علينا كافيه فعلا كان هادي ودافي اوي ومناسب لجو الشتا اللي احنا فيه لاقيت اسماء بتاخدني بعيد عنهم وبتسالني عليه !
– ماعرفتيش عنه اي حاجه تقدري توصليله منها ؟
– لا يا اسماء مافيش اي جديد الاحسن اني لازم افوق فعلا من الوهم اللي انا فيه دا اكيد هو مش فاكرني حاليا وانا بس اللي شاغله بالي بالموضوع دا
– لو ماكنتيش في باله من قبل كدا ماكنش سالك اخر مره هتتاقبلوا تاني ازاي ؟
– تفتكري ؟
– افتكر جدا ، المهم خلينا نروح نقعد مع البنات عشان ماحدش ياخد باله ولا حد يحس بحاجه
– تمام يكون احسن بردو
فات اليوم بضحك وهزار و لعبنا كتير وكل واحد فينا روح بيته انا ماكنتش عايزه امشي كنت حابه المكان ولمة صحابي حواليا وحاسه ان في حاجه ربطاني بالمكان اوي
فات شهر الاجازه اليتيم اللي اخدناه ورجعنا بقا على سواد مشروع التخرج بس قررت قبل مانبدأ اول يوم دراسه اني لازم اروح الكافيه دا تاني كلمت اسماء في الموبايل عشان تيجي معايا مش بحب اقعد في اي مكان لوحدي حتى لو متضايقه من حاجه
– اسماء ممكن بكره اول مانزل اسكندريه اسيب حاجتي ف السكن وننزل نروح الكافيه اللي كنا فيه اخر مره ؟
– بس كده ؟ دا انتِ تؤمري تحبي نكلم البنات ؟
– لا لا خلينا لوحدنا
بحب اسماء اوي وقد ايه هي محتوياني ودايما فهماني وهي من احسن الصحاب اللي عدوا عليا في حياتي بتفهمني من غير اي حاجه
ركبت القطر للمره المليون جايز يكون حظي حلو المره دي واقابله بس زي كل مره مش بلاقيه مالقتهوش المره دي كمان وصلت وروحت السكن سيبت حاجتي وقررت اني البس اكتر حاجه بتريحني عشان مابقاش متكتفه لاني ببقى شايفه طول عمري ان اخر يوم اجازه هو اخر يوم في الحريه لبست بنطلون جينز اسود وعليه توب اسود وشيميز كاروهات اسود في رصاصي ورفعت شعري لفوق ولبست كوتشي اسود ( استغليت ان ماما مش موجوده عشان تزعقلي على كل الاسود اللي لبسته ) بس حطيت المانيكير احمر واخدت شنطه حمرا ونزلت قابلت اسماء وروحنا كافيه طلبت نيسكافيه بندق وفضلت قاعده ساكته ومركزه في الديكور اوي كان في دفا وحنيه غريبه في المكان زي الحنيه اللي حسيتها فيه تماما لحد ماقطع سرحاني صوت اسماء
– مالك يا نور ؟ من وقتها وانتِ مش طبيعيه بقيتي هاديه اوي ليه كدا
ضحكت وانا بقولها
– يعني هو وانا هاديه مش عاجب ولا وانا مجنونه عاجب انتوا عايزين مني ايه
– عايزينك بس تبقي كويسه
طبطبت على ايدها وقولتلها
– انا كويسه يا سمسمه والله ماتقلقيش ..
قطع كلامنا النادل وهو بينزل الطلبات بس ماكنش النادل دا كان هو !!
قلبي رجع يدق تاني زي اول مره شوفته لا بس المره دي اكتر من الاول اتلغبطت وبان عليا ومابقتش عارفه اعمل ايه
– انا شوفتك قولت اجي اقدملك الطلبات بنفسي واسلم عليكِ ايه اخبارك ؟
– آآآ انا تمام انت ايه اخبارك ؟
– انا تمام الحمد لله
بص لاسماء وكمل كلامه – صاحبتك ؟
– ايوه اسماء
– اهلا اتشرفت بيكِ
– دا نديم يا اسماء
– اهلا يا استاذ نديم انا كمان اتشرفت بيك .. طاب نور انا هطلع اعمل مكالمه ضروري لماما ومش هتأخر
اسماء قررت تسيبني وانا محتاسه لوحدي وتقوم انا اول مره احس اني مش عارفه اتصرف كدا .. وهو شيك اوي وعاقل جدا وباين في عينيه حاجه غريبه اوي هو فرحان زيي انه شافني
– كان معاكِ حق لازم نسيب ربنا يدبرلنا الفرصه السعيده دي ماكنتش اتوقع اشوفك هنا
– ولا انا الحقيقه انت بتتعمل هنا ايه ؟
– انا صاحب المكان اصلا
رجعت خصلة شعري اللي كانت نازله على وشي وكإني بداري توتري
– ايه دا بجد ماكنتش اعرف صدفه غريبه اوي
– سيبي شعرك على وشك عادي شكلك حلو على فكره .. المهم طمنيني عملتي ايه في امتحاناتك ؟
– والله تمام الحمد لله عديت منها على خير ادعيلي اخلص السنه كلها على خير عشان اتخرج واخلص بقا
– ياستي ماتستعجليش هتتخرجي وتقولي يارتني
– لا لا هيوحشني لمة صحابي بس لكن الكليه استحاله
– اسكندريه مش هتوحشك ؟
– اكيد هتوحشني جدا كان نفسي افضل عايشه فيها
– ممكن ربنا يستجيب لامنيتك دي وتفضلي عايشه فيها على فكره
وفي نفس الوقت اشتغلت اغنيه لعبد الحليم وهو بيقول ” كان يوم حبك اجمل صدفه .. لما قابلتك مره صدفه .. ياللي جمالك اجمل صدفه ياللي جمالك اجمل صدفه .. كان يوم حبك صدفه …. “
حسيت ان بعد الكلمه دي وشي احمر وحسيت بحر جدا رغم ان الجو كان ساقعه اليوم دا ماعرفش هو يقصد اللي انا فهمته ولا انا اللي عايزه افهم كدا وخلاص
كمل كلامه وهو بيضحك وسحرت ف ضحكته اكتر ما انا سرحانه
– مالك وشك احمر كدا ليه
حطيت ايدي على وشي بسرعه
– لا لا عادي وشي ماحمرش ولا حاجه
– اتمنى ماكنش قطعت كلامكوا في موضوع مهم
اسماء قالتلها وهي بتقعد على الكرسي اللي جنبي
بصلي وهو بيرد عليها
– لا لا تمام مافيش حاجه
لاقيته طلع ورقه وقلم وكتب فيها رقمه وهو بيقول
– لو احتاجتي اي حاجه كلميني هتلاقيني قدامك على طول .. اسيبكوا بقا عشان ماضايقكوش اكتر من كدا
قام ومشي وانا عيني عليه لحد مادخل الاداره وانا مش مستعوبه اي حاجه من اللي حصلت واني شوفته تاني اصلا ! يارب انا مش عايزه قلبي يتعلق بحبال دايبه
– يا نور ايه يابنتي بكلمك من ساعتها في ايه
– قلقانه اوي يا اسماء وفرحانه في نفس الوقت ومتوتره
بصت لورقة الرقم في ايدي وهي بتقول
-طاب وهتعملي ايه ؟
– مش عارفه لسه
يتبع…
لقراءة الفصل التالي : اضغط هنا
الرواية كاملة اضغط على : (رواية فتى القطار)
