رواية غنوة الحب الفصل الثاني 2 بقلم ندى زايد
رواية غنوة الحب الجزء الثاني
رواية غنوة الحب البارت الثاني
رواية غنوة الحب الحلقة الثانية
لاقيت شخص طويل واقدر كمان اقول انه وسيم ممكن يكون في اخر التلاتينات الحاجة الوحيدة اللي تشبه اللي رسمته في خيالي هي جلبيته اللي لابسها والشال اللي حاطه علي كتفه هو دا ابن عمي ! دا العمدة عندهم ! دا جوزي انا ؟!!
وعند الفكرة دي فقت لنفسي تاني مهما كان شكله دا ميمنعش اني كرهاه حتي لو كان توم كروز …كان داخل ومعاه بنت جميلة ماشية جمبه بهدوء وابتسامة جميلة علي وشها قربت مني أنا ونغم وهي بتسال بشغف وحب
انتو بنات عمي صح مين فيكو بقي مرت اخوي
عمتو رباب شاورت عليا بحب وهي قربت وحضنتني بحب حسيتها طيبه اوي فبادلتها الحضن بهدوء
أنا مروة أبجي أخت زين الصغيرة وتجدري تعتبريني اختك انتي كمان لو تحبي يعني
ابتسمتلها بحب وطبطبت علي كتفها وانا عيني علي زين اللي باس ايد جدي وحضن ابويا بحب وسلم علي امي ووقف جمبهم بهدوء وفجاه نظراته بقت محاوطاني وحقيقي نظراته دي ربكتني اوي حسيت نظرته غريبة ومش مفهومة فضلت بصاله باشمئزاز لحد ماجدو قطع الصمت وهو بيقول
_كويس انك جيت يازين ياولدي مش عجباهم عروستك جلت تقولنا انت رايك
بصلي والكل كان باصص ليه كانهم مستنيين راي جناب العمدة بجد.. ابتسم ابتسامة هادية وقال
=الدكتورة ست البنات ياجدي ومفيش أحلي من مرتي في الدنيا كلها
حقيقي رد مكنتش متوقعاه منه بس هو عرف منين اني دكتورة وليه يجاملني بالشكل دا وهو ميعرفنيش كلهم ابتسمو ماعدا مرات عمي اللي كلام زين عصبها اكتر
-والله ياولدي كأنك بجيت محتاج تكشف نظر.. عين وصابتك والله
كنت لسة هرد عليها بس مروة قاطعتها وهي بتطبطب علي كتفي وبترد بابتسامه حب
*دا علي كدا كلنا محتاجين نزور الدكتور يما … دي غنوة زي الجمر مع اني هبدا اغير كدا علي اخوي اللي مكنش بيقول كلام حلو لحد غيري
ساعتها قرب منها زين وباس راسها بحب
_انتي جلب اخوكي يامرمر ودي حاجة معتتغيرش واصل
للحظة ابتسمت حبيت انه رضاها وكان حنين معاها يمكن لاني ارتحت لمروة وحسيت بطيبتها او يمكن لان طول عمري كان نفسي في أخ او يمكن… خرجت من أفكاري علي صوت بابا وهو بيحضن أخوه محمد واتعرفنا عليه هو ومراته طنط سعاد وابنهم مروان …فضلنا كلنا تحت سوي واتغدينا مع بعض في جو أسري لطيف أوي كانت بس تعليقات مرات عمي صفاء هي اللي بتوترنا كلنا وأخيرا سمحولنا نطلع اوضنا نرتاح اللي كانت في الدور التالت من البيت حقيقي كنت مستنية الكلمة دي من بدري حاسة بضغط كبير أوي علي اعصابي من افكاري ومن نظرات زين ومن الحياة الغريبة اللي دخلتها فجأة دي..
المكان هنا ميشبهش ابدا اللي كان في خيالي اوضتي كانت كبيرة وواسعه وديكورها هادي ولطيف وكانت بتطل علي الجنينة الكبيرة اللي برا اتنفست بهدوء وطلعت بيجامه من شنطتي ودخلت اخد دش يمكن اهدي شوية خرجت لاقيت نغم عندي في الاوضة قاعدة علي السرير وكانها مستنياني وانا متاكدة من كمية الكلام اللي هتقوله دلوقتي واللي حقيقي انا مش مستحملة اسمع منه حاجة
_غنوة اخيرا خلصتي دا انا افتكرتك نمتي جوا
=كنت محتاجة افصل شويه والمياه بتهدي اعصابي
الحقيقة ان المكان كله يهدي الاعصاب بجد مكنتش متخيلة انه حلو كدا
_اه لطيف بس دا مش معناه حاجة عادي يعني
=بلاش طريقتك دي ياغنوة اعترفي ان المكان عجبك وانك اتصدمتي انهم عندهم زوق حلو ومش زي خيالك وكمان الناس هنا كويسين انا حبيتهم اوي
كملت كلامي وانا بقعد قدام التسريحة وبمسك فرشاه شعري
_نغم انا مقلتش حاجة الناس كويسين وانا حبيتهم والمكان حلو ولطيف اه وبعدين ؟ دا ميغيرش اي حاجة بالنسبالي
=طب بذمتك زين معجبكيش ؟
حطيت الفرشاه بعصبيه وقمت من مكاني
-نغم انتي اتجننتي هو انتي فاكرة انه أنا هقبل بالجنان ده لمجرد ان طلع شكله كويس نغم فوقي انا متجوزه واحد معرفش عنه اي حاجة ومن غير موافقتي كمان في مكان مكنتش اتمني اجي فيه حتي لو في احلامي وبسببه ضيع كل تعبي ومجهودي في اني اسافر واحقق حلمي وانتي عارفة كدا كويس فكل دا ميفرقليش في حاجة غير اني لازم اطلق وامشي من هنا في اقرب وقت
= ممكن تهدي ومتبقيش مندفعة كدا دا كان مجرد سؤال أنا منكرش ان طريقة جوازك كانت غلط بس برده متاكده ان بابا مش هيعمل كدا الا لو فيه سبب قوي ومقنع كمان
عند السيرة دي افتكرت بابا وقعدت علي السرير بحزن
_ هو لسه مش عاوز يكلمني برده ؟
قربت مني نغم وطبطبت عليا
= متزعليش ياغنوة بابا بيحبك واكيد هيكلمك تاني بس طريقتك كانت وحشة اوي معاه وحقه يزعل
_ أنا عارفة اني غلطت بس بجد كنت متفاجاة أنا لحد.دلوقتي مش مصدقة كل دا وبتمني انه يبقي مجرد كابوس هصحي منه قريب انا زعلانه منه اوي انه حطني ف الموقف دا بس برده زعلانه انه مبيكلمنيش ده عمره ماعملها حتي اما صممت اني اسافر معملش كدا انا تعبانة اوي يانغم مش فاهمة حاجة ومش عارفة اعمل اي
مع اخر كلمة سمحت لدموعي تنزل بهدوء لاني بجد تعبت حضنتني نغم وفضلت تهديني لحد ماحاولت تخرجني من كل دا
_ بس شفتي حماتك يابت صحيح شكلها حرباية
= يختي بس متقوليش حماتك
ضحكت نغم وكملت
_ ماشي يختي مرات عمك شكلها مش طيقانا كلنا كدا علي بعض
مسحت دموعي وقمت للتسريحة تاني وانا بفكر في كلامها
= بصراحة مرتاحتلهاش ابدا .. انا قلت مش طيقاني عشان مش حابة الجوازة دي.بس لاحظت انها مش حبانا كلنا وكلامها كله قصداه وعاوزة تضايقنا تفتكري تبقي هي الكارت اللي هيساعدني امشي من هنا ؟
قربت نغم وقفت ورايا وبصتلي في المرايا
_ بصي ياغنوة احنا لسه مش عارفين حاجة ولا عارفين الايام مخبية لينا اي بلاش توتري علاقتك ببابا اكتر من كدا حاولي تعدي اليومين دول علي خير لحد متتصالحو وبعدين هنشوف هنعمل اي متفكريش كتير كله هيتحل صدقيني
قربت مني وباست راسي بهدوء ومشيت لاوضتها وسابتني في حيرتي وأنا بفكر في ان فعلا عندها حق لازم اصالح بابا الاول وبعدين هشوف أعمل اي رميت نفسي علي السرير بتعب وقررت انام وبعدين اشوف هعمل اي …….
صحيت من النوم علي صوت خبط علي الباب بس مش خبط عادي ده حد هيكسر الباب قمت مخضوضة فتحت الباب بعصبية
_ اي اي في اي حد يخبط بالطريقة دي
لاقتها مرات عمي بصالي بعصبية
= اي يختي نموسيتك كحلي كل دا نوم
حاولت اهدي نفسي علي قد.مااقدر
_ في حاجة حضرتك محتاجة حاجة ؟
= حضرتي محتاجاكي تصحي وتقومي تساعديني
_ اساعدك في اي ؟
= في تنضيف البيت وعمايل الوكل وشغل البيت ولا فكرانا الخدامين اللي جيبنهملك ابوكي ؟
بصتلها بعصبية وانا مش مستوعبة كلمة من اللي بتقوله
_ بيت اي وشغل اي وانا مالي بكل دا اصلا
= لا يحبيبتي فوجي لنفسك كدة انتي مرت ولدي يعني بجيتي من حريم البيت دي ومعندناش حريم تتدلع
مسكت ايدي بعصبيه وشدتني من اوضتني
= انجري جدامي يابت ليلي ولا امك مطلعاطو خايبين زيها
كنت لسه بلف وهرد عليها لاقيت حد بيمسكني من ايدي بحنيه وبيرجعني وراه ..بصتله باستغراب لاقيته زين !
_ في اي ياما علي الصبح معليه صوتك ليه
= هتحجر علي امك عاد جاية اصحي الهانم تنزل تساعدنا ولا عاوزني اشتغلها خدامه اياك
_ معاش ولا كان ياما بس هي مش هتعمل حاجة ومش هتنزل دلوقتي دي لسه واصله امبارح شغل اي اللي تعمله هي
= والله عال جاي تنصر بنت ليلي عليا بتنصر حته البت دي ع امك
_ يما هي مش حرب عشان انصر حد ع حد بس انتي ست العارفين بالاصول ودي مرت العمدة مش اي حد وكمان الخدم في البيت كتير يعني لا انتي ولا هي مطالبين تعملو حاجة ريحي حالك ياست الكل واللي تعوزيه الف مين يعملهولك
مكنتش مصدقة انه بيدافع عني ولا انه واقف قصاد امه عشاني !! ليه يعمل كدا معقول بيحاول يخليني اوافق عليه ! خرجت من افكاري علي صوت بابا وهو جاي علينا بسرعه وخدني في حضنه وهو بيتكلم.معاها
* جرا اي ياصفاء علي الصبح مالك ومال بنتي
= بنتك تبقي مرت ولدي وانت اللي اختارت فاتحمل اختيارك يابو البنات
سابتنا ومشيت وهي بتبصلنا بحقد وبابا مسكني من ايدي وقعد يبصلي بقلق
* انتي كويسة فيكي حاجة حد عملك حاجة
بصتله وهزيت راسي عشان اطمنه وبجد لو هشكر الست دي ع حاجة هشكرها انها سمحتلي اكلم بابا تاني ويحضني تاني بالشكل دا
_ متجلجش يعمي بنتك ف الحفظ والصون انت عارف امي بس وحركاتها حجك عليا يادكتورة …عن اذنكو دلوجت
سابنا ومشي وبابا خدني دخلني اوضتي وكانه افتكر تاني انه مبيكلمنيش وكان سايبني وماشي قمت جريت عليه ومسكته من ايده
_ بابا أنا أسفة أنا مكنش ينفع اكلمك كدا وصدقني كل اللي انا فيه ميجيش حاجة جمب احساسي اني مزعلاك بالشكل دا حقك عليا والله مش هتتكرر تاني ارجوك متفضلش زعلان مني انا محتاجالك ومحتاجة افهم كل اللي انا فيه دا منك انت ارجوك يابابا …
بصلي بحب وبعدين حضني وطبطب عليا
= انا معنديش اغلي منك انتي واختك ياغنوة انتو نور عيني يبنتي حقك عليا اني مقلتلكيش بس صدقيني مل دا.لمصلحتك وهيجي وقت وتفهمي كل حاجة خليكي واثقة في ابوكي وانه عمره ميضرك ابدا
_ انا واثقة فيك يابابا وفاهمة كل دا صدقني بس …
= من غير بس صدقيني يبنتي انتي حكمك علي الدنيا من براها دا غلط الناس هنا مش وحشين زي منتي فاهمة والبلد هنا جميلة ولو شفتيها هتحبيها يمكن اكتر من بلاد برا اللي هتموتي عليها انا عمري مكنت ضدك ولا ضد احلامك بس ادي فرصة لبلدك وناسك وبعدين احكمي انتي بتاخدي بالمظاهر ودي الحاجة الوحيدة اللي نفسي اغيرها فيكي وصدقيني زين كمان مش وحش ولو لفيتي الدنيا كلها مش هتلاقي حد يحبك ويحافظ عليكي زيه انا عمري ماارميكي ياغنوة دي مش جوازة والسلام وهيجي يوم تشكريني ع كل دا ادي نفسك فرصة بس واسمعي كلام ابوكي
بصتله وانا بحاول استوعب كل اللي بيقوله يعني اي زين بيحبني هو يعرفني منين عشان يحبني وليه بابا واثق فيه اوي كدا قررت اني اهدي زي مانغم قالتلي ومزعلش بابا مني واحاول اخلص من كل دا بهدوء من غير ماازعله مسكت ايده وبوستها بحب ووعدته اني هحاول وانا مش متاكدة اني هقدر احافظ علي الوعد دا
باب الاوضه خبط وكانت نغم وماما
– الله الله وانا أقول الحاج فين اتاريه مع غنون انتو اتصالحتو من ورانا ولا اي
قالتها نغم وهي بتغمز بعنيها وبابا مد ايده خدها ف حضنه
_ احنا كنا اتخاصمنا اصلا يالمضة كانو شويه زعل وراحو لحالهم
– اخرج منها انا يعني خلاص لاقيت حبيبتك ورمتني
بصلها بابا ضحك وسابنا احنا الاتنين وراح حاوط ماما بدراعاته وقال
= والله انا مفيش غير ليلي وبس اللي حبيبتي
ماما اتكسفت وطبطبت عليه بحب
_ انت اللي ناصفني والله ياعلي من بناتك دول
جرينا انا ونغم وحضناهم وبجد انا لو لفيت الدنيا مش هلاقي حد يحبني ربع حب بابا وماما لبعض في وسط فرحتنا ولمتنا اللي بتنسيني الدنيا حد خبط علي الباب وبلغ بابا ان جدي عاوزنا كلنا تحت
غيرنا هدومنا كلنا ونزلنا لقينا الكل متجمع تحت وجدي واقف ساند علي عصايته بقوه وهيبة نزلت انا ونغم سلمنا عليه هو وجدتي وقعدنا كلنا لحد ماقطع الصمت صوت زين
– جدي هستاذن انا عندي شغل كتير محتاج مني حاجة
= اجعد يازين ياولدي هجلكم كلمتين وتوكل علي الله
لاقيت عمو حسن بيبص باستغراب
_ حصل حاجة يابوي ولا اي
= حصل كل خير انا حبيت اعرف الكل ان علي ومرته وبناته ليهم في البيت زيكو كلكو مش معني انه غاب عن البيت سنين انه مالوش حج فيه دول مش ضيوف دول صحاب بيت واللي يدوسلهم ع طرف حسابه هيبجي معاي مفهوم
رد عليه عمو محمد
– يابوي علي يبجي اخونا وبناته بناتنا لازمته اي الكلام دا عاد
_ انا بوضح للكل يمحمد ياولدي احسن فيه ناس كده تحب تسمع الكلام بنفسها
لمحت جدي وهو بيبص لمرات عمي صفاء كانه بيحذرها والغريبه انها محاولتش ترد زي عوايدها
_ تاني حاجة كلكو عارفين ان زين كتب كتابه علي غنوة في مصر وان زين اجل فرحه لاجل ميعاود عمه هنه ونفرح كلنا عشان كدا تجهزو حالكم كلكم فرح زين علي غنوة الخميس الجاي
حسيت كان حد صب عليا جردل تلج انا لسه كنت بفكر ازاي هخلص من الورطه دي يقولو فرح
قمت من مكاني بعصبيه وكنت لسه هعترض بس سمعت زين وهو بيقول
_ بس أنا مش موافج
….
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية غنوة الحب)
