رواية غموض الحب الفصل الثامن 8 بقلم لولا
رواية غموض الحب الجزء الثامن
رواية غموض الحب البارت الثامن
رواية غموض الحب الحلقة الثامنة
تبدأ الاحداث في الشارع عند عمر عربيته مقلوبه والدنيا زحمه والناس حواليه من كل حته بيحولوا يخرجوا منها
احد الظباط بحده اوعى يابني منك ليه اوعى احنا هنطلعه
-اتفضل ياباشا
الظابط للاسعاف بحده انتوا واقفين تتفرجوا يلا منك ليه خدوا الراجل بسرعه هيموت
والاسعاف ابتدت فعلا تشد عمر من العربيه وخرجوا كانت دماغه بتنزف ووشه مليان دم وحطوا على الترولي وركبوا عربيه الاسعاف
الظابط لاحد الاشخاص: شوفت اللي حصل ???
الراجل اه ياباشا هو كان ماشي طبيعي بعدين لقيناه بيمشي بتهور والعربيه اتخبطت في العمود واتقلبت تقريبا الفرامل عملتها معاه
الظابط بتنهيده طيب تمام روح انت
في المستشفى
زينب كانت واقفه تعبانه اوي وقلبها واجعها بسبب وضع عمر علشان وفاه مامته وغيرانه من اسماء وازاي واخده عليه اوي كده فاقت من شرودها على صوت صاحبتها
شيرين بضحك ايه اللي واخد عقلك
زينب بتنهيده ولا حاجه ياختي بس مليش مزاج للشغل انهارده بصراحه
شيرين مالك يا زينب في حاجه مضيقاكي ? عملتي اي صح في العريس اللي كان جايلك
زينب بتنهيده رفضته يا شيرين مش العريس اللي مضايقني هي حاجات كتير والله بس يلا اديني بشتغل وبلهي نفسي من التفكير
نهى دخلت واكملت شيرين استماره المريض الجديد اللي عمل حادثه وديتيها فين ???
شيرين بتذكر : انهي مريض ??? اااه اللي هو الظابط عمر عزيز ده ??
زينب سمعت الاسم الابره وقعت من ايديها اتكسرت فاكملت نهى اه هو فينها وانتي يا زينب تعالي الدكتور عايزك معاه في اوضه العمليات
زينب بدموع وصدمه استني استني بس عمر مين اللي عمل حادثه ????وتابعت بحده وريني .. وريني الاستمااااره اخلصي
شيرين جابتها واكملت باستغراب اهي مالك يا زينب في ايه ??
زينب مسكت الورقه بلهفه وفضلت تبص على البيانات اللي خدوها من بطاقته واتصدمت ودموعها نزلت لما اتاكدت انه هو فعلا فسابت الورقه وطلعت جري على برا وهي بتعيط ومرعوبه عليه
نهى بستغراب هي مالها زينب في ايه
شيرين والله يابنتي مش عارفه من ساعه ماجات مش مظبوطه تلاقيه قريبها ولا حاجه
عند اوضه العمليات الممرضين منيمه عمر على الترولي وكان هيدخل العمليات فشافته زينب فعيطت اكتر وجريت عليه اتصدمت بشكله وحطت ايديها على بوقها وقلبها وجعها واكملت بعياط وهي بتهزه عمر عمر قوم ياحبيبي وخبطت على وشه براحه واكملت بعياط يا عمرر لالالا انت هتبقى بخير والله هتبقى بخير رد عليا يا عمر ومسكت ايديه اتاكدت ان في نبض فتنهدت بارتياح فاكمل الدكتور لما جيه يلا يازينب ورايا
زينب رجعت بضهرها لورا واكملت بعياط ورعشه لالا انا مش هقدر ادخل ارجوك يا دكتور خد حد غيري اعصابي تعبانه اوي
الدكتور بستغراب مالك يا زينب دي اول مره تخافي وتترعشي كده من شكل مريض
زينب عينيها كانت متثبته عليه واكملت بعياط ورعشه ده … ده قريبي وانا لسه … لسه سيباه بخير فمخضوضه ومش قادره اتلم على اعصابي ومش هقدر اشوفه كده ارجوك يا دكتور الحقه ابوس ايدك اتصرف وعيطت اكتر وحطت ايديها على بوقها
الدكتور بحزن اهدي يابنتي خير انشاء الله دخلوا يلا يا جماعه
زينب كانت واقفه مش قادره تسند طولها وكانت هتقع لحقتها شيرين وقعدتها واكملت بقلق مالك يابت في اييه زينب وخبطت على وشها
زينب بعياط كويسه كويسه متخافيش عليا
شيرين بخوف مخافش ازاي يابنتي انتي مش شايفه منظرك انتي جسمك بيتنفض ومش قادره تقفي على حيلك مين عمر ده ??? حبيبك صح ??
زينب هزت راسها ب اه بعياط واكملت بوجع واضح في صوتها حبيب عمري واول واخر حب في حياتي
شيرين حضنتها واكملت بحزن يحبيبتي … ربنا يطمنك عليه يارب
زينب بعياط يارب يا شيرين ورفعت ايديها وتابعت يااارب ارجوك مشوفش فيه حاجه وحشه حقيقي مش هقدر استحمل وعيطت
شيرين بحزن طبطبت عليها واكملت اهدي اهدي يحبيبتي وادعيله باذن الله خير انا هدخل معاهم وهطلع اطمنك
زينب بلفهه اه ياريت يا شيرين ربنا يخليكي ليا ياريت بجد
شيرين طبطبت على كتفها واكملت حاضر ياحبيبتي اهدي
ودخلت وزينب فضلت قاعده قلقانه فمسكت الفون وجابت القرآن وفضلت تقرا وتدعيله وهي بتعيط وايديها بتتنفض
وشويه وطلعت شيرين فقامت زينب بلهفه واكملت بعياط ها يا شيرين طمنيني الله يخليكي هو كويس صح
شيرين بحزن اهدي يحبيبتي هيبقى بخير انا رايحه بس بنك الدم ادور على فصيله O اصله نزف دم ويارب الاقي انتي عارفه دي نادره جدا ومش هلاقيها بس اشوف وخلاص
زينب بعياط ولهفه انا نفس الفصيله خدي مني مش مهم بس يلا بسرعه ارجوكي
شيرين بحزن يحبيبتي اهدي طيب انتي خدتي اي ادويه الكام ساعه اللي فاتوا او حتى عندك اي مرض مزمن ???
زينب بتذكر لالالا مخدتش حاجه ولا عندي حاجه الحمدلله
شيرين بحب طب يلا تعالي كده كده مش هنحتاج كتير
زينب قامت معاها ودخلت الاوضه ونامت على السرير وشيرين ابتدت تسحب منها الدم فا زينب غمضت عينيها بألم ودقايق تنهدت بارتياح لما شيرين خلصت سحب الدم
شيرين بحب اشربي بقى عصير ولا حاجه علشان تسندي نفسك
زينب بتعب وارهاق مش مهم المهم اطمن على عمر
شيرين بقلق لالا مش هينفع يا زينب انا هروح ادي الكيس للدكتور وانتي هجبلك حاجه تشربيها
وبلفعل راحت ادت الكيس للدكتور ورجعت لزينب سندتها وقعدوا جمب اوضه العمليات واديتها العصير واكملت امسكي يحبيبتي
زينب بارهاق مش عايزه يا شيرين بس طمنيني عمر ..
شيرين بمقاطعه عمر زي الفل والله طلما الدم هيتنقل هيبقى بخير انتي بس اشربي ده علشان تسندي نفسك وغلاوته عندك
زينب بدموع يارب بجد ومسكت العصير بارتعاش وشربت منه ورجعت راسها لورا بتعب
شيرين طبطبت عليها واكملت لو مش هتقدري تكملي اخد الشيفت مكانك انا مفروض اروح بس مش مهم
زينب بسرعه: لالالا ده انا هقعد لو مكنتش هقعد علشان عمر مينفعش اسيبه بلوضع ده لوحده مالوش حد
شيرين بحب ربنا يطمنك عليه يحبيبتي
———————————————-
عند امنيه
امنيه بدموع فرح وتفاجئ حساام !!!!! والصنيه وقعت من ايديها
حسام اتخض فاكملت سميه الام بضحك : ينيلك بت كده حته صنيه مش عارفه تمسكيها كويس ووقعتيها قدام الراجل ولا ليلى اللي في مسلسل نسر الصعيد لما اتقدملها زين القناوي
حسام بضحك كان ظابط بردو مش كده
سميه بضحك ايوه متابع بقى
حسام بضحك لا سمعت والله مليش في المسلسلات .. بحيث كده بقى بص للاب واكمل انا كلمتك يا عم محمد واتفقت معاك بس جاي اعيد كلامي قدام العروسه علشان تاخدوا رايها وزي ما ام امنيه قالت ضحك وتابع زين جاي يطلب ايد ليلى قولت ايه
امنيه كانت دموعها بتنزل من الفرح وبتضحك ومش مصدقه فاكمل محمد بضحك لا وانت يابني نسر الصعيد بحق وحقيقي ربنا يحميك لشبابك ولاسيوط يارب .. وانت ميعبكش حاجه يا حسام يابني موافق طبعا بس نشوف رأي عروستنا
امنيه ضحكت بفرح ودموعها في عينها واكملت : اللي تشوفه يا بابا
سميه بضحك طب داري فرحتك طب الاول بعدين قولي اللي يشوفه بابا
محمد بضحك بس يا سميه متكسفيهاش خلاص يبقى على البركه ربنا يتمملكم بخير يا ولاد
حسام ابتسم بفرح واكمل حيث كده ينفع اكلم العروسه في كلمتين
سميه بحب ينفع طبعا يا ابني دخليه البلكونه وادخلي معاه يا امنيه
ودخلت امنيه ودخل حسام وراها واكمل بابتسامه جذابه : واحشتيني
امنيه ابتسمت بخجل واكملت اقعد ساكت خالص علشان انت قطعت خلفي والله العظيم
حسام فضل يضحك واكمل بحب حقك عليا معترف ان مكنش ينفع اجي عليكي بزياده لما قولتلك انك زي زينب بس والله كنت عايز اتاكد بتحبيني زي ما بحبك ولالا
امنيه بصتله برفعه حاجب واكملت بتنهيده طب الحمدلله ان كسره قلبي قدام غرور حضرتك اكدتلك اللي انت عايزه وبصت على الاراضي الزراعيه قدامها
حسام وجه وشها ناحيته واكمل بحب لا عاش ولا كان اللي يكسر قلبك يا امنيه انا لو كنت اعرف ان هيحصلك كل ده وتعيطي بلشكل ده مكنتش عملت كده ابدا
امنيه بدموع انت قهرتني وخلتني احس ان الدنيا اسودت في وشي فاجاه علشان هزار زي ده خلتني حسيت ان الحياه فضيت ومفيش فيها حد رغم ان الناس كلها حواليا بس ده لاني شوفتك كل ناسي
حسام تنهد بحزن واكمل حقك عليا ارجوكي خلاص كفايه عياط وطلع المناديل من جيبه وادهالها واكمل بحب عارفه لو كنتي حلالي كنت خدتك في حضني دلوقتي وسبتك تعيطي براحتك بس معلش نستحمل
امنيه بضحك وهي بتمسح دموعها اكملت طب اتلم واسكت
حسام بضحك حاضر هتلم امسحي دموعك بقى علشان خاطري وسيبك من كل اللي فات خلينا في اللي جاي اديني جيتلك لحد عندك وبقولك شاريكي ياست البنات
امنيه بابتسامه وانا مش موافقه
حسام خلاص السلام عليكم ورايح يطلع مسكته امنيه واكملت بضحك ايه انت ماصدقت
حسام بضحك لا كنت رايح احدد معاد كتب الكتاب مع ابوكي اصل انا مباخدش عليكي
امنيه بضحك لازق بغرا يعني
حسام بضحك اه بلظبط
امنيه بحب سيبك من كتب الكتاب دلوقتي وتعالى بكره اخطبني من اهلي انت واهلك انا فاضيه بكره ومعنديش كليه
حسام والجواز ???
امنيه بضحك حسام انت مستعجل على ايه ماهنتجوز مش هنروح من بعض في حته بس انا حابه تبقى خطيبي بسرعه والجواز جاي جاي كده كده
حسام بضحك اه تبقى خطيبي بسرعه بس مش جوزي بسرعه مش كده ?
امنيه بضحك اصل انا في المواقف الجد متلاقينيش اوي
حسام بضحك ليه ياروح امك هو انا جاي اهزر ولا ايه وبعدين مانتي عارفاني وبتحبيني ناخر كتب الكتاب ليه
امنيه بضحك يا حسام اهدى ده انا لسه مش مستوعبه انك جاي تخطبني ونفسي اطير من فرحتي تقوم تسربعني و تفكر في كتب الكتاب من دلوقتي وبعدين اي حوار ابن خالتي ده عرفتوا منين علشان تخليهم يقولوا كده ??
حسام بضحك منا عرفت منين يا غبيه انك بتعيطي ماطبيعي كل ده عرفته من ياسمين لان انا لما قولت اني بحبك وعملت فيكي المقلب ده علشان اتاكد بهدلتني وحكتلي كل حاجه وانا استغليت االنقطه دي ولما كلمت ابوكي قولتله نضايقك شويه علشان افاجئك ونقولك ان العريس ابن خالتك
امنيه اتفاجئت واكملت بضحك يخربيت جحودك بجد …. يابني هو انا مبصعبش عليك مش حرام تخليني اعيط كل العياط ده
حسام بحب لا طبعا بتصعبي عليا بس فكرت اني كده هفرحك وافاجئك اكتر بعدين منا عايز نكتب علشان كده خايف اغلط واحضنك لما تكوني مضايقه وبتعيطي وانتي قمر كده او اخد عليكي اكتر في الكلام فمش حابب ابقى عملت حاجه حرام
امنيه بحب متخافش لما الاقيك هتتجاوز حدودك هفرملك علطول بس سيبني اعيش اجواء اليوم اللي اتمنيته بكل تفاصليه ده بمزاج يعني بكره قرايه الفاتحه والخطوبه وبعد كده كتب الكتاب ونقل العزال والفستان والقاعه سبها واحده واحده
حسام بحب اللي انتي تؤمري بيه انا معاكي
امنيه بصتله بحب واكملت على الله ميطلعش حلم بس واصحى واعيط
حسام ضحك واكمل بحب لا علم ياست البنات واتاريكي مش بتخرجي من بالي عماله تفكري فيا بقى
امنيه بضحك خايفه اقولك اه تاخد مقلب في نفسك فهسكت
حسام بضحك تسكتي بعد ايه منا عرفت الاجابه خلاص
امنيه بابتسامه صحيح مش معنى هنتجوز هنسى الفلوس اللي ليك بس سبني اردها واحده واحده
حسام برفعه حاجب انتي عبيطه صح هترديها لمين ?? لجوزك ???
امنيه بضحك وفيها ايه ماهي فلوسك و
حسام بمقاطعه فلوسنااا مش فلوسي … وخلاص مش عايز عبط وكلام كتير في الموضوع ده
امنيه بتنهيده تمام يا حسام لما نشوف لما نتجوز الموضوع ده
حسام لا ياحبيبتي هي مفيهاش نقاش خلاص الموضوع خلص اصلا وبعدين هتجيبي فلوس منين انتي
امنيه بستغراب منين ازاي من محل الملابس اللي شغاله فيه
حسام ااااه قولتيلي…. مش لو فضلتي شغاله فيه ??
امنيه برفعه حاجب وبحده يعني ايه بقى هو انت مفكر ان
حسام بمقاطعه رفع صباعه واكمل بحده هشششش صوتك ميعلاش علشان قسما بالله تحصل مره تاني هزعلك
سميه دخلت واكملت بقلق بس بس في ايه يا ولاد من اولها كده صوتكم عالي والجيران
حسام بحده عقلي بنتك يا ام امنيه عن اذنكم وخرج للصالون
امنيه خرجت وراه واكملت انا مش مجنونه علشان تعقلني يا حسام ولا انت ليك علاقه بلموضوع ده انا اتعودت على كده ودي حياتي من زمان
حسام بحده اديكي قولتي من زمااان .. من زمان ده بقى قبل ماعرفك فماليش علاقه ولحد دلوقتي مليش علاقه لانك في بيت راجل وبص لمحمد واكمل انا ليا اني ادخل في امنيه دلوقتي ???
محمد لا طبعا يا ابني بس في ايه لكل ده اهدوا
حسام بحده في ان بنتك مجرد ماتشيل اسمي انا حر اطلعها انزلها تروح هنا ماشي تروح هنا لا مخرجهاش من البيت اصلا انا حر ولا ايه ?????
محمد اكيد طبعا دي الاصول تسمع كلمه جوزها
حسام تمام عرف الاصول للدكتوره بقى
محمد بصلها بحده واكمل عملتي ايه يا امنيه بس
امنيه يا بابا انا مقولتش حاجه لكل ده انا بقوله اني هفضل في شغلي ومش هقصر معاه غلطت في ايه ولو قصرت يا سيدي ابقى قعدني
حسام اشتغلي يحبيبتي براحتك لحد ماتشيلي اسمي بعد الخطوه دي انا حر مع احترامي ليك ياعم محمد بس ساعتها كلام اي حد مش هيغير وجهه نظري انا مش عايز مراتي تشتغل عند حد مش مسأله تقصري ولا متقصريش
محمد عداك العيب يا ابني خلاص يا امنيه عيب لما تتجوزوا متشتغليش تاني وريحي جوزك طلما عايز كده
امنيه بدموع وبلنسبه لاني دكتوره اسنان لما اتخرج هعمل ايه بلشهاده ??
حسام هو مين بيشتغل بشهادته في مصر اساسا ??? بس على العموم لما تتخرجي يحلها الف حلال وبص لمحمد واكمل السلام عليكم يا حج همشي انا و هنيجي بكره نطلب ايد امنيه ونلبس الشبكه وبعد اذنك هاخد الرقم من ياسمين وابعتلها تنقي اللي هي عايزاه ونجيبه واحنا جايين
محمد بابتسامه تمام يابني مفيهاش مشكله تنوروا اي وقت
امنيه بغيظ خد هنا يا حسام متهاودنيش من دلوقتي عرفني اللي فيها مش هستنى نتجوز وتقولي مفيش شغل
سميه بتنهيده يابت كفاياكي عناد معاه ده احنا حتى لسه على البر
حسام بتنهيده لا ازاي متعصبنيش الدكتوره بصي يا امنيه على الدوغري وعلى بلاطه انا معنديش ستات تنزل تشتغل فوفري كلامك لان انا فعلا تعبان وجبتهالك من الاول وقولت اللي فيها مش هستنى نتجوز علشان اعرفك ومبغيرش كلامي
امنيه برفعه حاجب والله اومال لازمته ايه التعليم وطفح الدم اللي شوفته لحد مابقيت دكتوره
حسام بحده ولو سفيره ياستي انا حر انا راجل صعيدي دماغه مقفله ومعنديش تحضر علشان نريح ونقفل السيره دي
امنيه بدموع اشمعنا زينب بتشتغل يا حسام ماهي اختك اهي وانا سمعت من ياسمين انها ممرضه واحيانا بتبات في المستشفى كمان هي دي مش اختك ولا ايه ???
حسام بتنهيده زينب ابوهاا عايش وهو موافق تشتغل انما لما تتجوز لو جوزها مرضيش حقه محدش فينا هيفتح بوقه ولو انا بايدي اختار كنت قولتلها اقعدي لان دي الفطره اللي خلقكم بيها ربنا وده واجبكم الاول بس هي قالتلي انت اخويا الكبير وانا مش بكسر ليك كلمه بس ابويا وجدي كباري قالولي اشتغلي وموافقين فانا اتكتمت خالص لان مش من حقي اتحكم فيها وكبارها عايشين انا بقول رايي وبس وبراحتها انما مرااتي دي تخصني اناا علشان مش كل حاجه هتقارني نفسك بزينب تمام .. انا ماليش حكم غير عليكي انتي اختي دي هيبقى ليها راجل يحكمها لما تتجوز
سميه بابتسامه عداك العيب يا ابني ابن اصول مقولتش حاجه غلط
امنيه بدموع تمام يا حسام خلاص
حسام نفخ بضيق واكمل السلام عليكم يا عم محمد
محمد بابتسامه وعليكم السلام يابني
ونزل
سميه والله انتي بت فقريه بقى ربنا كرمك وعوض تعبك بشاب مفيش منه مال وجمال ومركز وعيله وعايزك اميره في بيتك وتابعت بسخريه تقومي تقولي لا عايزه اشتغل هو حب في المرار
امنيه بدموع مش كده يا ماما بس انا كان نفسي يبقى ليا كاريري الخاص ومفروض لو حسام بيحبني يشجعني على ده مش يهدم طموحي
محمد بتنهيده بعيدا عن كلامك الملعبك ده انا مفهموش بس اللي افهمه ان الراجل بيحبك بجد وشاريكي ودخل البيت من بابه ومسأله شغلك دي كانت متوقعه مفيش راجل صعيدي هيقبل مراته تشتغل حتى لو سفيره زي ماقالك ريحيه واسكتي
امنيه بضيق اومال انا اتعلمت ليه هااا
محمد اتعلمتي لنفسك وعلشان يجيلك واحد قيمه زي ده واتعلمتي لعيالك انما خلينا واقعيين انتي مش هتشيلي بيت وعيال وراجل وشغل يا ام ضغط بيوطى من فرش السرير
سميه ضحكت واكملت صغيره لسه يا حج متعرفش اللي فيها سيبها هي نفسها بعد كده هتشكر حسام ان موافقش تشتغل
محمد بضحك على رايك ربنا يهديكي يابنتي ويتمملك بخير هقوم انا ادخل جوه اريح شويه
سميه بحب روح يا حج على ماحضر العشا
ومشي
امنيه بقلق ماما بابا مشي كلميني شويه ليه هقول لحسام كده يعني هو الجواز صعب للدرجه دي
سميه بحب بصي ياقلب ماما الجواز مسئوليه كبيره اوي صعبه ومتعبه بس التعب كله بيهون لما يكون علشان راجل انتي بتحبيه وده هيبقى جوزك يعني مبقتيش مسئوله من نفسك وتصحيلي الضهر لا ده لازم تقومي الصبح قبل معاد شغله تفطريه وتكملي نوم لما ينزل او تروقي شقتك و ليه حقوق عليكي انتي مبقتيش صغيره وفهماني .. امنيه هزت راسها بفهم فتابعت سميه ولازم يرجع يلاقي البيت نضيف ومراته واخده شاور ولابسه شيك ومستنياه وفي عشا هادي وتهدي اعصابه من كل تعب الشغل والضغط اللي بيبقى فيه ده كل ده الفتره الاولى بعد كده في حمل وترجيع ومرواح ومجي للدكاتره وولاده وسهر بلبيبي مع حقوقه بردو اللي هيطالب بيها طبيعي وسط كل ده عادي اصل دول مبيهمهمش وضحكت لما شافت وش امنيه احمر وتابعت اه مش اكون صريحه معاكي ممكن يبقى طالع عينك طول اليوم من عيالك وشغل البيت ومرار وهيجي بقى يلاقيكي متبهدله مش زي العاده فيروح يقولك خدي شاور ونيمي العيال ونسهر انهارده وانتي طافحه الدم طول اليوم بس هتقدري تقولي لا …لا طبعا وده من حقه فرفقاً بيكي انتي يحبيبتي خلي اهتمامك الاول بيتك وجوزك ده انتي مش هتلاحقي عليهم لوحدهم يا ام شغل ….. وحاجه كمان اياكي صوتك يعلى عليه تاني احترميه واحترمي كلمته ده هيبقى جوزك قدامنا سكت بعد كده هيقولك مانتي اهلك معرفوش يربوكي فاهو سواء قال حاجه صح او غلط تلاشيه الراجل عايز اللي تسايسه مش تقف قصاده هيعند اكتر
امنيه بتنهيده حاضر يا ماما عندك حق انا عارفه دور الفرعنه وحقوق المرأه ده خدني قدامه وبتخانق على ايه ده انا فعلا هبطت من كلامك بس … فهسمع كلامه حاضر
سميه بضحك منا عارفه بنتي والله وطبطبت عليها واكملت بحب ربنا يفرح قلبك ويتمملك بخير يابنتي خدي بالك انا عرفت ان حسام هو السبب في رفضك للعرسان الفتره اللي فاتت بس ان جيتي للحق يستاهل وضحكت واكملت يلا روحي بقى ريحي شويه علشان تفوقي لليوم بكره وانا لما احضر العشا هصحيكي
امنيه ضحكت واكملت بحب حاضر هقوم اهو
———————————————–
في المستشفى
شويه وخرج الدكتور فقامت زينب واكملت بقلق ودموع ها يا دكتور طمني
الدكتور الحمدلله بقى احسن ونقلناه اوضه عاديه حصله كسر في ايديه اليمين ودماغه خدت 6 غرز وفي صدره 10غرز وهيحتاج يغير عليهم من 8 لي 12 ساعه كل شويه
زينب بعياط وخوف يالهوي كل ده وتقولي بقى احسسن !!!!!
الدكتور احمدي ربنا انها جات على قد كده الحادثه كانت صعبه اوي يا زينب وكنا ممكن نفقده
زينب بخوف ودموع فال الله ولا فالك يا دكتور الحمدلله الحمدلله نشكر ربنا طب ايه انا عايزه اشوفه واطمن عليه
الدكتور شاورلها على اوضه معينه واكمل نقلناه تقدري تشوفيه
زينب بدموع : تمام شكرا يا دكتور ..وانتي يا شيرين معلش شوفي الدكتور كتب لعمر ادويه ايه وهاتيهم من الصيدليه وطلعت الفيزا وادتهالها واكملت عليها الرقم السري معلش متتاخريش
شيرين حاضر يحبيبتي من عيني
زينب تسلملي عينيكي يارب
ومشيت بخطوات سريعه علشان تروح لعمر واول ماوصلت للاوضه وقفت قبل ماتدخل فاجاه وغمضت عينيها وخدت نفسها بعمق بعدين فتحت الباب ودخلت
لقيته نايم ومتعلق ليه محاليل ودماغه ملفوفه بشاش وايديه اليمين متجبسه فنزلت دموعها بحزن عليه وراحت شدت الكرسي وقعدت جمبه وحطت ايديها على ايديه السليمه واكملت بدموع سلامتك ينورعيني ياريتني كنت انا ولا اشوفك بلشكل ده ابدا ياعمر
عمر ابتدى يرجع لوعيه وفتح عينيه ببطئ وهي كانت عماله تعيط وحاطه ايديها على بوقها فلمحها والصوره ابتدت توضح قدامه فهمس بتعب زينب
زينب اتخضت لما سمعت صوته وشالت ايديها اللي كانت على ايديه بسرعه ومسحت دموعها واكملت وهي بتحاول تبان طبيعيه : نعم يا عمر الف حمدلله على سلامتك
عمر بتعب الله يسلمك مالك بتعيطي ليه وانا فين هنا وازاي انتي معايا
زينب بتوتر ابدا مبعيطش انت البنج شكله خلاك تخرف انت في المستشفى وانا هنا لان ده مكان شغلي طبيعي اكون فيه
عمر بتعب زينب انا تعبان اوي حاسس جسمي كله واجعني وتأوه بوجع لما حاول يتعدل
زينب بخوف على مهلك ..على مهلك يا عمر مش كده وقامت تساعده يتعدل في قعدته وعدلت المخده وراه كويس واكملت بدموع مرتاح كده
عمر قعد ورجع ضهره لورا واكمل بتعب اه الحمدلله بتعيطي ليه اهدي
زينب بتوتر مبعيطش ياعمر انت ليه مصمم
عمر ابتسم بتعب واكمل انا اه اتكسرت خالص بس مش اعمى يعني يا زينب
زينب بتوتر انا هروح اشوف شيرين اتاخرت ليه ورايحه تقوم مسك ايديها واكمل خليكي ارجوكي
زينب قعدت وبصتله بحزن واكملت نعم يا عمر
عمر بتنهيده عملتي ايه في موضوع العريس اللي كان متقدملك
زينب بتنهيده بعدين الكلام ده مش مهم وانت تعبان
عمر هز راسه بنفي واكمل لا بنسبالي مهم
زينب بصتله بتفاجئ واكملت مهم ازاي يعني
عمر بتعب جاوبيني يا زينب ومتتعنبيش
زينب بابتسامه رفضته زيه زي غيره ايه الجديد
عمر فرح جدا من جواه واكمل بضحك اممم بتتنكي حكم انك زينب الرفاعي
زينب بحب لا حكم انه مغلبني ومش راضي ينطق ومش هعرف اشوف حد غيره
عمر برفعه حاجب هو مين ده ??
زينب بهمس اقولك بعدين اصل ده سر وقامت ادته ضهرها ورايحه تمشي وهي بتضحك
وقفها عمر وهو بيقول: قولي اللي تقوليه واعملي اللي تعمليه بس بردو هتجوزك ومش هتشيلي اسم راجل غيري في الاخر
زينب اتسمرت مكانها بصدمه ولفتله واكملت بضحك قولت ايه ???
عمر بابتسامه اللي سمعتيه يا بنت معتز
زينب بضحك لا عمر انا مبهزرش انت قولت ايه بجد
عمر بحب هتجوزك هو مش انا مغلبك والسبب في وقف حالك كل الفتره دي بردو فاديني نطقت
زينب عيطت من الفرح واكملت عمر انت بتتكلم جد هتتجوزني والله
عمر مسك ايديها قعدها قدامه ومسح دموعها بايديه السليمه واكمل اه طبعا هتجوزك وليه العياط ده اهدي انا مبحبكيش تعيطي
زينب بدموع اخص عليك بجد واما انت عارف انك انت اللي انا بحبه سكت كل ده ليه
عمر ورحمه امي ما كانت اعرف انا لسه عارف دلوقتي
زينب بستغراب انت بتستعبط صح
عمر برفعه حاجب زينب اتلمي هو انا هكدب ليه
زينب بتوتر اصل ازاي يعني عرفت دلوقتي ليه حصل ايه يعني علشان تعرف
عمر مسك وشها ووجه ليه واكمل بحب بفهم لغه العيون ولما صحيت ولقيتك بتعيطي شوفت بنت قلقانه ومرعوبه على شخص بتحبه ولما قولتي انه مغلبك ومنطقش ومش هتشوفي غيره عينك كانت بتنطق حرف ال ك وكانها بتقولي زينب بتقول مش هتشوف غيرك مش غيره فتاكدت انه انا علشان كده قولتلك هتجوزك
زينب بحب ودموع يعني انا بعد كل السنين دي ساكته و مخبيه وتيجي حادثه حضرتك تكشفني في دققتين …. وبعدين صح انت عملت حادثه ازاي
عمر الفرامل هربت فمعرفتش اوقفها وضحك واكمل بعدين قولي الحمدلله بذمتك كنتي عايزانا نفضل مستنيين كده لحد امتى انا فاكر انك بتحبي غيري ولو مفيش انتي مش مبينالي حاجه اصلا
زينب بغيره صحيح يا عمر
عمر بحب ايه يا قلب وروح عمر
زينب ضربته في صدره جامد فتأوه بوجع واكمل اااه يابنت الجزمه حراام عليكييي
زينب بغيره مين الهانم دي اللي جيالك تطبخلك وتقعد معاك وانت عازب ولوحدك هااا
عمر بوجع منا قولتلكم بنت خالتي يخربيت امك بجد ايدك تقيله صدري فيه جرح هنا
زينب بصت لقيت الجرح كويس فاكملت بغيره مفتحش فخلاص بطل تمثيل وترد علياا يعني ايه بنت خالتك مش فاهمه مراتك يعني علشاان تقعد معاك ?????
عمر بحب انتي مراتي
زينب ابتسمت بحب …. بعدين كشرت واكملت بقولك ايه متثبتنيش انا مبهزرش دلوقتي علشان اقسم بالله كنت عايزه اولع فيها وفيك وتابعت بسخريه وانت نازل حبيبتي حبيبتي ياااخي حبك بورص وعشره خرص اما هي حبيبتك انا ايييه
عمر فضل يضحك على غيرتها واكمل طب خلاص بجد علشان قسما بالله بتحلوي وانا عامل حادثه لوحدي فمش قد كل ده
زينب بضيق عمر متعصبنيش انا بتكلم جد
عمر مسك ايديها واكمل بحب اسماء اختي في الرضاعه يعني تحرم عليا وجاتلي لانها عارفه اني وحيد زي اي اخت ممكن تعمل اكل لاخوها انما انتي فمش حبيبتي بس ده انتي حبيبتي ونورعيني وكل دنيتي وحلم عشت احلمه من ساعه ماكنت في اعدادي
زينب ابتسمت بحب وسكتت شويه بحرج بعدين اكملت خلاص طلعت ظلمتك حقك عليا
عمر بضحك لا انتي مجنونه بس مش مهم نتعود لاجل سمو الاميره زينب
زينب بغيره بس اي ان كان متقولكش حبيبي ولا انت تقولها حبيبتي اتلم هااا ولو انت محرج انا اقولها متقوليش لجوزي حبيبي دي تاااني
عمر بحب قلب جوزك والله العظيم بصي احنا ننفذ الكلمه دي وبعدين لو عايزاني اقطع علاقتي بسيف شخصيا انا موافق
زينب فضلت تضحك بشده واكملت اخص عليك ده اخويا حبيبي ده… لالا كله الا سيف وبعدين هتبيع صاحبك علشاني ??
عمر بضحك يعني انتي متبعيش صاحبتك علشاني ??
زينب بضحك الفنانه بوسي قالت ايه ?? انا ابيع الدنيا .. الدنيا علشانك انت ياروحي في ثانيه فمعاك يا بااشا
عمر بضحك طب كده تمام اوي بس نطلع سيف من الحسبه علشان ده حبيبي وحبيبك فمش هنعرف نبعد عنه
زينب بضحك الله ورجعت في كلامك ليه
عمر بضحك لا انا مبرجعش في كلامي بس ده لاني محتاج موفقته على جوازنا فناخده في صفنا مؤقتا
زينب بضحك لا يا جدع
عمر بضحك اه اومال انتي فاكره ايه وتنهد وتابع بس بيني وبينك قلقان اوي
زينب بستغراب قلقان !!! قلقان من ايه ؟
عمر بتنهيده من سيف حاسس هيفهمني غلط لما اقوله اني عايزك
زينب بستغراب وهو سيف هيفهمك غلط ليه ده انت عايزني في الحلال وسيف معندوش اعز منك منتا عارف وضحكت وتابعت اصلا هو شك فيا
عمر بستغراب شك فيكي ازاي مش فاهم
زينب بص ياسيدي لما هو قالي ان مامتك الله يرحمها توفت انا اتخضيت كده ووشي اتخطف وعيطت فاهو خد باله وقال لحسام خدها معاك ده عمر زي اخوها مش كده يا زينب ولا ايه فانا قولتله اه فا في اخر القاعده حضني وقالي ليا كلام معاكي فانا حسيت انه قفشني
عمر بضحك لا هو كده قفشك فعلا انا عارف سيف محدش بيعرف يحور قدامه حتى انا بحس انه قافشني بس ولا مره طاوعته وقولت اللي جوايا وتنهد وتابع انا خايف يقولي يعني انا ادخلك وسط اهل بيتي تقوم تبص لاختي وتخون الامانه والعيش والملح والكلام الكبير ده اللي مش هتسحملوا من سيف خصوصا انتي عارفه طبيعتي معاه في الشغل هو مبيهزرش ومش بيطيق حد اصلا فاكلنا بنتجنب اننا نعصبه
زينب بضحك عارفه سيف هو انتي هتقولي عليه بس متخافش مش هيرفضك ولا هيقولك كده انت عارف بيحبك ازاي ولو اعترض هنقول لحسام يساعدنا
عمر حط ايديه على خدها واكمل بحب كده كده هاخدك انا بس مش عايز مشاكل بيني وبين سيف علشان هو اكتر من اخويا وماليش غيره وسند جبينه على جبينها وتابع انما سواء وافق او رفض انتي مش لحد غيري
زينب بصتله بحب ورايحه تتكلم قاطعها دخول شيرين فبعدت عنه باحراج
شيرين بحرج احمم امسكي يا زينب الادويه اهي وحاجته والاكل جبتهملك والفيزا بتاعتك
زينب بتوتر هاتي يا شيرين تعبتك يحبيبتي اوي بجد معلش
شيرين بحب لا ولا يهمك حمدلله على سلامتك يا حضره الظابط
عمر بابتسامه الله يسلمك تسلمي
شيرين بحب يلا همشي اانا عايزه حاجه
زينب بحب سلامتك يحبيبتي
وطلعت وقفلت
زينب بحرج عجبك كده
عمر بضحك هو مش مفروض هي تخلي عندها دم وتخبط قبل ماتدخل ولا ايه
زينب بغيظ مريض وممرضته تخبط قبل ماتدخل ليييه هو انت فاكر نفسك في شهر عسلك
عمر بحب ياريت والله
زينب بضحك عمر انا مبهزرش كسفتني قدام البت
عمر بضحك في ايه هو انا كنت ببوسك ايه كسفتك قدامها دي ده انتي غريبه اوي
زينب وشها احمر واكملت بحرج يخربيتك ايه اللي بتقولوا ده انا هسيبك واطلع احسن
عمر بضحك لالا خلاص ههون عليكي بذمتك
زينب بضحك ليه هو حد قالك يا سي السيد ان انا هنا بشتغل لحضرتك بس
عمر انتي اصلا ايه مقعدك لدلوقتي استني فين الفون اتصلك بحسام يجي ياخدك
زينب بحب لالا متكلموش انا قاعده انهارده عندي شيفت ليلي
عمر نعم وده هتروحيله امتى ده انشاء الله ??
زينب بتنهيده الصبح بس انا كده كده مش هخرج غير لما اطمن عليك
عمر لا طبعا روحي ارتاحي افرض انا قعدت يومين تقعدي ازاي يعني
زينب برفعه حاجب عايزني اروح ليه علشان تيجي الحلوه بنت خالتك تقعد مكاني
عمر بضحك يازينب انا لساني طويل مش عايز اقولك كلمه تغير شكلي قدامك ونظرتك فيا تتهز فاتلمي يحبيبتي واتمسي وقولي يا مسا بقولك تحرم عليااا انتي مبتفهميش
زينب بغيره والله لو اختك شقيقتك بردو لا
عمر بضحك طيب يا مجنونه ربنا يهديكي .. هاتي فوني البت جابته فينه
زينب برفعه حاجب عايزه ليه
عمر بضحك اشوف الساعه كام يا قدري
زينب بصت واكملت 8 وراك معاد يا حضره الظابط
عمر بحب والله ولو ورايا ده انا احب راقده المستشفى دي لاجل انها بتطل على الجمال ده كله
زينب بضحك ياعمر احترم نفسك واتلم ويلا علشان تاكل علشان ادويتك
عمر لالا اكل ايه مليش نفس خالص
زينب جابت الاكل وقعدت جمبه على السرير واكملت بحب طب ولو قولتلك علشان خاطري يا عمر
عمر بحب خاطرك غالي بس والله ماليا نفس
زينب بحب معلش لقمتين يس علشان تاخد الدوا ومدت ايديها
وعمر كل منها بضيق فضحكت زينب على شكله واكملت عمر
عمر وهو بياكل اممم
زينب هتعمل ايه افرض قعدت كتير في المستشفى صح
عمر بتنهيده مش عارف هخلي خالتي واسماء معايا وخلاص
زينب بصتله برفعه حاجب واكملت كل من ايدي يا عمر خليني ساكته
عمر كل منها واكمل بضحك انتي عبيطه يابت اومال هساعد نفسي ازاي
زينب بحب اتجوزني انا وانا هخلي بالي منك
عمر فضل يضحك واكمل الله بقى هو ده الهدف .. بقى بتستغلي مرضي يا زينب
زينب برفعه حاجب نعم على اساس انك مش عايز تتجوزني وانا اللي هموت عليك ؟
عمر بضحك لا ياستي ولا تزعلي انا اللي هموت عليكي
زينب بحب ايوه كده واكلته
عمر اكل منها واكمل بحب عارفه انا اخر حاجه كنت اتخيلها انك تطلعي بتحبيني كده وتنهد بحزن واكمل لما سمعتك بتكلمي سيف وبتحكيله ان جايلك عريس وانتي بتحبي حد كنت حاسس ان نفسي الارض تتشق وتبلعني متخيلتش ربنا يطبطب على قلبي بسرعه اوي كده انا مكنش ليا غير امي واملي كنتي تبقي انتي كمان وتنهد بوجع واكمل كده انتي بس وبصلها بحب وعنيه مليانه دموع واكمل ربنا يدميك ليا
زينب دموعها نزلت واكملت ويديمك ليا يارب حقك عليا من كل الدنيا بجد يا عمر ربنا يرحمها يارب انا بردو فكرت انك مش بتحبني بس الحمدلله اللي جمعنا بجد
وفون عمر رن فطلعته زينب من جيبها لقيت اسماء فبصتله برفعه حاجب
عمر بضحك لو دي اسماء فاكيد قلقت عليا مفيهاش حاجه بلاش البصه دي
زينب بتنهيده طب عموما رد عليها طمنها وياريت متخليهاش تيجي انا قاعده معاك
عمر بصلها وضحك وهز راسه بيأس منها : الو ايه يا حبيبتي
زينب ضربته في صدره فتأوه بوجع وكتم الصوت واكمل بوجع ااه هطلع عين اهلك يا بنت الجزمه الصبر بس ورجع الصوت
اسماء بخوف مالك يا عمر في ايه طمني عليك ابوس ايدك
عمر بوجع مفيش يا اسماء انا بخير هبات برا بس انهارده متقلقيش عليا ونامي انتي لو عايزه انما متنزليش دلوقتي خلاص روحي بيتك بكره
اسماء تنهدت بارتياح واكملت الحمدلله كنت هموت من القلق مش تطنمي يا عمر
عمر بحب حقك عليا غاليه خلاص انا بخير اهو نامي بقى
اسماء بحب تمام تصبح على خير
عمر بحب وانتي من اهله .. باي
اسماء باي
وقفل ولقى زينب بتبصله ومش عاجبها الكلام فضحك
زينب بغيره وايه كمان ؟؟ حبيبتي وغاليه وقلقان تنزل دلوقتي وبتقولها ايه تاني ؟
عمر بضحك لا هما دول بس والله وقلقت لانها اختي مش اكتر
زينب بغيره هو انت قااصد تحرق دميي
عمر بحب الف بعد الشر عليكي من حرقه الدم يا زوزتي
زينب بضيق عمر انا مبهزرش بطل تحب فيها ممكن
عمر بضحك يابنتي بقولك اختي وانا كبيرها انتي عبيطه ولا ايه ربنا يهديكي بجد روحي اعرفي حكم علاقتي بيها من اي شيخ لو متعرفيش قال بحب فيها قال جتك داهيه في الفاظك
زينب بغيره عارفه بس بردو بغير سميها حب سميها جنان سميها مرض سميها زي ماتسميها المهم متحرقش دمي والا انا كمان اشوفلي اخ في الرضاعه و
عمر بحده وبمقاطعه و ايه انشاء الله???
زينب بضحك شوفت شوفت اتعصبت ازاي اشمعنااا بقى
عمر بحده ده علشان الهانم قاصده تعصبني انما انتي معندكيش اخوات في الرضاعه قال اشوفلي قال اصل بيتباعوا في السوق
زينب ضحكت واكملت فرحانه اني عصبتك وخلاص ومدت ايديها بلاكل
عمر كل منها بضيق واكمل انسانه معجونه استفزاز والله العظيم
زينب بحب اعيش واستفزك تقدر تقول غير كده
عمر ضحك بغلب واكمل بحب لا ياست البنات مقدرش طبعا ربنا يديمك ليا انتي واستفزازك
———————————————-
في بيت الرفاعي العيله كلها متجمعين بعد العشاء وبيتكلموا وخاله مازن جات من القاهره تقعد كام يوم عند اختها هي وبنتها رغد
مازن دخل واكمل مساء الخير
الجميع مساء النور
مازن بحب عمال اقول ايه النور ده كله اتاري منوارنا احلى نواره في الدنيا
نواره الخاله بضحك قلب خالتك انت طول عمرك تاكل بعقلي حلاوه وحضنته وتابعت بحب واحشني والله يا واد يا مازن ايه الحلاوه دي يا واد بتحلو
مازن بضحك دي عيونك الحلوين يا خالتي والله وباس راسها وتابع نورتي الصعيد يا غاليه
نواره بحب منوره باهلها يا حبيبي
رغد كانت بتبتسمله فاكمل بابتسامه ازيك يا رغد عامله ايه
رغد بحب كويسه الحمدلله
مازن بضحك كبرت امتى رغد ربنا يخليهالك وتفرحي بيها يا خالتي
نواره بضحك هي البنات كده يا مازن بتتغير 100 مره ويارب يسمع منك ربنا
صافيه ياسمين
ياسمين وهي قاعده مش طايقه نفسها اكملت امممم
صافيه معلش يا قلب تيته خدي البسكويت والكحك ده وانتي يا نور وراها بلشاي علشان جدكم حابب نتلم سوا في البرنده تحت
نرمين بحب اه والنبي يابويا لحسن الجو بليل حلو ويرد الروح
منصور بابتسامه منا علشاان كده قولت نقعد شويه تحت انهارده الواحد اتخنق من قعده البيت
احمد اه والله ياجدي انا من ساعه مارجعت حاسس حاجه نقصاني الدنيا هنا هاديه خالص من بعد المغرب عكس دبي بتبدا اصلا من بعد المغرب وضحك
عايده بحده معلشان هناك هيناموا بدري ليه مثلا ناس مرفهه ومعاهم فلوس موراهمش هم واتلم ومتلمحش شركتك عملت مقر هنا مفيش سفر تاني
احمد بضحك لا انتي فاهمه غلط انا مش بلمح انا هسافر فعلا بس لما يحتاجوني متفكريش هفضل هنا علطول
عايده رايحه تتكلم قاطعها ايمن واكمل بس يحبيبتي بس علشان دمك هيتحرق وهتقوم خناقه سيبيه يعمل اللي يعملوا
عايده بحده انا والله ههاوده واسكت بعد كل المرار ده عايز يبعد عني تاني
احمد باس خدها واكمل بحب مقدرش والله ياست الكل بس لو طلبوني هناك هيبقى غصب عني ومتخافيش مش هفضل قاعد هناك زي المره اللي فاتت هفضل رايح جاي
عايده بتنهيده اما نشوف يخش ماتكونش طالع لابوك بتضحك عليا بكلمتين
ايمن ضحك فاكمل احمد بضحك لالا عيب عليكي مقدرش يا عايوده
صافيه هي فينها شهد
ياسمين وهي بتشيل الحاجه اكملت بتذاكر في البلكونه
عز الدين سبوها تذاكر ننزل احنا يلا علشان منعملهاش ازعاج
صافيه بحب طب يلا يلا يابت يا نور
نور بحب شايله الحاجه اهو يا تيته
وبلفعل كلهم نزلوا في البرنده كانت قاعده كبيره قدام البيت فيها كراسي وترابيزة صغيره والزرع حواليها من كل حته وبتطل على الاراضي الزراعيه والجمال الطبيعي والجو هادي جميل وفيه نسمه هواء ساقعه ومريح للاعصاب لاقصى حد
نواره بحب ده الجو هنا فعلا يريح الاعصاب
عايده بحب اه والله الواحد واحشته القاعده هنا
كلهم قعدوا فنزلت ياسمين على الارض وجمبها نور وحطوا الحاجه على التربيزه وقعدوا
حسام كان داخل البيت شافهم قاعدين تحت فاكمل بابتسامه متجمعين عند النبي
الجميع بحب اللهم امين يارب
حسام بضحك ايه مقعدكم هنا بقالكم كتير مبتقعدوش هنا
صافيه بحب تعالى ياقلب ستك اقعد ارتاح ده جدك شاف الجو حلو انهارده وكلنا صاحيين قال ننزل نقعد شويه
حسام قعد واكمل بحب يارب دايما متجمعين يا حبايبي ناقصنا كده سيف وزينب وتكمل اللمه وتابع باستغراب بس فين يونس وشهد
ياسمين يونس بيتكلم في الفون من ساعه ماجيه من برا هناك اهو وشاورت عليه كان واقف بعيد وبيتكلم وتابعت وشهد بتذاكر فوق وزوزا في شغلها انهارده
حسام بحب ربنا معاهم يارب بما اننا كلنا متجمعين حبيت ابشركم واقولكم المجانين هيزيدوا واحد انا كلمت ابو امنيه وهو مستنينا بكره نلبس الشبكه
الستات والبنات كلهم زغرطوا في نفس وااحد
حسام بضحك بس خلاص هتصحوا الناس انتوا في الصعيد في ايه
نرمين بدموع فرح قامت حضنته واكملت يافرحه قلبي بيك يانورعيني اخيراا هتتجوز وهشوفك عريس انا مش قادره اصدق بجد
حسام باس جبينها واكمل بحب ربنا ميحرمنيش منك يارب وضحك وتابع علشان ترحمي زوزا شويه بس اديني هفرحك اهو
نرمين بحب ودموع ده انا مش هيهدالي بالي غير لما اشوفك انت واخوك واختك في بيتكم ومرتاحين
حسام بحب اللهم امين يا ست الكل
صافيه بدموع فرح تعالى في حضني يا قلب ستك وحضنته واكملت بحب مبروك يانورعيني الف الف مليون مبروك
حسام بحب الله يبارك فيكي يا صفصف يا غاليه
مازن قام وقف واكمل بضحك هو انا ياض مش قايل انا بس اللي اقولها كده حسام ضحك فحضنه مازن واكمل بحب متتصورش فرحان ليك قد ايه مبروك يحبيبي
حسام بحب الله يبارك فيك يا غالي وهمس عقبالك انت وسمسمه
مازن ضحك واكمل بحب يارب يحبيبي
منصور بتتهامسوا في ايه يا واد انت وهو
مازن بضحك الله ده تلاقيك عارف هو في حاجه بتعدي من تحت ايدك انت
حسام ضحك فاكمل منصور بضحك ماشي يا حيوان صبرك عليا وبص لحسام واكمل بحب مبروك يابني ربنا يفرح قلبك زي مافرحتنا المهم البت ايه غمز واكمل حلوه كده ولا من بنات اليومين دول ضعفانه
كلهم فضلوا يضحكوا فاكمل حسام بضحك لا ضعفانه بس نعمل ايه بقى الحب يا جدي
منصور بضحك طب على قدك بقى متبقاش انت والدنيا على البت
كلهم ضحكوا فاكمل حسام بضحك والله العظيم ده انت مشكله يا جدي
صافيه بضحك مفيهاش حاجه احنا هناكلها اكل يخليها تطخن وتبقى زي الفل
ياسمين بضحك الله هي امينه للدرجه دي مش عجباك يا سي حسام
حسام بضحك والله مفتحتش بوقي هما اللي بيقولوا انا عجباني وزي الفل اهدي يا حقنه واسكتوا لحسن دي العصفوره اللي هنا
ياسمين بضحك اخص عليك انا حقنه وعصفوره ماشي يا حسام
ايمن بضحك هما بيتكلموا صح الواد مش هيتجوز كل يوم يجيب واحده حلوه كده يفرح بيها والضعيفه دي تروح تعالج الانيميا
كلهم فضلوا يضحكوا فاكملت ياسمين بضحك ده على اساس ايه يعني يا عمو منا وبنتك وشهد وزينب ولا واحده فينا عودها مظبوط وحلوه الحلاوه اللي في دماغكم دي كلنا رفييعين ايه هنقعد جمبكم ??
ايمن بضحك ما ده اللي هيحصل يابنتي هتقعدوا جمبنا واحنا راضيين بقعدتكم عادي لحد ما حد يتص في نظره ويوافق
كلهم ضحكوا فاكملت نور بضحك لا عندكم بقى لحد هنا واستوب انا مخطوبه وعاجبه خطيبي رفعت ايديها اليمين بغرور
عايده بضحك اهو قاسم ده صعبان عليا والله ربنا يعينه معرفش ربنا ابتلاه بيكي علشان هبب ايه في دنيته
كلهم ضحكوا فاكملت نور بضحك بقى كده ماشي يا ماااما انا هتجوزه ومش هاجيلكم هنا تاني
مازن بحب ياخواتي مقدرش على بعدك انا لو عليا اجوزك في بيتي اخص عليكم محدش يضايقلي نوري مش هجوزهالو اصلا
نور بفرح والله انت روح قلبي وقامت حضنته
فباس راسها واكمل بضحك شبه عود القصب المسوس اه بس هو راضي وبيحبها انتوا مالكم انتوا الله
كلهم فضلوا يضحكوا فا نور بصتله بصدمه واكملت بضحك بجد اخص عليك انت كمان معاهم
احمد بضحك ده بيهزر يا قلبي قوليله المهم الجوهر
نور بضحك الله حتى انت يا احمد دي شكلها الحفله عليا
ياسمين بضحك علينا وانتي الصادقه فينها شهد كانت وريتهم دلوقتي بيتكلموا بقلب جامد علشان هي مش هنا
معتز بضحك اه لسانها متبري منها دي
نور بضحك بس جدعه بتجيب حقها مش زينا هطل
ياسمين بضحك والله عندك حق
مازن بحب طب اعمليلي شاي الحاجه قدامك يا سمسمه
ياسمين بحب عيوني حد يشغل البابور بس
رغد بحب اوعي انتي يا ياسمين بعرف اشغله هعملوا انا
ياسمين بضيق شغليه بس يا رغد وانا هعمل
رغد شدت الحاجه عليها واكملت لالا متتعبيش نفسك خلاص
مازن بص لقى ياسمين متعصبه منها فاكمل بحرج معلقتين سكر يا رغد
رغد بحب عارفه عملت كده من نفسي
ياسمين برفعه حاجب والله
حسام بص لياسمين بحده ففهمت قصده انها تسكت علشان ميبانش عليها واكملت بضيق انا هقوم اتمشى شويه مخنوقه
يونس دخل وسمعها واكمل اتلمي واقعدي الساعه 9 والناس نامت تتمشي ازاي دلوقتي يعني
ياسمين بحزن معلش يا يونس بس مش طايقه نفسي
يونس وراها الساعه واكمل يحبيبتي هو انا قاصد اضايقك مثلا بس مينفعش حد يضايقك دلوقتي
منصور بتنهيده سيبها يا يونس متخافش على اختك مشي بنت عمك شويه يا مازن وتعالوا
مازن اتوتر لما كلهم بصوا عليه واكمل بحرج احمم حاضر يا جدي يلا يا ياسمين
ياسمين بصتله بضيق وقامت وقفت
رغد بغيره والشاي اللي عملتوا ده يا مازن
حسام بضحك اشربه انا ولا يهمك ومسك منها الكوبايه وشرب منها واكمل تسلم ايدك يابت يا رغد زي العسل ولا كوبايه الشاي اللي بيعملهالي العسكري محمود في القسم
رغد بحرج الف هنا
نور كتمت ضحكها من حسام وشكل رغد
عز الدين مش الوقت متاخر شويه يا بابا هنا مينفعش ال
منصور بمقاطعه ده ابن عمها مش واحد غريب ومش هيبعدوا هيتمشوا هنا وراجعين قدام البيت عادي يلا يا مازن
مازن بتنهيده حاضر يا جدي يلا يا ياسمين
ايمن متتاخرش يا مازن
مازن حاضر يابا متقلقش والله
ومشيوا
ونواره بصت لبنتها ولوت بوقها بضيق
يونس بتنهيده انا طالع ارتاح
صافيه بحب تعالى يانورعيني اقعد معايا شويه
يونس بتعب معلش يا تيته بس عايز افرد جسمي
صافيه ربعت رجليها واكملت تعالى ياعمري وخبطت على رجليها وتابعت حط راسك هنا على رجلي وافرد جسمك عادي المكان واسع وفاضي بس متقعدش لوحدك فوق
يونس بلفعل عمل كده وكل واحد كان بيتكلم في احاديث مختلفه وقاسم رن على نور فخدت جمب وفضلت تكلموا
صافيه وهي بتمشي ايديها على شعر يونس اكملت بتنهيده مش ناوي ترجع تاني يونس اللي اعرفه
يونس بسخريه يونس اللي تعرفيه راح ورا لبنى هي اخر حد كان فاضل اعيش علشانه
صافيه بحب وانا لسه مموتش واخواتك البنات وابوك انت لسه عندك اللي تعيش علشانه متخليش الشيطان يعمي عينك يا يونس
يونس تنهد بعمق واكمل مبقتش فارقه انا مش عايز غير اختفي بجد لان كل حاجه بقيت تأذيني انا مش مستحمل من دلوقتي متخيله بعدين لما الحياه تمشي اكتر هعمل ايه وبصلها بوجع واكمل قوليلي اكرها ازاي يا تيته
صافيه تنهدت بحزن واكملت المشكله في حبك الصادق ليها اللي نابع من جواك لان هي لا عملت حاجه علشان تكرها ولا عملت حاجه علشان تفضل مش قادر تكرها فمش هتكرها يابني لانها مأذتكش بس ممكن تخليها عاديه جواك لا هو كره ولا هو حب
يونس بوجع تعرفي يا تيته دي غلطتي انا….. اه والله مش هلومها هي يمكن هي مكانتش صادقه او مدركه كفايه يعني اي حب حقيقي انما انا حبيتها بكل صدق ومشوفتش غيرها وطبيعي اي علاقه طرف بيقدم فيها اكتر من التاني العلاقه دي بتنهار وانا هاخد وقتي بس هتعود ولازم اقتنع ان مكنش ينفع احبها من الاول في 100 حاجه كانت بتمنع الحب ده يكمل بس انا اللي كنت غبي ولسه لحد انهارده غبي وبدعي تكون ليا وعارف انه مستحيل
صافيه بحزن ودموع بتمنى يابني والله ربنا يصلح الحال ويجعلكم لبعض
يونس بوجع لالالا ده وهم اتمني ربنا يراضيني ويريح قلبي وابطل احبها احسن
وقام وقف وطلع فتنهدت صافيه بحزن عليه واكملت قلبي قايد نار عليك يا يونس والله لو كان بايدي كنت اكلمها واجوزهالك بس النصيب نقول ايه وقلبك ده تستاهله بنت تعشقه وتقدره وتعوضك المر اللي شوفته في حياتك
وجيه اتصال لعز الدين فلما شاف الرقم اتوتر وقام وقف بعيد ورد واكمل بحده نعمين عايز ايه
الراجل بعصبيه بتتكلم كده ليه هو احنا بنشحت منك
عز الدين بحده قولتلك ملكش علاقه بيا ومتتصلش بلرقم ده تاني انت مبتفهمش
الراجل بحده ياك علشان انت خدت البت وربيتها منبقاش احنا اهلها ولينا حق فيها ولا ايه ؟؟؟؟
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية غموض الحب)
