رواية غموض الحب الفصل الأول 1 بقلم لولا
رواية غموض الحب الجزء الأول
رواية غموض الحب البارت الأول
رواية غموض الحب الحلقة الأولى
في احدى محافظات صعيد مصر محافظه «اسيوط » حيث عائله الرفاعي تسكن في عماره مكونه من طوابق ولكل طابق يسكن احد ابناء الجد منصور الرفاعي واولاده وهو كبير العيله تبدأ الاحداث عند ياسمين ابنه عز الدين الرفاعي
في اوضه ياسمين قامت بكل نشاط لانها متعوده تصحي بدري علشان تروح الجامعه فا هي في اخر سنه كليه حقوق جامعه اسيوط وناجحه جدا في مجالها قامت ودخلت الحمام توضت وصلت وبعد ماخلصت شالت السجاده وفتحت الستاير لتنكمش عيون اختها بانزعاج اللي نايمه في السرير المقابل ليها
شهد بضيق: يا ياسمين حرام عليكي مش كل يوم تصحيني بدري
ياسمين بضحك قومي يابت بلاش دلع انتي مش ثانويه عامه اي منيمك لدلوقتي
فتحت شهد عنيها بضيق واكملت هو كل اللي يشوف وشي يقولي انتي مش ثانويه زفت وشاورت بايديها على السرير واكملت حبيبتي شايفه المنظر انا سهرانه بذاكر ونايمه وسط الكتب ودرسي الساعه 11 كنت هنام ساعتين كمان حرام عليكي واتغيرت ملامحها للحزن والارهاق
ابتسمت ياسمين بحنان وحضنتها واكملت وهي بتطبطب على ضهرها حبيبتي انتي مبقالكيش غير شهر مينفعش فقدان الشغف ده كده عايزاكي اقوى وبصتلها واكملت محدش هنا هيحطك تحت ضغط هاتي اللي تجيبيه المهم صحتك متضغطيش على نفسك بلشكل ده
شهد بحزن بس ماما كانت عايزه تشوفني دكتوره
ابتسمت ياسمين بوجع واكملت وكلنا عايزين نشوفك وزيره مش دكتوره وبس انما ربنا ارادته فوق كل شئ اعملي اللي عليكي وسيبيها عليه اتفقنا ياروحي وباست خدها
ابتسمت شهد واكملت بحب اتفقنا.. رايحه فين انتي دلوقتي
قامت ياسمين وابتدت تكمل لبس واكملت الكليه هكون رايحه فين بزمتك يلا قومي صلي واتوضي لحد مانشوف بابا ويونس صحيوا ولا لسه علشان ننزل نفطر
شهد بحب تمام قايمه اهو
وخرجت ياسمين وسابت اختها تجهز وطلعت الصالون لقيت بااباها قاعد فاكملت بحب صباح الخير يا حبيبي وباست راسه
عز الدين بابتسامه صباح النور يا حبيبتي اختك صحيت
ياسمين اه صحيتها جوه هتلبس .. فين يونس
شاور عز الدين على البلكونه اللي في اخر الصالون واكمل كان جايله مكالمه شغل فدخل يتكلم شوفيه
وبلفعل دخلت ياسمين لقيته واقف بيتكلم وجاهز ولابس بدلته علشان يروح شغله
يونس: تمام انا قولت لحضرتك يا سياده العميد الكلام ده مصدقتش
-خلاص انا لما اجي انهارده هشوف الموضوع ده
-سلام
وبص لياسمين واكمل بحب صباح الخير يا اجمل بنوته في الصعيد وباس جبينها
ياسمين بضحك صباح الخير يا حبيبي وطي صوتك شويه لتسمعك شهد مش ناقصين تاكلك علي الكلمه دي
ضحك يونس واكمل شهد معتبراني خطيبها مش اخوها
ياسمين بضحك هتبقي عمتو الحربايه دي استنى بس وشوف وابتسمت واكملت بس اي الشياكه دي كلها
ضحك يونس واكمل حبيبت قلبي تسلميلي يا سمسم مفيش اجمل منك
ياسمين بحب لا دكتور جامعي .. دكتور جامعي يعني
يونس بضحك يلا يا بكاشه وبيبص لقى شهد داخله فاكملت اممم بتضحكوا في اي من غيري
يونس وياسمين ضحكوا فاكمل يونس منقدرش يحبيبتي الله هو احنا عندنا كام شوش يعني
شهد حضنته بحب واكملت يونس انا عايزه فلوس
يونس بضحك شوف الناس تقول صباح الخير ودي تقول عايزه فلوس ماديه حقيره
شهد بتمثيل حزن اخص عليك يا يونس يعني اقول لمين مفروض تقدر اني انا ثانويه عامه ونفسيتي تعبانه ومبنامش وبعيط كتير
ومضغوطه و
يونس بمقاطعه وضحك ومباكلش ومبشربش بس بس كفايه شحاته امسكي واداها فلوس في ايديها واكمل علي الله تجيبي كليه عدله في الاخر
شهد بضحك ممكن لو زودت 200 كمان
يونس وياسمين ضحكوا فاكمل يونس بضحك امشي يابت اطلعي برا متجبيش حاجه
شهد باست خده واكملت بحب تسلملي ينورعيني
يونس باس ايديها واكمل بحب كل اللي تعوزيه قوليهولي انا ملكيش دعوه بابوكي
شهد بحب ربنا يديمك سند ليا يا حبيبي بجد
يونس باس جبينها واكمل ويديمكم ليا يا حبايبي وفونه رن فاكمل يلا روحوا افطروا هتكلم وجاي
ياسمين بحب ماشي يحبيبي وطلعت هي وشهد
عز الدين يلا عشان ستك اتصلت قاالتلي حضروا الفطار
ياسمين يلا ما نازلين اهو يونس يخلص وهيجي ورانا
عز الدين بحب طب يلا يحبايبي
في الطابق الاول من العماره يسكن الجد منصور ومراته صافيه والعيله كلها بتتجمع عنده في اوقات الاكل والسهر وعند النوم كله بيروح شقته
دخل عز الدين وبناته واكمل صباح الخير
صافيه بحب صباح النور يحبيبي ادخلوا يلا يا بنات
ياسمين بحب اساعدكم في حاجه ??
عايده بحب لا يا قلبي خلاص انا ومرات عمك خلصنا كل حاجه اهو
خرجت نرمين وهي بترص باقي الاكل واكملت اومال فين العيال محدش نزل ليه
نور بمرح انا جيت اهو صباح الخيرر يا حبايبي
صافيه بحب صباح النور يا قلب تيته ادخلي يلا علشان تاكلي وتلحقي اول يوم في جامعتك
منصور الجد : فين ابنك يا ايمن منزلش ليه كل ده
ايمن مازن نايم في الاوضه بتاعت السطح مش في البيت معرفش صحي ولا لسه
عز الدين بستغراب اي ده وينام فوق ليه
نور عملت نفسها من بنها فاكملت عايده امها بضحك : اصل الهانم هي وقاسم امبارح طول اليوم خناق وتدخل تشهده مازن يرضيك اللي بيحصل من صاحبك ده ويراضيهم لحد ما اتخنق منهم وقالها يا نور انا عايز اناااام ورايا شغل الصبح الله يحرقك على يحرق قاسم على اليوم اللي وافقت اخطبكم لبعض فساب الشقه وطلع نام فوق
ضحك الجميع بشده فاكملت شهد بضحك طفشتي الراجل بسبب مشاكلكم قط وفار صحيح من يوم ماتخطبتوا
الجد بضحك اهدي شويه يا نور عيب يا حبيبتي خناقكم ده وانتوا لسه مخطوبين هتعملوا اي لما تتجوزوا
نور بضيق يا جدو قاسم غيور اوفر انا لسه مش محجبه ومش عايزه دلوقتي فمفروض البس نص كم براحتي لا ده معترض على كل اللبس اللي جبته اومال البس اي بجدد انسان مستفز
يونس دخل واكمل بضحك طلما نور شايطه يبقى قاسم زعلها
نور بضحك شايفين الناس اللي بتفهم مش يجي عليا زيكم اه قاسم زعلني
حسام من وراه بضحك قاسم مبيغلطش هنطبل ولا اي انتي اكيد حرقتي دمه زي كل مره
نور بضيق ابن عمي ده ياربي ولا تبعه هو
يونس بضحك سيبك منه انتي مبتغلطيش بنات الرفاعي عمرهم مايغلطوا
نرمين بضحك طب مش تجرب تشوف بنت عمك عايزه اي
نور فتحت فونها واكملت اهو بص عايزه البس دول انهارده
يونس بصدمه احمم لا قاسم مبيغلطش فعلا وضحك وتابع صدقت يا حسام مش ظابط من فراغ
ضحك الجميع فاكمل معتز عمهم متدافعش عنها تاني بقي
يونس بضحك توبه مش هتحصل
حسام بضحك يا ابني انا عارف والله حفظت خلاص
زينب دخلت واكملت بحب صباح الخير
نرمين بحب صباح الفل يا قلب ماما اقعدي جمب اخوكي يلا عاشان تفطري
حسام بحب صباح القمر علي اجمل نيرس في الدنيا
زينب بضحك والله بعشق تطبيلك ليا
حسام بضحك لا عيب عليكي ده حقيقي مفيش اشطر منك اساسا
نرمين بابتسامه ده حقيقي مفيش اشطر منها شغاله ممرضه في مستشفي محترمه بتنقذ حياه الناس وبصتله بضيق وتابعت مش انت واخوك شغالين شغلانه علي كف عفريت وبتحرقوا قلبي من الخوف ومش هتسكتوا غير لو جبتولي جلطه
حسام بضحك طب استأذن اانا علشان الفقره اليوميه هتبدا وانا بصراحه مش مستعد
ضحك الجميع فاكملت صافيه بضحك بس يا نرمين فال الله ولا فالك ما هما زي القمر اهو قدامنا
نرمين بدموع قدامنا فين يااما بس فين قدامنا هو في غير حسام وزينب من عيالي انا مش هرتاح غير لما يرجعلي سيف
معتز بحزن يحبيبتي دي طبيعه شغله ارجوكي مش كل شويه تعيطي لنفس السبب
نرمين بدموع واحشني يا معتز ابني وواحشني غصب عني هو بمزاجي يارب قلبي واكلني عليه بقالي كتير مشوفتوش ولا حتى سمعت صوته
زينب بحزن هانت ويرجع اجازه ارجوكي كفاياكي يا ماما علشان متتعبيش ولما يعرف يتكلم ويمسك الفون هيكلمنا
عايده بحزن يا حبيبتي اهدي حاسه بيكي منا احمد مسافر دبي اهو وبيجي اجازات وواحشني اوي والله بس مينفعش كده صحتك
نرمين بحزن ودموع حاضر
حسام بمرح حضن والدته واكمل الله وانا مش كفايه هنا يا نيرو ولا هو سيف ابن البطه البيضه وحسام الغلبان ابن البطه السودا بطلي تفرقي كده يا ست الكل علشان بغير
ضحكت نرمين من بين دموعها واكملت انتوا الاتنين نورعيني انت عين وهو التانيه والله يا حسام ومقدرش اعيش من غيركم
زينب احمم واضح اني اتنسيت كاني ماجيت
ضحكوا كلهم فاكملت نرمين بضحك ده انتي روح قلب ماما انتي
بصت شهد للارض بحزن شديد ففهم نظرتها يونس فتنهد بحزن واكمل بحب يلا يعمري افطري علشان اخدك اوصلك في طريقي
شهد ابتسمت بحزن وكملت اكلها
منصور يلا اقعدوا افطروا فاضل مين
ايمن مش فاضل غير مازن خلاص
عايده كلمتوا يا جماعه قالي هلبس وهينزل
صافيه بحب طب افطروا لحد مايجي وتنهدت واكملت عقبال ما سفرتنا تتجمع كلها يارب ماينقصها حد تاني ولا احمد ولا سيف
الجميع للهم امين فاكملت ياسمين انا هطلع اعمل مكالمه وجايه معلش
عز الدين روحي يا حبيبتي
وطلعت ياسمين من الشقه واتسحبت لفوق لحد ما طلعت السطح وفتحت باب الاوضه بحذر شديد ووجدته نايم بلفعل على بطنه وعاري الصدر فبصت ليه بحب وحطت ايديها على ضهره واكملت بحب وصوت رقيق: مازن …. حبيبي ووطت شويه وتابعت بصوت اعلى مااازن
فانكمشت عيناه بضيق شديد واكمل في اي على الصبح يا ياسمين هو الواحد ميعرفش ينام شويه حلوين ابداا لو مكنش قاسم ونور يبقى انتي
ياسمين بتمثيل حزن ايه ده .. ايه ده انت بتكلمني انا كده يا مازن اخص عليك وانا اللي طالعه اصحيك خساره فيك والله انا همشي احسن واتجهت للخروج وهي بتضحك ضحكه ماكره
قام مازن في الحال ومسك ايديها وسحبها في تجاهو وحط ايديه على ضهرها بيقربها ليه فاتخبطت ايديها في صدره العاري وهي بتبصله وبتبتسم برقه شديده بتخليه يحبها اكتر واكتر .. بصلها بعشق واضح واكمل طبعا بتضحكي علشان عارفه انك مش هتهوني عليا واقوم اصالحك صح ؟
حطت ياسمين ايديها حوالين رقبته واكملت بحب وابتسامه ايوه علشان كده …. قولي بقى يا بيه هو انت هتفضل لحد امتى تتاخر في النوم ونصحيك بلعافيه هي مش عايده مراات عمي رنت عليك ورديت
ضحك مازن واكمل اه امي رنت بس رديت عليها ونمت تاني اقول اي في قاسم ونور صدعوني امبارح بعدين يا سمسم انا ادلعت كده انهارده علشان تطلعي تصحيني واصتبح ب الوش القمر ده
ضحكت ياسمين واكملت: اه انا عارفه والله اني هطلع اتثبت ومش هعرف اخد معاك حق ولا باطل يلا البس يا بيه وانزل بسرعه ورايحه تمشي بس ايديه اللي ملفوفه عليها منعتها فاكملت بضحك مازن اتلم و اوعي سبني
مازن بابتسامه عاشقه: وافرض انا مش عايز اسيبك
ضحكت ياسمين واكملت: يبقى تتجوزني يا روحي وانا افضل معاك علطول ده عز الطلب
رجعها مازن لورا اتخبطت في الحيط وحاوطها بين الحائط ودراعه واكمل بحب: وغلاوتك في قلبي يا بنت عز الدين هتجوزك وما حد غيرك هيشيل اسمي
ابتسمت ياسمين بعشق واضح واكملت بهمس والله بحبك
بعد عنها مازن بسرعه وهو بيضحك واكمل برا يا حبيبتي يلا علشان بعد بحبك بتاعتك دي انا اعصابي بتتعب
ضحكت ياسمين بشده واكملت للدرجه دي بقى مازن الرفاعي بحاله مش عارف يسيطر على اعصابه من بحبك لالا متوقعتكش كده يا ابن عمي وفضلت تضحك
شدها مازن ليه واكمل بحب بالغ وهو بيبصلها: مازن الرفاعي مفيش بنت في الدنيا كلها اتخلقت قادره تخليه يقف قدامها كده ويفقد سيطرته على نفسه قدامها غيرك ياست البنات
اتجمعت الدموع في عيون ياسمين وبصتله بعشق واكملت بصوت يكاد يسمع مختنق من الدموع يعني مش هتتخلى عني يا مازن في يوم من الايام ولا حتى علشان انا مش ..
ولكن قاطعها مازن لما حط ايديه على شفايفها واكمل بحب عمري ما اتخلى عنك وبلاش الكلام اللي مالوش لازمه ده .. انتي ذمبك اي يعني وبعدين انتي بنت عمي ودي الحاجه الوحيده اللي انا اعرفها وحط ايديه على خدها وسند جبينه على جبينها واكمل بحب وعدتك وعد وهكون قده يا ياسمين ثقي فيا ارجوكي
بصتله ياسمين بحب واكملت ثقه عمياء وعارفه انك قد وعدك
ابتسم مازن بحب وباس جبينها واكمل يبقى متقوليش الكلام ده تاني ولاحظ لون الروچ فاكمل بشئ من الحده اي القرف اللي انتي حطاه ده؟؟ امسحي متروحيش الجامعه كده
ياسمين باندهاش قرف! !! قرف ايه يا حبيبي مش فاهمه
شدها مازن وقفها قدام المرايا واكمل بحده ايه مش واخده بالك ؟؟؟؟
ياسمين فهمت قصده واكلمت وهي رافعه حاجبها هو ده قرف يا مازن .. ايه رايك مش ماسحه حاجه واتجهت انها تنزل فشدها مازن فاتخبطت فيه مره تانيه واكمل بعصبيه يعني ايه مش هيتمسح انتي اتجننتي ولا ايه طب لو متمسحش يا ياسمين همسحهولك بطريقتي وتابع بخبث ومعتقدش دي هتعجبك
ياسمين بحده مش همسحه و
قاطعها مازن بحده وهو ماسك دراعها انتي متعليش صوتك علشان مبلعكيش لسانك ده وانا ميتقاليش لا انتي هتستعبطي ولا ايه يلا امسحي ووريني تقدري تروحي بيه الجامعه ازاي … ايه القرف ده … ده منظر لون تحطيه.
ياسمين بحزن وافرض انا دلوقتي قولتلك عاجبني ومش عايزه امسحه يا مازن
شدها مازن ليه واكمل بحده يبقي امسحه انا يا قلب مازن ورايح يبوسها بعدت عنه بخجل شديد واكملت بخوف خلاص خلاص والله همسحه
بصلها مازن وهو رافع حواجبه واكمل لازم اهددك يعني؟ يلا امسحي
وقفت ياسمين قدام المرايا ومسحته كله ولفت واكلمت بضيق اممم حلو كده
ابتسم مازن بحب وحط ايديه على خدها واكمل ده كده زي الفل
بصتله ياسمين بضيق وحزن فضحك على شكلها الطفولي الغاضب واكمل اتقمصي للصبح القمصه دي بلذات مش بتهمني
ياسمين بحزن مازن هو بجد كان وحش وقرف
ابتسم مازن بحنيه واكمل بحب كان مخليكي قمر علشان كده بلاش منه برا اوضتك انتي اصلا جمالك بسم الله مشاء الله مش محتاجه كمان تخلي شكلك شفايفك قمر هيبقى كتير الصراحه
تنهدت ياسمين بحزن واكملت اانا بصراحه حسيت ان مش عاجبك شكلي كده وانا اصلا علي قدي في الميكاب مش بعرف اتقنه اوي
ضحك مازن واكمل انتي عبيطه يابت انا بقولك كده علشان غيران عليكي مستحملش حد يشوفك كده برا البيت انتي في الصعيد مش في التجمع انما لو على احساسي فانا علطول شايفك اجمل بنت خلقها ربنا
ابتسمت ياسمين بحب واكملت طب ما رجاله الصعيد بردو عارفه مين ياسمين الرفاعي ومحدش هيبصلي
مازن بحب حتي لو مش مهم انا لو اطول اخبيكي خالص هخبيكي
ياسمين بضحك طب يلا كفاياك رومانسيه وانزل علشان هيتعملك مرشح من الحج منصور تحت
مازن بضحك ده حبيبي ده انزلي انتي وافطري كويس وجاي وراكي
ياسمين بحب تمام وبلفعل نزلت
في الشقه اللي بيجتمع فيها العائله دخلت ياسمين وقعدت تاكل
منصور بحده ابنك عايز يتربى علشان قربنا نخلص ولسه منزلش
ايمن بتنهيده معرفش بيهبب اي كل ده بصراحه
منصور بحده لما ينزلي
ضحك حسام بصوت منخفض وهمس لزينب اخته كده مازن الله يرحمه
ضحكت زينب واكملت بهمس بس يخربيت فقرك اسكت لو جدي سمعك هيضمك انت كمان مع مازن
حسام بضحك لالا لسه متعرفيش اخوكي انتي انا ليا وضعي على فكره
زينب بضحك منا عارفه
بصتلهم نرمين واكملت كلوا وانتوا ساكتين كفايه همس ممكن
ضحك حسام واكمل اوامرك ياست الكل
وفي الوقت ده نزل مازن وهو جاهز وبيبتسم ابتسامه جذابه جعلت ياسمين تبتسم هي الاخرى واكمل بمشاغبه صباح الفل على اجدع حج منصور فيكي يا بلد
منصور بحده اممم كل بعقلي حلاوه يا واد ما لسه بدري يا بيه لسه فاكر تنزل ده انا قايلك عايزك انهارده في مشوار للدكتور اخص عليك يا مازن
صافيه وهي بتحاول تهدي الموقف اكملت تعالى يا مازن بوس على راس جدك وراضيه تعالى وبصتله وهو فهم قصدها وضحك وراح لجده وباس راسه وايديه واكمل بحب حقك عليا يا سيد الناس راحت عليا نومه والله منك لله يا قاسم انت ونور
نور بضحك تشكر يا عم
ابتسم منصور واكمل انا مبتثبتش يا مازن مش علي جدو الكلام ده
ضحك مازن بشده واكمل ايه ده يعني طلعت مبعرفش اثبت ماشي يا جدي تشكر
منصور بضحك طب اقعد كل يا بكاش علشان تشوف مصالحك وتيجي تاخدني لما يجي معادي للدكتور
مازن بحب حاضر من عيوني وقام وراح باس راس جدته واكمل بحب وهو بيضحك يخليكي ليا يا صفصف دايما تاعبك معاايا كده وبتهديه عليا
ضحكت صافيه واكملت بضحك حبيبي انت يا مازن اقعد افطر يلا علشان تلحق يومك ده جدك كان ناويلك علشان مشواركم انهارده
مازن بضحك منصور ده حبيبي ميقدرش يزعل مني مش كده يا حج
منصور بضحك كده ياللي مجننا كده يلا كل بقى
وقعدوا فطرو بعد شويه قام كل واحد علشان يروح شغله او كليته
يونس وهو طالع على برا اكمل يلا يا سمسم انتي واختك تعالوا هوصلكم في طريقي
ياسمين وهي بتسرع ورااه اكملت حاضر يا يونس جايه اهو
عز الدين خلي بالكم من نفسكم يا بنات
شهد وياسمين حاضر يا بابا
بصلها مازن وهمس خلي بالك من نفسك
فهمت قصده وهزت راسها ب تمام وابتسمت ومشيت
زينب وهي بتقوم يلا انا هروح انا المستشفى بقى اتاخرت اوي
حسام استني قايم اهو هاخدك معايا انتي وبنت عمك علشان لسه منزلتش
نور بضيق شديد المفروض ان البيه خطيبي يجي ياخدني معرفش اتاخر ليه ماتشوف صاحبك يا مازن
مازن بضحك بت بقولك اي الله ينعلك علي ينعل صاحبي خرجوني من حوراتكم بقى سيبتلكم الشقه امبارح هتوصلوني لايه اكتر اهااجر
نور بضيق يووه بقى
عايده بضحك طبطبت علي كتفه واكملت كُل يحبيبي سيبك منهم هتحرق في دمك ليه
مازن بحب باس خدها واكمل والله ما عاجبني حد في البيت ده غيرك يا صفصف
ايمن بضحك تشكر يا متربي
مازن بضحك مش بقول الحقيقه طيب
منصور بضحك خد بالك بتعاكس مراتي كل شويه
باس خدها تاني واكمل بضحك وابوسها كمان دي ستي حبيبتي دي مش ليك لوحدك
حضنته صافيه وهي بتضحك واكملت قلب ستك والله سيبه يا براحته يا منصور الله ده فرحتنا الاولى ده
ضحك حسام واكمل الله الله كلنا ملناش لازمه يعني يا صفصف ماشي ياستي تشكري
ضحكت صافيه واكملت كلكم حبايبي ونورعيني هو انا ليا الا انتوا
زينب بحب ربنا يخليكي لينا يا صفصف يا قمر
وفي الوقت ده خبط قاسم وفتحتله نرمين
نرمين بضحك ادخل ادخل
قاسم بضحك ايه في ايه اتاخرت عليكم
نور بصتله بضيق شديد فاكمل وهو بيضحك الله النور ضلم كده ليه مالك يا نوري
نور بضيق ماشي يا قاسم كل ده تاخرني على الكليه اول يوم
قاسم بحب حقك عليا يا ست البنات والله راحت عليا نومه
مازن اممم يبقوا مسهرني وهو اللي يروح عليه نومه كمان
قاسم بضحك انا مالي اختك اللي كل حاجه تجري تقولك بعامل طفله قسما بالله
معتز بضحك ماهي طفله صح هي كبرت يعني نور
نور بضحك لا يا عمو لو سمحت انا بقيت في الكليه خلاص
عايده بضحك اه كبرتي يا قلب ماما اومال
قاسم بضحك شايفه ضحكتيهم على مشاكلنا ازاي
نور قاسم انت اللي استفزتني انا ملبستش ولا لبس من الجديد اللي جبته كله
قاسم تنهد يمنع نفسه من الغضب واكمل بهدوء وانا والله مش جديد عليكي اظن عارفه انا بوافق بايه واي لا
نور وبلسنبه لاني جبته خلاص ومفيش ترجيع
قاسم يترمي يحبيبتي مفيهاش مشاكل او تديه لحد محتاجه
نور بضيق يا بابا بص
ايمن خرجيني منها يا نور خطيبك مغلطش انا معاه
قاسم شوفتي حتى ابوكي بيقول ان
نور بمقاطعه وبضيق تمام ونزلت وسابته
قاسم بحده اهزقها طيب علشان بكلمها تنزل كده ومعملتش احترام لاي حد قاعد
مازن بتنهيده وهو بيحاول يهديه : معلش حقك عليا انا بت قليله الادب متربتش انا هبقي اكلمها
قاسم بحده لا محدش يدخل في الموضوع ده يا مازن خطيبتي وانا عارف اتعامل معاها ازاي هي لو محترمه اي حد مكنتش اتكلمت بلاسلوب ده عن اذنكم
ونزل وراها
عايده بتنهيده بنتك يا ايمن لازم تتعلم ان مينفعش تكلم خطيبها كده احرجتنا كلنا واحنا قاعدين
منصور بحده اقرص علي نور شويه يا ايمن قاسم قالها بلطريقه ان معملتش احترام لعمامها وابوها وجدها واخواتها اللي قاعدين
ايمن نفخ بضيق واكمل حاضر يابا لما تيجي هشوفها
مازن محدش يكلمها نور عيله وبتغلط وانا عارف اقولها ازاي ان طريقتها دي غلط من غير ماحد منكم يدخل انتوا عارفين هي حساسه ازاي
نرمين بس يحبيبي بردو مفروض تحدد كلامها امتي تقوله وفي وجود مين ميصحش اللي عملته في خطيبها وقدامنا
مازن بتنيهده حاضر يا مرات عمي انا هكلمها عن اذنكم هجيلك يا جدي في معادك متقلقش مش هتاخر وباس راس امه وسته ونزل
في عربيه قاسم
نور بتوتر قاسم
قاسم بحده نعمين
نور بحزن حطت ايديها على ايديه انا اسفه يحبيبي مقصدش اني اتجاهل كلامك وانزل بلشكل ده
قاسم شال ايده واكمل بحده طب انا بحاول اهدي نفسي علشان مش عايز اهزقك وتدخلي الكليه معيطه فخليني ساكت احسن
نور بحزن قاسم والله مقصدش انت بس عصبتني اصل انا اشتريت الهدوم مش معقوله ولا واحد عجبك اعمل فيهم اي دلوقتي
قاسم وقف العربيه فاجاه فا الفرامل عملت صوت واكمل بعصبيه مايولعوا انا قولت لا يعني لا هو علشان اشتريتيهم خلاص هوافق البسك المسخره اللي جيباها دي ?? هو يعني اي اشتريتيهم اصلا ما طلما مينفعش يتلبسوا يبقي الامر منتهي ومفيهوش نقاش ويغوروا هما والفلوس اللي ادفعت فيهم انتي بتستعبطي ولا لسه عارفاني امباارح ومش عارفه طبعي انا عايز افهم بس
نور نزلت عينيها وعيطت بصمت واكلمت بصوت مختنق من الدموع خلاص يا قاسم مش هلبسهم انا اسفه
قاسم بحده وهو بيرجع يسوق ده كده كده اصلا انا مكنتش باخد رايك وحسابك معايا بعدين علي طريقتك قدام اهلك دي
نور بدموع تمام انا غلطت فعلا وعيطت
قاسم غمض عينيه بحزن ونفخ واكمل استغفر الله العظيم يارب طب يابنت الناس انا عملتلك اي علشان تعيطي
نور فضلت تعيط بس فا قاسم مسح دموعها واكمل بحب حقك عليا والله مقصدش اعيطك بس انتي قليتي ادبك جامد وعصبتيني يا نور
نور بدموع عارفه وانا اسفه بجد يا قاسم
قاسم بحب لا يا حبيبت قاسم متعتذريش محصلش حاجه خلاص المهم انك اعترفتي بغلطك وميتكررش ومسك منديل مسح دموعها واكمل بحب خلاص بقي كل دول بسبب قاسم اخص عليك يا قاسم
نور ضحكت من بين دموعها واكملت خلاص والله مش هعيط ومسحت دموعها حلو
قاسم بحب ايوه كده قمر و بص في ساعته واكمل اتاخرتي اوي هكلم يونس يدخلك
نور بضحك واسطه من اولها
قاسم بضحك هنعمل اي بقى هو يوم باين من اوله
نور بتوتر ربنا يستر
وبلفعل وصلوا بعد شويه وكلم قاسم يونس وراحله
يونس بابتسامه وهو بيسلم عليه ازيك يا قاسم عامل اي خير طلبتني
قاسم بابتسامه بخير نحمد ربنا وضحك واكمل معلش بقى دخل بنت عمك المحاضره اتاخرت اوي وقلقانه
بص يونس لنور لقاها واقفه متوتره جدا وبترتعش فاكمل بضحك بس يا حبيبتي اي كل الخوف ده عارف انك اول سنه في الجامعه بس مش مستاهله كل ده متخافيش اوعي تبيني اوي كده انك اولى جامعه هيعملوا عليكي حفله و سيبها يا قاسم وانا هدخلها متقلقش
نور ضحكت واكملت لامتخافش مش هيبان عليا بص هبهرك كده
يونس بضحك واثق من كده انا حفظتك كل حاجه علشان متتلغطبيش وحد يضحك عليكي
نور بضحك قولتلك عيب عليك بنت عمك هتشرفك وهبهرك بيا كاني بقالي سنين في الجاامعه ومحدش هيلاحظ خالص
ضحك قاسم واكمل جدعه برافو وبص ليونس واكمل حبيبي يابرو هتعبك يلا هروح انا يانوري علشان اتاخرت اوي انا كمان على الشغل وباس جبينها
شدها يونس واكمل بضحك يا جدع مش قدام ابن عمها يخربيت بجاحتك يالااا مفيش ادب خالص
ضحك قاسم واكمل يابرو انت مننا وعلينا يلا باي يا حبيبتي
ابتسمت نور بحب واكملت باي يا حبيبي خلي بالك من نفسك
قاسم وهو ماشي اكمل من عيوني
ومسك يونس ايد نور واتحرك علشان يوديها المحاضره وبص في ساعته عرف انها متاخره ساعه
حمحمت نور واكملت بابتسامه هتعبك يا دكتور
ضحك يونس واكمل جميله منك دكتور اي الادب اللي نزل عليكي فاجاه ده يا نور
نور بضحك هو بعيدا عن انك قمر مش باين 28 بس الفرق بينا 10 سنين مش صغير ابدا ده انا لما بعوز من مازن طلب ضروي اوي بدلع عليه وبقوله يا ابيه علشان يرضى وانت قده فالازم في شغلك احترمك زيي زي باقي الطلاب ولا اي يا دكتور
ضحك يونس واكمل عندك حق كفايه الواسطه اللي هدخلك بيها دلوقتي
وخبط ودخلوا المحاضره
فشهقت نور واكملت يالهوووي كل ده فصل ده كبير جداا
يونس اتصدم وحط ايده علي بوقها وضحك باحراج واكمل بهمس ايه فصل !!!! منك لله هو ده اللي حفظتهولك
نور بهمس اي انا عملت اي
يونس بحرج هششش اسكتي خاالص
شافه الدكتور رأفت وضحك وقام من مكانه وسلم عليه واكمل ازيك يا دكتور يونس نورت معلش هي اول سنه كده بعدين هتتعود متعرفناش
يونس سلم عليه واكمل بابتسامه وضحك مصتنع اه طبعا طبعا انا بخير بس معلش هطلب منك خدمه دي نور بنت عمي اتاخرت انهارده بسبب ظرف حصل في البيت وطلبت مني اقولك ده بنفسي علشان تصدق
هز رافت راسه موافقا واكمل اكيد مش هكدب حضرتك يا دكتور انت بتحب الالتزام وطلما جيت بنفسك يبقي امر فعلا يستاهل اتفضلي يا نور واخر مره
ابتسمت نور بفرح ودخلت وهي بتبص ليونس بامتنان شديد
فابتسم ليها واكمل شكرا يا دكتور تعبتك
ابتسم رافت واكمل لا ولا يهمك
————————
بعد كام ساعه في الكافيه عند مازن قاسم كان خلص شغله وراحله الكافيه
مازن بتنهيده قويه اه يعني انت عايز تخوفني ولا اي
قاسم هز راسه ب لا واكمل لا يا غبي انا قلبي عليك انت فاهم انت بتقول اي انت عايز تتجوز ياسمين
مازن بعصبيه ومالها ياسمين ماتتعدل كده ما انت عارف اني بعقشها وهتجوزها بتستعبط ليه
قاسم بحده يابني انا بقول بكره تفوق انت عارف انت عايش فين انت في الصعيد والناس مبتسبش حد في حاله اما مازن الرفاعي كبير احفاد عيله الرفاعي يتجوز ياسمين الناس هتقول اي ??? انا قولت انك مع الوقت هتبطل تفكر في الموضوع ده انما انت من وهي في اللفه مش شايف غيرها وده هيوجعك علشان
قاطعه مازن بعصبيه واكمل بس يا قاسم لو قولت كلمه وحشه في حق ياسمين هتخسرني فعلا انا وعدتها وهكون قد وعدي بل بلعكس شايفها كتير عليا
قاسم بصله بحده واكمل بعصبيه انت عبيط ولا ايه ياسمين اختي وست البنات وميعبهاش حاجه انت عارف معزتها عندي قد اي احنا متربين سوا كلنا وبنت مؤدبه ومحترمه بس المشكله في اهلك ممكن يرفضوا ان يجوزوهالك علشان الناس ووطي صوته وتابع بحزن لان في النهايه ياسمين مقطوعه من شجره منعرفش عنها حاجه ولا اي اصلها وفصلها وكتر الف خير عمك انه رباها وهي طفله وسط ولاده يعني مش بنت عمك يا مازن
ملحوظه قاسم 24 سنه جارهم وصاحب مازن القريب وعشره عمره
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية غموض الحب)
