رواية غمرني بحبه الفصل الثامن 8 بقلم سحر السحرتي

رواية غمرني بحبه الجزء الثامن

رواية غمرني بحبه البارت الثامن

رواية غمرني بحبه الحلقة الثامنة

*اسرعت الى المستشفى لكن لا تدري ما هذا الشعور هل هي فرحه بعودته ام فرحه بانهاء هذا الارتباط المنهك هل ستستمر معه ام ستتركه
*طرقت الباب كان نائما
:ازيك يا طنط فاق امتى
: امبارح بس كلمتك كثير تليفونك مقفول
: اه الشبكه كانت وحشه وهو عامل ايه دلوقتي بيتكلم وحاسس بيكم
: اه هو كويس
*استيقظ يزن واندهش من وجودها وقال
: انت مين انا اعرفك
:حمد لله على السلامه يا يزن عامل ايه دلوقتي
:كويس انت مين
*شعرت ببعض الحزن هل لانه لا يتذكرها ام لانها أضاعت من عمرها ايام في انتظاره
:انت مش فاكرني
: لا مش فاكرك
*ارادت الخروج من هذا الموقف تحججت
:طنط انا هروح للدكتور اساله عن حالته
:طيب يا حبيبتي ما تزعليش ده يمكن من اثر الحادثه بس هو فاكرنا وفاكر كل اصحابه
:مش هتاخر
*خرجت واغلقت الباب واستندت بظهرها عليه وهي تبكي فاستمعت الى حواره مع والدته
:ازاي يا يزن مش فاكرها انت فاكر كل الناس
*قال بمنتهى السخرية والاستهتار
:فاكرها بس بقول لها كده عشان تمشي
: ليه يا حبيبي دي اكتر واحده وقفت جنبك وتقريبا كانت بتيجي كل يوم في الوقت اللي كل اصحابك نسيوك دي خطيبتك اللي اتخانقت معايا عشان تخطبها
:انت عارفه الحادثه حصلت ازاي
:لا هي قالت انك اتخانقت مع صاحبك وكنت بتدافع عنها
: انا ما كنتش بدافع عنها ولا حاجه كل الحكايه احنا كنا بنتسلى بنختار واحده نتعرف عليها وناخذ مزاجنا منها اذا ما كانش برضاها يبقى غصب عنها
:انت بتقول ايه انا مش مصدقة و اشمعنى سهر
: مره واحد صاحبي جالي المكتب شافها و اتحداني اوقعها طبعا عشان هي محجبه وعامله فيها شريفه رحت خطبتها واخذتها معايا الحفله ويومها كنا كلنا هنتسلى بيها وخناقتي مع صاحبي انه كان عايز يبدا هو الاول انا رفضت لانها خطيبتي و لازم ابدا انا الاول لانه حق…
*كاد ان ينتهي من كلامه ولكنه وجد صفعه قويه على وجهه فصرخ
: ماما انت بتضربيني
: انا كنت عارفه انك مقضيها وبتشرب قلت شاب …. لكن تلعب ببنات الناس المحترمه المتربيه في بنات تقبل على نفسها الكلام ده مش هلومك تمشي معاهم لكن سهر …خساره تعبي عليك ….. هو ده عقاب ربنا ومع ذلك تفوق بعد سنه من الغيبوبه بدل ما تحمد ربنا بتتباهى باللي كنت عايز تعمله….. و ذنبها ايه تضيع سنه من عمرها مستنيه واحد ندل زيك ….ذنبها ايه اول ما تفوق تمثل انك مش عارفها … انا كنت رافضه خطوبتك منها لاني كنت فاكراها اشتغلت عندك ولعبت عليك وطمعانه في فلوسك لكن بعد الحادثه اثبتت انها بنت اصول ومتربيه اتمنيت فعلا انك تفوق وتتجوزها … لكن بعد اللي قلته واحدة في اخلاقها خساره فيك
:خساره فيا و هو انا اصلا كنت عايزها ده كان مجرد رهان
: يا ابني حرام عليك ربنا ردك من الموت و ادالك فرصه ثانيه بلاش تضيعها … ربنا بيقول لك فوق من غفلتك …. اسمع لو استمريت في الطريق ده هتندم عمرك كله …. واحده زي سهر دي ما تضيعهاش من ايدك
: سهر دي في زيها كتير واحسن منها كمان انا ايه اللي يربطني بواحده معقده ومحجبه وعامله لي فيها شريفه
: انا نصحتك وانت حر بس اوعى تفكر انك ممكن في يوم من الايام تتعرض لها او تاذيها انا اللي هقف لك
بقلمي سحر السحرتي
*صعقت سهر بعد سمعاها لكلام يزن مسحت دموعها وطرقت الباب
*رات والده يزن دموعها فظنت انها تبكي لانه نسيها
:انا اسفه يا طنط ما لقيتش الدكتور
*وقامت بخلع خاتم الخطبه ووضعته في يد والده يزن
: ليه كده يا سهر ليه يا حبيبتي
:كده احسن لينا احنا الاثنين
: انت زعلتي عشان ناسيكي بكره يفتكرك
:لو كان حبني ما كانش نسيني انا كمان الحقيقه يا طنط ما حبيتهوش و ما قدرتش اخد الخطوه دي قبل ما يفوق لانها كانت هتبقى قله اصل لكن دلوقتي اقدر اسيبه وانا مطمنه حمد لله على سلامته مره ثانيه … ادعي له كثير وطلعي صدقه حلاوه رجوعه …. هتوحشيني
*بكت والده يزن
: انت كمان هتوحشيني اسالي علي انت بقيتي زي بنتي و غلاوتك كبيره في قلبي
: اكيد يا طنط هسال عليك اسمحي لي امشي وبكره هبعت باقي الذهب
: لا ده هديه مني لك
: معلش كده هبقى مستريحه اكتر سلام يا يزن
*خرجت وبكت وهي تمشي طوال الطريق لم تكن تعلم كيف وصلت الى المنزل كم ساعه مشيتها حتى وصلت لكن ما تعلمه ان الدموع لم تفارقها طوال هذا الطريق الطويل
*دخلت المنزل منهكه و متعبه توضأت وصلت ركعتين شكر لله ودعته
:الحمد لله يا رب انا راضيه … سنه ضاعت مني ومنعت عني مصير بشع كنت هقع فيه …. مصير مجهول اخره …الحمد لله انا راضيه
*انتهت من دعائها و مناجاتها لربها وندرت باخراج صدقه شكر على نجاتها من ذلك المصير
*رن جرس هاتفها فأجابت وصوتها متعب مليء بالحزن و يختنق بالدموع
:مالك يا سهر معقوله زعلانه كل ده عشان اتعصبت عليك شويه امبارح
: لا ابدا انا كنت لسه هبعت لحضرتك رساله اصل شكلي اخذت برد ومش هقدر اجي بكره ممكن اخذ اجازه وكويس ان ايناس أجازتها خلصت وهتبدأ بكره
: انت المرض عندك مظبطها ولة ايه
: الحمد لله انه ظبطها احسن كنت هضطر اجي وانا تعبانه
: انت متاكده انك تعبانه حاسس ان في حاجه ثانيه
: لا تعبانه جدا
: اجيب لك دكتور
: لا ده دور برد عادي بعرف اتعامل معاه
:خلاص ابعت لك حاجه عارف انك لوحدك
: لا اختي هتيجي بكره شكرا
:طب ابقي طمنيني عليك
:حاضر مع السلامه
:سهر استني انت لسه زعلانه مني
:ليه
: لما اتعصبت امبارح عليك اسف مش عارف عملت كده ازاي
:لا مش زعلانه في هدايا ربنا بيبعتها لنا بتقول لنا ما فيش حاجه تستاهل الزعل عليها
:مش فاهم تقصدي ايه
:بس انا فهمت تصبح على خير
:وانت من اهله ارجوك لو احتاجتي حاجه كلميني
: حاضر
بقلمي سحر السحرتي
*نامت هذه الليله بعمق و كأن جبلا كان فوق قلبها
*في الصباح اتصلت عليها والدتها
:سهر في ايه
: في ايه يا ماما
: امبارح قلبي كان مش مطمن وقلقانه عليك استنيت الصبح يطلع عشان اكلمك اطمن عليك
:اطمني يا حبيبتي انا كويسه قوي قوي كمان
:خير فرحيني
: يزن فاق والحمد لله مش فاكرني ففسخت الخطوبه
: ايه هو ده الخبر اللي يفرح ليه كده
:ما كنتش بحبه
:و ضيعت سنه من عمرك مخطوبه له ليه
:لانه كان بيدافع عني ما قدرتش اطلع قليله الاصل ربنا بيكتب لنا الخير في كل وقت
:وايه الخير في كده
: اني نقلت شركه احسن وراتب اعلى خدنا ايه من الجواز غير عينة عادل
:انت لسه شايله منه
:ده كرهني في الجواز نهائي و خلاني اجلته لاجل غير مسمى
:ليه كده
:سيبيني براحتي يا ماما ووقت النصيب ما يجي ما حدش هيقول له لا … المهم طمنيني انت عامله ايه عند اخويا
:مبسوطه وشايلني شيل
: طب كويس راحة ليك وعقاب لسمر وجوزها
:انت مصره و اخوك رايه كده بيقول لو ارمله او جوزها فقير نشيلها انما شغل استنطاع لا
: عرفتي بقى اني صح
: اه انتم صح وانا غلط مبسوطين روحي احسن تتاخري على شغلك وتقولي عطلتك
: لا خدي راحتك
:من امتى
: اصل واخده النهارده اجازه
: ليه خير فيك حاجه انا قلبي كان حاسس
:ماما …ماما اهدي انا كويسه بس بقالي يومين بشتغل مع الضيوف في القريه الريفيه فتعبت قلت اريح ومستر كريم مقدر ده واداني اجازه
:كثر خيره وهتعملي ايه في اجازتك
:هنام وبس
: ما تروحي شويه عند اختك وخدي لها معاكي شويه حاجات
:ماما
:عشان خاطري
:حاضر هاخد معايا اكل جاهز ليها وعيالها وبس حلو كده
: عيب عليك
:مش هصرف جنيه على النطع جوزها ولا بلاش اروح
:خلاص روحي مخلفه يهوديه
: ده انا اليهوديه برضة خلاص مش هزعلك هطلبها تيجي هي والعيال ياكلوا هنا وبرضو بلاش هو كويس كده
:دماغ جزمه
: شكرا بس على فكره ده عيب مصنع
:يا قليله الادب
:الحمد لله اني مش قدامك كنت حدفتيني بالشبشب
بقلمي سحر السحرتي
*اتصلت على سمر
: اسمعي عزماك انت والعيال بس على اكل جاهز شوفي يحبوا ياكلوا ايه عشان اطلبه و تعالوا متاخر شوية
: طب وعادل
*ردت بسخرية
: ماله يا حبيبتي
:مش هتعملي حسابه
:صحيح من عاشر القوم هو علمك البجاحه انا قلت انت والعيال مش عايزه خليك في بيتك معززه مكرمه
: لا جايه يولع هو احسن انا والعيال هفتانين منه لله
: ايوه كده احبك تاكلوا ايه بقى
:بروست وفراخ مشويه وكباب
: ده انتم جعانين مش هفتانين بقى حاجه واحده يا اجمل اخواتك هو المرتب فيه كام للبعزقة دي
: هو انت بتصرفي مرتبك على ايه
:وانت مالك هتشاركيني في مالي ده انت بقيتي نسخه منه خلاص انا هختار هو انا اللي غلطانة انا بسالك ليه اصلا
*دخل كريم المكتب وجد ايناس لكنه احس ان المكتب ينقصه شيء بعدم وجود سهر فهنأ ايناس على عودتها ودخل مكتبه يحمل حزنا غير مفهوم بداخله
*دخل سامي و اخبره ان خطيب سهر قد استعاد وعيه وان الجميع يهنئ والده بشفاء ابنه ولابد أن سهر عنده الان
*ازداد حزنه لكنه سيطر عليه حتى لا يظهر وانشغل في عمله و اجتماعاته
*في اخر النهار اتصل بسهر كي يسمع صوتها بحجه انه يهنئها بسلامه خطيبها
*في ذلك الوقت وهو يتصل كانت سهر تحاسب عامل التوصيل فرد ابن اختها بدلا عنها وعندما راى الطعام هلل
: الاكل … هناكل …. هناكل هييييه
:يا سمر هو عيالك كأنهم ما شافوش اكل من زمان هتفضحونا …. وانت مين قالك تمسك تليفوني
*واخذت الهاتف وردت
: اهلا يا مستر كريم
:عامله ايه دلوقتي
:بقيت احسن واختي جت هي وعيالها واهم قالبين دماغي بدل ما اريح
:هو انت ما خرجتيش النهارده
: لا طبعا انا تعبانه مش قادره امال اخذت اجازه ليه
*خجل ان يسالها عن خطيبها واحس براحه لحد ما لعدم خروجها
: هتقدري تيجي بكره ولا تاخديه اجازه كمان
: اه جايه بدل المدرسه اللي انا فيها
:مستنيكي سلام
بقلمي سحر السحرتي
*في اليوم التالي كانت ترتدي ملابس بيضاء زاهيه كأنها ملابس العيد
*تعجب كريم من رؤيتها وظن انها سعيده بعوده خطيبها عندما دخلت مكتبه
:مبروك
:على ايه
: خطيبك فاق
:يزن ااااه فاق بس ما بقاش خطيبي
*وجدت لمعه غريبه في عينيه وبدا يتفحص يدها وجدها دون دبله
:بجد حصل ازاي
*ضحكت من طريقته في السؤال
:صحي من الغيبوبه مش فاكرني اتلككت وقلت لمامته لو كان حبني كان افتكرني واخذت ديلي في اسناني وقلت يا فكيك وقد كان و الحمد لله مش عارفه حسيت انه هم كان طابق على نفسي
: امتى حصل ده
:يوم ما وصلني السواق المستشفى
:يعني اول امبارح ما بلغتنيش ليه
:ابلغك بايه
: انه فاق وانك فسختي الخطوبه
:كل حاجه حصلت بسرعه وتعبت بعدها
*وقالت ببعض الحدة وكأنها تذكرت كيف تحدث معها
:وابلغك ليه اصلا هو كان في بينا معاد ولا ناسي انك اتعصبت عليا
:مش اعتذرت وانت قبلتي
: امتى ده
: هو خطيبك يفوق من الغيبوبه انت تقعي فيها
:سابقا خطيبي سابقا لو سمحت
:تعرفي اني حبيت كلمه سابقا دي قوي
:نعم يا باشمهندس كريم عندنا شغل كثير النهارده وانت معطلني
*خرجت والابتسامه لا تفارق شفتيها
ايناس: ايوه مين قدك خطيبك فاق
: سابقا يا حبيبتي دلوقتي بقيت سنجل
: ومبسوطه قوي كده ليه الندل سابك اول ما فاق
: لا انا اللي سبته هحكي لك
#هل ستخبر ايناس بالحكايه الصحيحه ام ستخفي الحقيقه عن الكل