رواية غرباوية عاشقه شرقاوي الفصل السادس 6 بقلم روياتي
رواية غرباوية عاشقه شرقاوي الجزء السادس
رواية غرباوية عاشقه شرقاوي البارت السادس
رواية غرباوية عاشقه شرقاوي الحلقة السادسة
🤍الحلقه الاخيره🤍
.
.
.
عمتي … والله مش عارفه مانقولك يا وليدي قرار صعب هذا وفكر الكويس
حني…. ايوا والله صدقت خراب البيت مش ساهل
هوا .. فكرت كويس مافش الا الحل هذا تشوفوا بروحكم انتم ف مشاكل اخر فتره كملت هكي معاها كرهت نقعد ف شقتي مانروحش الا ف ليل عشان مانتلقش معاها. نتعاركو …
انا حسيت عمتي تبحت فيا صبيت وطلعت …
قعدو يحكو شويه ف موضوع بعدها قالو ع راحتك …
انا معا ماما ف مطبخ بس نسمع فيهم. …
محمد طلع …
خشت عليا عمتي ف مطبخ معايا ماما قالتلي….. غريبه محمد مسكر راسه ع طلاق اول مره يقعد مصمم هكي 😏
ماما… الله غالب كل شي نصيب
عمتي… انا راضيه شويه بالفراق عشان العويل القنه اتعبو مافش حل…
ماما… لا صح ف هذي معاه الحق دار الي عليه..
انا .. طلعت من دون مانحكي…
رنيت ع محمد .. قتله .. عليش تفتح ف موضوع توا حيستهم شكو فينا…
هوا… خلاص نبي نتزوجك ولا انتي ماتبش😏
انا… انفكر قبل😌
هوا… اجباري من دون تفكير المره هذي…..
.
بعد اسبوع من اصرار محمد ع طلاق فاطمه طلبت اتجي تاخذ دبشها ابروحها من شقه …
محمد… وافق بعد كم يوم يوم جت..
محمد خش علينا وعطانا العلم انه فاطمه جايه هيا واختها وامها تبي تاخذ دبشها…
كلنا مقمعزين ف صاله محمد دزلي رساله …
ماتطلعش ع فاطمه راه تعارك معاك..
انا… عليش نبي نطلع ماصدقت افتكيت من وجها 😒
هوا…. انحس ف روحي زعلان😌
انا… ريح روحك راه خيرلك 😒
هوا ضحك بصوت واضح وكان يبحت فيا كلهم بحتو فينا وانا اندير ف روحي مش شوري الموضوع مانبش انبحت 😐
بعد شويه جت فاطمه .. عدا محمد يفتح ف باب خشت هيا واختها وامها مافش حد سلم عليه …
رقن فوق وهوا قعد لوطه…
قعدن حاجة ساعه وبعدها نسمعو فيهن اينزلن ف حاجات … بعدها صوت وقف…
محمد. … اكيده روحو انعدي انشوف
طلع لقاهم طالعين سكر باب…
وطلعت عمتي …
محمد . . ف بنه غريبه تشمي فيها يا امي..
عمتي… اها بلكي عند جيران
هوا … نرقا انشوف
عمتي… جايه معاك
بعد شويه نسمع عياط عمتي وتكلم فينا محمد صوته عالي ….
انفجعت ورقيت دغري …
نلقا دخان ونار ف شقه😑
طلعت فاطمه حارقه صالون صاله قبل ماتطلع ومخربه كل شي ف شقه قبل ماتطلع…
ف وقتها تأكدت انها مريضه نفسيه ومش هيا بس طلعت ف عائله كلها هكي لانه مفروض امها ماخلتهش ادير هكي لو هيا طبيعيه ….
التمو علينا جيران مافش حد ماجا ايطفي ف نار …
وف ليل جن جرات وحوش صبايه كله..
نسمع ف محمد فتح ال باب وخش يبي يرقا فوق…
فتحت باب صاله … وقتله الحمدالله ع سلامتك ربي يعوضك خير😥
هوا… الله يسلمك…. والله اخر شي كنت متوقعه اديره…
انا… خليها تبرد ع روحها والله مريضه نفسيه هذي ..
هوا… والله ماني ساكت توا نبي نرقا بلكي نلقا حاجه من ادبشي كويسه انغير ونعدي اندير فيهم ليله نفس نهار الي داروه فيا…
انا …. لا رد بالك توا تعارك معاهم…
هوا… خشي بس انتي.. ورقا فوق بسرعه
انا … لحقتا دغري…
انا… محمد ماتعدش😥
هوا… ضروري نمشي مانقدرش نقعد. هكي .
انا… باهي عشان خاطري….
هوا… متخافش عليا مش حايسير شي
انا … لالا والله خايفه… 😥
هوا …. ف حاجه محتاجها بس بنتي دخان ودبشي مش نظيف
انا عرفته شن يبي وحضنته وكانت محتاجينها نحنا الاثنين…💗
انا .. خليك عارفتك ادير مشكله.وانت متعصب هكي.😣
هوا… لا خلاص خذيت مهدي توا 😌
انا… حولت … وقتله نزعل منك كان عديت☹️
هوا… لا مش هكي عاد ضروري ناخذ حقي كان سكتت نقعد مش راجل انا ف نظرهم ويطمعو اخرى ودير اكثر من هكي هذي…
قعدت نحكي معاه ونقنع وفيه بس مافش فايده سكر راسه وعدا…
من اول ماعدا وانا نستنا فيه ع نار …😐
العند جت ساعه 2 ف ليل وهوا ماجش مايردش عليا…
معش قدرت انتحمل وعيت عمتي وحكيتلها اني سمعت محمد يكلم ف واحد ويقوله يبي يعدي الهل فاطمه ومزال ما جا العند توا قلت انقولك بلكي ف شي تطمني عليه…
عمتي انفجعت وقعدت ترن عليه بس مايردش قعدت ترعش وتبكي…
معش عرفت ماندير وعيت بابا وحكيتلا نفس الكلام الي قلته ال عمتي …
الحوش كله وعا ونفجعو …
بابا يرن ع محمد مايردش…
رن ع ولد عمي رد عليه..
قاله وين محمد .. قاله كلمنا توا داير مشكله معا نسباته واصله للضرب…
بابا قعد يسأل فيه ع مكانهم عطاه الوصف….
وخذا مفتاح كنتر محمد من عمتي..
طبعآ محمد عندا كنتر خاطي سياره امتاعه يخدم عليها مره مره….
خلاص طلع بسرعه …
ماما خايفه ع بابا لانه فيه سكر مايشوفش ف ليل ممنوعه عليه السواقه..
بس الله غالب مافش الا هوا 😐
طلع .. مرت ساعه ع مشيتهم.. مافش حد رد علينا طمنا حتى بابا معش رد …
بعد ساعه عمتي رنت اخرى ع ولد عمي . .. رد عليها..
قعدت تسأل فيه ع محمد… قاللها محمد كويس ماتخافش عليه… لكن عمي داير حادث ورنو عليا انا لانه اخر رقم ران عليه انا…
وكان قصده ع بابا 😣
انفجعنا وماما انهارت وقعدنا نستنو ف اي حد ايطمنا عليه ..
وانا ف مطبخ .. مقمعزه ونبكي وندعي ال بابا ..
بعد شويا… نسمع الحوش انقلب عياااط💔
طلعت نجري مش فاهم شي … طلع بابا توفا وكان الحادث خطير بس هما مايبوش يفجعونا😓
انا مش مستوعبه كيف صار هكي قبل شويه مافيه شي كيف بعد ساعه يموت وانا الي وعيته للموت كان راقد انا وعيته من نومه للموت وكان هذا اكثر شي كاسر ظهري … 💔💔💔
انسرعلكم الاحداث ……
بعد اربع شهور من وفات بابا… انا مزالت ماصبرت وكل يوم ضميري يأنب فيا وحاسه انا السبب ف موت بابا مش قادره انتقبل
كل شي صار مريت بفترة اكتئاب ونقمت ع محمد ومعش حكيت معاه من يوم وفات بابا وحسيت انه هوا السبب مع انه حاول يحكي معايا بجميع الطرق بس انا مش متقبلته بكل وحتى تبحيت مانبش انبحت فيه ….
بعد الفتره هذي خويا طلع من الحبس وكان هذي ال شي الوحيد الي قدر يهون علينا…
جانا ف بنغازي قعد معانا اسبوعين بعدها قال ال ماما هيا انردو الحوشنا …
انا ماما وافقنا دغري لانه انا كرهت بنغازي وكرهت حوش عيت جدي وكل شي يذكرني بلي صار…
خويا قال ال محمد انه نبو نردو ال طرابلس وكانت صدمه له…
كان مزال يوم ع سافرتنا….
محمد ف ليل دزلي اطلعي للصور نبي انشوفك ضروري وكان ماطلعتي والله انخش عليك ..
كان الحوش كله راقد …
طلعت … وكانت هذي اول مره انتقابلو بروحنا بعد الي صار…
هوا يبحت فيا بنظرات حزن … وانا انبحت ونزل ف عيوني مش قادره انبحت فيه كيف قبل…
هوا… كيف قادره تقعدي بلايا هكي..
انا… مش قادره نحكي معاك
هوا… شن ذنبي انا
انا… انت كان سمعت كلامي وماعديتش راه انا ماوعيتش بابا ماصارش هكي
هوا…. عليش تفكري هكي هذا قضاء من ربي يومه كاتبه له ربي قبل مايجي ع دنيا
انا… مش قادره نقنع روحي
هوا… مفروض الفتره هذي نقعدو معا بعضنا انصبرو بعضنا ليش اخترتي البعد
انا… هذا انسب شي ليا ولكي
هوا .. ماتعذبينش خلاص ركبتيني حاله نفسيه كرهت روحي
انا . .. طول عمري انحس روحي انا وانت ذنب ف كل شي مش حاننسي ودموع ينزلن بروحهن من دون صوت حتى البكا معش عندي جهد له 😓
هوا… معش تقولي هكي مرضتي روحك وحرقتيني معش خليتي فيا حيل بكا دموعه ينزلن وهوا يحكي …
معش قدرت انتحمل انشوفه يبكي اول مره انشوفه يبكي ديما قوي مش باين عليه انه حساس … بكيت الراجل واعره بالذات لما يكون اقرب راجل لكي💔
انا قمعزت لوطه وقعدت نبكي شبه انهرت …
هوا.. قمعز وحط راسه ع ركبيا وقعد يبكي…
كان اصعب موقف بينا… معش قدرنا انصبرو بعضنا كانت اكثر لحظة ضعف بينا …
هوا… رفع راسه وكان وجه قريب مني عيونه ملينات دموع يبحت قال والله ذليتيني مرضتيني اول مره اندير هكي ع بنت ارحميني خلاص كيف تبي تردي طرابلس وتسيبيني هكي كيف نبي انخش حوش وانتي مش فيه …
انا… خلاص معش نقدر نقعد فيه الحوش هذا كرهته وكرهت بنغازي كلها…
هوا … كرهتيني انا ☹️
انا… مش عارفه
هوا.. كيف مش عارفه جاوبيني
انا… محمد معش تسألني مش وقته الكلام هذا …
كنت نبي انصبي بس هوا ماسك ايديا ماقدرتش انصبي..
هوا… كيف نبي نقعد بلاك ليش قعدتي قاسيه هكي عليا قوليلي اي شي يطمني قبل ماتعدي..
انا… حولت انصبي وخشيت دغري … الداري.. وكانت حالتي مايعلم بيها الا ربي… 💔
تاني يوم كانت العيله كلها قاعده ويصبرو فينا ع مشيتنا مكسورين الخاطر جينا معا بابا وعدينا بلاه 💔
محمد طلع للسياره وكان يبي يوصلنا للمطار ركبنا وانا انبحت فيه طول طريق ملامح وجه مش مفسرات كأنا خانق العبره…
وصلنا للمطار نزل خويا وماما محمد ينزلو ف شناطي..
سلمو عليه وجيت انا سلمت عليه باليد وقتله انشوفك طيب هوا مارد شي كأنا مش قادر يحكي يبحت زعلان واضحه فيه …
اقريب ماتخشو معا باب بحتت لقيته مزال مصبي ع سياره ويبحت….
عدينا وصلنا طرابلس وكانن خواتي ف حوشنا مجهزين الغداء محولات دبش بابا دار نوم امتاعه وكل شي يخصا عشان نقدرو ننسو اختي الكبيره دكتوره نفسيه وهيا الي صبرتنا ع فتره الصعبه هذي 💔
محمد كان كل يوم ايدز ويحاول ايتواصل معايا بي اي طريقه
انا قعدت انرد شويه شويه معاه ف بدايه نحكي رسايل بعد صوت… وكان متحمل كلام القاسي الفتره هذي كلها ضغوطاتي نفسيه عليه ولا عمري حسيت انه مل ومش قادر ايتحمل كان صابر عليا وسند وصبر ليا الفتره هذي كلها ساعدني ع تحسن حالتلي نفسيه وكنت محتاجه يكون معايا حد هكي قعدت انتقبل فيه العند ردينا نفس قبل….
بعد مرور سنه ونص ع وفات بابا … محمد قرر انه ايجي يخطبني رسمي ونتزوجو….
بس انا ماقدرتش نحكي معا هلي ف موضوع..
هوا جاب حنى وعمتي وكانو هلي يحسابو زياره عاديه.. بعدها فتحو الموضوع ال خويا وماما خويا فرح بالموضوع بس ماما قالت انفكرو ونردو عليكم…
ماما كانت عارفه انه ماكنتش متقبله محمد وخافت انكون مزالت هكي حكيت انا وماما فهمتها اني راضيه متقبله الموضوع…
بعد فتره جو ودارو خطبه وبيان وفاتحه وكل شي كان ورا بعضه… 🤍
محمد حدد الفرح بعد 6 شهور من الخطبه ..
بس انا شرطت عليه مانقعدش ف حوش الي مات فيه بابا …
هوا قنع هلا وباع الحوش وخذا حوش اخر ع دور ثاني لانه مايقدرش يسيب امه ماعندهش الا هوا مافش راجل ف حوش وحني وامه بس …
جا وقت الفرح ودرنا فرح عائلي ماكنتش حابه انديره كبيره كان خاطري مزال واجعني ع بابا وكان الفرح ف طرابلس اول ليله بينا ف فندق وكانت ليله مميزه ونحنا الاثنين مش مصدقين انه قعدنا البعضنا بعد معناه الي مرينا بيها وكل واحد مرايف ع لاخر اكثر💓
بعد تلات ايام… قررنا انردو ال بنغازي
وكنت خايفه من المشيا ال بنغازي تذكرني بحاجات حاولت فتره طويله ننساهن.. وهذا سبب الي خلاني نقعد اول ايام بينا ف طرابلس عشان مانكدش عليه ونخرب اجمل يوم بينا ..
بس هوا كان طول الوقت شاد يدي ويهدرز وينسي فيا عشان مانركزش … وصلنا ال بنغازي ..
وهوا عكس الطريق وكل شي ايجيب شور المنطقه الي كانو ساكنين فيها معش شالني له …
بعد شهر من زواجنا حملت 💓
وكان اجمل خبر بالنسبه الهم بالذات محمد مش مصدق انه صار شي هذا بالسهوله وكنا محتاجين شي يفرحنا💗
طول فترة حمل مخلاني اندير شي وكلهم خايفين عليا محمد مش قادر ايدس فرحته 💓
عدت فترة الحمل ونفسيتي تريحت …
وجبت عيل وسميته ع بابا💓
درنا اسبوع وليدي وكان كأنا فرح مش اسبوع مافش حد ماجا وهوا جاب شعراء وكل شي كأنا فرح عوض يوم فرحنا
جني خواتي و ماما وشاركني فرحتي
وانا حاضنه وليدي ونسمع ف بنت عمي تحكي ف قصتي صاحبتها… وقالتها قصتهم غريبه بس حتي هيا غرباوية وعاشقه شرقاوي اكيده قصة حبهم تختلف😆💓
.
.
.
💓النهاية💓
لقراءة الرواية كاملة اضغط على : (رواية غرباوية عاشقه شرقاوي)
