رواية عمياء وسط الذئاب الجزء الثاني الفصل التاسع والعشرون 29 بقلم محمد طه

_الباشا يطلع سلا،حه وبكل غضب _
أنا عايز تفسير للي حصل دا وبسرعه..
وإلا هصفيكم كلكم..أنا بقالي عشرين سنه شغال..
ومفيش واحد من اللي شغالين معايا..
شاف وشي أو سمع صوتي الحقيقي..
يعني اللي شغالين معايا ميعرفوش..
هما شغالين مع مين..
ف لما الحكومه فجأه توصلي وتعرف مكاني..
يبقي فيه حاجه غلط..يبقي فيه تقصير..
يبقي فيه خاين..(ويعلي صوته)
فهد..قدامك 24ساعه..
وتعرفلي الحكومه وصلتلي إزاي
(ويسيبهم ويخرج)
_فهد بغضب وتحذير_
أتمني إن ما يكونش حد فيكم..
ليه دخل بالمشكله دي..
عشان الخاين أنا مش هرحمه
_ميري بغضب_
خد بالك يا فهد من كلامك..
لأني مش هسمح إن يتوجهلي إتهام ف حاجه زي دي
_سهيله باستعجال وتهور_
وأنا إنتوا كنتوا حابسييني..
يعني أنا كده كده بريئه من الموضوع ده
_نور ف سرها_
حابسينها..يا تري كانوا حابسين سهيله ليه
_فهد يقرب من نور_
نور..لو الدكتور ليه دخل بالموضوع ده..
إنتي اللي هتحاسبي على الليله..
لأن الدكتور ف حمايتك
_نور بثقه وتحدي_
لو أنا والدكتور لينا دخل ف معرفه الحكومه بالمكان..
صدقني مش هتعرف تلاقي دليل واحد علينا..
ولو ما وصلتش لحاجه واحتجت مني مساعده..
أنا مش هساعدك
_فهد بثقه_
تأكدي يا نور إني هوصل للي كان السبب
_ميري_
فهد أنا عايزه أقابل الباشا
_(عند الباشا)_
_الباشا_
خير يا ميري
_ميري_
إصحاب نور هما السبب ف كشف المقر
_فهد_
وليه ما يكونش إنتي..
عشان تخلصي من نور وإصحابها
_ميري_
أنا مفيش بيني وبين نور أي عداوه..
عشان أخلص منها هيا وإصحابها..
ولو فيه بيني وبينها عداوه..
مش هفكر مجرد تفكير..
إني أكشف المقر عشان أخلص منها
_الباشا_
إيه دليلك على إن إصحاب نور هما السبب
_ميري_
الواد اللي سهيله قت،لته..
مكنش موجود بالصدفه عند النادي..
سمر بتدور ورانا وكانت حاطه الواد ده..
عند النادي لادورجي..
أنا متأكده إن سمر هيا اللي ورا اللي حصل
_الباشا_
فهد..تتأكد من الكلام اللي قالته ميري..
ولو سمر السبب تصفيها
_(عند نور)_
سهيله بكل بجاحه قعدت قدام نور والدكتور..
وحطت رجل على رجل وو،لعت سيجاره
_سهيله باستفزاز_
تحبي أو،لعلك سيجاره يا ريسه..
ولا خايفه تلسعي إيدك التانيه..
_(وتضحك ضحكه مستفزه)_
_نور تتجاهل سهيله وكلامها المستفز
_نور ف سرها_
كانوا حابسينك ليه يا سهيله..
أكيد عملتي حاجه..يا تري عملتي إيه..
ما أنا لازم أعرف..لازم أعرف
_سهيله_
إيه يا ريسه..هوا إنتي مش سمعاني..
أنا اللي أعرفه إنك عميا بس
_نور_
بقولك إيه يا سهيله..
ما تخلي الدكتور يغميلك عنيكي..
عشان نبقي متعادلين..
ونشوف مين هيسد قصاد التاني
_سهيله بسخريه_
وأنتي فاكره نفسك هتسدي قصادي..
دا أنا لو عطيتك قلم (وتضحك ضحكه عاليه)
كنت هقول لو عطيتك قلم هعميكي نسيت إنك عميا..
أنا كده أخاف أديلك قلم تفتحي..
_(وتخلص السيجاره وترميها وتقوم تقف)_
تعالا يا دكتره غميني
_وبدأ الدكتور يحط حاجه على عنين سهيله ويغميها
وبعدين عطي إشاره لنور بالبدأ..
وسهيله بدأت تمشي بحرص ف إتجاه نور..
لكن نور إتحركت وغيرت مكانها..
أول ما الدكتور عطاها إشاره البدء..
وسهيله مش عارفه تعمل إيه..
وحست إنها ورطت نفسها
_بقلم…محمد طه عبد المجيد
_وبدأ الدكتور يقف جنب سهيله..
ويخبط خبطه صغيره برجله ف الأرض..
تقوم نور رايحه ف إتجاه الصوت..
وأول ما تلمس سهيله تزقها وتوقعها ع الأرض..
وتضر،بها ضر،به جامده برجلها..
وبعدين تغير مكانها بسرعه..
وتقوم سهيله وتروح ف إتجاه الضر،به متلاقيش نور
ويروح الدكتور تاني يقف جنب سهيله..
ويخبط خبطه صغيره برجله ف الأرض..
وتقوم نور رايحه ف إتجاه الصوت وتضر،ب سهيله
وكررو الخدعه دي أكتر من مره..
لحد ما سهيله أخدت علقه مو،ت
_راحت سهيله شايله الغطا من على عنيها..
وبكل غضب راحت عشان تضر،ب نور..
قام الدكتور واقف قدام نور عشان يمنع سهيله
_نور تستفزها_
تعيشي وتاخدي غيرها يا مفتحه
________________________
__(في المستشفى غرفه نهله)__
_أم محمد_
عندي ليكي أخبار حلوه
_نهله باستسلام_
ما بقاش فيه حاجه حلوه خلاص..
ليه ما سيبتونيش أمو،ت..ليه ما سيبتونيش أمو،ت
_أم محمد_
بعد الشر عليكي..
سمير خف ورجعلنا..وإن شاءالله هيرجعلنا نور
_نهله باستسلام_
وعلي هيرجع إزاي..ومين هيقدر يرجعه
_أم محمد_
علي محدش هيقدر يرجعه..
بس نقدر نرجع حقه..ونجيب حقه من اللي قت،لوه
_نهله بوجع ودموع_
وهما مين اللي قت،لوه..وهنوصلهم إزاي..
هما اللي هيوصلولنا واحد ورا واحد وهيخلصو علينا
_أم محمد_
لو إستسلمنا هيوصلولنا..
إنما لو قاومنا ووقفنا قصادهم..
إحنا اللي هنوصلهم وهنخلص عليهم
__________________________
__(في بيت داليا)__
_سمر بعد ما هربت من الحكومه..
وأطمنت إن مفيش حد وراها..
راحت لسمير ف بيت داليا..
وأول ما دخلت سمعت سمير بيتكلم مع حد..
بسرعه طلعت سلا،حها وبكل حرص وهدوء..
راحت ناحيه الغرفه اللي صوت سمير طالع منها..
وفتحت الباب بهدوء ومتلاقيش..
غير سمير لوحده ف الغرفه
_سمر باستغراب_
هوه أنته كنت بتتكلم مع مين
_سمير بإرهاق وتوتر_
كنت بكلم نفسي..بكلم نفسي يا سمر
_سمر_
سمير أنته لازم ترتاح عشان تقدر تكمل
_سمير_
قولتلك يا سمر مش هرتاح غير لما أوصل لنور
_سمر_
عالفكره فيه عربيه شرطه إشتبهو فيا..
وطاردوني بس الحمدلله قدرت أهرب منهم..
وإحنا مش لازم نقعد ف البيت دا كتير
_سمير_
دا بيت أختي يعني بيتي
_سمر_
أنته نسيت إن إحنا متهمين بتفج،ير مبني..
يعني الظابط نوره هتعمل عننا تحريات..
وهتعرف إن ليك أخت وليها بيت..
يعني ف أي لحظه ممكن نلاقيها داخله علينا
_سمير_
إحنا كده كده مش هنطول هنا..
وأنا هروحلها بنفسي..
وهثبتلها إننا ملناش يد ف الإنف،جار
_سمر_
طب ها لقيت حاجه توصلنا للي خطفو نور
_سمير يروح يفتح دولاب أخته داليا..
والدولاب عباره عن فلوس ودهب..
من الأرض لسقف الدولاب
_سمر بذهول_
يا لهوييييييييييي…إيه ده..
أنا طول عمري أعرف إن الدولاب للهدوم..
مش للفلوس والدهب
_سمير_
إسمعي يا سمر..تاخدي اللي تقدري عليه..
وتجهزيلي رجاله يكونوا جاهزين ف أي لحظه
_سمر وهيا بتملس ع الفلوس والدهب_
هوه أنا معرفش رجاله..بس عندي كتيبه بنات..
اللي بدربهم ف النادي ويخدموني بعنيهم..
ومن غير ما ياخدوا جنيه واحد
_سمير_
تعملي اللي بقولك عليه..
وتاخدي من الفلوس دي على قد ما تقدري..
وتراضيهم كلهم وتجيبي سلا،ح بذياده..
وتعملي حسابك لو الظابط نوره دي إستغبت..
وحجزتني عندها ف القسم هتهربيني
_سمر_
خليها بس تحبسك..وأنا كفائه أهربك..
ف عز الضهر..وأخط،فها كمان..
قوم أنته بس خدلك دش..
لحد ما أجهزلنا حاجه ناكلها
_سمير يقفل الدولاب ولسه هيروح الحمام..
يتفاجئو بدخول………….
………….
_تفتكروا مين اللي دخل؟؟

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية عمياء وسط الذئاب الجزء الثاني)