رواية عشق البنفسج الفصل التاسع 9 بقلم سلمى تامر
رواية عشق البنفسج الجزء التاسع
رواية عشق البنفسج البارت التاسع
رواية عشق البنفسج الحلقة التاسعة
_ايه اللي بيحصل هنا ده انتوا بتعملوا ايه هي حصلت!!!!!
ريناد زقته بعنف وقامت وقفت بعيد عن سامح اللي كان مقيد حركتها واتكلمت بغضب وبقاء
_الحقيني يا اميرة الحق.ير ده بيتهجم عليا
سامح نفى بكدب
_كدابه..دي واحده كدابه وهي اللي ناديتني من اوضتي وقالتلي بنتي تعبانه تعالى خدها معايا للمستشفى وجريت علشان اشوف بنتها لقيتها بتشدني ناحية سريرها ولما قاومتها قطعت هدومها وقالتلي لو منفذتش اللي انا عايزاه هصوت واقول انك بتحاول تعتدي عليا
_ده ايه الفيلم الهندي ده ياراجل
بص سامح للي بيتكلم لقاه يوسف واللي كان بيبصله بنظرات اجرامية وواقف عند الباب
بلع ريقه ب توتر ويوسف قرب من ريناد وعطاها الجاكيت بتاعه وريناد لبسته بسرعه وبصيت لسامح ببكاء وغضب
_يوسف صدقني انا مش بكدب البت دي كدابة انا مجت…
قطع كلامه لكمة من يوسف واللي هجم عليه ض..ربه بعنف
اميرة بصراخ وهي بتحاول تسلك بينهم
_انت بتعمل ايه يايوسف مش ممكن تكون ريناد هي اللي كذابة
ريناد بصتلها ببكاء وصدمة واتكلمت بغضب
_انا مسمحلكيش تقولي عليا كده انا اشرف من اي حد في الدنيا ولا يمكن اعمل حاجة زي دي هو اللي ستين كداب في بعض
دخل الاوضة فريد وهند بفزع من صوت صراخهم واتكلم فريد بحدة
_فيه ايه يجماعه مالكوا..بتعيطي ليه ياريناد
يوسف بغضب
_الزبالة اللي اسمه سامح حاول يتعدى على ريناد
شهقت زينب بعنف
_اه ياكلب ياوا..طي هي حصلت
سامح بكدب وصراخ
_يجدعان حرام عليكم انتوا كده بتظلموني ، البت دي بتكدب وبتتبلى عليا
يوسف لكمه بغضب
_اخرس يا نج..س ، وهي برضه اللي كانت بتبصلك نظرات مقرفة تحت ده انا شايفك بعنيا
بص لأخته واتكلم بحدة
_بقولك ايه يا اميرة ، انا اتحملت و..ساخة البني آدم ده كتير ودريت عليه بلاوي سودة علشانك لكن خلاص طفح الكيل
الواد ده لازم يرمي عليكي يمين الطلاق ويغور ف ستين داهية من هنا
اميرة بصيت لسامح اللي بيبصلها بحزن مصطنع ودموع
اتوترت ومبقتش عارفة تعمل ايه
لكن افتكرت ان يوسف معجب ب ريناد ويمكن علشان كده بيدافع عنها
اتكلمت بإنفعال
_بقولك ايه يا يوسف ما انت مش عشان معجب بيها ف تطلعها بريئة غصب عننا كلنا ، زي ما انت واثق فيها انا كمان واثقة في جوزي وبقولك انه مستحيل يعمل كده
يوسف بسخرية
_يسلام!
طب انا بقى هعرفك دلوقت ان البني آدم ده كداب وهخليكي تندمي على الكلام اللي بتقوليه
وبص لسامح بشماته
_احنا هنراجع كاميرات البيت كله ياحبيبي والجنينة الخلفية كمان..وانت بتقول ان ريناد هي اللي راحتلك اوضتك وجيت معاها علشان تشوف بنتها صح ، احنا دلوقت بقا هنشوف مين الصادق ومين الكذاب
سامح اتوتر جدا وحس انه خلاص هينكشف
لكن اميرة صممت بعناد
_طب تمام راجع الكاميرا ونشوف بقا مين الصادق ومين الكداب
يوسف بص لأخته وخاف عليها من الصدمة اللي هتتعرضلها دلوقت..لكن مفيش قدامه حل تاني لازم يعرفها ان سامح شخص مقرف ويبعدها عنه وكمان لازم يثبت برائة ريناد لأنه متأكد انها مظلومة ومستحيل تعمل حاجة زي دي
رجعه فعلا الكاميرات وسامح حاول يهرب لكن يوسف مسكه بعنف
شافه ان سامح طلع من اوضته ونزل الجنينة وراح ناحية الشجرة اللي تحت اوضة ريناد وطلع فوقيها وبعدها فتح الشباك بآلة معاه ودخل الاوضة
اميرة دموعها نزلت واخدت صدمة عمرها في خطيبها واللي مكتوب كتابهم من شهر بس
وريناد حمدت ربها ان برائتها ظهرت وبصيت ليوسف بإمتنان وشكر
فريد بغضب
_ترمي على بنتي يمين الطلاق ومشوفش وشك تاني انت فاهم
سامح برفض وكدب
_لأ..لأ حرام عليكم متعملوش فيا كده وتحرموني من حب عمري
صدقوني هي اللي كانت بتبصلي بإغراء علشان كده ضعفت لكن والله غلطة ومش هتتكرر تان..
_اخرس بقاا
قاطعته اميرة بصراخ وبكاء
_انت ايه يا اخي..معجون بماية كدب!
كلنا شوفناك بعيونا وانت داخل اوضتها زي الحرامية واتفضحت ولسه بتكدب برضه!
طلقني..طلقني ومش عايزة اشوف وشك في حياتي تاني.. انت بني آدم مقرف وحقير ومش راجل ..طلقنيي
سامح نفخ بعنف واتكلمت بسخرية وملل
_مخلاص ياماما طيب هطلقك..احمدي ربنا اصلا اني رضيت اتجوزك بشكلك ده ، ده انا لما اطلقك مفيش دكر بط حتى هيهوب ليكي ده كفاية جسمك
يوسف هجم على سامح ضربه وشتمه افظع الشتايم علشان يجيب حق اخته وتنمره عليها وعلى وزنها اللي مكنش كبير اوي لكن هو حب يقلل منها علشان جرحته
_طلق اختي يا كلب ووحياة امي ما هسيبك تتهنى يوم ف حياتك ..طلقها يالا بدل ما اقت..لك
_انتي طالق
اميرة طلعت اوضتها بعد ما سامح رمى عليها يمين الطلاق وكانت ماشيا بالعافية وحاسه ان هيغم عليها..كلام سامح جرحها وصدمتها فيه كانت اكبر من اي حاجه
ريناد بصتلها وزعلت جدا علشانها وطلعت وراها ويوسف طرد سامح وقعد حزين جدا على اخته واللي حصلها وحب يسيبها لحد ما تهدى ويتكلم معاها
وزينب بتبكي بقهر على بنتها اللي اتطلقت وهي لسه مكتوب كتابها وفريد بيهديها
~~~
_متعمليش كده في نفسك..والله ما حد يستاهل
اميرة بصتلها ببكاء وقهر ومنطقتش ولا كلمة وريناد كملت كلامها وقلبها بيتقطع علشانها
_والله العظيم انتِ جميلة وربنا هيعوضك باللي احسن منه ده بني آدم مقرف
اميرة اترمت في حضن ريناد واتكلمت بأسف وندم
_انا اسفه..حقك عليا ، مكنش لازم اقول عليكي كدابة بس صدقيني كنت بتعلق ف آخر امل وانه ممكن يكون برئ وبيحبني…لكن..
انفجرت في البكاء وريناد فضلت تهديها طول الليل
~~~
تليفون ريناد رن وبصيت لقيته رقم غريب
فتحت عليه ولقيت حد بيكلمها بفزع
_مدام ريناد…الحقي بلال جوزك بيموت
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية عشق البنفسج)
