رواية عشقي الاول والاخير الفصل الرابع 4 بقلم أسماء مجدي
رواية عشقي الاول والاخير الجزء الرابع
رواية عشقي الاول والاخير البارت الرابع
رواية عشقي الاول والاخير الحلقة الرابعة
عمر فكر وقال ف نفسه لو قولت لفريده اني كنت مع هنا بنتكلم هتضايق فقالها: كنت عامل التليفون صامت ونزلت مشوار وجيت
فريده : كل ده يا استاذ 🙄
عمر : معلش يا حبيبتي الوقت سرقني
فريده : طيب معلش متزعلش مني اني اتعصبت عليك
خلاص يا فريده محصلش حاجه
بس انتي في حاجه ولا ايه حصلت عشان ترني عليه وتبعتيلي رسايل كتيير كده
لا مفيش يا حبيبي …..بس وحشتني وكنت عايزه اكلمك
امممم ….وانتي كمان يا حبيبتي
اتكلموا شويه وبعد ما قفل معاها
قال عمر جوه نفسه : هو انا ليه مقولتلهاش الحقيقه
يمكن عشان عارف انها بتضايق لما بحكلها عن هنا
برده مش مبرر انك تكدب عليها….اللي بيكدب بيبقا عارف أنه عامل حاجه غلط وبيخبيها
بلاش تفكير كتير ونكبر الموضوع على الفاضي انا عملت كده بس عشان هي متضايقش
وحاول ينهي الحوار بينه وبين نفسه وينام عشان يبطل تفكير
عند هنا ف اوضتها
كانت سرحانه ف قاعدتها هي وعمر فوق السطوح وبيغنوا سوا ونظراتهم اللي كانت مختلفه عن كل مره بيقعدوا يتكلموا فيها مع بعض كانت نظراتهم ليها معاني كتير اوي هنا مش فاهمها بس حسه انها مبسوطه وطايره من الفرحه …راحت ف النوم وهي على وشها ابتسامه مش عارفه تخبيها
الصبح
شيرين وهنا كانوا ف محاضره وكان فيه واحد زميلهم عينه على هنا طول المحاضره
خلصت المحاضره …وشيرين وهنا راحوا الكافيتريا يقعدوا فيها والشاب ده كان ماشي وراهم
وائل :لو سمحتي انا زميلك ف نفس القسم كنت عايزك تساعديني ف شرح بعض المحاضرات لان فيه حاجات مش فهمها وفيه حاجات مكنتش بحضرها
هنا /اخويا الله يكرمك انا مفياش حيل للمناهده والف والدوران والشغل ده روح اركب الدوده تكون لقيتلك مُزه تشقطها ( قالتها بأسلوب كريم عبد العزيز ف فيلم ابو على😹 )
وائل بذهول وهو مش متوقع من شكلها البرئ الرقيق انها تبقا بلطجيه كده ف أسلوبها : يا بنتي انا مقصدش حاجه غلط انا فعلا عايزك تساعديني
هنا بنرفزه/يلا يسطا من هنا مش ناقصين خوته
وائل بستفزاز/اسمي وائل 😁
هنا/ تشرفنا ..🙄…يلا من هنا بقا
امشي بكرامتك احسن لك … بدل ما أفرج عليك الكليه كلها .😡
وائل بعصبية/انتي فاكره نفسك ايه ! وازاي تكلميني بالاسلوب ده
احترم نفسك و زق عجلك من هنا … انا لغايه دلوقتي بتكلم بالادب
وائل بنرفزه/ ماشي انا هوريكي 😡
يمي يمي خفت انا 🙄
شيرين حاولت تلم الموضوع وقالت لهنا : خلاص يا هنا كفايه كده يلا بينا بقا
هنا وهي بصاله بتحدي : يلا
~~~~
بعد ساعتين
عمر اتصل على هنا
عمر : الو عمله ايه يا قطتي
هنا : يسطا متصغرناش قطه ايه بس هتضحك الناس علينا … انت كده بتضيعلي هيبتي 😹
عمر : انا حر اقول اللي انا عايزه …انا الوحيد اللي ليه حق اقول براحتي صح ؟!🙃
هنا : ماشي يسطا ..
عمر : بقولك امي عزمه فريده عندنا النهارده …وعايزاكي تحضري العزومه برده
هنا: يبني عيب عليك …. انا راشق من غير عزومه …لا تقلق😹
المهم مرات عمي عامله ورق عنب ف العزومه ؟! 👀
عمر: لا مش عارف هي ناويه تعمل ايه
هنا : طيب انا هنزل ااررها بنفسي 🙃
عمر : 🤣 طيب يختي مستنينك
هنا : طيب يلا باي
بعد شويه
هنا نزلت تساعد مرات عمها ف تحضير الغدا
هنا وهي قاعده بتنأنأ ف ورق العنب : الله عليكي يا مرات عمي … عليكي نفس ولا الشربيني بجلاله قدره 😋
ام عمر: انا عارفه انك بتحبي ورق العنب زي عمر فعملته ف العزومه 🙂
هنا : حبيبتي يا مرات عمي 😘
ام عمر: بس تعالي قوليلي …. ايه الجمال ده يا بت انتي كل يوم بتحلوي فيه عن اليوم اللي قبله كده ليه
هنا : الله يخليكي يا مرات عمي …. تنسعدي 😹
مرات عمها : تنسعدي ؟! … صدق الواد عمر لما قال عليكي سرسجيه صحيح 🤣
هنا : دايما فضحني ف كل حته .. يادي الكسوف …. يادي الاحراج🙈… يادي المصيبه الحقيييي يا مرات عمي التوم هيتحرق 😱😹
ام عمر : بت اطلعي بره يلا روحي اقعدي معاهم بدل ما انتي موتراني كده
هنا : ماشي …ماشي بتخدونا لحم وترمونا ….خلصت حجتي من جارتي ….اه طبعا مش خلصنا تحضير الاكل بتكروشينا من مطبخك دلوقتي يا مرات عمي ….مكنش العشم 😅
ام عمر : اه يختي مش خلاص لفتيلي المحشي وسويتي معايا الاكل … يلا بقا روحي اقعدي مع عمر ومياده. بره ..عقبال ما فريده تيجي
هنا : ماشي يا ست الكل 😘
هنا طلعت قعدت مع مياده بره وقعدت تتكلم معاها شويه وعمر كان جوه بيلبس
عمر: يا هنا … يا هناااا
هنا : ايوه يا عمر
-تعالي
طيب
هنا دخلت اوضته : ايوه يا عمر
– ايه رأيك ف التيشيرت ده حلو ولا مش اوي
جميل … حلو اوي
– والله ما في حلو غيرك
هنا ببتسامه : شكرا ☺️
– اموت انا ف الطماطم اللي بتظهر ديه
بس يا ولد
الباب خبط طلع عمر يفتح
كانت فريده سلم عليها ودخلت سلمت عليهم
وهنا وام عمر حضروا السفره و قعدوا ياكلوا ، عمر كان قاعد ف اول السفره وهنا على يمينه وجمبها أمه ومياده وفريده على شماله
كانوا قاعدين بيتكلموا عن يوم خطوبه عمر وفريده واد ايه كان جميل وفريده مركزه مع عمر وهنا جدا
عمر كان كل شويه يحط عينه على هنا وهنا لما تيجي عينيها ف عنيه تتوتر و تنزلها وتكمل اكل
فريده لاحظت ده وحست بالغيره فقالت : فعلا كان يوم حلو اوي يا طنط …عقبال فرحنا قريب واتكت على الجمله ديه وحطت ايديها على ايد عمر وهي بصه ناحيه هنا عشان تغيظ هنا وتفهمها أن عمر من حقها هي مش هنا
عمر حس أنه اتضايق لما فريده قالت كده ولما لمست ايده وعينه راحت تلقائيا على هنا
وبيبصلها كأنه عايز يبررلها الموقف ويقولها انا مكنتش عايزها تمسك أيدي ولا تقولي الكلام ده
هنا لما شافت فريده لمست ايد عمر وقالت الجمله ديه حست من جواها أنها عايزه تقوم تقطع ايديها اللي لمست ايد عمر وأنها مخنوقه بسبب انها قالت الكلام ده ..كانت مستغربه نفسها اوي وبتقول جواها : انا ليه حسه بكده مفيش حاجه بيني انا وعمر غير أننا ولاد عم وصحاب يبقا انا ليه حسيت بكده ….كده غلط فوقي يا هنا …فوقي …انتي زي أخته
فضلت تردد الكلام ده جواها عشان متفكرش ف الاحساس ده
خلصوا اكل وقاموا يقعدوا ف اوضه الصالون
فريده: تسلم ايدك يا طنط …الاكل تحفه
ام عمر : حبيبتي ☺️ … بس أن جيتي للحق فأنا مش عاملاه لوحدي هنا عملت معايا معظمه … نفسها حلو ف الاكل
فريده بصت لهنا وقالت : اممم 🙄
فريده قامت قعدت قريب اوي من عمر وعمر كان متضايق من كده اوي بس حاول ميبينش
فريده : حبيبي هننزل امتى نشوف الشقه
عمر : قريب… إن شاء الله … بس اخلص مشروعي على خير
فريده : يا عمر جوازنا اهم …نتجوز الاول وبعد كده تفكر في مشروعك
عمر : انا هبقا مرتاح اكتر لو عملت مشروعي الاول ….واشتغل اكتر..واجيب الشقه إن شاء الله .. طيب يا عمر 🙄
قعدوا شويه وفريده بتتكلم معاهم ف مواضيع كتير
بعد شويه
فريده : طيب استأذن انا بقا يا جماعه …عشان الوقت ميتأخرش 🙂
ام عمر : يا حبيبتي لسه بدري
فريده : هجلكوا قريب تاني يا طنط إن شاء الله ☺️
ام عمر : ماشي يا حبيبتي نورتينا …وابقي سلميلي على بابا وماما
فريده: حاضر يا طنط 🙂
فريده استغربت أن عمر مقمش عشان يوصلها من نفسه فقالت : يلا يا عمر عشان توصلني
عمر : حاضر … يلا بينا
فريده أول ما نزله : ايه يا عمر انت زي ما تكون نازل غصب عنك انت مكنتش حابب توصلني ولا ايه
عمر : لا طبعا بس كنت سرحان ف شويه حاجات عشان كده ماخدش بالي
فريده : امممم… اللي واكل عقلك !
عمر : لا ابدا مفيش … بس بفكر ف مشروعي والحاجات اللي ورايا
فريده : خير …أن شاء الله ربنا معاك … يلا وصلنا
فريده طلعت وعمر روح بسرعه هو كان متضايق ومش عايز ينزل مع فريده عشان كان كل اللي شاغل دماغه أنه ازاي يراضي هنا بأي شكل رغم انه مش لاقي مبرر أنه يقولها حاجه ف الموضوع ده لان المفروض مفيش بينهم حاجه وهما صحاب بس ….بس قال جواه لازم افهمها برده
روح البيت سأل أمه عليها قالتله أنها طلعت بيتهم
طلع فوق ولسه كان هيخبط سمع…..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية عشقي الاول والاخير)
