رواية عزبة فكه الجزء الثاني الفصل الثالث والعشرون 23 بقلم ريناد
رواية عزبة فكه الجزء الثاني البارت الثالث والعشرون
رواية عزبة فكه الجزء الثاني الجزء الثالث والعشرون
رواية عزبة فكه الجزء الثاني الحلقة الثالثة والعشرون
يوسف بعد مامشيو الجماعه من عنده قعد وكان مش مصدق اللي بيحصل كأنه فحلم وفجأه ابتسم وطلع تليفونه
يوسف:عبدالله عايزك هنا حالا
عبدالله بخوف:ليه يايوسف؟
يوسف:اماتيجي هتعرف،، وزعق فيه بسرعه
عبدالله قفل السماعه وبلع ريقه بصعوبه اكيد عايز يحاسبني علي اللي عملته،، دا مش بعيد يموتني،، مروحلهوشي طب لغاية امتي دي فلوسي كلها تحت ايده فقطع الغيار اللي في الورشه ابعتله حد؟ لا لا انا هاروحله واتاسفله وعلقه تفوت واتحامي في الصنايعيه اللي هناك وامشيه من ورشتي هو له معايا ايه يعني
عبدالله بتردد دخل الورشه ويوسف اول ماشافه جري عليه عشان يقوله اللي حصل لكن عبدالله اول مايوسف جري عليه هو جري منه
عبدالله:بص انا غلطت عارف والغلط راكبني من ساسي لراسي ولا اي كلام هيبرر عملتي لكن مش معقوله هتضيع نفسك يعني فيا،، وخصوصا انه محصلش اي حاجه
يوسف باستغراب: مش فاهم؟
عبدالله:يعني انا اسف ودي اول واخر مره هعمل فيها كده اخدت درس عمري ماهنساه
يوسف مش عارف عبدالله بيتكلم عن ايه لكن مش عايز يبينله ده عشان يقدر يفهم
يوسف بزعل :
انا نفسي اعرف انت عملت كده ازاي؟
عبدالله:لحظة شيطان والله،، شوفتك دايما بعيد عنها قلت استغل الوضع واحاول اأثر عليها
يوسف اتنفض من مكانه :قصدك مين؟
عبدالله :شيماء هي في غيرها،، بس وحياتك وحيات ولادي لحظة طيش
يوسف مسكه من هدومه : لأ احكيلي من الاول كده وبالراحه
عبدالله:مش هي والجدع اللي معاها حكولك؟
يوسف:منا لازم اسمع منكم انتو الاتنين
عبدالله:بص اللي حصل يايوسف ووالله ماحصل اكتر من كده شوفتهم النهارده خارجين من عندك قلت دلوقتي بعدين لازم نتواجه فسلمت امري وجيت
يوسف :يا ابن الكلب ومسكه وفضل يضرب فيه لما كان هيموته مخلصهوش الا الصنايعيه علي اخر نفس بعد مايوسف فش غليله كله وخوفا علي يوسف بس لانهم سمعو كل حاجه
يوسف اخد باقي فلوسه منه وساب الورشه،، والصنايعيه كمان سابو الورشه زي يوسف وقالوله هنشتغل معاك في اي حته تروحها احنا مش هنشتغل مع الواطي ده تاني..
يوسف وهو ماشي بص لعبدالله ورجعله مسكه مره تانيه :
علي فكره محدش منهم قالي حاجه انت اللي وقعت بلسانك زي الجردل،، ياجردل،، انا كنت عايز اقولك تشوفلي شقه قريبه من هنا عشان هرجع مراتي وهكون جنب الشغل
جرى عليه واحد من الصنايعيه اسمه ناصر كان بيحبه ومسكه :سيبه ياسطى ده خساره فيه حتى العتاب
يوسف :عندك حق ياناصر وبص لعبدالله اتفووو عليك وسابه ومشى
وعبدالله حاول يقوم بعد مايوسف مشي لكن مقدرش ووقع في الارض تاني
يوسف مشي وهو شايط من الغيظ ازاي عبدالله يعمل مع مراته كده؟
و راح دور علي الكانو وعرف طريقه وراحله،، والكانو اول ماشافو ابتسم :نعم عايز ايه
يوسف بحده :اولا جاي اشكرك علي اللي عملته مع مراتي شيماء..
الكانو: اشكر فكه لانها هي اللي طلبت مني ده،، وانا طلبات فكه عندي اوامر
يوسف:امم قولتلي طلباتها عندك اوامر
الكانو:اه طبعا مش هتبقي مراتي
يوسف:دا عشم ابليس
الكانو:امرك عجيب ياجدع مش انت مش عايزها!
يوسف:مين قلك مش عايزها
الكانو:الله امال كسرت بخاطرها وطردتها ليه من عندك
يوسف :بربيها ياأخي ،، بادبها علي غياب اكتر من سنتين وعذابي اللي شوفته،، ولا هي فاكراها ساهله كده
الكانو:لا في دي عندك حق،، طب وادبك ليها هيخلص وترجعها امتي؟
يوسف:علي حسب مشوف انها اتربت
الكانو:ازاي؟
يوسف :مش عارف بس هشوف طريقه،، هي شيماء رجعت اسكندريه؟
الكانو:لا روحت مع فكه العزبه
يوسف:طب حلووه بقولك متعرفش شقه تكون حنينه كده وقريبه من العزبه
الكانو:اعرف كتير
يوسف:طب انا عايز اشتري وحده واجهزها عشان اعيش فيها مع فكريه اصل مش هينفع تعيش جنب شيماء في مكان واحد مش هيعمرو
الكانو:هو انت هترجع شيماء؟
يوسف:لاطبعا هخليها تشوف حياتها انا مش هعيش الا مع فكريه وبس
الكانو عرض علي يوسف انه يبات معاه الليله عشان معندهوش مكان يبات فيه، لغاية مايشوفله شقه تاني يوم،، ويوسف وافق بعد اصرار الكانو
الكانو دخل اوضته وابتدي يشيل في صور فكه اللي ماليه المكان كله وجمعهم كلهم علي بعض وكانه خلاص ابتدا اول الطريق انه يتخلي عن حب فكه،، لكن ده كان صعب عليه قوي،، وكان كل مايشيل صوره يفتكر ذكري حلوه لفكه معاه ويبتسم وعنيه تدمع،، وبعد ماخلص بص للاوضه واستغربها من غير صور فكه وابتسامتها اللي كانت محاوطاه في كل حته.، وقعد علي السرير واتنهد بحزن :خلاص يافكه خلصت لحد هنا
يوسف نايم في الاوضه التانيه وبيفكر في الكانو اللي تصرفاته غير كل الكلام اللي حكتهوله شيماء واللي كانت حكياهولها فكه ،، وسال نفسه،، ياتري هو مكنش وحش من الاول،، ولا بعد فكريه عنه هو اللي غيره كده،، وفضل محتار،،
بس اللي متاكد منه وشاف في عيون الكانو حبه لفكريه اللي ممكن يفوق حبه هو ذات نفسه ليها،، وكون انه جايبهاله بنفسه عشان ترجعله يبقي حبه ليها عدي كل الحدود،،
واصبح حب نقي خالي من انانية الحب ودي اسمي درجات الحب
تاني يوم الكانو كلم كذا واحد وعرف مكان كذا شقه وبعت يوسف ليهم عشان يشوفهم وهو راح العزبه عند فكه زي مايوسف طلب منه وفهمه انه ميجبلهاش سيره عن كلامهم نهائي
شيماء بتستعد عشان ترجع اسكندريه لكن خالد طلب انه يفضل مع امه فكريه عشان واحشاه قوي،، وشيماء وافقت تسيبه معاها كام يوم،، وهي ماشيه يوسف رن عليها
شيماء بصت لفكه:يوسف بيتصل
فكه:مقدرش علي بعدك ردي عليه
شيماء :بلا نيله هفتحلك السماعه تشوفي الحب اللي مقطع بعضه
شيماء:ايوه يايوسف
يوسف:ايوه انتي فين؟
شيماء :انا في العزبه عند فكريه انا وخالد
يوسف :اه طب بصي انتي تروحي مكان ما انتي عايزه لكن خالد لا،، خالد هاخده يعيش معايا
شيماء:ازاي يايوسف وتحرمني من ابني ليه؟
يوسف:ابنك!؟،، لا ياهانم اظاهر انك نسيتي ان خالد مش ابنك ابن فكريه ومكتوب باسمها وفكريه ماتت والولد انا هاخده واربيه،، اه وحاجه كمان انا هاجي اخد حاجتي من عندك عشان انا اشتريت شقه وهتجوز فيها
شيماء بخضه:تتجوز؟
يوسف:اه اتجوز وحده بنت حلال اتعرفت عليها هنا من ساعج ماجيت الشغل هنا وهي عجبتني بصراحه،، وحسيت ان ربنا هيعوضني بيها عن اللي شوفته منكم انتو الاتنين،، وعرفت اني مخلف ولد ومامنعتش انها تربيه زي ابنها،، مش بقولك بت حلال
شيماء قفلت السكه وبصت لفكه :يوسف هيتجوز وهياخد مني خالد!
فكه قعدة ع الكرسي:ايه يتجوز؟
شيماء:اه بيقول وحده اتعرف عليها هنا في مصر
فكه:اه يعني كل اللي عمله ده تمثيل وانه زعلان مني اتاريه نسيني وحب غيري،، بقا كده يايوسف؟ طب وديني لاوريك
فكه :كانو عايزاك تشوفلي موضوع جواز يوسف ده وتعرف هيتجوز مين وتجبلي اصل الحكايه كلها
الكانو:بسيطه اخر اليوم نكون عرفنا الحكايه
شيماء :وادي قعده اما اعرف انا كمان والله ما مسافره دا عايز ياخد خالد يديهولها تربيه!؟
فكه:تربي مين يابت انتي عبيطه ولا ايه،، دي لو وصلت لخالد انا اطير رقبتها
الكانو:طب استأذن انا ومشي وكلم يوسف وراحله
يوسف:هاه ايه الاخبار؟
الكانو:فكه بتاكل في نفسها من ساعة ما سمعت الخبر وشيماء خايفه مووت علي ابنها
يوسف:احسن خليهم يشوفو العذاب
الكانو:طب بعتاني اطقس عليك
يوسف :اقولك تقولها ايه
الكانو روح اخر النهار والاتنين كانو مستنينه علي نار واول ما شافو جريو عليه وف نفس واحد:هاه عملت ايه؟
الكانو اخد نفس الاول :دا لففني الدنيا كلها وراه النهارده ابن اللذينه،، اتفرج علي شقه هو وهي،، وراحو اتغدو ولفو علي محلات الفرش عشان تختار العفش وشكلهم متسربعين قوي
فكه قعدة علي الكرسي :تصدق كان عندي امل انه يطلع بيكدب علي شيماء ياكانو
الكانو :لايافكه مطلعش بيكدب دا طلع واقع فيها قوي لو شفتي ضحكهم مع بعض ومسكت ايديهم بس الصراحه البت طلقه وتتحب مش عارف عتر عليها فين ابن الايه ده؟
فكه:بس ياكانو
الكانو:البت طول ايه وجسم ايه وبياض ايه وعيون ايه وشفايف ايه
فكه:بس بقولك
الكانو:ولا شياكتها يافكه باين عليها بنت ناس قوي وعدت علي يوسف راكبه عربيه من الاخر
فكه:يامرارك يافكه
الكانو:تستاهلي كنتي رجعتيلو من زمان
فكه:ما انا كنت فاكراه عايش مع الزفته دي ومبسوط ومتهني انا ايه عرفني انه مش بيحبها،، يافرحه ماتمت خدها الغراب وطار
شيماء :اخدتها الحربايه قصدك
فكه:علي رايك خطفتها الحدايه
الكانو:اخرسو قطع لسان اللي يقول ع المزه دي حدايه دا انتو الحدادي اصلكم مشفتوش القمر
فكه وشيماء بصو لبعض وقامو مره واحده ناحية الكانو اللي قام وجري من قدامهم وهو بيضحك
فكه:قلبي واجعني قوي ياشيماء انا بحبه قوي
شيماء:وانا كمان قلبي واجعني قوي يافكه
فكه بصتلها،،
شيماء :علي خالد متفهميش غلط يوسف خلاص طلعته من قلبي يافكه
فكه اتنهدت وبصت لقدام:بس انا مش هسيب يوسف لوحده تانيه تاخده مني .
ياتري فكه هتعمل ايه هنعرف الحلقه اللي جايه
وعدي الوقت والاتنين من ساعة ما عرفو بخبر جواز يوسف وهما مش علي بعضهم ولا عنيهم غمضلها جفن من التفكير،، فكه بتفكر في يوسف اللي بغبائها خسرته للابد وشيماء بتفكر في خالد الحاجه الوحيده اللي طلعت بيها من الدنيا،، وهتخسرها هي كمان،،
واتمنت لو يرجع بيها الزمن تاني كانت عاشت حياتها مع جمال سعيده ومتهنيه وداست علي قلبها بالجزمه
يوسف كان بيجهز الشقه وكان طايير من السعاده وكان معاه واحد من الصنايعيه بتوعه من ورشة عبدالله صمم انه هيروح يشتغل معاه فأي مكان ويوسف كان بيثق فيه جدا لانه واد ابن حلال وبتاع شغل وطيب قوي
ناصر:الشقه قربت تخلص اهي يا اسطي تتهني بيها يارب
يوسف:عقبالك ياناصر واجهزلك شقتك واتعبلك زي مانتا تعبان معايا كده
ناصر:رينا يسمع منك ياسطي وبصله وسكت
يوسف:عايز تقول ايه ياناصر اتكلم
ناصر:بصراحه عاوز اسال هترجع مراتك تاني ولا الشقه دي لعروسه جديده
يوسف:ليه يانصوره؟
ناصر:اصل بصراحه مراتك ام خالد باين عليها طيبه اوي وانا بقول المسامح كريم لو كانت غلطت وحاول تصلح معاها قبل ما تخرب بيتك يعني
يوسف:بص ياناصر انا بحبك قوي وبثق فيك وعشان كده هحكيلك علي كل حاجه الحكايه ياسيدي…………………
ناصر:انا فرحانلك قوي ياسطي بس علي اد مانا فرحان علي اد مانا زعلان علي الست ام خالد لانها اتظلمت اوي في حياتها دي تقريبا تطلع من حفره تقع في دحديره
يوسف:ما هي اللي بتختار توقع نفسها في الحفر ياناصر،، وبعدين هي اكيد اتعلمت الدرس وهتفوق وتشوف حياتها بقي تعرف ياناصر اني حامل همها اوي ومني عيني انها تنساني وتلاقي ابن الحلال اللي يسعدها ويريحها
ناصر :ما افتكرش بعد ماخلفت منك خالد دا هيبقي سهل عليها
يوسف:هو مش هيبقي سهل بس انا هصعب عليها اي طريق تاني ليا ،، وكمان هاخد منها خالد فتره كده عشان تحس انها خسرت كل حاجه وتحاول تشوف حياتها بقي
ناصر:بس دا ممكن يجيب نتيجه عكسيه يعني ممكن تتعب اوي ولا تحس انها ملهاش لازمه في الدنيا وملهاش حد وتحاول تنهي حياتها؟
يوسف:مفتكرش شيماء قويه انا عارف
ناصر:علي العموم ربنا يسعدك ويوفقك ويكتب السعاده للكل
يوسف:يارب ياناصر ..المهم انا عايز منك طلب دلوقتي ..وضحك هو طلب غريب بس انا مليش غيرك ينفذهولي
ناصر:اؤمرني ياسطي
يوسف:تعمل عروستي
ناصر برق:هاه ؟
يوسف :هفهمك
انا هروح عند فكريه وام خالد في العزبه وانت ترن عليا وتعمل صوت واحده وتنزل فيا حب وغزل وكلام ايه،،
يعني وانا هكون فاتح السماعه وتسالني اني اجيب خالد بسرعه عشان جيباله لعب كتير وعايزه تفسحيه عشان ياخد عليكي، بص عايزك تقلد هند رستم وتعمل زي عبد المنعم ابراهيم في فيلم اشاعة حب عايزك تكون هند فاهمنى
ناصر :فاهمك ياسونه ياخاين امووواه
يوسف:الله ينور عليييييك اثببببت على ده
ناصر:ههههههه والله انت هتجننهم ياسطي
يوسف:خليهم يتجننو ويدوقو العذاب دول عملو فيا عمايل ياناصر
يوسف راح العزبه وسال علي بيت فكه وخبط ودخل الكانو كان شايفه وراح وراه ودخل البيت هو كمان شيماء اللي فتحت وفكه كانت جوه
فكه:مين ياشيماء؟
شيماء:دا يوسف يافيفي
يوسف:هي بقت فيفي تاني ياحلااوه!
فكه قلبها دق وحست بفرحه شديده :اكيد جاي عشان يرجعني اكيد مهنتش عليه اكيد لسه بيحبني .ايوه انا متأكده انه لسه بيحبني وجريت بابتسامه وقالتله
:يوسف اتفضل واقف ليه ومنتبهتش للكانو
الكانو لنفسه :اتفضل انت كمان ياكانو واقف ليه؟ . حاضر ما انا هتفضل اهو
فكه ضحكت:ماتأخذنيش ياكانو
الكانو :لا ولا يهمك اصل من لقي احبابه نسي اصحابو ياعم
فكه بصت ليوسف اللي بص الناحيه التانيه وسأل :
فين خالد انا جاي اخده؟
شيماء اتخضت:ليه يايوسف هتاخده فين
يوسف:لا ابدا امه التانيه.قصدي التالته عايزه تقعد معاه شويه عشان ياخد عليها
فكه بصتله:يوسف؟
يوسف هنا كان رن علي ناصر في الخباثه وناصر رن عليه شاورلها بايده عشان تسكت وفتح التليفون والسماعه
يوسف:ايوه يانور عيني .
صوت رد عليه بدلع وحشتني اوي اوي اوي انا طول الليل امبارح وانا بحلم بيك ياقلبي
يوسف:القلوب عند بعضها ياروحي والله وانا كمان حلمت بيكي امبارح
فكه وشيماء بصو لبعض وتنحو
انت عارف اليومين الفاضلين علي فرحنا دول هيعدو عليا كأنهم سنتين يايوسفى
يوسف:ااااه علي يوسفى دي بتقطعني قوليها كمان مره كده
يوسفي يوسفى يوووسفييي
يوسف:الحقيني يا امه
فكه قامت مره واحده:ايه المياصه وقلت الادب دي متحترم نفسك انت وهي،، وبعدين ايه يوسفي دي،، انتا،، انتا ازاي تخليها تقولك يوسفي هو في راجل يبقي يوسفي؟
يوسف:طب سلام ياروحي دلوقتي وانا جايلك في السكه وقفل وهو بيداري ضحكته وبيبص للكانو اللي ماسك نفسه بالعافيه من الضحك علي منظر فكه
يوسف اتصنع الجديه وبصلها:ايه مالك انتي كمان،، واحده بتقولي يوسفي يعني يوسفها هي بس،، مش يوستفندي يا جاهله افهمي
فكه بتهكم:يوسفها؟!
يوسف:اه يوسفها وبصلها هي وشيماء وفضل يغيظ فيهم بأديه زي العيال الصغيره :
وانتو متغاظين ليه هاه متكادين ليه وحده بتدلعني وانا بصراحه بحب الدلع موتو بغيظكم يلا يا خلودي هنروح عند ماما الجديده وننبسط ياقلب بابا
خالد جاي علي باباه بفرحه:هتفسحني يابابا؟
يوسف:احلي فسحه لاحلي لودي في الدنيا
خالد :هييييه يلا بينا
يوسف اخد خالد وخرج والكانو وراه وأول مابعدو عن البيت
الكانو :ايه ده هى الحكايه قلبت معاك بجد ولا ايه؟ مين اللى كانت بتكلمك دى؟
يوسف مش قادر يرد من الضحك :دا واحد صاحبى عامل ست
الكانو :ههههههه يالهوى عليك
يوسف :بس شفت منظرهم الاتنين انا كنت شويه وهقع من طولى من كتر منا كاتم الضحك كنت هموت
الكانو بيقلد فكه :ايه المياصه وقلت الادب دى هههههه
يوسف :ولسه يافكه ان ماربيتك مبقاش يوسف .
الكانو :طب هرجع انا اشوفهم الا يكونو ولعو فنفسهم من الغيره والغيظ
يوسف :روح ولو لقيتهم مولعين كوب عليهم بنزين متهديهمش فاهمنى
الكانو :فهمتك
يوسف اخد خالد ومشيو والكانو رجع عند فكه وشيماء ولقى الباب مفتوح دخل لقى الاتنين قاعدين على الكنبه مبرقين وباصيين لقدام زى الاصنام وعنيهم مش بترمش حتى
الكانو :هيييه وشاور بايده قدام وشهم مالكم يابشر؟
محدش رد
بعد شويه فكه اتكلمت :شفتى يابت السهوكه شفتى!
شيماء :اه شفت عشت وشفت يوسف بقى يوسفى،، لا وايه منشكح اوى بيوسفى دى!
الكانو :بس عليها صوت بت اللذينه ولا يعنى هو صوتها بس،، دى كلها على بعضها كده قشطه على مربي على فراوله على كل حاجه حلوه قلبك يحبها واتحطو فخلاط وطلعت دى … يالهوووى يانا يامه
فكه : لا دا يالهوووى انا يامه وبصت للكانو :
متدبرنى ياوزير الراجل بيضيع منى
دا بقى يوسفى
الكانو :على عينى ياختى والله لو اقدر كنت اخدتها منه ورجعتهولك بس البت دايبه صبابا فيه وعشقاه .
فكه :عشقاااه؟! الحقينى ياشيماء هو يعنى مفيش غيره فى الدنيا خلاص كل البنات مش شايفه غيره دا حتى اسمر ياناس وشعره اكرت
شيماء :هههههه بس يتحب بصراحه
فكه بصتلها :قومى انتى كمان من قدامى اخفااااااى
شيماء قامت جريت على الاوضه وفكه فضلت تكلم نفسها والكانو خرج وهو كاتم ضحكته من منظر فكه اللى هتتجنن خلاص .
يوسف اخد خالد الملاهى وفسحه وقضو مع بعض يوم محصلش الاتنين فرحو وضحكو من قلبهم وسعادة يوسف انعكست على خالد اللى قضى احلى يوم فى حياته مع باباه
يوسف بقي شايف الدنيا بطعم جديد ولون جديد،، حاسس انه روحه رجعتله من تانى من بعد ماكان ميت مش مصدق نفسه ولا قادر يستوعب كل الفرحه اللى فقلبه حاسس انها كتيره وكبيره اوى وقلبه هيقف من كتر السعاده،، ياااه معقوله فكريه رجعت لحياته من تانى ؟ معقوله الدنيا ادتله فرصه تانيه معاها ؟
المرادى مش هسمحلك تبعدى عن حضنى ابدا ولا حتى تغيبى عن عيونى لحظه .
خلص اليوم وأخر النهار يوسف مروح بخالد من بعد مشتراله لعب وهدايا كتير وفهمه انهم هيمثلو تمثليه على فكه وشيماء وفهمه يقولهم ايه مقابل انه هيفسحه فسحه تانيه زى دى لو قالهم زى مافهمه .
روحو البيت والاتنين كانو منتظرينه،،
فكه وشيماء،، وشيماء كمان محضره عشا عشان يوسف يتعشى معاهم،، وفكه على نفس قعدتها من الصبح ونفس شرودها مفاقتش منه غير على خبط يوسف على الباب
فتحتله فكه واتقابلت عنيهم فى نظره طويله يوسف حس انه خلاص هينهار قدامها وهتسقط كل دفاعاته وهيستسلم مره وحده وياخد فكه فحضنه لكن فى آخر لحظه قاطعتهم شيماء :
انتو جيتو حمدالله على السلامه تعالا ياخالد ياحبيبى احكيلى عملت ايه النهارده؟
خالد :قابلت ماما الجديده الحلوه وفسحتنى وانبسطنا اوى وحبيتها اوى،، وهى اللى جابتلى كل الحجات الحلوه دى وقالتلى كل يوم هتفسحنى وتجيبلى حجات حلوه كده،، انا حبيتها اوى ياماما
شيماء :إيهيه ماما الجديده! .. وحبيتها ياماما ووطت صوتها .
امال ايه اصلها اللى اى حد يشوفها يحبها دى،، جاتنا نيله فحظنا الهباب
يوسف :بتقولى حاجه ياشيماء!
شيماء :لا ابدا بقول لخالد روح اقففل الباااب
يوسف :اممم بحسب
شيماء :ولا تحسب ولا تجمع انا هروح اشطف خالد وأغيرله عشان يتعشى وينام
وسابتهم ودخلت .
فكه بصت ليوسف بصت عتاب يوسف خاف يضعف دور وشه الناحيه التانيه
فكه :ياااه للدرجادى مش قادر حتى تبصلى؟
يوسف :ليه مش قادر ابصلك يعنى؟
فكه لفت ووقفت قدامه :طب بصلى يايوسف بص لفكريه حبيبتك نسيتنى خلاص ؟
يوسف :يافكريه دول اكتر من سنتين هى دى مده قصيره؟ ،، اكيد كان لازم اشوف نفسى واعيش حياتى يعنى
فكه :مع غيرى يايوسف؟
يوسف :منتى كنتى ميته يافكه والحى ابقى من الميت
فكه :كلامك ده بيقطع قلبى يايوسف
يوسف :غصب عنى يافكريه مش بأيدى
فكه :طب ادينى رجعتلك
يوسف :اتأخرتى،، اتأخرتى اوى يافكريه
فكه :يوسف؟!
يوسف :خلاص يافكريه،، وبعدين انتى لو صحيح بتحبينى لسه زى مابتقولى المفروض تفرحيلى وتتمنيلى السعاده
فكه بحزن :انا بتمنالك السعاده من كل قلبى يايوسف،، ولو سعادتك مع غيرى ربنا يوفقك معاها
يوسف :من قلبك؟
فكه :من كل قلبى،، صدقنى انا ميهمنيش فى الدنيا دى غير سعادتك يايوسف
يوسف :مش مصدقك؟
فكه :لا صدق ياقلب فكريه
يوسف :اثبتيلى انك فعلا بتتمنيلى السعاده
فكه :ازاى؟
يوسف :بسيطه انا عروستى وحيده وملهاش اى قرايب انتى جهزيلنا شقتنا وعشانا وكل حاجه تلزمنا فى اليوم ده انتى عارفه ان انا كمان لوحدى ومعييش حد،، ولو عملتى كده هتأكديلى انك فعلا بتتمنيلى السعاده
فكه بصتله ودمعه نزلت منها :من عينى يايوسف انا بنفسى اللى هعملكم كل حاجه بأديا
يوسف بص لدموعها وخرج من قدامها بسرعه من غير مايتكلم وقفل الباب وراه وهو قلبه عمال يتخبط جوا ضلوعه لما شاف دموع فكريه،، وبعد شويه ووقف وقال لنفسه :
زودتها يايوسف عليها انتا ازاى مستحمل تشوف دموعها كده وانتا اللى تخليها تنزل كمان ؟
معلش كلها بكره وهمسح دموعها ومش هخلي عيونها تدمع تانى طول منا عايش على وش الدنيا .
ياترى هيحصل ايه وفكه هتستحمل ولا هتنهار وتتصرف تصرف غبى
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية عزبة فكه)
