رواية عافك الخاطر الفصل الثامن 8 بقلم رويدا القاضي
رواية عافك الخاطر الجزء الثامن
رواية عافك الخاطر البارت الثامن
رواية عافك الخاطر الحلقة السابعة
محسن اول خشيت الحبس ماحسيتش بضيق هلبا لانه مجرد فقدان رجليا كنت حاس اني محبوسة ومع الحوش للي كنت قاعد وجهي في وجه الحيوط 24ساعة وكأنه خسارة رجليا جت
في الوقت المناسب باش تسهل عليا الاعتراف بذنبي … في السجن تعرفت ع شاب اسمه خالد
وكان ليه فضل كبير عليا….
محسن:شن سبب دخولك السجن انت ياخالد..
خالد: ظلم في ظلم مش تسمع يما في السجن مظاليم هذا ينطبق عليا في يوم قبل اربعة اسنين
طلعت زردة انا واصحابي طبعا لله في الله كانت سيارتي فاسدة…. وانجبر صاحبناالله يرحمه محمد يروح بيا فقت الصبح ع صوت سيارات الشرطة وعرفت بعدها انه صاحبي محمد لقوه مقتول في سيارته ولانه كلهم قالوا اني اخرواحد كنت معاه حصلت في التهمة….
محسن: كيف لقوه مقتول …
خالد: بسلاح المشكلة انه مافيش حد من الشباب عنده سلاح وأداة الجريمة مش موجودة …. ولا أي دليل خاطي دخانه للي خديت منه ولقوه واعتبروه دليل ضدي….
محسن: واصحابك للي كانوا معاك كيف ماشهدوش معاك وقالوا انك مظلوم…
خالد:قداش انت طيب يامحسن اصحابي معاش شفتهم من يوم خشيت الحبس مع انه صحبت اسنين للي جمعتنا….انا حتى لو عدموني مش خايف لانه نموت مظلوم خير مانموت ظالم…
احكيلي انت شن قصتك …
محسن: ايهههه قصتي طويلة لكن نختصرهالك اني قتلت مرتي في ليلة عرسنا….لانه كنت نتعاطى…
خالد:لاحول ولاقوة الا بالله كيف قدرت تقتلها وانت…..
محسن: مقعد صح عادي تعودت نسمعها لما قتلتها كنت نمشي ع رجليا وبعد موتها قررت نتزوج انسانه حبيتها وكنت نتوقع انها تحبني لكن طلعت غالط وفي الليلة للي كنت مروح بيها بمرتي صارلنا حادث ….هيا كسر ولا اثنين وانا
خسرت رجليا وخسرتها هيا لانه طلبت الطلاق
مني …..
خالد: لاحول ولاقوة إلابالله ربي غفور رحيم يامحسن ورحمة الله وسعت كل شئ انا نعرف مجموعة شباب ماشاء الله رح نعرفك عليهم
صدقني رح تتغير حياتك……
قيس:شن هذا للي صار مبكري في حوش بوك رجل كرسي انا ولا شن ومن وين طلع الاخ أنس هذا ….
كريمة: ماصار شئ غريب ولد عمي ومتغرب من سنين وتوا رجع شن الغريب في الموضوع …
قيس: كلامك معاه ومعاملتك ليه …
كريمة: هذا زي خوي راهو…
قيس: ماشفتيش اللمعة للي عيونك وانت تحكي
معاه وبعدين لازي خوك ولاغيره كان صغار العم خوت راهو ماكانش محسن متزوج كوثر….
كريمة: باهي شن نفهم من كلامك هذا بالزبط شك ولا غيرة….
قيس: الاثنين مع بعض…
كريمة:ضايقتني كلمته هاذي هلبا ولكن فوتتها ..ومعاش حبيت نكثر معاه في الكلام وصلنا للحوش خديت الغطاء متعي ومشيت رقدت في دار بروحي ….
قيس: ماشاء الله غالطة وفوقها بترقدي بروحك حلو الحق…
كريمة: حلو مر هذا للي عندي لما تتأكد من انه مافي شئ من الكلام للي كنت تخرف فيه بكري بعدها نرجع نرقد معاك…..
ومع الايام كبرت المسافة للي بيني وبين قيس وصلت في الشهر الرابع وطلعت حامل بي بنوته
كانت فرحتي مستحيل نقدر نوصفها….
عائشة: ان شاء الله تنوضي ع خير هاذي البنت الاولى بنخليها وللي بعدها بناخدهم انا نربيهم..
فتحي:ايوا اهو من توا بتفرطي فيا ربي يستر بعدين شن بيصير…
عائشة: سادك اسنين وانا مهتمة بيك…
فتحي:ههههه ايه صدقتك …
كريمه: حق انس بيستقر هنيا ومعاش بيسافر…
فتحي:ايه اهو لقيت من يخش ويطلع عليا كنت مكسد كان مع الشيابين ….
عائشة: لكن صحة ليه بعيد ع امه كل البعد
فتحي: بعيد عليها من همها ومشاكلها من قلة حنها ع صغارها….
كريمه: ماتقصروش معاه ماعنده حد خوه وملوح في الحبس …
فتحي: ع الكلام ع محسن انا وامك قررنا نعطوه التنازال …شن رأيك..
كريمه: زيدوه شهور ثانيه وبعدها اعطوه خلي يتربى صح …..
عائشة: خلاص لين اتجيبي انت وبعدها نعطوه التنازال….
في الحبس….
أنس:شن وضعك وشن ناقصك ..
محسن: والله ماناقصتني حاجة … غير ربي يغفرلي ذنبي بس باش نرتاح …
أنس: ماتخافش ورحمة ربي واسعة ياخوي شن نشوف فيك طلقت اللحية وقايم الإزراء…الباين بتولى شيخ…
محسن: هو فيه شيخ قاتل من زيني لو وليت شيخ لكن هذا المفروض الكل مدايرينه …لانها سنة الرسول صلى الله عليه وسلم…
أنس: عليه الصلاة والسلام…تمام معناها امورك تمام ماتوصي شئ…
محسن: رد بالك من عمك ومرته راهم ماعندهم حد وامك كيف حالها…
أنس: عمي ومرته وبنته في عيوني وامك كل شهر نحطلها في فلوس في حسابها لكن لا نمشيلها ولا نواصل فيها…
محسن: ربي يصلح حالها وخلاص لو ربتنا صح راهو مش هذا حالي توا….
روح أنس وخشيت وزعت الماكلة للي جابها ع المساجين للي مايسأل عليهم حد خالد كان النور
للي محتاجة في حياتي …. والمجموعة للي احكالي عليها كانت بلسم لجروحي بديت نحفظ في الاحكام والقراءة الصحيحة كنت نتسابق مع بعض المساجين من يحفظ أكثر من الثاني ….
وهكي كانت ايامي في السجن صلاة قرآن دروس توعية ….
بعد أربعة شهور ثانيات ….بدت التغيرات تاخد مجرى ثاني….
أسماء: الو ميسو حبيبتي كيف الحال ..
مسرة: الحمدلله شن امورك انت.
أسماء: مشتاقين لشوفتكم تعالوا غدوا بما انه جمعة نتعشوا مع بعض اهو قيس ومرته جايين حتى هما…
مسرة:قصدك كوكو بنت عمي والله ليها وحشة …خلاص معناها اعتبرينا عندكم…
سكرت الخط وكنت متعمدة انه نعطيها علم بوجود قيس … وبعدها اتصلت بقيس وقتله لازم غدوا اتجئ تتعشى معانا ….
قيس: تمام نرفع كريمة لامها وانجيكم….
لطيفة: هاذي الفرصة للي نستنوا فيها غدوا اليوم الموعود باش ننتقم من كريمة…
مسرة: بنضرة خبث خلاص شدي الهمة عاد وجهزيلها عمل مقوم معاش ايصير منها بعده ..
لطيفة:قتلك تم اعتبريه خاتم في صبعك تلبسيه
وتنحيه امتا ماتبي ….
المهم للي نعطيهولك اطمني انه ياكله قيس …بس.
مسرة: تعرفي فلاحتي انت كيف …
وفعلا مشت كريمة لاهلها وقيس لحوشهم باش بتعشى السم للي مجهزاته لطيفه ….
صالحة: راكم تنسوا عشاء قيس…
مسرة: اطمني عمتي صالحة حولته في سفرة وسلفرته ….
أسماء:سلمها الناشطة ….
لطيفة: كيف عاد حتى هيا بنت من…..
وصار للي كانت تستنى فيه مسرة وامها بدت معاملة قيس تتغير لعند مايوم …
كريمة: كنت نلاحظ فيه ديما شاد الهاتف ومشغول فيه معقولة هذا كله بس معاملتي مع أنس مستحيل اكيد فيه شئ ثاني….
قيس: جهزيلي العشاء بنطلع…
كريمة: تشوف فيا في شهري ومش قادرة نتحرك خش المطبخ وحط عشاك عادي راهو مش ينقص
منك شئ…
قيس: هكي رايك انت عندك حق خليك مقعمزة لين اتجي للي تراعي طلباتي وللي نبيه ….
كريمة: عدلتش عليه لانه الايام الاخيرة مولي كلامه زي السم وبصراحة انا لاهيه مع امي وبوي..فا مش فاضيتله…وللي يشك في مرته مايستاهلش الاهتمام …بعد تعشى طلع وسيب تليفونه او بالأصح انساه … جيت عكست الهاتف تحت الإضاءة شفت النمط متعه من أثار يده ع الهاتف فتحته وبديت نفتش لقيت بلاوي لقيته يخون فيا مع مسرة بنت عمي ….
ومخطط هوا وياها لزواج بعد ولادتي وكان مغرقها فلوس وطلعات وخشات واخته وامه عندهم علم من كثر الصدمة حسيت بوجعات معاش وقفت عرفت انها ولادة ….
وبحكم انه طالع اتصلت بي ماما جتني هيا وأنس رفعوني ….
أنس: تحملي شوية ونوصلوا بالك قايمة حاجة ثقيلة …
كريمة: انا مش قادرة نرد من الوجع وفي خاطري الكلام هذا مفروض نسمعه من قيس مش منك ..
عائشة: ارفعني لعيادة مانبيش مستشفى عام .
أنس: ايه نعرف اهو قريب نوصلوا لعيادة صاحبي .
وصلنا العيادة واعطوني دخول في اهم اللحظات للي كنت محتاجة فيها راجلي جنبي كان بعيد عليا الحمد لله جبت بنتي للي كنت نستنى فيها فرحتي والأمل للي نور حياتي…..
الساعة سبعة اتصل بيا وردت عليه …امي.
قيس: انت وين وين …
عائشة: كريمة في عيادة ….. جابت .
قيس:كيف شن جابت وانا اخر من يعلم…
كريمه: خديت الهاتف من امي وكيف بتعرف وانت مسيب هاتفك وهذا وين راجع للحوش للي مش هاهمه حوش مايهمنيش وانا بنروح لامي…
عائشة: خيرك يابنتي هكي تكلمي فيه…
كريمة:لانه يستاهل للي قلتههوله ….
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية عافك الخاطر)
