رواية طلاق بسبب الخيانة الفصل الرابع 4 بقلم إسراء ابراهيم عبدالله
رواية طلاق بسبب الخيانة الجزء الرابع
رواية طلاق بسبب الخيانة البارت الرابع
رواية طلاق بسبب الخيانة الحلقة الرابعة
فحط مفاتيحه ودخل المطبخ وهو متعصب وقال: إيه ريحة الطبيخ اللي في الشقة دي هتخنقني، أنا جاي من الشغل تعبان عايز مكان نضيف وهادي
أجي ألاقي البيت بالمنظر دا، إيه الإهمال دا؟ مش صالحة تكوني زوجة عارفة إيه اللي بيحبه جوزها وإيه اللي بيضايقه ومش تعمله، وكمان منظرك دا مفيش اهتمام بشكلك خالص
بصتله نهى بصدمة لكن بعدها فهمت إنه عايز يعمل مشكلة عشان يلاقي سبب يطلقها فمشيت معه عالخط وعملت نفسها مش عارفة حاجة
فقالت: أنت بتزعقلي ليه ما كل يوم بتيجي تلاقي الشقة كدا، وبعدين أروح أطبخ في الشارع يعني؟
وبعدين أنت أصلا عمرك خدت بالي من شكلي ولا لبسي، عايزني وأنا بطبخ أروح ألبس طقم خروج ولا أحط ميكب وأنا بطبخ ولا أحط برفان أنت بتقول كلام غير منطقي يا خالد وعايز تتخانق وخلاص صح؟
خالد عشان يلحق نفسه وإن هى ماتطلعش صح قال: أنتِ بتردي عليا؟ فين الاحترام للزوج يا نهى يا محترمة ها؟ طالما مش عارفة مسؤولية الجواز اتجوزتي ليه؟
نهى ببرود: معلش أصل غصبوني عليك
خالد بصدمة: نعم؟ أنتِ بتقولي إيه؟
نهى: مالك مصدوم ليه؟ أنا في الأول ماكنتش راضية بيك بس فضلوا يشكروا فيك وبعدها اتجوزنا، ولما أنت شايف إني ماصحلش زوجة تتحمل المسؤولية اتجوزتني ليه ووافقت عليا ليه؟ اوعى تقول أنت كمان مغصوب عليا وبصتله بتحدي
أما هو لقى الموضوع هيقلب عليه ويبقى في صالحها فقال: أهو غلطت في اختياري ليكي
فبصتله بسخرية وقالت: هات اللي جواك يا خالد من الآخر عايز إيه؟
خالد: ننفصل، احنا مش مرتاحين مع بعض، وأنا مش متقبلك ومش بحبك ولا بقيت عايزك
كان كلامه بينزل على قلبها بيطعنه فقالت بوجع بتحاول تخفيه: عايزنا ننطلق يعني؟
خالد: اها بالظبط كدا، أنا مش شايفك زوجة مناسبة ليا، ولا مناسبين لبعض جوازنا كان غلطة
نهى بتمثل البرود قالت: خلاص ارمي عليا يمين الطلاق دلوقتي طالما مش مرتاح معايا
فضغط عالكرسي بإيده وقال: أنتِ طالق طالق يا نهى
نهى بصتله بكره ووجع وقالت: بقيت لوحدك يا خالد عشان أنت خاين وأناني، وابقى سلملي على رنا اللي كنت بتسهر تكلمها كل يوم، ابقى روح عرفها بقى إنك طلقتني وابقى اعزمني على فرحكوا عشان أجي أبارك
بصلها خالد بصدمة، وهى دخلت الأوضة تلم هدومها
بقلم إسراء إبراهيم عبدالله
دخل خالد وراها بقلق وقال: إيه الكلام اللي بتقوليه دا؟ رنا مين أصلا اللي بخونك معها؟ أنتِ بترمي بلاوي عليا وخلاص قالها بزعيق
نهى ببرود: لا اهدى على أعصابك كدا لتطب ساكت، رنا الشخص المزيف اللي بسببها اطلقنا، روح بقى فرحها
خالد بصدمة من كلامها: شخص مزيف إزاي؟ أنتِ بتتبلي عليا وأنا مش هسكت على كدا
نهى بابتسامة سخرية قالت: بردوا لسه بتنكر حقيقي أنت غريب، طب يا خالد استنى أجيب موبايلي وأوريك مين رنا دي
راحت تجيب موبايلها من عالكوميدينو وهو أعصابه سابت خلاص وفي باله عرفت إزاي؟
فتحت الشات وحطته قدام وشه وقالت: سربرايز مش كدا
بصلها خالد بصدمة وقال: يعني إيه؟ مفيش رنا؟ وأنتِ كنتي عاملة حساب مزيف باسم رنا وبتكلميني عليه طب إزاي وأنا عمري ما شوفتك ماسكة الموبايل وأنا ماسكه، يعني ضحكتي عليا وعيشتيني مع شخصية مش موجودة
نهى: ما أكيد يعني أنا مش غبية زيك عشان أمسك الموبايل قدامك وأنت ماسك موبايلك وبكدا تشك فيا، وكملت بحزن حقيقي ماكنتش متوقعة منك كدا أنا عملت الأكونت الفيك دا كهزار بس صدمتني بما رديت عليا وماعملتش بلوك، بس مش أنا اللي أطلع خسرانة يا خالد
خالد: أنتِ كدا خربتي بيتك بإيدك، أنتِ في وعيك؟
نهى: بالعكس دا مش بيتي، ولا دا مكاني، مكاني وبيتي مع واحد أمين وبيخاف ربنا وبيخاف على بنات الناس مش يروح يخونها
خالد بجنون وصوت عالٍ: خونتك إزاي؟ وأنا طلعت بكلمك أنتِ
نهى بسخرية: ما أنت ماكنتش تعرف إني أنا، تعرف أنا فرحانة وزعلانة، بس فرحانة أكتر إني كشفتك على حقيقتك، دا كله وماحبتنيش ليه؟ ها ما أنت ماكنتش بتقعد معايا، لو جيت اتكلم بتشوف كلامي تافه وملهوش لازمة، لو في مشكلة تقولي عادي، ولو زعلانة من حاجة، عمرك ما هونتها عليا، ليه؟
خالد بتوهان: يعني كنت بحب في وهم مفيش رنا إزاي؟
نهى بابتسامة سخرية: للأسف دا نتيجة أعمالك الدنيئة يا أستاذ خالد، وورقة طلاقي توصلي عالبيت، خليني أشوف حياتي اللي دمرتها خليني أعالجها
كانت خلصت لم هدومها وسايباه مش في وعيه كدا خسرها، وكمان مفيش رنا يعني بقى وحيد مش معاه حد عشان نزوة وشيطانه اتغلب عليه وخلاه يرد على أي واحدة ويبعد عن مراته
جرت وراها شنطة هدومها بعد لما لبست حاجة خروج تطلع بيها، وهو مشي وراها لغاية ما وقف في نص الصالة عيونه مركزة عليها وهى رايحة ناحية الباب تفتحع وطلعت وقفلته وراها بدون ما تبص وراها عليه
وبكدا خسر شريكة حياته بسبب نزواته وإنه اهتم بواحدة تانية حتى لو كانت وهم ومهتمش لمراته اللي كانت أولى بالاهتمام والحب دا، وكتير من الناس إذا كان راجل أو ست بيقعوا في الغلط دا للأسف وبتكون النهاية الطلاق والفراق
تمت
لقراءة الرواية كاملة اضغط على : (رواية طلاق بسبب الخيانة)
