رواية طبيب التشريح الفصل الثاني 2 بقلم محمد مهني
رواية طبيب التشريح الجزء الثاني
رواية طبيب التشريح البارت الثاني
رواية طبيب التشريح الحلقة الثانية
وقفت وعيني بتتحرك على الجثتين.. جثة البنت اللي خرج منها شعر كتير… وعلى السرير التاني جثة الراجل الخمسيني اللي لقيته فجاة بيخرج من بوقه دود كتير! نفس الدود اللي بيخرج من الجثث بعد التحلل!.. شفت منظر الدود وهو بيخرج من الجثة! ماستحملش اقف دقيقة تانية! جريت وخرجت من المشرحة عشان اروح للشيخ سعيد مغسل المشرحة يجي يشوف اللي شوفته!..
بس كنت لسه خلاص هخرج من باب المشرحة سمعت صرخه اااااااه قوية اوي ! ابص ورايا عشان اشوف!… شفت جثة الراجل مرمية على الأرض! مش دي المشكلة ولا ده اللي خلاني اخاف! اللي خلاني اخاف أني شايف الجثة بيخرج منها دود اسود صغير اوي من كل حته في جسمه! من بقو ومن عينه وكمان من بطنه! دود كتير اوي كان بياكل في الجثه! كانت بتتحلل قدام عيني!…
مستحملتش المنظر.. طلعت اجري على الشيخ سعيد! بجري بخوف وجسمي مش شايلني! وصلت لاوضة الشيخ سعيد.. واول ما شافني وقف منفوض من ع الكرسي!
– أعوذ بالله ف ايه يا دكتور وشك اصفر وبتنهج كده ليه!
= تعالى الحقني وشوف المصيبة اللي جوه في المشرحة!
قلت له كده ومستنتش لما يرد عليا… مسكته من أيده وشديته وانا بجري ناحية المشرحة!
– أهدى يا دكتور
مكنتش بسمعه كل اللي عايزه أنه يشوف اللي شوفته عشان انا بدأت اتجنن! لازم يشوف اللي شوفته! وصلنا المشرحة والجثة كانت مكنها على السرير! بس وضعها كان غريب! هحاول اوصف لك المشهد .. الجثة نايمة على السرير بس وضعية الرأس كانت غريبة.. هي نايمة على السرير ع ضهرها.. والطبيعي أن الرأس تكون باصه ع السقف أو حتى تكون باصه ناحية اليمين او الشمال.. لكن راس الجثة كانت مقلوبة 180 درجة ! الرأس مقلوبه وقفا الجثة اللي ناحية باطنه! الوضعية غريبة اوي! الشيخ شاف المنظر ده واستعاذ من الشيطان! الشيخ سعيد ياما شاف لكن اول مره اشوفه خايف! لان اللي شايفينه عمره ما يكون طبيعي ابدا! انا حاولت امسك الرأس واعدلها.. كانت الرأس في حالة تيبس جامدة… مش عايزه تتحرك.. بس في النهاية عرفت اعدل الرأس ناحية السقف .. ولما عملت كده رجعت خطوتين لورا لان شفت منظر عمري ما هنساه! العنين مكانوش ف مكانهم تجويف فاضي ! ده غير الكسور اللي ف الجثة.. كسر في الرقبة وكسر ف الايدين والرجلين! الكسور دي مكانتش موجودة لما الجثة وصلت!..
انا مش هكمل تشريح! اللي شوفته كان صعب! خرجت من المشرحة انا والشيخ سعيد وكنا في حالة زهول ! معقول اللي حصل ده! ايه حكاية الجثتين دول؟ انا هكتب تقرير واخلص من الجثتين دول بس قبل ما اكتب التقرير لازم اعرف حكايتهم! قلت للشيخ سعيد عايز حد من أهل البنت دي … وسألته هما لسه متجمهرين بره؟ قالي اه مش عايزين يمشو غير لما ياخده جثة بنتهم وجثة الراجل لازم تتحرق! قاتلها خلي حد يجبلي ام البنت دي عايز اقعد معاها هي موجودة بره؟ قالي اه موجودة بره …
طلع الشيخ سعيد وبعد ربع ساعه جالي ومعاه ست.. قالي دي ام البنت يا دكتور.. الست كانت منهاره .. عماله تعيط وتقول أنا السبب انا اللي ودتها بايدي لحد عنده! حاولت اهديها وقلت لها انا الدكتور بهاء الدين دكتور التشريح في المشرحة وعايز اعرف منك بنتك ماتت ازاي؟
الست سكتت وكانت باصه للأرض وبعدها بصت لي واخد نفس طويل وبعد ما مسحت دموعها قالت لي:
– انا اللي اخدتها بايدي للشيطان ده! بنتي عندها عشرين سنه دلوقتي واحنا في البلد عندنا لما البنت توصل العشرين يبقى كده خلاص بارت!.. كل بنات العيلة بيجولهم عرسان ومافيش ولا عريس بيجي لبنتي! سلفتي جات لي وقالت لي في شيخ مبروك على أيده عقدة بنتك هتتحل.. رحت له وهناك قالي أن بنتك مربوطة أن مافيش عريس يجيلها.. وعشان نفك الربط ده لازملي مخ جثة لسه ميته وميكونش عدى عليا اربعين يوم! انا انصدمت من اللي بيقوله! مخ بني آدم ايه اللي هجيبه! هو قالي ملكيش دعوة انتي كل المطلوب منك تدفعي لي المبلغ واللي كان مبلغ كبير.. وهاتيلي حاجة من أطر بنتك! انا عملت كده من غير ما افكر.. جبت له خصل شعرها من بنتي وحطتهم في منديل وجبت المبلغ اللي قال عليه وتاني يوم رحت له… لما رحت له قالي تستني بره ع ما اخلص وهندهلك تاخدي بنتك.. بنتي دخلت له وأنا فضلت بره… ساعه كاملة قاعده وكنت سامعه صوت زعيق جامد وحاجات بتتهبد وصوت صريخ بنتي! وفجأة الصوت وقف ولقيت الشيخ طالع لي وبيقولي ادخلي خدي بنتك! بنتي كانت كأنها في غيبوبة ونايمة ع الأرض… سندتها وروحت ع البيت .. وقبل ما اخرج من بيت الشيخ ده قالي بكرة
هتفوق وهتكون زي الفل ومش هتلاقي ع العرسان! روحنا وع بليل صحيت ع صوتها بتصرخ وماسكه رأسها وعماله تخبط ف الحيطة! مقدرش ولا انا ولا أبوها نسيطر عليها! عشان فجأة تجري ع الباب ونطلع ف نص الليل وتجري ف الشارع وهي بتصرخ! محدش كان قادر يمسكها! جريت ناحية بيت الشيخ ! جرينا وراها ولما وصلنا لبيت الشيخ لقيت بنتي مرميه ع الأرض والشيخ فاتح بوقه ع الاخر كأنه كان بيصرخ! مانعرفش ايه اللي حصل ! بنتي ماتت بسبب الدجال اللي عمل له مصيبه معرفش ايه هي!…
أهل البلد اتلموا عند بيت الشيخ واهلي كمان كل اللي كانوا واقفين عايزين يجيبوا الدجال ويحرقون ف نص الشارع! بس الشرطة جت بسرعة واخدت الجثتين ع المشرحة! احنا عايزين جثة الشيطان ده لازم يتحرق! بس انا كمان السبب ! انا اللي ودتها عنده! …
الست خلصت وقلت تلطم ع وشها وتصرخ وتقول أنا السبب انا اللي موتها ! الست حالها انهيار عصبي !.. مسكينه خسرت بنتها بجهلها لما ودتها لدجال الله اعلم عمل ايه لما جاب مخ البني ادم! اكيد عمل مصيبه خلت البت تفقد عقلها! …
أنا كتبت تقريري بدفن الجثة وكتبت سبب الوفاة سكته قلبية عايز اخلص من الجثتين دول !..
أهل البنت استلموا الجثة.. وجثة الدجال الحكومة هي اللي دفنتها تحت حراسه جامدة لأن أهل البلد كانوا رافضين الدفن .. كانوا عايزين يحرقوها! وقد كان فعلا أهل البلد بعد الدفن على طول نبشوا القبر وخرجوا الجثة واتحرقت!…
انا شفت كتير كدكتور تشريح لكن اللي شوفته في الجثتين دول عمري ما شفته !…
يتبع…
لقراءة الفصل التالي : اضغط هنا
لقراءة الرواية كاملة اضغط على : (رواية طبيب التشريح)
