رواية صوت من المجهول الفصل الرابع عشر 14 بقلم زينب ماجد
رواية صوت من المجهول البارت الرابع عشر
رواية صوت من المجهول الجزء الرابع عشر
رواية صوت من المجهول الحلقة الرابعة عشر
انهدت عليه بكل غيض تضربني ..
وتصيح : اربي واتعب سنين وتجن ع الحاضر تاخذنه يكتل بخواته ويباوع لحلكج … اني توزين ابني على خواته
جان يوم جمعة … والبيت كله نايم
اصيح اريد ابعدها مني اوخرها وهي مجلبه براسي
سرى جانت نايمة .. كعدت على صوت الصياح تركض .. تفاككني منها ..
تصيح وتكلي : ولج انت توزين بابني على خوااااته
– تعرفين كل الزين ابنج مو اني وزيته وتعرفين الجان راح يصير وعرفتي لو درى يسوي هوسة بس ما كدرتي اطلعين غيضج بيه طلعتي بيييه .. حسبالي مرا جبيرة ومحترمة وتخاف الله بس جنت غلطانة
اني كلت هيج لو هي كامت تلطم على وجهه وتصيح : ولج اني الما محترممممة اني الما اخاف الله
احجي ووامشي وابجي – لو عندج ذرة خوف من الله ما تسوين اللي تسوي من ما تكدرين على ابنج ترجعين عليه ..
تحجي وسرى لازمتها وتصيح – اليوم اشعل اهلج اليوم والله ما تظلين هنا
سرى : بس كافي يمه هسه دكاااافي
– ما ضالة عندج اني كاعدة ابيت رجلي وهو الوحيد اليطلعني منا …
– شوف السانها شوووووف شوف البايعتها علينا ايمان اليوم اجرجرج من بيتي تجرج واطلعج بالنعال
– ما طول البيت بيت رجلي معناه بيتي ولا اي بشر يكدر يطلعني منه .. واليكدر لا يقصر .
– ولج اني موجودة وتصيحييييين بيتي ولج هديني عليها رجلج هذا التتتباهين بيه لا ما خليته يحطج ويطك ظهرج لا ما خليته يهجج وينعل الخلفج
-واتمنى من الله اتخابري صدك وترجعي .. اتمنى
طلعت نجلاء من غرفتها وهي تصيح : تعاي بت الخر… هاي حجيج ومراددج ويا امي
حجيت : الخلفني اشرف من انو ينجاب على السان اليسوى والما يسوى شهيد عند الله ورايته بيضة الخوف ع الناس الما تخاف الله ..
صعدتلي تريد تضربني
دخلت غرفتي وقفلت الباب كامت تضرب بالباب وتريد تكسره
اتخبلوا بالبيت نجلاء تصيح اكتلها وامه تصيح اهججها .. انكلب البيت فوك جوا .. الموبايل بيدي اريد اخابر واتردد .. اريد اتصل واطلع اسمه واريد ادوس اتصال .. واتراجع .. شمرت الجهاز ع الجرباية ووكعدت حطيت وجهي بين اديه وكمت ابجي ..
احس نار مشتعلة بجسمي
وشيطان يوسوس براسي انزل اتفل عليهم كلهم واهج واطلع ..
وارجع اتعوذ ابليس واحاول اهدا .. شتصرف ما اكدر لا اكعد ولا اطلع ولا اسوي اي شي .. دا اسمعهم يسبون ابويه .. ويغلطون ويقهروني بالشتيمة .
كمت من مكاني واني ارد ( لا حول ولا قوة الا بالله )
نار بروحي مجاي تهدا .. اخذت ملابس ورحت للحمام غسلت غسل الجمعة وبقيت جوا الدوش حتى اعصابي ونفسي تهدأ ..
اندكت عليه الباب .. صحت : منو ؟
سرى : اني دا تسبحين
– خلصت
طلعت اسمع خالتي تكل لنجلاء شوفيها شوفيها البربوك ولا على بالها طابة تسبح ما بعينها احد ..
حجت نجلا : شبيج رايدة تقهرنا الخايسة عود اني عدي زلمة واسبح وراه
الجايفة الساقطة
تركتهم ومشيت لغرفتي لكيت سرى كاعدة ومنتظرتني
– ها كملتي نعيما
– شكرا
– انت متشوفين غلطتي ويا ماما بالكلام ؟
– اذا شفتي بس غلطي اكو خلل بعينج سرى
– لا والله ادري امي صح هم غلطانة
– هم غلطانة !
– خابرتي ايوب
– هذا اللي قالقكم اخابره لو ما اخابره
– لا مو خطية والله رايح بطريق موت ومو مال واحد يشغل باله
– ما خابرته
اجت حضنتني : والله اني احبج وادري امي حيل داست عليج بس ميخالف اتحملي
– تعتقدين اني اللي وزيت ايوب
– ليش اتعلميني بايوب ما اعرفه هذا اسلوبه من كامت عصة ادم
– لعد غلطي وين الينضرب وينكتل وينهان غير على سبب .. السبب اللي امج دا تضربني وتهيني عليه شنو
– هي ضايجة من ايوب لان ضربني
– وما كدرت تفتح حلكها ويا ايوب وترده رجعت عليه اني شعليه
– اني مو كتلج ادري غلطانة بس ميخالف اتحملي
– واني متحملة قايل شمسوية الغيري هسه خابرت اهلها وخابرت عليه وتشبج لحية بلحية .. بس اني ما اكول بس حسبي الله ونعم الوكيل
– الله كريم اهدي وكلشي ينحل
هزيت راسي .. عافتني وراحت نزلت .. مديت سجادتي واخذت القران وكعدت اقرأ حتى تسكن نفسي .. اقرا واحاول ابعد فكري من كل الضغوط المحيطة بيه وارجع لربي حتى تطمئن روحي ..
صارت كدامي اية .. واني اقرأ ((وبشر الصابرين الذين إذا أصابتهم مصيبة قالوا إنا لله وإنا إليه راجعون أولئك عليهم صلوات من ربهم ورحمة وأولئك هم المهتدون)) اخذت نفس وصرت اردد انا لله وانا اليه راجعون
صرت ارددها لحد ما تجمعت الدموع بعيني .. بعدت المصحف من ايدي وخليته على صفحة وسجدت لرب العالمين .. لخمس دقايق اني مغمضة وساجدة وابجي كل الطاقة السلبية اللي اتكونت بروحي فرغتها ابجي بين ادين ربي .
رفعت راسي من السجود .. شلت اديه ودموعي تجري على خدي
إلهى الى من يلجأ العبد إلا لمولاه و إلى من يلتجئ المخلوق إلا إلى خالقه ؟ الهي وسيدي وباب رجائي اسألك القوة والصبر اسألك نفسي ربي اللهمني الصبر والقوة .. والهمني الحكمة بالتصرف ..
كاعد ادعي وابجي سمعت اذان الظهر ..
مسحت دموعي واني ارد ( حسبي الله ونعم الوكيل )
رجعت كملت تلاوة الصفحة على ما يكمل الاذان .. من بعدها كمت صليت وكملت .. نزلت جوا .. الهول محد بيه .. دخلت للاستقبال عمي كاعد صاح : تعاي بتي
تقربت من عنده : ها عمو
– عمو ليش تتجاوزين على عمتج بكد امج هي وجبيرة وانت الاكول عليج حبابة وعاقلة هيج تسوين
– بشنو غلطت عمو ؟
– تكليلها انت مو محترمة وفد وحدة ما تخاف الله
– جانبا عن انو اني ما حجيت هيج بس عمو قبل لتحاسبني ممكن ترجع لاساس المشكلة حتى اعرف اني ليش انضربت وانهانيت وانشتم والدي .. انطيني غلطي حتى اعرف اذا اني استحق هالمعاملة
– ما ادري عليمن العركة تكول ما تحترم
– جيبها وكعدها وكولها اني بشنو ما احترم
– هسه ما اريد اجيبها ونسوي مشاكل بس عمي الهوسة والصياح مو حلوة واحنا ناس مستورين
– واني اللي صيحت ؟
– الحجي هذا احجي الج والهن وللكل ما اخصج بيه المشاكل مو حلوة
– بعدني عمو ادور على سبب لاهانتي وضربي
– كون خابرتي ايوب
– ما خابرته مع انو هذا حقي اني كاعدة بهذا البيت بكفالته وهو المسؤل عني من انضرب او انهان او حتى اغلط .. هو المسؤل اليحاسبني ويشوف منو غلط وياي ووين غلطي بس ما خابرته وهو رايح بطريق موت واكعد اشكي امك وامك .. سكتت
– اي عفية ابنيتي هاي المشاكل اتصير وهي مثل امج اتحملي
– واني هذا الجاي اسوي عمو
دخلت هي حجت : الج عين وتنزلين ؟ ولج انت شنو من صلافة
صاح عمي : جا تنحبس بغرفتها كافي كفينا شرج من لا بارك الله بيج
– اني الما يبارك بيه دخل يجي والله لا اعلمج الله حق بنت الاوادم
كام عمي يرزل بيها ويحجي عليها
اني كمت من عدهم وتركتهم بينهم .. رحت للمطبخ دخلت نجلاء وحجت : اذا مديتي ايدج ع الجدورة لو ع الثلاجة واكلتي الا اطيح حظج واني اريدها من الله حجة حتى اريح گلبي بيج
بقيت افتح بالكاونترات واسد بيهم ومنطيتها ظهري وهي تحجي
خلصت كلامها ومشت طلعت من الثلاجة خبز وصبيت تمن وفوكه مرك .. وكاعد اصعد شو هاي شافتني واركضي وراي .. واني ركضت لغرفتي وقفلت الباب هي تصرخ وتصيح واني متت من الضحك على روحي .. حطيت الاكل ع الميز اريد اوكف من الضحك
دك التليفون رديت شفته امي .. والضحكة بحلكي : الو
– الو مبينه اتضحكيييين اليوم مرتاحة لازم الاسد يمي
– اضحك من الخير
– ايوب يمج
– لا التحق الصبح
– يرجع من السلامة شكو ماكو
– هييي بنص الخير شحجيلج
– والله ييمه ما جنة خير شصاير
– امه
– شبيها
كعدت اسولفلها لو امي دخنت وتكلي : حضري هدومج هسه اجي اخذج
– لا تجين ولا توصلين
– ما تجين شني كاتلينج وتريدين اسكت
– اي وشنو بيدج تسوين
– انعل ابهاتهم واعلهم ياهو ابوج التشتمه وهو بكبره لمي هدومج
– ماما لا تخليني اتندم لان احجيلج البيه كافيني
– ولج من تسكتين ينداس عليج ساكتة ليش
– اي اجيتي وصيحتي وكلبتي الدنيا وهيييي ما سكتنا وبعدين يمه وبعدين ؟ شني اخوتي بيهم فزعة ؟ لو تركت بيته وطلعت وهو ما موجود ما يتركب الحق براسي ذيج المرة بتيزاب ردت اروح واجيتي وكلبتي الدنيا واخذتيني اي شصار اخوتي بنفسهم جذبوني واجا رجعني وهو يتأمر وطلعت اني وانت الغلطانين .. دخيل بختج يمه اسكتي يكفيني بيهم الله يشوف
– ما طول ما تريديني خابري زلمتج
– شكوله تعال امك كتلتني .. يمه رجلي بطريق كركوك مدري وصل مدري لا .. وطريق موت وحرب اجي اخابر واكله امك وامك .. يجي ويعرف
– والله يا بتي فتيتي كلبي شلون وتظلين هيج يطردن بيج ومانعاتج من الثلاجة ومن الاكل وانت راضيتلهن
– ما راضيتلهن بس ما اريحهن وانفذ غايتهن وتالي نتخارب اني ورجلي يجي بسلامة ونتفاهم ويحلها
– واتصبرين على امه وخواته العايقات لحد ما ينزل
– بعد شسوي هذا اللي الله كاتبه
– والله يابتي برودج هذا فتني فت شلون بالله كليلي شلون كلبي يرتاح وانت بنص ذني الما يخافن الله
– الله موجود ماما شسوي الله موجود
سديت الاتصال واتندمت حجيت لامي .. انشغل بالها عليه حيل وانمردت من القهر .. بس شسوي الخليتها تجي وتتعارك يتركب الحق كله براسنا هو اني بعدني بالبيت وساكتة وهم ذابين الصوج بيه ومغلطيني لعد من تجي امي شيصير ايوب واهله وفوكاهم اخوتي كلهم يصيرون عليه .. اقلها اصبر والله ياخذ حقي من كل ظالم .
حطيت الاكل وكتبي وكعدت اكل و اقرا .. ما نزلت غير ورا المغرب
نجلاء تحجي وتدرم وتغلط وهي تسوي العشا .. وخالتي كاعدة يم عمي .. صاحلي : تعاي عمي لا توكفين
حجت خالتي : خل تولي انكلعي ما اريد اشوف خلقتج
حجيت : محتاج شي عمو اني بس نزلت اسأل خاف محتاج شي لان اريد اوجع اكمل دراستي
– لا عمي الله يوفقج اخذي راحتج
صاحت خالتي : شوفي يالصلفة ياهي التخليج تمتحنين بس صبرج عليه
عفتها وصعدت .. هم زين هاي العركة اجت من جانبي
ميردوني بالبيت اكعد بغرفتي اقرا احسن .. كعدت اقرا لحد ما صارت الساعة ١١ ونص نزلت جوا .. فتحت ماعون بيتنجان مكلي .. اخذت خبز حميته شوية وخليت بيتنجان وكصصت خيار .. وحميت الجاي اخذت كلاص جاي وصعدت .. احس عقلي كلش قفل مو مال اقرا اي شي
شغلت محاضرة للدكتور عدنان ابراهيم وكعدت استمعله واكل واشرب جاي .. كملت رحت فرجت اسناني ورجعت لكيت التليفون يدك .. اخذت التليفون .. ايوب .. رديت : الو
– ها بابا شلونج
– هلا عيني شلونك وصلت !؟
– اي الحمدلله شلونج كاعد تقرين
– لا كملت واريد انام ، ليش ؟
– ها قفلي الباب وياج من اتنامين ..
حجيت : تعبان
– اي والله الطريق جان صعب .. وصارلنا تعرض
– دخيلك ربي وشصار
– لا الحمدلله سيطرنا ولا واحد مصاب الحمدلله على كل حال
– ايوب دا اخاف عليك حيل
– لا تخافين والله موجود .. ادعيلنا الله يوفقنا ونحرر هالكاع ونفتك ونرتاح
– ان شاءلله ياربي عليك الله دير بالك على نفسك
– ان شاءالله ابويه امي شلونها ؟
– ما مخابرها ؟
– لا والله وين شايف دربي هسه يلا كعدت بالقران كلت خلي اخابرج اشوف شكو ماكو
– لا الحمدلله ماكو شي .. بس ندعيلك ترجع بالسلامة
– الله يسلمج ابويه .. غفران راتبي فوك تندلي اي شي تحتاجي اخذي منه ودزي
– والله ما محتاجة بس ملازم ، بس شلون اطلع اشتريهم
– دزيلي برسالة يا ملازم تريديهم واني اخليهم يوصلوهن الج
– تمام
– يلا ابويه طفي وارتاحي واني وهم اخذلي ساعة انام عدنا اجتماع ب٣
– اجتماعيش هذا ب٣ بالليل ؟
– بعد ، شنسوي تصبحين على خير
يحجي والتعب بصوته مبين .. سلمت عليه وسديته ورفعت اديه لربي يحفظه ويحمي ويرجعه النا بالسلامة .
كم يوم وهن شادات وياي بس انزل يغلطن ويتجاوزن ..
وميقبلن الزم اكلهم ولا شربهم … عاد اني شفتها فرصة اكعد اقرا
من اشوفهن هدوء انزل على راحتي اخذ ماعون صغيرة وارجع للغرفة اعتزل واقرا
طلعت للحمام جان اسمع نجلاء تكل لخالتي : ترا هي مكيفة على هالوضعية كارصة بغرفتها تقرا واحنا نكرب وتنزل بدون علمنا تبوك اكل وتصعد ..
حجت خالتي : خليها يجي ايوب الا اخلي يكسر راسها
– والله لا يكسر راسها ولا هم يحزنون خوفج لا يمسحلها خاف ماذين مشاعرها بعدج معولة على ابنج يردها انت هم بلية كلب .. ذابه الشغل براسنا وعايفتها تقرا .. واحنا نكرب بحجة منريدها
دخلت وتركتهن … العبد يكيد والله يكيد لكلمن يكيد ما ينسى احد
رجعت اقرا .. ماكو نص ساعة وانهرجت الباب عليه .. كمت فتحت الباب ، طلعت عمتي كالتلي : الخايسة كاعدة وكارصة بغرفتج هسه تكومين اتنظفين البيت كله
– تمام جاية
دخلت لغرفتي واني اريد اسد اللابتوب حجت : شجابه لايدج اللبتوب هذا مال ايوب
– هو انطانياه كالي اقري بيه
خزرت بوجهي ومدت ايدها اخذت اللابتوب وطلعت
اخذت حجابي نزلته وياي ونزلت .. البيت ما بيه ذاك الشغل بس كمت طشيت الكراج مي وغسلته ورجعت المطبخ مواعين قليلة غسلتهن ومسحت البيت
سلكت بيتية وسويت العشا بتيتة حمس وعليها بهارات وسويت طاوة طماطة اخذتلي لفة من الطاوة ورحت وحطيتها بنص الاستقبال وصعدت
ثاني يوم كعدت لكيتها مطلعه الكاونتر كله ..
واشتغلت وياها المطبخ كله للعصر يلا خلصنا .. هلكت من التعب رجعت اقرا صاحت ع العشا نزلت كملته ورجعت اقرا ..
ايوب وصلني الملازم بيد ابن عمه انطاهن لعمي
خالتي رايدة تاخذهن عمي ما منطيهن الها كاللها : ايوب دز امانة تنطي بيد مرته مالج غرض انت ..
صاحلي نزلت كالي اخذيهن عمي وصعدي
صعدت اقرا .. بس انضغطت حيل .. بس من وراهم كلش تعبت من الجو كيد ومداسس وحقد وكره .. اجواء المحبة والالفة مالها مكان بالبيت ..
وراها كعدت لكيت كالبة البيت جوا تريدنا انظف البيت جارة القنفات ومطلعة الفراشات لحد ما وصلت لغرفة البنات تكلي طلعي الفراش مال غرفة البنات بسرعة
– البنات كاعدات خلي يطلعوها
حجت : لا شو انت اطلعيها
– ليش البنات مو موجودات ليش اني
– غصبا ما عليج وعلى الخلفج
– خالة ترا عيب كل ما حجيتي وجبتي الخلفني ترا والدي شهيد حرام عليج
– والله من انعل ابوج لابو الخلفج
– انت ظالمة والله يجازيج ان شالله .. وما اكول حسبي الله ونعم الوكيل
حجيتها وبصوندة المي ترش لزمتها وصفكتني بيها .. وهي تصيح : تتحسبين عليمن ومنهي الظالمة بت الجلب
– ما اسمحلج تجيبين ابويه على السانج ولا اني خدامة بهالبيت حتى اكوم انظف غرفة البنات كاعد انظف وياج البيت اكول خالتي وجبيرة وام زوجي واساعدها بس مال تريدين اتذليني انظف غرفة البنات لا والله لا الج ولا لغيرج يذلني
عفتها وكاعد امشي وهي تغلط وتجيب الصونده بظهري
احسها لسعتني حيل .. تركتها ومشيت وهي تصيح وتغلط
ودخلت وراي تكلي : عود زعلتي وتعوفين البيت مكلوب واتصعدي غصبا ما عليج انت تنظفين
– احجي لبناتج
عفتها وهي صعدت وراي .. وهم لزمتني من راسي كمت اصيح
عمي يصيح من جوا وسرى صعدت فوك تجرها من عندي .. دفعتها مني حيل زلكت ووكعت بالكاع .. لو هي تخبلت
هجمت عليه تريد تكتلني .. طبيت بغرفتي سديت الباب وتركتها تصيح وتاكل بروحها وتكول ما اخليج اليوم بهالبيت الا اهجج
كمت الزم براسي من القهر واحك بظهري من الوجع
شسوي يربي والله ما ظلت عندي طاقة واتحمل اكثر .. كمت ابجي
وما عندي وما بيدي غير ادعي ربي واتصبر ..
لثاني يوم ما طلعت من غرفتي احس بعد ما عندي طاقة اتحمل اكثر
جان يوم خميس .. خابرت على ايوب .. رد : الو
– ها عيني شلونك
– هلا يابه شلونج شخبارج
– زينة بس ردت اترخص من عندك
– علموديش
– يصير اروح لاهلي ؟
حجيتها واختنكت .. حجه : غفران صاير شي
كمت احاول ابلع العبرة اللي ابلعومي واحجي : لا بس مشتاقة لامي
– متأكدة
– اي ، اكدر اروح
– راح ادزلج سيارة واحد من ولد عمي من اخابرج انزلي ضلي باتي عد اهلج اني باجر انزل .. وبنزلتي اجي عليج اخذج ماشي
– ان شاءالله
– ديلا بابا بدلي واني خل اخابر صلاح حتى اشوف منو من الولد موجود
سلمت عليه وسديته ..
ولميت غراضي وكتبي وقرطاسيتي وكعدت انتظر اندكت الباب
فتحت الباب سرى شايلة ماعون اكل : وين رايحة
– خابرت ايوب رايحة لاهلي وباجر هو ينزل
– ها ابراحتج بس اجيت جبتلج اكل لا تضوجين
-هزيت راسي
حجت : لو ما مكبرتها وطالعة افضل اذا باجر يجي اتحملي بس اليوم وباجر يوصلج هو
– اني جان من زمان اطلع بس ما ادري شنو المصبرني
انداريت الها :من كل اللي ديصير يهمني اعرف شغلة وحدة
– شنو هي ؟
– ايوب شنو علاقته بنادية اني دا احاول اصبر بكد ما اكدر بس من اتذكر ضعفه وهو يشوفها احس نار تشتعل براسي وشي يكلي اهج واطلك واخلص وارجع اكول لا خوش وجال ويحبني وراجع اتذكر موقفه اكدر اعرف شنو علاقه
– ماضي عادي
– ما اريد تختصرين وتكليلي ماضي احجيلي الحقيقة ووعد لا اسوي شي ولا اتصرف اي شي بس رايدة اعرف وارتاح
كامت من مكانها راحت سدت الباب وكالت
باعي هو ماكو واحد ما عنده ماضي .. والصار صار ..
ايوب جان يحب نجلاء من هو عمره ٢٠ سنة واليوم هو عمره ٣٨ سنة
يحبها حب لا صاير ولا داير .. بس المشكلة امها مو زينة يعني المنطقة تعرف امها مو راحة .. جان ابويه محرم على ايوب يتزوج نادية
حاول شكد ودخل ناس تتوسط يم ابويه شكد ما فاد ويا ابويه
احجيلج هذا الحجي بوكت جان الحجي والشور بيد ابويه مو بيد ايوب جان ايوب صغير ..
هو يحبها حيل بس هي هم متكعد راحة عذبته حيل ..
من صار موظف بالنفط وابويه شوية استسلم وتقريبا بيه مجال يقبل يتزوجها كالتله .. والله اني ما اتزوج ابيت اهلك تحطلي بيت وحدي وشرط باسمي ..
صارت مشاكل وتعاوفوا فترة ورجعتله هي واتنازلت عن البيت باسمها بس كالتله نتزوج بشرط اريد بيت وحدي كاللها ما اكدر هسه اصبري عليه لحد ما اوكف على رجليه ..
بهالوكت .. صارت احداث ٢٠١١ ابويه طلع لسوريا وايوب صار الكل بالكل بس ما يكدر يتركنا فكاللها نتزوج وتصبرين ويا اهلي لحد ما الله يفرجها ويرجع ابويه بسلامة كالتله موافقة لما جاب شيوخ وراد يتزوجها امها شرطت مهرها ١٠٠ مليون يلا تنطي بتها
هنا هو حيل اتفشل جايب زلم ورايدها وطالبها وتالي يتفشل من امها هيج
تعاركوا وتزاعلوا وتركوا بعض فترة بس هي تحبه وهو يحبها كامت تعتذر وتجي هنا من تجي نجلا بلكت تشوفه وتجبره يحجي وياها لحد ما وافق ورجعوا لبعض
من بعد فترة هم حجوا بسالفة الزواج
عمامي و ابويه كلوله لو تصير مريم العذراء لا نمشي ولا نخطبها امها الطردت الزلم الا مهر بتها ١٠٠ مليون فلا نخطب بتها .. اتعلعل حيل
هاي غير مصايب امها غير مشاكلها
يحتاج ايام يلا اكملج مشاكلها ومشاكل امها ويا وويا المنطقة
ناس لا تنجرع ولا تنبلع بس هو حبها من هو صغير ربى على حبها وهي ربها ودينها التمسكن
ليش ما السيد انطى جهاد ٢٠١٤
ايوب بلا ما يكول لاحد ولا يشور احد ذب استقالة وصاح لبيه
امي هنا تخربطت الدنيا انكلبت مقبلنا .. هي هنا هددته اذا يروح للجهاد تتركه .. ما سمع لاحد وراح جاهد واستمر اشهر لا يجي لنشوفه
هو بالحشد بدا يرتفع ويبرز وابوه معروف
وصارله مكان وناس تعرفه وتهتمله شخصية ايوب اتغيرت من دخل الحسد التزم بالدين اكثر … صار اكثر مسؤلية كلمته ماشية اكثر صاروا حتى عمامي يحترموه ويحسبوله احساب
هنا هو راد يجي يخطبها واتفق وياها على مهر واتفق ويا امها ورتب كلشي وعمامي صار عدهم علم بخطبتها .. وسكت ابوي وعمامي كلهم وخلاهم يوافقون يروح يخطبها وراح خطب وقروا الفاتحة وحددوا المهر وخلصوا كلشي وجان ناوي يخلص من معركة بيجي ويعرسون .. كاللها ما ضل شي تخلص معركة بيجي ونتزوج
والكل صار عنده علم ايوب يخلص معركة بيجي ويتزوج
احنا نحضر وعمامي يسلون يمتى العرس وشوكت وكلنا متهيئين بيوم من الايام هم هناك قليل شبكة توصلهم بس هي مخابرته حلصته وما راد وباقي ٣ ايام ما رد ولا مخابرته .. اجت هي تكول من حصلته معناها يطلع عنده الاتصال ويكدر يتصل بس هو يتجاهلني .. من محصلته هو نفسيته تعبانه منهد بيها يصيح وهي تصيح متعاركين
بس هالموضوع عادي عدهم هم صارلهم ١٥ سنة يتعاركون ويرجعون عادي .. بس يهدئون يخابرها ويرجع كلشي لمكانه
بس هلمرة هي ما صبرت
عود لان اتجاهلها رادت تسويله كسرة خشم كومي ووافقي بواحد متختخ فلوس بس جبير وهي خاطبيها لايوب وقارين فاتحتها .. وحطت يوم عرسها بيوم نزلته للعلم ايوب خابرها وصالحها واتصالحوا وانتهت المشكلة وعادي بيوم نزلته يحجي وياها ويضحكون وهي تكله عرس بنت خالتي هو كاللها خلصي العرس وخابريني وعادي ماعنده علم هي شدا تخطط
هي عود بعقلها مسويتها مفاجئة وعود دا تشوفه شكد قوية وما تهتمله .. سمعنا صوت زفة وطلعنا من السطح نباوع .. جان امي تسمع زفة نادية
يمه امي تخبلت .. شنو زفتها شنو احنا حاجين عليها وقارين فاتحتها
راحت كعدت ايوب كالتله : انتم متزاعلين
كاللها يمه شبيج خليني انام
فلا انسى ذاك اليوم هو نايم ما عنده اي علم باللي هي جاي تسوي بيه
كالتله : شتنام ابني الزفة الكاعد تسمعها زفة نادية
انتم متعاركين شنو اتزوجت
سمع هيج والله كام يكوم ويتعثر بدربه ..
طلع وصدك جان يوم عرسها ما ادخل ولا منع ولا سوالها مشاكل بس اخذ سيارته وشهرين ما شفناه ولا عرفنا اخباره ولا خابر ولا تواصل
كطع عن العالم كله ذب روحه بالساتر راد باي طريقة يستشهد ويموت حتى يخلص الله يعلم ذيج الايام شلون تجرعها وعاشها
لما رجع طبعا امي اتمرضت من وراه .. واحنا متنا بس نريد خبر
بس لما رجع لكاها مطلكة من اللي اتزوجت هي زواجها وطلاكها صار بشهر واحد ..
– يعني هي من اتزوجت اقتنعت ووافقت لو بس رادت تقهر ايوب
– لا ما مقتنعة هي غريبة الاطوار وغرابتها بصلافة بجرأة تسوي اشياء تتعجبين تكولين هاي بعقلها بس هي هيج فاخذت الموضوع عود هي قوية وتكسره وتكسر كبريائه هي جانت دائما تكول عليه متكبر متعجرف شايف روحه لان هو ما يتنازل بالزعل ما يطخ لو هسه مو تتمرض لو تموت ميتنازل انفة
– وتالي كملي كبل لا يجي
– التالي سحلت روحها بالكاع بس تريده يباوعلها حرمها كالها تحرمين عليه بعد ولا تصيرلي مرة ولا اتشرف بيج ولا اريد الساني يطخ السانج
من ذاك اليوم لهذا اليوم هي ما خلت طريقة حتى ترجعه بس هو حرمها لا يرد عليها ولا يجاوبها ولا يقبل يشوفها .. رادت امي اتزوجه وخطبتله كومة نسوان بس ما صارت لحد ما رهمت وياج
– اي واضح رهمت
ضحكت ، حجيت : تتوقعين يحبها
– يحبها اي يريدها لا .. هو رايد يبعدها باي طريقة بس اذا تسالين على الحب اكولج الحب هذا صارله ١٨ سنة مو بيوم ويومين يموت .. يحتاجله وقت يلا يكدر يتخلص منها .. كبل لا ياخذج سوت افلام يابو افلام بيه بس حتى ترجعه تعبته بكل معنى الكلمة خلت يكره روحه اسمعه يشكي يم امي يكللها هي مثل السرطان بكلبي لا بيدي اطيب روحي ولا اتاقلم وياه بس الله اليكدر يشفيني منه
كاعد تحجي خابرني ايوب سرى كامت .. رديت : صلاح بالباب
– ماشي نازلة
– اخذي وياج ٥٠ من الفلوس خاف تحتاجين شي تشتهين شي عد اهلج وبحيل الله باجر اني نازل واجيج
– ترجع بالسلامة
– غفران متاكدة ما بيج شي
– ما بيه
– مو ارجع والكا طلعتج هاي زعلانة
– خو رجعني بيدك ليش ازعل اسم الله
– هاهية اني انزل اجي عليج ان شاءالله
اخذت جنطتي ونزلت يم عمي سلمت عليه وكتله : عمو امي خابرتني خواتي ملتمات ورادتني وياهن خابرت ايوب ودزلي واحد من ولد عمه يوصلني
– اي عمي ما طول رجلج راخصج وبعلمه براحتج سلمينا على اهلج
طلعت وسلمت على ابن عمه
ودليته وجبت الطريق كله افكر بسالفة ايوب
ما ادري الشعور بداخلي مو غيرة بكد ما انقهرت على وضعه
ممعناها فعلا متأذي ويتمنى يرتاح مثل ما كالي .
دا احاول اعيش شعوره من رادت تكسره
صعب شلون عاش الموقف وشلون تجرعه وشكسر بروحه جم احساس وشكد قسى گلبه ؟
بنص هالتفكير احس اشتاقيتله
طلعت تليفوني وكتبتله ( صح رايحة لاهلي بس مشتاقتلك اكثر منهم )
بسرعة جاوبني ( الله يعلم شكد مشتاقلج ومشتاق لغرفتنا وراحتنا بحيل الله باجر راجع واعوضج اتحمليني )
ابتسمت … اتحمليني
اخذت نفس وباوع بالطريق لحد ما وصلنا لبيت اهلي
سلمت على ابن عمه ونزلت .. اتلكتني امي مستغربة : ها ولج زعلانة
– يمه اني كل ما جيتج كتيلي زعلانة لا مو زعلانة
– جا شبيج الوجه كراط حجار
– يمه هسه هذا خوف لو تعيبين عليه
– ولج احجي ترا كلبي طاك من وراج
– اتضايقت وخابرته كتله اريد اروح لاهلي كال روحي وباتي هناك اني من اجي اخذج
– زين يعني ماكو شي
– اكو بس ما طلعت بسببهم طلعت ارتاح بس
– جا شنهي حزورة هي اركعج بالنعال والله احجي فتيتي كلبي
سولفتلها واجت كشفت ظهري صاير ازرك من ضربة الصوندا تخبلت ..
كالت : بعد ما تروحين انعل ابهاتهم
جريت روحي منها ونزلت هدومي وكتلها : لا تحجين على حجاية لا اني ولا انت بكدها خليني ارجع معززة مكرمة وايدي بيده ولا ولدج يكتلوني فوك كتلتي ويرجعوني
– لا شحدهم غير اسويهم وصلتين
– اكول يمه خليني ساترة على روحي وكاسبة رجلي احسنلي اقلها كاعد ادرس حتى لو اكو مشاكل ضامنة امتحاني ، عسى ما الدنيا تمطر مصايب لازم امتحن وزاري ولازم انجح ما رايدة تكبر المشاكل عرفيها
كامت تحجي وتدعي ومرة تغلط عليه ومرة على حظي وفرفحت
بس شسوي هم اذا ما اكللها تضوج واذا اضم بكلبي اكثر احتمال اني انفجر احتاج مرات احجي وافرغ البداخلي واسولف .
كعدت ويا امي شوية
ورحت فتحت كتبي وكعدت اقرا ..
شوية وما احس الا امي دازتلي على لفة همبركر وقوطية بيبسي وحلويات بيد احمد .. كالتلي : اتعشي واشبعي بطنج وربج يتوكلهم وياخذ حكج منهم بجاه كربة ابوج وظليمته
ابتسمت .. الحمدلله هم نعمة من نعم الله عليه انو عندي ام وجانب راحة بحياتي اشوف دلالها حنيتها تخفف عني همي وارتاح .. كملت قرايتي واكلي وكمت غسلت ورجعت هي كاعدة ع الموبايل .. كتلها : يمه ميخالف انام يمج بالفراش
فتحت غطاها واديها : غالي والطلب رخيص تعاي ييمه
تمددت يمها ونمت على ايدها .. اخذت نفس واني اشتم ريحتها كأنما ريحة الجنة دمعوا عيوني .. حجت : يمه غفيرة ام دمعة العزيزة الما تنزل بهدم الجبال ثكلت عليج دنياتج ونزلن دميعاتج وبجيتي غفيرة يمه .
هي تحجي هيج زاد البجي بعيوني وحضنتها
بقت حاضنتني وتمسح على راسي وتدعي الله يصبرني ويوكف وياي ويكيد كلمن بكلبه كيد اليه ..
نمت على صوت دعاويها اليه وعلى ريحتها
ارتاحيت واحس جزء جبير من همي خف بوجودها
ثاني يوم خواتي وجهالهن اجوا والتمنيا وسوينا غدا وكعدنا ناكل ورا الغدا رحت سويت جاي واجيت لكيت امي تسولفلهن باللي سوته عمتي بيه .. وكعدن يستفسرن مني حجيتلهن سالفة ايوب ونادية تخبلن
– وصابرتله
– وشنو بيدي غير اصبر
نوره : ولج اني بمكانج غير اهج والله ما ابقى عنده ساعة وحدة اهلة يكتلون و هو بكلبه وحدة وصابرة
– بس هو ما مقصر ويايا
– شيقصر بعد شامرج بنص حيايا
– اهله يعني شسويلهم
اسيل : اهله شتسويلهم يا برودج ولج غير العب الدنيا شلم بلم اني انكتل واسكت
– وشنو اسوي ما عندي غير الساني واحجي
– السان شنو اخابر اهلي واخابر اخوتي واخابره واسويها عليهم كربلة
– كلامج صح لنفترض هرجتها وسويت هوسة وسويتها كربلة النتيجة شنو ؟ ترا الهوسة سهلة والحكمة صعبة اني من اريد اقدم على تصرف غير اعرف نهايته منو يوكفلي ؟ اذا اني حطيت اهلي هو راح ينطي باهله كدام اهلي لو راح يذب الصوج بيه !؟ اخوتي راح ينطون بيه لو راح يتراجفون وينطونه الحق حتى لو مذبوحة كبالهم تحجن كانما ما تعرفن وضعنا
– والله لا وضع ولا شي بس انت ضعيفة غفران كله سكتة سكتة سكتة شما يصير ساكتة غيري شخصيتج
– انتو ليش حاسبين الصياح والهوسة والعركة والجدال قوة شخصية ؟ يعني لو اصيح واكلب الصوبين لو اني ما عندي شخصية .. باعتقادح النبي محمد ضعيف شخصية لما اجا رجال لزمه من هدومه وشاله من الكاع وكاله انطيني من مال الله اللي عندك شنو سوا الرسول ؟ ابتسم وانطاه .. ضعيف من ما رد وخلا جماعته يهدون ضعيف من سكت على رجل تطاول عليه .. لو شخصيته بحكمته وصبره ..
القوة عندي من احقق الشي اللي اريده سواء هم يقبلون او ما يقبلون واني اللي اريده دراستي وكاعد اجاهد عليها .. اما الصياح والعرك والهوسة هذا كله مو قوة عندي انما اعتبره تسرع وعدم تصرف .. اني هيج نظرتي
– اي لعد تضلي اتحملي
– ترا الكاعد اتحمله زوجي
– اي كرة عينج بهيج زوج بكلبه وحدة ثانية
– اي كرة عيني ليش لا .. واذا هو عنده ماضي وكلبه معلق بوحدة ورايد يخلص منها وميكدر فلا هو ولا اني نكدر نغير كلبه الله وحده اليحكم الكلوب ويتحكم بيها هو يتحكم بعقله بتصرفاته واني اشوف تصرفاته ويايا زين ممقصر .. بس محتاج اللي تسنده وتساعده ينسى
– اي ومبارك انت هاي الوحدة
– ما دام الله اختارني فراضية، كلنا نتمنى من الله هذا الانسان اللي يجي يحتوينا ويعوضنا وينسينا اللي مر بينا ويصلحنا ويرتب حياتنا .. ليش محد من عدنا يحاول يصير هو الانسان اللي يتمناه ؟ والا الله ما كال ( ومن احياها فكأنما احيا الناس جميعا ) الله وحده اليحيي فلما يطلب من عبيده الاحياء تعتقدين شيقصد ؟ يقصد ان نوكف لانسان محطم ومنهار ونسانده ونحيي حتى يرجع يوكف على رجليه .. لما تحيي انسان واحد عند الله انت حييت البشرية كلها .. فليش ما احيي انسان الله كتبه اليه زوج ؟
ما ردن عليه وهذه عادتهن من احجي دين يحسن كلامي تدين مبالغ .. لهذا اكره احجي بافكاري واعتقادي كدام الناس لإن ما تشوف غير الاستهزاء .
ختمت كلامي وكتلهم : يكفي فضل ربي عليه انو وهبني رجال مؤمن متقي يخاف الله بيه ما يظلمني اتقوى ع الدنيا بيه ما يستقوي عليه .
حجت امي : خواتج يمه من حركة كلبهن عليج يحجن هيج
اسيل : قابل نكرهه بس شنو بعدها عروس ويوم جاية محركة بتيزاب مرة مكتولة بصوندة وهي ساكتة والله ننقهر .
– لا يكلف الله نفسا الا وسعها ربي ما دخلني هالاختبار لو اني ما عندي القدرة على التحمل وكل اجر على قدر المشقة وشمدريج الله يكول (فلا تعلم نفس ما أخفي لهم من قرة أعين جزاء بما كانوا يعملون) الدنيا مو مكان راحة لاحد لا اني مرتاحة ولا انت ولا اي بشر .. بس اكو ناس الله يحبهم يصعبها عليهم شوية حتى يجازيهم بافضل الجزاء لإن يستحقون واكو اللي ما عدهم طاقة صبر وتحمل .. وذولة الله يهونها عليهم لكن حظهم بالاخر قليل .
حجت هديل : هسه جانبا عن اهله والمشاكل جديات انت تحبيه
– لما اشوفه يدخل البيت يجيني الشعور نفسه من جان ابويه يدخل اللبيت ومحمل اديه اشكال والوان .. من يغيب افتقده .. من يلتحق ابهت بدونه .. من هو بصفي احس الدنيا كلها بين اديه .. ومن انام بحضنه احس ماكو قوة تكدر تطخني وتوصلني وهو يمي .. ياذيني كلبي من اشوفه تعبان افرح من اشوفه مرتاح .. اضوج من اباوعله منزعج .. واطير من يغازلني واحس عندي قوة بكد الجبال مستعدة اشيل عن ظهره كل همومه وكلشي يتعبه حتى اشوفه متهني ومرتاح .. ما اعرف اذا جانت هالمشاعر حب بس هذا اللي احسه وياه
اسيل : كرادة حظج تكلي ما ادري وهي مغركة السفن
حجت هديل : ترا حقها غفران لا بعمرها عاشت امور عاطفية ولا مرة بتجربة قبل الزواج لو حبت من طرف واحد اول رجال يدخل حياتها زوجها ولو ما شايفة منه وجه حلو وحاسة بحنيته ما تحبه المرة ما يتعلق كلبها برجال لو ما ضايكة حنيته عليها .
كاعد يحجن ويسولفن وجان يجي زيد يكلي : عمه زوجج اجا
ابتسمت : ابن حلال رجلي
اسيل : هم زين الا شرية جان شكيت بامه
ضحكنا بصوت عالي وكمت ركضت بلهفة عدلت نفسي ..
ورحت ركض .. احمد جان ما موجود وهو واكف برا .. صحتله
دخل اول ما دخل فتحلي اديه اثنينهم .. حضنته حيل
جان يكول : افيش ولج شكد مشتاقلج
كاعد يحجيها وبعدني منه بسرعة : وخري اجو
طلعتله امي كاللها : اعذريني والله بعدني بهدوم ال دوام وتكرمين الحذاء شوية ما اكدر انزعها وحيل تعبان
كالتله امي : الله يساعدك يمه الله يحفظك ويحفظ كل ولدنا الغيارة ويخلص هالحرب على خير ويحميكم
– امين روحي بدلي بسرعة وتعاي
ركضت لميت كلشي وبدلت وطلعتله جان بلال وياه بالحوثية جايين
معناها ما راجع للبيت كبل جاي عليه
جانوا اثنينهم تعبانين لدرجة اثنينهم ما نطقوا ولا كلمة طول الطريق
وصلنا بلال للبيت وودخلنا اني وياه ، فات واني وراه باس راس ابوه وسلم على امه .. شاف الوجوه مكلبه
كال : خير اكو شي
حجه ابوه ؛ ماكو شي اصعد ارتاح ابني
– شبيج يمه ؟
– كلشي ما بيه شبيه بخير الخير يهلهل
– والله يمه تعبان وما مستعد اسمع مشاكل ولا هوسة ارتاح وعود هلهليلي بالخير التحجين بيه
-اصعد يمه اصعد
صعدنا فوك بدل وسبح وصلى المغرب ونام
اجيت يمه حضني ونمنا نومة اهل الكهف جن ما شايفين نوم
كعدنا ثاني يوم ب١١ كال : هي هي صلاة الصبح مو بس فاتت حتى قضاء صارت .. ادري ما حسيتي ما دك منبه
فتحت تك عين وكتله : هو انت العسكري وعين الذيب وما حسيت تريدني اني المطفية احس
ضحك وحط راسه على جتفي : احس بروحي مكسر فد مرة
– تعبان ونمت هواي تكسرت
جر روحه وشبكني : رايد اتنشط
ابتسمت وانكلبت على ظهري وفتحت عيونيصار نص جسمي جوا وهو نايم على بطنه وحاضني : مشتاقتلك حيل
– تعاي اعلمج الاشتياق شلون يصير
ضحكت و اتحاضنا .. ما ادري ليش احس بروحي طير واني يمه انسى همومي وانسى كلشي ويبقى بس هو بساحة افكاري
كام من عندي كال : بلا امر عليج اذا تكدرين تسويلي ريوك حيل جوعان
– تأمرني امر
تقرب وكال ( لا حشاج ما يتأمر عليج ظالم ) وباس كصتي وكام لحيلا
كتله : انتظر اسبح قبلك وانزل ما ارتاح بهالوضع وغسل الجمعة واح يخلص بصلاة الظهر
– ديلا استعجلي
ركضت غسلت وطلعت بسرعة بدون ما امشط نزلت جوا
المواعين هوسة كالعادة شي على شي تركت وحطيت الجاي ع النار وفضيتله الطاولة وسويتله اشكال والوان نزل هو سابح ومرتاح والتعب راح من جسمه
-شلون صرت هسه هم بعدك مكسر
غمزلي : اخذنا منشط بعد يا تعب يا تكسير
ضحكت وكعدت اتريك وياه
فاتت نجلا مدلغمة فتحت الثلاجة خذت منها دولكة ثلج وسدتها
حجه هو : لا سلام لا كلام شبيج نجلاء
حجت – خلينا الكلام المرتك
-احجي عدل لا اكوم افرك حلكج شصاير
عافته ومشت اندار وراه يباوع رجع باوع بوجهي : شصاير
– هواية اشياء اتهنى بريوكك وخلص واحجيلك
اكل لكمة وما اطمئن كام لامه فتح الباب وكاللها : يمه شصاير بالبيت واني مو هنا
تكله : اسأل مرتك التغلط عليه وتكلي انت مو محترمة وفد وحدة ما تخافين الله وهذا بيتي وغصبا ما عليكم وتشمر وتغلط علينا وتسبنا هاي تالي عمرنا تجي وحدة من الشارع تكول هذا بيت رجلي وانتم عايشين بخير رجلي
اني كاعد اسمع .. ما كمت من مكاني تركتهم
هو اتوجه لابوه .. ابوه كايله تعاركن وامك تعدت عليها ومرتك غلطت وعركة نسوان يا ابني ما تسوى واحد يتخارب من وراهن
كمت من المطبخ حتى اصعد لغرفتي
لكيت نجلاء وسرى ونبأ كاعدات بالهول
طلع هو وصرخ : غفررررررران
التفتتله : ها
صرخ : تعااااااي هنا بسررررعة
– اعتذر عندي قراية رايدة اصعد
اني كتله هيج لو هذا اتوجه عليه مثل الوحش يريد اكلني لزمني من جتف دشداشتي ويكلي : من اكلج تجين يعني تجييييين افتهمتيييييييي
– ومن اكولك اريد اصعد يعني اصعد اذا عندك حجي ويايه عندي غرفة نتفاهم بيها وتفتهم كلشي
جريت ملابسي من عنده وهو تخبل ….
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية صوت من المجهول)
