رواية صوت من المجهول الفصل الحادي والعشرون 21 بقلم زينب ماجد
رواية صوت من المجهول البارت الحادي والعشرون
رواية صوت من المجهول الجزء الحادي والعشرون
رواية صوت من المجهول الحلقة الحادية والعشرون
تركته وراي بقى يغلط ويشمر حجي والرياجيل واكفين بصفه ديساعدوه
دخلت الجامعة ورحت للنادي .. ردت كهوة حجه : شنو نوع الكهوة
– شنو الانواع الموجودة ؟
– اسبريسو كابتشينو موكا نسكافيه واكو هوت چوكليت
– اريد شي مر ما بيه حلاة
– اسبريسو
-اي
انطانياه شربته طعم كهوة سادة عادي بعد على شنو ديسميها اسبريسو تخيلت نفسي راح اشرب شي عمري مشاربته على هالأسم ..
اخذتها ورحت للمحاضرة كعدت ليكدام ما صعدت فوك وبقيت لازمة دفتر الملاحظات .. وحاطة جنطتي ع الكرسي الثاني ، اجا شاب حجه : اكو احد هنا
باوعته خفت من عنده شعره عالي ووشم على اصابع ادية ولابس حذاء بدون جواريب وبنطرونه طافر .. حجيت : اعتقد بنية حاطة جنطتها هنا راح تجي
بعدني مماخذة على هذا الاختلاط الجامعي
لو بنية جاية تكعد بس شاب وكرسي بصف كرسي ومحاضرة ساعتين ما راح اخذ راحتي بالكعدة .. كملت محاضرتي وطلعت للنادي .. هستوني كعدت .. صد بوجهي الولد اللي دعمت سيارته كاعد بالنادي
هذا طلع ويايا بالجامعة !
ولو شنو هالغباء العندي اذا مو بالجامعة شعنده يديخل سيارته بكارج الجامعة .. بس ما اجا على بالي هو جامعي ويايا ..
هو يخزر بيه وضايج ويشمر حجي
كتبت رقم ايوب كمت من مكاني وحجيت : اعتذر منك اخي العزيز اشكد يصير تصليح سيارتك خابر على هذا الرقم وان شاءلله ما يقصر
باوع عليه اخذ الرقم واندار لصديقه وهو يشكك الرقم ويكوله : ع القندرة انطيها
تنهدت صدك مو مال احترام شنو هالبشر هذا
اني صوجي كمت اعتذرت منه مال اروح هسه وارجع ادعمها مرة ثانية واجي .. تركته .. وطلعت من النادي ورحت اتمشى بالجامعة لحد ما صارت ب١١ حضرت محاضرتي الثانية وطلعت من الجامعة كلها …
توجهت للكراج ..
دا اريد اصعد بالسيارة جان اشوف السيارة مزلغة ومكتوب عليها ( كح..ة) اسغفرك ربي شنو هذا ! معقولة هالشيطان كاتب على السيارة !
ياربي شلون فار دمي شلون راح امشي بالسيارة هسه وهي مكتوب عليها هيج ! كمت ازلغ عليها بالمفاتيح لحد ما ضيعت الكلمة .. بس تأذت السيارة تزلغت تزلغ .. هسه ايوب يخبص الدنيا فوك راسي هسه يكلي كتلج لا تطلعين بيها شلون يربي هسه منين اجاني هالبشر هذا لا والله مو بشر شيطان
صعدت بالسيارة ومزاجي جان عكس الصبح تماما
شلون جنت مرتاحة وفرحانة وهسه الدنيا طالعة من عيني .. صفيت السيارة اباب البيت ودخلت .. اكو خطار عد بيت عيالي ..
دخلت من باب المطبخ خالتي واكفة كاعد دا تطبخ كلت : السلام عليكم
حجت : ما طلعت جامعة للثنتين وبعدج ما شرفتي ما تكولين وراج بيت وراج عالم الخطار كلهم براسي .. اصعدي بدلي وتعاي يلا بسررررعة
– ليش سرى اجتي ؟
– لا بعدها بالدوام ما اجتي روحي
تنهدت وطلعت الإنسان يتحمل كلشي الا انو ينظلم
طلعت من المطبخ عاقچة وجهي منا السيارة وتلكتني خالتي تصيح
اريد اصعد طلع ايوب : رجعتي
– اي
حجيت وصعدت
– تعاي
– شنو ايوب
– شبيج مدلغمة ؟
– السيارة
عقد حاجبه : دعمتيها مو
– لا ما دعمتها بس من طلعت ما اعرف منو مزلغ عليها
– مزلغ عليها شنو زالغتها لو احد زالغها
– ما ادري حسيت احد زالغها
– منو ؟
– ما ادري بس والله اني ما زلغتهت حيل ماخذة حذري بالسياقة
– اذا على زلغ سهلة فدوة .. بس على هاي مدلغمة
– لا تأخرت على فرضي خالتي منتظرتني
حجيتها وصعدت بدلت وصليت وخالتي لعبت لعب بالحجي عود الشغل كله عليها واني بالدوام .. بسرعة بالي رجع لايام هيفاء نفس الشي ما تغير شي
كملت ونزلت وهي تحجي : كمت اساعدها بالمطبخ وواكفة وياها
وهي تنتر وتزمخ .. دزيت ونصبوا السفرة للخطار ووكفت اكمل الجاي وصبيتلهم وهم كاعدين يتغدون انطيته لبلال .. حجه : يمعودة كاعد يتغدون يا جاي
– هاك يمعود
انطيته الصينية ورجعت اريد اخلص المواعين حتى اصعد ميته من التعب هو حجه : اها انا اغلامك يبوي كابين اليوم
عفته ومشيت للمطبخ.. دكت امي اخذت التليفون رديت عليها ووكفت ع السنك : ها يمة
– اسم الله الرحمن شبيج بتي
– ما بيه شي
– لعد شبيج عصبية
– جاية من الدوام تعبانة
– ها .. سمعتي باخيج النذل لو لا ؟
– منو ؟
– احمد طلع مشتري شقة ببسمايا
– ايييه ؟
– يكلي يمه مع احترامي الج بس اني هم حقي حالي حال علي وغيري اكعد وارتاح ابيت الوحدي
– هذا صدك يحجي لو يتشاقى
– يا يتشاقى يمه شبيج مشترين ومأثثين الشقة ومجهزين امورهم على داير مليم
-وشيريد ؟
– يكلي هاي الجمعة اشيل
-يشيل وحدة
-كلي تريدين تجين وياي هلا بيج اشيلج على راسي ما تريدين براحتج بعد بيت ابوي باقي الج
-باقي الج شنو ومنو يبقى يمج ؟
– والله يا يمة ذبني زماني وثكل عليكم
حجتها واختنكت
كتلها : ثكلتي شنو لو اعرف اطلك واكابلج والله ما اعوفج اذا اخوتي باعوج بروحي اشتريج لا تفكرين بيهم ولا تشيلين همهم …
– اني الما ارضى اهجم بيتج يبتي
– عاد من حوره شلون بيت دكعدي يمه
– لا يمه لا تحجين هالحجي ايوب خوش زلمة وحاويج صح مريض هالفترة وتعبتي حيل منه ومن خطار بس اصبري ما بعد الصبر الا الفرج
– الله كريم اني اخلص شغلي واخابرج
كملت المواعين ورحت كاعد اصعد هستوني حطيت رجلي ع الدرج صاح ايوب : غفراااان
تنهدت : ها ؟
– تعاي
اجيته حجه : راحو حتى بلال انزعي حجابج ارتاحي وحميلي هذا الجاي وصبيلي استكان
باوعت خالتي كاعدة ع السفرة مال الزلم تاكل وراهم وتفلس سمج اخذت الاستكاين ورحت حطيته ع النار وغسلت الاستكيان على ما صار الجاي صبيتله ورحت .. حجت خالتي : ما تكعدين تاكلين ما جوعانة
– شاكل وراهم
ايوب : ما بقى سمج
خالتي : كله نعمة شبيه متكبرة على نعمة الله
– الف الحمدلله والشكر بس ما اكدر
ايوب : هذا غداي ما اكلت منه كلش قليل اكعدي اكلي
– تعبانة اريد اصعد
خالتي : والسفرة ياهو اليلمها ابوي !؟
من حجت هيج جريت الماعون مال ايوب والتمن مالته وكعدت اكل بصحنه حجه ايوب : البنات وين لعد ؟
خالتي : نجلاء تعرف بحالها ما ضل الها حال بعد بتها وسرى بالجامعة
كاعد يحجون جان تطب سرى سلمت عليهم امها كالتلها : ابن الحلال بذكره بدلي وتعاي اتغدي
– لا حيل تعبانة ما بيه حيل
– سودة عليه هالبنية حتى ضعفانة كاضية من القهر شضال بيها
درت وجهي باوعت بوجه ايوب انتبهلي باوع
تنهدت ورجعت اكمل اكلي ..
اباوع الساعة ٤ الا شوية
واني ب٢ الا ربع رجعت كلبت الدنيا عليه .. ما طالبة منها شي غير تعاملني مثل بتها شنو هم بشر واني حيوان .. يعني لإن جنة واجبي اخذم خو لا الله ولا رسوله شرع هيج قوانين .. اني ارجع من الشغل افتر وبتها تصيح سودة عليه اثنينا بشر واثنينا جامعات !
كمت وشلت صحني وحطيت بيه خاشوكتي كتله : ايوب محتاج شي بعد راسي حيل كام يوجعني
– لا ابويه اخذي راحتج
خالتي : لمي السفرة وخضي المواعينات بس ذني ضلت وصعدي بعد محد يصيحج اخذي راحتج انت هم تعبانة
حجه ايوب : يمه سخري البنات وينهن
– يمه بغرفتهن شيصيحهن هن شينرادلهن عمي اني اشيلهن
دنكت بلا ما احجي كمت نزلت نظفت المواعين كلهن ولميت السفرة ورحت للمطبخ غسلتهن كلهن اني تعبت تعبت ضل على ذني اسويلي مشكلة ..
هو حس اجا وراي : تعبتي
انداريتله : اي والله بس دا افكر بأمي
– شبيها
خدرت جاي جديد واني اسولفله : احمد اخوي يريد يشيل
– يشيل !!! وين يشيل ! ؟
– ماخذ شقة ببسمايا
– وامج ؟
– يكللها تشيلين وياها هلا بيج ما تشيلين ابقى ابيت ابوي
– وحدها
– ما ادري ماما حيل مقهورة
صبيتله جاي اله والي وكعدت كباله اشرب وياه
حجه – تخبل هذا لو شنو اكو واحد يذب امه ولك والله مصيبة هاي ؟ وهسه شنو
– ما اعرف كتلها بعدين اخابرج ميخالف اروحلها اليوم ابات يمها
– لا باجر من الجامعة نزلي عليهم
– باجر ما عندي جامعة
– ليش ؟
خليت دوامي بتناسب ويا شغلي ٣ ايام جامعة و٣ ايام شغل
– اني اشوف لو تتركين الشغل بعد ما راح تكدرين شغل ودوام
– ليش !؟
– اشوفه هواي عليج وراح تتعبين ابقي بس دوام جامعة افضل
– بس اني حابة شغلي
– اشوفلج شغل احسن منه
– تخاف خالتي متقبل
– اني ما اخاف من احد كتلج لمصلحتج انت راح تتعبين
– عادي شو لا عندي طفل ولا شي وانت ما اقصر وياك
– لا عوفيها
– مو انت الخليتني بالشغل ! يعني دا تعاقبني الي
– اعاقبج ليش اني رايدج ترتاحين اهتم بدراستج واني انطيج فلوس شغلج
– وكت اللي اتعب اني اكولك ما اكدر
– لا عوفيها
– زين تكدر تكولي شنو السبب الحقيقي ولا تكولي اتعبين .. عوف السبب هذا لان اعرفه حجة
– اني وحدها وتحتاج احد وياها يساعدها
– ايوب ترا نجلاء موجودة ليش دا تشمرون الحمل بس عليه
– كل وحدة من خواتي خطار هنا تجي قسمتها وتروح والبيت يضل الج
– اي عود من يتزوجن ذاك الوكت نتفاهم واكعد
– لا عوفيها هسه ارتاحي هسه حصلتيلج كم فلس بالعطلة احسن من الكعدة هاهية ارتاحي جامعة وشغل
– اني كتلك جامعتي ٣ ايام و شغلي ٣ ايام يعني اعتبرها جامعة كل ايام الاسبوع لا تعتبره شغل
– عوفيها
– اي زيد زيد ما اوصيك ما ضل شي واهج انطيني الاستكان رجعلياه يلا
اخذت الاستكان من كدامه و شلت استكاني حطيتهم بالسنك وهو ظل يضحك اخذها بضحكة
بس اني اتنرفزت يكعدني حتى يخليني خدامه لامه وخواته كاعدات ليلهم ونهارهم بس موبايل .. صعدت فوك .. الحجي يفور براسي افكر اطلك واكعد ويا امي ابيت ابويه واخلص ! بس والله ما يخلوني لا امي ولا علي خو علي اذا يسمع علمود شغل مستعد شغل وجامعة يبطلني ويكسرني في سبيل ابقى يم رجلي ما ارجعلهم
اروح وارجع وافتر ..
رحت نزلت متمدد بالاستقبال حجيت .. كتله : ما دام ما عندي شغل كوم اخذني لاهلي
شال راسه : شبيج تخبلتي ؟
– لا تخبلت ولا شي بس مشتاقة لامي اريد اروحلها
– اي كتلج من الجامعة باجر وروحي
– ليش مو هسه !؟
– وشنو الفرق بين باجر واليوم
– ما ادري اسال نفسك
– مو تعبانة وراسج يوجعج
– ميخالف اريد اروح لامي ارتاح
– بابا مو حلو العناد روحي اصعدي وارتاحي
– ليش تعتبره عناد عليه مو عليك ليش مو انت مو هم معاند ! اني ما اشوف فرق بين اليوم وباجر
نفخ : استغفر الله ربي واتوب اليه
بقى يباوع بتليفونه .. بقيت كاعدة
يلا .. يتجاهل .. احجي وياك بس كلي شنو السبب
ما يرد ..
والله معليه اني اريد اروح
انداريت يم راسه كعدت : ايوب جاوب
– روحي ارتاحي بنيتي
– ما اريد اريد امي
– هسه اني مانعج منها دا اكلج باجر
– والله عاندت
– وانت هم عاندتي
– اي لان ما اشوف سبب يمنع صدك
– اعتبريني سبب واصعدي ابويه
– معناها ارجع للشغل
ما جاوب حجيت : انت تتعمد تسكت حتى تغثني
– هسه ليش اغثج وليش تغثيني اصعدي ارتاحي مو تعبانة
– لا مو تعبانة اريد اروح لامي
لا جاوب ولا اني كمت .. بقيت قافلة حيل ضايقني من يريد يكعدني حتى اساعد امه وخواته ما يحركن نفسهن .. لو كايلي اني محتاجج فلا افتح حلكي بس بذات اهله تكول بحر شتحط بيه يضيع
حطيت راسي على ايد القنفة اللي هو منتجي عليها .. وكمت اكله : يلا اريد اروح
وهو متجاهل .. اخذني لاهلي
ميرد .. نعست سكتت ضليت صافنة بابوه نايم المسكين شاهد على لغوتنا .. كمت اغفي وغطيت بالنوم واني على هالوضع .
فزيت عليه وهو يجر جرجف فوكاي
حجيت : ما اريد انام اريد اروح لاهلي
– ميخالف ادللي اصعدي ارتاحي ونامي فوك وعود بعدين اخذج
كمت من عنده .. ردت اصعد بس ما بيه حيل كمت تمددت ع القنفة ونمت
طلع شافني نايمة طفى المروحة لإن الجو صار بيه خيط برد والمروحة باردة من مشتغلة وحدها بالصالة
حسيت عليه طفى المروحة وكعد ع القنفة اللي يم راسي
كمت اتكلب حجه : ابويه ليش ما تصعدين ترتاحين وتنامين فوك
شلت راسي من القنفة باوعتله : اريد اشتري سيارة
صفن بوجهي : بابا بيج شي انت
– اي مو ما ترضى اصعد سيارتك اني اريد اشتري سيارة ما اروح فورتات لو تكاسي ما اريد اريد سيارة
– انت هاي سوالفج تتحلمين بيها وتكعدين تسولفيها لو شنو وضعج
– ابيع ذهبي واخلي امي تچملني واشتري سيارة
– لا اخذي سيارتي ما احتاجها اني اطلع بالحوثية
– واذا كلت اريدها ؟
– اخذها
– واني ابقى بدون سيارة لا ما اريد
– ام راسه لاعبة لعب بالسيارة مزلغتها ناعلة ابو ابوها وتتكلب كومي لا اكومج بجلاق امشي
– عفية حباب لا تبطلني من الشغل والله ما اشكي
– الله كريم دصعدي
باوعتله : يعني اشتغل
– لا
– ماشي
كمت صعدت فوك .. شوية وسمعت دا ديصع ع الدرج بس صعدت الدرج عنده صعبه لإن على رجل وحدة .. هميت من مكاني فتحت الباب حتى اروح اساعده .. شفته وصل اخر درجة مشى بعد ع العكازة واجا : ها شكو
– عبالي اساعدك طلع وصلت من تريد تصعد صيح عليه
– مشكورة
– ايوب اني مالي حق اجادلك ع الشغل .. ومتفضل عليه انت لما كاعد تدفع اقساط جامعتي ومخليني اداوم بس ايوب مدام تريدني اكعد وتطالبني هم لازم تحجي ويا امك
– لا تكولين امك
– خالتي
– عفية .. اي شحجي وياها
– يعني اكو محاظرات مرات عندي تطول او يصير فد تأخير واتأخر بالجامعة تكلب الدنيا على راسي بس شوفة عينك سرى ترجع وراية بساعتين متحجي بالعكس تشكي حالها تعبانة لعد اني مكاعد اتعب
– انت اذا تبقين تطالبيني بهيج امور راح تدخليني مطب ويا امي وخواتي ما يليق بيه يعني شوفة عينج حجيت وكتلها صخريها وما سخرتها ولا صاحت شمنتظرة مني اتعارك ويا امي علمود شغل النسوان يعني والله عيب اشوفها بحقي اني احتاريت بهاي التفاصيل البيناتجن عيب بحقي ادخل بيهن وبسوالف نسوان وبنفس الوكت اني ما اتحمل اشوفج انت تشتغلين وغيرج كاعد
من اكللها يمي كومي البنات
تكوم هي بمكانهن ما تسخرهن اذا اروح واحجي واصيح على خواتي هسه يكللي احنا وامنا واطلع كاعد اتحجج علمود ما اخي مرتي تشتغل بدال امي فد وضعية سخيفة كلش
– زين والحل
– الحل تخلصين شغلج بالليل كله واذا تكدرين تطبخين المرك من الليل وتضمي لثاني يوم علمود تكعد امي ماكو شغل خفافيف تمن زلاطة ومواعين تريد تكعد خواتي تريد هي تسويهن شغل النهار عليهم والليل عليج
– زين واذا كامت تصيح من اجي من الجامعة تعرفها خالتي تخبص الدنيا ع الشغل
– انت تجين من الجامعة كبل لغرفتج لحد الليل يلا تنزلين معليج الباقي اني اتصداله من تصيح اعرف شحجي ما طول انت مكملة شغلج من الليل ومأدية واجبج ما اقبل بالظلم اكو غيرج بالبيت خوما احاطج هنا خدمة بس اللي اريده تأدين العليج حتى من احجي ما كو حجاية تعلى فوك حجايتي بحجة ما تشتغل وبس كاعدة
– ماشي
– وهسه تعاي يمي
– لا بعدني ما ناسيتلك انت منعتني اروح لاهلي ومنعتني من الشغل
– تجين لو اكوم
– اني تعباااااانة اريد انااااام
– صارلج ساعة تلغين من توصلين يمي تعبانة
– اخ راسي يا يمه رجليه ااااااخ ظهري خل اروح انام لحد يكعدني
ضل يضحك اني رحت للجرباية جريت اللحاف اتلفلفت بيه وحطيت طرف جواي منا وطرف فيته وحطيته جواي من ورا ظهري وغطيت راسي صرت صاج مو بنية
هو كعد ع الجرباية يباوع ويضحك
احتريت اختنكت كالوا اتغير اجو مو التف باللحاف
طلعت راسي شفته كبالي صحت : ااخ اخ ظهري يمه مكاعد احركه
– من هاي الله حلل اثنين لان يدري ببعض نسوان ظهورهن ترفة ما تتحمل
رفعت حاجبي وباوعتله : هاااه هيج صار الحجي
– جا وين الواحد ينطي روحه ؟
– اي اتوكل لعد
انداريت وانطيته ظهري بس شو من صدك ضجت
اتحشر روحه يمي كتله : لا جديات اريد انام وخر
– هاي شبيج كلبتي خلقتج
– لا علويش ساعة اريدج تكعدين من الشغل حتى تساعدين امي ساعد الله حلل اربعة
– لا جذابة اني كلت اثنين ما كلت اربعة
– يعني ناوي وحاطها براسك
– غفران مبين دا اتشاقى صارلج ساعة تتشاقين وتلفين بروحج من اني احجي كلمة اتطنكرين
– اي اتشاقى منو لازمك لا اطنكر ولا شي
– دنداري يمي ..
– عوفني هسه ما بقى للصلاة ساعة ما بيه تعال اسبح وهاي مالي خلك
– تمام
سكت ما حجه واني بقيت على تليفوني لحد ما صارت الصلاة صليت ونزلت كملت شغلي وحطيت العشا ورحت اصعد لغرفتي بعد .. شفته كالب وجهه ويباوع ع الاخبار .. لبست شلحة وفليت شعري ورشيت عطر وحطيت حمرة سحرية لشفايفي وشوية على خدودي وطفيت الضوا كال : خير الساعة ب٩
– واني من ٧ كاعدة
– اي نامي شلي علاقة بيج
-مراح تنام ؟
-لا نامي
-زين ليش كاعد هنا متكوم ع السرير وباوع
-نامي ابويه معليج بيه وين ما يعجبني امدد واكعد تحاسبيني
-واني شلي علاقة بيك واحاسبك
تركته ورحت لفراشي خابرت ماما وكمت اسولف وياها شوية ولفيت راسي ونمت .. ثاني يوم مكعدت للدوام ما جان ابالي اداوم هو ندهني ب٨ فتحت عيني واكف فوكاي : ما تروحين جامعة ؟
-لا
-ليش
-كتلك خليت دوامي ٣ ايام
تركني ومشى .. طارت نومتي كعدت بعد .. بقيت بالنص ساعة بفراشي بعدين نزلت لكيت علي منتظره يريد يطلع كتله : وين رايح
– للشورجة ليش
– مو لازم اروح للشغل اليوم
– احنا شاتفقنا
– اي فجأة ابطل غير اروح استرخص منهم احجي وياهم وانهي وارجع عيب اتجاهلهم
– اني اخابرهم واتصرف
– ايوب المسؤلة تعرفني وتحترمني عيب اخليك انت تخابر وتنهي اروح اني اتفق وياها وانهي ..
– خو دكيتي رجل
– مدا افتهم انت ليش مكبرها !
– روحي وارجعي بسرعة
– راح تروح بالحوثية ؟
– اي
– لعد راح اخذ السيارة
– بعدني ما مصلح الزلغ مالتها مسويتها ما شاءالله لوحة بالتزليغ ماكو هيج زلغة بتاريخ السيارات
– متريد اروح بيها ما بلازم شهالمنة
– اخذيها بس ديري بالج عليها
حجاها وطلع اني كمت سويت الغدا رغم دنيا صبح وطفيته والبيت نظيف لحد ما صارت ب١٢ ونص بدلت وطلعت لشغلي
لما وصلت هناك سلمت ع المسؤلة كلت الها : رايدة احجي وياج بموضوع
-كولي حبيبتي
– اني رايدة اترك الشغل
– هاي شنو اليوم ثاني وحدة تترك
– ليش
– اعرف قل الشغل والطلاب بس انصحج نصيحة متتركين اسمائكم قدر الامكان راح نقدمها حتى نخليها ع الدولة
– يعني ممكن تتقدم اسمائنا ع الدولة ؟
– طبعا اني لو غيرج اكولج الله وياج بس لان اعرفج واعرف زوجج فدا انصحج
– شسوي بعد
– باعي اكو دورات رصد وتحليل بلبنان وراح نحط بعض الأسماء راح تفيدج هاي الدورة كلش وممكن بعد الدورة نقدم اسمج على اقسام الرصد الموجودة بالعراق ..
– ووين اكدر اروح للبنان اني
– لحظة بس اخابرلج
راحت للغرفة الثانية شوية واجتني كالتلي اكدر اخلي اسمج ع الدورة بتكاليف مدفوعة على حساب الجهة اللي احنا تابعين الها وما دام معرفج ابو عرب ميمانعون بسرعة يقبلون شنو رأيج
– والله ما ادري شكولج .. بس يقبل ابو عرب
– ابو عرب يعرفهم شوفي حاليا نكدر نكول حرب داعش خلصت والمرحلة الجاية اخطر من حرب داعش لهذا دا نهتمد بالامن السيبراني والرصد الالكتروني واكو دورات مكثفة كاعد يسووها بلبنان كون هم خبرتهم بهالمجال اقوى من عدنا كمقاومة فاذا استغليتي هالمجال صدكيني راح يفيدج حيل اني دا اقدملج نصيحة وكتلج لو غيرج اكولج الله وياج بس انت تختلفين
– الله يسلمج ميخالف احجي ويا الحجي اليوم واردلج خبر لباجر
– بس باجر اخر شي اذا ما انطيتني نقدم الاسماء وتتثبت بعد تروح عليج
– تمام
سلمت عليها .. وطلعت رجعت للبيت
حجت خالتي : جا رجلج مو كالج شغل بعد مننوع تخلينه يمشي واطلعين وراه
– لا كتله وكالي روحي
– يعني ما بطلتي من الشغل !؟
– ليش هو كالج بطلت !؟
رفعت حواجبها ودارت وجهه وانهدت ما ردت عليه ..
انتظرته لحد ما يجي تلكيته من الباب : اذتك رجلك
– لا شوية ، اصعدي بدلي يلا حتى علي يوصلج لاهلج
– لا ما اريد عوفها
– مو كتلتي نفسج على روحة اهلج
– شظل صار المغرب وباجر جامعة متسوى ..
– على راحتج ، عندج شي شو كأنما بوجهج حجي
– لا موضوع اريد اكولك بيه
– شنو هو
– مو هسه بالليل بس كاعد افكر بيه هواية اذا رفضت راح اضوج حيل
– غير اعرف شنو
– كمل واصعد ونحجي
بقى يم اهله شوية كاعد جوا .. ورجع صعدلي فوك
لكاني مبدلتله وناثرة الشعر ومرتبة وجهي والعطر يشع ..
حجه : ايوا ايوا لازم الموضوع حيل جايد حتى مسوية كل هالاجواء
– لا تكول هيج البارحة ما لبست وطلبتك وانت لبستني
– طلبتني شنو شهالمصطلح ؟
سكتت ضحك .. لازم طالب الموضوع عندج
– يا موضوع
ضل يضحك واخذني اله .. واخذ راحته
من بعدها كعدنا واني راسي على صدره … حجه : اي شنو الموضوع البكلبج ؟
– سولفتله اللي حجتلياه المسؤلة كال اعرف صاحبنا المسؤل عن هاي الدورة
– خلي احط اسمي حباب
– وتروحين للبنان وحدج !
– ويايا بنات
– لا وبيش تفيدج
– هي كالت كلش تفيدني هم سفرة وهم استفادة عليك الله
– لا عوفي هالموضوع
– ايوب حباب
– كلت لا
– ليش
مجاوبتي دلغمت وسكتت ..
حجه : اني بس اكوم على حيلي اخذج سفرة لكيش
– ما اريد شكرا
حجيتها وانداريت .. بس جنت بانية احلام اقنعه متخيلت هلكد راس يابس اصلا ما قبل ازيد حجي سكتني .. اختنكت .. كامت دموعي تجري
حجه : نهيتي وياها الشغل
مجاوبته .. صاح : مو احاجيج ؟
حجيت وصوتي بيه بجي : خابر انت وانهي كلشي
– لعد شنو روحتج اليوم !؟
غفران … ليش دا تبجين .. على سفرة
– اصلا عطلتي المرت هاي لا اتهنيت بيها لا شفت منها شي غير بس مصايب انت والطفل وابوك كلت راح اخلص من السادس اطلع اتنفس تالي لباب مطعم ما وصلت
-بويه بويه بويه هذا كله لان كلنا لا على سفرة لبنان
-ما اريد السفرة طفي التلفزيون وعوفني انطمر
– اني اخذج وعد
-ما اريد شكرا
بقيت دايرة عنه .. وقهرتي بكلبي
لثاني يوم الصبح كعدت للدوام وهو نايم دخلت الغرفة نشفت وبدلت هو كعد كال : يا ستار يا لطيف احد يكعد الصبح مبتسم انت مبوزة من الصبح شبيج
تركته ورحت للمرايا .. لفيت الربطة وعدلتها
حجه : رايح للهيئة لا تاخذين السيارة
انداريتله بسع : – وشلون اروح ؟
– هاي سمعتيها بساع جاوبتي
– ما بيه حيل اروح فورتات
– تكسي
– اني صاعدة تكسي اخاف ما اعرف اصعد تكسي انت روح تكسي وانطيني السيارة
– لا اروح تكسي شنو عيب زحمة ميصير وبعدين هاي مو سرى وياج دا تروح وتجي وحدها
– سرى هاي جامعتها قريبة ركبتين توصل اني بتلفات الدنيا ولو على شنو اذل نفسي على مود سيارة ما اريدها
– الله شكبرها اذل نفسي هسه طلعت اني الذالها ولاعب بيها لعب وج انتتتتتتت
اخذت عباتي وطلعت بس مدلغمة ..
وكفت تكسي بس ما اعرف اشرح .. اندل اروح الطريق مرة مرتين اروح بيه اندله .. بس مال اعرف الاماكن اسمها واشرح ما اعرف .. كال صعدي وهناك من نوصل المنطقة تدليني .. لما طلع السايق مشى اني اخذت صفنة ع الشباك .. لما اباوع وين مودني وشنو هاي الطرق ما دا افتهمها
ضل يسألني كتله : خوية بحياتي مجاية من هاي الشوارع انت منين جبتني
– اي خوية مو كلتي تندلين
– شندل اني ما جاية منا .. يا الله محاضرتي بعدلها نص ساعة
كام يلف ويدور بيا عكا ومكا .. دزيت رسالة لايوب كتبتله : ارتاح هاي صارلي ساعة ضايعة ويا السايق خلي السيارة تفيدك
دقايق واتصل : وين انت
– غير اعرف اني وين حتى اكول كله منك
– انطيني السايق
كام يدليه والسايق يكله اي خوية اندل اني كاعد اسال وان شالله نوصل
ضل ايوب وياه وياه لحد ما دخلني بشارع اعرفه .. نهيته من ايوب وكمت ادلي لحد ما وصلني للكلية .. رحت امشي شبه الركض حتى الحك
من بعيد شفت الشيطان الزلغ السيارة
درت سويت نفسي ما شايفته .. كمت امشي مدنكة وسريع ما احس الا انردم بواحد .. فزيت العفو
طلع هو : بالسياقة ثولة حتى بالمشي هم ثولة
– الاثول انت لان اني شفتك هناك بعيد هالسوالف التتعمدها عيب عليك اخي
– ها يعني لاحظتني من بعيد ولفتت انتباهج مو
تركته ومشيت متأخرة ع المحاضرة مع هذا دخلت بس روحي طالعة وعاقدة حواجبي .. كملت المحاضرة بطني تنلوي من الجوع .. طلعت للنادي بسرعة وكفت طلبت بيتزا صغيرة .. وكلاص جاي .. كتله شكد حسابي كال ٧ الاف
دنكت ادور بجنطتي على خردة الفين ويا الخمسة جان اسمع صوت يكله : حساب الست واصل يمي
رفعت راسي نفسه الشيطان ضليت اباوع يتبسملي
طلعت ٢٥ مصدة من الجنطة وانطيتها للكاشير كالي : الاخ دفع حسابج
– اعتذر ما اعرفه
انطيت الفلوس رجعلي الباقي .. كال : اتفضلي دقايق ويوصلج الطلب
– بس لتتاخر عفية جوعانة كلش
كعدت كدام طاولة صغيرة انتظر
الشيطان اتربع كبالي ع الطاولة الثانية
سويت نفسي ما منتبهتله .. بطني تلويني من الجوع
دك تليفوني باوعته ايوب .. رديت : الو
– مو اخابرج ليش متردين
– جنت بالمحاضرة
– ها وصلتي ؟
– اي
– وصيت علي اخوج يجيبج بالحوثية لا تجين وحدج
– اي
– بعدج مطنكرة
– ايوب الله يخليك عوفني من غيرها اليوم كله زفت
– ها ها بعدنا مطنكرين اسفين اسفين نترخص
سد الخط واللي ع الكاشير اشرلي اجي استلم الطلب
كمت جبت وجبتي واكل .. ماكو هيج بيتزا لاستيكة من كالي بيتزا ب٦ اتخيلتها راح الكاه متروسة جبن يكرم الله نفسها البيتزا التنباع بالتجهيزات بالسوك بالفين الجنها لحم بعجين بس ضايفله زيتون وجبن مطشر تحسبه بيدك كم نتفة جبناية حاط .. من الجوع كاعد اتجرعها مكدرت اجرع قطعتين كمت اشرب بالجاي
انجر الكرسي وكعد الشيطان ..
حجه : اول مرة تعاركنا ميخالف نفتح صفحة جديدة وبما انو ردت ادفع الحساب واعزمج اقبل انت تعزميني .. اسمي ساري طالب كلية ادارة واقتصاد مرحلة ثالثة واشتغل محاسب بشركة اهليه
دفعت البيتزا كدامه وكمت من مكاني وطلعت
رحت كعدت بالسنتر شوية لما صار موعد محاضرتي الثانية رحت دخلت ..
كملتها وخابرت على علي كال : ٥ دقايق اخابرج اگلج طلعي
– تمام
بقيت واكفة انتظر ..
اللي اسمه ساري واكف لهناك ويباوعلي ..
تركته وطلعت .. من الجامعة تبعني خابرني علي وهو اتصل شفت سيارته رفضته ومشيت فتحت الباب الخلفي مال السيارة وصعدت .. الجام مال السيارة مظلل كام يباوع وطول النظرة تحرك علي
حجه : ها شلونج
-زينة
-بعدج كالبح خلقتج
-علي رحمة لاهلك عوفني ترا واصلة ويايا لهنا
– دحجي عدل احجي عدل
حجيت: صف على اقرب مطعم جيبلي من عنده لفة ميتة من الجوع
– دكومي لج تأمرين عليه
– امر عليك شنو جوعانة حيل ما اتحمل لما اوصل للبيت
– واني مو خدامج حتى تكليلي صف
– اكلك ليش مبقيت ويا ايوب وخليت بلال يجيني ؟
– دحترمي نفسج لا امسح بيج الكاع والله
طنكرت بالزايد ودرت وجهي .. بطني تقرق والشارع ازدحام بالساعة واكفين وما تمشي السيارة ساعة ونص يلا وصلني يم بيت ايوب كتله : ليش ايوب مبلغك اروح لاهلي !؟
– اكلج انزلي لا ابتلي بيج كالي وصلها ما كتيلي اريد اروح لاهلي انزلي خل ارجع نوم ما نايم اني جاي من بسمايا لهنا حتى اوصل حضرتج وما راضية
نزلت من السيارة .. صفت سيارة ايوب ورانا
نزل بلال يساعد ايوب يدخل اني مدلغمة باوعتله وتركته ودخلت اسمعه يكول لعلي : شبيها
صعدت كبل بدلت ورحت اتوضى ..
كام يصيح عليه كملت صلاتي ونزلت حجه : شبيج انت وعلي
– انت مكايله توديني لاهلي جان كلتيله ليش هالعصبية
– يا عصبية متت من الجوع اكوله صف على مطعم اشتري يصيح عليه يكلي شنو اني اشتغل عندج اكوله متت من الجوع يا تشتغل بس صف وصار ساعة ونص بالطريق ما كلف نفسه ووكفلي على مطعم يشتريلي يستنكف
ضالة اني من ايد فلان لايد علان
– منو فلان ومنو علان ؟
– منو فلان ومنو علان التقصديهم
عفته وكمت للطباخ .. انتبهت الطباخ فارغ اصلا ماكو طبخ
فتحت الثلاجة .. فارغة بيها بس كيمر كالة وطماطة وحدة معنفصة
– ما عدنا مسواك ؟
– شمدريني اذا ماكو ليش متكولون
سديت باب الثلاجة بس دموعي كامت تلالي بعيني
ايوب يباوع بوجهي وكاعد ولازم عكازته .. دخل علي صاح : حجي
– فتحي الباب خلي علي يجي منا
فتحتله الباب مال المطبخ كاله : حجي بعد محتاج شي لو اروح
– بس اخذ جيب دجاجة مشوية وخبز وبعد شتريدين ؟
– ما اريد شي
– جيبلها لبن .. وبعدين لحظة خوية رحمة الوالديك بنية لازكة بطنها من الجوع طلبت منك تصف على مطعم تشتريلها ليش ما مشتريلها اذا تستنكف توصل اختك وتحسب روحك تشتغل عدها كلي حتى ادز بلال بدالك
– لا والله حجي بس هي ادب سز تأمر من تحجي متحترم
حجيت : والله ما امرت بس كتلك صف عند اقرب مطعم اشتري
– انت شنو تشتكيني
حجه ايوب : علي ترا غفران زوجتي واني وصيتك بيها وهذا مو رجاء هذا شغلك اني ما كاعد اكلفكم واكثر الايام ما اشغلكم واخليكم تاخذون راحتكم من وديتك انت رايح بشغل خوية ما رايح لاختك المفروض تحترمني
– ان شاءالله حجي تأمر
انطاه فلوس حتى يروح يجيب غدا ..
حجه : هسه مطنكرة ليش غير افتهم
– ما بيه شي
حجيتها ودمعت .. ارتكز على عكازته وكال : انت تعرفين اني دموعج ما اتحملهم شنو اللي تريدي امري
– ما اريد شي
تعاي كعدي كعدت كدامه بس مقهورة وتعبانة ونفسيتي صفر
لزم ايدي : لج بابا ليش كل هالحزن بهالعيون غير افتهم
– ما بيه شي ايوب
حجه : هاي كله علمود السفرة !؟
سكتت ، حجه : شلون اقبل تروحين وحدج ؟ غفران انت صغيرة اني بالسيارة اتندمت بكد شعر راسي علمتج اخاف اتطلعين بالسيارة بخصوصا بسيارتي تجيبلج عين وانت بهالعمر والله اخاف عليج
ما حجيت ، حجه : زين خلي تخلي اسمج بس بشرط
باوعتله : شنو الشرط
– اني وياج نسافر سوية
– شلون تسافر وانت بهذا وضعك
– بعد شسوي !؟ ما اتحمل اشوفج مقهورة وحقج اني لا بعرسج طلعتج جان المفروض اخذج لكيش وما طلعتج وبعطلتج انصابيت واتأذيتي ووكع الحاهل واني هم اذيتج حيل بمرضي
– يعني موافق نروح
– اي حطي اسمج بالدورة واني افيز واحجز ونروح اني وياج
من كالها .. يا يابه طير واخذ روحي من الفرح وطار بيها
كمت من مكاني بسرعة وحظنته واني اكوله : شكررررررا
– ادللي بعد شعندي غيرج احبل اجيب بس لا تنقهرين ابويه انت .
بست بخده ووخرت جان اباوع نجلاء واكفة
وخرت من عنده
حجت : صارلي شهر ونص حارمني من بتي ومخلي دمعتي على خدي وما همك ولا سألت عني وكاعد تتوسل وتطلب رضاها وصايرلها خادم طول وعرض وهوسة وحرس وسواق وخابص روحك علينا وتالي وحدة بكد النعال تمشيك بكيفهااااااا
وتصيح وتكله : والله فلا اخليكم تتهنون واصبرووووولي لا ما اطلع حقي من عيوووووونكم
لزمت كلاص ع الكاونتر اني عبالي راح تشمره بالحايط
شو هاي الزمي وضربي بوجهييي فزيت …..
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية صوت من المجهول)
