رواية صمام الأمان الفصل الأول 1 بقلم أمل عبد الرازق
رواية صمام الأمان الجزء الأول
رواية صمام الأمان البارت الأول
رواية صمام الأمان الحلقة الأولى
هاله: بطل تمشي ورايا وتضايقني وإلا هصوت وألم عليك الناس
– فارس: وماله أنا عايزك ترقعي بالصوت وهقولهم خطيبتي زعلانه مني وبحاول اراضيها
– هاله: كان يوم مالوش ملامح لما اتخطبتلك، ربنا يسامحه ابويا هو اللي بلاني بيك، دا انت لازق بطريقة مستفزة، فين كرامتك اسأل عليها لأنها بتبكي في الزاويه
– فارس: في الحب مافيش كرامه يا لولو، لو مكنتش أنا استحملك مين هيستحمل لسانك الطويل غيري
– هاله: لو آخر واحد في الدنيا مش هتجوزك يا فارس، يلا بقى متعطلنيش
– فارس: لسه بردو بتدوري على شغل مع المعاتيه اصحابك، يا بت دا انا هتجوزك واستتك وهخليكي هانم
– هاله: لا يا اخويا أنا هاله مش عايزه ابقى هانم واصحابي مش معاتيه مافيش معتوه غيرك في البلد كلها، خلاص يا فارس إحنا عاقلين ودكاتره زي بعض حتى لو انت دكتور بهايم بس دكتور بالرغم ان في دكاتره بيطرين كويسين أوي بس معرفش انت دماغك فيها إيه، حوار إنك عايز تتجوزني وبتحبني مش هيدخل عليا، أنا اتخطبت ليك بالغصب وابويا تعب بسبب رفضي، لكن انا فاهمه دماغك وعارفه ان أبوك العمدة عايز الكام قراط اللي عندنا وطمعانين فينا ومش مكفيكم اللي عندكم دا انتو واكلين حق البلد كلها، عمري ما اتجوز واحد ظالم وبياكل حق الغلابه
– فارس: أوهام معيشه نفسك فيها يا حبي، ولا اقولك انتِ صح شوفي بقى هتثبتي ازاي، أبوكي رايح جاي يوزع جوابات الفرح ويقول هتشرفونا في فرح الدكتوره هاله والدكتور فارس ابن العمدة
– هاله: واطي يا فارس
– فارس: كلها يومين ونكتب الكتاب وهدفعك تمن الكلمة دِ
هاله: مش هيحصل وهتشوف يا فارس، يلا معطلكش
– فارس: هو دا النوع اللي بحبه اصل أنا بعشق التحدي، متتأخريش عن الساعة ٤ العصر يا أم السباعي
هاله: سبع لما ياكلك يا بعيد
– فارس: لسانك طويل بس قمررر، بردو هسمي الواد على اسم ابويا وهسمي الشحات على اسم جدي
– هاله: إلهي يشحتوا عليك يا شيخ، توكتوووووك
– فارس: ابقي وريني هتتقبلي ازاي دا انا موزع صورتك على المستشفيات كلها وقايلهم عندها صعار وجرب
– هاله: إلهي يا فارس يا ابن السباعي يا الشحات يبليك بداء الكلب ويكون اجرب، خدني يسطا في أي حته بعيد عن الراجل دا لأنه عبيط، اقولك اخطفني وريحني
– سيد: اهدي بس يا دكتوره، عمل إيه تاني مضايقك
– هاله: هو انت يا عمي سيد، معلش نصيبك معايا دايما وأنا متعصبه
– سيد: يا بنتي افرحي دا انتي عروسه، وألف واحدة تتمنى الجوازة دي
– هاله: دي جنازة مش جوازه، أخلص من البلوه دي ازاي يا ربي ، اكشفه على حقيقته ل أبويا ازاي مش مصدق حاجه عليه، نفسي أهرب بس مش قادره اكسر نفس ابويا قدام الناس، بس بيظلمني بالجوازة دي، أنا هدفع تمن شراكتهم سوا واتجوز واحد مش بيطقه
– سيد: استهدي بس بالله وادعي ربنا وربنا ان شاء الله هيكتبلك الخير كله ، انتِ طيبة ومحترمه وربنا هيكرمك، معاذ إبني دايما بيمدح في أخلاقك، هو كان معاكي في الكلية بس أكبر منك ب ٣ سنين واشتغل دلوقتي في المستوصف اللي في البلد وبيروح مستوصف تاني مشهور كدا في حتة اسمها المعادي
هاله: مش فاكراه والله يا عم سيد، بس حضرتك ونعم الأب، ربنا يباركلك في اولادك، معلش توصلني للكافتيريا اللي في أول البلد
_______
– ريم: يا بنتي اهدي اتوترنا معاكِ مش عارفين نفكر
– هاله: بقولك الفرح آخر الاسبوع، مش متخيلة نفسي معاه في بيت واحد، دا انا طلعت عينه يا نهار ابيض هينتقم مني، أنا مش بطيقه يا بنات أعمل إيه
– ساره: انا بجد شيفاه كويس خالص وشكله طيب جدا ومالوش في العك بتاع والده
– هاله: نقطينا بسكاتك و انتِ عايشه على المريخ كدا
– ريم: أنا جتلي فكرة إنما إيه هتجيب من الآخر
– هاله: انجديني الله يسترك، أنا بقول بردو ماليش غير البت ريم حبيبتي
– ريم: انتِ هتنامي عادي جدا الليلة، وتصحي من النوم تاخدي حباية منوم فهُما هيصحوكي اعملي نفسك مغمى عليكي وهجيبلك البتاعة اللي بيحطوها في بوقهم اللي فيها لون أحمر دي وأول ما تصحي اضغطي عليها بضرسك واعملي نفسك بتستفرغي، وأنا هسبقك على المستشفى واظبط مع الدكتور اللي هناك
– هاله: فكره جامده جدا
– ساره: استني عندك منك ليها رايحين فين
هاله: رايحين نشتري العدة عشان ننفذ الخطة
– ساره: دكتور مين اللي هتقنعوه بالهبل دا، وهتقنعوه ب إيه أصلا، يا جماعه عايزين نكون واقعيين، انا متوترة وخايفه ننكشف
ريم: يا ساره ما انتِ دايما متوترة إيه الجديد يعني، أنا وانتِ هنروح للدكتور اللي هيكون مداوم وقتها ونقوله اللي بيحصل ونخليه يقولهم يأجلو الفرح شهر كمان أو يقولهم تعبانه جدا نفسيا أي حاجه تعطل الفرح، مينفعش نسيبها كدا
– ساره: أنا عملت اللي عليا وحذرتكم وربنا يستر
_______
في فله في المعادي
– حمدي: أنا مبقتش قادر استحمل قرف ابنك، عملية تافهه زي عملية الزايده كان هيخلص على المريض لولا ان الدكتور اللي معاه لحقه، بحاول أنفخ فيه مافيش فايده، بيتصرمح ليل نهار ومش نافع، سافرته يتعلم برا مافيش فايده، خليته يروح مكاني يخلص صفقات أدوية بيخسرنني ،اعمل فيه إيه
زيزي: ابنك دماغه ناشفه بلاش تتعامل معاه كدا مش هيسمع الكلام
– حمدي: بقولك إيه أنا تعبت وجبت أخري، عاجبك حاله يعني، دلعناه لحد ما باظ خالص وبقى لا يُعتمد عليه كل اللي شاغل دماغه الفشخرة والفسح والبنت اللي سارحه بيه ومصدق إنها بتحبه وهي بنت طمعانه فيه مش أكتر
– زيزي: بوسي دي طيبة وشيك خالص، مش محتاجين اصلا عشان يطمعوا فينا، أبوها رجل أعمال معروف جدا وبتلبس من أعلى الماركات
– حمدي: أنا عارف حاتم طالع لمين ما هو مش هيجيبه من برا، بوسي أبوها مديون للبنوك وواقع وطمعانين فينا ،هما بس بيحبوا الفشخرة عشان يضحكوا بيها على اللي زيك ، حاتم علاجه عندي وأنا هعلمه الأدب
زيزي: حاتم لسه صغير بالراحة عليه يا حمدي
– حمدي: صغير مين دا عنده ٢٨ سنه، أنا عايزك حاطه ايدك في الميه البارده كدا لحد ما هو يضيع ويتنصب عليه ويفضل يجيب هدايا لبوسي ، لو مش هتفوقي يا زيزي أنا هطلقك
_______
– معاذ: أنا متفهم كل اللي بتقوليه يا دكتوره ريم، بس صدقيني صعب جدًا اعمل كدا، وبعدين واضحه أوي إنها بتتحجج عشان متمكلش في الخطوبة دي
– ريم: حضرتك مش تايه عننا يا دكتور، حرام هاله تروح عند ناس زي دول عشان ترضي ابوها وأخوها، هاله خايفه أوي ولوحدها وحتى والدتها مش عارفه تعملها حاجه، هي اكيد لما تتعب هيجروا بيها على المستشفى وأنا عرفت ان حضرتك اللي هتكون موجود وحمدت ربنا وقولت ان شاء الله هتساعدنا غيرك كان هيفتن علينا
– معاذ: أنا مش عارف اقولك ايه يا دكتوره ريم، أنا معرفش اكذب دا ضد المهنة والدين
– ساره: حضرتك مش هتكذب، حضرتك هتقول ان نفسيتها تعبانه وواضح إنها خايفه من حاجه ولو فضلت كدا حالتها هتتدهور
معاذ: ان شاء الله خير يا دكاتره، اه صح في مستشفى خاص عايزه دكاتره وأهو تشتغلو بمرتب أحسن من اللي هنا
– ريم: فين دي يا دكتور الله يباركلك، دا إحنا رجلينا دابت من اللف
– معاذ: المستشفى في المعادي بتاعت الدكتور حمدي المصري اكيد سمعتوا عنه اسمها مستشفى الرحمة وبجد حاجه جميلة وعايزين دكاترة في تخصصات مختلفة، بس مش عارف هتروحوا إزاي بقى وهتقنعوا أهلكم إزاي
– ريم: إحنا عندنا مبدأ مافيش واحده هتشتغل من غير التانيه ومافيش حاجه هتفرقنا عن بعض، فلازم نكون سوا إحنا التلاته
– معاذ: الفرع دا لسه جديد وعايزين أطباء ممكن تروحو تقدموا وربنا معاكم
– ريم: هنروح ان شاء الله
– ساره: هنروح فين بطلي هبل يا ريم، أنا أخاف اقول ل أهلي حاجه زي كدا مستحيل يوافقو
– ريم: يا دي خوفك يا ساره، أنا هقنعهم لو عرفت اقنع أهلي اصل امك صاحبتي أوي، بس مشكلتنا في هاله دلوقتي
– معاذ: لو على هاله متشلوش همها حلها عندي ان شاء الله
– ساره: إزاي بقى
– معاذ: لأ إزاي دي سيبوها عليا بكرا
________
اليوم الثاني
– ورده: إلحقني يا محسن بنتك قاطعه النفس ومش بتصحى
– محسن: انتِ بتقولي إيه يا ورده مالها هاله
– ورده: انت لسه هتسأل، تعالى شوف البت بسررعه
– محسن: بت يا هاله ردي عليا، يا حبيبة أبوكي متخوفنيش عليكي، يا هاله يا حبيبتي فيكي إيه
– ورده: إلحق البت بتستفرغ دم على آخرها
– محسن: ما انا شايف حد قالك ان أنا أعمى، اسكتي عشان برن على فارس يجي يلحقها
– هاله: اااااااااااااااااااه يا بطني، إلحقيني يا ماما أنا خلاص روحي هتطلع
– ورده: يا قلب أمك بعد الشر عنك، بلاش فارس سيرته بتتبعها وبعديندا دكتور بهايم، اسندها معايا وخلي السواق يوصلنا بسرعه مافيش وقت
_______
– فارس: أنا حاسس ان دي تمثيلية بنتك عملاها يا عمي عشان تخرب الجوازة
– محسن: بقولك البت دمها كان بيتصفى، لو كانت عايزه تمثل كانت مثلت من بدري ، لكن يا حبيبة ابوها دي تعبانه اوي
– فارس: بنتك تعمل أي حاجه، دلوقتي الدكتور يطلع وهيأكدلك كلامي، والفرح في ميعاده لو حصل إيه
– محسن: أنا مكنتش عارف انك بارد كدا، بقولك البت تعبانه وكانت بتصرخ على آخرها وأصلا كان مغمى عليها وغرقت السرير دم و انت تقولي فرح، انا غلطان إني رنيت عليك أصلا
– فارس: لأ يا عمي مش قصدي ابدا، دا أنا خايف عليها ونفسي تكون بخير وفرحتنا تكمل بس
______
– معاذ: تعالوا يا جماعه اتفضلوا أنا فحصتها خلاص
– ورده: خير يا دكتور بنتي مالها الله لا يسيئك
– معاذ: بنتكم بقالها فترة بتاخد مهدئات ووضعها صعب، وكانت واخده كمية حبوب عشان تنهي على حياتها ولو كنتو اتأخرتو لحظة كمان كانت راحت فيها وكان زمانكم بتطلعوا شهادة الوفاة، لازم تبعد عن الزعل وتتعالج في مستشفى خاصه لأن هنا مافيش امكانيات، هكتبلكم جواب تحويل لمستشفى في المعادي لازم تروحوها عشان تعمل غسيل معدة دا غير إنها جالها هلاوس وبتخترف ولازم تتعرض على طبيب نفسي، بجد حرام واحدة في سنها يحصل معاها كدا، ارجوكم ساعدوا بنتكم قبل ما تروح منكم الموضوع ممكن يوصل للجنون
– هاله: الدكتور العبيط دا بيقول إيه، الموضوع كبر كدا ليه، منك لله يا فارس أنا لازم اخلص عليك، أنا مش مجنونه أنا عاقله، محدش يمسكني أنا لازم اخلص عليه
– ورده: جننت بنتي منك لله، أنا مش هجوز بنتي ليك، اهدي يا ضنايا محدش هيبعدك عن حضني
– معاذ: واضح ان المشكلة فيك، من فضلك اطلع برا المريضة جالها انهيار بسببك
– فارس: دي مش مريضة دي قردة وبتمثل عليكم محدش فاهم دماغها غيري ، الفرح في ميعاده يا عمي وإلا انت عارف أنا هعمل ايه
– محسن: أنا معنديش بنات للجواز، شوف يا دكتور المستشفى دي فين بالظبط وأنا أوديها، انا مش مستعد أخسر بنتي وتخرب الجوازه فداها
– هاله: ناولووووني رقبته أخلص عليه
– فارس: متحاوليش أنا فاهمك كويس أوي ، والفرح آخر الأسبوع
– هاله قالت بصراخ: بطننني ،ااااااه يا بطني، حد يلحقني
فارس: هكتب عليها وهسافر بيها اعالجها، شكلنا هيكون قدام الناس وهتفضح بنتك، مش مشكلة الفرح نأجله دلوقتي بس تبقى مراتي
– معاذ: من فضلكم اطلعوا برا حالا المريضة جالها انهيار ودا بجد مش هزار، حرام اللي بتعملوه فيها دا
________
– ريم: يا ماما دي الفرصة الوحيدة عشان اثبت نفسي، ارجوكي وافقي متقلقيش عليا، هاخد شقة أنا واصحابي وهنشتغل وهنطلع من الفقر اللي عايشين فيه وهنسدد كل الفلوس اللي علينا من جهاز اختي
– سعديه: يا بنتي خايفه عليكي، دول عالم و احنا عالم، أنا عايزاكي تعيشي مرتاحة ومتتبهدليش وان شاء الله ربنا هيكرمنا، العمدة وافق يشتري الأرض وهنجهز اختك التانيه خلاص فرحها قرب وإحنا معملناش حاجه
– ريم: دا هيشتريها برخص التراب، مستحيل نبيعها ليه على الأقل بيطلع منها محصول نبيعه ونسد بيه أي حاجه، ان شاء الله ربنا هيكرمنا اطمني
سعديه: يا بنتي اخواتك اللي أصغر منك اتجوزا و انتِ الكبيرة وخلاص القطر هيفوتك، مينفعش تفضلي مسترجلة كدا هتتعبي في الحياة، عايزاكي تلبسي وتحطي أحمر على شفايفك وخدودك عشان يجيلك عدلك
– ريم: لو عدلي هيجي بالطريقة دي مش عايزاه يا ماما، انا اتعلمت وتعبت واشتغلت كتير بعد وفاة بابا وما صدقت اتخرج عشان اشتغل بوظيفتي، طلعت عيني واتمرمت وخلاص جتلي الفرصة ابوس إيدك أنا عمري ما طلبت منك حاجه ودي أول مرة اجبري بخاطري ووافقي
________
– رضا: أنا موافق يا ساره عشان عايزك تجمدي شويه وتبطلي الخوف والتردد اللي انتِ فيه دا، إحنا أقرب للمعادي من اصحابك، وهاخدلكم شقة كويسه هناك كدعم وتشجيع مني ليكم
– ساره: ربنا ما يحرمني منك ابدا يا بابا، أنا كنت مترددة ومش عارفه افاتحك في الموضوع إزاي
– رضا: أنا جنبك وفي ضهرك يا حبيبتي متقلقيش من حاجه، أهم حاجه ترفعي راسي، إنك تغيري نفسك للأحسن، عايزك تثبتي نفسك وتكوني طبيبة شاطره، وصحباتك واضح انهم بنات محترمة ومتربين كويس وكانت الكلية وش الخير عليكي عشان تعرفيهم وياخدوا بإيدك، قوليلي صحيح هاله عملت إيه
ساره: ادعيلي وادعيلها يا بابا وضعها صعب وإحنا اصلا مش عارفين هناخدها معانا إزاي، هقوم اقنع ماما وربنا يتولاني
________
– منصور: فضلتي تقولي خلاص هو على تكه يا دادي وهيجي يبوس الأيادي ولا جه ولا شوفنا وشه
– سوزي: ابوه اللي عامل المشكلة ومش موافق على ارتباطنا، بس حاتم زي الخاتم في صباعي متقلقش خالص، كلها أيام ويجي و انت تتشرط عليهم براحتك
– منصور: البنك هيحط إيده على الشركة، أنا بغرق يا سوزي و انتِ أملي الوحيد
سوزي: اطمن يا دادي مستحيل اسيبك تخسر وأنا هساعدك تاخد كل حاجه من اللي اسمه حمدي وابنه الغبي اللي اسمه حاتم
________
_ معاذ: آنسه هاله اهدي انا عارف كل حاجه مافيش داعي لصراخك دا
– هاله: إلحقني يا دكتور أنا بجد مش قادره استحمل الألم إللي في بطني ودا مش تمثيل
– معاذ: هحطلك مسكن في المحلول وان شاء الله هتكوني كويسه
– هاله: زقازيق ومرض نفسي إيه، انت بتجود ليه من عندك، حضرتك تقولهم ان الموضوع عبارة عن تعب نفسي ونفشكل الجوازة وخلاص
– معاذ: وأنا داخل الاوضة سمعت خطيبك بيكلم حد في الموبايل وبيقوله لازم نخلص على ابوها واخوها بعد الفرح وهمضيها على تنازل عن كل حاجه بس انت اجهز عشان عايز الموضوع يخلص خلال ٢٤ ساعة، وهي بقى حسابها معايا وهكسر رقبتها وهتكون خدامه عندنا
– هاله: انت بتقول إيه، الكلام دا لو حقيقي يبقى مصيبة وحلت على دماغنا
– معاذ: لازم تبعدي عن هنا بسرعة يا دكتوره هاله، والمستشفى مش في الزقازيق بس دا اللي جه في بالي
– هاله: لازم أهلي يعرفوا الحقيقة بس محدش هيصدقني هيفكروا ان أنا بقول كدا عشان مش عايزاه، وبعدين انت بتساعدني ليه
– معاذ: عشان بحبك ومش قادر على بُعدك وهاخدك في مكان مافيش حد يعرف يوصلك فيه
– هاله: يا خيبتك يا هاله، يا دي الشيلة ويا دي الحطة روحنا على جمل وجينا على بطه، بقى أثق فيك تلعب بيا، هتلاقيها من فارس ولا معاذ يا بنت محسن، دا أنا كان كل طموحي ألبس البالطو الأبيض وأعيش في جزيرة أأكل فيها كتاكيت مش عايزه اعرف بني آدمين تاني يا رب
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية صمام الأمان)
