رواية صرخات أنثى الفصل الثالث عشر 13 بقلم آية محمد رفعت

رواية صرخات أنثى الفصل الثالث عشر 13 بقلم آية محمد رفعت

رواية صرخات أنثى الجزء الثالث عشر

رواية صرخات أنثى البارت الثالث عشر

رواية صرخات أنثى الحلقة الثالثة عشر

تجمعت الدهشة والريبة لتشكل على معالم علي بحرافيةٍ، وبالرغم من محاولات أحمد ببث الأطمئنان إليه الا أنه لم يكن بذلك أبدًا، فما أن توقفت سيارته قبالة العمارة حتى قال قبل هبوط الجميع:
_فريدة هانم من فضلك يا ريت تتعاملي مع فطيمة بحذر، فطيمة مريضة نفسيًا يعني ده هيدمر اللي وصلتله بحالتها.
حدجته من تجلس بالخلف جوار مايا وشمس بنظرة قاتلة، ورددت باستهزاء:
_والله؟ ولما هي مبقتش كويسة خرجتها من المستشفى ليه يا دكتور!
تنحنح أحمد الجالس بالأمام جوار علي:
_فريدة، وبعدين؟!
ادعت برودها ووداعة ملامحها وهي تجيب:
_أيه اللي قولته غلط يا أحمد! المكان الطبيعي للمرضى النفسين هو المستشفى!
أغلق علي عينيه بقوةٍ وهو يحاول التماسك، لا يريد نزع تلك الليلة، وخاصة بأنه لن يترك فطيمة تجلس بمفردها، سيصطحبها للمنزل حتى موعد الزفاف، فوجد شمس تمسد على كتفه وهي تمنحه رسالة مبطنه لقلقه بعدم تمكنه من الصعود برفقتهم الآن:
_متقلقش يا علي هنتعامل معاها بحرص، وأنا ومايا مش هسيبها خالص لحد ما ترجع بليل.
أكدت له مايا وهي تتابع نظرات فريدة المشتعلة على ابنتها:
_احنا أساسـًا يدوب ننزل عشان نشتري الفستان ونجهز فطيمة.
ضيقت عينيها بدهشة:
_تخرجوا فين؟
ردت شمس بتوتر:
_هناخد فطيمة نجبلها فستان لكتب الكتاب.
زوت شفتيها بسخرية:
_والله! طب تمام يلا عشان منتأخرش.
جحظت أعين مايا وتبادلت النظرات مع شمس وعلي وهي تتساءل:
_هو حضرتك هتيجي معانا؟
أغلقت زر جاكيتها الأسود الشبيهة للتنورة السوداء وقميصها الأسود الأنيق من أسفل الجاكيت الثمين، قائلة:
_عندك اعتراض يا مايا؟
هزت رأسها نافية وبالكد قالت:
_لا طبعًا أنا بسأل بس.
فتحت شمس باب السيارة وهبطت لتلحق بها فريدة ومايسان، بينما ظل أحمد جوار علي، ليشير له:
_يلا يا علي إطلع على المحامي نرتب معاه الأوراق عشان منتاخرش.
زادت صدمة علي، فصاح بعدم تصديق:
_عمي حضرتك جاي معايا؟
هز رأسه مؤكدًا، فقال الاخير:
_لا طبعًا، متقوليش إنك هتسيب فريدة هانم مع فطيمة لوحدها، محدش هيقدر عليها غيرك إنت!
ضحك أحمد بشدة وردد:
_إنت قاريني غلط يا علي، فريدة أمك مش بترضخ لحد هي ممكن تكون بتتفادى رغيي فبتعمل اللي بطلبه عشان أبطل أتكلم بالموضوع، لكن في حقيقة الأمر فريدة هانم مفيش شيء بيردعها عن اللي في دماغها.
وهمس بصوتٍ ظنه غير مسموع لعلي:
_لو كنت قدرت عليها يمكن ده مكنش حالي!
ابتسم بسخطٍ تمكن من إخفائه، وقال محاولًا تصنع جديته:
_عمي أنا مش هقدر أمشي من هنا وأنا قلقان عليها، وجودك على الأقل هيطمني.
وتابع بحزنٍ تغلب عليه:
_فطيمة أقل شيء بيخلي حالتها تسوء أكتر من فضلك حاول تمنع ماما إنها تضايقها.
شفق عليه وعلى القدر الذي وضعه باختبار سيكون من الصعب عليه تجاوزه، كان يعلم منذ أشهر بأنه علي قد سقط بداء العشق، فلم يكن بذاك الطبيب الذي يفشي أسرار عمله عن مرضاه أبدًا، ولكن من كثرة تفكيره بفطيمة وما يخصها كان يشعر تجاهها وإنها من أولويات حياته، وكأنها أحد أفراد عائلته، فكان يحاول باستماتة علاجها طوال تلك المدة التي تكمل العام بعد سفرهما من مصر لانجلترا، فنتج عن انشغاله تقصيرًا شمله تجاه العائلة، فاضطر أسفًا يبرر انشغاله لرفيقه الودود أحمد، ووالدته وأخيه ظنًا من أنهم سيتفهموا سبب غيابه بالأيام عن العودة.
ورغمًا عنه وجد الامور تخرج عن طور سيطرته، فإذا بقلبه المغدور يعلن حبها صريحًا له، جابه مشاعره كثيرًا ولكن قلبه بالنهاية انتصر.
تحركت يد أحمد تربت على ساقه وهو يخبره ببسمة هادئة:
_متقلقش يا علي، هكون موجود معاهم ومش هسمح لفريدة تعمل شيء.
وهبط يغلق باب السيارة وهو يشير إليه:
_روح إنت مشوارك ومتقلقش.
ابتسم براحة بعدما تفادى الخمسون بالمئة من المشاكل، فحتى إن كانت فطيمة ستواجه جزءًا من تسلط والدته ولكنها ربما تكون هينة أمام المئة بالمئة!
********
ارتدت حجابها حينما استمعت لرنين جرس الباب، واتجهت لتفتحه، فوجدت مايسان تقف ولجوارها فتاة وامرأة تسدد لها نظرة لو حملت الجمر لأشعلت فطيمة على الفور، بدى لها بأن تلك المرأة لم تكن سوى فريدة هانم والدة علي، وقد صدقت أحاسيسها حينما قالت مايسان:
_دي شمس إخت علي يا فطيمة، ودي فريدة هانم والدته.
ابتلعت ريقها بتوترٍ شديد، ورددت:
_أهلًا وسهلًا.. اتفضلوا.
ابتسمت فريدة ساخرة، وولجت للداخل متعمدة أن تحك كعب حذائها الأبيض العالي بالأرضية، مرددة:
_مش محتاجين عزومة إننا ندخل بيتنا يا حبيبتي.
كانت بدايتها معلنة للفتيات، بأن تتهييء للحرب منذ الآن، فخففت شمس وطأة الاحداث حينما أحاطت فطيمة بذراعيها وببسمة مشرقة قالت:
_أهلًا بعروستنا الجميلة اللي هتنور بيتنا.
استلطفتها فطيمة، فكانت بشوشة رقيقة مثل مايسان، فضمتها وأجابتها على استحياءٍ:
_تسلميلي يا حبيبتي.
مازحتها وهي تدعي بحيرة:
_قوليلي بقى أناديلك فطيمة ولا فاطمة ولا فاطيما.
ضحكت وهي تجيبها:
_براحتك الإسم اللي حاباه ناديني بيه.
أشارت لهما مايسان التي تقف بالردهة تراقب فريدة الجالسة على الأريكة تحدجهما بنظرة قاتلة، ثم قالت:
_يلا يا فطيمة ادخلي غيري هدومك عشان هننزل نشتري فستان لكتب الكتاب.
أخفضت عينيها أرضًا بحرجٍ، فدنت منها مايسان تهمس لها بضيق:
_هو انا مش وريتك امبارح أوضتي وقولتلك إلبسي اللي تحبيه يا فطيمة، لسه بالاسدال ليه؟
_يمكن مش مستنضفة تلبس مكانك يا مايا، ومستنية الجديد يوصلها!
قالتها فريدة وقد بدأت تلقي سهام حربها، فانقبضت معالم فطيمة خوفًا من القادم، خاصة بأن نظراتها كانت مقبضة، أجل هي تعلم بأنها لن تكون بداية سلسة بقرار زواجها، ليس من علي بالتحديد بل بأي رجلًا، من البديهي أن والدته لن ترضخ لطلبه الغير مقبول بالزواج من أنثى تم تجرديها مما تمتلك!
هي من البداية كانت تصر برفضها لعلمها ذلك، ولكنها بالنهاية لم تكن قاسية على قلبها مثلما قسى عليها الجميع.
خطفت فطيمة نظرة لفريدة التي تقتص بنظراتها التي شملتها من رأسها لأخمص قدميها،كأنها تقيمها بنظرة تحط من قدرها، فوجدت الكره والحقد يترأسان حدقتيها، اعتلاها الحزن وفضلت الصمت،فتركت فريدة حقيبة يدها البيضاء جانبًا واتجهت لتقف قبالتها، فمازالت تقف جوار شمس ومايسان جوار باب الشقة المفتوح، مربعة يدها حول صدرها بثقة:
_قوليلي يا فاطيما، عملتيها إزاي دي وقدرتي توقعي ابني الدكتور علي!!
واستكملت بسخرية:
_أصل بصراحه شايفة إنك بتمتلكي ذكاء وخبث ميلقش على وش البراءة اللي مصدرهولي من ساعة ما شوفتيني، واحدة زيك باللي حصل معاها كان ممكن يبقى طموحاتها توقع الفراش، حد من أمن المستشفى، صبي البوفيه، لكن الدكتور المعالج دي بصراحه تحسبلك!
صعقت مما استمعت، فشعرت وكأن قدميها تهتز عنفًا طالبة جلوسها قبل أن تسقط أرضًا، بينما اندفعت شمس تهتف بها:
_مامي بليز مينفعش اللي بتقوليه ده حضرتك عارفة إن آآ..
رفعت كفها توقعها عن الحديث ومازالت نظراتها تحيط بفطيمة التي تتشبث بجوانب اسدالها الفضفاض، تجاهد أنفاسها اللاهثة، فتدخلت مايسان بهدوء:
_فريدة هانم ميصحش اللي حضرتك بتقوليه ده، علي شرح لحضرتك قبل كده والموضوع انتهى!
أحالت بنظراتها عنها لتتجه لزوجة ابنها الأصغر وابنتها، لتردد باندفاع:
_مفيش شيء انتهى يا مايا، الحرباية دي عرفت تتلون على ابني عشان توقعه بس مش هتنجح تخدعني، ولو عندها ذرة كرامة هتاخد نفسها وتمشي من هنا فورًا.
وخطفت مسافتهما لتصبح قبالة عينيها:
_ولو بتحبه مع إني أشك في ده، هتحب الخير ليه وإنه يكون سعيد مع بنت يكون هو حظها الأول وميبقاش بسببها أضحوكة وسط الطبقة المخملية اللي مستحيل هتكون منها!
_فريـــــــدة!
صوت ذكوري قوي قطع حديثها، ليمر من بين الفتيات حتى أصبح قبالتها عوضًا عن فطيمة التي يرتجف جسدها، فأشار لمايسان وشمس:
_خدوها تغير هدومها عشان هنتحرك حالًا.
جذبتها شمس بفرحة لوجود أحمد هنا، فلا هي تمتلك جرءة محاربتها ولا حتى زوجة أخيها، ولجوا بها لغرفة مايسان الجانبية، وأغلقوا الباب ليدعوا الساحة لأحمد ليحارب بمفرده.
فما أن تأكد من ابتعادهما حتى صاح غاضبًا:
_إنت شكلك مش ناوية تجبيها لبر، سبق واتكلمنا وانتهينا، لسه بتحاولي تعملي أيه تاني؟
تركته واتجهت تقف أمام الشرفة الزجاجية الضخمة، مرددة بانفعال:
_لا مخلصناش يا أحمد، أنا مش هقف أتفرج عليها وهي بتدمر ابني قصاد عيني.
حرر زر جاكيته الرمادي، ودث يده بجيب بنطاله القماشي، فاستند بيده الاخرى على العمود المجاور له وهو يردد بارهاقٍ:
_وبعدهالك من العناد يا فريدة، تعبتيني وتعبتي اللي حواليكي!
واتجهت عينيه إليها يخبرها برزانة نبرته الجذابة:
_يا فريدة افهمي البنت مريضة حرام عليكي اللي بتعمليه ده هيدمرها.
ضحكت ساخرة واقتربت منه:
_والله أول مرة تخليني أشك في ذكائك يا أحمد، البنت دي سليمة وأحسن مني ومنك، عارفة هي عايزة أيه كويس وبتنفذ لعبتها من زمان، لدرجة أن علي مكنش بيتنقل من المستشفى نهائي بسببها والله أعلم هي عملت أيه تاني عشان تخليه يصمم عليها كده، مستبعدش أنها أغريته أو آآ..
صوته الجهوري خرج متعصبًا:
_حرام عليكِ تظلمي البنت وابنك بالشكل البشع ده، الظاهر إنك بعد اللي عمران عمله بقيتي تشوفي علي نسخة منه، علي يا فريدة العفيف اللي مبيسبش ولا فرد، علي اللي عاش عمره كله يطيعك رغم إنه عارف انك غلط، تفتكر إنه ممكن يرتكب ذنب زي ده!!
أخفضت وجهها للأسفل فانسدل شعرها القصير يخفي معالم وجهها عن عينيه، تراه لا يرغب برؤبة دمعاتها، مسح وجهه بقوة كادت باخفاء معالمه، ثم دنى يقول:
_حبيبتي سبيه يختار حياته ويعيشها زي ما هو حابب، والله أعلم بعد كده هيحصل أيه، ما يمكن ميتفقوش أو يحصل لا قدر الله عدم تفاهم بينهم ساعتها لو أخد قرار الانفصال يكون باختياره هو وبدون ما تفصري عليه بشيء.
رفعت وجهها إليه، واتجهت لتلامس النافذة الزجاجية، هامسة بخبث:
_ده اللي هيحصل.
صفق كف بالأخر مرددًا بنفاذ صبر:
_مفيش فايدة فيكِ هتفضلي زي ما أنتِ.
أسرعت إليه تتمسك ذراعه وبرجاء قالت:
_أحمد افهمني أنا آآ.
ابتلعت جملتها بصدمة حينما وجدته يستل ذراعه منها بانتفاضة غريبة، فراقبت معالمه باستغرابٍ، تنحنح بحرجٍ مصطنع:
_اعذريني يا فريدة، أنا مش حمل أشيل ذنوب، متنسيش إني بالنهاية أخو جوزك وعم وألادك.
واستكمل طريقه للمقعد واضعًا ساقًا فوق الاخرى بثقة، تاركها تتأمله بدهشةٍ وخوفٍ بدأ يحيطها من فكرة نفوره منها ومن مشاكلها التي لا تنتهي، فوخز قلبها بقوةٍ جعلتها تتجه لتجلس على الأريكة المجاورة له لتردد بصوت محتقن تقطع صداه:
_أحمد إنت عايز تبعد عني؟
رفع رماديته لها بعتاب شق صدرها:
_وأنا من أمته كنت قريب يا فريدة هانم!
كادت بالحديث إليه فقاطعتهما شمس حينما قالت:
_احنا جهزنا يا أنكل أحمد.
نهض يغلق زر جاكيته وهو يشير لهم ببسمة جذابة:
_يلا يا شمسي، السواق جاب العربية تحت وأنكل أحمد بنفسه اللي هيوصلكم مكان ما تحبوا، بس من اولها كده انا مش حمل بهداله البنات والجري على كل محلات المول، يعني تحددوا قائمة المحلات اللي هتدخلوها وياريت تكون محدودة، مفهوم؟
ضحكت مايا وأجابته بمرحٍ:
_علم وينفذ يا باشا.
ابتسم وهو يراقبهما، واتجهت عينيه على فطيمة التي تتطلع أرضًا بحزن، تتحاشى أن تتطلع تجاه مكان جلوس فريدة، فاقترب منها قائلًا بلباقة:
_أهلًا بعروسة ابني الغالي، وأكيد من النهاردة هتبقي بنتي إنتي كمان.
واسترسل مازحًا:
_ما شاء الله الواد طلع بيفهم ومختار قمراية ، مش كده ولا أيه يا شمس؟
أحابته الاخيرة وهي تضع قبلتها على خد فطيمة:
_الا كده، دي كريزة يا أنكل.
رددت بخفوتٍ شديد:
_شكرًا لحضرتك.
أشار لهم على المصعد قائلًا:
_طيب يلا بسرعة ورانا مشاوير كتير.
واستدار تجاه تلك الساهمة التي مازالت تتطلع لمقعده:
_هتيجي معانا ولا هتخليكِ هنا يا مرات أخويا؟
انتقلت نظراتها الغاضبة إليه، وحملت حقيبتها واتجهت خلفهن بخطوات متعصبة جعلته يبتسم وهو يهمس بخبث:
_مفيش مانع وأنا بحل مشكلة علي أحل مشكلتي بالمرة!
*******
ولج ثلاثتهم للمصعد، فوقف جمال قبالة يوسف يعدل من الجرفات، مطلقًا صفيرًا مضحكًا:
_لا البدالة هتأكل منك حتة يا جو، دي مبتخرجش الا للحبايب خد بالك.
نزع يده عن عنقه وهو يصيح بضيق:
_خلاص يا عم قرفتني بام البدلة بتاعتك!
منحهما سيف نظرة ساخطة وعاد يتابعه التاب في محاولة لمراجعة مذاكرته، فتوقف المصعد بأحد الطوابق، فولجت للداخل فتاة محجبة وضغطت على زر الهبوط للأسفل.
اتسعت بسمة واسعة على وجه يوسف وهو يراقب تلك الفتاة بأعين منبهرة، جعلت جمال يميل إليه هامسًا بصدمة:
_أوعى خناقتك مع دكتورة ليلى تأثر معاك وتتجوز عليها، اعقل يا جو!
لكمه بغضب جعلها تستدير للخلف بريبة، فقال يوسف ببسمة بلهاء:
_أعتذر عن الازعاج، صديقي لا يبدو أنه بخير.
منحته نظرة ساخطة وعادت تتطلع للأمام، بينما انجرف يوسف تجاه سيف المنعزل عنهم تمامًا بمذاكرة دروسه ليجد أخيه يلكزه بقوة، جعلته ينزع نظارته الطبية وهو يهدر بانفعال:
_في أيه تاني؟
أشار بغمزة عينيه:
_محجبة ولابسة واسع ومحتشمة، مالكش حجة.
وأشار لجمال المنصدم بقدر صدمة سيف:
_هعرف من أمن العمارة ساكنة في الدور الكام وهروح أنا وجيمس نخطبهالك، ها أيه رأيك؟
لطم جبهته بالتاب فاستغل خروجهم من المصعد ليصيح به وهو يسرع لسيارته المصفوفة بالخارج:
_أنا واكل ورثك بتحاول تتخلص مني بأي شكل! ما تنزلي اعلان على السوشيل ميديا أحسن!
وهمس بضيق وهو يصعد لسيارته:
_يا رب ارحمني منه ومن أصحابه لاني اتخنقت، أغير كالون الشقة ولا أطفش وأسبهاله!
غادرت سيارته وتبقى يوسف يلمح أثره بعدم رضا، فنزع يده المستندة على خصره ليشير لجمال:
_هات عربيتك يلا.
دنى منه يشاكسه:
_بدل ما أنت شايل هم أخوك كده شيل هم نفسك وفكر هتصالح دكتورة ليلى ازاي؟
وطرقع أصابعه بخبث:
_ولا أقولك إحنا في طريقنا للمعلم زير النساء، قاهر قلوب الأجانب استعين بمساعدته أياكش حظك النحس يتفك على إيده.
منحه نظرة غاضبة، ليصيح بوجهه:
_الزير الوقح مع كل النساء ومش عارف يتواقح مع مراته! غور هات العربية يا جمال وخلي يومك يعدي!
*****
انتقت مايسان أحد المحلات الراقية، وبمساعدة شمس اختاروا فستانًا بسيط من اللون الأبيض، تحيطه بطانة من الدنتل، وصف من الفراشات تحيط بكتفيه، لينتهي باتساع وكأنه فستان خاص لسندريلا عصرها، فجذبته العاملة بحرص حينما شددت صاحبة المحل بحزم:
_إحمليه بحرص، ليس لإنه غالي الثمن بل لإن والدتي قد صنعته بيدها خصيصًا لمن ستكون صاحبة النصيب.
واستدارت تجاههم مضيفة ببسمة عملية:
_ويبدو بأن تلك الجميلة هي صاحبة النصيب.
اكتفت فكيمة بمنحها بسمة بسيطة بينما كادت بالانصياع ليد شمس التي تجذبها للغرفة بحماسٍ، فأستوقفتها جملة فريدة:
_الفستان شكله قيم ويستاهله عروسة بجد، مش كده ولا أيه يا مدام فطيمة؟
رفعت عينيها الدامعة إليها، فوجدتها تمنحها بسمة متشفية لما خاضته الآن، فتدخل أحمد حينما قال ببسمة مستفزة لتلك التي تراقبه، متعمدًا الحديث بالانجليزية ليرضي فضول العاملات من حوله بمحاولة فهم جملة فريدة العربية :
_بل صنع لصاحبة القلب الأبيض والوجه الملائكي، صنع خصيصًا لكِ فطيمة.
بالرغم من خوفها الشديد من صنف الرجال ولكن هذا الأحمد يبدو بأن شعورها غريبًا تجاهه، لم تقابله سوى بضعة دقائق وبدأ شعور الألفة والأمان يجتاحها، منحته فطيمة بسمة ممتنة وولجت خلف الفتيات للداخل ساهمة بما سيحدث لها من فريدة، إن كانت كذلك بأول يوم جمعهما به ماذا ستفعل حينما تذهب للعيش برفقتهم؟!
تحركت برفقتهما وتركتهما يعاونها على ارتداء الفستان وهي شاردة بعالم أخر، لا تعلم ماذا يتوجب عليها فعله، هل تخبره برفضها مجددًا أما تهرب منه تاركة قلبه ينكسر من خلفها؟
والأهم من ذلك إن تركته إلى أين ستذهب، هي لا تعرف أحدًا هنا سواه هو ومراد الذي لم تمتلك له رقم هاتف حتى، لا تعلم لما حنت بتلك اللحظة لعائلتها، فافتقدت حضن والدتها الراحلة، بداخلها عذاب يقتلها لأنها تعلم بأن والدتها ماتت من حسرتها على ما حدث لها، حتى والدها وشقيقتها انقطعت عنها أخبارهم.
انسدل الدمع على وجه فطيمة وفجأة انتفضت باكية بشكلٍ قبض صدر مايا وشمس، فضمتها مايا إليها وهمست لها بحزن:
_متزعليش يا فاطيما خالتي والله طيبة وقلبها أبيض هي بس مش متقبلة إن حد من ولادها يأخد قرار بدون الرجوع ليها، وبكره لما تعاشريها هتعرفي الكلام ده بنفسك.
وطبطبت عليها وقد انسدلت دمعاتها تأثرًا بها، بينما قالت شمس بصوتها المحتقن:
_بليز فاطيما متبكيش، أنا عارفة إن مامي غلطت فيكي بس والله بكره هتحبك وهتتقبلك، لإنك حد كيوت ولطيف.
أبعدتها مايا عنها وأزاحت دموعها قائلة ببسمة:
_متزعليش بقى ده النهاردة كتب كتابك يا عروسة، عايزينك مفرفشة.
وتابعت بسخرية:
_وبعدين إنتِ عايزة أيه من فريدة هانم، ما أنا وشمس وأنكل أحمد ودكتور علي معاكي وبنحبك ده مش كفايا؟
رسمت بسمة رقيقة على محياها وهي تجيبها:
_كافي ليا يا مايا، أنا أساسًا حبتكم من اول ما شوفتكم والله.
ضمتها شمس بسعادة وهي تجيبها؛
_أنا كمان حبيتك جدًا جدًا.
وأشارت لها وهي تخرج من حقبيتها أدوات التجميل:
_خلصي لبس بقى عشان لسه هحطلك الميكب، لكن لفة الحجاب مش هعرف لإني مش محجبة فنخلي مايا تلفهالك.
قالت على استحياء وهي تراقب ما تضع على السراحة الجانبية للغرفة:
_أنا مش بحب أحط مكياج.
استدارت إليها تخبرها:
_متخافيش انا هحطلك حاجات سمبل كده.
هزت رأسها بخفة وإنصاعت لمايا التي تديرها لتغلق سحاب فستانها الأبيض.
******
أبلغتهما الخادمة بأن عمران برفقة الطبيبة بالصالة الرياضية القابعة بالطابق الثاني ، صعد جمال ويوسف للأعلى، فما أن رأتهم الطبيبة حتى تهللت أساريرها، وجعلتهما يعاوناها بعلاجه، فأمسك به جمال ليسنده على الحامل الخشبي، بينما يوسف يحرك قدمه مثلما أمرتهما الطبيبة، فعبث جمال ساخرًا:
_دي أخرتها خدامين لمعاليه!
رد عليه يوسف وهو يحرك قدم عمران بمهارة:
_الحقير ده مطلع عنينا وهو بصحته وهو راقد!!
أغلق عمران عينيه باسترخاءٍ مستفز:
_اشتغل وإنت ساكت منك له.. محدش قالكم تيجوا دلوقتي!
نغزه جمال ساخطًا:
_جاين نكفر عن ذنوبنا بمعرفتك السودة يا سيدي!
لف جسده بعنف جعل يوسف يرتد للخلف ساقطًا أرضًا ليسدد لكمة قوية اطاحت بفك جمال، ليصيح بغضب:
_احترم نفسك معايا، أنا دراعي لسه سليم فخدلك عازل مني بدل ما هلاكك يكون على يدي!
انتصب يوسف بوقفته فاحاط تلباب ملابسه بيده مرددًا من بين اصطكاك أسنانه:
_أقسم بالله يا عمران لو متلميت لكون كسرلك رجلك التانية، اعقل كده وسبنا نخلص التمرين المنيل ده خليني أغور من خلقتك أنت والحقير اللي جنبك ده.
برق جمال بدهشة لحقت نبرته المستنكرة:
_الحقير ده كنت بتترجاه إمبارح لجل ما يسترك يا دكتور.
أصاب عمران نفس الدهشة، فاستدار لجمال تاركًا يد يوسف تحيط رقبته:
_تستره من أيه؟ انت انحرفت من ورايا يا دكتور العفة والشرف!
تركه يوسف واتجه للمقعد يجذب جاكيته ويرتديه متمتمًا بعصبية:
_أنا غلطان إني سايب المستشفى والعيادة وجاي لانسان وقح زيك، أنا ماشي شوفلك حد يساعد الدكتورة.
لم يعبىء به وسأل جمال باهتمام:
_عمل أيه قولي؟
أجابه وهو يحيطه بقوة بعدما تخلى يوسف عن مساعدته:
_دكتورة ليلى طردته في نص الليل بالبيحامة الستان السودة، كان شكله مسخرة والله العظيم.
أدمى عمران شفتيه ساخطًا:
_اخص على دكتور الندامة، بقى تطردك بالبيجامة.. بالبيجامة يا يوسف!
هدر بانفعال:
_غنوا وردوا على بعض ما أنا عارفكم واحد وقح وواحد حقير هستنى منكم أيه؟!
تعالت ضحكاتهما عاليًا، فقال عمران وهو يستند على الحاملين الخشب:
_لخص الحكاية ببوكيه ورد وروحلها المستشفى بيه، الستات تحب اللافتات اللطيفة دي وبالذات لو كان بمكان متتوقعش أنك تعملها فيه.
وجلس بتعب على أقرب مقعد وهو يستطرد:
_نسبة كبيرة منهم بيحبوا الواد الروش اللي يبين حبه ليها قدام خلق الله وبالأخص بمكان شغلها، ويحبذا بقى لو شخص معتوه راح لمراته مكان شغلها واتخانق معاها هناك، دي بتكون نهاية للعلاقة يا صديقي!
أشار جمال بأصبعه ليوسف الشارد بحديث عمران:
_ركز يالا في الاختيار الأول، شيل ورد وروح بكرامتك.
وتابع بخوف:
_سكوتك قلقني إنت بتفكر في الحل التاني ولا أيه؟!
هز رأسه بنفاذ صبر:
_يا عم ارحمني انا لسه داخل الدنيا من كام شهر هنهيها من دلوقتي!!
ودث يده بجيب جاكيته يجذب الهاتف الذي يعود لرنينه للمرة الثالثة، فخرج من الغرفة الشاسعة بأجهزة رياضية حديثه، ثم ذهب بعيدًا ليتمكن من الحديث مع زميله بالمشفى.
انحنى جمال لعمران الذي يمرر يده على قدمه بتعبٍ، وعينيه شاردة بأجهزته المفضلة بشوقٍ لعودته لممارسة الرياضة من جديد، فقال بحزن:
_مع التمرين والعلاج هترجع أحسن من الأول.
ابتسم برضا تام وقال:
_لو ده عقوبة الكبائر اللي ارتكبتها فأنا راضي يا جمال.
وسحب نفسًا ثم مرره عبر أنفه مستكملًا بحزن:
_إنت متعرفش الخوف اللي جوايا مدمرني إزاي، خايف من عقاب ربنا ليا، خايف ميغفرليش أخطائي اللي ارتكبتها، بستنى بخوف العقوبة اللي هشوفها بالدنيا على جرايمي دي.
أدمعت عين جمال تأثرًا بحديثه، وقال بخشونة يخفي ضعفه خلفها:
_بطل الكلام الفارغ ده، إنت الظاهر كده السم اللي شربته دمرلك عقلك.
وتابع ببسمة هادئة:
_يا عمران ربنا غفور رحيم، وإنت مدام ندمت على أخطائك وبتعافر أنك ترجع لطريق الصلاح عمره ما يقفل بابه في وشك أبدًا.
وبصوتٍ عذبٍ فاجئ عمران، ردد جمال بخشوع… تام:
_قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ ﴿٥٣ الزمر﴾
أدمعت عين عمران تأثرًا من سماع صوته الدافئ، فقال:
_صدق الله العظيم.
وبلهفة أضاف:
_صوتك جميل أوي يا جمال، إزاي مسمعتوش قبل كده؟
ضحك وهو يشير لذاته بغرور مصطنع:
_صاحبك أحلى واحد يقيم الصلاة بالشركة.
وتلاشت بسمته حينما قال بحزنٍ:
_كلنا بنرتكب معاصي يا عمران، أنا مش قادر أنسى المرة اللي شربت فيها الزفت الخمرة، لحد الآن مش مسامح نفسي، بس بكمل حياتي وبستغفر ربنا على أمل إنه يغفرلي خطيئتي دي.
نزع عنه سترته الرياضية، وبتقزز شديد قال:
_البلد اللي احنا فيها دي السبب، المعاصي محاوطنا من كل جهة، خمرة وستات وكل شيء هنا مباح بدرجة مرعوبة، تعرف أنا بتمنى أسافر لمصر ونعيش في القصر بتاع جدي الله يرحمه مع عمي أحمد بس للأسف غصب عننا لازم نكون هنا، أملاك بابا وشغل علي ودراسة شمس حتى الجمعيات وشغل فريدة هانم كله هنا.
رد عليه جمال وعينيه لا تفارقه:
_دي حجة باطلة بنضحك بيها على نفسنا يا عمران، المسلم القوي إيمانه لو سافر لزمن الجاهلية والكفر مش هيتهز فيه شعرة، كل دي حجج يا صديقي!
هز رأسه باقتناعٍ، وبحرج أضعف حنجرته:
_عندك حق، إحنا محتاجين نقوي إيمانا بالله عز وجل.
منحه ابتسامة هادئة قبل أن يشير له:
_طب سند نعمل التمرين الأخير عشان يوسف ميتأخرش على شغله.
أومأ برأسه ونهض يحتمل على كتف رفيقه، فأحاطه بقوةٍ، بينما اقتحم. يوسف الغرفة يخبر جمال بحماسٍ وفرحة:
_جمال الدكتور الأمريكي اللي كنت بتسألني عنه عشان عملية القلب بتاعت والدتك جاي المستشفى عندنا كام يوم تبع المؤتمر اللي هيقام عندنا، دي فرصتك إنه يعمل لوالدتك العملية.
شحب وجه جمال تدريجيًا، فأجلى أحباله الصوتية:
_بعدين يا يوسف بعدين.
استغرب يوسف طريقته ومع ذلك أثر الصمت، فقال وهو يعيد هاتفه لجيبه:
_طيب لو خلصتم خلينا نتحرك اتأخرت.
أشار له جمال بارتباكٍ من نظرات عمران إليه، فقال وهو يسنده:
_هدخل عمران أوضته وجاي.
أشار له يوسف:
_طيب هات المفاتيح أدور العربية لما تنجز.
دفع له المفاتيح وخطى جوار عمران تجاه غرفته، فما أن تأكد عمران من هبوط يوسف حتى منع جمال من الفرار قائلًا :
_استنى عايزك.
كاد بالخروج من باب غرفته، فاستدار وهو يقبض قبضة يده بغضب لحق هو الاخير بنبرة عمران:
_سبق وسألتك قبل كده على عملية والدتك وقولتلي إنها لازم تتعمل بأقرب وقت، ودلوقتي بعد ما الفرصة جتلك بتتهرب منها، في أيه يا جمال؟
زفر في محاولة لاختيار كلماته:
_مفيش، أنا حاسس إنها بقيت كويسة وآآ..
قاطعه بسؤاله المباشر دون لف ودوران:
_إنت محتاج فلوس؟
احمرت حدقتيه غضبًا وصاح بعصبية:
_مالكش دعوة يا عمران، أنا أدرى أحل مشاكلي لوحدي.
جذب المزهرية المجاورة لفراشه ليسقطها فوق رأسه بتعصب، تفادها جمال بصعوبة وهو يهمس بعدم تصديق:
_مجنون!!
بحث عمران عما يود استخدامه ولكنه فشل بالوصول للمزهرية الاخرى، فصرخ بعنف:
_استنى أنا هوريك الجنان اللي على أصوله، عشان تبقى تعرف تتكلم معايا كويس يا حقير.
وتابع بعصبية بالغة:
_بقى بتداري عليا بعد كل اللي بينا، ده أنا لو حصلي حاجة إنت أول واحد بتجري بيا، للدرجادي أنا مصدوم ومش مصدق إنك تكون بتمر بحاجة زي دي وتخبي عننا يا جمال، بجد مصدوم ولو قادر أقف كنت قتلتك وخلصت.
أسرع يخبره بحزن:
_إنت عارف إني مش بحب أطلب مساعدة من حد حتى لو كنتوا اخواتي.
خرج عمران عن هدوئه، فجذب الوسادة من خلفه ليقذفها إليه، فالتقطها سريعًا ليعيدها إليه بحدة:
_اهدى بقى بهدلت الأوضة بجنانك ده، مش صالة رياضة هي!
أجابه من بين اصطكاك أسنانه:
_ما أنت معصبني خصوصًا إنك واقف بعيد ومش طايلك، تعالى لو راجل تعالى أقف هنا قدامي!
انحنى يجمع زجاج المزهرية لسلة المهملات، مردفًا:
_لا أجيلك ولا تجيني، خليك مستريح مكانك أنا أساسًا مش فاضيلك.
وانتهى من جمع الشظايا، ثم إتجه ليغادر، فقال عمران بحزم:
_جمال جهز أوراق سفر والدتك، وأنا هتكفل بفلوس العملية ولما تجمع المبلغ بعد المناقصة اللي داخلها ابقى سددلي جزء منه وبعد كل مناقصة هأخد جزء من فلوسي، وبكده تكون رضيت غرورك الغبي.
أشتعلت حدقتيه، فابتسم عمران بخبث:
_اتعصبت! حلو تعالى اقعد جنبي هنا ونتكلم ونتناقش.
استدار ليغادر فعاد يناديه مجددًا:
_جمال.
توقف محله، ليأتيه تهديدًا قطعي:
_أقسم بالله لو مبعت جبت والدتك الاسبوع ده لا أنت صاحبي ولا أعرفك، وإنت عارف كويس إني قد كلامي، كفايا زعلي من اللي عملته، المرادي هتبقى كبيرة.
ابتلع ريقه بتوترٍ، خسارة أحد أشقائه تعني الموت حتمًا فهز رأسه مرددًا:
_حاضر.. هحجزلها.
وغادر على الفور من أمامه، تاركًا ابتسامة الانتصار تحيط بوجه عمران، فتمدد على الفراش، ليغلق عينيه براحة وفتحها مجددًا حينما فُتح باب الغرفة مجددًا، فاعتدل بجلسته هاتفًا بسخرية:
_يا هلا يا هلا بالعريس، أيه لسه فاكر أنك نسيتني وراك!
حدجه علي بنظرة جامدة قبل أن يتجه للخزانة قائلًا ببرودٍ:
_نسيت ابن أختي ورايا ورجعت أخده.. قوم إلبس وخلصني.
منحه نظرة ساخرة قبل أن يشير بيده إليه، فجذبه علي ليستقيم بجلسته ومن ثم اتجه للخزانة ليجذب بذلة آنيقة من اللون الأسود، مررها لعمران وكاد أن يشرع بمعاونته ليوقفه الأخر بسخط:
_أيه الذوق المقرف ده، إنت بتكروتني!
جحظت عينيه بصدمة، لحقت نبرته:
_هو أنا جايبها من دولابي، ده ذوقك يا حبيبي!
ألقاها عمران جانبًا وأشار له:
_مش بلبس أنا كده، بختار البنطلون وبعد كده بطقم باستايل مختلف مش اللبس المعتاد ده، أنت تايه عني ولا أيه يا دكتور؟
كز على أسنانه بغيظٍ:
_هو ده وقت محاضراتك يا عمران، فطيمة سايبها مع فريدة هانم وحاسس إني هروح ألقيها نهشتها على سنانها.
ضحك بصخبٍ، وقال:
_تعملها مصدقك، بس في أمل عمك معاهم فمش هيسمحلها متقلقش.
على ذكر عمه، قال علي بجدية تامة:
_لما نرجع بليل محتاجين نتكلم شوية، في موضوع مهم لازم أقولك عليه يا عمران.
إلتحف بالجدية هو الأخر وسأله باهتمام:
_موضوع أيه ده؟
قال وهو يعود للخزانة في محاولةٍ إيجاد ما يناسبه:
_بخصوص عمك، بليل نتكلم أفضل، دلوقتي لازم نتحرك، فلخص وقولي أجبلك أيه؟
أشار على البنطال الداكن من خلفه، وإختار قميصًا أسود اللون، ثم أشار لعلي مرددًا:
_عندك درجات الكحلي نقيلي درجة متكنش داكنة أوي.
زوى حاجبيه بضجرٍ، كلما أمسك سترة أشار له بالنفي، فجذب أحدهن وألقاها بوجهه صارخًا:
_إنت بتستهبل! ده أنا العريس مخدتش الوقت ده كله باللبس!
أجابه بسخرية وهو ينزع التيشرت عن جسده:
_وإنت من أمته بتهتم باختيار لبسك! إنت دقة قديمة يا علي مش ماشي تبع العصر!
ورفع ذراعه يقبل عضلته البارزة، متفاخرًا:
_حتى الرياضة مالكش فيها لما بحس إنك شبه خلة السنان!
دنى منه علي بنظرة جعلت الاخير يرتعب وخاصة حينما هدر:
_تحب أوريلك دلوقتي أنا أقدر أعمل فيك أيه بجسمي اللي شبه خلة السنان ده!
عاد لذكرياته ما تلقاه من ضربًا مبرحًا على يده، فأشار لذراعه الأيسر:
_كان على عيني والله بس إنت شايف أهو بعينك عندي شلل نصفي رباعي حاد الزوايا، لما أخف إبقى تعالى خد حقك.
انحنى يعاونه على ارتداء البنطال بنفاذ صبر، ليأتيه الأخير بصاعقة تفوقه حينما ظل لنصف ساعة يختار الحزام الجلدي المناسب للبنطال، ونصف ساعة أخرى ليصفف شعره ويختار البرفيوم المناسب، فأضرم علي بأن اليوم هو موعظ زفاف أخيه وليس هو.
جذبه بغضب حتى وضعه بالسيارة، فأطلق صفيرًا كان مزعجًا لعلي الذي هاتفه مدعيًا ابتسامته:
_تعرف تقعد بهدوء بدل الازعاج اللي عامله ده.
أجابه ببسمة واسعة:
_فرحان يا أخي مش كتب كتاب أخويا!
رد ساخرًا:
_أخوك نفسه معندوش الاستعدادات والانشكاح ده!!
مازحه بمكر وهو يغمز له:
_حد منعك من الانشكاح، انشكح براحتك بس بهدوء عشان فريدة هانم متفزعكش!
*****
صف السيارة جانبًا وهبط بخطاه الواثق وإبتسامته الخبيثة تحيل على شفتيه، فدنى من فؤاد يتلقف منه ما بيده دون أن يصدر اي رد فعل تثير الشكوك إليه، فهمس إليه الاخير:
_هنوصلها لمصر المرادي إزاي يا باشا؟
أجابه آدهم وهو يتصنع أنه بعدل حذائه ليدس الفلاشة داخل جواربه، ثم انتصب بوقفته يهمس له:
_متقلقش هتوصل والمرادي بطريقة مختلفة.
وغمز له قبل أن يغادر لداخل قصر راكان، مستمتعًا بكل خطوة يخطوها للداخل بعدما حقق اول إنتصارًا بكشف من يعلو راكان وتفاصيل العملية القادمة التي حتمًا ستكون بمثابة دق أخر مسمار بنعشه.
اصطدم إدهم بالهاتف الخاص براكان ملقي أرضًا أسفل قدميه، فرفع بصره ببطء تجاهه، ليجده ينفث غليونه بغضب شديد، وما ان رأه حتى صاح:
_الحيوانة شمس مش بترد على مكالماتي، وأنا مش عارف هي قالت أيه لعمران ولا لفريدة هانم، كنت عايز أضحك عليها بكلمتين.
قبض يده بعنف تمنى لو تركها تطول فكه فتحطم صف أسنانه السفلية، ولكنه سيطر على انفعالاته ليبدو باردًا كلوح الثلج، وقال:
_وإنت كنت منتظر أيه منها بعد ما اتخليت عنها واستخبيت ورا العمود!
جذب كأسه يرتشفه بغدافية شديدة، وتلفظ:
_وأنا كنت هعمل أيه يعني، أفديها بروحي مثلًا! ما إنت عارف اللي فيها.
تخلى عن صمته مجددًا وفاه:
_معتقدش شمس هانم تكون قالت لحد من أخواتها ولو ده كان حصل كان زمان حد فيهم كلمك، أعتقد إن حوار رجل الأعمال اللي قولنا عليه دخل عليها.
تمعن بحديثه جيدًا، وقال بتردد:
_طب وهعرف إزاي، هحط افتراضات؟
وتابع بعد تفكيرٍ:
_لازم أقابلها.. هروحلها الجامعة بكرة!
*******
طرقات على باب غرفتها حررت صوتها الرقيق:
_اتفضل.
ولج للداخل فوجدها تتمعن بتلك الاوراق التي توقع عليها وقالت بعملية دون الاهتمام بالتطلع لمن القادم:
_استريح، ثواني وهكون مع حضرتك.
منحها نظرة مستنكرة لوقاحتها بالتعامل مع المرضي، فقال بامتعاضٍ:
_من الذوق والأظب أنك تستقبلي المرضى بابتسامة واهتمام أكتر من كده يا دكتورة!
رفعت عينيها عن الأوراق تزيح نظاراتها، ولسانها بردد بدهشة:
_يوسف!
ابتسم ووضع باقة الورد على الأوراق التي أمامها مرددًا:
_دكتورة ليلى قلب دكتور يوسف وفشته وكليته وكل الأمعاء.
ضحكت وهي تراقب باقة الورد بعدم تصديق، فقالت باستغراب:
_ده أيه؟ أكيد بحلم مش كده؟
ازدادت بسمته عشقًا:
_احلمي وأنا المارد اللي هيحققلك أحلامك كلها، ومتعشم فيكِ تحققيلي حلم واحد بس.
امتعضت معالمها غضبًا بعدما تسرب لها سبب وجوده هنا، فألقت باقة الورد بوجهه وهي تهدر بانفعال:
_آه قول كده بقى، إنت جاي عشان ترجع تفتح حوار الخلفة تاني.
أبعد الورد عن وجهه وأسنانه تكاد تنهش شفتيه، وبدأ يستعيد اتزانه كليًا، فابتسم وهو يحرر احتقان صوته الغاضب:
_حبيبتي أنا عارف إنك امبارح اتحججتي بحوار البنت الحامل اللي كلمتني امبارح علشان قبلها كنت بقولك تعدي عليا بالعيادة أكشف عليكي من باب الاطمئنان بحيث يكون عندنا بيبي بأقرب وقت.
طرقت على سطح المكتب بغضب:
_متفتحش الحوار ده تاني يا يوسف، من قبل ما نتجوز وأنا قايلالك إني نفسي أحقق طموحاتي وأبقى من أكبر الجراحين في انجلترا وإنت وعدتني إنك هتساعدني ومش هتقف بطريقي.
رد عليها بهدوءٍ رغم اشتعال روحه:
_وهي الخلفة اللي هتعطلك عن تحقيق ذاتك يا دكتورة؟!
منحته نظرة غريبة يراها ببنية عينيها لأول مرة، وألقت إليه تهمتها:
_يعني لو أنا طلبت منك تسيب شغلك ونجاحك اللي وصلتله هتقبل بده يا يوسف؟
رمش بعدم استيعاب:
_وده دخله أيه في موضوعنا؟
وبوضوحٍ شديد تساءل:
_ليلى إنتِ بتلمحي لايه؟
نهضت بوقفتها تطعنه لأول مرة بما جعله عاجزًا محله:
_قصدي إنك غيران من نجاحي يا دكتور يا محترم، ودلوقتي عايز تهد كل اللي أنا حققته عشان أقعد في البيت وعلى كتفي عيل!
برق بعينيه بصدمة جعلته يحاول النهوض ليقف قبالتها، فاجبر صوته على الاستيقاظ:
_أنا هعتبر نفسي مسمعتش الكلام اللي قولتيه ده لإني لو أخدته بعين الاعتبار فمش هخرج من الاوضة دي غير وأنا رامي عليكي يمين الطلاق.
نالها من الصدمة جانبًا بعدما أهانته وانتزعت قلبه من صدره، فحاولت الحديث عساها تمحي زلة اللسان الكريهة هذة ولكنه منعها حينما قال بألم جعل صوته جاف:
_انا عمري ما غيرت من زميل ليا في مجال تخصصي ما بالك بمراتي اللي بتمنالها الخير على حساب نفسي!
وتابع يدافع عن نفسه المجروحه:
_ثم من أمته وأنا بقف بطريقك! أنا أوقات بحتاج لزوجتي تشاركني أجازتي زي أي إنسان طبيعي ومش بلاقيكي جنبي وعمري ما فتحت بوقي لإني عارف شغلك ومقدر ده، عمري ما جبرتك تقعدي من شغلك ولو يوم واحد، ولما بترجعي وبتحاولي تعوضي النقص بترتيب البيت والطبيخ بزعل لاني عارف وقفة طول اليوم بالمستشفى عشان المرضى عاملة ازاي، فبحاول أساعدك على قد ما أقدر، برتب كل شيء ورايا وبعمل لنفسي بأغلب الوقت أكلي، ده مش معناه إني ضعيف ومش قادر أكسرك بأي وقت..
ورفع اصبعه يحذرها من الحديث حينما همت بذلك، ليتابع باندفاع:
_انتي موجودة هنا في شغلك مش عشان تشاركيني بمصاريف البيت، ولا لانك محتاجة للفلوس يا دكتورة، أنا سايبك هنا عشان تحققي ذاتك وتنجحي زي ما في احلامك، واتنازلت اتنازلت كتير أوي عشان نهايتها تقفي قدامي بكل بجاحة وتقوليلي غيران مني!!
وابتسم ساخرًا وهو يضيف:
_وكل ده ليه عشان نفسي أخلف منك ولد! عشان اديتك وعد وانتظرتك أنتِ اللي تاخدي أي خطوة وتوقفي المانع من نفسك! كل ده عشان مقدرتش استحمل الوجع لما بيتولد على ايدي كل يوم طفل وعندي رغبة أشيل ابني بين ايديا زي أي زوج عايش حياة طبيعية مع مراته!! قوليلي أنا غلطت في أيه؟!
واخفض ذراعه ليضيف بتهكمٍ:
_بتطالبيني أسيب شغلي على أي أساس! أنا اللي هحمل بدالك وهشيل المسؤولية دي!! ، وبعدين هو كل ست حملت وخلفت سابت شغلها واتخلت عن حلمها؟!
ومنحها نظرة أخيرة قبل أن يخبرها:
_بس عندك حق أنا أستاهل إنك تتمادي بكلامك وطريقتك بالكلام معايا..
وحمل باقة الورد ووضعها بسلة القمامة المجاورة لباب الخروج ثم غادر على الفور، فانهار جسدها على المقعد، لتضم وجهها لكف يدها وهي تردد بصدمة:
_أيه اللي قولته ده؟!
*****
وصلت سيارة علي أمام الباب الخارجي للمول، فاتصل هاتفيًا بعمه ليجده يشير له فقاد للامام قليلًا، ليتفاجئ بها تهبط الدرج بفستانها الأبيض وملامحها الملائكية التي زلزته وكأنه لم يرى فتاة من قبل، هبطت برفقة مايسان وشمس حتى باتت قبالته تتحاشى التطلع له بحرج، فكانت عينيه لا تحيل عنها، حتى أنه لم يستمع لحديث شمس ولا لمباركات مايسان، وبصعوبة بالغة قال:
_القمر نزل من سماه لأرضي معقول!
تعالت ضحكات عمران المتدلي نصفه من نافذة السيارة، فصاح بخبث:
_الله أكبر دكتور علي نبغة العلم والأدب نطق يا جدعان، بركاتك يا مرات أخويا شكلك كده وقعتيه واقعه مفهاش قومة.
استدار إليه علي، فدفعه للداخل بغضب، وأمر مايسان بحده:
_خدي جوزك لعربية عمي.
خرج من النافذة يرفض:
_ده بعدك يا أبو علي لزقالك.
منحه علي بسمة ساخرة، فأشار لعمه الواقف على بعد مسافة منهما، واتبعته فريدة تكتف ساعديها أمام صدرها بغضب، ففتح على الباب الخلفي لوالدته التي حدجته بنظرة غامضة ثم صعدت للخلف ومن بعدها مايا وشمس، فتساءل عمران باستغراب:
_والعروسة هتركب فين يا ابني!
اتجه علي يميل على أحمد هاتفًا:
_المفاتيح يا أبو حميد ومرددالك.
غمز له بمكر وصعد يقود السيارة، فخرج عمران من النافذة يشير له بمرح:
_مش هعدهالك اصبر بس.
بينما صعد علي سيارة أحمد وقادها قبالة فاطيما، فصعدت لجواره على استحياء ليتجه بها للمحامي لعقد قرانهما أمام أفراد العائلة، ليعودوا جميعًا للمنزل مرة أخرى، وما أن ولجت فطيمة للمنزل حتى أشارت فريدة لعلي قائلة بأعين لامعة بالدموع:
_عملت اللي في دماغك يا علي؟ اعتبر إن من النهاردة مالكش أم!

يتبع…

لقراءة الفصل التالي : اضغط هنا

لقراءة الرواية كاملة اضغط على : (رواية صرخات أنثى)