رواية صدفة حب الفصل الثاني 2 بقلم ندى زايد

رواية صدفة حب الفصل الثاني 2 بقلم ندى زايد

رواية صدفة حب الجزء الثاني

رواية صدفة حب البارت الثاني

رواية صدفة حب الحلقة الثانية

* ليلي فوقي معايا يحبيبتي ماعامر يبقي المدير بتاعي يحبيبتي
_ اي … بتهزري ؟
* في اي يبنتي انتي كل دا مجمعتيش
_ انتي قايلاليي انه قريبك مجاش في دماغي عامر خالص يالهوي عليا انا عماله اشتم في الراجل من الصبح
* بتشتمي مين … عامر ؟
_ اه يختي عماله اقوله دا مديرها حلوف وعديم الاحساس ومعرفش اي ياربي عليا الراجل يقول اي دلوقتي بس
سمعت صوت ضحكتها كانها بتغيظني اكتر
* عامر حلوف ؟ احسن والله يستاهل
_ بطلي ضحك بدل مااشتمك انتي كمان يعني الراجل كل شويه اعك معاه الدنيا كدا … بقولك اي يملك اقفلي دلوقتي عشان هو جيه هكلمك بعدين
قفلت معاها بسرعه ومستنتش ردها وبقيت افرك بايدي بتوتر وببص عليه وانا بجد محروجة منه .
= اي اتاخرت عليكي
_ ها لا ابدا ابدا
= مالك ياليلي حصل حاجة
_ ها لا ابدا ابدا
= انتي علقتي ولا اي ف اي ياليلي انتي كويسة
_ بص … والله ماكنت أعرف بجد أنا مجاش في دماغي خالص انك مدير ملك والله انا اسفة بجد
بصلي بجنب عنيه وهو بيبتسم وبيدور العربية
= اه هي قالتلك كنتي استني شويه كنت عاوزة اعرف حلوف واي كمان
_ متبقاش رخم بقي مكنش قصدي بجد مكنتش أعرف
= ماشي يستي عفونا عنك مفيش حاجة
ابتسمت بهدوء وفضلت مركزة في الطريق وانا بفكر في قد اي هو جميل ولا يمكن يكون حلوف لا
وصلنا وطلعت وصليت وحقيقي كنت مبسوطة.جدا باليوم وبكل حاجة حصلت فيه فضلت افرك في الشقة عشان اقاوم اني مطلعش البلكونة بس مقدرتش خرجت وقعدت ادور عليه بعيني بس ملاقتهوش معرفش ليه زعلت ومكملتش تفكيري ولاقيته ظهر
_ بس بس بس
= مستنياني ولا اي
غمزلي بعينه فحسيت اني اتحرجت انا كنت مستنياه بس مش عاوزاه يعرف هو باين اوي كدا
_ ها لا ابدا دا انا كنت عاوزاك في موضوع كدا
سند علي السور وهو بيبصلي باهتمام
= موضوع اي بقي المهم اوي دا
_ ينفع اطلب منك طلب وتنفذهولي ؟
= ياسلام طلب واحد بس انتي تؤمري عاوزة اي
_ ينفع تدي ملك اجازة ؟
بصلي بجنب عنيه كانه كان متوقع فكملت وانا بفرك في ايدي بتوتر
_ بص انا عارفة اني ماليش عين اطلب حاجة بعد كل غلطاتي الكتير اوي دي بس بجد ملك محتاجة اجازة ياعامر بقالها كتير اوي في وسط الشغل ووحشتني وانا عاوزاها تيجي تتبسط شويه مش هيحصل حاجة ووعد لو الشغل اتعطل في حاجة انا هساعدها ونخلصه بسرعه وعد والله عشان خاطري ياعامر وافق ممكن ؟
بصلي كتير بطريقة مفهتمتهاش بس وترتني اكتر وحقيقي مش عارفة ليه
= خلاص هشوف الموضوع دا حاضر
_ بجد ياعامر يعني موافق احلف كدا
= هفكر واقولك ممكن ؟
_ ان شاء الله هتوافق دا انت طيب وجميل والله
= انا ؟
بصتله واستوعبت اللي قلته فسكت بجد ليه الانسان مبيعديش الكلام علي مخه قبل مايقوله بجد
= المهم قوليلي انتي مبتشتغليش ليه
سندت علي السور بقلة حيلة
_ كنت بشتغل اشتغلت سنتين في شركة كبيرة وبجد كنت شاطرة اوي بس للاسف صفو كل اعمالهم في مصر والشركة قفلت .. واشتغلت شهرين في شركة الدمنهوري اكيد تسمع عنها بس بجد مستحملتش مقدرتش فاستقلت واديني بقالي ست شهور بلا عمل
= سمعتهم سبقاهم دايما اشتغلتي فيها ازاي دي
_ نصيبي قلت يمكن اشاعات بس بجد لا مديرهم مقرف كلامه نظراته كل حاجة فيه مثيرة للاشمئزاز بس فخلعت بقي
= طب اي رايك تشتغلي مع مدير طيب وجميل
بصتله باستغراب شوية لحد مستوعبت فضحكت علي طريقته
_ بس يارخم انت
= مبهزرش والله متيجي تشتغلي مع ملك
_ عامر مش بحكيلك عشان تقولي كدا اكيد هلاقي شغل بلاش اصعب عليك
= ليلي فوقي انا الحلوف متغيرتش
بصتله شوية وحقيقي ضحكت ومقدرتش اسكت هو اي اللي قاله دا فضلت ابصله واضحك لحد مابصته ليا خلتني اتكسفت وسكت
_ هو ضحكتك قمر الحقيقة بس خلينا ف المهم .. انا قصدي اني بحب شغلي ياليلي ومش بشغل اي حد وخلاص يعني انتي هتيجي زي اي حد تقدمي وتدربي وهنشوف لو شاطرة هتكملي لو مش شاطرة حقيقي هتمشي انا في الشغل انسان تاني ملك عندها حق
= انت بتتكلم بجد والله ؟
_ جربي وانتي تشوفي بنفسك
= خلاص اتفقنا اول ماارجع من هنا هاجي اقدم عندكو
_ طب يلا ادخلي ارتاحي اليوم كان طويل وبكرا نتكلم
ودعته ودخلت وانا بجد مبسوطة اليوم كان جميل وعامر جميل وكمان لاقيت فرصة شغل يابركة دعاكي يماما والله … كلمت ماما حكتلها كل حاجة وفرحتها معايا ونمت محستش باي حاجة غير الصبح و حد عمال يهز فيا يصحيني
* ياليلي اصحي بقي اي طوبة نايمة
فتحت عيني ببطء وانا بستوعب مين هنا وفي اي لاقيتها ملك ساعتها قمت من مكاني ونطيت بسرعة حضنتها
_ ملك الله انتي هنا بجد جيتي امتي
* لسه واصلة يختي .. استاذ عامر حن عليا واداني اجازة فجهزت شنطي وركبت اول قطر وجتلك علطول واضح كدا ان في حد بقي ياثر علي قراراته
غمزتلي بعنيها وفهمت قصدها كويس وانا عارفة انها مش هتسكت ابدا عن الحكاية دي
_ وسعي بس يختي كدا .. ولا قرارات ولا حاجة انا بس قلتله تيجي عشان تشتغلي احسن بعد كدا يعني وكدا
* يابت .. عيني في عينك كدا
_ شكلك فايقة ياملك علي الصبح وانا عاوزة انام
* تنامي فين … انا مش سيباكي غير اما تحكيلي كل حاجة حصلت من ساعة مجيتي هنا لحد اللحظة دي
_ منا بحكيلك كل حاجة في التليفون يابت انتي
* تؤ تؤ التليفون حاجة ودلوقتي حاجة تانيه خالص
شدتني من ايدي علي المطبخ وبدات تعملنا فطار وهي بتستجوبني عن كل تفصيلة حرفيا ….
* كل دا عمله عامر ابن خالتي انا ؟
_ عادي يعني يملك الراجل بيعتبرني زيك مفيهاش حاجة
* دا ياريته يعتبرني انا اللي زيك يختي .. شكل الصنارة غمزت والله
ربعت ايدي وانا بحاول انكر كل دا كاني بسمع نفسي عشان محلمش بحاجة مش هتحصل
_ ملك متوهميش نفسك مش عشان بيعاملني كويس يبقي فيه حاجة عادي يعني مجرد راجل لطيف مش اكتر من كدا
* طب وانتي ؟
_ انا اي
_ حاسة بايه
* هحس بايه يعني يملك انتي والله مكبرة الحكاية اوي
عملت صينيه عليها كوباية شاي بلبن وسندوتشين جبنه رومي واتحركت من قدامها يهدوء
_ استني يابت انتي رايحة فين احنا مش كلنا ..مودية دا فين
حطيت الصينيه علي الكرسي وانا بلبس اسدالي
* عامر مبيعرفش يعمل حاجة ياكلها فهوديله يفطر واجي
بصتلي من فوق لتحت كانها قاصدة تثبتلي اني بضحك عليها والحقيقة اني مفكرتش وانا بعمل كدا انا بس كنت عاوزاه يفطر ..حسيت اني غلطت وحاولت اصلح دا
_ بت متبصيش كدا .. انتي عارفة اني بساعده عشان حاسة بالذنب من ساعه اللي عملته فيه بصي خدي انتي وديله الاكل عشان تعرفي انه عادي يلا يلا روحي
خدت الاكل وعلي وشها نفس الابتسامه اللي موتراني ومحسساني اني مكشوفة اوي .. خرجت شوية وبعد كدا رجعت والصينية معاها
_ اي مديتهالوش ليه
* مش موجود يختي خبطت ومردش
_ اي دا ازاي يعني ..
مسكت تليفوني وانا برن عليه تحت نظراتها اللي محاوطاني
_ الو .. اي ياعامر انت فين
= معلش ياليلي عندي ميتينج شغل محتاجة حاجة
_ ها لا ابدا دا انا بس كنت عملالك فطار وملاقتكش
= معلش والله نسيت اقولك امبارح اني عندي شغل بدري عموما هخلص واكلمك ماشي
_ ماشي بص ملك جت فاحنا هنستناك علي الغدا بقي يلا سلام
قفلت معاه بسرعة بسبب ملك ونظراتها ومستنتش منه اي رد
* هو لو مش فطار يبقي غدا .. محتاج غذا عامر برده
_ يبنتي مش عشان اشكره الراجل اداكي اجازة بعد مطلبت منه يعني وكدا
* اممم قولتيلي … حنين اوي عامر برده
_ اوي
قولتها من غير تركيز … وبعدين قمت من قدامها ودخلت المطبخ وبدات اجهز الغدا وانا بقنع نفسي اني عملت كدا عشان فعلا اشكره الراجل مكسفنيش يعني الله !! … شويه وملك جت وبدات تساعدني وسط كلامنا وهزارنا مع بعض اللي حقيقي افتقدته
* الله ياليلي وتشتغلي معانا بقي ونروح انا وانتي سوي الشغل وافقي وافقي بالله
_ يبنتي حيلك حيلك دا قالي انه لسه هيعملي انترفيو ويشوف شغلي الاول وياتقبل يا لا
* ومتتقبليش ليه ان شاء الله انتي اشطر مني اصلا وبعدين انا هبقي معاكي متخافيش
_ تفتكري بجد ياملك هتقبل .. حساه بيحب شغله اوي وخايفه اعك معاه الدنيا
* هتعكي اي ياليلي انتي متفوقة جدا وعندك خبرة اصلا انتي مش قليلة يحبيبتي
بعتلها بوسة في الهوا بامتنان علي كلامها اللي دايما بيشجعني … خلصت الاكل وجهزته ودخلت اغير هدومي مش معقول علطول يشوفني بالاسدال يعني لبست دريس بسيط باللون الاسود .. وخرجت
_ اي ياملك مش هتغيري .. عامر قال انه خلص وعلي وصول
* هغير اي ماله لبسي
_ هتقابليه بشعرك كدا ولا اي
مكملتش كلامنا لاقيت الجرس رن ..ملك جريت فتحت الباب ولاقيتها بتحضن عامر بحب
* وحشتني اوي يحبيبي
_ وانتي كمان يالمضة هانم
* اعمل اي من الشغل اللي كله فوق راسي مقولكش بقي مديري صعب جدا
_ اه منا عارف صاحبتك قالتلي علي مديرك الحلوف باين
فضلو يضحكو وانا ابتسمت بهدوء وبصتلهم باحراج ومعرفش ليه غيرت .. معرفش غيرت علي صاحبتي ولا علي عامر بس هزارهم غريب يعني اه ولاد خاله بس ملك مبتعملش كدا مع قرايبها يعني .. سبتهم بهدوء ودخلت المطبخ اجهز الاكل
* مسلمتيش علي عامر يعني
_ كفاية انتي سلمتي يختي
كملت بخبث وهي بتقول
* اه والله كان واحشني اوي بجد بشوفه في الشغل كل يوم بس مبعرفش حتي اسلم عليه عشان طبعا البيه مبيقولش عن قرابتنا لحد
_ ماهو ميصحش تحضنو بعض في الشغل برده
بصتلي وكانها بتاكد حاجة لنفسها فقربت وهي بتبتسم اكتر
* الحلو غيران ولا اي
_ هغير من اي ياملك بطلي هبل .. انا بس مستغربة يعني شعرك واحضان هو ابن خالتك اه بس انتي عارفه انه حرام وميصحش
قعدت علي رخامة المطبخ وهي بتخطف الخيارة من ايدي بتاعة السلطة
* ليلي حبيبتي هو انا مش قيلالك مرة ان انا واحمد وولاد خالتي راضعين علي بعض
_ اه قلتيلي بس يعني اي دخل دا ف …… اي دا ثواني هو عامر اخوكي في الرضاعة
* الحمد لله وصلت ياربي .. اي ياليلي تركيزك ضايع ليه اللي واخد عقلك
_ انا ازاي نسيت بجد دا انتي معندكيش غير خالة واحدة … الله يعني انتو اخوات وولاد خالة دي حاجة حلوة اوي
_ عامر طيب وجميل ياليلي وزي احمد بالظبط انا ماليش غيرهم بعد وفاة بابا الله يرحمه … وانتي اغلي واحدة في حياتي وانتي عارفة كدا كويس .. عامر يستاهل انك ..
* ملك ملك ارجوكي بلاش نستعجل انا عارفة انك نفسك بس ياملك انا مش هفرض نفسي عليه يعني ومش عاوزة استعجل واندم بعدين ممكن تسيبي كل حاجة لوقتها عشان خاطري
حضتني بحب وطبطبت عليا كانها بتطمني وبعدين خدنا الاطباق علي السفرة برا وقعدنا كلنا سوي
_ ليلي .. هي دي البسلة اللي كانت علي دماغي من كام يوم
ابتسمت وافتكرت شكله وحاولت اخبي ضحكتي
= اه هي وزودتلك الجزر مش قلت بتحبها
_ دا انتي مركزة بقي
غمزلي بعنيه وكانه مصمم يحرجني هو وبنت خالته متفقين عليا اكتفيت اني ابتسمت وبدات اكل بهدوء
* الاكل تحفة ياليلي .. دا يبخته اللي انتي من بخته والله
بصتلها وانا ببرقلها وعارفة معني كلامها كويس بس هي مهتمتش
* انا عارفة بس هترفضي في العرسان لحد امتي ..دا امك حتي لسه مكلماني بتقولي في عريس وعاوزاني اقنعك
شرقت ووشي احمر واتكسفت واتوترت كل دا كنت حاسة بيه من كلامها ونظرات عامر اللي بقت محاوطاني فجاه هتموتني ناقصة عمر والله لاموتك بس يمشي
بعدها عامر كل بسرعة واستاذن بسرعة ومشي حسيته اضايق او يمكن متهيالي .. فضلت انا وملك قاعدين سوي نتكلم ونتفرج علي التليفزون لحد.منامت وساعتها قررت اخرج البلكونة يمكن اشوفه بجد عاوزة اطمن انه مش مضايق ملقتوش قاعد ولاقيت البلكونة مقفولة فانا اللي اضايقت وفضلت اتفرج علي السما والبحر البعيد وسرحت لدرجه اني محستش بيه غير اما اتكلم فجاه
_ اللي واخد عقلك
= ها خضتني ياعامر اخص عليك
_ سلامتك من الخضة والله .. انا هنا من شوية بس انتي اللي مش هنا خالص
= معلش والله كنت سرحانة
مد ايده بكوباية شاي بالنعناع خدتها بحب واتبسطت انه عامل حسابي
= ملك نامت ولا اي
_ اه من شويه كنت عاوزة اخرجها بس هي تعبانه من السفر فبكرا بقي
= المهم تبقي مبسوطة
_ اوي ياعامر والله من ساعة مجت وانا مرتاحة .. شكرا
= علي اي ؟
_ مرفضتش طلبي وادتها اجازة وخلتها تيجي
= والله عشان خاطرك بس .. مع ان خاطرك دا شكله هيخسرنا كتير
_ اي دا ليه ؟
= عشان انا راجل حقاني وبما اني ادتها اجازة وافقت علي الاجازة المتاجلة لكل الناس واللي مخدش اجازة صرفتله مكافاه عشان يبقو زي بعض هنعمل اي بقي كله لاجل عيونك
بصتله كتير اوي وانا مش متخيلة ان عامر جميل اوي كدا … حاسة انه يشبه بطل رواياتي اللي بقراها كانه متفصل عشان احبه … احبه ؟ هو انا حبيته ؟
= اي ياليلي رحتي فين
_ ها لا ابدا بس بجد والله ربنا هيكرمك عشان خاطرهم وعشان دخلت الفرحة قلوبهم
= هو كرمني فعلا
_ ازاي
= كان عندي حلم كدا نفسي احققه وشكلي خلاص قربت ليه
_ حلم اي دا
= هتعرفي قريب .. قريب اوي
المهم يلا ادخلي نامي الوقت اتاخر .. هاجل شغلي بكرا لبليل وافسحكو طول اليوم اي رايك
_ الله ماشي طبعا موافقة يلا يلا تصبح ع خير
صحيت الصبح وانا كلي نشاط وصحيت ملك ولبسنا علطول ولاقينا عامر مستنينا … ودانا اماكن كتير حلوة اوي واتصورنا كلنا صور جميلة واكتشفت ان عامر طبعه الحنية طريقته مع ملك جميلة وحقيقي انا مبسوطة بيه …متهيالي اني محتاجة اعترف لنفسي اني بدات احب عامر من اللحظة اللي شفته فيها بس ياتري هو احساسه اي !! حاولت مفكرش كتير وخليني اتبسط بالوقت اللي بنقضيه سوي … وفضلنا طول الاسبوع سوي عامر بيخرجنا وبنقرب من بعض اكتر وملك كانت دايما معانا وبتقولي اننا لايقين علي بعض …انهاردة عامر كان مختفي طول اليوم وانا كنت متعصبة طول الوقت بجد ولا حتي مكالمة تليفون
_ هو عامر مكلمكيش ياملك
* لا ابدا قالي انه عنده شغل ومن ساعتها اختفي
_ احسن يكون جراله حاجة
* هيجراله اي يعني ياليلي هو عيل صغير
_ اي البرود دا يابنتي هو مش ابن خالتك واخوكي دا انتي لقياه في كيس شيبسي
* انتي قلقانه عليه ولا زعلانه عشان مكلمكيش طول اليوم
قعدت علي الكرسي بعصبيه واتنهدت بقلة صبر
_ انتي عاوزة اي ياملك
* عاوزاكي تعترفي باللي جواكي وتبطلي تخبيه
_ اعترف بايه انا
* ليلي انتي صاحبتي وانا عارفاكي كويس انتي مبتشوفيش نفسك وعامر موجود بتبقي عامله ازاي انا عمري مشفتك مبسوطة كدا
_ انا فعلا مبسوطة اوي ياملك وخايفة اكون بوهم نفسي احنا بكرا هنرجع القاهره وممكن مشوفوش تاني تقدري تقوليلي اعشم نفسي بحبه وبعدين اعمل اي انا
* يعني انتي بتحبيه ياليلي
_ اه ياملك بحبه وبجد عامر جميل ويتحب بس انا بخاف علي نفسي ياملك ومش عاوزة اجرحها
قربت وباستني بحب وطبطيت عليا
* وانا بخاف عليكي من الدنيا كلها بس الوحيد اللي هطمن عليكي معاه هو عامر انتو تستاهلو بعض .. وهو انا عارفاه كويس هيطلع بيحبك وهتشوفي
مع اخر كلمه ليها لاقيت تليفوني بيرن وكان عامر رديت بلهفة
_ الو ايوة ياعامر انت فين انت كويس ؟
= متقلقيش انا كويس كان عندي بس شويه شغل
_ ومش عارف تتطمني يعني ياعامر .. قصدي تتطمنا يعني دا ملك كانت قلقانة اوي
بصتلي ملك وهي بتضحك خبطتها بالمخدة وقمت وساعتها سمعت صوت ضحكته هو كمان
= ملك برده ؟ علي العموم قوليلها متقلقش وعشان متزعلوش يلا البسو عشان هوديكو مكان حلو اوي نسهر فيه عشان نودع اسكندرية سوي يلا ساعه وهعدي عليكو
قفل معايا وانا اتحمست وانا بشد ملك
_ يلا يلا بيقول هيسهرنا قومي قومي البسي بسرعة
ضحكت وهي بتقوم معايا وقعدتني علي السرير بهدوء
* اهدي اهدي هتتجنني من الفرحة براحة
_ يبنتي بيقولك ساعه وهيجي مش عاوزين نتاخر يلا بسرعة دا اخر يوم لينا هنا
واتنهدت ساعتها بحزن وانا بكمل
_ ومحدش عارف اذا كان هيحصل تاني ولا لا
* دا هيحصل حاجات كتير اوي بكرا تشوفي
_ يارتني متفاءلة زيك كدا
قربت من الدولاب اشوف هلبس اي لاقيتها قفلته ووقفت قدامي
* بتعملي اي
_ بشوف هلبس اي مالك
* لا يحبيبتي بيقولك هنسهر وانا عارفة سهرات عامر كويس اوي اللبس دا مينفعش
_ يسلام واي بقي اللي ينفع
لاقيتها بتخرج شنطة من جمب السرير وتخرج منها فستان ستان باللون اللبني كان حلو اوي
_ انتي بتهزري ياملك هو احنا رايحين فرح
* لا طبعا بس سهرات عامر هنا يعني هيودينا حفلة ودا لبس الحفلات يلا يلا بلاش غلبه
لبست الفستان اللي كان معمول وكانه اتخلق عشاني وملك ساعدتني وحطتلي ميكب بسيط ولفيت الطرحة وكنت فرحانه اوي بشكلي
وملك كمان لبست دريس بس كان بسيط اوي خلاني احس اني اوفر جمبها
_ ياملك حساني اوفر بجد
* اما تشوفي راي عامر فيكي هتعرفي انك قمر اوي
لاقيت عامر بعتلي رسالة ان في اوبر تحت مستنينا هيودينا ليه عشان هو عربيته عطلت . زعلت انه مش هيشوفني اول مااانزل وانا حلوة كدا بس سكت ونزلت انا وملك وصلنا
لمكان غريب كان مضلم وشكله قريب من البحر مسكت في ملك وانا خايفة ومشينا علي ممر من الخشب وفجاه لاقيت اضاءة بسيطة قربت اكتر وبجد انصدمت من حلاوة المكان
كانت خيام كتير جمب بعض حواليها ورد واضاءات ليد وفي الوسط طرابيذه خشب صغيره متزينه بورد وبلالين وجمبهم عامر لابس بدلة كحلي وشكله حلو اوي قربت وانا بترعش ومش فاهمه حاجة ولاقيت ملك بتقف بعيد
_ أنا عارف انك بتحبي الاميرات فقلت اعيشك يوم زيهم
= كل دا عشاني انا ياعامر
_ كل دا ميجيش حاجة جمب كل اللي كنت عاوز اعمله بس معلش بقي الوقت كان ضيق.. بس اي الحلاوة دي
= بجد شكلي حلو
_ انتي علطول شكلك حلو بس اي رايك في زوقي انا اللي اخترت الفستان دا كنت عارف انك هتبقي قمر فيه
= اي يعني ملك عارفة كل دا كانت بتضحك عليا
_ الحقيقة ملك عارفة كل حاجة من اول يوم شفتك فيه حاجة خطفتني دا طبعا بعد مفقت من ضربة الطاسة يعني
= ميبقاش قلبك اسود بقي
_ محدش يحبك وقلبه يبقي اسود ياليلي ابدا
= اي ؟
لاقيته بينزل علي ركبته وبيطلع خاتم من جيبه
_ بحبك … من اول ماعيني شافتك وانا حبيتك ودلوقتي بطلب منك تقبلي تكوني شريكتي في ايامي وسنيني الجاية واكون ضهرك وامانك لاخر عمرنا .. تقبلي تتجوزيني
دمعت وانا مش مستوعبة اللي بيحصل ولا ان كل دا حصل ليا انا .. بصتله وانا بهز راسي بالموافقه قام من مكانه يلبسني الخاتم
= استني
_ اي في اي
= انا موافقة بس مينفعش البس الخاتم دلوقتي لازم بابا وماما يعني يعرفو ويوافقو و…
قرب مني وهو بيبتسم وشاورلي ناحيه ملك
_ بصي هناك كدا
بصيت وبجد اتفاجئت بملك واقفه بعيد فاتحه فيديو وبتكلم بابا وماما وهما بيتفرجو علينا بصتله وبصتلها وانا مش مصدقة
= مشيت بليل وسافرتلهم مخصوص وحكتلهم كل حاجة وخدت موافقتهم الاول .. احنا رجالة اوي لامؤاخذه
ضحكت من قلبي وانا ببعت بوسه ليهم ولملك اللي كانت واقفه وفرحتها مالية عنيها … لقيته مسك ايدي بهدوء ولبست الخاتم وباس ايدي بحب فضل ماسكها وهو بيبص للبحر بحب واتنهد بحب وهو بيبصلي
_ حبتيني ليه بقي يلا يلا اعترفي
ابتسمت بكسوف وبعدين بصيتله في عيونه بحب
= عشان انت الوحيد اللي حسيت معاه بالامان اللي بحسه مع ملك
ابتسملي كانه كان مستني الاجابة دي
_ عارفة لما قلتلك اني بحلم بحاجة بقالي كتير وشكلها هحققها قريب
= ايوة صح مرضتش تقولي وقتها
_ عاوزة تعرفي ؟
= اه عاوزة اعرف يلا يلا قولي حلم اي دا
_ انتي ياليلي
= انا اي
_ انتي حلمي
وفي الخلفية الست كانت بتقول
وقابلتك انت لقيتك بتغير كل حياتي …..

تمت…

لقراءة الرواية كاملة اضغط على : (رواية صدفة حب)