رواية صدفة حب الفصل الأول 1 بقلم ندى زايد
رواية صدفة حب الجزء الأول
رواية صدفة حب البارت الأول
رواية صدفة حب الحلقة الأولى
_تيجي اسكندرية صد رد ؟
=صد رد اي ياليلي ياحبيبتي وأمك هترضي ؟
_ياملك ماهي هتوافق لو معاكي وانتي عارفة كدا كويس بجد انا زهقانه أوي وخصوصا بعد ماسبت الشغل
= طب اعمل اي بس المدير رافض كل اجازتنا والله
_ هو مش قريبك يبنتي متتصرفي ولا تديله قلمين
= هو قريبي اه بس دا برا الشغل جوا الشغل ولا يعرفني وممكن يرفدني عادي
اتنهدت بحزن وانا بحط ايدي علي خدي بقلة حيلة بصتلي ملك شويه وحسيت اني صعبت عليها قربت مني وطبطبت علي كتفي
= طب بصي هنتفق خدي مفتاح شقتنا اللي هناك وانا يومين اخلص الشغل اللي ورايا وأحصلك اي رايك
_ وانا هعمل اي هناك لوحدي وماما مش هترضي وانا مش هعرف اتصرف انتي عارفاني ياملك
= يستي جمدي قلبك كدا هبعتلك اللوكيشن وهقولك العنوان بالظبط تقوليه لاي سواق تاكسي اول متنزلي من المحطة وكدا كدا انتي عارفة الشقة ولو علي طنط انا هتصرف معاها ومش هتاخر عليكي والله فكي بقي
ابتسمت بهدوء أنا بجد محتاجة أغير جو محتاجة أبعد وأبقي لوحدي وأهي فرصة أثبت لنفسي اني بعرف اتصرف لوحدي من غير حد….
معرفش ازاي بقيت واقفة هنا قدام الشقة وبفتح بابها بالمفتاح اللي معايا ..طب مالموضوع بسيط اهو امال انا مكبرة الحكاية ليه
دخلت الشنط بتاعتي وفكيت الطرحة ورفعت شعري بهدوء وبدأت اشيل كل الملايات اللي مغطية عفش البيت وانضفه ودخلت رصيت الاكل اللي معايا في التلاجة ودخلت الاوضة رصيت هدومي في الدولاب ولاقيت التليفون بيرن وكنت متاكدة انها ملك
= ها عملتي اي وصلتي ؟ متهتيش صح حد عملك حاجة
ابتسمت من خوفها عليا وكانها جوزي مش صاحبتي !!
_ لا يستي وصلت سالمة ونضفت الشقة ورصيت هدومي وفضيت حاجة التلاجة كله كله
= دا اي الشطارة دي كلها ياست ليلي دا احنا استغنينا خالص
ابتسمت وانا عارفة انها بتشجعني عشان مخافش وانا لوحدي مع ان اللي عملته بسيط واي كائن حي هيعمله بس هي ملك دايما لازم تحسسني اني سوبر هيرو
_ طب هتيجي امتي يختي عشان مستغناش
= مش عارفة والله ياليلي بس متخافيش مش هتاخر عنك والله .. اتبسطي بالاجواء ولو احتاجتي أي حاجة كلميني أنا هنا أي وقت
ابتسمت وقفلت معاها وكلمت ماما طمنتها عليا ودخلت عملت سندوتش اكله ووقفت في البلكونة اتنفس هوا اسكندرية الجميل … قد اي البلد دي مميزة وهواها جميل رغم انها بسيطة بس فيها حاجة بتشدني دايما …وعدي اليوم في هدوء وقررت انام بعد يوم طويل من السفر وتنضيف للبيت نمت محستش بالدنيا غير تاني يوم الضهر … قمت بكسل فتحت الستاير وصليت وقريت قرآن وبعدين قررت اقوم اشوف هجهز اي للغدا حاسة اني صاحيه مفجوعة … طلعت طاسة اعمل بيها بيض افطر واغذي نفسي مؤقتا بس سمعت صوت برا خروشة كدا كأن حد بيفتح الباب خرجت والطاسة في ايدي وأنا خايفة وبترعش من الخوف قربت من الباب ولاقيت فعلا حد بيفتحه كتمت أنفاسي وانا مش عارفة أعمل اي ومين الحرامي دا اللي استني لحد مااجي مكانت فاضية مجاش ليه اي الحظ دا بس !!
فجاة لاقيت الباب اتفتح ودخل منه شاب طويل شهقت بصوت عالي وقبل ميلف وشه ولا حتي يستوعب خبطته بالطاسه علي دماغه … بصيت عليه وانا بترعش وقربت منه
اوعي تكون مت الله يباركلك والله مكان قصدي انا اتخضيت بس
يااكابتن ياحرامي يااستاذ ونبي اصحي .. مجتش وهي فاضية ليه بس يعني حرامي وأهبل
نزلت عدلته بصعوبه وبصيت عليه لاقيته شاب حلو واسمراني ولابس كمان هدوم نضيفة
يعني كل النضافة دي وجاي تسرق !!
قربت منه لاقيته بيتنفس ومفيش دم ولا حاجة عرفت انه بس أغمي عليه اتنهدت بارتياح وبعدين خفت تاني انا معرفش حد هنا ولو صحي ممكن يعمل فيا حاجة … فضلت أعافر معاه لحد مقعدته علي كرسي وجريت ادور علي أي حبل وربطته في الكرسي وفضلت قاعدة قدامه بتوتر ومستنياه يصحي وميكونش جراله حاجة … عدي الوقت ببطء وأنا راحة جاية مستنياه بس يتحرك فجاة سمعت صوته وهو بيتالم وبيفتح عينه براحه وقفت قدامه وأنا عامله اني متماسكة وماسكة الطاسة عشان احمي نفسي بيها … فجاة فتح عينه وقعد يتالم وبصلي باستغراب
_ اي دا ف اي اي اللي حصل
= انت مين
_ انتِ اللي مين وبتعملي اي هنا
= يعني حرامي وكمان بجح
بصلي وهو بيرفع حواجبه وبيسالني بحدة
_ حرامي ؟!
اتالم تاني من راسه وبجد صعب عليا بصلي وبص للطاسة في ايدي وكانه بيستوعب
_ انتي ضربتيني بالطاسة دي ؟
= اه بجد طلعت جامدة اوي الواحد محتاجله واحدة في الشنطة
_ اي جو ريبانزل دا ؟
بصتله باستغراب وبعدين استوعبت وافتكرت ان فعلا عملت زيها ابتسمت حقيقي انا بحب الاميرات اوي وبعدين استغربت انه يعرفها
= انت تعرف ريبانزل بجد ؟
_ اه ومش شايف شعرك سحري يعني عشان ابقي جاي اسرقه
بصيت لنفسي فجاه وانا بستوعب اللي قاله صوت في وشه وجريت علي اوضتي وانا بلعن غباءي اني ملبستش اي حاجة وهو مغمي عليه وعامله ناصحة اوي دخلت لبست الاسدال بتاعي وخرجتله تاني وانا حاسة انه قرب يفقد اعصابه وهو عمال ينادي
_ ياستي .. ياأنسة … يامدام .. تعالي فكيني انتِ رحتي فين … دا اي الورطة دي ياربي
= متعليش صوتك ياجدع انت .. أفكك ازاي دا أنا هسلمك للبوليس
_ بوليس اي وجنان اي انتي مين وبتعملي اي هنا في بيتي
= بيتك ؟ … بقولك اي متفتكرش اني عبيطة البيت دا بتاع ملك وأحمد اخوها وانا مش تايهة عن احمد اخو صاحبتي يعني للدرجة دي فمتحاولش تضحك عليا
ابتسملي بسخرية
_ أخيرا عرفت الجنان دا اي حضرتك صاحبه ملك هانم والله لأطين عيشتها متهببتش قالتلي ليه انها مديه المفتاح لصاحبتها ياربي علي الورطه دي
بصتله باستغراب وانا بساله بشك
= هو انت تعرف ملك ؟
_ اه يختي لأجل حظي المنيل تبقي بنت خالتي هي وأحمد وانا متعود باجي هنا عشان شغلي والغبية مقالتليش ان صاحبتها هنا
= بقولك اي متغلطش في صاحبتي ياجدع انت
_ دا انا هكسر دماغها بس فكيني بس
رميت الطاسة علي الكنبة وقربت منه وأنا بجد محروجة منه وعلي اللي عملته فيه وبدات افكه
= أنا بجد أسفة أوي أنا مكنتش أعرف والله أنا افتكرتك حرامي بجد والله مكنتش أقصد
_ هو فيه حد بيجي يسرق شقة وهو معاه مفتاحها برده
= انا كنت خايفة ومركزتش بجد أنا مش عارفة أنا عملت كدا ازاي انا اسفة
_ يعني واحدة صاحبة ملك هستني منها اي أنا
عيني اتملت بالدموع من كتر الاحراج وانه اي حاجة هيقولها مش هعرف ارد عليها … قام من مكانه وهو بيتالم تاني وبيحط ايده علي راسه بوجع قريت منه تاني وانا بساله
= بتوجعك ؟
لف بوشه وبصلي فجاه وساعتها عيطت لاحساسي بالذنب
_ يالهوي بتعيطي ليه انتي دلوقتي .. يبنتي انا كويس والله مفيش حاجة متعيطيش ..ياانسة يااسمك اي انتي
رديت وانا بمسح دموعي بابتسامه
= اسمي ليلي
_ وأنا عامر وبجد متضايقيش من كلامي أنا مش قصدي
= أنا اسفة ياأستاذ عامر والله استني هنا ثواني
دخلت المطبخ بسرعة وخرجتله وانا بمد ايدي
= خد حط دي علي دماغك هتريحك شوية
بصلي وبص لايدي شويه وهو بيضحك
_ هحط علي راسي بسلة ياليلي
= أعمل اي ماهو مفيش أكياس تلج بس دا كان ف الفريزر يعني ساقع هيهديك شويه خد بس جرب مش هتخسر حاجة
ادتهوله وسبته بيضحك وخدت تليفوني وخرجت البلكونة اتصلت علي ملك حكتلها كل اللي حصل
وصلي صوت ضحكها في التليفون وكانت تقريبا بتشرق من كتر الضحك
* يالهوي ياليلي دا انتي بهدلتي الراجل خالص بالطاسة ياليلي
وكملت ضحك تاني وكأنها قاصدة تغيظني
* انتي عارفة لو خالتو عرفت اللي عملتيه في ابنها هتعمل فيكي اي
_ونبي اتنيلي دلوقتي واسكتي أنا مش عارفة أعمل اي أنا محرجة منه أوي ومش عارفة أعمل اي دلوقتي
* تعملي اي في اي ؟
_ هطرد الراجل من بيته يعني مالازم أمشي
* بطلي هبل ياليلي تمشي فين انتي متعرفيش أماكن هناك وهو مقاليش انه عنده شغل دي غلطته يبقي يمشي هو انا هكلمه و …
_ اياكي ياملك والله أزعل منك أنا أصلا مضايقة بجد من نفسي ومكسوفة منه متزوديهاش عليا بالله عليكي
* أيوة ياليلي يحبيبتي بس هو هيعرف يتصرف عامر حافظ اسكندرية كويس لكن انتِ …
_ ملك بصي اقفلي دلوقتي هشوف هعمل اي وأكلمك تاني
مدتهاش فرصة للرد تاني وقفلت دخلت أطمن عليه وعلي دماغه دي بجد الإنسان في نص هدومه …لاقيته حاطط كيس البسلة علي دماغه وشكلها ريحته فعلا ابتسمت شكله بجد كان يضحك
_ شفت البسلة شكلها اشتغلت
ابتسملي وبصلي بطرف عنيه
= أصل لاقيتها بالجزر وانا بحبها كدا
ضحكت بجد طريقته وهو بيقولها ضحكتني معرفش ليه كاني بتلكك عشان اضحك فضل يبصلي شويه بطريقة وترتني فسكت
_ بص ياأستاذ عامر أنا فعلا أسفة ولو اني عارفة إن أسفي مش كفاية .. أنا عاوزاك تديني بس نص ساعة هلم حاجة واشوف اي مكان اقعد فيه علي مااملك تجيلي …
= هتروحي فين ؟
_ والله منا عارفة … يعني لو تعرف فندق هنا ولا بيوت بتتاجر تبقي عملت معايا واجب والله …
= لا خليكي هنا مش هتمشي
بصتله بعصبية وانا بقربله وبرفع صباعي في وشه بتحذير
_ مش معني إني عمالة أتاسفلك انك تتجاوز حدودك معايا عاوزنا نقعد مع بعض في بيت واحد انت اتجننت ولا اي ياجدع انت
= بس بس اسكتي شويه انتي مبتعرفيش تفكري ابدا لازم تدخلي زي القطر كدا متجربي تسمعي
بصيتله بعصبيه وربعت ايدي قدامي وبصتله بسخرية وانا مستنياه يكمل البيه المش محترم دا
= الشقة اللي قصاد الشقة دي تبقي بتاعتي بس انا قافلها اغلب الوقت لاني متعود باجي هنا مع احمد انا لو اعرف انك هناك صدقيني مكنتش ازعجتك فانا هروح هناك وخليكي انتي هنا ..انتي زيك زي ملك وانا مرضاش تتبهدلي
بصتله تاني وانا بجد بلوم نفسي علي استعجالي فركت في ايدي بتوتر وانا احراجي منه بيزيد قربت منه وبصتله بطريقة طفوليه
_ ينفع أتاسف تاني ؟
معرفش ضحك ليه يمكن علي طريقتي او شكلي بس بجد ضحكته حلوة اوي المحترم الجميل دا
= متتاسفيش محصلش حاجة انا عارف انك لسه متوترة من اللي حصل عموما انا هروح هناك ولو احتاجتي حاجة انا موجود عن اذنك
خرج من البيت بهدوء وانا قعدت علي الكنبة اتنفس براحة في الوقت اللي ملك كانت بترن عليا
_ اي ياليلي عملتي اي طمنيني
حكتلها كل حاجة حصلت وعن قراره وانه راح الشقة التانيه
= طول عمري اقول خالتي عرفت تربي والله … بصي هو تقريبا التربية دي معاكي انتي بس لانه بيرن عليا وشكله كدا هيهزقني فسلام انتي دلوقتي
قفلت وانا ببتسم ومتخيلة خناقتهم دلوقتي …قمت قلعت الاسدال تاني ورجعت للمطبخ اجهز الغدا وحقيقي كنت بفكر فيه وقررت اعمله غدا معايا كنوع من الاعتذار عن كل اللي عملته دا … وبكل الحب عملت اكلتي المفضلة بشاميل وبانيه … صليت المغرب ورصيت صينية ليه ومعاها كوباية عصير ورحت خبطت علي بابه
_ أهلا ياليلي فيه حاجة ؟
= عملتلك أكل معايا عشان تسامحني
ابتسم وبصلي بحنية
_ مسامحك من غير حاجة والله بس جيتي في وقتك أنا جعان أوي ومبعرفش أعمل حاجة
مديت ايدي بالصينيه بصلها بحب طفولي وشكله كان حلو اوي
_ الله دا أكلتي المفضلة بقالي كتير اوي مكلتهاش شكرا اوي ياليلي بجد
انسحبت بهدوء عشان محرجوش بس بجد شكله كان يضحك اوي كأنه طفل مش واحد كبير ابدا .. رحت كلت أنا كمان وقد اي الاكل كان جميل مش عارفة عشان انا اللي عملاه ولا عشان قررت اشاركه معايا !!
اليوم عدا ببطء أوي قعدت أقرا رواية لحد مخلصتها ومبقتش لاقية حاجة أعملها بجد كنت مفتقدة ملك اوي خرجت البلكونة أتنفس هوا اسكندرية
_ بس بس بس بس
= اي دا خضتني في اي
_ مستنيكي بقالي كتير علفكرة
= فيه حاجة ولا اي
_ أصل الأكل كان حلو أوي بجد
= بجد عجبك
_ احلي اكل كلته في حياتي
قد اي كنت مبسوطة كلامه البسيط فرحني حتي لو معرفش ليه لاقيته بيمد ايده بكوبايه شاي من السور اللي فاصل بينا في البلكونة
_ عملتك كوباية شاي بالنعناع اي حكاية الحاجة الوحيدة اللي بعرف اعملها
= تسلم ايدك والله
فضلنا ساكتين بنستمتع بكوباية الشاي وفضلت أتامل العمارات والاماكن حوالينا
_ كنتي زهقانة ولا اي ؟
= اوي بجد مفتقدة ملك جدا
_ شكلك بتحبيها اوي
= ملك ؟ ملك دي احلي حاجة حصلت في حياتي انت عارف وانا صغيره كنت انطوائية ومبصاحبش حد هي الوحيدة اللي سمحتلها تقرب مني وهي الوحيدة اللي فضلت صحبتي طول السنين دي ..ملك عمرها مسابتني عارف ماما وافقت اني اجي هنا لوحدي عشان عارفة بس ان ملك معايا ومش بتتطمن غير لو ملك حواليا وحقيقي انا مبعرفش اعمل حاجة من غيرها وجودها بيطمني وبيخليني اعمل كل حاجة من غير مااخاف
_ امال اما تتجوزو هتعملو اي
= والله مش عارفة خايفة ياخدها مني اوي بجد بس انا عارفة انها مش هتسمح بكدا لا .. وبعدين انا مش هتجوز غير لو لاقيت حد اطمن معاه زي ملك كدا غير كدا انسي
بصلي كتير ومفهمتش نظرته وفضلنا نتكلم كتير سوي في مواضيع كتير والوقت عدي بسرعة من غير مااحس لحد ملاقيت الوقت اتاخر استأذنت ودخلت أنام … صحيت علي صوت الفون وهو عمال يرن برقم مش متسجل
_ الو .. مين … يعني محدش يتصل بحد بدري كدا
= انتي اللي كسولة
_ انت مين وعاوز مين
= انتي مش عارفة صوتي بجد
_ انا نايمة ومش عارفة صوت حد عاوزة انااام
= ليلي أنا عامر
بدات افوق واستوعب وابص للتليفون بصدمة
_ عامر ! عامر ازاي انت جبت رقمي منين
سمعت صوت ضحكته وسكت شويه
= خدته من ملك هو مش سر حربي يعني
_ وملك ادتهولك عادي كدا ؟
= انا بعرف اتعامل معاها المهم قومي يلا الساعة عشرة
_ واي يعني مالسة بدري ورانا اي يعني
= ورانا فطار عازمك عليه في مكان هيعجبك اوي
_ بجد والله هتفطرني هخرج بجد احلف كدا
= والله قدامك نص ساعة لو اتاخرتي همشي
قمت بسرعة من علي السرير وانا بجري
_ اقفل اقفل انا جاية اهو انا لبست اصلا
قمت وانا بلف حوالين نفسي غسلت وشي وصليت وطلعت بنطلون اسود علي بلوزة زيتي وطرحتي السودا المفضلة وخدت شنطتي وخرجت بسرعة لاقيته واقف علي الباب
_ شفت متاخرتش ازاي ؟ انت واقف كدا ليه مكنت هخلص واخبط عليك
= عشان دايما الاميرات لازم يبقي فيه حد في استقبالهم
كلمته خلتني اسكت لاقيته اتحرك قدامي ونزل من علي السلم مشيت وراه في هدوء لقيته بيركب عربية اللي فهمت انها بتاعته واتحركنا لحد موصلنا مكان جميل اوي قعدته كلها كانك في براندا وديكورات هاديه وكمان قدام البحر !! دا اي الحلاوة دي
_ الله ياعامر المكان شكله حلو اوي ملك عمرها ماجابتني
هنا
كمل كلامه وهو بيشدلي كرسي اقعد عليه زي الافلام
_ اساسا ملك انا اللي معرفها كل حاجة هنا فانا الاستاذ يبنتي
= الله عليك ياواد ياجامد
كملت كلامي بغمزة من عيني وحقيقي اتحرجت بعدها انا لازم اخد بالي من تصرفاتي اكتر من كدا وكانه حس باحراجي فبدا يغير الموضوع
_ المهم تفطري اي كرواسون وشاي وحاجات التصوير دي ولا فطارنا المصري الاصيل
= بص هي الاجواء دي عاوزة كرواسون فعلا بس معلش الحاجات دي مبتشبعش احنا نطلي فطارنا الحلو وبعدين نجيب كرواسون وكوبايه شاي ونلقطها صورة مع البحر اي رايك
بصلي وقعد يضحك وصوته علي من كتر الضحك وحسيت البنات حوالينا بيبصوله باعجاب وهو فعلا ضحكته بتحليه اوي
_ انتي مشكله ياليلي بجد
طلبلنا الاكل وشويه ووصل وبجد طلب المطعم كله تقريبا لقيت طعميه وفول وبيض وجبن ومربي ولانشون وحاجات كتير اوي قعدنا ناكل وبجد الاكل كان حلو اوي مش عارفه بقيت استمتع بالاكل هنا كدا ليه …خلصنا ولاقيته جاب كرواسون زي مطلبت وقعد يصوره مع ايدي وكانت صور جميلة اوي … خلصنا وفتحت شنطتي اطلع فلوس اشارك معاه
_ انتي بتعملي اي ياليلي فاكرة انك خارجة مع ملك ولا اي
= لا ابدا والله بس انت طلبت اكل كتير اوي حرام تدفع دا كله لوحدك نتقاسم سوي مفيهاش حاجة
_ ليلي رجعي فلوسك الشنطة اما ابقي احتاج فلوس هبقي اقولك عيب كدا
= والله ماقصدي حاجة بس يعني ميصحش انت مش ملزم تدفعلي و ..
_ ملكيش دعوة هو انا كنت دفعتلك حق اكل امبارح هو حد بيعزم حد يقوم مدفعه فلوس متزعلنيش بقي
سكت وبصتله بهدوء وابتسمت حاسة عامر يشبه لاحلامي اللي بحلمها كل يوم كانه خارج من كتاب حواديت … خلص وخدني اتمشينا علي البحر واتصورنا صور جميله اوي كنت مبسوطة اوي وكان الدنيا كلها بتضحك معايا
_ عارف الخروجة دي ناقصها ملك
= مش مبسوطة معايا ولا اي ؟
_ لا والله دا انا مبسوطة اوي .. بس ملك كانت هتتبسط اوي مش هاين عليا افرح كدا من غيرها بس هنقول اي كله من مديرها الحلوف دا
= حلوف ؟
_ اه بجد مع انه قريبها يعني فيها اي لو خدت اجازة شويه يعني هتخرب الشركة هيقفلو الصبح مش راضي يدي اجازات لحد خالص وهي بجد محتاجة اجازة عديم الاحساس
= كمان ؟
بصتله وبصيت لنظراته وحسيت اني عكيت
_ بص انا اسفة انا نسيت ان كلكو قرايب بس بجد مش قصدي بس بجد بيعامل ملك زيها زي اي حد كدا
= دا الطبيعي ياليلي الشغل شغل مينفعش تدخلي حياتك الشخصية في شغلك والا مش هتنجحي
_ بس ملك تعبانه بجد شغاله ليل نهار وتستاهل الاجازة دي حتي لو شغالة مع حد غريب فانا شايفة انها تستاهل
سكت لما تليفونه رن فضلت باصة للبحر وانا بتمني افضل جمبه علطول
= ليلي معلش تعالي نتحرك دلوقتي هقابل واحد يديني ملفات مهمة للشغل وبعدين هروحك اتفقنا
هزيت راسي ببساطة وركبت معاه العربية لحد موصلنا قدام شركة سابني وقال انه مش هيتاخر عليا .. تليفوني رن وكانت ملك
* مكلمتنيش يعني طول اليوم بتعملي اي من غيري يابت
_ ابدا بتفسح
* اوعا صحبتي بقت بتلف وتتفسح ودا لوحدك بقي ؟
_ لا عامر اللي بيفسحني
* عامر ؟ اممم قولتيلي دا انا فايتني كتير بقي
_ بس يابت انتي دا انا صعبت عليه باين فقال يحن عليا يعني
* هو دا بيصعب عليه حد دا
_ ليه كدا دا شكله طيوب خالص والله
* مش بقولك فايتني كتير
_ بت هتيجي امتي بجد وحشتيني بقي
* والله قولي للبيه اللي عندك يحن عليا زيك كدا وانا اجي
_ وعامر ماله ومالك دلوقتي
* سايبني محتاسة ورايح يتفسح ويفك عن نفسه والله لاقلب خالتي عليه
_ يبنتي مش فاهمة حاجة مال عامر بيكي واي دخله في شغلك
* ليلي فوقي معايا يحبيبتي ماعامر يبقي المدير بتاعي يحبيبتي
_ اي … !!!!
يتبع…
لقراءة الفصل التالي: اضغط هنا
لقراءة الرواية كاملة اضغط على : (رواية صدفة حب)
