رواية صدفة أم قدر الفصل العاشر 10 بقلم سمية عبدالسلام
رواية صدفة أم قدر الجزء العاشر
رواية صدفة أم قدر البارت العاشر
رواية صدفة أم قدر الحلقة العاشرة
كانت تعبر الطريق غير منتبهة لتلك السيارة المتوجهة نحوها بسرعة،
فقالت علا بصوت عالي وهي ترى السيارة تقترب من ندى _حاسبي ياندى.
توقفت أرجُل ندى عن الحركة لتتصنم محلها من هول الصدمة لكن لحسن الحظ ان رحيم قد وصل بسيارته ومعه صديقه اسر ،لم يفكر كثيراً وركض نحوها ودفعها بعيداً حتى سقط الإثنين على الارض.
ذهبت لهم علا ومعها لين وقالَ الاثنين في صوت واحد _انتِ كويسة؟!
وقف رحيم سريعاً ينفض الغبار عن ملابسه ،اما ندى كانت تنظر لـ ملابسها واردفت بغيظ_عاجبك كده؟ ده الطقم لسه جديد.
صعق اسر او بالاحرى صعق الجميع من كلمات هذه الفتاة فـ بدلاً من ان تشكره على انقاذه لها تقوم بتوبيخه على اتساخ ملابسها ببعض الغبار.
ليقول اسر مدافعاً_ده بدل ما تشكريه؟!!
ابتسمت لين بخجل من هذا الموقف وقالت وهي تنظر لـ رحيم _شكراً ليك يا دكتور رحيم.
رسم رحيم ابتسامة خفيفة على وجهه فقالت علا هامسة باُذن ندى _انتِ تعرفيه ياندى؟
اجابتها بلا مبالاه _اه ما هو ده خروف العيد اللي قلتلك عليه.
اتسعت حدقتا عين علا و لين التي سمعت حديثها من الذعر ثم نظروا لرحيم الذي كان يحاول ان يتمالك اعصابه.
_تصدقي بالله،قولي لا إله إلا الله.
_لا إله إلا الله.
_انا لو لفيت العالم ده كله عمري ما هلاقي واحدة لسانها طويل زيك.
_ياعم اتنيل انت لاقي تاكل عشان تلف العالم.
وضعت علا يدها سريعاً على فم ندى لـ تبتسم ببلاهة وتقول _شكراً لحضرتك يادكتور انك انقذت بنت خالتي.
_لا شكر على واجب.
ثم اقترب بضع خطوات من ندى التي شعرت لوهلة بالخوف وقال بهدوء _قلتها لك قبل كده وهقولها لك تاني.
ارتد نظارته الشمسية التي ذادت من هيبته وقال بهدوء جعلها تشعر بالرعب _انا اسمي رحيم بس ما برحمش حد.
ثم تركهم وذهب ومعه اسر وصعدوا للسيارة من جديد.
كانت تنظر له بغيظ التفت لتقول لـ علا_شفتي مستفز ازاي؟!
لتجيبها الاخرى بعصبية _شفت في عينك ،بقا الراجل انقذ حياتك من المو”ت وانتِ بتشتميه؟!!
لين هي الاخرى لتردف بسخرية _ودكتور رحيم اللي مش لاقي ياكل ؟ ده راكب عربية اغلى من حياتي انا شخصياً.
_بردو هيفضل خروف العيد بالنسبة لي.
_لين ،البت دي شكلها ناوية على رفد وانتِ كمان معاها.
تصنعت الخوف وهي تقول _لأ رفد ايه انا هقطع علاقتي بيها.
_جدعة ،يلا احنا نروح الكافيه وخليها هي واقفة كده يمكن العربية ترجع تاني وتهفها خلينا نخلص.
_يلا بينا.
وضعت علا يدها في يد لين وتحركوا تاركين ندى خلفهم لتقول وهي تحاول اللحاق بهم _يابنات استنوا انا جاية معاكم.
________________________________
كان يجلس على مكتبه وامامه سَليم المنشغل ببعض الاوراق _كده تمام ،عايزك تراجع الورق ده كويس عشان المناقصة.
رفع سليم رأسه وهو يعدل من وضعية الاوراق امامه _اعتبره حصل ،بس قلي هتعمل ايه مع اللي اسمه انس الصاوي احنا قلنا له يومين والنهاردة التالت.
رجع بظهره للخلف وهو يقول _مراد لسه مكلمني وقال ان جدك طلب منه يروح لصاوي ويبلغه ان زكريا المنشاوي عايزه.
_وهتعمل ايه؟
_هقلك…
ثم سمع صوت الطرق على باب المكتب فقال ادهم _ادخل.
دلف فارس وقال وهو يتبادل نظراته بين ادهم وسليم _كنت عايز اتكلم معاك يا بشمهندس لو ده مش هيعطلك.
اشار له ادهم بالجلوس وقال _طالما مش قادر تستنى لحد لما نتقابل في البيت بالليل يبقا الموضوع مهم ،اتكلم يافارس.
صمت فارس ففهم سليم انه لا يود التحدث امامه فقال _همشي انا عشان رايح اعاين الموقع.
_خد حد معاك من المهندسين.
_لأ ما انا هاخد سالم.
_تمام ،بس مين سالم ده؟
ابتسم سليم وقال _السكرتيرة بتاعتي ده لقبها الجديد قالت انها عندها محاضرات وهتخلص وهتسبقني على هناك ،يلا سلام.
ابتسم ادهم على ابن عمه وقال _سلام.
ثم اعاد بصره لفارس الذي قال وبدون اي تمهيد _انا عايز اسيب نرجس.
________________________________
كان يقود السيارة وبجواره يجلس اسر الذي اردف _انا مش فاهم المفروض انه عايز يكسرك زي ما عمل مع ابوك زمان ليه بقا بيحاول يأذي البنت دي بغض النظر عن انها كانت تستاهل بطولة لسانها دي.
كان ينظر للطريق في صمت حتى قال _وانت ناسي البنت دي مين.
_لأ مش ناسي ومش ناسي كمان انه كان بيلوي دراعك بـ رحمة.
تحولت ملامح رحيم للغضب عندما تذكر ما كان يفعله طارق عبد الحميد بـ المسكينة رحمة وقال بشر دفين _نهايته هتكون على ايدي بس الصبر.
_رحيم انت لازم تقول الحقيقة ويا يصدقكوا يا ما يصدقكوش وسعتها نشوف خطة تانية.
اوقف رحيم السيارة ونظر لـ اسر _محدش هيصدقني بعد السنين دي كلها.
ابتسم اسر وقال بثقة كبيرة _بس في شخص واحد متأكد انه هيصدقك.
ضم حاجبيه وقال بستفهام _مين ده؟
_زكريا المنشاوي.
_________________________________
نهض ادهم من كرسيه ليتجه للكرسي المقابل لـ فارس اما فارس كان يحاول جاهداً ان يخفي دموعه فقال ادهم بهدوء _انا مش من حقي اسألك انت عايز تسيب نرجس ليه بس انت زيك زي اي حد من اخواتي واكتر وتهمني مصلحتك.
صمت قليلاً ثم اكمل حديثه _انت شايف ان ده القرار الصح؟
نظر لـ ادهم وعيناه تملأها الدموع وقال بصوت متعب _تعبت يا ادهم تعبت ،كل انسان وليه طاقة وانا طاقتي خلصت ،انا بشتغل شغلنتين ومش راحم نفسي عشان اجبلها كل اللي نفسها فيه وبردو مش عاجب يبقا خلاص طالما كده مش عاجب وكده مش عاجب كل واحد يروح لحاله.
كان ينظر له وهو يتحدث اخرج تنهيدة وقال _متخليش زعلك منها يغمي عينك عن حاجات حلوة تانية كتير ،مش دي نرجس اللي كنت هتمو”ت وتخطبها ،ده انتم بقالكم سنة وخلاص المفروض فرحكم بعد العيد.
اجاب بضيق _ايوة بس اكتشفت انها مش مناسبة ليا.
ردد كلامه بسخرية وقال _مش مناسبة ليك؟ واكتشفت ده بعد سنة خطوبة انت فكرت لما تفسخ خطوبتك الناس هتقول عليها ايه؟
_كل ده مش مهم.
_بنات الناس ماينفعش نعمل معاهم كده يا فارس.
نظر للجانب الاخر وقال _يعني عايزين افضل كده ولو فضلت كده هكرها يا ادهم وانا مش عايز كده.
_ومين قال كده انت المطلوب منك تقعد معاها اتكلم فهمها غلطها براحة نرجس لسه صغيرة يمكن مش فاهمة نتيجة تصرفاتها دي ولازم تكون حنين عليها واهم من ده كله انك متستخدمش اسلوب التهديد معاها أن لو مغيرتش من نفسها انت هتسبها لأ المفروض انك تحسسها بالأمان يعني مهما يحصل عارفها انك مش هتتخل عنها وصدقني نرجس بتحبك وهتعمل اللي انت عايزه.
زفر بضيق_حاضر يا ادهم.
رجع بظهره للخلف وقال _نرجس بنت حلال يا فارس متضيعهاش من ايدك.
_________________________________
جلس ثلاثتهم لتقول علا بأستنكار مع ابتسامة على وجهها _بقا القمر ده تقولي عليه خروف والله ما حد خروف غيرك.
كانت تنظر لها وهي ترفع إحدى حاجبيها مع لوية شفتيها فقالت لين مازحة _قمر ،ده انا كده اكلم احمد واقله الحق خطيبتك بتعاكس الشباب.
ضحكت علا وهي تتذكره لتقول بهيام _احمد ،احمد ده نعمة من ربنا ده كفاية حنيته عليا ده عمره جه في مرة وسابني انام زعلانة.
ابتسمت لين وقالت _ياسيدي ياسيدي.
أضافت ندى معلقة على حديثها _على سيرة احمد ،علا متقليش لـ احمد على موضوع الحادثة ده عشان ميتخضوش عليا عشان انا عرفاك مش بيتبل في بوقك فولة.
_عيب عليك.
لكن قالت لين بأعتراض _بس لازم يعرفوا العربية دي كانت قاصدة تخبطك.
_ابوس ايدك ده لو عرفوا حاجة زي دي مش بعيد يقعدوني من الجامعة مرحش غير على الامتحانات.
_ليه كده؟
_عشان ندى هي البنت الوحيدة في البيت والكل بيخاف عليها.
ضيقت عينها وهي تنظر لـ علا فقالت _عيب عليك ياندى سرك مش هيخرج برى مصر.
_______________________________
كانت تسير بجواره محاولة مواكبته في السير لكن سليم كان سريع للغاية فـ هو يتعمد ذلك محاولة لاغاظتها.
اما سلمى بعدما انتهت من محاضراتها اتجهت لمتجر يبيع الملابس وقامت بتبديل ملابسها إلى ملابس واسعة جداً وهذا ما يعيقها عن السير ولكن لا ننسى النظارة وبعض من الmakeup على وجهها وعلى ذكر الmakeup هذا التي تضعه سلمى على وجهها لا ينتمي لل makeup بصلة لا اعرف ماذا اسميه لكن ليس makeup بتاتاً.
خرج صوتها وهي تحاول اخذ نفسها _حضرتك انا ماشية معاك فممكن تمشي براحة ده لو مش هيزعل روح المرسيدس اللي جواك.
نظر لها بطرف عينه وقال _مش ذنبي انك سلحفة وبعدين اجمد كده يا سالم.
اغلقت عينيها بضيق وفتحتها ثم قررت ان تقوم بالرد على اهانته لها ومنادتها بهذا الاسم لكن قطع سليم افكارها عندما قال _وصلنا.
نظرت للمكان كانت عمارة قيد البناء فقالت _ده الموقع ؟ انا مش شايفة حد.
_تلاقيهم واخدين استراحة او بيشتغلوا جو تعالي ندخل.
دلف الاثنين للعمارة ودخل شقة بها كانت تنظر للمكان وتحاول السير فـ الارض مليئة بحبيبات الرمل وغيرها من ادوات البناء الـ ملقاه أرضاً سمعت صوت لتقول بخضة _ده صوت الباب بيتقفل.
كان ينظر للمكان هو الاخر وقال بعدم اهتمام _تلاقي الهوا قفله مش مشكلة يعني.
_ايوة بس الباب مفهوش اكُرة من جوا.
ذهب سليم وخلفه سلمى وجد الباب مغلق وبالفعل كما قالت سلمى اخرج هاتفه ليقوم بالاتصال فقالت سلمى _بترن على مين؟
اجابها وهو يضع الهاتف على اُذنه _برن على عم حسين رئيس العمال هنا.
زفر بضيق وقال وهو يضع الهاتف في جيب بنطاله _مقفول ،شكل مافيش شبكة في المكان.
_يعني ايه اتحبسنا هنا؟!
_متقلقيش هتصرف.
_انا مرة قرأت في رواية 5 صحاب دخلوا مكان واتحبسوا فيه وعشان يخرجوا والباب يتفتح كان لازم كل شخص يقول سر صحبه ميعرفوش عن التاني وبعدين الباب هيتفتح.
_وبعد ما كل واحد يقول السر اللي مخبيه يكتشفوا ان فيهم القا”تل وفيهم الخاين والباب هيتفتح بس بعد ما يكونوا خلصوا على بعض صح؟
اردفت بسرعة _اي ده انت قرأت الرواية؟!
_رواية ايه ؟ده فيلم اجنبي.
_طيب ما تجرب تقله افتح ياسمسم يمكن يفتح.
قال بنفاذ صبر _ليه فاكرة نفسك في مغارة علي بابا اسكتي ومتتكلميش تاني.
_والحل؟
نظر لها سليم وقال بجدية _معاك طفاشة؟
___________________________________
كانت تنظر لـ قدر الجالسة على مائدة الطعام وهي تأكل حتى اتنبهت قدر لها وقالت ببتسامة _مش بتاكلي ليه ياطنط نجلاء؟
نظرت للخبز بيدها وقالت_اصلك فكرتيني بحد عزيز عليا كان زيك كده يقطع في الرغيف قطع صغيرة وما يكلش غير واللقمة تكون متساوية واد بعضها.
نظرت قدر للخبز ثم لسيدة نجلاء _انا كده من صغري عادة فيا مش عارفة ابطلها بس مين الشخص ده بابا علا؟
ابتسمت لكن اختفت الابتسامة عندما رأت علا تخرج من غرفتها وهي ترتدي اسدالاً اسود وتضع فوق رأسها طرحته التي كانت بنفس اللون فقالت نجلاء بسخرية من ابنتها _يابنتي لو اتطلقتي ولا جوزك ما”ت عرفينا واهو نحزن معاكي كلنا.
سحبت علا الكرسي وجلست لتتناول الطعام _ده كله عشان الاسدال؟
_لأ ياروح امك ده كله عشان لابسة اسود.
_طيب وربنا ما انا واكلة.
كانت تنظر لها وهي تأخذ الاطباق لتقول بسخرية_طيب لما انتِ مش هتاكلي بتشيلي الاطباق ليه؟
_لأ ما انا هدخل اكل في اوضتي.
قالت بصدمة وهي ترفع يديها الاثنين في الهواء_الضغط ارتفع الحقيني ياقدر ببرشامة الضغط.
_بس انتِ مش عندك الضغط ياطنط.
نجلاء وهي تضع يدها على صدرها _قلبي همو”ت مجلوطة يا ناس.
لترد عليها قدر مرة اخرى _بس القلب في الشمال مش اليمين ياطنط.
كانت علا تحاول كبت ضحكتها فقالت نجلاء_امشي ياعلا انتِ والبت دي احسن هتفرسني هي كمان.
حاولت قدر التخفيف عنها لتقول _خلاص متزعليش انا هروح اعملك كوباية القهوة انما ايه مشربتيش قبلها قبل كده.
ضمت علا حاجبيه بأستغراب _بس ماما مش بتشرب قهوة.
_لأ ازاي بتشرب بس لما تكون متضايقة.
لتقول علا متسائلة _وانتِ عرفتي منين اذا كان انا بنتها معرفش.
_لأ ما هو وردة هي اللي قالت لي.
_اه صح هي فين وردة؟
نجلاء وهي تنظر لقدر كا من يفكر في شيء ما وقالت _راحت الكُتاب.
نظر الاثنين لبعض وقالوا في صوت واحد _الكُتاب؟!!
___________________________________
_و دلوقت هسأل سؤال He بتاخد Has و لا Have ؟
اجاب الطفل الجالس امامها في مسجد السيدات _He بتاخد She.
وردة بسخرية _حلو اوي الحصة الجاية تيجي ومعاك المأذون.
سمعت وردة صوت ضحكة فقالت ببتسامة عندما رأتها _ازيك يامس نعمات.
نعمات (زوجة الاسطى إسماعيل)_الله يسلمك يا وردتي.
_يااه لسه فاكرة الاسم ده؟!!
_طبعاً ده انتِ كنت اول بنت احفظها القرآن لما جيت هنا الكُتاب صحيح ربنا مأردش لي الخلفة بس كنت بعتبرك بنتي.
_اللي يسمعك كده يقول إن عندك 50 سنة دول 30 سنة انتِ اكبر مني ب 6 سنين بس.
_وردة لو هتتعبي من شغلك كمدرسة انجليزي ومحفظة للقرآن عادي ممكن…
قاطعتها وردة _وانا حابة كده انتِ ناسية اني كنت بشتغل مدرسة انجليزي اصلاً لما كنت في السعودية يعني انا متعودة على كده ثم انا بعمل ده لوجه الله مش عشان الفلوس.
ابتسمت ثم قالت _اسمك وردة وانتِ وردة فعلاً.
_سامعة يامس نعمات؟
_سامعة ايه؟
_صوت زي ما يكون حد بيعيط.
التفتت حولها وقالت _بس المسجد مفهوش غيرنا الاطفال خلصوا ومشيوا.
لمحت وردة شيء يتحرك خلف المكتبة الصغيرة بالمسجد ذهبت ناحيتها وخلفها نعمات وجدت طفل يبكي ويخفي وجهه بين يديه انحنت سريعاً وقالت _بتعيط ليه؟
لم يرد عليها فكررت سؤالها فـ توقف الطفل عن البكاء وقال _عشان انا وحش.
تعجبت ورد فكيف ذلك فـ هو ذو ملامح جميلة فكيف يكون قبيح _بس انت جميل ليه بتقول على نفسك كده؟
الطفل _عشان…عشان…
ثم اجهش في البكاء اخذته وردة في حضنه وقالت _اهد ياحبيبي .
قالت نعمات وهي تربت على ظهره _انت اسمك ايه؟
_زين.
اخرجته وردة وقالت _الله اسمك جميل اوي يازين انت بتيجي هنا على طول؟
مسح دموعه وقال _لأ اول مرة اجاي.
ثم اصدر صوت غريب من فمه لكن لم تعلق وردة _جاي لوحدك ولا معاك حد؟
_لأ جاي مع بابا بس هو راح المسجد التاني.
_انت بتحب عصير القصب؟
اجابها ببتسامة كبيرة على وجهه_اه بحبه اوي.
_انا بقا ما بحبوش.
ضحك زين فقالت وردة _ايوة كده اضحك ولما طفل جميل زيك كده يقول على نفسه وحش امال انا اعمل ايه اروح ارمي نفسي في بلاعة.
_بس انتِ جميلة خالص.
_اللهي تنستر.
قالت نعمات هي الاخرى _ايه رأيكم نروح احنا التلاتة ونشرب عصير قصب.
_موافق.
صمت قليلاً واردف بحزن _بس بابا قلي ما رحش ما حد غريب.
ثم اصدر نفس الصوت مرة ثانية
وضعت وردة يدها على ذقنها بشكل مضحك يدل على انها تفكر في شيء ثم قالت _طيب ايه رأيك نقول لـ بابا ؟
خرجوا الثلاثة من المسجد ولكن سمعوا صوت يقول _زين.
التفت زين وقال وهو يركض نحوه _بابا.
قام بعناقه وبداله الاخر العناق وقال بخوف وقلق عندما رأى علامات الدموع على وجهه_انت كنت بتعيط؟
_اه بس طنط الجميلة دي وطنط اللي معاها هيجبولي عصير.
وقف والد زين واتجه نحوهم وقال بتذكر _مش انتِ اللي شفتك على النيل؟
ابتسمت وقالت _اه هو حضرتك والد زين؟
_ايوة ابني الوحيد مليش غيره.
قررت نعمات ان تطرح عليه سؤال بخصوص الاصوات التي يصدرها زين _كنت عايزة اسأل حضرتك على حاجة بخصوص زين؟
هز رأسه ثم قال لـ زين _حبيب بابا ممكن تستناني في العربية وانا هجبلك العصير واجاي.
_ماشي بس مش تتأخر.
ابتسم ثم نظر لوردة ونعمات وقال_عايزة تسألي عن الحالة اللي فيها زين.
نظر كلاهما للاخر حتى قالت وردة _حالة ايه؟
_اظن انكم ممكن تكونوا لاحظتم من كلامكم مع زين انه بيطلع اصوات غريبة من بوقه.
_اه هو كان من شوية بيعيط بس قلت يمكن حد ضايقه بالكلام بس معلقتش على الصوت.
_زين ابني مريض عنده متلازمة توليت يعني يصدر اصوات وهو بيتكلم مش بيقدر يتحكم فيها ولو حاول يمنعها بيتعب ذيادة.
اردفت نعمة بحزن _والحالة دي ملهاش علاج؟
_لاسف مفيش علاج للحالة دي وهيفضل كده طول عمره.
شعرت وردة بالاسة على حال هذا الطفل المسكين وقالت _زين طفل جميل اوي ،ربنا بحفظهولك.
_امين ،شكراً.
_على ايه بس؟
_مش لازم يكون على حاجة،عن اذنكم.
تركهم وذهب لـ زين وابتسمت نعمات وهي تقول _ايه النظام؟
لم تفهم وردة مقصدها وقالت _نظام ايه،انتِ فاهمة غلط ده واحد قابلته صدفة و…
_مبدأياً مفيش حاجة اسمها صدفة ثانية …بكره نشوف.
_________________________________
كانت تنظر حولها بضيق حاولت الجلوس على الارض لكنها غير مريحة بالنسبة لها. وقفت مرة اخرى لكن سمعت صوت سليم الجالس أرضاً ويستند بجسده على الحائط _كنت بحبها.
انتبهت له سلمى وتوقفت عن الحركة فأكمل سليم حديثه _او كنت فاكر اني بحبها.
ابتعلت سلمى الغصة في حلقها وقالت بنبرة هادئة بعض الشيء _هي مين دي؟
حول نظره لها وقال _ملك خطيبتي السابقة.
_انت كنت خاطب انت كمان؟
اكتفى بهز رأسه فقالت سلمى_وليه فركشت .
تنحنحت ثم قالت_انا اسفة لو مش عايز تقو…
_لاني كنت بني ادم سطحي باخد بالشكل زي اي شب كان بيدور على الشكل الحلو بس بعدين عرفت ان في حاجات اهم بكتير من الشكل مكنتش موجودة عندها.
تنهد بحزن وقال _ما كانش نفسي تبقا حكاية احكيها لحد غريب.
عدلت سلمى نظارتها بأصباع السبابة للخلف وقالت _نصيب زي كل حاجة بتحصل لنا وبنقول عليها نصيب.
تذكر كلام سلمى التي قالته لتو وقال _كان قصدك ايه بأنت كمان ؟انتِ كنت مخطوبة قبل كده؟
_اه ،بس مكملناش احنا كمان لان زي ما بتقول في صفات كتيرة لازم تكون في شريك الحياة وانا ملقتش صفة واحدة تخليني متمسكة بيه.
_بس معقولة ياسالم انتِ كنت مخطوبة قبل كده تلاقيه اطس في نظره يوم ما اتقدملك.
_لعلمك بقا انا نص (نصف) شباب مصر بتجري ورايا.
_اكيد سارقة منهم حاجة عشان يجروا وراك.
زفرت بضيق ولكن اردفت بتسائل _كل واحد قال حاجة التانية ميعرفهاش ليه بقا الباب ما اتفتحش زي الرواية.
سليم وهو مازال يستند على الحائط _ياختي اتوكسي أنتِ والرواية بتاعتك ده ناقص تقولي افتح ياسمسم الباب يتفتح.
لم يكمل جملته حتى سمعوا صوت الباب يُفتح من الخارج ارتسمت على ملامحها ابتسامة النصر وقف سليم وقال _اخيراً جيت ياعم حسين.
_انا شفت عربية البشمهندس ادهم راكنة برا عرفت ان حضرتك وصلت .
لاحظ سليم نظرات حسين لـ سلمى فقال _ده عم حسين رئيس العمال هنا ودي سال..سلمى السكرتيرة بتاعتي.
_______________________________
_اركب ياباشا ،اخر كرسي في الميكروباص.
صعد مراد سيارة الميكروباص ذاهباً للمنزل نظر لجوراه بعد جلوسه وجد هبة تجلس على نفس الكرسي فقال _انسة هبة؟
انتبهت له هبة الشاردة في شيء ما لتردف متسائلة _مش حضرتك اخو ندى؟
_اه ،انتِ عاملة ايه؟
_تمام الحمدلله.
ثم سمع السائق يقول لشاب _اركب في الكرسي الاخير لسه ناقص نفر .
تحولت ملامح هبة فـ هي لا تريد ان يركب بجواره شاب لاحظ مراد ذلك وتدخل سريعاً _خلاص ياسطا انا هشيل الكرسي واطلع على كده.
_تمام يادكترة .
قام بوضع حقيبة ظهره في المنتصف بينه وبينها ثم قام بأخراج هاتفه واتصل على ادهم الذي قال _عملت ايه؟
_عيب عليك كله تمام وزي ما طلبت.
_برافو عليك يا مراد ،انت فين كده؟
_انا راكب اهو ورايح البيت هستناك هناك.
_تمام.
أنهى المكالمة ونظر لـ هبة التي اخرجت سندوتش من حقيبتها لتأكله وقالت _تاخد؟
ابتسم مراد وقال _متشكر.
ثم قام بالاتصال على والدته ليقول لها _ست الكل.
اجابتها عايدة _عايز ايه؟
_انا جاي البيت وعايز اسمع الماتش.
_لأ في مسلسل هندي هيشتغل خليك بره.
_طول اليوم هندي هندي انتِ بتعبدي البقر ولا ايه يا ماما؟
_لأ بخلفهم.
تنحنح مراد وقال _طيب سلام سلام.
ونظر لـ هبة وقال _قلتِ لي بقا ده سندوتش ايه؟
__________________________________
_ياسكر يامسكر ياللي فيكي بفكر كل ما تبعد بتوحشني اكتر ياترى الحلو رايق ولا متعكر؟
اجابته علا من الناحية الاخرى على الهاتف _لأ ياخويا متعكر .
_وايه بقا معكر مزاج مراتي وام عيالي.
_مش البت ندى كانت هتعمل حاد…
سكت قليلاً وقالت بهمس _انا شكلي عكيت صح.
ليأتيها الرد من احمد _مالها ندى انا مش فاهم حاجة.
لم ترد عليه حتى سمع صوت سليم الذي يقول بضيق _ما تخلص يا عم روميوا انت والست جوليت بتاعتك.
_سلام دلوقت وهبقا اكلمك بعدين افهم ايه الموضوع.
اغلق الهاتف وقال _في ايه يا بارد؟
_وصلنا.
نظر احمد حوله وقال _وصلنا فين انت جايبنا هنا ليه؟
_ما انا مش هشرح 100 مرة قلت لك العمارة دي فيها شقة اللي اسمه انس الصاوي واصحابه بيجوله هنا وقت ما يبحوا يعملوا مزاج بس ابوه ميعرفش عنها حاجة.
_وانت عرفت المعلومات دي كلها منين؟
_مراد هو اللي جاب المعلومات دي.
_قلت لي مراد دي تلاقيها روح الظابط اللي جواه.
_طيب يلا ياروح امك.
وقف احمد عن السير وقال _استنى بس امال مراد وادهم مجوش معانا ليه؟
_لأ هما راحوا يعملوا حاجة تانية.
_واحنا هنطلع الشقة كده افرض حد معاه؟
سليم وهو كاد صبره ينفذ _لأ متقلقش مش بيبقا موجدين غير بالليل واحنا دلوقت العصر.
_طيب افرض..
قاطعه سليم وهو يقول بضيق _لأ ما افرضش وكلمة كمان هرنك علقة بدل الواد اللي فوق ده انت طلعت رغاي اكتر من خالتي اللتاتة.
صعد الاثنين للطابق الرابع وقام احمد برن جرس الباب فتح انس ليقول وهو غير منتبه _جبت المطلوب؟
ابتسم سليم وقال _جبناه وفاضل انك تستلمه.
ثم اعطاه لكمة قوية اطاحت به.
بعد قليل
شهق عندما وجد جردلاً من الماء البارد ينسكب عليه وقال وهو يحاول التنفس من المياه على وجهه_انتم مين؟
اقترب سليم وهو يحمل المياه في يده _لأ مش هنتعرف احنا ،انت شكلك لسه ما فوقتش.
_خلاص خلاص افتكرت مش انتم اللي…
احمد بمقاطعة _ايوة احنا اللي.
_انتم جايين ليه.
سليم وهو يشمر كُم قميصه _انا بقول تاخد علقة وبعدين نتكلم.
رد عليه انس بسرعة وقال _ياعم انت حمقي كده ليه ،مش انتم قلتوا يومين.
احمد _واليومين عدوا.
_ايوة والمطلوب دلوقت.
نظر احمد لـ سليم الذي قال _لأ المطلوب ده ابوك هيقول لك عليه وانت توافق وانت ساكت.
_بابا؟! وايه دخل بابا في الموضوع؟
_ازاي بس ده لازم يعرف ده هيبقا ابو العريس.
نظر لـ احمد وقال _يلا بينا.
اتجه سليم للخروج لكن توقف احمد عن السير واقترب من انس عندما رأى جميع المنكرات التي حرمها الله من مخدر”ات وخمر وغيرها فقال _مش رجولة انك تشرب مخدر”ات الرجولة ان تتاجر فيها مكسبها دهب اقسم بالله اسمع مني.
_________________________________
حلى الليل على الجميع فقد لبى الصاوي دعوة زكريا المنشاوي واتت السيدة فاطمة رغبة منه لكن ابت اسراء الذهاب وفضلت الجلوس في المنزل مع ابنة خالتها هبة.
كان الجميع يجلس في قاعة الحج زكريا والمقصود هنا بالجميع كان الجد والصاوي والسيدة فاطمة وكان أيضًا ادهم ومراد ما عدا فارس الذي ذهب عند منزل نرجس.
بالاعلى كان ينزل الدرج من شقتهم متجه للاسفل وجد احمد يخرج من شقتهم هو الاخر.
فقال احمد _يلا عشان الكل قاعد تحت.
سليم _طيب اقفل نور الشقة طالما مفيش حد.
_مفيش غير عمر جوا في الحمام بياخد دوش ومينفعش اطفي النور كله انت عارف عمر مش بيخاف غير من حاجتين _ادهم والعفاريت.
ابتسم سليم لكن اخفاها سريعاً وقال _ممكن تسبقني انت يا احمد وانا هحصلك.
_تمام بس متتأخر.
نزل احمد للاسفل وسليم دلف الى الشقة وقام برفع سِكينة الكهرباء عن الشقة.
عند عمر في المرحاض كان يغني وهو مغمغض العينين _صفر ال 100 الحالة ضانك ،صحابي فاكريني مدير بنك، قررت اني افضي التنك واثور فيكوا ،قلبي مات واخدت عزاه.
لم يكمل الغناء عندما صوت غريب يقول _البقاء لله.
فتح عمر عينيه بسرعة لكن لم يرى شيء بسبب انقطاع الكهرباء فقال بخوف _من هناك؟ ماذا تريد؟
*عمر يتحدث بالفصحي عند الخوف وعندما يريد اغاظة سليم *
سليم وهو يستخدم مكبر الصوت الذي يقوم بتغيير الاصوات _لأ اتكلم عدل ومتعجوش لسانك ده يا ابن ريهام.
كان يحاول التحرك حتى يجد الباب وقال في نفس الوقت _انت مين وعرفت اسم امي ازي ؟
_انا شهبور ابن بهبور ملك الجان.
_بربور مين؟
…لسه الحكاية مخلصتش…
فارس هيعمل ايه مع نرجس؟
مين رحمة اللي اتكلم عنها رحيم واسر ؟
وايه الحقيقة اللي مخبيها رحيم واشمعنا اسر متأكد ان زكريا المنشاوي هيصدق رحيم؟
ملك ممكن ترجع تاني لحياة سليم؟
وياترى الصاوي هيوافق على كلام الحج زكريا؟
وأخيراً سليم ناوي يعمل ايه في عمر؟
يتبع…..
لقراءة الفصل التالي : اضغط هنا
لقراءة الرواية كاملة اضغط على : (رواية صدفة أم قدر)
