رواية صاحب مفتاح الشقة الفصل الثاني 2 بقلم عمرو راشد
رواية صاحب مفتاح الشقة الجزء الثاني
رواية صاحب مفتاح الشقة البارت الثاني
رواية صاحب مفتاح الشقة الحلقة الثانية
طب ما تطلقها يا أمجد
= منال دي كنز كبير مينفعش يعدي من تحت ايدي
عشان فلوسها يعني؟
= الفلوس والشركة وحاجات كتير أوي
طب ما تفكر ازاي تاخدهم منها
= هيحصل بس كله في وقته
بس مش عايزاك تضايق نفسك،، انت امجد العطار ميهمكش اي حد
= وانتي تعرفي ان امجد العطار بيسيب حقه؟
لا طبعا
= يبقا اطمني وقريب أوي كل حاجة تخص منال هتكون تحت ايدي،، منال نفسها هتكون تحت سيطرتي
وانا معاك و جنبك وهفضل جنبك لاخر العمر
= هو دا اللي أنا عايزه بالظبط
” لما يبقا معاك ست واثقة فيك و شايفاك اعظم راجل في الدنيا يبقا لازم تحا*رب الدنيا عشانها بس تخيل بقا لو الراجل دا هو انا،، أمجد العطار
تحب اعملك المساچ اللي بتحبه؟
= انا جسمي متكسر فعلا ومحتاج استريح
طب نام و انا هريحك على الاخر
= يا بت قولتلك المساچ الاول
طب ماهو انا هعمل المساچ يا سيد الرجالة ولا انت عايز حاجة تانية؟
= هي البدلة دي قطعة واحدة ولا اتنين؟
” ردت عليا وهي بتضحك بخجل
اشمعنا؟
= عشان اعرف هتاخدي وقت قد ايه عشان تقل*عيها
” الحياه هتبقا غير عادلة تماما لو مقابلتش حد يعرف يحتويك،، الاحتواء مش كلمتين بس لا دا لمسة او حضن دافي مع نفس الكلمتين الحلوين انما هتقول كلمتين بس يبقا دا مش احتواء دا درس تنمية بشرية
انت فين يا أمجد من امبارح؟،، مبتردش عليا ليه؟
= معلش يا حبيبتي واحد صاحبي كان تعبان أوي و روحت معاه المستشفى
وهو دا سبب كافي انك متردش عليا وتتجاهل مكالماتي كأني مليش لازمة
= يا حبيبتي انا مكنتش شايف التليفون اصلا،، ربنا يبعد عنك اي حاجة وحشة اصله دخل العمليات،، كان بيعمل الزايدة
وانت فين دلوقتي يا أمجد؟
= انا معاه في المستشفى مستني يفوق
طب تخلص وتجيلي،، تجيلي يا أمجد ومتتأخرش،، وحسابنا لما ترجع
= حاضر يا حبيبتي،، أول ما هخلص هتلاقيني قدامك علطول،، مش عايزة حاجة وانا جاي؟
” مردتش عليا لانها كانت قفلت المكالمة،، ابتسمت ساعتها وانا بسند ضهري على السرير وفي نفس اللحظة كانت ناهد صحيت جنبي وقربت مني وبا*ستني من خدي وقالتلي
انت ناوي تنزل؟
= لازم ارجعلها
طب بقولك ايه؟،، ما تيجي ناخد جولة كمان
” بصتلها و ابتسمت وقولتلها
كفاية عليكي اللي حصل امبارح،، سبيني انزل بقا
” قومت دخلت خدت دش وخرجت لبست هدومي ووقفت قدام المرايا بظبط شعري
طب انت فكرت هتعمل معاها ايه؟
= الصبر يا ناهد،، كل حاجة في معادها
طب خلي بالك من نفسك
= خلي أنتي بالك من نفسك
يوه نسيت دا انا معايا سيد الرجالة ميتخافش عليه
” لقيتها قامت من على السرير وقربت مني و دخلت في حضني وكملت كلامها
بس انا بخاف عليك يا أمجد
= بس انا مش اي حد
عارفة وهو دا اللي بيخليني اقلق اكتر
= المفروض تطمني وعموما اطمني انا تمام وهفضل تمام متقلقيش عليا،، خلي بالك من نفسك وأنا هبقا اكلمك
” نزلت من عندها و ركبت العربية و رجعت البيت،، اول ما رجعت دخلت الشقة لقيتها قاعدة في الصالة وبتتفرج على التليفزيون واول ما شافتني وشها كله اتقلب وقامت وقفت
اهلا يا بيه،، طب مش كنت تقول انك جاي على الاقل كنا نفرش الارض ورد،، كنت فين يا أمجد؟
= تاني يا حبيبتي ما انا قولتلك كنت مع صاحبي في المستشفى
انت فاكرني عبيطة هصدق الكلام دا؟،، قولي كنت فين بهدوء كدا بدل ما تشوف مني اللي عمرك ما شوفته
= الصراحة انا كدبت بس انتي السبب على فكرة،، انتي اللي فضلتي تضغطي عليا وتقوليلي روح خلي امك تعتذرلي،، انا مقدرش اروح اقول ل امي كدا،، عايزاها تشوفني ايه؟،، بلاش دي،، عايزاها تغضب عليا؟،، انتي متعرفيش غضب الام بيكون عامل ازاي؟
” ردت عليا وهي رافعة حاجبها
امممم عامل ازاي
= بيكون قاسي اوي على الابن،، ربنا بيغضب عليكي وانا مش قد غضب ربنا،، عشان كدا يا حبيبتي انا اسف،، انا بتأسفلك مكانها،، انا اسف و اوعدك انها متكررش تاني
هعديها بس بمزاجي،، فاهمني يا أمجد،، بمزاجي
= ربنا يخليكي ليا يا حبيبتي
طب جهز نفسك بقا عشان ماما مستنيانا
= ماما مين؟
” ردت بنبرة حادة
ماما يا أمجد،، نسيتها ولا ايه؟
= لا يا حبيبتي طبعا مقدرش انساها
كويس،، جهز نفسك عشان نروح نفطر عندها
= هو لازم النهاردة يعني؟
اه لازم يا أمجد وكفاية أوي اني كنت مكسوفة امبارح وانا بعتذرلها،، هتيجي معايا ولا اروح لوحدي؟
= لا طبعا يا حبيبتي جاي معاكي،، هو أنا هسيبك يعني تروحي لوحدك؟
تمام انا هدخل اغير هدومي
” دخلت اوضتها و قفلت الباب وراها بقوة وانا قعدت على الكنبة واتفرجت على التليفزيون لحد ما هي تخرج،، عدت نص ساعة وبعدها منال خرجت وانا دخلت بعدها اغير هدومي ولما خلصت خدتها ونزلت ركبت العربية و روحنا عند حماتي،، الجو كان لطيف إلى حد ما ولكن المشكلة كانت لما قعدنا عشان ناكل،، كنا قاعدين انا وهي وامها واختها هالة وجوزها صلاح،، بس الغريب ان صلاح مهتمش بالطبق بتاع مراته قد ما اهتم بالطبق بتاع مراتي،، وفعلا هو قام وقف وبدأ يشيل شوية من كل صنف و يحطه في طبق منال اللي كانت مبتسمة و قابلة الموضوع،، ساعتها انا متكلمتش ووسط ما احنا بناكل عزمت عليها ب صنف من اللي كان قدامي
اتفضلي يا حبيبتي
” بس المشكلة أنها رجعته عندي تاني وقالتلي
شكرا مش عايزة
” ساعتها انا بدأت اعزم عليها من تاني
شكرا يا أمجد،، انا باكل
= عشان خاطري دي بس
” لكن لقيت عينها برقت وقالتلي بصوت واطي
قولتلك مش عايزة،، انت ايه مبتفهمش
#بقلم : #عمرو راشد
” سكت وبصيت في الطبق بتاعي تاني ولكن قبلها لمحت صلاح وهو بيضحك بطريقة خبيثة،، ساعتها اخدت نفس عميق وحاولت مبينش اي رد فعل لحد ما خلصنا اكل وقومت انا قعدت في البلكونة لوحدي،، بعد شوية لقيت امها داخلة عليا وهي ماسكة الشاي ومدت ايدها وقالتلي
متزعلش من منال،، دي طيبة بس هي عصبية شوية
= منال انا اشيلها جوا عنيا متقلقيش
انا مش قلقانة طول ما هي معاك
= كتر خيرك يا حماتي
دا انت اللي كتر خيرك ياابني،، تاعبينك معانا في الشغل
= الحمدلله مفيش تعب ولا حاجة
طب تعالى اقعد معانا برا بقا
“من الغباء انك تعرف عدوك فين وتبعد عنه بالعكس دا انت لازم تقرب منه وتفرض كل فروض الولاء والطاعة ومش بس كدا دا انت كمان تعرف تحقق من وراه هدفك ولما هدفك يتحقق ويخلص ساعتها مينفعش تبعد عنه عشان هتكون اتكشفت قدامه خلاص ف الاحسن انك تنهي حياته قبل ما هو ينهي حياتك
لسة كنت بقول ل امجد انه شايل الشغل على كتفه
” رد عليها صلاح جوز اخت اخت منال
وهو كان يحلم يشتغل شغل زي دا ولا يقبض ربع المرتب دا؟،، احمد ربنا يااخي
= والله يا اخ صلاح انا اتعلمت و اهلي صرفو على تعليمي كويس أوي عشان اعرف اشتغل الشغل دا واقبض المرتب دا،، على عكس ناس تانية معاها دبلوم ومش ثابتة على شغل،، متنقلة كل شوية عاملة بالظبط زي الحمار،، معلش في اللفظ يعني،، الحمار ساعات يشيل طوب،، اسمنت،، برسيم،، انما يشيل دهب لا ميقدرش ولا ينفع اساسا،، سمعة الدهب هتبوظ ساعتها
= قصدك ايه بالكلام دا يا أمجد؟
دا مثال يا صلاح،، مثال عادي مش شرط كل حاجة تاخدها على نفسك يااخي
” ام منال بدأت تضحك عشان الموضوع يعدي وتحديدا هما كلهم كانو بيضحكو باستثناء صلاح اللي كانت لسة نظراته الخبيثة مراقباني طول ما انا موجود ولحد ما مشيت،، لما وصلنا البيت لقيت جولة تانية من الخناق
ايه اللي انت عملته مع صلاح دا؟
= عملت ايه؟،، انا كنت بهزر معاه
انت مخدتش بالك انك احرجته جدا و احرجت مراته
= يا حبيبتي انا كنت بهزر و بعدين هو كمان غلطان بيتدخل في حاجة هو ملوش فيها
حتى لو مينفعش خالص اللي انت عملته
= حاضر يا حبيبتي المهم عايزك تهدي
انا هادية،، هادية جدا
= ربنا يهديكي أكتر وأكتر
ربنا يصبرني عليك
” التظاهر بالغباء هو اذكى حل ممكن تستخدمه عشان تهرب بيه من أي مشكلة تقابلك،، غباء مصبوغ ب طيبة وضعف،، وخصوصا لو هتعملهم عشان ترضي غرور واحدة زي منال،، هو دا الحل الامثل بل الاذكى
يلا يا أمجد عشان تصلي الجمعة
= حاضر يا حبيبتي،، انا صاحي اصلا من بدري
طب يلا قوم البس عشان تنزل تصلي
” قومت بالفعل لبست الجلابية البيضا مع طاقيه بنفس اللون و مسكت السبحة في ايدي وعطرت نفسي
متتأخرش
= احتمال اقعد مع واحد صاحبي بعد الصلاه بس متقلقيش مش هتأخر
المهم لما اتصل ترد،، فاهمني؟
= حاضر يا حبيبتي
” نزلت صليت وبعد ما خلصت ركبت العربية ومشيت،، كل فترة ببقا محتاج حالة من الهدوء،، استرخاء وسلام نفسي مش هعرف الاقيه غير عند واحد بس،، وصلت المكان اللي انا عايزه ونزلت من العربية جيبت فاكهة كتير وخضار و طلعت الشقة فتحت الباب و دخلت
السلام عليكم ورحمه الله وبركاته
” ثواني ولقيتها خرجت من جوا،، وشها ابيض وطالع منه النور ، اسم على مسمى فعلا.. نورا
امجد انت جيت؟
” ابتسمت في وشها الجميل وقولت
ايوا جيت
” بصت للحاجات اللي كانت في ايدي وقالتلي وهي مبتسمة
ايه دا كله؟
= دي حاجات بسيطة جبتها من عند سيدنا الحسين
يا بركة الله،، انت كنت بتصلي هناك النهاردة؟
= ايوا ودعيتلك كتير أوي
ربنا يتقبل منك يارب يا أمجد
= المهم انتي طمنيني على أحوالك؟
انا بخير الحمدلله مش ناقصني غير وجودك
= دايما يارب تكوني بخير،، انا كمان والله يا حبيبتي مش ناقصني شئ في الدنيا غير وجودك جنبي بس هنعمل ايه بقا دا شغل
مينفعش حتى تخليهم يومين في الأسبوع على الاقل اقعد معاك اكتر
= الرزق مش هيستناني يا نورا،، دي تجارة مع الله،، انتي عايزاني مروحش الشغل و أقطع عيش الناس الغلابة اللي معايا
لا طبعا ميرضنيش
= ربنا هيجازينا خير ان شاء الله على اللي بنعمله بس انتي دعواتك معانا
بدعيلك والله في كل صلاه ومع كل اذان يا امجد،، ربنا يخليك ليا يا حبيبي
= طب ايه يا ست البنات مش هناكل حاجة من ايدك الحلوة؟
ايه دا يا امجد انت نسيت ولا ايه؟،، احنا صايمين
= يا الف نهار ابيض،، تصدقي كنت نسيت فعلا،، الشغل واخد عقلي كله والله بس الحمدلله طالما بنرضي ربنا يبقا نستحمل أي حاجة
طب انا هقوم احضر الفطار بقا
= براحتك خالص وانا كمان هدخل اصلي
هتصلي ايه؟،، لسة العصر مأذنش
= هصلي ركعتين شكر لله بركة اني شوفتك وقعدت معاكي،، انا طول الاسبوع بدعي ربنا ليل ونهار ان الايام تجري بسرعة عشان يوم الجمعة ييجي واشوفك
= طب ايه رأيك لو نخلي كلام الغزل دا بعد الفطار احسن؟
نخليه طبعا يا ست البنات
” نورا دخلت جوا تحضر الفطار وأنا كمان دخلت الأوضة على اعتبار اني هصلي ولكن أنا فتحت تليفوني واتصلت ب منال
خير يا أمجد؟
= خير يا حبيبتي،، انا بس حبيت اني هفطر برا النهاردة
عند امك؟
= لا دي عزومة واحد صاحبي عاملها بتاعت كل سنة دي مانتي عارفاها
وهتخلص امتا؟
= لسة مش عارف بس عموما انا مش هتأخر
براحتك خالص يا أمجد
= مش عايزة حاجة وانا جاي؟
” السكة اتقفلت،، بعد شوية خرجت وفضلت قاعد مع نورا نتكلم لحد ما جه معاد الفطار وقعدنا ناكل،، بعدها مقعدتش كتير عشان كان لازم امشي
استودعك الله يا نورا
= كان المفروض تبات معايا النهاردة يا أمجد
اعمل ايه بقا؟،، الرزق بينادي و انا لازم اروح
= طب هترجع امتى؟
الله اعلى واعلم
= ربنا يحفظك ليا يا حبيبي
” جميل انك تلاقي حد نقي ونضيف من جواه،، لسة ابيض كأنه مولود امبارح،، بس تفتكر بقا الدنيا هتحافظ عليه لحد امتى؟،، بعد الهدوء اللي كنت فيه دا محتاج ارجع افوق تاني،، وعشان كدا اتجهت بالعربية على شقة ناهد،، فتحت الباب و دخلت لقيتها قاعدة في الصالة ولابسة قميص نوم قصير لونه اسود،، اول ما شافتني قامت وجات لحد عندي
اهلا بالمعلم أمجد العطار سيدي وتاج راسي،، كنت حاسة انك جاي النهاردة
= قلبك كبير يا ناهد
قلبي بس؟
= هو في حاجة تانية؟
لا انت كدا محتاج تكشف عليا عشان تتأكد بنفسك
= كشف طبيعي؟
تؤ قيصري
” بعدها ضحكت ضحكة خليعة وهي لسة بتقرب مني
طب اسمعيني بس الاول،، انا محتاجك تنفذي اللي اتفقنا عليه
= وهو احنا اتفقنا على ايه؟
شكلك هتتعبيني يا ناهد،، انا عايزك فايقة معايا
= فايقة وسامعاك
أنتي هتظهري في حياه منال
= لا دا الكلام كبير أوي كدا،، منال مراتك؟
منال مراتي!!
يتبع….
لقراءة الفصل التالي : اضغط هنا
لقراءة الرواية كاملة اضغط على : (رواية صاحب مفتاح الشقة)
